LET's LOVE AGAIN by Ziki_nu_chapter-20

[Ziki_nu]

LET's LOVE AGAIN




By Ziki nu



Chapter-20



Hun chuan kan beisei loh danin min her kual lawp lawp ni ta ber hian ka hria, kan duhthlan ni miahlo kawng tam tak kan zawh fo a, thenkhat chu chhengchhe deuhin a kawng chu a hahthlak thin a, mahse chu hmun chhengchhia leh hrehawm tak kan kal pelh hnu chuan hmun nuam em em ah min hruai chhuak thin.

Chutiang chiah chu hring nun hi a ni, kan remuat loh danin kan awm fo a, mahse a hrehawm lai ber kan tawng emaw kan tih pawh hian Pathian chuan kan tan hun tha leh lawmawm min lo la zuahsak thin a, a hrethiam leh pawm thiam apiangte hi mi vannei an ni mai.




Rintea te ina chaw ka va ei tum chuan min lo b tha khawp mai a, be tha han tih ah, min pak huam hran lo na in a hma anga boruak nuamlo leh uap kha engmah a awm ta lo va, pa Zama lahin ka beisei aia tha in min dawngsawng a, Rinfeli te chhungkua an awm lo bawk nen puitling rual chu ti ti pawh a muk deuh viau mai a, chaw eia min sawm chhan leh nu Nutei'n 'titi ho a tul' a tih chhan te pawh chu ka beiseiloh lam vek a ni.




Pa Zama chuan Rintea eizawnna tur chungchang min sawipui a duh vang a lo ni a, a chhan pawh Rintea chiah fa an nei a, an fanu ang maia an enkawl Rinfeli lahin pasal a nei tawh bawk nen, mo an awh ve tawh thute pawh tlang takin min hrilh a, a lawmawm rualin ka dinhmun en chuan hmanhmawh ve thei ka ni tlat lo a, rilru a buai duh ngang mai.




An ni lam chuan Rintea'n a duhdanin a eizawnna tur kawng a dap dawn a, Falkland a a ni te in an sak hlim hlawt chu a chhawng hniha luah an tum thu te, Karaoke leh Jam room siam a rilruk thute pawh min hrilh vek a, chu chu hman atanga a tum leh chak ber thil anih avangin mak pawh ka ti lo, a tihlawhtling thei a nih chuan a lawmawm viau zawk ang.



Eizawnna ngial nghet deuh a neih chuan innei mai tura min duh thute thlengin an sawi kai a, ka tan a lawmawm viau rualin rilru erawh a tibuai ru viau a ni.




Rintea hnenah chuan pasal ka la neih theih loh thu ka hrilh tlang rawt a, ka beisei ai daiha min lo hrethiam chu ka lawm khawp mai.



Thawhleh zana a rawn leng chu zan dang zawng aiin a leng rei a, a chauh hmel riaua ka hriat avangin ka thiam ang tawka lo duat ve pawh ka duh.


"Vawiin lam in thawk tluang maw?" ka tih chuan lo bu nghutin "A hautak ve khawp mai, rawng hnawih kha ka duh uluk deuh a, a zau tham bawk nen chei mawina ringawt ah pawh ka inseng teuh ang" a tih chuan zawhna ka nei a, a zawh chi angem tih erawh ka hre chiah lo.




Rintea hi kei aiin kum khatin a naupang zawk a, chuvang te pawh chu a ni mai thei, kawng thenkhatah hi chuan a puitlin lohna hi a lang leh thin a, tuna a thil tih tum pawh hi a chiang chiah em tih ka hre duh. Hlawhtling ngei se ka duh a, ka tan emaw, ama tan pawh.. A chhungkaw chawm theihna tur hna nei se ka duh a, mipa hna thawh nei lo, zir nei bawk si lo chu ngaihsan an har em a, chuvangte pawh chu a ni mai thei, a talent hmang hian inhai kaw ngei se ka duh.



