Rempuia (Short Story) By CVL.Awmpuii

[CVL Awmpuii]

REMPUIA (Short Story)
By CVL.Awmpuii



"Lalṭhian" ka ṭhiannu muthlu lâi chu ka nghawk deuh sawk a. A muthlu a ni tih hriat loh khawp a rumin min rawn melh nghal hrawk mai. "A zahthlak, inti harh rawh" inthlahrung deuh tak chuan ka lo ti leh sep a. Hâm bâi bâi chungin kan hla sak lâi chu a rawn sak zawm veleh mai bawk a. Kaihthawh a awlsam angreng khawp mai.




"Dár engzât nge?" ring lèng làwnga a zài hnù lawk chuan a rawn ti sar sar a. Ka phone sana en pah chuan "Dár li" ka lo ti sep, a ner nghal nâwng mai. "Khúa a va la vâr har dâwn ve" a ti bak hlak a. A mutchhuak tawh mu thei bawk si lo chu a thinchhe hlur tawh maiin ka hria. "Darkar khat vêl bâk a ngai tawh hlei nem. Insangphek ila, zâi ve ṭang ṭang teh ang" tiin ka lo fuih ve sauh sauh thung a. Khúang pû in hlã a rawn lâk rual chuan inthurual ni àwm fahrana ring in kan lo zawm vat a. Midangin min lo nuih ṭha ka hmuh chuan ka zak leh hnuhnawh deuh. Mahse lusunte zâia hnêm tura kal kan ni miau a, kan tih tur tak tiin kan zai ve a ni mai a, ka zak rei lêm lo.




"Awi saw mite saw" ka ṭhiannu Lyn-i hawina lam chu ka hawi vat a. Mipa lian ṭheh ṭhawh pali an rawn inzui lût ṭham ṭham mai. A khaipa ber ni àwm tak chuan hmâ rawn hruai in kan ep chiaha tlar hnung berah chuan an rawn ṭhu nghal khup a. Mitthi lumen-a tlaivar kan ṭhahnem vak lo bawk nen an langsar hma kher mai. "Tute nge a?" Lyn-i chu ka bekbawr sar sar a, "U Rempuia te ṭhian zaho an nih saw" a lo ti ve mai a. Ka hriat ngai pawh an ni hlawm lo e a. U Rempuia a tih ber ni a ka rin chu a khaipa ve deuh ber anga lang, a palian ber saw anih ka ring ve tawp.



"Ka vawikhat hmuhna" Lyn-i bulah bawk chuan ka phun leh sep a, "An tamna mual ah chuan an tam lutuk. Khúa ah i awm tam lo va, i lo haw ve chhunah lah Biakin leh a chhehvel bâk i thleng ngai si lo va. I hre fuh lo mai mai anih kha" a lo ti duah a. "U Rempuia chu a tu ber saw nge?" ka ti leh hram a, ka rin rûk tak kha a lo ni ngei e. "A va pà rem rem ve" ka ti uang zeuh a, Lyn-i chuan min lo melh rang ngang mai. "Sawi hlek suh" a ti bul hmak a, "Timaw?" ka tih chuan "Lerh rãpthlâk" uar zet hian a lo ti a. Ka zâwt zui tawh bîk lo.




Mahse U Rempuia a tih chuan mak tak maiin ka mit a la ru riau a. Ka lo melh leh vung vung ṭhin. A palianin a taksa a inphut mâwi tâwk em em a. Hmelṭha ti a sawi tùr ni hauh si lovin a hmêl chu a pà deuh hrak a. A ṭhutpuite pawh saw an zia thawkhat a, mahse U Rempuia chu a langsar fâl bîk nalh a tih theih ang. A hoodie dum hâk leh a jeans kekawr paw dal hâk lah chu a inhmeh zek a. A sneakers lawk zette nen chuan a inhnerem vêl vek mai. A lan dàn aṭang ringawt pawh sawn a fel zawk zawk dawn lo tih chu a hriat nghal mai a. A mitmeng pawh chuan ka ṭhiannu thusawi kha a nemnghet chiang viauin ka hria. A mitmeng a lerh, a ten duh tán chuan tenawm rawng pawh a kai hial mai thei a ni. A inthuam dàn leh a lan dànte chu ka ngainat chî a ni ngai miah lo. Mahse U Rempuia chu ka vawikhat hmuhna mah nise eng emaw boruak hi a rawn keng tel ringawt ka ti mai. Engpawh nise, palian deuh hi chu an hmuhnawm ka ti hranpa ve hrim hrim a.



Chutia ka lo melh reng lai chuan min rawn melh thut a, ka phu chiang kher asin. Rang zeta hawisawn in ka zâi nghal tàwn tàwn a. Ka mitsir chuan min rawn en ve reng ani tih a hmu reng. Mahse ka lo hrelo der tawh thung a, a nui suk suk tih pawh ka hria. Ka haider lui ngar ngar tawh.




Zîng dár 5 leh minute 15 vêl chuan kâwl a rawn êng ta ṭan a. Ka mut a chhuak ve hlê tawh, Lyn-i erawh a harh tulh tulh emaw tih mai tùr a ni. A hmaa a lo mutthluk kha a chhawr hlê aniang ka ti tawp mai. Dár 5:30 a rîk meuh chuan khúa a vâr fel ta. Kan hruaitu chu lo ding vat a, banna a siam ta nghal a. Ka thaw huai mai.




"Hmun hi tihfel pui leh law law ila kan haw dâwn ania. Nula dang ti tùr an vâng emai" kan han bâng fel ta chu Lyn-i chuan a lo ti leh sawk sawk a. Ka mut a chhuak rãpthlâk tawh si a, ka phùr hlawl lo. Mahse tlawmngaih hun a ni tih hria in phun nawi miah lo chuan ka tihfel pui ve sawk sawk a.




Zîng khúa a lo vâr ta chu lusun chhûngte lung a chhe zual emaw tih mai tùrin an han ṭap ṭha leh lawp lawp a. Heihi ania mitthi in kal ka hreh em em chhan chu! Mitthi chhûngte ṭap ka hmuh leh ka hriatte hian ka hnuk a lo ulh ve ringawt zel a. Mi ṭap lai hi ka hmu thei lo ni berin ka hria. Mahse ka hnuk ulh hminhchhiat hma in kan tih tùr ang angte chu kan tifel zo hman hlauh a. Lyn-i nen chuan kan inzui haw ve ta nghal a. Tunah tak hi chuan insifai a mut bawrh bawrh tluka châk ka nei rih lo.




"Lapui...Lapui...harh rawh....Lapui" min ko vak vak a, mangchhia ka mang tih ka inhre reng. Mahse chiang takin ka harh chhuak thei lo, ka maimizial ni berin ka hria. "Lapui...Lapui...i harh em?" min rawn sawi nawk nawk tâkah chuan chiang zet hian ka harh ta hlawl a. "Mangchhia i mang emawni? I rãk nasa lutuk alawm le. I mut leh dâwn chuan i mut dàn thlâk la, anih loh paw'n rawn tho tawh rawh" ka Nu chuan a lo ti leh sawk sawk a. Room aṭang chuan min chhuahsan zui nghal daih bawk a. Apron nen a la ni ap bawk nen a laklawh viau aniang.



Ṭul lo zetin ka mumang chu ka ngaihtuah lêt a. Mitthi lumenna kan kal kha lo mangphan chhunzawm in U Rempuia kha ka mumangah chuan ka hmù anih chu! Ka hmù satliah mai pawh ni lovin kan haw tùr kha min lo man bet a. A ṭhiante nen khan min rûk bo an lo tum a, min pui tùr zawnga ka au tuarh tuarh kha a takah ka lo au chhuak anih hmêl.



Sana ka en chuan dár 8 pawh a lo la ri lo. Ka muthilh khan dár 6 a ri tawh a, darkar hnih êm pawh ka la mu lo tihna anih chu! Tih tùr em em ka nei chuang lo bawk muthilh tum chuan ṭan ka la leh a. Mahse ka mitthla ah ka mumang kha a rawn lang zel a, ka muhil thei tawh der lo. Tho chhuak ta mai lo chuan ka phone chu ka tuai let ta sek a. Youtube-ah video ho mai mai ka en a, chu chuan ka mut a rawn tichhuak zui veleh mai aniang reilotê ah ka lo muhil leh ta daih a. Ka harh leh meuh chuan nî a lo tlâng sâng tawh ngang mai.




Ka va thawh chhuah chuan ka Nu leh Pa te pawh an lo awm tawh lo a. Mitthi in lamah an kal ani tih ka ring thiam nghal mai. Ka rilṭam êm avangin chawei ka insiam nghal rak rak a. Dár 11 lâi a ri tawh a, rilṭam chu a àwm ve tawh viau mai. Ka chawei pah chuan ka û, Aizawl-a hnathawk a awm chu ka call zui zat a. Thil pawimawh em em sawi tùr ka hre chuang lo na in ka tih tur hrelo chuan ka call ve mai mai a ni.



"Aw Lapui..." a lâk rual chuan a rawn ti nghal a, "I buai em? Eng nge i tih?" ka tih chuan " Buai em em lo, office-ah ka awm" a lo ti vat a. "Class i lâk laklawh te ka lo ring a" ka tih leh chuan "Chuti si min lo call tho a" tiin a nui a, keipawh ka nui ve tho. Kan unau hi pahnih chauh kan ni a, ka û hi Aizawl Private School pakhatah nikum aṭang khan a thawk ve ṭan a. Kei erawh kuminah khan Class 12 ka zo ve chiah thung. College kal chhunzawm ka tum ve viau na in admission tih hunlai vêl khan ka damlo thut mai a. Entrance pêk leh interview ngai thilte a ni si a, ka chhûngte'n "Nakkum aṭangin i chhunzawm mai dâwn ania" an ti a. Tih theih dang nei ta lo chu an thû zawm in khúa ah ka awm ve tih ta phawt chu ania.




Ka û nen chuan thu ho mai mai sawiin ka chawei chhûng zawng chu kan inbia a. Ka thusawi a lo ngaithla a ni zawk mah. "Engtikah i lo haw theih ang?" ka tih chuan "Krismas hma chuan ka lo haw thei ang" nghal zet hian a rawn ti a. "Uang lovin" ka lo ti bak nghal hlar mai. Midang bula ṭawng ṭha duh miah si lo hi a farnu ka nih vang nge ka bulah chuan a nghal em em a. Kan awm dun chuan kan inhau zel, mahse kan inngai ber tho. "Tak taka ni 20 ah hian ka lo chhuk ang" a lo ti ṭha veleh mai a. "Awi...i lo va haw har dâwn " ka lo ti hluai. Ni 15 thleng sikul an kal dâwn a, rawn haw har a tum ka lo ti khawp mai.




"I duh chuan ni 19 ah lo chho ve la, kan bazar ang a ni 20 ah kan haw rual ang a. Min lo lam tihna a nimai alawm" a rawn ti leh luam a. Bazar a sawi chiah chu ka lo phùr ngang mai, "I ti tak tak em?" ring ngam chiah si lo va ka tih chuan "Ti tak tak e, mahse ka Nu leh Pa te'n an phal chuan" a lo ti a. Ka phùr nghal harh mai.




