Thinlung Chapter-25

[Kimkimi tlau]

Dam chuan ni hi aral zung zung a, Christmass pawh nuam tak leh hlim takin kan hmanga, ṭhiante nen 24 zanah Ar te kang ve in U Mafela nena kan christmass hman dun hmasak ber ani bawk a, chhungkuain buaina tawk mahila kum dang zawng zawng aiin ka hmang nuam a, ka ipik lutuk tur pawh azia deuh. Kohhran programe atam a, Christmass dawn hnaihah phei kha chuan zan inkhawm kan awl tawhlo a, hritlang chung chungin ka inkhawm ve vek zel; Dam loh deuh pawn Doctor bialpa neih chu athlamuan thlaka, Damdawi eitur min hrilhin min ngaihven em em a, keilah hian Damdawi ei hi kalo hreh ve tum hrang a, ka haihawt bawk nen ei loh mai ka chin avangin ahun chat chatah ka ei theih nan msg leh call in min vil renga, min ngaihsak lutuk te chuan minti pangchang zo vek lo chauh ani.


Kohhran programe atam miau avangin in ah ka awm tam hmanlo a, Worship committe lamin Zai hruaituah te minlo ruat ve avangin inkhawm tur pawn mite aiin ka kal hma ṭhin a, Inkhawm ban hnuah Zaikhawm alo awm veleh zel bawk nen kan in ah chuan chaw ka ei hman ṭawk hi animai; Zai hruaia kan din chhuah chang hian U Mafela alungawi lo ziah a, 'Khapa khan a din hnaih lutuk che, hla kha ahar pawh anilo hla thu en kher kha angailo' ati ziah zela, Hla chang ka sawi pawn ka dinpuipa in minlo hnaih lutuk loh nan ka inveng tluan ṭhak zela, Angaihi'n min eilo dun lutuk a, Hmai chhanah 'Doctor vesi i over ve mah mah ani, duh leh insi thlawp pawn ding ang hmiang, Kohhran mipui hmaah an che khawlo ngamlo hrim hrim, i bialnu rinawmzia te hi i hrelo der zawk nge mawni' Tiin U Mafela a ankhum zeka, U Mafela lahin 'I thulo, engmah sawi vesuh' ati hmaka, khata ṭang khan an inhmuh apiangin an inhnial ngei ngei zel.


Tuk khat kan buai chiam tih loh kha chu kan chhungkua pawh kan buai leh ta rihlo a, U Faki rai thu pawh hria chu awm nual tawh mahse, Christmass lai ani rih a, tute mai pawh an buai lai ani a, an pianthar thla leh lamtual an mawi hunlai anih avangin sawi darh em em anla awmlo a. U Faki nise ahman apiang in a inkhawm ve ziaha, tute mitmei mah a venglo niin kahria, Naute pa pawh ala sawi duhlo cheu a, a mize pawisak neilo ṭhin lutuk kha ka ngei lek lek chang a awm a; mahse, tunah hian alo ṭangkai zia ka hria, hetiang mizia hi neilo se tunah hian paukhauh takin a awm thei dawnlo a, amah hian a chhiat phah dawn tih achiang a. Mahni tihsual pawm a, a mualpho ngam hi ka chhuang ani; sawn apai hi aṭha ka tihna lam erawh anilo a, thil chu athleng tawha siamṭhat theih anih tawh loh hnuah huaisen taka a tihsual rah lo lang chhuak apawm ngam hi a fakawm ve thlawt, Hmeichhe dangte hi chu anti sual a, nuam an chen a, an nawmchen rah lo lang pawh pawm leh ngam silo in an ti tla a, an nun chhung ṭawp tak thup nan kohhran an bel a, kalo sawi ve tur chu a awmlo na in piangthar ṭha tak ti a sawitur ka ni silo a, an nun lem lutuk hriat ve kur takah chuan an bula awmte leh rawngbawl ho te hi a har kati.


31 ah chuan tlaiah U Mafela nen kan leng a, kan in ngaihzawn tirh aṭangin hetiang hian kanla leng chhuak ngailo a, kan hlim dun ve khawp mai. Insi rial chunga Ni tla tur thlir dun te kha anuam a, kala tawn ngai reng reng loh hlimna in minlo fan chiai chiai a, Mipa pakhat avangin heti tak hian ka famkim thei ang tih ka inring ngailo.

Zanah pawh kan tlaivar ve a, Zaikhawm hruaitu in ṭawngṭairual arawt a, ṭawngṭai thupui a sawi diat diat a, "Kum hluia kan thil tihsual zawng zawngte avangin ngaihdam kan dil anga" atih chuan ka bula ṭhu Angaihi'n "Ngaihdam dil leh hni hne turin thil ka tisual lo " alo ti sur sura, ala nui vur vur zui, henu em em hi chu abuaithlak kati.