"I pa pawisa I tihek dawn si a, I rulh leh ngei chu a ngai ang aw" fiamthu ti tak deuha ka tih chuan tawi te hian a lo nui ve suk a, "Min va ngai nep ve Malsawm" a ti chu ka melh rang viau a ni.



"Kum 4 chhung khan ka awm mai mai biklo asin" ti leh supin thutthleng nghenchhan chu a nghawng ri dawt a, vanvadakin in chung lam chu a melh vung vung bawk a, a lungawi lohna tur thil ka sawi em mawni ka ti hial.



"I awm mai mai ka tih loh kha, thil te I zir a, I piano grade pawh a sang tawh viau tih ka hria alawm" tiin ka nuih tlawn deuh a, a lu a lo thing nghut chu ka hrethiam lo leh nghal pang bawk.



"Kum 4 chhung kha a rei lutuk, hlawhtling turin theih tawp ka chhuah alawm, hna ka thawk a, ka hmuh remchan apiang kha ka thawk thin" tiin min rawn melh zawk a, mahse a hawi sawn leh thuai thung.
Thawk a la vang vang a, ka chhan let hma in amah bawk chuan "Nangmah vang khan dam chakna ka nei lo va, dam chhan tur neilo angin ka inhre bawk a, keimah leh keimah intih chhiat vek pawh kha pawi tihna ka nei lo, mahse khatih hunlaia rilru thar min puttir Tu leh beiseina thar min pe tu kha eng nge a nih i hria em?" tiin min zawt a, lu thingin ka zawt zui nghal zat bawk.



"Pathian thu min hrilh thin kha" a tih chuan kan ngawi dun vang vang a, "Eng ber khan nge i rilru hneh?" ka ti a, kan theih ang tawka Pathian thu kan lo sawi dun ve na rah chhuah kan hmu dawn nia ka inhriatna chuan min ti phur viau a ni.



"Tu pawh thil tha tih tur hriaa ti si lo chu a tan sual a ni"

Chu thu chu ka hria, ka innghahna chang tawi te te zing ami a ni.

Jacoba bung 4, chang 17..



A sawi leh tur nghaka ka ngaihchan reng lai chuan thawk a la leh ham ham a, "Thil tha kha ka hre reng a, mahse ti turin ka huaisen tawk lo a, chak tawklo niin ka inhre thin, mahse zan khat chu kha bible chang kha ka rilru ah a awm tlat a, tha lam kawng zawh kha ka thlang a ni"
Ka inrin hma in ka insut ri hraih a, ka biang rawn lum thla pap chu ka tuai hul leh rang viau bawk.



Min rawn en in a âwm ah min kuah bet zui a, "Ka nun I tichhe vek emaw I tih lai khan nun thar min pe zawk asin Malsawm, Pathian khi a tha êm a, kan dilloh lamah malsawmna in min vur thin anih hi" zawi leh thuk ruih hian a ti zui leh sup a, ka mittui tla chu ka dang zo lo a, dan tumna pawh ka nei tawhlo.
Kan dinhmun hrehawm leh khawharthlak em em nia kan lo hriat lai khan Pathian chuan kan tan fel takin rem min lo ruatsak zawk a, ka lawmna tizual em em Tu pawh Rintea ang tho a Pathiana tuihalna ka chan ve vang a ni.
Rilru hrehawm leh thinlung na em ema ka awm lai khan Pathian ka ngai zual a, ka biak hnem phah bawk a, kan mittui te hmang khan kan thlarau nun min lo chawm len sak zel zawk niin ka hria.




Zan rei deuh thlengin kan titi a, a hma zawnga kan la tih ngailohte tiin bible te kan chhiar dun a, hetiang hi inngaihzawnna kawnga ka lo zawn ruk fo thin kha a ni, tunah chuan Pathian in min pe ve ta niin ka hria a, ka pawm thlap bawk.




Zingkarah U Mama'n min rawn call a, ka pawisa dinhmunte min rawn zawt luam a, ka nu a boral leh atang phei kha chuan a hma zawng aiin min ngaihtuah leh zual a, nitin deuh thaw min rawn call thin.