Zanah chuan ka Nu leh Pa te chu ka dil nghal a, an lo phal ve mai bawk a, lâwm tak ka ni. Mahse ka Pa chuan min fuih zui mawlh mawlh a "Krismas dâwn hnaih a thil thar neih kher tumte hi a ṭha ber lo ania. Kan neih theih chuan a ṭha tho a, mahse midang rualawhna belhchhah tùr ting a khawsak tih sàn viau hi a changkâng lo. Hetiang hunpui ah hi chuan mahni ṭânghma hai aiin rethei leh chanhai zawkte puih hi a Pathian thû in Krismas nen pawh a inrem zawk ania" a ti duah a. A ngaihdàn chu a dik ka tih rualin ka chhâng veleh ta tho. Ngaihdàn fahrah tê tê hi ka lo nei ve ṭhin a, kan chhûngkua ah na nâ nâ hi chuan ka sawi hreh lo bawk.



"I sawi chu ka pawm thlap tho a. Mahse Krismas-a thil thar neih theihte chuan chu tluk a awm hlei nem. Midang pawh kan ṭanpui tho ang a, kan ṭanghma pawh kan hai ve tho tùr alawm. Chuloah midang rualawhna belhchhah tùr khawpa khawsa thei pawh kan nih loh hi" ka lo ti ve luam a. Ka pa chuan min chhan zui ngaihna a hre tawh bîk lo. "A dik tho a, mahse thu ṭha ka'n hrilh che anih chu" te la ti hram tho a. Thinrim a inhnial kan ni lo bawk nen ka chhâng zui tawh bîk lo.



Kar thar kan chuangkai a, ka Aizawl kal hun tùr ni 19 chu kan thleng veleh ta der mai. Lyn-i ka sâwm ve a, vanneihthlak lutukin a chhûngte'n an lo remti ve hlauh a. Kan pahnihin Aizawl-ah chuan kan han inzui chho ve dâwn a ni. Ka hruai ve kher duh chhan pakhat chu Aizawl-a ka sikul kalpui ṭhin ka ṭhiante ho nen inhmelhriat ve se ka duh a. Keipaw'n a ṭhian kawm dangte ka hriatpui ang chiah hian min hriatpui ve sela, inhre pawh tawn vek ila tih chu ka duhthusàm a ni.



Kan khúa aṭang chuan zingkarah Sumo in kan chhuak a, kan chhungte'n min lo thlah thlap bawk a. Zan khat lek riak tùr ni mah ila ni tam tak châm tùr ang mai hian thu ṭha min fah mawlh mawlh a, fimkhur hle turin min ti nasa hle bawk. Kan khúa leh Aizawl hi a inhlat lutuk lo va, tlân pangngaia tlan chuan darkar thum vêl tlan a ni a. Tun ṭum phei chu ṭhian dûn a motor chuang kan ni bawk a kawng thui tham ve deuh mah se ninawm ka ti hman meuh lo a ni.




Aizawl kan thlen chuan Sumo Stand-ah ka û in min lo nghak vang tawh a. Kan bungrua te chu min thiar sak zung zung in Taxi min koh sak nghal bawk a. Keini kan chuang ang a, ani chu a Bike-in a lo haw thung dâwn a ni. "U Muanpui, i bulah ka lo chuang ve mai teh ang Taxi chu ka chuang peih tawhlo" chauh hmel zet hian Lyn-i chuan a lo ti sep a. Kan thlen dâwn hnaih khan a rui deuh a, luak erawh a luak êm lo. "Aw kha chu in tih dàn dàn a nimai" ka û pawh chuan a lo ti ve mai bawk a. Mahni a Taxi chuan chu ka hreh lêm loh bâk ah Lyn-i chu ka khawngaih a, "Anih chuan inphur phei mai ula, kei taxi ah ka lo chuang mai ang" ka ti a. Kan kal nghal chu a ni deuh mai.




Two Wheeler-a tlan zawk an nih avangin traffic jam-ah an tâng ve vak lo va, kei aiin an lo thleng hmasa a. In ka va thlen ve meuh chuan ṭhutthlenga Lyn-i lo mu bal chu ka hmu nghal zat a, "A va han chau àwm em em" ka tih chuan "A chuang sual ve hlê aniang a over theih nen" ka û chuan a lo ti zeuh a. An inngam tlâk a, over hi chu an intih dàn fo ani. Ka inbual fai hmasa tê tê a, Lyn-i chu intifai phawt a mu ṭha leh mai turin ka kaitho a, ka lainat reuh tak tak a ni. "Motor i ruih ngai àwm ka hre si lo va, i va chuang sual àwm ve mawle" ka lo ti hliai a, "Kan thlen dawn hnaih khan ka pum a che thut alawm mawle...ka chau nghulh mai, rai ang mai hian ka awm" a lo ti ve niah niah a. Inbual turin Bathroom-ah chuan a lût zui ve mai bawk a.




Kan thlen veleh a bazar nghal tum si kha Lyn-i awmdanin a zir ta ngang si lo va, kan chhuak ta lo law law. Tlãi lamah erawh a rawn harh ṭha ve ta viau a, a mu hnem êm a, harh hawkna tham chu a mu ve in ka hria. Eirawng kan bâwl dûn a, a nui leh awr awr tawh. Ka û erawh lehkhabu chhiar in a room-ah a awm daih thung a. Sikul chàwl tawh mah se a chàwl veleh lo pek aniang. Naupang sikul chawlh lai te hi remchângah la in inchhiar zau nan hun a hmang ṭhin a. Kei ni ila ka peih loh tawp tur a ni.




"Kan va harh leh phawr phawr tawh si ve" ka ngaihtuah lai mêk in ka u chu choka ah a rawn lût phei a. "Kan rawn thlen tirh kha chuan ka thi dâwn emaw ka ti hman alawm le "Lyn-i chuan a lo chhang vat a. "Khatiang tùr si i lo zin ve khanglang a, bazar kan tum tum nen min ti khaihlak vek alawm" tui in pahin ka û chuan a lo ti veleh, an inngam tlâk ka tih tawh kha. "Kal mai teh a" Lyn-i lah chuan a lo ti duh lêk chauh a, an inhnial zui bap bap a. Ka lo nui ka lo nui mai.




Khaw thim hma in zanriah kan ei fel a, Lyn-i chuan kàwnchei fan a châk tlat pek a. "Kan kal ve ta sa sa, ka fang ve châk alawm. Zanin chauh hun kan nei bawk a, chhuak ve ang" a ti tlat a. Ka û kan dil chuan "Kan kal ho dâwn ania" a lo ti ve mai bawk a. "I lo kal ve kher a ngailo asin le" pakhatnu lah chuan a lo ti zeuh pek a, "Ka nau hi i bo pui palh ang, i confi sual ve thei sia, khawpui i hmu khat si" ka û chuan a ti zek a. A vawikhat nan Lyn-i a dang ve ta tlat, "I over e a" a ti ringawt a. An pahnih bula awm chu ka nui leh reng mai dâwn anih hi.




Kàwnchei chu kan fang ta ngei a, ka beisei ai daihin nuam ka ti. Hunpui lo thleng turah chuan mitin kan inbuatsaih nasa hle tih a chiang reng mai a. Vêng tin chu a mâwi vêl vek a ni ber, sum pawh an sêng nasa viau in ka ring a. An thâ leh zung ngaihtuahnate pawh an sêng nasa dâwn tih a hriat reng mai. Hetiang hunah hian lo sawisel pâwl an awm lo thei lo va, kei chu miin an duh a, inlungrual taka an chei duh mah anih chuan lo sawisel vak kha awmzia a awmin ka hrelo. Lo sawisel pâwl ho hi chu thâ leh zung, sum leh pai sêng lo lo hi an lo ni tlângpui lehnghal a. "Midang ṭanpui nan hmang zawk se" ti tâwk an lo awm ve ṭhin bawk a. Hengho pawh hi kâ chauh a ṭhahnemngai an ni ka ti mai. Hunpui ah hi chuan engkimah a ṭha thei ang ber kan chhuah mai tur a ni. Midang pawh kan ṭanpui ang a, mahni ṭanghma pawh kan hai ve ang a. Sual kawng zawh nân hmang lo ila a bâk chu a ṭha vel vek mai.




"Eheu...Rempuia te teh hlawl chu" ka û hawina lam chu ka hawi ve nghal vat a. U Rempuia ka hmuh rual chuan engtin emaw riau hian ka kawchhung a rawn awm, min rawn melh zeuh a, ka lo nui tàwi tâk ringawt. Min nuih lêt ve miah lo hian ka û bawk chu a melh leh a, ka hrilhai letling phian mai. "Engtikin nge i lo chhoh a?" ka û bawk chuan a ti leh a, an inchibai zui zat a. U Rempuia chuan "Nimin piah khan" a lo ti ve mai a. An inbe zui luam a, ngaihsak lo ang takin Lyn-i nen chuan kan lo inbe ve bawk a. Lyn-i chuan a ngaihsak lo tak tak tih ka hria, mahse kei chu ka û te inbiakna ah chuan ka beng ka lo chhi ru ve kar a, ka hriat tur pawimawh a awm pawh ni hlei lo. Ka awm dân chu atthlak ka va'n ti tak. An inbiak danah chuan inhre ṭha tak hi an ang a, engtin nge maw U Rempuia hi kha chen kha ka lo hriat loh theih zawk ni?




"Rempui, ka hman tawh e...Ehe...Muanpuia te chu..." ka mi hmuh avang chuan ka meng phâwk nghal hra a. "Awi U Es" ka lo ti ve hluai a, helai hmuna kan inhmukhawm teh ṭhup chu mak ka ti kher mai. U Es-i pawh chuan min lo be ve nghal sawk sawk a, U Rempuia bana a chelhna chuan ka mit a la kher mai. "Changtunu nen in lo kal lek chu niin" ka û in a chhaih tâkah chuan ka hrethiam ve ta kuar mai. Rei inbe tawh hlawm lovin kan in kalsan zui a. "I û hi chèn da hrep r'u aw" U Es-i chuan min lo fiam zeuh a, "Thil kan ngên vak vak dâwn" uar zet hian ka lo ti ve vat a. Khúa a inhmu leh tùrin kan inthlah zui ta a. An kal liam chiah chu zawhna ka ngah ngang mai.




Lyn-i sawi danah U Rempuia leh U Esi te kha reife lo inzui tawh an ni a. Mahse inṭhen zeuh zeuh an nei fo, inṭhen hlei thei si lo, inkawp nghet cherh chawrh thei si lo ang kha an lo ni a. A chhan pawh U Rempuia lerh vang niin a sawi. U Esi ngaihzawng chungchangah khan mi sawi ka lo hre ve fo tawh ṭhin a, "Esi chu a fel tehreng nen a mãwl leh lutuk a, a bialpa in a bum char char mai a ni. A bialpa hian a phû thlawt lo mawle, mahse Puia hi a zei êm a, a rilru a hnehsak zel chu anih hi" an tih ka hre ṭhin a. A bialpa Puia an tih kha U Rempuia lêk hi a lo ni tihna ania. U Esi ka hriatna hi a la rei vak lo na in ka nêl ve nghal em em a. Kan khúa a cafe changkang ve pâwl tak hi a ta ania, ka dàwr zin em avanga inhre chho ta kha kan nia. Ka hriat zel dân phei chuan an vêng lamah KṬP active member, Nula fel tak hi a lo ni reng a. Ani leh U Rempuia inngaizawng tùr ka ngaihtuah chuan ka lo ui ve nghal ringawt pek a. U Rempuia ber kha la hrechiang lo hle mah ila a lerh an ti êm a, ka awih ve nghal tawp.




