KA LALPA CHAPTER 22(LAST) BY MAWITEI BAWITLUNG

[mawitei bawihtlung]

KA LALPA




CHAPTER 13



“Ka thu hmu miah lovin i nei lui ngam a maw Lalthanpui?" Thanpuia pa aw fiak ṭhak avang chuan keimah pawh chu ka lo phu dawtah, a thinrim hmêl chu Thanpuia thinrim hmêl nen a inang viau, pafa ni miau hek. Chuan a pa hi Thanpuia ai pawhin a khirh dâwn tih ka hria, kei hlauthâwng zeta ka awm laiin Thanpuia erawh a pangngai thlap thung.




Engtin nge danglam miah lova a awm theih zawk ni? Ka hlau bawk nen a bânah chuan ka hmer ngat ngata “Ka pa ka hmangaih a ni, mi hausa fanu ai chuan ka thlang zawk, mi hausa fanu nei kher lo pawhin hei chen kan thleng thei alâwm" Thanpuian a ti ve chu a biang a ri nghal sawka, ka lo au nghal ṭhat mai.




Hrehawm ka ti lutuk chu ka mittui a tling pam bawk,keimah avangin a pa kut a tuar chu a ni sia; in sût hlap hlapin a hmaah chuan ka dinga “Khawngaihin pa keimah zâwk hi min beng mai rawh, i fapa ka lo hmangaih avângin min ngaidam rawh" tiin ka sawi ve ta tawpa, a rawn meng dur zual sauh mai.





“Lo ngawi mai mai rawh, nang fahrah mai mai tân hian ka fapa hi ka phal hleinem. I phu tâwk hre ta che" a tileh chu Thanpuia pawh a rawn thinrim ve nghal phata “Ka pa khatiangin ka nupui ṭawngkhum hauh suh, a ni hian thiamlohna a neilo, tin ka ṭhen lo bawk ang. Ka duhthlanna a ni a, ka enkawl tur a ni bawk, ka kalsan dâwn hauh lo ania, min pawmpui theilo a nih chuan in thu thu, keichuan ka kalsan dâwn lo" ti ve hrawkin min kuah beta.





Keimah avânga chutianga a pa a ṭawngkhum chu hrehawm ka ti a, chutihrual erawhin a pa ṭawngkam erawh chuan min tina em em thung. “Lalthanpui ka hrin chawpin hetiang hian maw min tih dâwn a? He dinhmun i thlen theihna chhan hi hre reng rawh" tiin a kut sai dar dar chuan min rawn kâwk khur dawt dawta.




“Hetiang hmeichhia dukdak lo avâng hian maw i pa kha tianga min ṭawngkhum, ka mo ah ka pawm ngai lovang tih hria ang che" tilehin a in hera “A pawi ka tilo, he dinhmun ka thlen theihna chhan chu ka hria e, engkima min hrethiama min enkawla, duat taka min châwm seiliantu ka nu avâng chauh a ni e, nangin enge i tih ve? Kan tan hun i nei ngailo a nih kha" Thanpuia thinrim pawh chu a aw a chang ṭha tawh viau mai.





“Te a tawk, khatiangin i pa ṭawng khum suh, i hringtu che a nih hi. Khawngaihin khatiang khân ti tawh suh" tiin ka in pet fan fana, ka mittui a hmuh chuan a ni lah a lâwm lo zual sauh tih hriat takin a rum nghata “Ka pa i ni pawh hi a mak ka ti zâwk, hre rawh. Hei hi ka nupui a ni a, a ni reng bawk ang, he dinhmun ka thlen theihnaah chuan i tello ka ti hauh lo; mahsela ka theihna ngeia thleng ka ni tih theihnghilh suh, ka nupui rilru dâwn lek lova khatiang i rawn sawi kha ka lâwm hauh lo bawk, ka pa i ni a mahsela i fapa hi min ngaihtuah tak tak ngailo tih i hria, khawngaihin chhuak tawh rawh" tiin en pawh en tawh lo chuan room-ah min luh puia.





“Te enga tinge khatiang anga i biak? In in rem ngai dâwn lo asin, i pa khân a sawi dik chiah alâwm. Kei fahrah leh lehkhathiam lo hian puih theihna che ka neilo êm a ni" tiin a âwmah chuan beiin ka ṭap zui hlap hlapa "Mira min en teh, min puih theihna i ngah a lawm. Ka beidawn chângin min fuiha, harsatna ka tawh apiangin ka kiangah i awm bawk, chu tluka hlu ka tân a awm lo tih hre reng rawh. Mite chuan engpawh sawi rawh se, lehkhathiam i nih a ngailo, ka dawn ngai loh ngaihsakna leh hmangaihna i lan tîr hi a tâwk" tiin ka hmuiah chuan a rawn fâwp zauha, ka mittui chu a hru pah bawk.





Ka en reng chu nui sukin “Inthiam lo suh, hausakna chiah ûm tu chuan hmangaihna a phu ngai lo, kan pahniha kan hlim chuan a tâwk mai, tumah dang awm suh se. Ka nu kha chu la dam se chuan a pawm ngei ang che, in mizia thlengin a inanga, a lâwm dâwn lutuk che tih ka hria a ni, a ni chuan ka thutlukna a hnial ngai lova, min pawmpui reng ṭhin" tiin a ngawi zui rauh rauha.





A hmêlah chuan khawharna leh lunglenna ka hmu thei, a nu angai tih lah ka hailo. Keipawhin ka pian tirh aṭangin nu leh pa neilo mah ila mihring ta nafam chuan nu leh pa neiha ka thlakhlelh ve châng lah a tam, ka kiangah awm ve sela an thlazâr hnuai aṭanga school te kal ve a, eng helh nei miahlova awm ve pawh ka châk, mahse min duhlo in min kalsan miau si a.





Thanpuia ngawi ran chu kuahin ka âwmah chuan ka bei tîra “I nu chu nu ṭha tak a ni dâwn tih ka hria a lawm, chuan ka lawm e aw. Nang tal ka nei che hi ka lawm, chuan ka hmangaih bawk che, i tân tih theih ka neilo lutuk hi a pawi ka ti, nu leh pa tal lo nei ila chuan hetianga kan awm kher hi a ngailo tur tiraw? I pa pawh khân min iai miah lovang, mahse i tân englai pawhin ka awm ania, kan naute pawh a awm bawka" ka tih tâkah chuan thaw hawkin a rawn dâk chhuaka.




Ka dul puar ve ar tawh chu rawn khawihin a ṭhen ta saka “A rawn che ve nasa tawh tehmai a nia, a harh dâwn a niang. Ka pumah hian a tlân kual nimaiin ka hria" ka tihchuan za tak mai hian a rawn nui hawk hawka.



“Bawihi, a tlân theilo ang. Mahsela a rawn chêt chuan a ṭhat chu, a chêt leh veleh min hrilh dawn a nia, ka naute duat tur chu a rawn pian chhuah hun ka nghakhlel khawp mai" tiin ka dul zâwnah chuan kûn hniamin a chuk zauh zauha, a hmela hlim hmêl a rawn lan tâkah chuan ka thaw huai mai .



Nui sakin a biangah chuan ka chûl saka “Ka lawm e, engkim avâng pawh hian. Ka tân thil pek hlu ber i ni tih in hre rawh aw, Pathianin ka vântirhkoh ni tura a rawn tirh i nih hi" tisapin keimah zâwk chuan a tihfo ṭhin dân angin a chalah chuan ka fawhsak vang vanga, a mit chhingin nghet zet chuan min kuaha.





Ka dara bei chung chuan a thaw hle hle bawk, a hnungah chuan ka bensak thek theka. A tân pawh khatianga a pa biak kha a nuam miah lo ang, a hrehawm a ti viau ang tih pawh ka hria, mahse a nupui ka ni a ka thlavang a hauhna ah erawh chuan ka lawm takzet thung.




“I hmelṭha e, sâp ho i ang. I hmel hi a langsâr vuah reng mai a nih hi, kan naute pawh hmelṭha tâwk rawn ni thei sela" tiin khumah chuan ka delh mu a “Tihian mu ang aw, zanin chu hna pawh thawk lo mai rawh, i thawk nasa lutuka i mitkhur te a thûk zo" tiin a lu an chuan ka chûl sak heuh heuh renga, ka hrehawm rukna erawh ka ti lang duh hauh lo thung.





“Nangpawh hahchawl rawh, hetianga i awm reng chuan i chau leh mai ang, damdawiin kal nawn ngai suh se. Doctor in in enkawl ṭha tura an tih che kha, tunkar nilai hian Mumbai lamah chhuh ka ngai dawna, hruai tel che châk viau mah ila nau ilo pai bawk si a, ka hnênah lo i awm hi ka duh vak lo nan" a tihchuan ka nuih ringawta.





“Tinge a? Hna thil a nih chu ring tho mah ila i va kal hla dâwn ve, i awm rei angem?" Ka tihzawm zata, a lu a thing nghal nar nar mai, a awm rei vak chu ka ringlo, a chhan pawh min ngaihtuah theih zia ka hre miaua, "Nangmaha rei tak awm tir che ka duh lo ka tih fo kha, a theih chuan i ṭhiannu kha ilo in riahpui tîr dawn ania, keimah pawhin ka lo bia ang, nangmah chauha reilote pawh awm tîr che ka duhlo, in himna ka duh ber" tiin a taksa chungah chuan min pawt kaia.





Thu awih tak chuan a tih ang ang chuan ka awm ve maia, ka kut chu rawn la in a vuana “Ka lo tawng lovang che tih ka hlau mange" a tihchuan ka en chho ha a, min lo en ve reng bawk. Chunglam melhin thawk a la zui ham hama “Ka nunah hian hmeichhe pahnih in awm ve tawha, mahse nang chuan hmangaihna hmangin ka thinlung i nei chu a nih hi, dawhtheihna, khawngaihna leh lainatna chuan i salah min siam a nih ber hi maw" tiin a nui suk suka.



Ka lai bawk nên ka nui ve put put mai “Nakinah ka taksa te hi a zûr hunah min iai leh mai si ang tih te hi ania ka hlauh, nau ka neih phei chuan ka nalh lo ve telh telh dâwn sia" tiin ka phun niap niapa, ka dul te hi a rang vek dâwn sia ka huphurh lâwk.




“Ka sawi tawh kha engpawh ngaihtuah lâwkin ka nei che, khalamah kha chuan hlauhthâwnna tur a awm lo. Mipa rilru nghet lo lutukah min ngai lo la, Mira ka thlang tawh che ka tih kha, engmahin a thlâk danglam lovang, kan naute hi ṭha takin enkawl la chu chu ka duh" tiin min kuah hlu hlu a.





Engmah sawi pui duh tawh lêm lo chuan ka mit ka chhin san ta daiha.




A tûk lamah inah awmin a ni erawh hna a kal leh thunga, min hruai ve duh viau mahse in lama hahchawlh ka duh bawk nen ka zui duh ta lo, bâkah ka naupai a lian ve zêl sia, ni lêng lenga ṭhut kha ka thei tawh meuh lo.


Pi Zari chuan min awl hneh bawka, ni leng chuan ka mu a tih theih, ka hahdam huai huai mai. Ka lo muhil a ni ngei ang pi Zari au deuh ṭhat ri avâng chuan ka mengchhuak kawka, tho chhuakin ka ngaithla chianga. Ka hriat sual lo a ṭawng zui mawlh mawlh chu ka hre thei miaua.




Tho chhuakin room aṭang chuan ka kal chhuaka, chutah Thanpuia ka hmuh rual chuan au chungin ka pan nghal ruak mai, a ban aṭanga thisen chhuak chu ka hmuh hmaih lo, hlauthâwng lutuka ka pan lai chuan min lo au in ding tur chuan min ti zuia.



“Mira ka ṭha, room-ah lo va lût rawh. Hetiang hi hmu lo turin ka duh che, pi Zari hian min buaipui mai ang, lût vat rawh. Kan zawh hunah ka rawn hmu ang che" a tihchuan ka ding data, mahse a hliam avâng chuan ka hlauthâwng tho bawk si, ka dang sawp sawp mai.




“Mira kal vat rawh, ka rawn lût thuai ang. Hetiang hi hmu turin ka duhlo che, lût rawh" a rawn tih leh tâk hrawkah chuan hmanhmawh zetin room-ah chuan ka lût leha, engvanga ka hmuh pawh chu duh lo tlat nge a nih ang. Tum luauin khumah chuan ka ṭhu thla a, engtin nge khatiang hliam kha a neih theih? Thah tum an awm em ni ang?





Ka thaw chhuak leh hak ṭhin, rinai a rawn lût har bawk nen chhuah leh mai ka duh ut uta, mahse min lo hauh leh ka hlau bawk si, ka phi cheng ringawt.