"Ka hlawh hi chu tihian ka lo khawl ve zel anga, Christmas ah pawisa hmanna tur a tam leh dawn sia, Pathian zarah kan damte chuan Bawiha te unau Christmas kawr tur pawh ka leisak ve thei tawh ang" tiin phur deuhin ka tum dan te chu ka hrilh a, puitling taka awm turin min hrilh nawn mawlh mawlh bawk.



Kartluanin school kan kal a, keipawh ka hun awlah rilru tih thawvena tihhrisel nan pangparte ka khawi leh tan a, mi angin ti ve duah lo mah ila mahni chuan buai a na ve thin viau tho mai.


Zan lamah pawh Rintea chu a rawn leng hman tawh meuh lo a, an dawr luah tur chhawng hnih an tih kha a hnuai ber luah theih tura an tih ruah leh si avangin chu chu studio atana hman an tum a ni âwm a, an bei nasa in an buai vanglai tak a ni bawk nen, mut hmunah rei lo te kan inbe ve zawk tih loh chu kan inbe hman meuhlo.



Karthar maiah U Mazari te an inneih tawh dawn avangin a nu te lam pawh an rawn zin thla nual tawh a, kan buai nak naka lunglen leh khawhar pawh a sawi theih meuhloh.




Kan buai ngang a ni ang hriat loh karin hun a kal duak duak a, inneih ni chuan Rintea pawh a rawn tel ve thei a, kan veng Biak inah kohhran dan thianghlimin an innei a, U Aldrina tlangval fel leh hawizau a ni bawk nen inneih lawmpuitu pawh an ngah viau mai.




Tlai lama ruai kan theh zawh chuan Rintea nen kan inzui haw a, "Chhuak dun lawk ang" a tih vangin ka inthlak zawhah kan chhuak lehnghal a, kan kalna tur ka zawh lah chuan a sawi duh tlat lo a, boruak tha lo kan nei lem lo bawka keipawhin ka zawt lui duh bik lo.



Aizawl khaw pawn kan tlan pelh lai te chuan a titi ve bawrh bawrh a, a tawng duh lutuk chu nuih a tiza lam mah a ni.



Darkar chanve vel kan tlan hnuah tlang ni âwm tak, mahse hmun zawl vek si hi kan chuang chhuak hlawl a, a bike a tihdin rual chuan chhuk vatin kan awmna chu ka thlek kual ruai a, a hmun a thengthaw nuamin a reh raih bawk nen, ka awm duhna chi tak a ni.



"A van nuam ve, hei hi a ni em min hruai i tum ziahna hmun kha" ka tih chuan lo bu nghutin min hui zauh a, a bul ka thlen chuan ka darah min lo kuah zui tharh a, "Khi laiah khian thutna a awm" a tih vangin kawng chhak lam, tlema let liam deuh lam pan chuan kan inzui chho a, a hmun lah chu phul vek a ni a, a hring dup a, chutiang hmun mawi leh nuama midang tumah hmuh tur an awmlo chu mak ka ti hial a ni.




A sawi ang tak takin kan thlen chuan thing hmanga thutthleng siam chawp, a zawm nan pawha thing hrui mai mai an hman hi a lo awm a, chuta kan thut rual chuan kan hma lam ralah Aizawl khawpui a lang tuar bawk a, nuam tak a ni.



"Engtinnge he lai hmun hi i hriat a, a hma in ka la kal miahlo, midang kal pawh ka la hrelo" ka ti mawlh mawlh a, a ni chuan ka kawng a chelhna chu ti nghet salhin "Nangma tana ka hual alawm" tih chauhin min chhang a, zawh belh tumna pawh ka nei chuanglo.



"A nuam hle mai" ti leh halhin a darah chuan lu ka nghat a, kan hma lam rala khawpui chu kan thlir dun a, rei fe chu inbe lovin kan ngawi dun awm e.



"Malsawm" a tih chuan dak meuhin a hmel chu ka han en a, min en ve lo na in eng emaw ngaihtuah muk hmel deuh a pu a, sawi duh nei a ang.