"U...engtin nge U Rempuia kha i hriat a?" ka û chu ka zâwt leh hram a. "Hriat loh chhan tùr a awm hlei nem, middle school kan kal laiin kan in pâwl rual ṭhin alawm" a lo ti mai a. "Chuloah khaw khat kan nia, inhriatpawh loh chhan tur vak a awm lo e" a tih leh chuan engmah ka zawt zui tawh lo.




Ka mut hnú thleng pawh chuan ka rilru ah U Rempuia leh U Esi te ringawt kha an awm a. Ka mitthla ah an châm zui veng veng mai. An inhmeh ru riau hian ka hria a, ka duhsak tawn em em ve ringawt chu ka hrethiam lo. An hmêlṭha dunin an hleitling dùn bawk si innei daih se tih te thleng chuan ka ngaihtuah a. Ka lo ngaihven lutuk chu ka inthiamlo hnuhnawh viau mai.




Kan haw dâwn tûkah chuan kan bazar ta nge nge a, Lyn-i pawh a in duhthawh ve ngang mai. A chhûngte'n pawisa an pai ṭhahnem ve angreng aniang a mit la deuh thil chu a lei pawp pawp ngam tlat a. Kei chu pheikhawk leh puan bih tùr bâk ka lei lo. Ka û in Tshirt min lei ve ve bawk a, lâwm tak kan ni. Kan bazar zawh meuh chuan kan Sumo chhuah hun a lo hnai kuar mai tawh mai. Aizawl-a ka ṭhiante nen inhmuh kan tum pawh kha kan ṭhulh ta tawp. An lungawi lo viau nghe nghe a, mahse tih theih ka nei miau si lo an lungawi lo rei bîk lo.




Lyn-i chuan motor ruih leh a hlau tlat tawh si a, ka û in Bike a hawn thla dâwn tho bawk nen "Min phur haw mai rawh" a ti ta tawp a. "Phunchiar suh aw, neuh neuh ngah lo bawk la" ka û chuan a ti hmasa tê tê a. An inphur leh ta nge nge a, kei erawh kan bungrua te nen Sumo ah ka chuang thung a. Kan hnungah min lo zui ve zel a, tlân chak lo turin kan inchah nasa bawk a ka û pawh a fimkhur ve khawp mai.



Darkar thum ṭha zet kan tlan hnu chuan kan in kan thleng leh ta. Lyn-i chu a chhungte'n kan inah an lo hmuak a, ka û nen chuan an rawn thleng zui ve mai bawk a. "I phunchiar sia, vawikhat mah ka Bike ah i chuang leh tawh lo vang" ka û chuan a ti nghal khur khur a. "Ka chuang peih tawh teuh lo, i thinchhe si" Lyn-i chuan a lo ti ve nghat a. Engtin tak nge maw an lo intihbuai leh tâk ni? An rawn inphur thleng thei tal pawh chu a lawmawm hrim hrim e.



Krismas leh kumthar chu tluang takin Pathian zarah kan hmang zo a. Keipawh inkhawmna leh zàikháwmna lamah ka tap ve chawt a. Kawng engkimah Lyn-i nen kan inthurual thei zel a, a tihzia phian mai. Lèn vak vak ai chuan kohhran a tel tawp mai hi kan nuam tih záwng ania. Zàikháwm te hi tette aṭanga kan tih ṭhan vang aniang nuam kan ti em em zel a. Lyn-i phei chu talent a nei ṭha bawk nen hlã te a hril lawp lawp ṭhin a, a bulah ṭhu in ring deuh deuhin ka lo zai ve ṭhin a. A châng leh ka lâm ve bawk a, kan hmang nuam khawp mai.




Ka û pawh Aizawl a chhoh a lo hun leh ta. Zui veleh ka duh viau na in ka Nu leh Pa te'n an remti tawh chiah lo va. "Krismas leh kumthar vuak vet a zo chiah si a, hnathawh kan ãwl rei tawh bawk nen thawh tùr a tam. I duh chuan hun remchâng dangah i zin veleh dâwn ania" min ti a, ka hnial bîk lo. Tunah hian in sa lai mêk kan ni a, nikum kum tâwp lam aṭang khan kan kawmthlangah concrete-in in kan rel ve ruah mai a. Krismas leh kumthar in a zui ta bawk nen kan âwl ta vang vang kha ania. Ka Nu leh Pa te ṭhahnemngaihna pawh chu âwm ka ti viau mai.




Ka û Aizawl chhoh tûk aṭang chuan kan in sak lai pawh chu kan khawih zawm leh nghal a. Hna rum kan thawk ve thei em em si lo va, ka Nu nen chuan an chhun ei tùr siamin kan lo buai mitin ve ṭhin a. Dàwr thil lei tawp ai chuan mahni a siam chawp hian a hláwk zawk a. Senso a hautak loh zawk bâk ah puar khawp ei tùr kan siam thei zawk a. Hlawhfa tán leh kan tán pawh a ṭha ve ve zawkin ka hria.



Inrinni ah chuan Lyn-in min rawn pui ve a, ka Nu nen ngawt a chêt ai kha chuan kan thawk hlawk khawp mai. Lyn-i mawng a zâng bawk a dár 11 rîk hma in chhun thil ei tùr chu kan siam zo ta der mai a. "Tih tur dang a awm tawh rih chuang lo bawk a, in sakna ah chuan va kal ve reng reng ila" Lyn-in a tih chuan ka lo tho ve vat a. Eitur kan va pek bâk hi ka phei tam lêm lo va, min chhawr nasat tum viau si kha thawh mumal pawh ka nei veleh chuang miah lo.



Kan in sâ chu mi in sa pangngai aiin hlawhfa kan chhawr hnem hret a. Mi sàwm lâi mai kan chhawr a, hautak deuh mah se zawh vat vat kan duh vang niin ka hria. Hnathawk kan tam na nâ nâ chuan hna pawh a lo sâwt deuh a. Ni khat chhunga an thawh zawh pawh hi a tam ve khawp mai.



Kan va thlen chuan ka beisei loh lutukin U Rempuia kha ka va hmu ve hlawl a, min hmuh rual chuan a lo khi suk a, ka lo nui ve ringawt tawp. Nidang zawng khan ka hmu ngai miah lo va, a lo thawk thar ve anih ka ring. "Helai hi i room tùr tiraw? A nuam dâwn khawp mai, a zauh hmel bawk sia" Lyn-i chuan min be mawlh mawlh a. Mahse U Rempuia ringawt chuan ka rilru a la pêng tlat pek anih chu! Eng dang vang ni lovin a hnathawh lai chuan min rawn melh leh zawk ṭhin a. Va melh ve kher lo mah ila ka mit sirin ka hmu fuh thei bawk si. Nuam ka ti miah lo.




"Chhun chawlh a hun ṭep tawh sia, kan thilsiam sa te kha va ti lum ila, ei mai theih turin va buatsaih teh ang" ka ṭhiannu bulah chuan ka ti tawp a. Helai hmun aṭanga kalsawnna hun remchâng hi ka zawng a ni ber. U Rempuia min lo melh leh zeuh ṭhin chuan ka awm a ti nuam lo va, ka chêt a tibuai vek. Lyn-i lah chuan a lo hrethiam der si lo, "Kan phei ve chauh alawm, enkual phawt ila eitur chu kan va buaipui leh zawk dâwn ania" a lo ti tlat a. Kan inrelah chuan a vei kual thauh thauh a. Hnathawk sa a hmelhriat hote nen chuan an inbe zui luam bawk a. Kan insak ni mah se ka lo kimki em em thung a. Lyn-i te in tùr chu a ang zawk mah.





"Min va hlauh hmêl ve" ka hnunglam aṭanga rawn ti thûm bul bultu avang chuan ka phu dawrh pek a, midangho chuan min lo ngaihven lo hlauh. Ka inher vat a, U Rempuia nen kan in hmachhawn ta rân mai, "Hlau lo e" ka nui lui sak a, mahse ka mitmeng aṭang chuan a hrethiam vek aniang mit tizim sun hian min lo melh a. "In hah tawh àwm mange?" ka zâmna tih reh tum tak chuan ka ti zâng leh vah a. "Hnathawh chuan hah hlê tur" a lo ti vut a, min rawn kalpel rual chuan ka lo phu leh ringawt pek a. A va han atthlak tak!



Kârtluanin U Rempuia chu a rawn thawk ve a, thil danglam em em thleng lo mah se eng emaw châng hian min lo melh leh vung vung ṭhin a. A ngaih ṭhat thlâk miah loh. A chanchin ka hre tam lo va, ka hriat zawng chu U Esi bialpa anih bakah a lerh hle tih zawng chu a nimai. Belhchian ka châk ru riau a, mahse chutiang tùr chuan huaisenna ka neih loh bakah zawh tùr pawh ka hre lo. A lakah eng rilru mah ka pu lêm lo va, mahse a palen vang nge a mi dip a na riau a. Kan insakna ah chuan lo thawk ve tawh lo tawp mah se ka pawiti miah lo.




"Mipa ho lerh zia hi chu aw..." ka khuma a mut laiin Lyn-i chuan a rawn ti chhuak hlawl pek a. "Leh ringawt zel a" ka lo tih chuan "Ania lawm, hmeichhia hi kan fel tehlul nen tinge mipa sual deuh deuh hi kan tawn fo le" a lo ti leh mawlh mawlh a. "Hmeichhe sual na laileng hi chu kan sual ve teh ania aw" tiin mipa thlavang ka lo hauh vat a. Kei ka ngaihdanah chuan mihring hian mize hrang hrang kan nei ve bawk a. Kan mize pakhat lek hi kan nun pum teh nan hman ṭhin tùr a ni ngai lo. Chutiang chiah chuan mipa lerh pakhat kan hriat fuh avangin mipa zawng zawng an lerh ta vek tihna a ni kher lo.




"U Es-i hi ka khawngaih zozai" a rawn ti chhuak leh hlawl a. A thusawi chuan ka beng a lo verh zat mai. Mipa lerh a sawi nen chuan inzawmna a nei ngei dâwn tih chu hrilh chawp ka ngai lo bawk. "U Rempuia chuan a lerh san leh tawh em ni?" tim deuh tak, hre châk bawk si hian ka lo ti sep a. "Ka hrechiang chiah lo, mahse chutiang vêl chu anih ka ring an lo inṭhen leh reng tawh alawm" a rawn ti zung zung a. "Ehee Krismas dâwn pawh khan an la inzui sia" ka lo ti ve hluai a. "Kum thar hma khan an inṭhen an ti. U Rempuia khan a lo kawp leh tawh aniang. Chu lo chu puh tur dang ka hrelo" a lo ti leh fak fak a.




"I hriatchian loh chuan sawi ringawt suh, thû hi a kual a kual phei chuan dik tâwk lo a tam tawh ṭhin sia. Ṭawngkam fimkhur tur, tuna i thusawite kha midangin an lo hre reu reu ange" ka lo ti duah a. "Awww...i bul ania ka rin dân ka sawi ve mai alawm. Midang bulah te chuan mi chanchin ka sawi ngai lo" a lo ti ve vat a. Thu dang a rawn sawi zui daih a, mahse mak tak maiin ka rilruah U Esi te ringawt chu an awm zui a. A hrehawm zawk tak tak a ni.