A tâwp a tâwp ah chuan a kut tuam chung chuan a rawn lût a, ka pan nghal vat bawk. “Eng thil nge thleng, engtin nge hetiang hliam te hi i neih theih? Te, ka hlauthâwng a nia" ka tih tâkah chuan min rawn kuah pahin “Buaina ka tâwk deuh alâwm, Police lam an che tawh e, an man thuai turah ngai ang. Ana lo a nia, vawiin i lo chau êm?" a tihchuan ka lu ka thing nar nara. Ka ngaih a ti ṭha miahlo, thah duh tu an awm a nih ka ring bur, tûn angah tualthah hmang an tam tawh si.




ZAWMNA



“Te min hrilh loh chuan ka awm a nuam theilo ania, nang leh zêl dinhmun hlauhawma i awm chuan ka tân nun ngaihna a awm tawh lovang, i tello in engtin nge ka awm ve anga? Ka mal dâwn lutuk a sin" tiin mittui tling pamin ka ena, ka ṭah a chhuak lo theilo.




A ni leh zêl chân tur anga ka in dah hian ka na nghâl ṭun mai, ka phal hek lo. Ka kiangah awm reng turin ka duh “I tello in ka awm duhlo, ka hmangaih che Lalthanpui, i tello in kan fa enkawl ka duhlo, kan pahnih ngeiin enkawl dun ang, min kalsan dâwn lo tiraw?" tiin ka insut nghal hlap hlapa, amah ka hnaih aṭang hian ka no zo a, hmeichhe inring tâwk tak kha tûnah in nghahna tûr pasal ka han neih tâk meuh chuan ka hmeichhiatna a lang lo theilo.




Ka derdep zia ka hre chiang leh ṭhin, han tuarchhelin han in duhtawk viau ṭhin mah ila ka pasal ângchhûng a ka awm chiah hian duat phûtna te, pangchan châkna te. A kuahna ban te ka thlahlel ṭhin, chu chuan hmeichhia ka nihzia a tilang leh ṭhin bawk, kha chen mahnia lo khawsa ṭhin leh thlavang hauh tu pawh nei ngai lovin ka han neih chiah khân keimaha ka lo pal tawh te kha a ni lak aṭanga dawn ka duh ta nimaiin ka hria.




“Min en teh, ṭap tawh suh le. Ka kalsan dawn hleinem che,  en la. A hliam hlek mai chauh a lawm, ka ban puam lai a nia a thi duh anih kha, ka ṭha. Tumahin ka lak aṭang hian an la sawn ngai lovang che,  ka enkawl dâwn che ka tih kha, ka nupui i nia. Nangmah chauha kan fa enkawl tîr che ka tum miah lo ania, ka sum a rûk avânga ka man tîr jail aṭanga rawn chhuak ania" a tih tâkah chuan ka thaw hak mai.




Zak map lovin thah a rawn tum leh ngam a maw? Jail tân tir reng tlak a nih chu, “Police chuan an man maw? Chhuak leh mai mai tawh lo tûrin tâng tlâk a nih chu, ana viau em?" tiin a ban na lai chu ka chûl saka, a tuamna chhanah pawh a thi chu ka hmuh hmaih lo, a thûk ve tâwk ang tih ka hria.




“Um Court in a chung thu a rel mai ang, a chhuak mai mai lo turah ngai ang aw. Tualthah tumna a ni a, bail chhuah mai pawh a har ang, ka thawmhnaw min siampui dâwn em ni? Naktuk mai hi ka kal hun a ni tawh sia, ni hnih hnuah rawn lêt ka tum dawn ania" a tihchuan ka thaw haka, ni tak e. A hma pawhin a lo sawi tawh kha maw; mahsela a in hliam bawk nên ka ngaih a ti ṭha thei mawlh lo.



“Ka ngaih a ṭha theilo, Te zin lo maila ka duh, vairam phei chu ka ngaihtuah lehzual che. Mizo an zuk thi duh si, engkim hi ka ngai dik lo vek tawh ania'ng" tiin ka thaw hapa, ka kut chu rawn humin ka lu chu a dârah a nghata.




“Him takin ka rawn lêt leh ngei ang tih ka tiam a che, kan pahnih tân leh kan fate tan a lawm ka tih ni. Hlauthâwng mah ta che, vêngtu ka nei reng dâwn alâwm, nangmah zâwk hi lo in enkawl ṭha la. Ka awm loh chhûnga ka chhungten rawn biak che an tum a nih chuan lo be hauh suh ang che, tirawh le. Insiam tawh ang hmiang" tiin a thawmhnaw dahna lam chu min panpuia.




A hawn rual chuan thawmhnaw a lo tlep tuar mai, a dum deuh vek an ni. Mipa hi chuan thil dum hi an ngaina a nih hi, suitcase chu la thla in a thawmhnaw chu ka khung sak mawlh mawlha, “Rawn haw vat tum la aw, i tello chuan ka khua a har dâwn teh ania, a reh bawk si. Rawn zui ve mai che ka duh nân" ti a ka ṭawng pah mawlh mawlh lai chuan ka hnunglam aṭang chuan min rawn kuaha.




“Hruai che ka duh ania, min sawi hmuh suh. Mahsela kan naute a lian tawh sia a chi loh ang" a tihchuan ka nui haka. “Nia kan lo nghâk ang che, zaninah Dodoi pawh ka lo bia ang, min riahpui theiin ka ring, nangmah hi zuk in enkawl ṭha hle ang che" tiin alamah inherin ka kuah a.




“Ka zo e, kan mu leh mai dawn nge?" ti a mitko ka sân euh rual chuan min nuihsukin min pawm kâng nghal nawlha “Vawikhat na reng reng chu kan ti ang chu, ka awm loh chhungin lo rinawm hle ang che" tiin khumah chuan min delh mu a.



A nupui ka nihna ang ngeiin chêt a lak zawm nghal zat bawk, nui hakin ka kuaha. A samah chuan ṭhamin min mamawhna a tihlan ang chiah chuan ka lo tilang ve bawk, ka naupai puar ve deuh tawh nen ka dul chuan a do pawng alha. A rawn nui hak mai.



Engdang mah sawi tawh lo chuan ka hmuiah chuan rawn fawpin chêt a lâk zawma. Keipawhin lo puiin a tâwpah chuan kan duh in pe tawnin kan thaw dun hle hle a, “Ka ngai dâwn che e, reilote i awm bo pawhin ka khua a har a nia, helai aṭanga ralkhat pawha thlir phâk lohah i awm dâwn ania, zu fimkhur rawh ka tih kha hre reng rawh aw, vai ho chu Mizo ai an la rapthlâk zâwk lehnghâl, fimkhur takin che ang che" tiin ka hrilh leh pah malh malha.






“Ka hria a lawm, lo in enkawl ṭha la nihnih bâk rawn châm ka tum dawn lo ania, ka ngaihtuah zâwk che tih hria la. I hrehawmna belhchhah tura ka chhûngte hetianga an lo awm leh zêl hi chu pawi ka ti; mahse lungngai lo la i tân ka awm reng dâwn a nia, tumahin ka nupui i nihna hi an tidanglam ngai dâwn lo. Ka chhûngte hetianga an awm hi hrethiam hrâm hrâm ang che" a tihchuan ka nuih saka.






“Ni e engtikah emaw chuan min la pawm em em ang, inthlahrung miah suh. Kan fapa ten kan thurâwn pawh la miah lova an duhzâwng a an lo kal ṭhin hian pa tam tak rilru ana ve a tih pa Hliran min hrilh tawh a lawm, a dik in ka ring. An ni tân chuan an fapa i nia, i hma hun an ngaihtuah ve dawna, nakin lam thlenga i nupui i enkawl tur tih hria in an duh uluk ve dawna, chuvang mai mai ania'ng" tiin a kutah chuan ka chelh saka.




“Kan naute a han piang anga, an rilru an la thlâk mai ang. Tûnah min haw viau mahse min haw reng bik in ka ringlo, an rilru a na rih a chuvang mai mai a nih hi" tiin keimah zâwk chuan ka thiam tawk chuan ka ṭawng thlamuan ve a, a inthiam lo hmêl hian lo vui khum vak ka tum lo.




Ka lakah ṭha lo mahse ka mipa hmangaih chhûngte an nia, ka hmangaih chhûngte chu ka hmangaih pui ve mai tur a ni, an laka vui reng emaw. Ka pasal bula lo sawisel chiam pawh ka tum hran lo, a chhûngte lak aṭanga pawtsawn tu mosual tak ka ni ang tih ka hlau, tûn angah miin mona chhûngte sual an sawi nasa in an in hrilh kuala.


A ṭhat tho rualin hmeichhe tam tak thinlungah mipuiin min chhan dâwn tho tih rilru pu a pasal chhûngte pawisawi tum tlat leh in hauh pui tum tlat an awm phah in ka ring. Hmeichhia chu kan sualna lamah chuan sual leh vervêk tak kan nia, mipa ai kan fing tih dâwn chuan ni chiah lo mahse kan phakar thiamna leh lemchan thiamna hian min chak tir leh ṭhin.



Pasalte fuihpawrha an chhûngte lak aṭanga hruai pêng tu hmeichhia nih hi ka duh hauh lo bawk, ka fate ngeiin an rawn tawng ve ang tih ka hlau.



“Ka tân hian i hlu mange Lalrosang, i awm lovang tih hi ka hlau hnuhnawh ta riau mai, ka chhûngte laka i vui ngai miah lo pawh hi kei i pasal hian ka hmuh hmaih hauhlo, min hmangaih vanga ti i ni tih lah ka hai hek lo, engtin nge nang ang hmeichhia hi an awm theih tih hi ka in zâwt fo a sin" tiin ka samah chuan a chûl hliau hliaua.





“Ka tawng che hi ka lawm daih zawk, a tîrah hlau viau che mahila tûnah chuan ka tâna ngamtlak ber i ni a sin. Harsatna ka tawhin min pui tur leh ka thlavang hauh turin i awm renga, mi diriamna ka tawhin ka hmaah i dinga, ka ṭahin min hnemin min kuaha, ka natin min tuam dama, i chungah hian vui thei ka ni hleinem" tiin ka nuih var vara.



Ka sawi chhuah loh tam takah hian sawi chhuah thiam loh lamah a chungah lawmna tur chu ka ngah mai, englai pawha min pui tu leh ka tana ding ṭhin hi kalsan pawh ka duh lo, ka ta ni reng se tih hi ka duh a ni.



Dodoi biak angaih avâng in phone ka hmansana, a ni pawhin ngawi rengin min lo ngaichâng thung. Dodoi pawhin a lo rem ti ve mai bawka, ka thaw deuh huai mai. Keimaha riah kha keipawhin ka hreh ve deuh, thil rûk hrât mi hausa rawk hmang tual thah pawh pawi tilo an tam tawh si; Aizawl pawh hi a thlamuan thlak tawh lo ka timai.




“A hman dâwn ta em?" Thanpuia bula ka va phei leh chuan min lo zâwt vata, ka bu nghat mai. “A lo riak thei dâwn a nih chu, a nu leh pa saw an fel ve a keipawhin nu leh pa tak takin ka en a, an ni pawhin min en hrang ngailo. Dodoin duhlo mahse an hriat chuan an rawn tir lui tho vang" tiin ka nui haka.




A ni pawh a thaw huai mai, nu Zari awm mahse lâng in a rawn kal ṭhin sia, min ngaihtuah dâwn lutuk tih ka hria. Nupuite mahni chauha awm tîr chu tu mipa tân mah hian a nuam bîkin ka ring lo.


“A ṭhat chu, a duh leh lo chawl sela, a hlawh chu a ngai reng tho vang. Nang alo awmpui che chuan ka hrethiam ang" a tihchuan ka lo bûk pui nghat nghata.


A pawm dâwn tih ka hria, chawlh hi chu a phûr reng tih ka hre miau a, a hlim hle zâwk ang chu.



“Te ice cream kha min va lâk lawk mai, ka ei châk leh tawha. Khumah hian ka lo nghak ang che" tiin nuih tlawna, ngawi reng chuan a kal ve nul nula, a rawn lêt leh rang viau bawk.




Ice cream chu ei leh te tein kan mu zui ta thuaia

MUTTUI U

[mawitei bawihtlung]

KA LALPA



CHAPTER 14



“Lo haw leh vat rawh aw" tiin ka pasal cara lût tûr chu ka kuah vang vanga, ka samah chûl zauhin “Lo in enkawl ṭha ang che, ka rawn haw leh vat ang. Min lo ngai em em la, min ngaih châng apiangin min rawn phone dawn ania aw, i tân chuan ka hman reng ang" a tihchuan ka nuih seih a.