"Imm" a mah la en reng chunga ka tih chuan "In hmangaih nawn leh ang" a lo ti mauh mai.


"Engmaw?" ka lo ti let ha chu min rawn en ve zawkin "Kan lo inhmangaih tawh thin a, vawiin ni hian inhmangaih nawn leh ang aw" a ti leh sup a, chu thu chu engvanga sawi nge a nih ka hre duh.



"Kan inhmangaih reng alawm" ka tih lai chuan a lo bu nghut a, "Kan inhmangaih reng thin a, in hmangaih nawn leh zel thin ang, kan hma hun kan hre lo a, engpawh thleng se la in hmangaih tlat ang" a ti a.

"Hmangaih na chu eng nge a nih i hria em?" tia ka zawhna chu heti hian min chhang.


"Bible in hmangaihna awmzia a sawifiah baka chiang leh fiah kha chuan ka sawi thiam lo anga, sawi tur pawh ka hre lo ang, mahse Malsawm, hmangaihna chu sawifiah thiamlo mah ila i kianga ka awm hian ka hrethiam thin a, nangmah atang hian hmangaih nih hlutzia te, hmangaihtu nih a tulzia te ka hre thin" tiin.



Chumi ni atang chuan ania Rinsangzuala hi innghahna tlak mipa a ni tih ka hriatchian tak em em ni. Kawng engkimah puitlinna kawng a lo zawh ve tawh a, keimah ang bawkin hun harsa a tawk ve tho a, tunah chuan engkim hmachhawnpui turin ka inpeih tawh, amah ah rinna ka nghat ngam tawh tlat a.






. .. .
A tawi lutuk a, naktuk zanah kan zawm dawn nia aw..
A boring in tih ka ring tlat, min hrethiam teh u

[Ziki_nu]

ZAWMNA


Kan inkarah inhriatthiam lohna a awm tawh lo va, engkim patlang dun turin kan inpeih tawh bawk a, kan pahniha kan inrin tawn chhung chuan engmahin kan inkar chu a tihchhiat ka ring lo.



Hun a liam zung zung a, September thla kan chuankai meuh chuan U Mazari pawh a pasal te in lamah thla khat dawn a awm tling ve tawh a, mo tha tak a nih chu ka ring tlat bawk.



In chungah u Dintei te nufa chauh an awm tak avangin a chhungte chuan han fin ve mai turin min sawm fo mai a, an fiamthu anga han ngaihsak viau ka tum pawhin an nu ber Nu Zovi hian a sawi chhuak leh thin a, ka tan tak pawh kan hnial tlat chu thil nuam a ni biklo.



A dik takin U Mazari ang emin u Dintei nen chuan kan inpawh ve lo va, innelin inbe bawrh bawrh mah ila ka thuruk engkim ka hrilhna a ni ve lo a, unau piang hmun emaw, thisena inzawmna kan nei lem lo bawk nen mahnia awm hran theih laia an ni nufa han fin leh rih chu ka chak vak biklo a ni.




Nu Zovi rawn zin thla chu zan khat a rawn leng chuan thu ngai bawk a rawn sawi leh a, "In luah man pawh I chawi ve lo mai anga, hetia an nufa chauha an han awm ringawt tur hi chu ka ngaingam thei lo, keini kan rawn zin reng thei dawn lo a, Dintei lah a nula tha leh a ni mai a, a lo dai sual tawh vangte hian amaha rinna han nghah vek hi a harsa tawh a" ti sap sapin awm fin mai chu min sawi hmuh leh a, nu tling pui mai han hnial fo chu thil nuam a ni lo.




"Ka u te be zawk la" ka lo ti chu a hahawlh zawng tak ka sawi tih hriat zet hian a nui sang a, "Ka lo be nghal dawn nia, han remtih lohna tur pawh a awm chuang nang mawle" a ti a, ka lo nui tawi hle tawh.


A haw hnu chuan U Mama ka call nghal a, Nu Zovi'n awm fin mai tura min tih thu leh amah ngei biak a tum thu ka sawi chuan ka fin duh leh duhloh min lo zawt thuai a, ka duhloh thu ka sawi uar ngang mai.