Hunpui boruak kan pel a, Kum thar dam taka chuangkaiin tunah chuan mahni hna ṭheuh kan thawk leh ṭan a, keipawh ka buai veleh ṭan khawp mai. Ka hna ngai bawk insuk chu kaṭan leh a, keini tan chuan kum pawh thar se kan thil tih ṭhin hi adanglam chuanglo a, Kum tharah pawh kan insu leh turh turh tho. Christmass leh kumthar vuak vetah mitin kan buaia inkhawm angai vereng bawk nen mite pawn thawmhnaw bal an ngah tlang aniang, in suk tur ka hmu ve zut a, nitin ka insu a, a zawna karkhat ngawt ka insuk hnuah phei chuan ka kut a pilh niai tawh, pawisa pawh ka khawl ve nual hman a, ka kut pilh chu athlawn lo tih kahria a, ana pawh kati vaklo.

U Mafela hian min khawngaih ṭhin a 'Insu tawhlo mairawh' ati fo a, kei lahin "Ka insuk loh te chuan pawisa ka nei dawnlo asin" kati ve thunga, Lungawi lo thinrim ngam chuang silo hian a awm ṭhin a, akhawngaih thlak zawk. ka pasal ala nih miau loh avangin min puih atum te hian ka duh ngailo a, In ngaihzawn lai aṭanga in chawm tirte chu katum teuhlo mai. Ka kut pilh ahmuh aṭangin inneih a sawi ri tam leh sawta, kalo tiam tawh angin keipawn kapa sawipui chu sawipui katum ruh ve lutuk; Mahse, mahni pa te bula chutiang sawi chu ka tim deuha, nilengin sawi duh sawi ngam silo in kapa bulah ka awma, a khat tawkin thawpui kala leh halh zel.


" Pa, sawitur kanei a " Sitting room ah kanu nen an awm a, ka huaisenna zawng zawng sawmkhawm takmeuhin ka sawi chhuak ani, ka tha te hi a khur ru dar dara, kapa lah chuan a phone en lai dah meuhin min en kara, min zirchiang aniang. " Enge ni sawita che " Dam thlap in ati a, 'Angai leh lo mai ' ti a kalsawn daih ka chakzia chu pui tak ani; Mahse, ka mitthla ah U Mafela alo lang a, amah avang tal pawn kasawi tur ani tiin ka infuih a, mahni leh mahni chu infuih huaisen ahar khawp mai.


" U Mafela nen kan chungchang ania..englo" tiin ka ngawi data, sawi zawm nghal chu duh mahila ka dang hi a awk deuh tlata, ka sawi chhunzawm maitheilo. ka thusawi vang chu nge Kanu phone enlai pawh chu alo hawichhuaka, an pahnih chuan min endun kar bawk si 'hawisawn teh u' tih mai ka chaka, ka ṭah khum lo chauh tawh ani.

" U Mafela'n inneih aduh thu asawi a, In rem tih chuan Palai lo tirh a duha " Kati chhuak phawnga, hei aia ṭha leh pangngai zawka sawi chu duh mahila ka ngaihtuah chhuak zo lo a, Hmeichhe dangte hian pasal anneih duh thute hi engtin nge an chhungte hnenah an sawi ve ṭhin le, U Mafela'n 'I pa chu keiman ka be dawn emni? Atih laia kalo hnialte kha tunah chuan ka in chhir vawng vawng tawh.

" Chulam daih chu maw.. thil lawmawm anihchu" Kapa chu anui vur vura, tlem chuan ka awm pawh anuam ta deuh e, " Keichu ka duhlo " Kanu'n alo ti ve hmaka, "Engvang chuan maw " Kapa'n atih chuan "Zothani'n min hmuhsit zia hi inhrelo anih hi, Lalnunkimi pawh bansan turin ka hrilh zing lutuk che, min hmusit em em tute nena inzawm ka duh reng renglo " Ati bawrh bawrha, a aw pawh a dim vaklo. " A hmeichhe thil lutuk ṭhin, thu lawmawm sawi dawn laiin thil ho mai mai hi lo sawi ṭhin suh, engtin pawn minlo hmusit se enge pawi, an fapa in kan fanu aduh miau a, ani pawn sawitheih anei chuang nang " Kapa'n ati duah a, Atira ka hahdam hman tehlul nen ka hlauthawng zo leh vek tawh.