A hnathawh lai hi chuan biak buai hi ka inthlahrung ṭhina, chu chu a hria a ni ngei ang. “Aw le, ka lo bia ang che, nangpawh fimkhur la. Dam takin i lo haw leh dawn ania, ka lo nghâk reng ang che, dam takin" tiin a hmuiah chuan ka fâwp zauha “Nangpawh lo ninhlei lo la, i nu i lo ti hrehawm ange, i rawn chhuah hunah ka hau dâwn che ania" tiin ka dul chu a khawih leha, ka lo nui hak thung.




A che nasa ṭhin bawk nen eng la hre silo hi a hau ve mual mual zêl chu ania, “Ka kal tawh ange" tiin car-ah chuan a lût zuia, ka kut chuan ka vai liam a. Ka ngui nghâl ruai mai, kan hmangaih te hi chu reilote chhûng pawha kan ngaih zia leh thlakhleh zia hre chiang tu ka ni tlat.




Minute khat lek pawh hi a rei ngawih ngawih nimai hian ka hria, ka hmangaih êm avâng hian min be miah lo a a awm chuan biak a neih loh pawhin biak nei ang tlatin ka ngai a, ka thikthu hi a lo chhe leh hlur zêl.





A tlân liam tâkah chuan inchhûng lamah ka lut zui ta thuaia, chaw ka ei tawh bawk nen room lamah ka awm ta daiha. Tih tur a awm lo bawk si lehkhabu chu ka chhiar malh malh a, khawhar a hnêm ve viau mai. Dodoi lah chawhnu lamah bâk a rawn kal thei dâwn bawk silo, chawhma insiam nan hun hman zuk han tum a mawle.





Eng em em nge maw rawn ken a tum dâwn ni? Joela nena an chungchang pawh zawh a ngai ang, an la nilo tihchu ka hria a, a be ṭha duh lo anih ka ring ber, kum 25 na a hmang ve tawha, nei zung zung se ka duh. Keiai a upa bawk nen hetiang chuan pasal neih a tum ve te a nih chuan a upat lutuk hma hian nei sela ka duhpui zawk.





Lehkhabu ka chhiar zawh chuan mut hahdam tumin thil ka ngaihtuah paha, Thanpuia ka neih chin hi ka hahdamin ka awm awl bawk nen mut leh ei tui bak tih tur ka nei meuh lo, ka hnathawh hah a phal bawk silo. Ka nau lo pai leh zêl nen duat chikimin min duat a ni ber mai, kei pawhin a phalloh thil chu tih luih ka tum bik lo.




Luhlul deuha ka awm khân min ning thuai theia, kan pahnih inkar ka ti chhe vek thei tlat a ni. Chuvângin a duhloh thil hi chu lo tih luih phet ka tum bik lo, ka pasal a ni a, min enkawltu tûrin a inhuama a duh miau chuan kei a nupui chuan ka lo zâwm mai tur a ni.



Mi a duat duh vang a ni a, lo tihluih phet pawh ka tum chuang lo, kan intawn tirh ka ngaihtuah tello thei ṭhin lo. Ka dai sual kha a ṭha ka ti hauh lo, mahsela Pathianin rem min lo ruatsak nimaiin ka hria, ka nun leh ka hun tawn hre rengin khang thilte kha ka nunah a rawn thlen tira, Thanpuia hi ka tan a rawn tîr ka tilo theilo.




A tirah nello in hel ṭang ṭang mah ila tûnah chuan amah bâk hmangaihtu ka nunah ka tawn loh zia ka hrechiang êm a ni, a pâwnlam hlauhawm tak angin lang mahse a chhûngril lamah erawh mi ṭha tâwp khawk ani thung si.


Ka kuta zungbun chu enin ka nui ver vera “Lalpa ka lâwm e, min hawisan loh avangin. Ka nu leh pa kha ka hlim a ni tih tal lo hriattir thei la ka ti, duh loa an kalsan hian hmangaihtu ka lo nei ve renga, an fanu hi a puitling tawh tih tal hi hriata, an hmêl vawikhat tal hmuh pawh ka châk, engvanga min kalsan nge an nih tih hi zawh ka duh ani," ti a phun sap sapin pâwnlam chu ka thlira.





Airport-an thleng tawh ang nge, jamah an la tâng ni ang? Zui ve ka châk lutuk chu in thunun a har lek lek mai, him taka a rawn haw leh ngei ka beisei, a tello chuan ka dam theih tawh pawh ka ring lo, ka dul chu chûl hliau hliauin ka thaw chhuak ham hama.




Tûnah chuan thla nga a tling chho ve tawh bawk nen a langsâr ve ta viau, ṭhenkhat min hre ve tu ho lah mi sawichhe tu ah an ṭanga, kan pûk lâwk chu mi hmuhsit leh zual nân an hmang a ni ber mai; mahsela engah mah ka ngai duh lêm lo, nau pai tlang ngam lova a ti tla ru ho pawh an ni ve nuk tho a, keichuan ka ti tla êm hleinem.




An duh duh chu lo sawi ang hmiang, Thanpuia nena kan inkar a ṭhat phawt a hnu an duh duh chu lo sawi rawh se. Keichuan ka pasal nena kan inkar leh ka chhungkua bâk hi dah pawimawh ka tum lo, midang nuna inrawlh leh lutuk pawh mahni tâna hrehawmna insiamna mai a ni.



“Miriam ka rawn thleng a nia" Dodoi aw ka hriat rual chuan tho chhuakin room aṭang chuan ka chhuak zuia, thawmhnaw bag nen a rawn lût rup mai. Êm êm ṭhin hian, a ha hman zozai dawn emaw ni? “I va rawn inkeng tam êm êm ve, i ha hman vek dâwn em ni?" ka tihchuan a rawn nui haka.




“Khawnge in room? Lût lawk ang" ti a min zawh avâng chuan kan room lamah chuan ka hruai zuia “Kha hêng hi ka nau duat tur lo pian huna a hâk tur a nih hi, in lei thei dâwn lutuk tih hre mah ila i ṭhian ka nihna angin ka fa ang tho tur ania, a lo pian hun a a hâk turin dah ṭha mai rawh. Ka rawn lei ve tawp a nih kha" tiin naute thawmhnaw ṭha hnem fe chu a rawn phawrha.




Ka lo meng phawk vak mai, tûnah thla nga na tur chiah a nia, a va lei hma êm êm ve.“A ngai lo a sin, bakah a rawn piang mai rih dâwn lova, thla li vêl nghah phawt a ngai a lawm. Ka lâwm lutuk a nia, ni e a nu i ni dâwna, i duat viau angai ang, pasal tur lah i la hmu thei silo" ka tihchuan uar zet hian a rawn nui zui vaka.




“Kan nei ve ṭep tawh ang, ka lungdumtu hi an la awm rih silova, kan tuar rih mai a ngai a nih hi. Tûnah pawh ka la zawng char char, duhthusama tha hi chu an han vâng em em khawpa, mi ngaihsak deuhtu leh mi duat tu hi ka duh ve bawk sia, hmuh an har bawk si. Keichu mipa in duhtâwk lutuk hi chu ka ti thei der lo" tiin a sawi zui nghal zata.




“Kal rawh titi ila, titina hun pawh kan nei khât tawh a lawm, hna lah ka rawn kal thei ta mang silova, ṭhian duna titi hun pawh a awm ngai tawh loh hi" tiin veranda lamah chuan ka chhuah puia.




“Joela nen chuan in la nilo em ni?" ka tihchuan a lai chhe nghal hle tih a awmdanah chuan ka hai bik lo, eng emaw tak chu thleng a awm ngei bawkin ka ring “I hnar bik lo tiraw?" ka tihchuan a hmai chu a sen zui ṭan ṭana, ka nuih te lam lam a tiza, chuti êm êma han laih chu eng tak chu awm ang maw?





“Ih...a ṭha chu ka tia, mahse kan in len hleih bawk sia. An ni an hausa si, keini kan rethei bawk sia. Lo haw lo la, i pasal chhûngte nêna in awmdan ang hian kan awm ve ang tih ka hlau a lawm; hausa ve deuh hlek ila chuan a zia anga, mahsela rethei leh hausa inneih hi chu chhûngte lakah hian a inthlahrunawm ṭhin ema, amah chu ka duh lo pawh a nilo; mahse kan in kar hi a zau em a ni" a tihchuan dik ka ti tho.




Chutih rual erawhin mi awm theilo lutuk an ni bik lova, an iaina chiam tur ka hrelo. Thanpuia chhûngte ang kher hi an nilo mai thei bawk a “Mi kan inang hleinem, an fel viau mai thei a sin, mipa rintlâk tak a niin ka hria, keichuan ka duhpui che. Han fiah ve hrim hrim la ka duh, mipa zâwk in min duh hi chuan kan ti fuh nge nge zêl ania, mahni in sit duh lutuk loh tur" ti ve duahin ṭhutthlengah chuan ka ṭhu thla a.





“Dodo mahni hi in sit duh lutuk bik loh tur, mihring ve tho kan nia. Midang aia hniamah in dah loh tur, kan vânneih na a nasa lo bik tihna a nimai, hausa tur chu awlsam takin an hausa maia, keini ang tân chuan kan vanneihna hun a la thleng lo ti a pawm mai a ngai alâwm, khawvêl hi chu a vannei te tâna din channa ram a nia, tumahin kan dinhmun hi lungawipui kan awm bik hleinem. Mahsela kan awm luih a ngai miau sia, vânnei tur bik an awma; chu erawh kan hausakna te hi vanram kan luhpui dâwn lo tih hriat reng erawh a ṭha" ka tihchuan a bu ve nghat nghata.





“Ka lo ngaihtuah dâwn a nia, tûnah pawh kan la in be reng tho, a ni pawhin kan dinhmun lam thlir lo turin min tia, mahse a ngaihtuah loh theih loh. Mi hausa inah keini ang va lawi dâwn ila engmah thiam kan nei bawk silo, a insit loh theih ṭhin loh alâwm, bâkah min bum ve te pawh ka hlau, mipa chu an inthup thei si a. Mi duh deuh anga lang si hian mi lo kawp leh mai duh an awm ṭhina, an engkim an social media khawihna chena hriatpui loh chuan ka ring ngam ṭhin lo, min lo kawp hrep ang tih a hlauhawm. Hriat an har sia" tiin a rawn sawia.





A ti dik ve tho, mipa lerh phei chu vawikhat ah 5 te zuk kawp thei a! Rapthlâk hian! Engtin nge biak dân tur an hriat ni? Keini pakhat pawh engtin nge kan biak ang tiin kan ngaihtuah fe zêl kha a nia, an ni chu an han be tak tak chu an bialnute hian kawp an ni tih an inhre ngailo reng reng.




“Joela chu ring phawt rawh, mahse rindan tâwk thiamla. Keipawh ka lo dai sual tawha, ka tihsual ang kha tisual lo turin ka duh che, keini ang kher hian in awm dâwn lo ania. Fimkhur turin ka duh che, keipawh inchhir lo mah ila Thanpuia hian min lo nei duh lo ta se ka chan tur i hriat kha" tiin ka phun sap sapa, a ni pawh a bu nghat nghat mai.





“Ka hria alâwm, kan duh ve laklawh anga min tina leh hrep ang tih te hi ka hlaua, ka bialpa hmasa kha i hriat kha. Kha tiang kha tawn nawn leh pawh ka duh tawhlo, a hrehawmin thawk a har, kan hmangaih dâwn veleh min kalsan leh daih an hmanga, lunglêng leh rilruna lutuka awm a ngai ziah; mahse Joela chu hun pêk chhin chu ka lo tum ang, khawi maw in in hi min fan pui teh ka la hmu chiang miah lo ania" tiin a rawn tho chhuak zuia.




In chu pâwn lam aṭanga en puiin kan titi pah mawlh mawlha, mawi lah chu a tih thu a sawi sek ringawt. Nuih ringawt in in chhûng lam pawh chu ka enkual puia, zânah pawh mikhual room-ah kan mut mai a ngai ang. Nupa room hi chu a zahawm tlata, miin a kan len pawhin an nupa room êm hi chu zahsak an ngai.



ZAWMNA.





“Pasal i nei fuh bawka, in in pawh a nuam, hmeichhe tam takin neih an châk kha i nei thei bîk ania, i thikawm lek lek mai. Keite hi ka hma hun pawh ka la hre silova, engtin nge hun ka hman ve dâwn ni, ka tâna khuanu ruat rawn chhuah hunah chuan ka kal tîr mai mai hauh lovang, ka thlung bet tlat ang" a tihchuan ka nui hak hak mai.