"Rempuia...ka number hi lo Save rawh aw" a message chu ka chhiar nawn sek a, Save tùr a nih leh nih loh pawh ka hrethiam lo. Ka rilruah zawhna tam tak a rawn lût a, engvanga min lo be ve ngawt nge anih? A la inrintawk hmel em em zui a. A message chu chhâng lêt lêm lovin a nihna ang ang chuan ka dah tawp a, a number pawh chu ka Save ta chuang lo. Ka hmelhriat ṭha leh ṭhian ṭha pawh a ni lêm lo va, ka Save ngawt chhan tùr ka hrelo.




Tun hnaiah a chanchin Lyn-in a sawi peih bawk a, ka hre ve nêl nual tawh a. An khawsak theih zia ka hriat tâkah phei chuan engvangin kan insakna ah khan a lo inhlawh ve ringawt le tih ka inzawt nawn fo mai. A Nu leh Pa te sawrkar hnathawk pension ve ve an ni a. An unau zinga mipa awmchhun niin sum leh pai ah an harsa bawk si lo. Ka ngaihtuah ngial pawhin kan bula a lo inhlawh ve ngawt nachhan kha ka hrechhuak zo lo a ni. Dàwr lian tak an nei bawk a, Lyn-i sawi dàn kha chuan an dàwr chu aman a enkawl a ni àwm e. Dàwr tihah khan dàwr satliah ni lo, dàwr hung zet mai hi ania. Kan khúa leh a chhehvel a wholesale rate-a pe chhuak tute hi an lo ni reng a. Nepnawi leh stationary thil an zuar nasa a, frozen lampang thlengin an zuar, Lyn-i sawi dân kha chuan an zuar chikim lutuk.



Ka nun chu a pangngaiin a kal chho ve bek bek a, thil thar sawi tùr em em a awm lo. Nitin kan insakna ah ka buai ve a, in tak chu sa ve lo mah ila eisiam ah ka Nu nen kan lo buai ve em em a. Kan hnathawk te'n kan eisiam min fak der ve na te chu ka lawmna a ni. Unau pahnih chiah kan nih avang hian indaih loh a na ve ṭhin a. Kan têt zual deuh lai phei chuan ka Nu vekin engkim a ti ṭhin si a. Min chhawr hma ang reng khawp mai, middle school ka kal chuan eirawngbawl ilo engkim ka thiam deuh vek tawh. Nin châng leh peih loh châng nei ve fo mah ila eirawngbawl thiam hma chu a lo ṭha khawp mai. Aizawl lama ka û nen in kan luah hnu pawh khan ka chhawr ve em em a. Ṭhianho thil tih khawm ah lah nise eisiam tu ber ka ni a, thil dangah ka ãwl hlauh thung a. A awlsam phian ṭhin.




"Lapui...ka number i la save lo a nimaw?" U Rempuia message chu enliam leh mai ka tum a, mahse engtin emaw tal a chhàn lêt ve chu ṭha tawhin ka hria. Chhàn lêt dàn tùr erawh ka hre hauh si lo. A number Save tura min tih aṭang khan kârkhat a liam tawh a, a reh ve mai dâwn emaw ka lo ti hman tawh a. Chutia min rawn be leh hlawl chu chhân lêt ve ngei a ṭha tawhin ka hria.




"Save ngawt nachhan tùr a vâng e" tih tê mai hi ka va thawn a. Mahni tâwk ah mipa biak hi chu ka harsat lutuk bîk lo va. Ngaihzawng la nei ngai lo tawp lah ka ni hek lo. Mahse tleirawl ât laia pahnih ka neih bâk kha ka nei leh ta miah lo va. Nula ti a sawi theih ka nih hnù hian tumah ka la ngaizawng lo va, bialpa han neih châk em emna pawh ka nei chuang lo.



"Lo lèn i phal em?" a rawn ti leh daih a, a engamah hma in ka thâwk a lo rang ringawt a. "Engvang ngawt chuan maw?" tiin ka zâwt lêt kauh a, ka tih dân chu a hawihhawm lo tih pawh ka hria. Mahse a lerh zia Lyn-i sawi kha ka hrechiang tawh a. Min rawn tih dàn vêl hi ngaih kawih loh tawp a har deuh chu a ni. "Ka number chu lo save ang che aw " a rawn ti leh daih a. Reife ka inngaihtuah hnù ah ka Save sak ve ta hram a. Chuti taka number Save rawn duhte chu lo induh khum ngawt thû awm hek lo le. Mahse ngaihtuah zui erawh ka tum lo bur.




Ka Nu in min rawn koh tâkah chuan choka lamah ka phei vat a, hnathawk ho chhùn thil ei hun a lo ni der tawh chu niin! Lyn-i a rawn lang veleh hlawl bawk a. In sakna ah chuan kan hruai phei ve nghal a, ani hi chu a awlsam angreng a. Ka tih apiang hi min lo zawm ve thei zel ṭhin a, koh kal a awl ti ila a dik ber ang.




"Eng nge i lo tih teh thut a?" kan ina kan lêt leh hnù chuan ka zâwt a. "Thil hrilh tùr che ka nei a, pawimawh deuh" thutak zet hian a lo ti vat a. Kan thil eina vêl kan tihfel hnù chuan room-ah kan inzui lût nghal a. Ka ṭhiannu lah chu a serious hmêl nasa mai bawk si. A thusawi tùr min ti hre châk zo vek.



"Eng nge i sawi duh chu le?" a sawi hun pawh nghak thei lo chuan ka lo ti nghal vat a. "U Rempuia'n i number min lo dil ve ringawt a, mahse ka pe lo" a rawn ti hlawl a. "A ngaizâwng tlat che in ka hria. Tlang deuh chuan a sawi lo nâ in kan inhmuh fuh chânga a melh ṭhin dàn che te kha ka ngaihtuah lêt a, a ngaizâwng che in ka hria. Mahse i tán ka duh lo, a ṭha lo. Sawi leh sawi hnú U Rempuia phei chu a lerh ropui si, hlauh tûr " a ti leh duah a. Min lo bia tih chu sawi chi pawh niin ka hre tawh lo. Ka ṭhiannu hian a ei lo sa nasa mai bawk si a. Ka sawi palh hlauh anih chuan keimah zawk min hau hrep mai ang tih pawh a hlauhawm.



A haw hnù thleng chuan a thusawite chu ka ngaihtuah zui a. U Rempuia khan min ngaizâwng niin a ring nghet bur mai a. Keipaw'n tlêm chuan ka awih ve deuh, chuti ni lo se min rawn biak ngawt nachhan tùr kha a awm lo. Mahse rilru leh tih takzeta min duhna erawh a neih ka ring hauh lo. A lerh êm a, a la serious chuang lo vang. Hawklak leh kalpah deuh a biak atân min lo ti pawh a ni thei a. A thangah chuan awh ka tum lo nasa.




Ka phone a rawn rîk chuan ka en vat a, ka ngaihtuahna hria ni àwm takin U Rempuia a lo ni. "A va mak teh hlawl ve mawle" ka phun sep a, han lâk loh tawp chu thil pawimawh te a lo nih tâk in tiin ka la a. Mahse engmah a rawn sawi zui miah lo. "Hello...ka ṭawng i hre thei em?" ka tih mawlh mawlh pawh chuan a reh zui vang vang a. Ka awmna te chu ka'n sawn kual vêl ṭhin a, a thawm hriat tur a awm chuang lo. A rawn nui hawk ka hriat tâk ah chuan ka phone chu la sawnin ka melh vak a. Hepa hi min fiam kual mai mai niin ka hria. Rang zetin ka hmet tàwp ta hmak a, ka lo la kher kher chu ka inchhir lutuk. "Zahthlak lutuk" ka phun hlak a, ka ngei tak tak ani.





Zanah chuan ka beisei loh lutukin kan inah an rawn lêng anih chu! A ṭhianpa pakhat hi a rawn hruai a, mitthi ina a ṭhutpuipa kha ni ta in ka hria. A hming chu Nunga a lo ni a, a tirah hre lawk lo mah ila a chhûngte a'n sawi tâkah chuan ka hre chawpchilh ve mai a. An rawn lêng chu chhungkua min ṭhawng tlâng khawp mai. Mahse ka Nu leh Pa te hi hetiang kawngah hian an puitling em em a, ka mualphona turah min lo thup mawiin ṭha takin an lo dawngsawng a. Kei erawh ka la ni deuh huih mai. Engmah rawn sawi lâwk a awm loh chu thuhran, an rawn lêng lût ngam ringawt pawh chu mak ka ti lutuk.



Ka Nu leh Pa te chuan hrethiam takin min mut san vat a, mu lovin la awm ve reng se ka ti kher mai. An bulah hian thlah fal chi ka ni pawhin ka hrelo. Thingpui han lum ringawt dâwn ila kan in zo chiah bawk si. Tih tur a vâng, ka kàwm thiam bawk si lo. Ka awm dàn chu a lài vêl vek.



"Hahdam deuhin awm rawh, kan ei zo dâwn hlei nem che" U Rempuia'n a rawn tih chuan ka melh vat a, nuihza insûm zet hian min lo melh a. "Aaa....chutiang pawh a ni lo" ka lo ti ban chhalh ringawt a. Ngáwi rengin kan ṭhu ho ta ngat ngat a, an phone an khawih daih a, keipaw'n tih tùr ber hre chuang lovin ka phone chu ka tuai let ve sek a. Haw vat vat se ka ti kher mai.



"Lapui..." U Rempuia chuan a rawn ti leh hlawl a, "Umm..." ka lo ti vat, ṭawng chhuak ngat ila ka âw a ri che che ang. "Bialpa i nei em?" a rawn ti teh tawl a, U Nunga chu a lo nui nghal huk a. "I va hmanhmawh tak" a ti sup chu ka lo hre pha reng. Chhàn mai dàn tùr hre lovin thâwk ka lo la halh ringawt a, "I neilo tiraw?" a rawn tih leh chuan " Nei e" rang zetin ka lo ti hmiah mai. Khawia bialpa mah nei hawt si lovin nei angin ka inchhal ve hmiah chu ania. Min rawn tibuai zui lo se ka duh vangin ka lo inveng lawk a ni ber. "Dawt i sawi" U Rempuia chuan a lo ti hmuk a, U Nunga a lo nui leh huk tawh.




Kan in aṭanga an chhuak fel chiah hnâr a hlît phawi ang huai ka ni, ka âwm dawmin ka thaw chhuak nghal ham ham a. Boruak rit zet an rawn keng tel ani chêk ang chu, an chhuah rual khan kan inchhung boruak a pangngai leh chauhin ka hria. Ka hahdam huai tak na in min thlah dân khan ka ngaihtuahna erawh a tibuai tho. An lo lên leh fo tùr thû an sawi a, U Rempuia lah khan bialpa lo nei miah lo turin min ti tawl pek a. Mi pangngai tán chuan hriatthiam loh chi pawh a ni lo.