" Mafela pawh Nurse nu nen an sawi zawm renga, lo innei ta pawh nise aler lovang tih ahriat hleinem, inneih chu ka rem tilo " Ati leh bura Kapa chuan thaw pui ala haka, "Thil la thleng lo vanga buai chiam hi aho tih i hria em? Ka fanu bialpa hi ka zirchiang lo emaw ti reng reng suh, nang aiin ka chik in ka zirchiang nasa ang, mipa kani a, a zawng zawngin hrelo mahila ka mipatpui rilru chu ka hrethiam ve a, Mafela'n ka fanu a en dan hi mipa in kan hmeichhe hmangaihte kan en ṭhin dan ani, chuvang chuan keichuan a rem loh na ka hrelo. Matei pawh pasal neilo rual anilo a, ahmabak ani bawk, la inkawp reilo mahse, rei tak in kawp kher hi nupa kar nghehna pawh ani hranlo, 'Zothani asual' 'kan chhungkua min hmusit' tih vel kha chu khel chiam chiam angailo, min hmusit anih leh kan hmuhsitawm animai" Tiin kanu chu a en kalh a, kanu erawh athinrim belh sawt tih ahriat a, a mitmeng te chu a sen ram thei.


" Inneih pawh an inneih hma aṭanga hmeichhe dang nena sawi kai hat thei hi pasal rinawm tak anih ka ring neklo e, Zothani'n mo atan a pawmlo a, Ka thu pawisa lova inti lui anih chuan ahreawm tur chu Kimi tho ani, Pasal rinawmlo anei anga, A pasal nu lah hrawn anuam dawn heklo, nangni aiin thil hi ka thlir thui daih zawk " Ati tawn tawna, athilsawi chu amak kati, U Mafela angai rinawmlo nghal ringawt chu thuhran thil thleng miahlo thleng mek anga asawi thei maite chuan minti buai lek lek a, kanu thilsawi teh nuai hi ka hrethiamlo.

" Kan rinawm loh chuan midangte pawh hi rinawm lo ve turah kan ngai vek ṭhin alawm, i thilsawi te hian awmzia aneilo ania, Hmeichhia nen sawi an kai tih mai maia in nghat rual pawh ini tawhlo, A neitu tur berin 'ka thei ang' atih chuan kan ringtawk maitur ani, Zothani pawh nu sual tak ani hleinem, tawhkhirh vedeuh mahse, Matei'n ṭhat achhuah tlat chuan nem hun anei em em ang " Dam dapin kapa'n ati leh a, atirlama athilsawi chu ka ngaihtuah zui a, ka ngaihtuah mek laiin "Ka rinawm loh avanga midang pawh ring zo lo ang ah min ngai emni? " Kanu chuan ati ta chiah a, "I ngaih ngaihin ngai maiteh " Dawhthei lo zetin kapa chuan ati tawh a, a ṭhutna aṭanga tho vutin " Mate, room lamah kan sawi ṭha dawn mi? " tih leh kalsawn aruala, pen hnih vel bak a pensawn hmanlo tih ah kanu chuan" Tualthattu fanu chu Zothani chuan a mo atan apawm theilo aniang, a sawikual nasat kha " Ati a, a sawi zawh rual chuan ka khawng nghal awt a, kapa pen lai pawh atawp chat a, ka thinphu rang lutuk chuan ka awm chhung ati na lek lek ani.


" Khatiang thu i hriat kher ka duh loh avangin thildang kasawi a, i luhlul lutuk avangin thu hriat nuamlo tak i ngaihthlak angaih phah anih hi " Kan ngawih tlawk tlawk laiin inla pawisawilo zet hian kanu chuan ati leh a, a aw rikdan zang vah aṭang chuan hahdam huai hi a ang ber. "Thu diklo a sawi chuang hleinem, thudik ani a, han buai chiam chhan tur a awmlo " Kan lam lo hawi leh pahin Ka beisei loh dan deuhin kapa chuan ati a, " Ma..maw! I rilru ana miah nange, hetiang khawpa min hmusittu te chhungkua ah engvangin nge kan fanu hi kan kaltir ang" Kanu chuan ati bah deuh nawk nawka, " Thudik lo an sawi emni? Zothani chuan amah a inti mualpho mai mai tih a in hrelo anihchu, A fapa in kan fanu neih atum miau chuan aduh loh leh a sawichhiat fo chu afa mo animai dawna, miin an hmusit let zawk daih dawn tihna animai " Kapa chu anui suk a, minlo en in "Nidangah kan sawi ṭha dawnnia, i nu hi abuaithlak emai" ati leh a, hahdam deuh angin alang bawk, kei erawh ka ṭah achhuak et et thung a, ka hrawk pawh a thip hlur tawh. Kapa mit a natna te lungngaihna leh tuarna hreawm tihna lo lang chhuak zut zut kha reilo viau mahse, ka hmu hmana, kapa ka khawngaihna leh Pi Zothani ka huat zia chu pui tak ani.


" I bialpa nu in khatiang khan mi bulah asawi a, thu diklo chu asawi hauhlo; mahse, i pa an hmusit ngawih ngawih anihkha, chuti chung chuan Remruatfela chu ila nei lui tho dawn emni? I pa tuarna te hreawm tihna te kha i haider sak dawn maw! " Kanu chu ka hmaah ading a, a kut pahniha akawng dawmin min en rana, kei erawh ka ngawi ran thung. Enge kasawi ve anga, enge ka tih ang tih pawh ka hre chuanglo, ka buai nuai a, ka mang vek niin kahria.