"I bula a sawi pawhin min lo phat sak hram hram rawh, awm ho chuan eng emaw hlekah in tihthiamloh a awl dawn a, U Mazari ber a awm tawh bawi silo" ka ti niah niah chu a pawm hmel viauin ka hria.

"Dintei chu a u a ang lo a, zalen a zo dawn silo a, a chhungten an dem che pawh a hlauhawm, inven kha a tha mai, ka lo hrilh dawn nia" a ti a, inchunga han awm chu hreh chhan sawi dawn chuan sawi tur ka ngah lutuk.



Mut hmunah Rintea nen kan inbia a, a duh ang taka a eizawnna tur a han tifel thei chu kan lawm duh ngang mai. A studio pawh a thianpa puihna zarah a hlawhtling thawkhat a, jam room leh karaoke lah beisei aiin kal duh an tam a, zan lamah chuan darkar tin deuh thaw booking ti an awm a, hetiang a nih chhoh zel chuan a senso pawh a hmu chhuak harin ka ring lo.




"Naktuk tlai chu kan chhuak dun ve dawn em ni? I hman angem?" a tih chuan ka phur khawp mai a, kan hna ve ve ah kan buai dun em avang hian inngaizawng dangte angin kan chhuak dun zen ve thei lo a, kan inhmu khat viau ti ila a dik ang.



"Khawiah nge kan kal ang" ka tih chuan Richarda te nen kan nih tur thu leh an thian hlui dawr tharah anih thu te min hrilh a, Richarda nen kan innel ve tawh bawka ka huphurh hranlo.



Dar zat ka zawh chuan "School banah ka rawn lam mai ang che" a lo ti a, ka scooty tlan loh ni hi a hre fu thei khawp mai, naktuk pawh zingah taxi lak ka lo tum sa hrim hrim a, tlai lama minnlo hruai thei dawn chuan a remchang ting a ni mai.



Zingah Riny'n min lo call a, school a lo kal thei loh tur thu a sawi chuan a chhan ka lo zawt nghal thuai a, a nawmsam loh thu bakin min chhang meuhlo.
A aw atang chuan a chauh hmel hle a, Ramdina nena an inthen atang khan hetianga awm hi a chiang thar riauin ka hre bawk.
Nitin school ah kan kal ho a, mahni hna ngai pawimawh leh kalloh hreh em em thin ni khan ka hria a, tun hnai hi chuan chhuanlam neuh neuh a nei zing riau a ni.




Taxi in school ka kal a, Riny awm loh chuan Aruata nen kan inkawm deuh ber thin a, ngeiawmin tawng thei viau mah se kan thawhpui dangte an senior deuh tawh si a, inrualkhat na na na chu kan inkawm leh nge nge zel.



"Ngatinge Riny hi a kalloh leh ringawt a?" ka thlen rualin Aruata chuan a lo ti nghat zat a, hre zawk tura ka ngaihin min zawt let hlauh si a, chhan dan tur ka vai khawp mai.


"Ka nuamsam lo a tia, nangman i hre zawklo em ni?" ka tih chuan ner nangin "Nimina kan haw lamah pawh min la hnial zawt zawt alawm, kallohna tur khawpa nâ a neilo hrim hrim" a lo ti hluk hluk a, hmeichhia phei chu nise a va han rapthlak dawn tak.



"Tunlai chu nawmlohna a nei neuh neuh reng mai, lo duat viau rawh" ka ti chu a duhlo leh pek khawp a, tihian han sawisa hnehsawh viau thin mah se a kalloh hi chuan a ngai thin tih ka hre reng sia, a nihna takah chuan Aruata hian Riny a duh tih ka hre daih tawh, mahse ka thiannu rilru zawk hi enga nge ka hre ve chiah lo a, han sawipui viau ngaihna ka hre lo bawk nen anmahni an in hai kuak hun nghah a ni deuh tawp mai.