Loh theih lohin Lyn-i ka hrilh ve ta tawp a, keimah maia pai dam chu a harsa êm a ni. Tih dàn tùr a lo hriat takin tih thil thû ah ka râwn a, "U Rempuia chu hnaih loh a him ber" a rawn ti vak ringawt a. Pehhel dàn tùr min hrilh tùr a hre chuang bîk bawk si lo. Kan ṭhian dûn rilru chu a tibuai takzet a ni.



A sawi ang tak takin U Rempuia chu a rawn lêng nawn leh sak a. Ka chhûngte men lai zawng chuan pangngai takin an inkawm mai a, mahse an mu chiah chu a hma zan ang bawk khan kan awm leh a. Kan titi lo va, mahni phone ṭheuh khawh in ngawi rengin kan awm leh tawp mai a. Titi an vawrh miau loh chuan sawi tùr ka hre bîk bawk si lo. Kan awm dàn chu a manganthlak tih piah lam a ni. Hnar ngawt dâwn ila thil tih chî a ni si lo, kan awm awm chuan kan awm ve mai zel a. Phone-ah min rawn be zui ngai lo va, a rawn lêng a, a duhtawk em em ni berin ka hre tawh.




Chutia zan nga zet a rawn len tâk ah chuan tukṭhuan kan ei laiin ka pa chuan min zâwt thâwr a, "In inngaizawng ve deuh reuh em ni?" a tih chuan ka lo pha rang kher mai. "A teuhlo mai" ka lo ti vat a. "An lo lêng ve zantin bawk sia, in inkawm satliah ti dawn ila i kawm rual an ni bawk si lo. Rawn lên chhan chu an neih ka ring tlat" a ti nuah nuah a. Ka kawm rual chu sawi loh, ka û te nen an inrual vêl ang a. Kum 28 vêl chu an nih tawh ka ring, kei hi tunah kum 19 chauh ka la ni sia, kum 10 dâwn in kan inthlau tihna anih chu!




"A...an rawn lêng ve mai mai aniang" tiin phat mar tum viau mah ila ka Nu leh Pa te chuan an awih loh hmel khawp mai. "A hrim hrimin Rempuia chu bialnu nghet kha a nei reng emaw ka tia, a rawn lêng tlut tlut bawk si. Mi ngaihdàn a ni lo vang tih a hlauhawm, mi mitmei vèn a na ṭhin si" ka Nu chuan a lo ti ve hluai a. "Nula rim te chu a thiang alawm" nui vur vur chungin ka pa chuan a lo ti awlsam veleh then a. Min lo lèn chhan tih chu an ring nghet hmiah tawh niin ka hria.




"Awi...Lyn, ka mangang. A rawn lêng reng a, kan ṭawng ngai chuang bawk si lo. Tihngaihna ka hre tawh lo, lêng lo tura intih ngawt thû lah a awm bawk si lo" ka ṭhiannu bulah chuan rilru hah zet hian ka sawi a. U Rempuia chungchang chu keimahin ka pai rei tawh lutuk a, ka ipik êm avangin sawi pui turin ka va lenchilh tawp a. Thil dang sawi hmasa lovin kan topic-ah ka luh pui nghal chat a. "I lakah rilru a pe ve takzet niin ka hre ta tlat anih chu" Lyn-i chuan a rawn ti heu mai. "Naaa....khatiang zawng kha chuan min sawipui lo law law teh. A lo lên tawh loh dàn tùr kawng dap a ngai zawk ani " ka lo ti nghat thung a. Thû min han râwn tùr pawh chu a hre vak bîk chuang lo.



"Bialpa nei angin insawi mai rawh" a tih chuan ka insawi tawh thû leh a awih loh thû in ka lo chhâng vat a. "Ehe...a duh tak tak che anih chiah chu " a rawn ti leh tawh. Rum zetin ka lo melh a, min ṭhen khum ṭha ringawt a. Ṭum dangah chuan ngaihdàn ṭha zet a nei ṭhin kha ania, ka mamawh hun taka a thluak a hmang thei lo lutuk chu ka haw hlur mai. "Lo lungngai lo phawt la, keiman ka lo bia ang" a tih leh lâi mêk chuan "Aih, ka hrilh che tih hi a hriat ka duh lo" ka lo ti bawk si. Hahthlak min tih hmêl zet hian min melh ta vang vang a. U Rempuia chuan ka ngaihtuahna a tibuai ve tih pawh hi a hriat ka duh lo bur.




"Lapui" ka ṭhu mar nghal awt a, U Rempuia chu a lo nui ri nghal hawk thung a. Inhmatawnin kan inṭhutchilh rân a, min rawn koh thut kha ka beisei lo bawk nen ngaihtuah mang hlei lovin ka phone ka lo tuai melh melh kha ania. Zan dang ang bawkin a rawn lêng leh a, U Nunga a tel ve lo lehpek a. A awm kha chuan kan boruak rit lutuk a zâng ve deuh ṭhin kha ania. Tunah tak hi chuan rilru kàwi pu lêm lo mah ila a zamawm ngawih ngawih.




"I bula ka awm lâi rengin i ngaihtuahna i va kawm nasa ve" U Rempuia bawk chuan a rawn ti leh sup a. Meng buai nakin "A...aw...ih...eng nge ni ta?" ka ṭawng buai nawk nawk mai. Ka ṭhu ṭha nghal sat sat bawk a, ka awm dàn chu ka mawl hmel ngawtin ka ring. U Rempuia chuan min lo nuih leh suk tawh! A lakah hian rilru danglam tak pu kher lo mah ila ka zâm tlat zel hi a mak, a mi uap a nat vang hi ni berin ka hria.



"Ka awm dàn hi i hrethiam ang tiraw?" a rawn tih chuan " Aih hrethiam lo" ka chhàn ran dàn em em chu ka hriatthiam lutuk vang tih a hai hauh lo vang. "I hrethiam mah mah zawk a ni" ka rin ang ngei ngeiin a rawn ti sup a. "I awm dàn ang khan ka awm ve lo" ka lo ti hmiah a, ka duh lo tih hi zêp ka tum hran lo. Hre law law sela, lo lêng tawh lo bawk sela. Ka hahdam huai zawkin ka ring. "I la awm dâwn alawm" mahni inringtawk zet hian a lo ti hmiah a. "I lerh" ka lo ti ve hmak, ka melh ling hlar bawk a. A mitmeng dam ruih leh lerh ru zet chu ka ngai thei dêr lo. "Teh fo che u hian" a rawn ti hluk a. A ṭawngkam aṭang chuan lerh tih chu a lo hlawh fo tawh tih a hriat reng mai.




"Hmeichhe pakhatah rinawm rawh, mipa kawp lawr deuh hi hmeichhia te'n kan ngaisâng lo ania, pasal atân phei chuan kan duh lo. Tunlai chhanah mipa fel leh ṭha tâk tak an tam tawh si a, hmeichhe ṭha tak i chang lo hlauh ange" ka ti duah a. Eng ber nge sawi ka tum pawh ka hrethiam lo. Fuih ve ngei ka tum chu anih hmêl a. Ka ṭawngkam thiamna in a tlin hlawl lo a ni e. Ka beisei loh zet hian U Rempuia chu a rawn nui leh hawk hawk a. A ngaihna hrelo fê a ka melh lai chuan "Ngaihzâwng ka kawp ngai lo" nichina a nui hmêl bo ṭhak khan a lo ti hmuk a. A mood inthlak chak dân em em chu engtin nge maw a theih zawk ni?




"I lerh zia te chu khawpum hriat alawm. Khúa a ka awm ngai loh avang khan hrelo bîk tùrah min lo ngai ange. Min bum chu tum buai lo mai rawh, lerh lâr in alawm i lâr" ka lo ti leh zung zung a. A dawnsawngtu tán chuan ka ṭawngkam chu hriat a nuam lo ve khawp ang. Mahse ka pawisa peih vêl lo, min bansan theih nan chuan eng ṭawngkam pawh ka hmang mai ang.



"Thil lah hi in hre sia, in hre dik lo thei si" a ti hluk a, thinrim ai mah chuan a lungawi lo hle niin ka hria. "Tunge ngaihzâwng ka kawp tawh han sawi teh. Sawi tùr i hriat phawt chuan ka thlah vang vang ang che" a lo ti leh khut a. Ka ngaihtuah a, uluk taka ka han ngaihtuah kual ngial pawhin ngaihzâwng a kawp sawi mai tùr ka hre tlat lo. Ka ṭhiante leh mi sawi lah engmah ka hrelo, a lerh an tih ringawt chu ka hriat awmchhun a ni.



Ka ngaihtuahna buai zet chu a lo hrethiam a ni chêk ang chu "Sawi tùr i hriat tawp loh kha! Finfiahna i nei te anih ngawt loh chuan lerh min ti ve ngawt tawh suh" min ti ta nghut a. Ka chil ka lo lem khalh ringawt a, a ngaihzâwng kawpte chu Lyn-in a hre ngei ngei ang. Nakina chhuahchhal ah tal pawh ka hre ve ngei ngei tùr a ni.



A haw tùr chu pâwn thleng ka thlah ve thlap a, a kal mai dâwn emaw ka tih laiin ka kutah chuan min rawn chelh teh tlat a. Ka ṭang nghal ṭung mai, "Hlauthawng suh, engtin mah ka ti dawn lo che" a tih chuan tlêmin ka inthlahdul veleh ta deuh a. "Min duh turin ka nawr lui ngawt thei lo che a, chu chu ka duh dàn pawh a ni lo. Mahse hei tal chu ka ngên ve duh che. Mî min sawina aṭanga min teh lovin ka awm dàn leh nunphung, nangmah ngeiin i hmuh dàn aṭang hian min teh ve la ka duh. Chuti chung chung pawh a i mithmuha ka la tling lo cheu anih chuan ka tibuai leh tawh ngai lo vang che. Keimah ka nihna angin chance min siam sak ve la ka duh, midangin ka chanchin an sawina aṭang ni lovin " a ti ta duah a. A thusawi chuan eng emaw kawng zawng tak hian min hneh tlat pek a. Ka mut dâwn thleng pawhin ka ngaihtuahna a tibuai zui kher mai.




"Eng nge i lo ngaihtuah leh veng veng zel a?" ka bu nghal lâwp a, Lyn-i chuan rum zet hian min lo melh a. "I mak emai, i bulah ka titi ve char char a, ka thusawi engmah i ngaithla lo. Tunlai hi eng nge i hriat? Dik lohna chu i nei chiang alawm" a ti leh hlawih hlawih a. "Sawi ṭha leh rawh, uluk deuhin ka lo ngaithla tawh ang" ka lo tih ve chuan rum zet hian min rawn melh leh a. "I mak maw...ninawm a" ti hlur in a alu vel lâi chu a dah tau hmak a. Min kàwm tùrin a lo lêng ve êm êm a, eirawng min rawn bâwl pui thlap bawk a. Ka lo rulh lêt dàn ah chuan a läwm hlawl lo tih a lang reng mai.