Zanah pawh chuan ka muhil theilo a, U Mafela pawh ka be rei peih chuanglo, hma deuhah ka chauh chhuanlamin mut kaduh thu kasawi a, tui taka mu tura min thlahna chu seen tawh lovin ka offline san a, ka phone chu ka flight mode nghal daih bawk. ka rilru buai nuai nuai chu duh lovin mutthilh katum a; mahse, kamit ka chhin apianga ka mitthla a kapa leh U Mafela an inlan chhawk zut zut avangin ka harh tulh tulh a, ngaihtuah ber tur hre lovin kamu meng kara, tuna tan chuan au chiam chiam tluka chak ka neilo, chutianga kati anih chuan ka tawt lutuk hi azia deuh karing.


Mu theilo a ka in leh kual sek lai chuan room pawn lamah thawm ka hre zeuh zeuha, ka beng ka dawh uluk deuh lahin thawm chu areh leh daih lawia, ka bengchhe ri mai mai anih ka rin laiin thawm chu na lo te hian alo awm leh ṭhin bawk si, muttheih loh nen ka thin arim deuh ṭun a, hlauh lam alang lo hrim hrim. Ka khum chu thawhsanin chapal pawh bunlo chuan kelawngin kawngkhar lam chu kapan a, kawngka ka hawn dawn chuan ka in ngaihtuah chianga 'Thlahrang ani mai angem' tih chu ka ngaihtuaha, kawngka hawnna ka vawn zet tawh chu ka thlah leh rih a; mahse, helai thleng ka kal tawha, engpawh nise ka fiah tur ani tiin kawngka chu dimte hian ka hawnga, chhuah pawh chhuak mai ngam rih lovin kalu chiah chu ka rawlh chhuaka, thawm awmna chu ṭhutkhawmna lam niin kahria.

Room aṭang chuan ka chhuak ṭhem ṭhem a, dimte a kal hlekin Ṭhutkhawmna lam chu kava thlek zeuh a, ka thil hmuh erawh chuan min ṭhawng hle a, ka mittui ahnai nghal kuar bawk. Kapa chu ṭhutthleng seiah alo ṭhu kun lap a, kanu thusawi kha palzam tak angin alang na a, a rilru a hreawm tih chu ahriat ngawih ngawiha, Kapa rilru na indawmkun lai thlir chu anuam hauhlo. Ka mittui chu ka biangah alo luang thla a, hetia kapa awm chhan hi keimah vang anihna chin a awm a, hreawm kati takzet.


Kum 10 dawn liamta ah khan kapa'n tihpalh thil in Kani fapa chu akap hlum a, Ngaihtuah pawh kan ngaihtuah ngai loh, mangchhia atan pawha kan duh ngai reng reng loh turin ataka min han deng kha arapthlak lutuka, kan chhungkua phei chu min nghawng hle nghe nghe. Kani fapa a kah hlum lai khan kapa khan zu arui lo a, thil thleng khan a nghawng bawk nen thla3 chuang chu mumal aneilo hrim hrim. A sarhu lai phei chuan mi zawng zawng titi lailum kan luah a, keipawh kapa ang chiahin thil thleng khan ka rilru a nghawng a, mite hian min nuihzat leh min diriam tlata hriatna ka neih avangin kawtlaiah pawh ka chhuak ngam ngailo a, Ka ṭhiante hi chu awmlo se aṭha zawngin khawvel hi ka hmachhawn lo anga keima insiamchawp tan in ah khan kala tan reng karing.

Kum a ral vezel a, mite pawn thil thleng chu an sawi ngai ta vaklo a, akhat tawka sawi erawh an awm reng thung, Keini chhungkaw tan erawh mangchhia ani a, kan thinlung kil khatah a cham renga, eng emaw hlekah kan hlauthawng hma a, kan ralṭi ngawih ngawih mai ani. Kani khan kapa chu angaidam a, chhungkhat kannih miau avangin thubuai siam anilo a; Kani chuan atirah tuarin kapa chu be duhlo mahse, hun akal tam deuh hnuah chuan rin aiin atuar thiama, kapa erawh zu ah aṭuan a, harhfima khawvel hmachhawn kha azuam ngailo, aṭha tilo mahila kan sawisel ngailo a, mangchhia avanga zan mutṭhat loh pawh angah ṭhin.