“Ni e, nei vat rawh. Mo ṭhiana ṭante ka duh ve ania, mawi deuhin kan inchei anga, mahse Thanpuian a phalloh chuan chiloh viau ang" tiin ka nui haka, “Nia mahse maw in inneih hnu phei hi chuan a nelawm reuh lutuk, hna kal pawhin mi a be ve deuh renga, i ṭhiannu ka lo ni kher kher hi chu ka vânnei ka inti, lo in hre lo ila chuan thik em em che in ka awm âwm sia" tiin a nui zui har hara.








“Nang ang ṭhian ka nei che hi ka lawm zâwk asin, ka tûn dinhmun thlen theih chhan pawh hi nangmah avâng chauh a ni, he hna hi min hmuhpui lo la chuan Thanpuia nên hian kan in tawng ngaiin ka ring lo, tûnah chuan a ke pen ruala pen nuam ka ti a; a aw hriatreng chakna in ka khat bawk, pasal ka la nei ve ang tihchu ka suangtuah ṭhin ngei a, mahsela Thanpuia ang hi ka nei ang tih ka ring phalo, keimah anga rethei ka nei turin ka lo ngai ṭhin kha a nia" tiin ka phun sapa.








“Iti mak e a, hausa leh hausa te, rethei ve ve inneih kher tur tih a inziak hleinem. Pathian hian kan tân ruat a nei lâwk veka, a ṭhen chuan kan nghah rei angaih hle laiin ṭhenkhat erawh chuan an tawng nghal maia, vânnei leh vanduai inkar a ni. Tam tak chuan kan malsâwmna dawn tur hre miah lovin kan beidawn sana, chu chuan a hma aia dinhmun hniam zawkah min dah ṭhin. Pathian hian mi tin tân hian hun a ruata, kan nghah rei ve te a ngai an tih kha, keipawh engtikah emaw chuan chu khuanu ruat chu ka la tawng ngei ang tih ka hria" tiin hmalam chu a en renga.






“Kan hlawhtlin hun kan nghah chhûng hian tam tak chuan beidawnna kan tâwk mawlh mawlha, ding chhuak leh tawh lo turah kan in ngai fo ṭhin, khawvel mite min sawisêl avângin kan na a, kan hrehawmna a pung sauh bawka, mahse chûng tuar chhuah hnuah chuan a tlûk nawn theih mai mai tawhlo" tihchu a sawi duaha.








“I puitlin ve hmel reuh lutuk, ka nuih iti za, sawi ṭha ve bawk sia" tiin ka nui chhuaka, a rawn ner nasa mai “Mi thutak lai laiin khatiang in lo nui suh, a va tlai tawh ve ka ril a ṭam riau mai, tirawh zanriah te ei hma ang, mut vat ka duh. Nizân ka mengrei lutuk, Joela nên kan inhniala" a tihchuan ka mit ka lo sân euh euha.







“Ehem! A rawn lêng lo i ti emaw tia, chu a lo lêng reng a nimaw? In thup thei deuh ve. Thup reilo mai pawha,  a ṭha ang ka tih kha, a zia a zawia, mi inthlahrung chu ani bawk nen i tisualin ka ring lo, nupui te ngaihsak leh duat tak chi a niin ka hria, enchhin mah rawh. Mipa in duh tâwk deuh, in la pa bialnu duh ve tho si ngaihsakna châng hre leh lo ang chi chu ani lovang, a rinawm burin ka ring bawk" lo ti ve duahin ka tho chhuaka.








“Chaw chu va ei ang hmiang, keipawh ka ril a ṭam riau mai, nau ka pai vâng hi ania'ng ka ril hi a ṭam zung zunga, a hrehawm lek lek zawk. Ka thau chak bawk si" tiin choka lam chu kan pan zuia.




“Nu Zâr chaw ei i hman tawh em? I in peih tawh chuan kan lo ei ange, eikham lamah Thanpuia biak te ka duh dâwna, min la rawn be lo nên ka ngaihtuah riau mai" tiin chairah chuan ka ṭhu thla a “Ka in peih e, lo ṭhu rawh u ka rawn siam ang" a tihchuan Dodoi chuan a lo pui vata.






A ni hi chu a chhûngte bulah ei a duh ṭhin avangin thleng a sil zawh hi chuan a haw mai zela, chêt ngai a la awm chuan keimahin ka lo ti ve maia, zingah ka tih theih loh ho rawn tiin a mah a fel bawka Thanpuia pawh hian awmpui dang lâk a tum vak lo ania'ng.






Chaw ei phah chuan kan titi mawlh mawlha, a hna chawl tur a lâwm thu ringawt sawia. Hahthlâk ṭhin, Thanpuia hian a awm loh chânga a ai awh tu tur a neih tho avang hian ka ngaihtuah em em lo, a rinawm bawk nen kan nupa pawh kan âwl phah viau mai.




Chaw eikham chuan ha te chu nawtin mikhual room lam chu kan pana, “Awi min rawn sâwm har lutuk zawka, riah chhuah ka chak mai zia, nau te ho an han infiam tak tak chu lu hi a na ut ut thei, in pa chu be vat teh" tiin khumah chuan a mu thla a, a thawveng mai sia maw.



Thanpuia chu call in a la rang leh viau lawi sia, a buai a nih ka rin nên phone a rawn chhâng leh rang lutuk chu mak ka tilo theilo,  “Aw ka nupui duh tak" a rawn tihluai chu ner sakin Dodoi chu ka ena, a hre pha ve vek bawka a lo nui kar kar mai.




“I hman tho sia, min rawn be miah lo a, tinge?" ti a ka zawh rual chuan a rawn nui hâwka “Min ngaih leh ngaihloh ka hre duha, ka be duh lo che a nih kha, mi call hmasak hi i tum siloa" a rawn ti chu ka ngei lutuk chu ka chek hlaka “Suala, ka rawn call tawh miah lovang che, ka ngaihtuah zia che i hre miah lo em ni?" ka thin a tirim ṭun mai, min rawn biak kha ka ring ve em em ania.




“Thinrim lo hram rawh ka nupui duhtak, ka ngai em em che a lawm, ka lakah engtiang chiahin nge rilru i put ve tih kha ka hre châk alawm, i ṭhiannu chu a rawn riak ta em?" tihchu min zâwt nghal zata, chhan pawh ka chhâng duh mai lo, ka thin a tirim tlat. Be hmasa ngai em em lo mah ila ka rilru a hre reng.




Engvanga a zin lai laia mi fiam kher nge maw a nih ni “Min chhâng vat la, i la lungawi lo em ni? Thinrim tawh suh le, ka tihpalh a nih kha; ka ngai teh mai che ania" a tihchuan ka hmui ka ti pawrha, Dodoi lah kan nupa thusawi leh ka awmdân chu min lo nuih ve char char bawk.




Thanpuia hriat loh tur chuan ka hau nasa mai “Riak dâwn e, ka dah dâwn min be chak lo emai" ka tichu a rawn au nasa mai, “Dah reng reng suh, Mira ka rawn be hmasa ziah tawh ang che, in mu tawh dâwn em ni? Keipawh hei meeting turin ka kal dawn chiah" a rawn ti chhunzawma, zân aṭangin an in hmu khawm nghal dawn a ni maw.




A chau dâwn tih ka hria, ka khawngaih leh hnuhnawh “Um, kan mu nghal mai. Tih tur vak a awm silo, ṭhut chhuah reng kha ka pum nên hian a hrehawm ve deuh tih i hriat kha" ka tihchuan a rawn nui haka, “Ka naute pian hun kha ka nghakhlel tawh teh ania, lo in enkawl ṭha ula, i ṭhiannu kha a lo vak chhuak a nih vaih chuan ka bân ang" a han ti ngei lehnghâl.





Dodoi chu rang zet hian a rawn ṭhu chhuaka, “Ka lêng dâwn lo, bân ka duh hleinem. Rawn haw vat mai teh, i nupui hi nang ai ka hmangaih daih zawk ania" ti pawr hlarin a mit chu min la rawh sân awk awk lehnghâl.




“Min hlau lo viau suh aw, kan nu ṭhian nimahla ka dim dâwn miah lo che a nia, zahngaihna ka nei miah lo ang" Thanpuian a rawn tihchuan a hlauhthâwn hmêl nasa mai, kei erawhin a fiam tih ka hriat avângin ka lo nui har hara.




“I ti hlauthâwng vek a lâwm, i thleng tawh em? Naktûkah ila cham dâwn tho sia; inhmuh mai tur cheu alâwm, kei chu ka chau lutuk. Awm la chuan ka ke hi min hmehsak leh la ka ti e" tiin ka vui pah nâng nâng a, dik tak chuan nikhat êm pawh la cham lo mahsela ka ngai em em tho si hi keimah pawhin mak ka inti.



“Lo haw vat ka tum dawn ania, tawrh a har viau chuan i ṭhiannu te kha lo hmeh tir la aw, enge ka lo hawn ang che?" a rawn tinghal zata, “Umm nangmah kha min lo hawn rawh, chuan maw? I lo haw veleh noodles min lei rawh aw, ar bawp tui tâwka siam pawh ka ei chak" tiin ka sawi zâwng te chuan ka chil a pût thei nia.



“Aw le, aw le, ka dah phawt ange aw. Kan thleng tawh a, i mut a chhuah viau chuan lo mu hma ula, naktuk zîngah ka rawn be dâwn che ania, ka hmangaih che" a rawn tihchuan ka chhâng lêt ve sapa, an tluang êm ang chu maw? Rawn haw vat theilo te hian a awm ang tihte ka hlau.



Phone kan dah hnu chuan khumah chuan ka muthla a “In in duat ve hlarh hlarh si maw, keichu ni ila ka ṭah khum vak ang. A hrim hrim in i ke chu a hrehawm viau em?" rawn tiin ka bulah chuan a rawn tawlh hnaia, ka in luah lai khan kan riak dûn ve fo a, tûnah chuan kan riah tlân lohna pawh a rei ve tawh hle mai.




“Hrehawm em em love, Joela chu a la rawn be lo che em ni?" tiin ka zâwt a, a hmêl ngui nghal ruai chu ka hmuh hmaih lo. “A buai sia, kan in be khât lutuk, dik tak chuan min be tam ve deuh se ka duha, mahse a khât tâwk bakin min rawn be lo, heti chung hian min duh ang deuhin a awm bawk si. A laka rilru put dân tur pawh hi ka hrethiam lo, min rawn biak leh ka hlima, min biak loh lahin ka ngai em em bawk si, ka tân hun a nei thlâwt lo ania'ng, ka be ṭha duh vak tawh lo" a tihchuan ka nuih saka.



“Nghak la, hna nei an nia an tân online reng pawh a har ang chu, an rawn len khân a zia tur awm ang chu ka hrethiam deuh ruak a sin, bakah Thanpuia pawhin a fak viau a nia, a duh em em ang che. Chuti nilo se a rawn be tawp nâng che, mipa hi chu an zia hi a mak ve ania. Han biak tam leh min chhâng ṭha duhlova, biak loh lahin an thinrim leh daiha, hriatthiam hi an har a sin" ka tihchuan a bu nghat nghat mai.





A hrethiam ve ta pawh a niang engmah a sawi belh tawh lêm lo “Be tam lo chhin la a mizia chu i hrechiang mai ang, an induh tawk ve a, hrem ve te pawh an ngai, an zia a inang silo va, mutthilh tum phawt ang. Naktuk chu in bul restaurant ah sâwn va kal ila a ṭha ang, thil thak lam ka ei chak lutuk" tiin ka mu ṭha a.




“Khavang khân ania pasal pawh ka neih duh mai loh, naupai nên retheih phei chuan duh duh a ei theih siloh, bakah fate kan han nei anga, kan pasal ten min puih nachâng an hriat loh chuan a hrehawm, mu phawt la kan la kal ang chu. Rawn piang zung zung tehse" a tihchuan ka nui haka.




“Nakinah chuan ila puar luah ve dâwn ania, min hmusit hauh suh, ril hi a ṭam huam huam reng mai a ni. A che nasa bawk sia a harh viauin ka ring" tiin ka ham zui bai baia.


BUAI ANA LUTUKA, NAKTUK ZÂNAH CHAPTER THAR DAH KAN TUM DAWN NIA.

[mawitei bawihtlung]

KA LALPA




CHAPTER 15





“Te ilo la haw dâwn lo em ni?" a cham tum aia tam a cham belha, ka ngai tawh bawk nen ka vui lek lek mai. Nithum lai a cham tawha, enge pawimawh awm dâwn ni?



“Ka rawn haw thei ṭep e, naktukah chuan ka lo haw tawh ngei ngei ang. Hna hi a lak lawh sia thawhpuite rin ringawt dik lo a ka hriat avangin ka rawn haw lo a nih kha, min ngai tawh viau em ni? Ka rawn haw ṭep ania" tiin a rawn nui zui haka.