"Tihpalh..." ka ti ta ringawt a, a titau fo a, han in thlêm vêl hi ka thiam si lo. Heti hian a hnu ah a insawh tau lungawi veleh mai zel. "I ninawm emai, i rilru kap tu min hrilh chuang bawk si lo. Tunlai i awm dàn hi ka hrethiam thei thlawt lo che" a lo ti zung zung a. Nichina a thusawi ka ngaihtuah loh vang ringawt a lungawi lo kha chu a ni tawh lo. A thinrimna hi ka hrethiam em em bawk. Hetianga ka awmna hi kar hnih dâwn a ni tawh a, U Rempuia thusawi khan min mawlh tlat vang ani. A lo lêng ta lo vang vang a, "Hun thâwl ka pe ang che" a ti kha ania. Mahse phone kaltlang erawh chuan min rawn ngaihven reng a. Ka lo hriat dàn ang em em a sual leh lerh kha chu a nih hmel bîk lohin ka hre ta hial anih hi.




"A mak...sawi lai mêk mêk paw'n " rawn ti leh hlar tu chu Lyn-i a ni, a hmêl ka en a. A thinrim luatah a ṭap ṭep tawhin ka hria. "Lyn..." ka ti hliai a, sawi chi a ni ang em ka hrelo na in keimah maia thuthlukna siam tur chuan ka ngaih a ngam thlawt lo a ni. "Sawi rawh...ka ning tawh lutuk" a lo ti bak leh hlar a. Ka hrilh lo anih chuan a thinrim hle dâwn tih ka hai lo. Ṭum dangah min nawr lui ngai lo bawk a, a hriat ve a hun takzet tawh anih hi. U Rempuia chungchâng chu ka hrilh fai ta kelh a, ka sawi karlakah a lo meng pawng leh zawr zawr ṭhin a. A ngaihtuahna tùr àwm ang pawh a hriat tlang theih hialin ka hria.




"Engtin nge ka tih ang?" ka thusawi tàwp lamah chuan ka ti ta ngawt a. "A duh ve tak tak che in ka hria. I chanchin min rawn zawh peih dàn em em te kha keipaw'n mak ka ti" a tih chuan "A lo zawt ṭhin che maw?" phawk zet hian ka lo ti a. "Zawt ṭhin e mawle, chutianga innel em em sa pawh kan ni si lo va. Khatia zah pawh dâwn lo va min lo zawt meuh kha chu keipaw'n mak ka ti alawm. A lerh tih ka hriat avang khan ka lo hrilh ṭha duh lo mai pawh a" a ti ta duah a. "Enteh Lyn, a lerh hi in ti fo sia, tunge ngaihzâwng a kawp tawh i hria em?" U Rempuia min zawhna ang chiah chiah kha ka zâwt ve tawl a. A inngaihtuah vang vang hnù pawhin sawi fak tùr a hre bîk miah lo nia mawle. Amah paw'n mak a ti hial.




"Tinge mi hian lerh an tih tlat le?" ka ti leh thlawt a, ngaihzawng a kawp ngai azeng pawh a ni si lo. "Lerh" ti a han than tlat mai chu mak ve deuh asin. "Nia tiraw" Lyn-i pawh chuan a lo ti ve ta ngawt a. Sawi zui vak ngaihna pawh kan hre tawhlo a ni ber. A haw dâwn chuan "Fîm takin inngaihtuah la, thuthlukna i siam dâwn ania. Kei chuan eng thuthlukna pawh siam la ka pawmpui vek che, i lam ka ṭang zel ang" a ti nghet charh a. Ṭhian ṭha tak tih tur ni pawhin ka hria.



Zanah chuan U Rempuia a rawn lêng veleh teh tlat a. Lyn-i nen kan inkawmna kha a lo hria emaw tih mai tùr a ni. Zan dang zawnga rawn kal tawh ngai si lo a rawn lang leh thut chu ngaihbel tùr ka zawng kual ruai mai.



Ka chhungte nen pangngai takin an inkawm leh a, ka lo hmuh ve dân chuan a puitling fu in ka hria. Mite sawi ang mai mai kha chu a lo nih bîk loh zia keimahah a chiang tawh a. Ninawm si lo hian min zar buai hneh ve a. A ngaihawm tâwk chauha reh daih châng lah a ngah. Dik tak chuan ka rilru a la pêng ve hlê tawh tih hi chu phat rual a ni lo. Ṭawngkam thlum tak hmangin min rawn be ngai pawh a ni chuang lo, mahse min ngaihsakna a lan tîr fo a. Ka zawh ni hauh si lovin a thiltih engkim min rawn hrilh thlap ṭhin a. Ho tê pawh nise a rawn sawi zel a, ka rin aiin a peih rei zek mai. Fiamthu rawn thawh zeuh lah a thiam si, a message te hi ka lo nuihpui veleh hak hak ṭhin anih kha.



"Lapui" min rawn ko leh thut tawh, a ngai tê tê in kei lah chu ka lo phu leh awrh pek a. A lo nui huk mai. Ka chhûngte an mu fel leh diam tawh a. Min thlah fâl fo hi nuam pawh ka ti lo, sawi tùr a vâng thei ropui si. "Min kawm aiin ngaihtuahna kawm i thlang fo zawk a" tiin a kiau leh suk a. A bawp khawkherhin thatchhe zet hian ka hma zâwnah tak a ṭhu a, mit tizim sunin min lo melh bawk a. A awm dàn chu hmuh a nuam ru riau, mahse a mi uap a na mah mah hret a ni.



"Eng nge i sawi duh a?" ka chil lem khalhin ka lo ti ro halh a. Han kawm chiam dàn ka thiam lo, phone-ah te hi chuan tih dân dân a la awm a, hmaichhanah erawh ka zâm chhe vek zel. U Rempuia chu a lo nui leh suk a, "Innocent reuh bawk si" ka hriat tura sawi ni lo mah se a phun sup ri chu ka lo hre hram a. "Hun ka pe hnem tâwk tawh che in ka hria a. Min duh tùr i nih chuan min duh hun a ni tawh viau in ka hre bawk a" a rawn tih leh chuan sawi mai tùr pawh ka hrelo. Ka ṭawng ve hma chu ṭawng chhuah a tum tawh lo tih lah a hmêl lan dàn aṭangin a chiang reng si.



"A...Rempui..." reife kan ngawih hnu chuan ka ti halh a, sawi zui tur em em pawh ka hre chuang lo. Ka rilru chu ka pe ve hle tawh tih ka hria, mahse pawm harsa ka ti a. Ka ngaihzawng tùr anga ngaihtuah phei chu ka la ngai ngam thei lo. "Lyn-i ka lo hrilh ve phawt ang" ka rilru a rawn lang hmasa ber ang chuan ka ti leh pawp a. Ka beisei loh zetin U Rempuia chu a lo nui chhuak ta hawk hawk a. A hmêl thutak zet bo ṭhak khawp khan han nui a mawle. A ngaihna hrelo fê a ka lo melh chuan "Thuthlukna chu i siam tùr, chumi zawhah i ṭhiannu chu i hrilh chauh ang. Hetiang chu mi pahnih inkar a ni a, midang in ṭanpui tir na chî a ni lo" a lo ti nghet charh a. A hmêl thutakna phênah chuan nuihza insûm hmêl ka la hmu tho.



"Ka hre tawh bîk lo e a" hmui pet zeuh chung chuan ka ti ta ngawt a. A duh hmu ta ni âwm tak hian U Rempuia chu a lungawi hmêl viau tawh. Ka ngaih a ngam leh chiah si lo, "Ka duh tihna che a ni chuang lo ania" tiin ka pha zui leh zat a. "Kha bâk bâk" a lo ti khauh, min melh zâm tum ni àwm tak hian tawrhhlelhawm zetin min rawn melh a. Ka hawisawn nghal vat a, a vawi tam tak nan min nuih leh hawk tawh.



"I bulah khan ka lo ṭhu dâwn a, i phut zawk loh nan ka hrilh lawk che anih chu" ti leh in muangchang hian a rawn che chhuak a. Hnialna hun pawh awm lo in ka bul a rawn thleng der mai. Ka mitmenga zâmna leh hlauhna chu a hrethiam a ni chêk ang chu "Hläu suh, engtin mah ka ti dawn lo che. I bulah ka ṭhu ringawt dâwn" a tih chuan ka inthlahdul ve tial tial a. Thu dang daih min sawipui ta bawk a. Ka zirlai chungchang te, ka awm zel dân tur te min zawt a. Nichin lawka min duh thû sawi a thutak zet kha chu a ang leh tawh miah lo. Tunah tak hi chuan ka û titi pui ka ang berin ka hria.



A haw dâwn chuan pâwn thleng ka thlah leh thlap a, kan boruak uap deuh churh kha a reh vek tawh a. Ṭhian inpawh takte pawh kan ang zawkin ka hria. Min tih zâm a thiam tluk zetin awlsam takin min bengdai leh mai a. Mi mak ve tak chu a ni, a awm dàn hian min thunun ti tawp mai ang.



"Ka bialnu i ni tawh a, i bialpa ka ni tawh. Kan inngaizawng tawh, zanin aṭang hian" ka hriatfiah loh hlau ni àwm tak hian a ti nghet charh a. "Mahse..." ka ti dek dek a, "Mahni lehzel chu inbum loh tur" min lo tih khalh a, ka ngawi leh dâk mai. Ka rilru hria ni àwm taka a ṭawng chhuak tlat thei ṭhin hi a mak. "Mak tih viau tùr a awm lo, ka belchiang fe tawh che alawm" a lo tih leh lek phei chuan ka hlauthawng lek lek tawh. Ka hmêl thlabar zet avang chuan a lo nui leh hawk hawk a. "Ka chhinchhiahna che hi a rei tawh alawm. A hma zawng khan ka tilang ngai lo mai chauh a ni" a rawn ti leh a. Min melh dân chu, hun kal tawh ngaihtuah ni àwm tak hmêl hi a pu a. Amahin a nui leh suk a, a lungawi hmêl takzet.



Min hawsan hnù thleng chuan a kal dâwn a min melh dàn khan ka ngaihtuahna a la tibuai. Kei chuan nikum kum tàwp aṭang khan ka hre ve chauh a, tunah ka hriat aṭangin thla thum êm pawh a la liam lo ania. Thil thleng a tam hman zia erawh mak tih loh rual a ni lo. Ka rilru hneh tùr tak phei chuan thla khat leh tlêm bâk a mamawh lo chu anih hi.



Kan chanchin Lyn-i ka hrilh chuan a phusa nasa mai. Ka khumah a zuang vak vak a, ka beisei ai daihin min phur pui. A hma zawng zawnga rêl ṭhin khan a'n fak ta tak tak anih kha! A chhiat loh thû leh a huhang nat thû a sawi châmchi a. "A hma zawng khan lerh i tih kha aw...i ei loh êm kha" ka lo tih chuan "A luck vangin a lerh ah kan lo ngai mai mai niin ka hre tawh" thutak zet hian a rawn ti ta khauh a. "Ve teh khiah che chuan, khatiang ngaihdan kha chu nangmah aṭanga chhuak a ni theilo" tiin ka lo nui hak hak a. "Ka ti tak tak, chuloah U Rempuia hi ka cousin te nen an inkawm ve ṭhin a maw. An sawi alawm, 'Rempuia chu mi a be chhe ngai si lo va. Hmeichhe ṭhenkhat ho lah hian lo biak hmasak an hreh si lo, ṭha deuhin a lo be ve mai zel a. Kha tak kha Es-i thîk tâwk a lo tling ṭhin bawk sia. An buai fo chhan pawh hi ania lawm ' an ti a. An sawi êng aṭang chuan keipaw'n ngaihdan ka siam thiam chiah" a ti ta duah a. U Es-i a rawn sawi chhuah tâk ah chuan ka hrechhuak veleh chiah. Eng vang tak chuan inṭhen ang maw? Zawh ka tum hran lo va, ka hriat a ṭul anih chuan min hrilh mai tùr ah ka ngai.