Heng thil thlengte avang hi ania keini chhungkua chu kan inlakhran tak em em, kapu te kan tlawh khata, Papuia te pawh chuti tho. anni chuan kapa hi an fapa, an unaupa leh an thisenzawm anih avangin huatna annei lo a, kan inthlahrung lutuk hi an mahni hian hreawm anlo ti ve hial zawk a, min lo len chilh chang lah atam. Kapa hian Kani hi a hmu hreh ngawih ngawih a, phone a kani in alo biakte kan in a alo len te hian a inthlahrung ṭhin a, keimahni hian fuih in ṭanpui hle lo ila chuan tun thleng hian ala inlakhran karing. Kan chhungte hi kan pawh duhlo ani hranlo a, Patea leh Papuia te kapu leh pi te kani te chhungkua hi chu sawiselna tur an awm loh laiin Patea Nupui leh Papuia nupuite hian ṭawngkam ngeiawm leh mei nei deuha min ṭawngkhum an hrat avang hian mahni intih hreawm reng chu tiin kan tlawh pawh zen zen duh talo mai zawk ani, An fate lah abik in hmeichhe lampang hian min hmu mawh zual a, 'Kapa'n engmah a tisual velo hi chu kavan lawm tak' mintih khum chang annei fo a, chiang takin sawilo mahse, an thilsawi awmzia kahre chianga, thudik mah nise dam taka palzam ahar kati ṭhin a, vawikhat phei chu Patea fanu nen kan insial a, khata ṭang khan chhungkaw inhmuhkhawm emaw chaw eikhawm changte hian ka tel tawh ngailo a, U Rci te hi fel viau lo phei sela chuan kapu te in ah pawh kan kal ngai lovang.


Room a ka let leh hnuah chuan ahma aiin ka awmdan ahreawm zuala, ka ṭah chhuak lutuk chu ka insum thei hlawllo a, ka lukhamah ka hmai phumin ka ṭap khur dar dara, Kapa ka lainat na chuan min fan chhuak a, U Mafela kalsan lah ka zuam silo, in hauh vang pawh nilo a inṭhen chu ka duhlo a, chutih laiin A-nu vangin kapa rilru ana thar leh mek chu ani si, ka rilru abuai takzet ani.


Ka meng tlaivar ta ṭhaka, ka ṭah chiam avangin ka mit lah chu abui chuk a, muhil ngat ila chuan hei ai hian a bui nasat zawk karing. Ka let ka let a, ka pang akham zung zunga, mutthilh ka tum poh leh ka harh tulh tulha, zan lah arei ropui si, ka lukham bula ka phone chu ka khawih leh ta nge nge a, offline games ka neih ho chu khel kualin ka tui thei tak tak chuanglo a; mahse, hun erawh ka khawhral tam vedeuh aniang game khel peihlo a ka phone ka dah leh meuh chuan khua alo eng ṭan tawha, ka thaw huai mai. Sana ka en a, Dar5 vel chiah chiah ani a, mu peih tawh lovin ka tho a, ka thawmhnaw chu thlakin room aṭangin ka chhuak a, zing boruak ṭha hi hip ila ka taksa sawizawi bawk ila ka ipik lutuk te pawh hi azia karing ani.

Kawngka chu thawm neilo thei ang berin ka hawng a, ka chhuah hnuah nam khar leh in kawng dungah chuan zawi muangin ka kal a, ka kut te chu vaikual in am zetin boruak ka hip lut pah a, January thla laihawl vel chiah ala ni bawka ala vawt khawp mai. Rei vaklo ke a kakal hnuah zawimuangin ka tlan a, ka thaw khu hlat hlat chu ka lawm leh tlata, ṭullo ah ka thaw chhuak vak vaka, min hmutu awmse mak minti ve ngawt ang.

Kan tetlai kha chuan hetia kan thaw khu hlat hlat zel hi 'Ka ka chhungah meizial khu a awm' kanti a, Kan korean film en ṭhin a achangtute thaw khu hlat hlat kan hmuh avangin thlasika kan thaw alo khuk ve chang te khan korean ni ve ta ang hial a in ngaiin kan lawm ve ṭhin hle anihkha. Panlai nun bawkin ani lung ti leng leh ni, Tun a ngaihtuah let chuan aho viau a; mahse, a hunlai kha chuan engdang ngaihtuah lo a kan hlimpui kha ani a, ahunlai anih avangin aho kanti ngailo bawk.


Thil chu a hunlai te te hi alo awm a, ahunlai a kan thil duh leh hlut tak te pawh a hunlai apelh hnuah chuan kan hlut tawh ngailo. vawiin a kan nuihpui chiam hi naktukah chuan ngaihtuah let mahila kan nuihpui kher tawh ngailo a, vawiina kan natpui ngawih ngawih te pawh naktukah chuan kan ngaihdan adanglam leh daih tawh ang. Kan na anih chuan ahunlai hian na mai ila, kan chunga thil thleng engpawh hi lawm taka kan pawm theilo anih pawn lungawi taka lo dawnsawn mai hi aṭha a. Vuina tur zawnga dem tur kan zawnkual avang hian harsatna leh manganna te hian min kiansan phah lo a, kan chunga thleng tur kan kawnga awm chu hel na leh tlanchhiatna a awm chuanglo, chhel taka awm a, lungawi taka lo dawnsawn mai hi buaina chinfel dan ṭha ber chu ani.