“Ngai lutuk che i cham rei tawh bawk si, a nuam lo. Rawn haw vat vat rawh, i rawn haw vat loh chuan ka lo tlanbo daih ang" tiin ka phun nâng nâng a, a rawn ṭeu nasa nghal hle mai “Sawi pawh sawi suh kha thil kha, ka rawn haw a i awm lo a nih vaih chuan khawiah pawh awm la ka zawng ang che a, ka hmuh hun che chu hremna i tawh hun a nimai" a tihchuan ka lei ka chhuah vak ringawt.






“Ka tello in i tlei emai min ngai tak tak lo ang, vawiin chu naute a rawn che nasa lutuka, a na lek lek mai. Rawn chhuah vat a châk tawh ania'ng" ka tihchuan a rawn phûl hluta, a awmdân vel min rawn zâwt nghal sek bawk. Ṭha deuha hrilh ve maiin ka dul chu sawi pah chuan ka chula.






“A pa a chhûn dâwn aniang, a harh hmel tlat. Nangpawh hi i harh viau in a nia ka rin ni, keichu ka harh loh thu an sawi veka, nangmah a chhûn dâwn che ni hrim hrim" tiin ka nui hak haka “A pawi hleinem, a pa anga hmelṭha leh chhelo a rawn ni anga, a luck viau ang" a tikher chu ka eilo bawk nen ka ner nanga, a hmelṭhat pawh chu a va chhuang awm ve.







“I hmêl chhiat nen in la hmelṭha viau suh, keimah min chhun chuan a hmelṭha anga, nang a chhûn che a nih chuan thinchhe thanin a thang dâwn tih ka chiang" ti ve hmakin Dodoi thil lo ei mawlh mawlh paha lo nui kur kur chu ka ena “Ka dah phawt, ka ril a ṭam tawh zânah min lo be rawh aw, lo haw vat la ka ngai tawh che ania" ti in Dodoi bulah chuan ka ṭhu thla a, spicy kan chhûma chu erawh ka hrilh duhlo, min hau palh ang.






“Aw le ka lo haw vat ang, keipawhin ka ngai em em che a nia, eiin kha lo ei ṭha la. Ilo damlo hlauh ange, a nih leh thil chu ei phawt rawh aw" tiin phone chu a dah zuia; chuveleh Dodoi chu a rawn ṭawng nghal par par mai “In in be ve lah hi in inhnial loh leh in inrun luiha, in thlahlel em em tho si, nuih in tiza zawk, a zia a dang ka tih rêng kha, a hmangaih chiang che a lawm, i samkir buk luih khân a zial hnan chiang lutuk" a tihchuan ka beng thlawrha.







“Tikhan min ti ve kher suh, ka ngaihtuah sia a rawn haw har bawk sia, tunlai phei chu mangṭha lo ka mang ngun lutuka ka ngaih a ṭha lo alâwm, a chunga eng emaw thleng tur ang tlat hian ka hria a, ka ngaihtuah lo theilo ka bulah te chuan awm sela chu thu hran, kan awm hrang bawk si" ka tihchuan ka kut rawn vuanin a thil hâwp lai chu a ei zo te te a.







“Mangṭha lo man hian a takah thil ṭha kan tawng duh zawk an ti a lawm, mang mai mai a nia. Tam takah a thleng dik chu awm mahse a nilo zâwnga thleng hi a tam zâwk a nia, naupai lai i nia in ngaihtuah hah vak suh. Nau pai lai chuan hahdam tak leh rilru thawveng leh thlamuang taka awm tluka hlu a awm lo, i pum chhûngah khân naute a awm tih hria la, thil a zângkhai zawnga ngaihtuah hrâm hrâm tum rawh, dam takin a rawn haw em em ang" a tihchuan ka thaw huai mai.








Ṭhian neih hi chu a hahdam thlâk ṭhin, rilru hahna leh natna kan neih a kan thlenna leh min hnem tu ber an nih vang te pawh hi ania'ng, Dodoi lo awm hi chu ka hahdam pui takzet a ni, ka mamawh hun apiangah min fuih tura a awm reng thei te hian min ti lâwm. Keipawh ka theihna apiangah a tâna awm zêl ka duh.






“Ilo awm lovang tih hi ka hlau ṭhin, tûnah te hian keimah chauh chuan awm ila ka mu ṭha ngut lovang, i rawn awma ka thla a muang sawt mai. Misual hi an tam tawh sia, mahni chauha awm chuan a thlamuanthlâk loh, ka in hluiah kha chuan mi rethei te mai ka nih avâng khân hlauhthâwnna tûr em em ka neilova, tûnah chuan ka awmna hmun hian a zir bawk nen thlamuanthlâk loh deuh mai a sin" tiin ka ei tur chu ka ei ve a.







A thak tui ngei mai, Dodoi lah Thanpuia zin chhûng a chawl bawk nen nilenga titina hun kan nei thei chu ka lawm, a ni lah chutia thawveng taka awm theih chu nuam a ti a, mi fiam pahin Thanpuia chu zin reng se a ti thul, ngeiawm ve ngat ngat tak a ni, ka ngai tih hre rengin nitin min la tilui ziah peih ania.







“A rawn haw veleh i hlawh cut turin ka ti ang, naupai lai tih hlauhthâwn a ṭha lo i tia, min ti hlauthâwng em em tho sia, chuvângin ka lo sawi ngei ngei ang. Hahdam taka min awmpui turin a ti che a, mi i rik rap reng mai" fiamthu a ka tihchuan a eilo teh e, tum burin a hawp ri hrawih hrawiha.





“Joela rawn leng se, i thil ei lai hi hmu ve chhin che sela ka châk, chaw i heh zia te hi hre ve se" ka ti zo chiah chu “Lalrosang" tihchu a rawn ri fiak nghal ṭhaka, za zetin ka nui thung.







“A dik lo em ni? Keichu ka chak, engtiang chiahin nge a hmaah i awm ngam ni" tiin ka spicy eizawhna chu thleng silnaah chuan ka dah zuia, “Tinge hetiang em ema i chimawm, ka heh a nih pawhin min duh tak tak chuan engah mah angai chuang lovang, bâkah a hausa tho min châwm zo em em ang" a tichu ka in sum thei tawhlo, ka nui chhuak uar uara.







A nilah a thutak nasa mai si, chûng te hlei hlei chuan nuih a tiza zual, kâwk in ka nuih kiah kiaha “Zanah rawn len a tuma, ka lo zâwt vek dâwn. Chutiang a duh loh chuan kan in ngaizawng lo mai ang" a tileh phei chu ka mittui a tla phung tawh, a ti leh duh tak takin ka ring, khap pawh ka tum chuang lo. A nihna ang anga pawm tu a hmuh ka duhsak ber.







“Ni e, lo zâwt tawp rawh. Keipawh ka heh tho alâwm, mahse ka pasal a fela mi a duat bawka hei ka thau kûng kûng mai hi, nang pawh i thau ve kûng mai ang. Awia ka la kham lo" tiin ka dul chu ka zût ka zûta, “I rapthlâk a bêl ah ala awm kha, ei leh rawh. Pumpui lian" a rawn ti kher chu ka ngei ve bawk nên “A lian ve bawk ang chu, mi pahnih in ei miau hek, pakhat pawh khati kha i nia, thleng kha lo va sil rawh, ka ei phawt dâwn" tiin a bêl chuan la kangin ka hawp nghal zata.








A va han tui tak, englai pawha ei mai ka duh, hetianga thil tui hi an lo siam chhuak lovang tih a hlauhawm; mahse kan tûnlai khawvelah chuan thil tui leh hralh kal deuh hi chu a hrisel lo rawn ti hi an awm ngei ngei, hralh a kal hma chuan an ngawi mai maia, miin an ei tâk chiam chinah hian cancer thlen thei chuti khati an tileha, an mak ka ti.



“Ka sil dawn, ka rawn awmpui palh palh che nuam iti si" tiin a phun phei hlawk hlawka, thlêng chu a va nuai nghal nawk nawk bawk nen ka nui lo theilo “Nuam itih êm kha aw, chutia i peih loh viau leh nidangah Thanpuia a zin leh pawhin hna i kal zêl tawh dawn ania" ka tichu a duh leh chuang bawk silo, a hahthlâk zawng a ni e.




Ka thil ei zawh chuan keimah chuan silin ka rem fela, chutih lai chuan ṭhenawm te inhau chu an rawn ri bur bur bawk nen Dodoi en chak zâwng tak a lo ni si, min kaiin pâwnah chuan min chhuahpui nghal dawr dawr mai.





“Ngaithla ang" tiin a beng chu a dawh zuia, an inhau ri aṭang chuan an pa zâwk chu a uire a nih hmel. An nu tan chuan thinrim loh chi pawh a lo nilo, tûn ang lai mipa tam tak hi tinge nupuite khamkhawp lova kan uire fur mai ni. Kohhran leh khawtlang hruaitu ah pawh hian an lo awm ru nuk zêl,  rapthlâk hi ka tia, hmeichhe ṭhenkhat mi pa an ni tih hre chunga sum duh avânga mi chhûngkua tih darh hmang hi ka haw leh zual, a ṭhen erawhin an hre lâwk bik lo thung.





“Lut ang, a nuamlo mi inhau ngaihthlak chu a ṭha lo emai, an buai buaiin buai phawt teh se" tiin Dodoi duh lo chung chu in chhûng lamah ka luhpuia, chuti chung pawh chuan an thawm chu a la hriat phâk reng tho. Hriat loh theih hek loh, bengchhet kan ni bik lo nên an ṭawngkam leh pa ber thinrim rawl chu hriat nuam lo tak a ni.



Dodoi nên chuan in en in ka dar chu ka sân ak a, “An nu tân chuan a hrehawm âwm, sawtiang pasal saw ka nei ang tih ka hlau, chuvângin ania hetia nulât mai mai hi ka tum ni. Rin ang hi an lo ni ṭhin silova,fa te neih tawh phei chuan hmeichhe tân chuan han tlân mai mai lah tihchi a ni tawh bawk silo, hrehawm duh dâwn hian ka hria, mipa lerh tawn fuh hi chu a pawi a nih hi, an hausakna hi an chhuang bawk si" Dodoi chuan a ti sapa.





Ka lo bu ringawt, a sawi chu a dik tho mai. Engvanga duh taka kan neih leh enkawl hi phatsan duhna thinlung nei leh ṭhin nge kan nih le? Hur sual vâng ni berin ka hria, kan rinawm thei dâwn lo a nih chuan mi thinlung hi va neih sak ṭalh tum loh mai tur, hmangaihtu kan buma thinlung na tâwp khawkin kan siama. A tâwpah beidawngin min han kalsan a, a phatsantu zâwk hi kan han sawi chhe leh ṭhin te hi a thinrim thlâk dawn dawn mai.





“Pawn lam ringtu ṭha deuh, chhûngril lam erawh tenawm ru tak tak hi kan tam rêng a sin, miin an chungah rinna nghata an han neih hnuah an phatsan leh duh ania, hmangaihna hi an nei ve lo a nih ka ring, kan ṭhenawmpa pawh chu a lo mak hle mai, ka hmuh chinah kha chuan nupa in ngeih leh in ngai tak an niin ka lo hre ve asin, mi hi an lan dana teh ngawt chi pawh an lo nih loh hi" tiin ka lo sawi ve a.





Dodoi pawh a bu nghat nghat mai “Keipawh Joela hi ka fiah phawt dâwn, la nilo mah ila in ngaizawng awm dân nen kan awmdan a dang lam lo. Fel viau mahse rin loh lam daih mizia pawh a lo nei ve reng theia, kumkhat tal ka en chhin loh chuan ka nei mai mai lovang" tiin a ṭawng zui siam siama.





Kan ṭhenawm te pawh an nu ber chu chhuah a tum nge an fate nên chuan an ri nuaih nuaih reng mai. A ṭhenawm a te tân pawh ngaihthlak a hrehawm, pa ber rinawm loh avângin chhûngkua an kehchhia anga, an fate an fahrah dâwn der chu a ni sia le, Thanpuia nen erawh sawtiang thil saw kan tawn loh hrâm ka beisei, ka dil bawk ang.





“Tirawh nu Zari a rawn kal ṭep tawh ang, room-ah games khêl ila; kan khêl dûn khât tawh si" tiin room lam chu kan pan duna “Taka Thanpuia hian a duat che em? Amah lah hi a rorum sia, nge duatna châng che a hre lo zâwk?" a rawn tih thut chuan ka en zawka.





A lo thutak bawk nen ka aw chu ka thian kharha “I hmuh ang hian kan in biak dân aṭang hian i hre mai lo em ni? Tak takin keipawhin kan inneih tirh kha chuan ka huphurh ve lutuk, mahse hei kan inneih hnu hian mi a duatin a ngaihsaka, nuam ka ti. Ka rinloh lam daih mizia a lo neia, sawi tawp ila keimah avângin tûnah pawh hian a chhûngte nen an inti thiam lova, ka inthlahrung bawk nen ka pangchang lutuk ngam lo zawka" tiin ka phun sapa.