Tlaiah Rintea'n min rawn lam a, tlang nghal tur ka nih avangin keipawh nidang zawng aiin ka inchei uluk a, a ni pawh a rawn chhe lo leh pek viau mai.



"Richarda te chu an kal tawh a, mahse hmanhmawh a ngai lo, thilpek tur te kan lei hmasa ve phawt dawn nia" a tih chuan ka lo bunghata nghat a, a sawi danin an thian hlui chu USA a an awm laia inhria an ni awm a, ei siam lam a zir a, mizo leh mizo na na na chu an lo inkawm ngeih viau a ni awm e.



Bazarah kan kal hmasa a, thuamhnaw lam kan en dawn emaw ka tih laiin tar mawi tur thil a lo en daih a, a thlang uluk ang reng si a, rin ai daihin kan rei bawk.

A tawpah snow ball chhunga sanghanula lem awm hi a la a, a man lah chu a to phian a, mak ka ti deuh na in ka zawt zui vak duh chuang lo.



An dawr awmna chu a hla phian a, Falkland lamah kan tlan a, kawng thlang lama dawr hawn thar tih hriat zet kawtah chuan kan ding a, a hmun a rehin a nawm hmel viau mai.


A thil lei chu min khai tirin ka kutah min kai a, dawr chhung pawh chu a changkang khawp mai, counter ah chuan nula pakhat hi a lo thu a, ka kalpui pa chu a hmu fo tawh tih hriat takin nel takin a lo be nghal thei a, Richarda te chu inchung lama an awm tawh thu leh an dawr neitu ber pawh a chhuah lawk thute a lo sawi zung zung a, a la naupan hmelin a hmel chu a tha phian a, a nui sen sen bawk nen customer lo lawm thiam tur chi tak niin ka hria.




Kailawna kan chhoh lai chuan "I kal thin em ni?" ka ti a, "Vawi khat ka kal tawh a, min lo la hria anih kha" a lo ti ve mai a, ka zawrtzui lo.




Richarda te chu an lo awm tawh ngei a, a bula nula thu chu sam tawi, ngo veng leh la upat hmelloh tak mai a ni a, min lo nuih ve sen sen tih loh chu min be lem lo, a zahzum hmel riauin ka hria.



"Boss ber hi a bo rei tawh khawp mai" Richarda'n a lo tih chuan ka bul ami chu a nui suk ringawt a, a thiannu chu min hmelhriattir in "Lawmtei a nih hi" a ti a, kan han inchibai leh rih a, kei a maha a naupan ka ring.




Mipa pahnihte chuan an hna lam chungchang an sawi dun mawlh mawlh a, Lawmtei chu han biak tlangnel duh ve viau mah ila, thian siam leh mi han biak hmasak vel hi ka zei lohna lam tak a ni a, kan inbe tam meuhlo.



Minute 15 vel lai kan thut hnu chuan kan hnung lam atangin hmrichhe pakhat hi a rawn ri hlut a, kan hawi phei rang hlawm viau.



"Ka beisei aiin in rawn thleng hma a, choka lam mamawh leiin ka lo va chhuak ve daih alawm mawle, rin aiin kan rei leh sia" ti zung zungin kan bula thutna awlah chuan a rawn thu ve a, a lan danah dawr neitu chu a nih hmel a, mipa a ni dawn emaw ka tih laia hmeichhia a lo ni daih chu mak ka ti ve deuh.



"Nang chu engtik lai pawn nghah reng i ngai thin alawm" Richarda'n a lo ti chu a ner khum duh lek a, keini chu min rawn en in "Hei hi maw I bialnu chu?" tih leh min kawh a rual ta mai a, a chetdan chu hawihawmlo ka ti ru khawp mai.



"A nih hi, Sawmi a nia, chuan Sawmi hei hi kan thiannu Marina-i" tiin Rintea chuan min hmelhriattir a, min en mang lovin min chibai ve thuak ringawt a, engah vak min ngai lo tih a awmdanah chuan a hriat reng mai.