In a ka tlan thlen leh meuh chuan alo tlai duai tawh a, Mampuia'n Duati lo pua in, in bul velah chuan alo tei pui a, Duati pawn nuam ati ngang mai, a rak ve ruai ruai a, Mampuia lahin eng eng emaw asawi pui ve a, rin aiin naute chhawnchhaih athiam daih. "Duati, A Patea nen kawtlaiah in leng ami? " Ka tlan hah deuh vanga thaw halh halh chungin Duati chu ka bia a, Thlasik ala tawp loh avangin tlan chiam mahila thlan atla tak tak theilo a, hah chu ka hah khawp mai. " I va tho zing ve, i mit chu abui deuhin kahria, i ṭap ami?" Chik deuha min en pahin Mampuia chuan ati a, " Ṭap nang, nizanah kamu theilo a, chuvang anih hi " nui lui var varin kati a, Zawhna min zawh belh hlauin Duati chu ka chhaih san daih bawka, vanneihthlak takin engmah min zawh belh tawhlo.


Inbual ka tum tehlul nen in chhung ka luh chuan rin aiin alo vawt a, ka thlan atla chuanglo ti a inhnem in ka insil ta zawka, ka thawmhnaw chu ka thlak vek tho, Zingkar boruak ṭha dawn takah chuan ka harh lo lutuk leh ka pik churh kha areh a, ka rilru buai nuai nuai pawh kha azia deuhin kahria. Ka inthlak fel hnuah U Nguri rawngbawl kapui a, dan ngaite in ani chu atiti leh siam siama, tukin chu ka zawm ṭha peih vaklo thung. Kanu lo tho lah chuan min be seka, tukdangah pawh min be tak tak ngai tawp silo a, a mood fuh lutuk chu ka hrethiam hlawllo, A zawhna min zawh lah a ho si, chhang peihlo teh mahila chhan loh chu thil tih chi ani silo a, tum burin ka chhang vezel tho a, ka awmdan leh landan aṭang hian ka ṭawng ṭha peihlo tih te chu hriat ve awm ania.


Nizan thil thleng vangin ka rilru abuai a, ka hreawm em em laiin Kanu erawh thawveng sawt hi a ang bera, tukdangah heti taka a mood aṭhat hi ka hre ngailo hrim hrim. In chhungah hian ahlim hlawllo tih hi ahriat a, in ah a awm ve tawh chuan phunna tur ahria in athinrim reng zel, pawn lamah erawh thinrim ngailo ang mai ani leh lawia, pawn lamah chuan nu hlim thei tak leh chhungkaw hmangaih tak angin alang thiam. Ka hlim loh ber lai leh hmalam hun pawh ngaihtuah ngamlo a ka buai mek laia chuti taka kanu ahlim chu ka rilru a kawi lek lek a, Afanu ni mahila keihi eng atan mah min ngailo tih chu ahriat viauin kahria.


" I rilru chu i siamfel tawh ang chu tiraw? I bialpa kha ṭhen hmak rawh, an fapa saw rangkachak hmanga siam pawh ani biklo a, kalsan phalloh chhan tur a awmlo, induh tawk ve tlat la, i pa rilru tina em em tu te hi hlatsan vang vang ang che " Choka aṭanga U Nguri chhuah lawk hlan chuan Kanu'n ati a, chhan mai nachang pawh hre lovin ka melh tlawk tlawk a, U Mafela hi ṭhen se minti ngawih ngawih niin ka hre ber tawh. " U Mafela'n tihsual anei hleinem " Tih chauhin ka chhanga, ka chhanna ahriat ruala kanu hmel inthlak chu hmuhnawm tak ani, nichin lawka ahmel nung sarh kha areh daih a, a landan aṭangin a lungawi lo tih ahriat viau.

" I va han rapthlak ngai ve, i pa rilru anti na in nizanah pawh a muhil theilo a, chuti chung chuan i bialpa chu ṭhen ila tumlo maw " Vin ṭhak hian ati a, a landan inthlak hlawk hlawk chu amak kati lutuk; Film ah chuan thil inthlak danglam thut thut hi kahmu ṭhin a, Mihring ramsa a changte, ramsa mihringa changte pawh kahmu ṭhin, tunah erawh atak ngeiin kanu danglam lai ka thlira, Kanu berkher ani bawk nen sawi tur pawh ka hre tawhlo, A mitmeng sen ram te chu ka melh ngam tawhlo a, engtin emaw chhanglet leh ngat ila chuan kut min thlak duh in karing.