Room kan thlen rual chuan kawngka chu kharin min rawn pan hnaia, “Enge a awmzia a chhûngte chu?" ti a min zawhna chu nuihpuiin “An mo ni tûrin min pawm chiah lova, Thanpuia nen pawh an inhau nasa alâwm, keilah fahrah mai ka lo ni bawk nen an tân chuan ka iaiawm ve êm lah taka, an chhûngkaw mo turin min duh lo a ni ber" tiin khumah chuan ka ṭhu thla a.




“Keimah avanga a chhûngte a do leh a chhûngte pawhin an rawn be duh miah lo hi hrehawm ka tia, ka inthiam theilo. Heiaia dinhmun ṭha deuh te hi lo nei ila chuan a zia tur nan, neih engmah neilo chu an chhûngkua anga lawi lût tura min duh lo pawh hi a âwm chu ka ti tho" tiin ka ṭhen zui saka.





Ka bula rawn ṭhut hnaih pah chuan “Hrehawm tisuh, an thiamloh a nih chu, he khawvelah hian in hmusit tur chuang kan awm lo, min siamtuin duhtaka a siam te vek kan nih hi, i pasal in a duh phawt che chuan nuam lo tih nân hmang suh, kan tana Pathianin a ruat hi tumahin kan hnial theilo, hrehawm ti duh suh, i kiangah ka awm reng ania, i pasal pawh. A chhûngte hmaa a ṭan ngam che a nih chuan enge lungngaihna tur i neih? Thil tisual pawh i ni hleinem, mahni insit leh in hmuh hniam hi duh miah loh tur, kan khawvel nun hi chu kan damchhung nun a niloa, khawvêl piahlam hi ngaihtuah zâwk tur" tiin min kuaha.





Min ti zâng huai mai, ka rilru hrehawm ru lutuk pawh a ti zia huai mai “An monu a an pawm lo che a nih pawhin engtin mah ngai duh lêm suh, i pasal tân hian theihtawp chhuah la a ni pawhin a rûkin a ngaisangin a zah ang che.  Dinhmun avâng hian kan zahawmna hi a dang theilo, kan chhûngril leh thinlung thlir dan a zir hi a ni zawk, engtikah emaw an la inhmu chhuak mai ang" a tihchuan ka bu nghat nghata.





Chu thil chu ka beisei ber a ni, ka nghâk reng bawk. A chhûngte lak aṭanga la hrang tu ti a mite min sawi tur ka ngaihtuah phei hi chuan ka tawt up up zêl, mosual ti a miin min sawi tur hi ka ngaithla ngamin ka ring lo, thil hrechiang lova sawi hi kan peih hlawm bawk si a, a chhûngte lak aṭanga la sawn tu anga min chhuah a nih vaih chuan ka tân chuan a hrehawm in ka mualphona a ni dâwn tih ka hre chiang si.






“Beisei phawt ang, engtikah emaw chuan in ngeih tlâng takin kan la awm ve mai thei a sin tiraw? Kan pasal thlang fuh mah ila pasal chhûngte thlan fuh loh hi a pawi a nih ber hi, innei lo thei lo dinhmunah kan ding miau si a, ka neih loh chuan hêng hi ka lo ni tawh bawk si" tiin ka dul chu ka chûl zauha.





“Inthiamlo duh suh ka tih tawh kha, i nei hi i ti fuh zâwk alâwm, a duat che in a ngaihsak bawk che sia, hetiang pasal hi an vâng a nia. Hausakna chhuang ve vak bawk silo, a chhûngte bulah in awm chuang lova, in pahniha in hlim phawt chuan chu tluk a awm lo" ti a a rawn sawi leh tâkah chuan ka pawm zâwng tak a ni.




“Ni e a ni nêna kan inkar a ṭhat phawt chuan ka lungngai lo, bâkah nang i awm bawka. Ka ṭhian ilo ni hi ka lawm tak tak, kan riahdun hun chhûng ringawt pawh hian ka tana i thil tih hi a tam a sin, amahte rawn haw sela kei pawhin tûn aia nasa a ka ngaihsak a ngaiin ka hria, mahse ka nau pai hian chêt a ti harsa bawk nen a lehlamah chuan a hrehawm, a kawh lian tawh bawk si" ka tihchuan a rawn nui har hara.





A dul chu min tihelnan a la rawn chûl kher lehnghâl, ngeiawm thiam thei lutuk, zânah Joela awm laiin phuba ka la dâwn khawp.





Zân lam chu sitting room-ah awmin kan titi mawlh mawlha, rin ang ngeiin kawngka chu an rawn kik ta karh karh mai. Phur zeta a kal phei vawk vawk chu a hnunglam aṭangin ka nuih vur vura, kan fiam hlak teh ang.




Chutah Faktea leh Joela nena an rawn inzui lût chu lo enin ka mit ka san ak aka “Kha kan monu tur khân inneih nghâl mai a duh ania, Joel engtikah nge palai tirh i tum?" ka tihchuan an pahnih chuan inring lo tih hriat takin min rawn en rual ṭhawt a, Dodoi phei chuan rum lutuka min enin a rukin min hau nghal zauh zauh bawk nen ka nui pût pûta.






Ka bula an rawn ṭhut rual chuan “Taka Joel, Dodoi khân zawh tur che a nei tak a sin, a zawh ngam loh che leh keimahin ka lo zâwt ang che" ka tih leh lai chuan Faktea zawk chu a lo nui huka, ka fiamthu tih a hria tih ka hria. An ni pahnih erawh an lai kual vêl vek tawh, an ṭhu te chu an ṭhu nghet hleithei lo, an kûn ngul bawk nen an duhawm ru phian mai.





“Lalrosang thil nilo lo lo sawi suh, ila châk lo viau ang aw" Dodoi lahin a rawn ti bawk. “Phuba a nih kha zâwt vat rawh, in inneih tur leh tur loh a hril kha" tiin ka kut chu ka kuangkuah zui ata, chutah Joela chuan enin “Min hrilh duh i nei em ni?" pângngai tak chuan a ti zuia.




Chu chuan Dodoi pawh a ti huaisen a nimahna dâk vahin a hmachhawn zui a, Faktea nen chuan ngawi rengin an che vel chu kan lo en thung, “Hmeichhe chaw heh deuh i duh lo em ni?" a tih rual chuan Faktea zâwk chu lo nui phuh ṭhutin a khur zui nghal chawr chawr mai, a va han hahthlak ṭhin em.



“Enga timaw? Chaw an heh te chuan an chak duh a lawm," a lo timaia, “Aw chaw ka heh a, chaw heh deuh i duh loh chuan in ngaihzâwn pawh ka duh lo, keichu ka nihna ang anga min pawm tu tur ka duh ber, ei ka thei sia min châwm zo tu tur ka duh ber" Dodoi lahin chiang lutukin a sawi chhuak ta hmiah hmiah mai si.





“Eeee lungngai suh ka châwm zo lutuk ang che, hmeichhe thil ei tlêm deuh ka ngaina lo, keipawhin ka ei ṭawk zel alâwm, kan innei thei a nih chu" tiin Joela lah a lo nui vur vura, a nuih loh theih loh. Ka pum dawmin ka mittui tla phungin a ri lo chuan ka lo nui ngar ngara, a va han hrehawm tak.




In tawng tur dik tak an lo intawng a nih hi, mi thu hmun, in ngaihzawnna lama zeilo ve ve. An inhmeh phianin ka ring, “In va han mâwl dun tak êm, in hruai haw nghal law law rawh u, khatiang midang bula sawi chi pawh a nih loh kha, ka rawn len pui palh palh" Faktea lah chuan nui sawng chungin a lo ti ve bawk.




Ka insum zo tawh lo ring zet zet chuan ka nui chhuaka, ka dam chhûng zawnga ka la nuih nasat ber a ni hial ang, ka pum te chu a kham urh thei nia.“In ninawm khatia tlang deuha sawi kha a ngai a lawm, mahsela inneih nghal chu ka duh lo ania, ka enchhin phawt dâwn che" Dodoi bawk, awi a ngaihna hi an awm thlâwt lo.





Han innei chiah se chuan thuruk chu an neilo ve mai mai ang chu aw.

Ka phone a rawn rik avâng chuan ka nui chu insûmin ka pasal a nih avâng chuan ka la vat a “Aw..." ka nuih la za bawk nen ka aw chu a khur thei hial “I nuam lo em ni? Tinge i aw chu?" a rawn ti ta rêng bawka, “Nilo e ka nui nasa lutuka, ka pum a na urh mai, ka ṭha ania" tinghal zatin Joela te lo ṭawng mawlh mawlh chu ka en zawka.




“Rawn lêng an awm em ni? Tlangval in in rim tir em?" a rawn tihchuan ka nui haka “I ṭhiante alâwm, thik nghal ngawt suh, Dodoi an rawn rim alâwm, awm ve la chuan maw i nuih a za ve tho ang, naktuk chu i rawn haw thei dâwn ta em?" tihchu zâwt nghal zatin midang hlat deuhah chuan ka kal sawn riha.




“Um ticket pawh ka book sa tawha, ka rawn haw thei tûrah ngai ang. Eng chu nge chuti taka tihlim che a?" a rawn tih leh tâkah chuan thil awmdan chu sawiin ka sawi pah chuan ka la nui leh ṭhin, zanin zet zawng nuih tâwp a har a ni e.




A ni pawh a rawn nui ve hawk hawk mai, “Innei sela an va ngaihtuah awm duh awm ve" tihchu a rawn sawi zui zata, pawn lam ka en chuan thla a lo êng kulh mai. Tukverh bulah chuan va dingin vân lam chu ka en vang vanga, “Nia an inhmeh ngawt ang, zanin chu thla a êng mawi hle mai" tizawm zatin ka zai zui rât râta.





“Nia a mawi khawp mai, ka ngaihtuahna ah i awm nghal, ka ngai tawh lutuk che a nia. Ka rawn haw veleh min duat viau ang che" pangchang aw taka a rawn ti chu ka lâwm riau mai, hetiang anga a awm tawh hi chuan duat a chakawm hliah hliah ṭhin.




“Tehreng mai, i rawn haw veleh ka lo duat nghal char char ang che, lo haw vat la. Papa hi kan ngai tawh che ania, i tello chuan engkim hi a reh" lei chhuah zuk paha ka tihchuan phone chhanah chuan a rawn nui ri haka.



“I va ril ve, thil ṭha deuhte i hria a nilo maw? Eng emaw ka rawn hawn dâwn che a nia, lo in tifai viau la" a tikher chu ka lo vin let hlar mai.


“Khaih khaih! Kan naute kha a hun hma in i sang chhuak hlauh ange; insûm la, i intihfai loh pawhin ka tân chuan i rimtui tho," thusawi tur lah hi a haihchham ngai der lo, lehkha zir sâng tih takah thil a ngaihtuah chak riau mai.




“Lo haw vat la a nih chu" midangin min lo auh sek avâng chuan “Kan phei ange an be châk che a niang, an rawn au sek tawh mai, kha be rawh u" tiin phone chu loud ah dahin an bulah chuan ka ṭhu thla a.



“I va zin rei ve, in nu hi kan lo rim tluk tluk mai aw, kan bula awm pawh nuam a ti. Nang chu kan hre chhuak zeuh zeuh che" Faktean a tihchuan Thanpuia chu a rawn phun hluka “Kan nu kha rim ka phal reng reng lo, lo enkawl ṭha ula, chuti a nih loh chuan thal fang char in tawn a ngai ang" ti a a rawn fiam letna chu an ni pahnih pawh chuan an nuih pui vur vur mai.





“Lungngai suh kan enkawl ṭha lutuk, zanin phei chu a nui nasa lutuka naute a nui chhuak ang tih a hlauhawm zawk " Dodoi chu za zetin a lo nuia, a malah ka ṭham sak nghâl ṭawk chu a rak nghal ṭhat mai.




“Lo nui ringawt suh, in zei loh nên khatianga nui ngam tur pawh i nilo, huiham fiam reng suh u" tiin ka lo hau chu an uang sauh lehnghâl, an pathum chuan in hnialin an ri chel chûl a, Dodoi nen chuan ngawi rengin kan lo ngaithla ve ringawta, sawi tur leh in runluihna tur an hre thei em em mai lehnghâl.



POST HI LO LIKE ṬHIN RU AW FB AH, COMMENT THAR KA HMU AWLSAM A.