Marina-i chu a thau lam lek lek a, mahse pian mawilo khawpa thau ang chu a ni ve lo, a sam sei zet chu a herh kir chiai a, a hmai a hlai phuk a, en thuak chuan a hmeltha khawp mai.
Amah a nu lianin a thawm a na bawk a, hriatchian hmaa ngaihdan han siam chu ka hreh viau na in hmeichhe nungchang tha tak ang hi chu a nih ka ring chiahlo, a ri phawr phawr a, amah ei lo tute chuan a 'over' an tih tur ang chi hi a ni in ka hria.

Rintea thilpek kensak pawh chu a lawm thiam ngang mai a, nui sangin lawmthu a hrilh mawlh mawlh reng.


Mipa pahnihte ngawt chu a bia a, keini min han tihtlang nel lam chu a tum vaklo a ang khawp mai, Lawmtei pawh chuan nuam a ti vak biklo aniang a khat tawkin a phone a bih sek tawh a, kei aiin a naupang ve leh chhawng si a, ka khawngaih letling zawk.



"Hmanhmawh suh u aw, in rualin ka ei ve nghal ang, in chung lamah hi chuan midang lo chhoh tir lo turin ka tia, kan menu thar ber ber in ei dawn nia" tiin a nui har har reng a, ka ngaihbel nge mawni, ka bialpa bana a vuan zing lutuk leh a nek lui leh talh talh thin chu hmuh nuam ka ti vaklo.




Inhnuai lama a let thlak leh lai chuan "Mipa a ni dawn emaw ka tia" ka lo ti halh a, Richarda lo nui hawk chu a nakah Lawmtei'n a lo nghawk sawk a, a eu ngawng ngawng mai.



"Mipa angin a sawi ve tho em ni?" mak tih hmel deuha Lawmtei'n min zawh chuan "A.. Sawi chuang.. lo e" ka ti ban charh a, mipa nge hmeichhia a nih engmah a sawi lo a, keimah zawkin mipa ni ve tur ah ka lo ngai ringawt zawk a ni.



"Hepa hian kan thianpa a tia, chuvang chauh chuan ka kal" tia Richarda melh zawkin a kut a kuangkuah zui hmak a, an sawi ang tak takin a thikthu chu a chhe ve viau a nih hmel e, mahse ka dem miahlo, inngaihzawnnaah te chuan a thiang alawm le..


"Mipa nge hmeichhia a nih ah buai vak a ngai hleinem, tuai leh patil ai chuan a tha hrim hrim" ka bul ami lah chuan a lo ti ve khauh a, a ngaih ho hmel nasa mai.



Kan hmaa mite lah chu an innghawk sawk sawk reng a, kan thiannu chu a lungawi thei vaklo a nih hmel.

Marina-i rawn let leh chuan in tur a rawn chawi tel a, midang zawng coffee pangngai min pek laiin Rintea chu coke a rawn kensak bik a, ka hrethiamlo khawp mai.



Tawng tuma ka âng zuau chu dawr neitu nu lo tawng vang chuan ka ngawi leh rih a, "Rinsangzuala hi chu thîk lo mai ru aw, coffee a in ve thei lo a" a lo ti a, ka thu ding uai mai.
Engtik laiin nge ka bialpa hian coffee a lo in theih tak loh ka hrelo a, he hmeichhia hian inring tawk taka a sawi ngam chhan hi ka hre lo bawk.


"Coffee I in thei lo maw?" Lawmtei'n a lo tih chuan ka melh ve ran a, a bu nghut ka hmuh rual chuan ka thutna atang ka ding ve hluai bawk!



Phawk deuha min en lai chuan "Bathroom ah ka'n kal lawk" tih leh kalsawn ka rual a, ka awmdan chu ka hrethiam chiah lo, hetiang vang mai maia lungawi lohna han tih lan chu ka duhlo a, thîk phei chu ka duh hauhlo.
Mahse ka bialpa a en dan leh a biak dante, a hriatchian hmel lutuk te chuan ka awm a ti nuamlo hle ringawt mai a ni.







Cont....