Ṭukṭhuan kan eikham a, U Nguri nen ei na vel kan tihfel hnuah room ah kalut a, ka phone chu ka khawih veleh chiah a, Whatsapp a ka luh chuan U Mafela msg pathum lai alo awm a, missed call pawh vawi 5 lai a awm bawka. chutia ka ngaihsak lo kual chu ka inthiamlo hnu hnawh viau a, anih tur ang anih vek hnuah erawh awmzia a awm tehchiam lo.

A msg hmasa ber chu 'Good morning, i tho nuam em?' Tih ani a, hna akal dawnah minlo hrilh leh thlap bawkin a msg pathumna chu 'Ka lakah lungawi lohna i nei emni? Hetia min rehsan vung vung te chuan engmah ka ngaihtuah thei hleinem' tih hi ani a, ka nuilo theilo. 'Zanah lo leng la, thil sawipui tur che pawh kanei, vawiin chu in chhung tihfai katum a, ka buai dawn a, min hrethiam mai aniang chu, Vawiin ni hman nuam Duata' tiin ka reply veta nge nge a, zanah inhmu phawt ila engkim sawi dun ila pakhat thluak ai chuan pahnih thluak chuan thil angaihtuah chhuak ṭha zawk ang, kei mai hi chuan engmah ka ngaihtuah kaw lo a, ka ipik thlawn ani ringawt.


Nileng chuan ka che char chara, reilote pawh ka hahchawl duhlo hrim hrim, chhuat pawh vawi3 ngawt ka nawt nawn a, Char lam a kan thil dah hnawk deuh ho pawh chingfel vekin ka chekual nasa lutuk a, ka thiltih zawng zawng te chu sawi vek sen pawh anilo. U Nguri te nufa lo inpawm chhoh tum poh ka phal lo a, an nufa in an lungawi lo hle a, phun nang nang chungin an room ah anlut leh a, khawngaih deuh tho mahila titi mood ah ka chenglo, tihian mahnia chet mawlh mawlh hi ka duh rih zawk.

.
.

Zanah chuan U Mafela alo leng a, In chhung alo pen luh rualin Kanu mitmeng nelawm loh zet kahmu nghala, ka ngaipawimawh duhlo thung. Kapa chuan pangai deuhin abia a, kanu erawh atho hmaka, an room ah alut a, apawi kati hranlo. Thil sawipui ka duh miau avangin char lamah kan inzui chhuak leh ta nge nge a, hahdam deuha a awm laiin kei erawh ka ṭang ṭunga, insi riala kan ṭhutdun hnuah pawh ka inthlahdul thei vaklo. Duhthawh taka min fawhna pawh chu zan dang angin ka feel theilo a, chhanglet ve mahila ka rilru in thildang angaihtuah tel tlat avangin infawh mood ah chuan ka cheng hlawllo ani. Ka taksa danglam aṭangin U Mafela pawn ahrethiam aniang rum nghutin a inla hranga, mitmeng tak ngala hnai fe a min en ngur chung chuan " Enge buaina" ati nghuta, amit ah pawh melh rei ngam lovin kan in fawhna avanga ahmui hnawng chap chu ka melh ngar ngar a, ahmui ka en tih ahriat vang nimaw ahmui hnuai chu aliak zeuh a, anui deuh lehnghal.


" I sawi loh chuan ka hre dawnlo ania, engthil in nge ka fawhna che dawngsawng ṭha theilo khawpa ti danglam che, ka msg leh call pawh i chhang duhlo bawka, chhan ṭha tak a awm ngei tur ani, achhan aṭha tawklo anihchuan ka lawm dawn hauhlo ania " Tiin ka kut chu achelh a, la kangin afawp leh vang vanga, hetianga a chet reng chuan kaduh ang hi ka sawichhuah theih pawh ka in ringlo e a.

" I nu hian ati ve mah mah deuhin kahria, ka chungchang chu lo sawi se ka pawi tilo, na deuh deuhin min ṭawngkhum mahse, katan i awm chhung chuan ka paltlang theih mai ka inring a, chuvang ania inneih isawi chang pawha ka hnial ngai loh che; Mahse, ka chhungkua thleng thlenga hetia ati hi ka duhlo, kapa nunhlui sawichhuaka mi bula a mo atan min pawm loh thu asawi hi na kati a, ka tuardam thei biklo ani " Ka sawi zawh rualin am zetin boruak ka hip lut a, ka thilsawi duh bahlah lo leh Mar pata ka sawichhuak thei chu ka lawm viau bawk.