[mawitei bawihtlung]

KA LALPA





CHAPTER 16



“Ka nupui duhtak" pâwn lam aṭanga rawn au ri ka hriat rual chuan rang zeta ka chaw ei lai thawhsanin ka theih tâwp chuan ka tlân chhuaka, ka pasal aw a ni tih ka hre chiang em a ni.




Pâwn ka thlen rual chuan Indian tih hriat ngawih ngawih hmeichhe pakhat chhelo zet nen hian an lo ding tlânga, tunge a nih ang? A thawhpui tur pawh a nimahna, engmah sawi lêm lo chuan amah chu ka va kuaha “I va rawn thleng har ve, hei hi tunge?" ti a ka zawhna chu hrethiam tih hriat takin a rawn hruai nu chu a melh zawka.





“Khulama ka thawhpui Mr Mukesh fanu a nih hi, he lamah kan bulah a awm ve rih dâwn a, pawi i ti em? A awm rei lovang, helam thil tihdan vel te hriat ve a duha, Mizoram hi a vawikhat rawn kalna tur a nia" a tihchuan ka bu nghata.




Chunu chu chibai in ka pasal bawk chu ka en leh a “Ilo in enkawl ṭha maw? Khawiah nge i ṭhiannu chu?" ti a ka hnunglam a en chuan lo hrilh fiahin a rawn haw dawn avânga ka haw tîr tawh thu chu ka hrilha, ka biang chu a rawn piai zauh lehnghâl.




“Ilo hmelṭha lehzual sawt a nih hi, tirawh u lût ang u hmiang. Eng emaw ka rawn hawn che a nia" a tihchuan ka phur ngei mai, eng tak chu min rawn hawn ang maw? Thil ṭha tak a ni ang tih chu ka hrechiang viau thunga, chunu chuan vai ṭawngin eng emaw hi a rawn sawia, Thanpuia pawh chuan a lo bûk khum nghauh mai.





Eng tak chu sawi ang maw? A chhelo bawk nen ka pasal kher a rawn zui haw chu a ruk tak chuan nuam ka ti miah lo. Tûn ang laiah hmeichhe zak theilo, mi pasal ngaizawng leh mutpui duh an tam si, Thanpuia hian min phatsan chu ring lo mah ila hetiang nula bulah hian awm tam lo se ka duh takzet.




“Enge in sawia? A hrim hrimin kan bulah kher maw a awm dâwn a?" tiin ka en ha a, Thanpuia hmêl chu chiang takin ka melh bawk. Chutiang khawpa mi hausa fanu te chuan hotel changkâng tak takah a awm thei reng dâwn si a, engvanga kan bulah kher awm duh nge a nih ang.




Ka pasal a melh dân ber chuan min ti lâwm lo, duh tih hriatna mitmengin a ni a en ni. Chuti nilo se Thanpuia hi ka zâwt kher lovang, a enga mah hma in ka millo nghal tawp mai; “Ni e, amaha awm tir ngawt kha a chhûngten an ngaihtuah ve a, mipa sual tak tak an tam si a, thlakhat vêl bak a awm lovang, lungngai suh a fel a nia. I che thei vak tawh silo a, a ni in a âwl zel thei dâwn che a lawm" tiin inchhungah chuan kan lût zuia.




“Chhun chaw i lo ei a ni maw? Nu Zar hei Rahi nên kan ei tur hi min lo siam ve ta che, zing chaw kan la ei lova, thlawhnaa an sem lah han puar pui chi ni hek lo, ril a ṭam riau mai" tizuiin ka bulah chuan a rawn ṭhu thla a, kei pawhin engmah sawi tawh lem lo chuan ka chaw ei lai chu ka bar zawma.




Chunu in a kan chaw ei vêl a ni ngei ang kawka a sawi leh ṭhin chu ka lo ngeih lo khawpa, hrelo pawh ani âwm tawp silo, an chaw nên dang mahse chaw hmeh chu a hmu ve fo ang tih hriat reng, a va han ninawm tak. Ka pasal lah chu a be buai sek bawk si, a tawpah phei chuan ka ning bawk nên kham daihin room-ah ka lut ta daiha.





“I nuam vak lo em ni?" rei vak lo hnuah Thanpuia chu a rawn lût ve a, a thawmhnaw chu suk turin a dah nghal bawk. Ka bulah rawh kal pheiin min kuaha “Ka ngai hle mai che, ka rawn tlai lovang chu maw? Min tlân bosan kha i tum nasa sia ka theih anga rangin ka rawn haw a nih hi" tiin ka nghâwngah chuan a rawn fâwp vang vanga.





“Um keipawhin ka ngai che a lawm, chuan eng maw min lo hawn? Ka hmu châk tawh a nia, min hmuh tawh la" tiin a mi kuahna ata chu awm sawnin ka mit ka sân aka, a rawn nui nghal hak mai. Chutah a kawr ipte chu zenin bâwm te hi a rawn phawrh chhuaka, ka meng deuh kâwk mai.



Thinphu dat data ka lo en lai chuan “Kan inneih tirh aṭangin ka la lei miah lo che a, tûnah chuan nupa kan nihzia tichiang turin" tiin zungbun rangkachak aṭanga siam nalh zet mai hi a rawn phawrh chhuaka, a kual chhuak chuan lunghlu ang maiin a tle sep sep bawk, ka kutah chuan rawn rawlh lûtin a nui nghal suka.




Ka bun tâwk chiah nia! Min lo chik viau a ni ngei ang, a ni pawh in a kutah chuan ka ta ang chiah a buna; mahse a ni erawh a cheimawina a awm ve lo thung. Nuih var varin ka kut chu la kângin ka en chhin vela, ka nui leh ṭhin “A nalh lutuk, ka beisei phâk loh a sin. Ka lawm e, ka hmangaih che" tiin ka kuaha, ka hlim lutuk chu au vak vak mai ka châk.




Dik tak chuan kan inneihna a rei ve leh tawha, inneih zungbun bun miahloa awm kha a nuam miah lo, nupa min ti famkim lehzual tu chu zungbun ngeiina min bun hnan hi niin keimah hi chuan ka ngai ve a, Thanpuia khân a sawi chhuah ngai lêm loh avangin a chhûngte nêna kan inkar nên khân ka sawi chhuak ngam lo kha a nia.




Tûnah chuan ka nei ve ta e, hlim lohna chi lah a ni hek lo. Khumah chuan mu in kan titi mawlh mawlha, a awm loh chhûng vela thil thleng ka sawi chuan a ni pawh a nui nasa ve viau mai. A ṭhiante pahnih awmdân ka sawi lai chuan a lo phun leh hluk ṭhin, a thikthu pe chhe lutuk hi amah min duh tir tu a ni daih thung.



Chutiang bawkin keipawh a lakah ka thikthu a chhia a, hmeichhe dang laka chân mai hlauhna in ka khat a ni ber mai. A mah ka ring lo lam nilo in hlauhthâwnna hi a awm lo thei bîk lo, mihring chuan hma hun emaw keimahni kawppuite rilru ngei pawh kan hrethiam theilo ania.





Hlauhthâwnna hi a awm lo theilo, rilru leh thinlung inthlak ve theih zia hrechiang tu ka ni miau a.



“Engtikah tak rawn piang ang maw? Ka nghâk thei tawh lo, duh ai a rawn chhuak har mah mah" a tichu ka nuih pui haka “Lungngai suh, a hunah chuan a rawn chhuak em em ang, rei nghah a ngai tawh dâwn hleinem, thla a liam leh meuh chuan a rawn chhuak thut lo ang tih pawh a hriat loh hi, chu zawng ai chuan kan nufa hian i thlazâr hnuaiah kan awm dâwn tih hria la, mi han duat em em bawk la engkim a ṭha a nimai" tiin a âwmah chuan ka bei thana.





“Min kalsan dâwn lo tiraw?" ka ti thut chu a ni pawh in mak a ti nge a lu rawn kân in min rawn ena, “Chu thu chu engvanga min zâwt nge i nih? Phatsan duh che in min ring em ni?" a rawn tihchuan ka lu ka thing nak naka, “Nilo e ka ring lo che lam nilo in thil hi a inthlâk danglam ve thut theia, hmeichhia phei chu fate kan han neih chuan kan taksa ah danglamna nasa tak rawn thlengin kan mawina a bo ve tial tiala, min phatsan ring lo mah ila hlauhthâwnna a awm ve alâwm" ka sawi zawh rual chuan a mu thla hnaka.






“Ka phatsan leh ka iai leh turin nupuia ka neih che ring suh, in hauh châng leh in tih thiamloh châng chu nupa inkârah chuan a awm ve fo tur alâwm, in ngaizawngte inkârah mah a awm fo ania, mahse chutiang avânga kalsan duh tur che in min ring suh, ka hmangaih i ni tawha. Ka kalsan mai mai lovang che, hre reng rawh. I lakah nelawm loh châng emaw nin chang che pawh ka nei mai thei; mahsela chungahte chuan dawhtheihna leh hriatthiamna in min dawm la, ka kalsan ngai tawp lovang che" tiin ka kut chu la in a fawp zauha.




“Min ning suh, nin kher kher chu ka duhlo. Englai pawhin min thlahlel rawh, min ninga min thlahlel tawh lo a nih chuan ṭha takin min hrilh la, tichuan ka kiansan vang vang tawh ang che. Chutih hunah chuan kîr leh na a awm tawh lo thung ang, eng harsatna pawh tâwk la hriat ve zel ka duh bawk. Ka tello in thuruk ngah lo la, a tê ber thlengin hriat vek ka duh, nupa; tisa pumkhat kan ni tawha, kan in dawmin kan in pui tawn tur a ni, chuti nilo a ka laka thuruk i ngah lutuk chuan kan inkar a chhe thuai ang" ka thusawi chu ngawi rengin a ngaithla a.





A ngaithla liam mai mai dâwn lo tih ka hria, hetiang lam hi kan sawi ngai zen zen lova; mahsela kan sawi chhuah hunah erawh kan in ngaithlak sakin in zawm sak ngei pawh kan tum ṭhin. A ni pawhin mipa ka nih hi ka thu thu in i awm tûr a ni ti bik mai lovin ka duhdan a dah pawimawha, keipawh in ka zah bawk.




Chu chuan kan nupa inkar pawh hi tûn thlengin buaina neilo in min la awm tîr ka tilo theilo, mipa mahni thu duh leh lutuk chu a nupui nen in hnialin inṭhenna hial a thlenga, chumai nilo in a ṭhenkhat phei chuan an nupuite hi an sawisa hlum châwk ṭhin.



Tam tak chuan nupui kan han neih hian awmdan kan thiamlova, kan nupuite hi kan chhiahhlawh emaw ti kan awm leh ṭhina, chûng chuan nupui te duat taka enkawl leh âwm nem zâwk tih hre miah lo in kan enkawl ta ṭhina. Chu chuan nupa inkar a tichhe zo ṭhin.



“Ah.." ka pum chu a rawn pet leh dawt tawh, ka naupai che nasa thei lutuk hi a mak “Enge nita? I pum ana em ni?" tiin ka pum chu a rawn khawiha, chutih laia a rawn chêt leh avâng chuan a nui nghal suk mai.




“A hrisel hmêl hle mai, a ṭha a ṭha. A chak ṭha dâwn a nih hi" a tihchuan ka nui haka “Chak kher lo mai thei a sin, a la hriat miah loh. Tetakte te hi a rawn chhuak nawlh mai thei ania" ka lo ti chu “Chiloh lutuk, min chhûn ngei ngei tûr a ni, i ṭawngṭai nasat a ngai a nih chu, a pa ang hian rawn piang turin dîl nasa viau rawh" a tihchuan ka ner nâng a.





“Keimah chauhin maw? I va phakar ve a, nangmah pawh i ṭawngṭai nasat a ngai a lawm, he chhûngkaw pa ber hi i nia ṭawngṭai nasa hle rawh" tiin ka ke chuan ka khana, chutih lai chuan khanu bawk khân a rawn au leh tawh, ka va han ning chiang tak. Reilote rawn awm mah nise ka ngai theilo, a zia sâwn min hip lo a ni tawp mai.





“Ka va kal lawk ange, lo mu hahdam rawh. Tlai lamah i chau leh ang" tiin a chhuak zuia, Riha-i a tih nu hi a hnawksak dâwn riauin ka hria, mi mil loh hi ka nei khât ania, mahse a ni kher kher chu a tîr phat aṭangin ka eilo nghal em em ringawt hi a chhan pawh ka in hrethiam biklo, englai pawha ka pasal a koh sek vang pawh chu a ni ang.





Thanpuia lah chu a rawn lêt har riau leh nghal, ka tum bûr tawh mai. Eng êm êm nge a va tih pui ni, darkar chanve dâwn hnuah chuan a rawn lût hrama, “Enge in va tiha?" ka lo tichu ka bula rawn ṭhut pah chuan “A rooma khum kha kan sawn lawka, tui a lo haw theilo bawk nen ka siamsak a nih kha" a tihchuan ka chhâng tawh  lem lo.