"Mate...zanin chu ka lo lêng hman dâwn lo aw. Dàwr ah ka buai dâwn a, zanlaia bungrua lo thleng tur a awm a" U Rempuia message ka chhiar zawh rual chuan ka nui nghal var var a. Pangngai taka kan inngaihzawn aṭangin karhnih dâwn a liam veleh tawh a. Ka beisei phâk bâk in bialpa ṭha nih a tling. Kan la inkawp rei loh vangte pawh aniang intihbuai ik pawh kan la nei lo va. Mahse a la rei loh ngaihtuahin ka âtchilh hlê tawh. Keimah leh keimah inthunun a, duh lutuk loh zir châng pawh ka ngah mai. Mahse ani chuan min duhna lantir te hi a hreh lo va, tlâwm ah pawh a la lo niin ka hria.



A sawi lawk ang tak takin zanah chuan a lo lêng ta lo va. A buai hle aniang zan tira kan inbiak bâk chu dár 12 velah min rawn be leh ta chauh a. "I muhil tawh em?" tih tê mai hi min rawn thawn a, reply ka tum lai mêk chuan min rawn call zui zat a. "Ka message i hmuh rualin ka lo be nghal che, i la muhil lo anih ka ring ngawt a" a rawn ti nghal zung zung a. "Muhil lo e, tlaia ka muhil zeuh khan min ti mu thei lo" ka lo ti ve vat a. "Tunah i mut a la chhuak lo maw?" a rawn tih chuan " Chhuak nang, ka harh telh telh" ka lo ti ve vat a. "Anih chuan ka lo kal dawn aw" a rawn ti hem mai! "Awi leh...a tlai tawh lutuk " ka lo ti vat a. "Lunglèn hian zanrei chu a ngam lutuk asin, zàn a rei telh telh a, lung a lên telh telh ṭhin hi. Zàn a rei poh leh i ngaihawm telh telh " a rawn ti luam a. "I va han tenawm tak" ka lo ti hlak. A ṭawng chhawrthlapui deuh hian ka ten tlat ṭhin a, chu chu hria in min tilui leh zeuh ṭhin.



"Ka lo kal ngei ngei a ngai" a ti leh bur mai. "A ṭul lo" tiin hnial sateh mah ila " Ka lo kal loh chuan thi tùr ang hian ka awm" a tih tâk tlat ah chuan fiamthu mah nise hnial in awmzia a nei dâwn lo tih ka hria a. "Lo kal ta poh che, mahse inchhungah a inkawm chi loh ang. Pawnah ka lo nghak ang che" ka ti ta nge nge a. "Ka lo thlen hma chu lo chhuak suh. Pâwn a min lo nghak lovin ka lo thlen hunah ka rawn hrilh che ang a, i lo chhuak chauh zawk dâwn ania" a tih chuan ka lo pawm ve mai a. Hetiang ho tê anga langah te hian alawm min tih lâwm thiam em em. Min ngaihsakna a lan tîr dân hi ka hmuh hmaih bîk lo.



Minute tam pawh a liam hma in a rawn thleng nghal a. Ka va chhuak chiah chu nghet zet hian min lo kuah nghal chawt a. "I va han ngaihawm tak" a ti ngawih ngawih anih chu! "I over e, nizànah pawh i lo lèn reng kha" ka ti hlak a. "Dár 12 a pêl tawh, nizàn hmasa ani tawh. Chuvangin alawm ka ngaih em em che" a lo ti leh a. A nghal ru zek tih pawh hi kan inngaihzawn hnu aṭanga ka hriat chiah a ni. "Heti em em a zùn han ngah bîk" a ti leh kher a, "I over eee" uar zet a ka lo tih chuan nui hawk chungin a inlahrang ve ta hram a. Mahse min la thlah chuang lo hian min melh vang vang a, ka hmaizawna a rawn kun hniam tâk ah chuan ka mit ka lo chhing nghal tawp a. A vawikhatna atân kan infawp, a tirah chuan muang deuhin a hmui a rawn ti che a, ka chhang lêt chiah chu koham zetin min fawp tawn tawn nimai hian ka hria.




Min thlah rual chuan ka lo thaw chhuak nghal ham ham a, ka niang la khuap run chung chuan min melh leh vang vang a. "Ka hmangaih che tih hi ka la hrilh lo che tiraw" a tih chuan ka ṭek chhawk mai. "Ka hmangaih che" a lo ti leh a, ka tuiral vek maiin ka hria. Dam zet hian min rawn fawp leh vang vang a. Zanin a awm dân zet chu, pà ka ti ngawih ngawih, min ti luangliam takzet bawk.



Kan in bathlara ṭhutna te fel ren rawnah chuan insi rial hian kan ṭhu dùn a. Ka kut a khalh niap niap a, a fawp leh vang vang ṭhin a. A awm dàn chuan min fan chhuak vek, thu tam a sawi lo. Mahse min hmangaih thû a sawi khan min la ti chawmawlh vek. "Ngaihawmnu" a tih chuan "I bulah ka awm reng hi mawle" tiin ka lo nui hak a. "I ngaihawm tho alawm, eizawh tham lek ni si hi" a tih chuan ka lo rum nghat a. Ka tê chhe miah lo, hmeichhia ah chuan a lian pâwl tak ka ni ve. Mahse tinge mawni tereuhte chhuah hian min chhuah ve ziah. A lakah chuan ka tê êm lah tak bawk a. A dàr ka chen ṭawk a, mahse ka dingdihlip chauhin. "I len vang mai khan tê min ti fo suh" ka ti nghat a, "Mi liannu" min ti leh kher anih chu! Ka va han ngei mai mai tak.



"Thinrim suh, i zunah hei chen ka uai tawh tho alawm" a tih chuan "Awi...thla khat pawh a la tlin loh hi" uar zet hian ka lo ti vat a. "I hrelo" a lo ti hmuk, ka ngáwi nghal dâk a. Min hriatna a rei tawh zia a sawi kha ka hrechhuak vawng vawng mai. "Engtik aṭang khan maw?" dilchhut zeta ka tih chuan " I intithei dâwn emai ka sawi duhlo" a lo ti leh lawi a. "I ngeiawm thei emai aw" ka ti bai bai a, a lo ṭhen suk ringawt tawh. Kan inzawh chhuah hmêl loh khawp mai.



Rei inkawmna chi ni tawh hek lo, a haw ta vat a. Mahse kan hun tawite neih chhun chu kan âm dùn ve khawp mai. Thu tam sawi lovin chêt zia in kan induh tawnna kan lantir mawlh mawlh a. Heti em em hian ka rilru a hneh theih ka ring pha lo va, mahse hun tawite chhungin min sawp tuiral vek a tih theih ang.




Zingah chuan a morning wish a lo awm leh thlap a. A mipa zawk hian min thawh khalh reng mai. U Rempuia chungchanga mak ka tih leh pakhat chu a tho hma thei lutuk hi a ni. Zing dár 5 a rîk tawh hi chuan a morning wish a lo awm tawh ngei ngei zel a. A meng tlang ṭhin emaw ka ti hial. Mahse a sawi dàn chuan dàwr hawn hma a duh ṭhin a, a mu tam vak lo a ti. Darkar nga tal mu tur hian ka ti ṭhin a, mahse a lo tih ṭhan dân chu a sim ngawt thei bîk lo.




Nilengin a buai ta aniang, morning wish ka thawn lêtna chu zàn thleng pawhin a la en lo. Zanrei thleng ka nghak ngial a, a la reh zui tlat. Ka phone a, a ring ral ṭhak ṭhak bawk si. Tlem chuan ka mangang ve deuh, mahse a buai hle anih ka la ring fan a. Rilru nuam zan lo chuan ka mut san ta tawp a. Zingah chuan beiseina sâng tak nen tho chhuakin ka phone ka ban nghal a, a message a lo la awm chuang lo. Rilru a inhnem ru mawlh mawlh chungin morning wish chu ka va thawn hmasa hram a, a in deliver reng, a last seen check ka tum a, engmah hmuh theih lohin a dah bawk si. Tlãi thleng ka nghak a, zàn a ni leh tawh. U Rempuia chu a la reh vang vang tho. Ka ngaih a ṭha lo takzet tawh. Ka phone leh ngat a, a ring ral ṭhak. Mangan ai mah chuan tihtauh lamah a kal tawh a, buai viau pawh nise min lo be turin ka phût a. Min lo biak hunah pawh titau turin ka rilru ka siam fel hmiah.




Ngaihtuah zui duh tawh lovin ka inbual ta daih a, Bathroom aṭanga ka chhuak chiah chu ka phone ri a lo tàwp ve chiah a. Tihtauh tum viau si kha amah anih beisei in ka va en nghal a. Mahse Lyn-i zawk a lo ni, ka phone lêt a, a la thei leh tawh lo. A pawimawh chuan min lo phone leh mai ringin ka inthlak san ta daih a. Ka inthlak zo, mut nghal theih tùra ka khum ka siam lai mêk chuan Lyn-i a rawn lang ta hlawl a. A hmêl awm dàn aṭang chuan dik lo a awm tih ka hre nghal mai.




"I hre tawh em? U Es-i te kha...nge i la hre miah lo zawk. Aw i la hre miah lo niin ka hria i hmêl landan aṭang khan" a rawn ti lût mawlh mawlh a. Ka chhanna pawh nghak hman lo chuan amah leh amah a rawn inbe vak vak a, min ti phawklek vek. "I sawi awmzia ka hrelo" ka lo ti ro halh a. "U Es-i a rai" a tih chuan min ṭhawng ve det, mahse "U Rempuia fa" a rawn ti leh chiah chu ka nghing lawih mai. Lo dawnsawn ngaihna pawh ka hrelo. "Maw..." ka ti thei ṭawk a, ka dang a ro nghal huam huam a. Ka ṭek chhuak vek nimai hian ka hria.



Lyn-i chuan "Vawiinah khan ka cousin te'n an sawi a, ka hre ve chiah. Ka mangang lutuk a, ka rawn hrilh nghal che anih hi. Phone kaltlanga rawn sawi kha ka tum zet a, mahse hmaichhana sawi a fuh zawkin ka hria a. Ka lo kal ta tawp anih hi. Lapui, a pawi lutuk. Bul lo ṭan lo tawp ula ṭha tùr ania. Ka cousin te sawi dàn chuan inneih an tum hmêl khawp mai. U Rempuia nen chuan inla inbe ṭha reng reng em? Ka thinrim viau dâwn a, tih vak ngaihna ka hre bawk silo" a ti leh mawlh mawlh a. A thusawi chuan min ṭhawng dawt dawt mai. U Es-i a rai a, U Rempuia fa a pai, inneih an tum a tih bâk chu engmah hriat mumal pawh ka nei zui lo.