" Sawi chiang deuh teh " Atih chuan " Tualthattu fanu hi a mo atan chuan minlo iai viau anihkha, keichuan kapa hi ka zahpui lo a, i nu thusawi avanga kapa zan mu theilo leh hreawm ti lai hmuh hi ka duh tawhlo. Kapa hian a duh vang rengin U Rinzuala kha that sela chuan engmah sawi theih ka neilo; mahse, tihpalh thil liau liau ani a, tun thleng hian minla nghawnga, chutih lai kara thil ho te avanga asawi chhuak hi ka hrethiamlo ani " Ka ti nawn leh a, ka sawichhuah leh takah chuan thinrimna leh lungawi loh na bawkin min luhchilh leh a, ka thinphu pawh arang leh dawt dawt tawh.

" In hriatsual aniang, kanu'n chutiang asawi ka ringlo, i lakah akhirh in asual tih chu kahria; Mahse, hetiang chhungkaw buaina hi chu a sawichhuak lovang, chutiang sawichhuak tur khawpa hniam ani heklo " Ati nghuta, ka melh tlawk tlawk ringawt. " I ṭan anihkha, In in a kalo kal laia min ṭawngkhum dan aṭang khan asawi anih loh ka ring biklo" kati ve hmaka, mite sawi zawng zawng hi adiklo tih leh thu belh an hrat tih pawh kahria, chutih laiin mite hian dawt muhlum tawp chu an sawi ngai biklo a, anlo belh deuh anih pawn Pi Zothani chuan eng emaw tak chu asawi ve tihna animai.

" Mi thusawi a in nghat mai mai rual pawh ini tawhlo Bawihi, Mite hian kan ṭhatna an duhlo tih te chu hrethiam ta che, kanu hi kaṭan bik lo a; Mahse, hei kher kher hi chu asawi dawnlo tih kahria " Ati a, a in ringtawk lutuk chu ka haw ngawih ngawih. Rilru nat vanga kapa muhil theilo in dawm kun tlawk tlawk te kha angaipawimawh lo tih ahriat a, Lo innei ta pawh ni ila Pi Zothani'n min duhlo a, ṭawngkam hriatnuam lo deuh deuh in min ṭawngkhum fo se, ka lam chu aṭang ngei ang; Mahse, athisen zawm amah hringtu A-nu hi a haw thei dawnlo a, tunah pawh kan buai nghal der chu anihhi, keiin tihtak zeta a chhungte ka huat theih laiin ani chuan achhungte a thisen zawmte hi a haw ve thei tak tak dawnlo a, kan inrem thei tak tak dawnlo tih thlengin ka ngaihtuah kai tawh.


" Mite hian dawt muhlum an sawi ngai biklo, kapa rilru natna te ka hreawm tihna te, hrelo derin i nu iṭan zawk a, Eng amah hmain 'Hetiang sawichhuak tur khawpa hniam anilo' min tih khum hmaka, heti taka hmuhsit tur hi kanni bik emni? Ni e, nangni chu in sang a, kan dingdihlip iak iak chung pawn kan ban phalo che u anih hi, i nu duh ang tak hmeichhia chu i nei dawnnia, kapa rilru ti na a, ti hreawm tute chhungkuaa lawm taka lawi luh chu ka chak biklo " Kati ve ta a, ka sawi zawh rualin ka kawchhung hi a na nget nget a, hrawm bawrh bawrh ang mai hi ani.

" Chu chu i duh dan maw? " Ti nghutin ka darah achelh a, a hmer nghet lutuk chu ana thei hial a, anat thu sawi erawh ka tumlo, U Mafela chu ka en a, ka mittui pawh atling pam tawh, A mitmeng nelawm lo zet chu ka enrei duhlo a, a zawhna pawh chu ka chhang chuanglo, " Min chhang ta che, Kanu duh ang hmeichhia chu nupuiah ka nei ang maw? I phal chiah em?" Ti hrawkin min thing deuh nawka, min thin rual chuan ka mittui ka biangah aluang thla nghal pap a, hruk pawh ka tum buailo. Hmeichhe dang tan ka phallo a, phallo viau mahila tunah hian enge ka tih chuan ang.


" Aṭha e, ka kal ang, zanin ah hian engmah kan sawifel dawnlo, ka hmusit ngailo che u tih erawh hriat ang che, tui deuhin i mu dawnnia " Dam dap hian ati a, ka dara avawnna chu athlah tawh bawk. Ahmel chu hmu chak viau mahila ka en duhlo a, ka mittui avangin ka biang ahuh vek bawk nen hnaptui nen mittui nena hmachhawn chu ka duhlo hrim hrim. A kal hnuah pawh ka awm ngaiin kala awm reng a, a bike ri ahriat theih loh thlengin ka awmdan ngai chuan ka awm, tikhan akal a, vawikhatmah ka kiangah alo let leh tawh ngai dawnlo tihna maw? kan inkar titawp tu chu ni mahila ka duh vang renga kaltir kanih loh na hian minti na a, Mahni hmangaihte kaltir chu awmdan thiam ahar takzet ani.


Cont..