Thla khat tal tap chu mihring pangngai ang pawhin ka khawsa ti ila a dik ber ang. U Rempuia nen kan inkar a tàwp hmak a. Tawpna mumal pawh kan siam lo, khati khan a reh hlen ta tawp a ni ber. U Es-i nen chuan an innei dâwn tak tak a. Ka beisei phâk bâk in ka tuar a, ka bulah Lyn-i a awm reng a. Min fuih ãwl lo bawk, mahse ka nâ a ni. Kan inkawp chhûng kha reilotê mah nise rilru ka lo pe takzet hman tih tun hnu hian ka hre thar a. Nâ tih hian ka awm dàn chu a sawifiah zo lo a ni ber. Nêp ka inti a, ka tuar ka ti chhel lui thei chuang bawk si lo. Ka chhûngte paw'n ka boruak tawn khirh zet chu an hrethiam khawp mai a. Min sawipui an tum ngai chuang lo na in ka awm ang ang chuan min enliam tawp rih a ni ber. Hetiang taka ka tuar hi tlâwm ka inti a, mahse ka innawr lui thei thlawt lo a ni. Lyn-in min fuih ãwl lo va, a châng leh U Rempuia a rêl thùl. Kan lo inkawp hman kher kher kha pawi min tih pui ve takzet tih ka hria.





Thil thlen dân hi a rang teh phut lutuk a, ka inring hman lo ni ber. Mahse thil thleng tur tho tho anih chuan inrin hun ka nei chuang pawhin ka ring lo. Ka awm dàn mumal lo zet hmuh reng chu ka chhungte pawhin hrehawm an ti ani mahna ka û bulah, Aizawl-a reilotê chhûng awm turin thû min râwn ta tawp a. Keipawhin ka lo hnial eih lo. Karleh lawk hi U Rempuia te inneih hun a ni tawh tih ka hre ve kar si a. Ka awm lui thei lo vang. Ka tuar tih chhel luih a, natna insiam ai chuan mi dawihzep ang maia tlanchhiat pawh ka pawiti lo zawk.




Ka kal hma zan chuan Lyn-i a rawn riak a, a tàwp nan ti àwm ang hrimin ka ṭap nghek mai. Min thlêm a hnek in min lo ṭahpui ve chiam a, min lainat hmel lutuk te chuan min ti zuau zual. Chumi zan chuan thu tam kan sawi lo, mahse chêt ziain min tawrh pui ve zia a tilang a. Mahni ngawta tawrh ai chuan a ziaawm deuh te'n ka hria. Ka Aizawl chho tùr pawh Sumo Counter thleng min thlah ve thlap a, "Lo dam haw vawng vawng rawh aw..." tiin duhsakna nen min thlah a. Dam takin ka haw leh thei ang em ka hre lo, ka la tuar dawn chauh ni te'n ka hria.



Aizawl ka thlen chuan ka û in min lo hmuak a, ka û ka'n hmu chiah chu ka zuau thar leh vek. Ka hun tawn hre sa vek a ni bawk a, ka inthup lui thei lo. Ka ṭah khum leh nghek a, hrehawm min tih pui ve hle tih a thawk leh hawk ṭhin danah chuan ka hrethiam ve. Inchhung chêt ah min ring nghal chawt a, ka rilru la pêng turin theihtawp a chhuah tih ka hria. Ka ṭhiante chawei a sàwm tur te'n min ti a. Mahse ka phûr hlawl lo. Chhunah min office san daih zel sia, kan khúa a ka awm lai ai mah khan ka lung a lêng zawk te'n ka hre ṭhin. Mahse a hma ai khan ka inti paukhauh lui thei tawh a. Ka inngaihtuah lungpuam dâwn châng chuan ka chhuak thawrh a, ka theih chen chena thui ke hian ka kal leh nghek mai zel a. Hlimna ka zawng a ni ber.




U Rempuia te inneih dâwn zàn chuan theihtawpin thil dang ngaihtuah luih ka tum char char a. Ka tuar chhuak zo dâwn lo takngial a ka hriat avang chuan ka û bulah zàn chhuah ka dîl ta tawp a. Rem min tih sak tho na in dár 9 rîk hma a haw tur chuan min chah tho a. Min ngaihtuah vang a ni tih ka hria a, ka hnial bîk lo. Ka tih ṭhin dàn ngai tê in vengchhung chu ke in ka kal tluan leh parh a. Zan tlai tak a la ni lo bawk nen hlauhawm a ni lo va, vei vak pawh an la awm ve reng a. Ka rilru la pêng thei tur thil ka dap ruai a. Mahse ka ngaihtuahna ah U Rempuia bâk a awm thei meuh lo.



Vêng tawn tirha kawngpui an ṭhutna an siamah chuan ka ṭhu chàwl zeuh a. Ka phone ka phawrh a, ka beisei loh lutukin U Rempuia message a lo awm anih chu! Inngaihtuah buai lek lovin ka hawng nghal a. Message pakhat chauh mah nise a thui ṭha kher mai. Inṭhenna mumal pawh sawi lovin min bansan ta tawp kha a ni a. Tun hi a message ka dawn leh vawikhatna a ni.



Heti hian a lo ziak tlar dul a - "Mate...tawpna mumal tak ka siampui loh che avang khan ka tihpalh aw, ngaihdam dil tur che pawhin huaisenna ka nei ngang lo a ni e. Khami zàn, kan inhmuh tàwp ber zàn kha kan tàwpna tùr ani tih ka hre lâwk bîk miah lo ania. In a ka haw hnù khan Es-i hnen aṭangin a rai thû ka hria. Ka rilru kha a buai kher asin aw. Kan inṭhen tawh avang khan min lo hrilh ngam lawk lo va, thla khat chhung chu a lo zep ve ṭang ṭang a. Mahse a huaisenna zawng zawng sàwm khawm in min rawn hrilh ve a ni. A thianghlimna min hlan a, nang nena kan inkawp hmaa thil thleng vek a ni. Midang puh tùr an awm lo va, ka fa ngei a pai tih chu ka pawm nghal thlap. Dik taka sawi chuan kan chêtsual hnù aṭang khan kan inkar a chhe ta telh telh a. Mahse a thianghlimna ka lâk sak tawh miau avangin ka chelh lui ve ṭang ṭang. Lungawi lohna a neih pawhin tih lungawi hram hram ka tum ṭhin. Mahse amah zawkin min ṭhen tâkah kha chuan ka tilui duh ta bîk lo va. Nang ka neih theih nan che hun remchâng min siam sak ah ka ngai hmiah mai a. Ka hriatna che a rei tawh ka tih kha dawt ka sawi lo. Aizawl-a lehkha i zirlai aṭang khan ka hre daih tawh che. I û nen in awm dun ṭhin lâi khan in inah kan lo lêng tawh. Mahse nang chuan i hre tawh kher lo tih ka hria. Khata ṭang khan ka mit i la em em a, mahse ngaihzawng nei lai ka nih avangin bawhzui enah ka en lo che. Hun a kal leh deuh a, ka ngaihtuahna ah erawh i rawn lang veleh zeuh ṭhin. Khúa a i rawn awm ve tâk hnù ah phei kha chuan ka rilru i la pêng nasa êm êm a. Es-i nen kan inkawp lai reng a ni bawk si, keimah ngei pawh kha ka inhaw ṭhin. Mahse hun remchâng ka neih tâk ah kha chuan bawhpelh duh lovin ka ûm zui ta vat che a. Ka hlawhtling ta rêng bawk a. Mahse tawpna hlimawm kan siam thei ta lo erawh pawi ka ti. Ka fa lo piang tùr tih fahrah hi ka duh lo va. Uluk taka ka inngaihtuah hnù ah he thuthlukna hi ka siam ta ani. Mahse hun kha ka duh rei miah lo asin. I rilru a na hle ang tih ka hria, mahse dam hun i la nei leh dâwn tih ka hria. I la naupang a, hmalam hun êng tak i nei tih hria la. Kei chu min theihnghilh rawh aw. I rilru ka hliamna zawng zawngah pawi ka ti takzet. Heti lo deuh a tawpna siam hi ka duh ve takzet asin. Mahse ka tih sual rah chu ka seng ngam ve tur a ni a. Mipa tih tur dik tak niin ka hre bawk. I duh leh min dem la, min hua la. Mahse nang chu lo dam vawng vawng rawh aw. A tàwp nan ka hmangaih che, ka hmangaih tluk zet che in ka bansan tak tak che a ṭul tawh zia pawh ka hria. Engmah sawi tawh lo a thlah tawp che ka duh a, mahse naktukah chuan eng thil mah ka sawi a rem tawh dâwn si lo. A tàwp nan heti hian ka rawn thlah ta mai che anih hi. I laka insawifiah ve hi ka ba a, ngáwi renga tàwpsan tawp chu i phû bîk lovin ka hria. Min ngaidam la, hmalam hunah duhsakna sâng ber ka hlân che aw"





A message ka chhiar zawh rual chuan ka ṭap leh ta! Mahse min thlahna thû tal a la rawn sawi a, hmalam pan tura huaisenna min petu ni mawlh teh se. "Pa ṭha tak ni tùrin duhsakna ka hlân che. U Es-i tán pawh pasal ṭha ber ni la, hmangaihna nen chhungkua i enkawl dâwn ania" tiin ka thlah ve thei ta. Mahse ka na ngawih ngawih si. A thusawi mal tin te kha ka ringhlel eih lo. A chhan chu U Rempuia hian dawt min hrilh ngai tlat lo. A rilru buai ve tùr zia te ka ngaihtuah a, ka khawngaih phâk ni lo mah se ka khawngaih tlat anih chu! A mawhphurhna lâk ngei a tum chu ka ngaisâng a, heti khawpa min hmangaih si a tih sual rah seng tura min kalsan ngam chu huaisen ka ti.



Mãwl inti zet hian ka sam chu ka tuai thuak a, min tina em em chung paw'n a ṭhatna ka la hmu tlat. Heti tak hian ka lo vei ang tih ka ring pha ngai lo. U Rempuia chu ka hua a, ka khawngaih tel tho bawk si. U Es-i nen khan lo chesual miah lo se hetiang hi ka thleng lo nimai tùr ania tihte chu ka ngaihtuah a. Nupa nih hmaa mipat hmeichhiatna hman pawi zia te nen lam ka ngaihtuah thleng hial. Hemi vanga inhmangaih miah lova fate tih fahrah hlauh vanga nupui pasal a insiam an lo awm ve theih zia te chu ka ngaihtuah a. Pathian thil duan loh dân a khawsak pawi zia min zirtir a ni ber.



A êng zawnga thil thlîr ka tum ta hram hram a. Ka natna te chu dah len ber ka tum tawh lo. Naktuk aṭanga midang ta ni tawh tur vang hian engvangin nge ka nat reng ang? Kan nula ṭan ve ek ek a, mipa vangin ka kehsawm ta vek chu ania. Mahse a pawi lo e, senior hnu lama hmangaihna vanga nat hrep ai chuan tunah hian lo na lâwk nghek mai ila. Nakin lehzel ah chuan ka tuar thiam zawk ang tihte chuan ka inhnem a. Ka ngaihtuahna âtthlâk zet avang chuan nui chhuak hakin ka ṭap zui leh der chu a nimai.



Mahse "I dam dâwn, Lapui, i dam dâwn. I na reng dâwn lo" tiin ka inhnem zui ta mawlh mawlh a. Natna a awm anih chuan damna a awm ngei ngei ṭhin. Thi tura piang pawh chatuan nunna nei tur thovin alawm kan thih ni!




A TÀWP TA.