Inherin ka mit ka chhing ta daiha, “I thinrim em ni?" a rawn tihchuan “Rim lo ka mut a chhuak ka mu dâwn, chhuak tawh miah suh" tiin ka ngawi leh daiha, lungawi lo lutuk anga lan ka duh bawk silo, ka lungawi lo ve tho bawk si lai hi a hrehawm, khanu khân min la ti buai dawn ang tlata hriatna ka nei bawk nen ka awm a nuam thei der lo.





“Aw le, keipawh ka rawn muhil miah lo a, ka chau ve tho ania mu dûn ang aw. I bula ka mut lohna pawh a rei leh tawh, i rimte hi ka ngai" tiin ka hnunglam aṭang chuan min rawn kuaha, alamah in herin a zakhnuaiah zen lût chuan ka kuah lêt a, kan in en dun kar mai.




“I vun hi a nung sâwt riau mai, naupai ngeih an sawi ṭhin ang hi i ni dâwn a nih hi, i nalh tulh tulh mai. Mipa dangin an lo hmu tai ang che tih a hlauhawm" a tihchuan ka nui haka “Nang pawh hmeichhia in an endan che hi ka hmuh hmaih hleinem, i zungbun hi phelh ngai miah suh ang che. Kan pahnih inzawmna a ni a, he zungbun i bun chuan tupawhin nupui nei tawh i ni tih an hria anga, ka tan pawh a ngaihṭhat thlâk deuh ang" tiin ka ner saka.




“Chutiang zâwngah chuan hlauthâwng suh ka tih kha, nang phatsan tumna che ka neilo; ka awm loh chhûngin ka chhûngte an rawn kal in emaw, rawn biak che an tum em?" a tihchuan ka lu ka thing nar nara “Tum lo ania'ng, ka hre miahlo. Dodoi nên khân kan awm chawta, a ni lahin nuam a ti, zin reng tur khan a duh hial che mawle" tiin ka nui hak haka.




A ni pawh a nui ve hak hak mai, “Ka awm loh chuan hna a kal dâwn silova, nuam a ti a nih chu. A nih leh nang tehin ka rawn haw hi i duh lo em ni?" a tihchuan rang zetin ka lu ka thinga.



“I ti mak emaia, i hriatreng kha rawn haw vat vat tura ka duh zia che pawh ka sawi reng a, engah nge i rawn haw chu ka duh loh ngawt ang" tiin a hnung zâng ah chuan ka sih saka, a ner sawk mai.


“Ka fiam che a nih kha, i kut tin kha tan vat rawh, nau i neih phei chuan zuah rêng rêng suh ang che. Kan naute i sik pilh hrup ang tih a hlauhawm, a rang lamin tan ang che" tiin ka biangah chuan a rawn chûl heuh heuha, ka mit chhing diar diarin ka lo vuan leta.




“Min ngai tak tak em? Ka nupui hian a ka ngeiin min ngaih thu a la sawi miah lo ania" dam dapa tiin ka chalah chuan a rawn fâwp vang vanga, nghen hnaih nghal ṭalh ṭalh pah chuan “Ka ngai lutuk che, chuvângin alâwm lo haw tura ka tih che. I tello chuan ka khua a hara, Dodoi awm mahse ka pasal bul aia thlamuanna ka neilo tih hi hre reng rawh, ka neih chhun i ni a, ka in nghahna i ni bawk. Nang leh zêl ka hlata i awm chuan ka tân hian nun ngaihna a vâng lutuk" tiin ka phun sep sepa.






Min kuah nghet sauhin ka khabea rawn vuan chuan min kuai dâk a, chutah rawn kûn hniamin ka hmuiah chuan zawi leh dam raih hian a rawn fâwp zuia, ka lo chhâng nghal vat. Ka chungah rawn bawkin ka thawmhnaw chu muangchang hian a phelha, “Tunah maw?" ka tihchuan nui suk hian “Ni chiang e, ka mamawh tawh che alâwm" tiin amah pawh chu a inphelh a.




Min play kualin ka hmuiah chuan a rawn fawp zui tawn tawna, ka mamawh ve tawh bawk nen hnial pawh ka tum lo. Chutah amah chu insiam remin ka dul a lian tawh bawk nen khumah chuan a ṭhingṭhi a, ka taksaah chuan muangchang hian a rawn lût zui nghal ṭial ṭiala. Ka thaw hak mai, mit chhingin lukham chu ka ṭham vaka.




Ka awmdan chu mitmeng zim san chuan min en reng thung, thaw hak hakin ka mit ka chhinga, a chângin ka rum chhuak leh hak ṭhin. A chet dan chu a duhthawh tial tiala, min dim tum viau mahse a thei meuh lo, a tâwpah ka chungah rawn bawkin thaw hlawp hlawp hian min rawn ena.




A âwm vêl te chu a thlan hlap bawk, chûl sak heuh heuhin ka kuaha “I ṭha em? Kha zet chu" tiin ka nui hak haka, zawi zet hian a rawn ṭhen ve suk suk mai “Ka insum thei tawh lo alâwm, nau i pai hnu a ka khawih khât zia che hi. Ka insûm ve nasa a nia, a khât tâwk chuan a pawilo turah ngai ang" tiin ka taksa aṭang chuan a awm sawn zuia.



“Ka muhil dâwn aw" tiin men pawh meng ṭha peih tawh lo chuan amah khan chial chung chuan ka muhil zui ta thuaia, nau ka pai chin hi ka awl bawk nen chhûn mut ka hrat bawka, ngaiah ka neih tawh a ni ber mai, a thau lah ka thau. Ka vun nung a tih pawh kha ka inhai biklo, ka ngo sensuah renga.



“Mira harh tawh la" a tlai tawh a ni ngei ang, ka biang vel chu rawn khawih in a chûl kual vela, ka meng chhuak nghal riai riai mai, ka mut la chhuak lutuk chu ka meng ṭha peih meuh lo, mut hi chu kham tih hi a awm dâwn lo. Mut dâwn a hreh viau pawh hian han mut takah hi chuan thawh hi a peihawm leh lo bawk si, mut loh leh kan chaua, mut lahin kan zawi leh bawk si.





“Te ka meng peih lo, ka mut hi a la chhuak a vawt bawk si" tiin ka phun nâng nânga, a rawn nui hawk mai. Chutah min pawm nawlhin room aṭang chuan min chhuahpuia, Riha-i pawh kha a lo ṭhu chhuak tawh a nih hmel. Kan inpawm chhuak chu min lo en reng a.




“Nu Zâr chaw ei chu siam ta che, Mira-i pawh a harh vat mai ang" tiin min enin a nui leh haka “Le! In ti harh hrâm hrâm rawh, nakinah chaw eikham ve in i mu leh dawn a nia, mutduh reuh lutuk. Chaw ei phawt ang le" tiin min sawi leha.




Keipawh chu ham buai buaiin ka inthing harh luia, chairah chuan ṭhu in ka mit erawh ka la meng ṭha peih meuh lo, chutih lai chuan Riha pawh kan bulah rawn pheiin Thanpuia chu a bia a, a ni pawh a nui hak mai. Ka va en pheia, keimah min lo en bawk nen ka ngaih a ṭha chiah lo.



“Enge in sawia? Tinge in nuih?" lawm lo lek leka ka tihlai chuan ka kut rawn vuanin “I mut la chhuak lutuk kha mawle, ei zung zung ang. Chuan kan mu vat dâwn ania, zanin chu keipawh hna khawih ka peih lo, chawlh hahdam phah a nimai, Riha hian naktûkah Aizawl hi fankual pui a duha, ilo tel ve duh em?" a tihchuan ka bu nghata.




An pahniha thlah fal ka tum reng reng lo, an bulah ka awm ve zêl tûr hi a ni ringawt.


“Nu Zâr i chau tawh em? Thleng i tih fel zawhah haw mai rawh aw, tihtur dang chu kan lo ti tawh mai ang" ka tihchuan a ni pawh a bu nghat nghata, a fel ka ti ṭhin. A chau ve thei viau in ka ringa, phun nawi hauh loa hetiang a ti zêl thei te hi ka fak bawk.



Mi in awm a ni chungin kan nupa tân phei chuan nu dik tak ang mai a ni, kan dik lohna ah min khak hreh lo va, min fuih tu ber a ni bawk. Thanpuia hian a lo chhawr fuh hle in ka hria, kan nupa tân chuan malsâwmna a ni ringawt, kei phei chu nu leh pa nei lo ka nih avâng hian nu Zari hi ka thurâwn lâkna ber a ni.





Chaw eikham chuan reilote Riha nên chuan an titi duna, ka nghâk reng bawk nen room-ah chuan min luhpui zui ta thuaia “Unaute a nei em?" ka tihchuan min rawn en deuh haw mai, ka thusawi awmzia a hre lo nge maw ni.




“Riha-i saw a nia ka sawi, unau dangte a nei ve em?" ka tih leh tâkah chuan rawn bu nghatin a thawmhnaw chu a thlaka, keipawh mut hma chuan in bual fai leh te te in kan mu zuia “I duh vak lo in ka hria a; mahse helama a awm chhûng chu kan kutah a tla a, a nu leh pa in min rin avângin ka kutah an daha, kan nupa a kan enkawl angai a ni" a tihchuan ka bu nghat ringawt.




“A ṭha a lawm, naktukah chuan ka rawn tel ve ang. Mahni chauha lo awm chu ka duh biklo, bâkah ei châk ka ngah lutuk. Min ei pui rawh aw? Ka chah che leh i rawn hâwn kim thei silo, keimah ka lo tel ve loh chuan a ṭha lo" tiin duh dah taka mu in ka khan ar ara, a rawn nui nghal hak mai.



“Hetianga mut hi ka châk na a rei tawh a nia, i rawn haw har lutuka ka lo ngai hman lutuk" tiin a âwm ah chuan ka beia, in ngaihzâwn laite ka ngaihtuaha. Inneih hnu nên hian a dang lam lo in ka hria, karhla di neite hi an khawngaihthlak ka ti, in hmuh zung zung an thei veloa, hlim taka len dun te, khawiah emaw lenga in tihhlimte an thlahlel ve ngei awm sia, an duhzâwng sawia titi dun te an châk ṭhin hian ka ring.




Hetia kan innei chung hian kei ngei pawh hian ka thlakhlelhna a la reh theilo a ni si a, a awm loh leh ka zawnga. Ka ngaia, ka thlahlel bawk, a awm pawhin ka hlima, ka thlakhlelhna a zuala, a bula pangchang taka awm ka châk zual ṭhin.




“Tunah chuan ka zin san mai mai tawh lovang che, i kiangah ka awm reng tawh ang. Ka rawn haw tawh hi, tudang mah mamawh lovin ka siam ang che, heti hian zantin min khan thei tawh ang" a tihchuan ka nui ver vera,chu aia thlakhlelh ka neilo.



A hun zawng zawng min pe turin ka tilo; mahsela a hunawl neih chhun hi ka tân hian hlân ve sela ka duh, a hunawl tlêm tê pawh ka chang a nihchuan ka lâwm tawk em em tho, chuti nilo a a hunawlah pawh ka tân hun neilo sela, ka thlakhlelhna te hi huatna ah in letin a reh hlen ngei ang.




“Ka tan ka Teddy bear lianpui ni reng rawh, i thlazâr hnuaiah ka hlima, ka duh ber i ni tih hi hre fo bawk la. I chau ang mu tawh rawh, keichu ka mut chhuak a reh leh tawh, thil eng emaw ka ei châk, nilo theitui ka in châk lutuk" tiin ka ṭhu chhuak hlawla.




“Tikhan lo awm rawh aw, Dodoi nen kan theitui lei kha a la awm in ka hria, ka va la lawk ange" ti a thawh ka tum chu min rawn man betin khumah chuan min kuai mu a “Lo awm rawh, ka va la ange, i pasal ka awm reng laia nangmah kal i tum, i chak tâwk tawhlo. Tikhan lo awm mai mai rawh" tiin a chhuak zuia.




Hnial hman ngaihna pawh a awm lo, a lehlamah chuan chutia min ngaihtuahna a tih lan chuan min tihlim phian lawi si, nui var varin lukham nghêng chuan ka lo ṭhu mu a.



“Rawn chhuak zung zung rawh, i pa pawh kan awm tir hle hle theih loh hi, ei duh i ngah si" ti a ka pum ka hauh mawlh mawlh lai chuan Thanpuia pawh chu theitui ûm keng chung chuan a rawn lût a, ka lo ṭhu ṭha nghal vat mai.




“Kha le, i in châk bawka han in ṭeuh teh, a hrisel bawka ka hau lo ang che" a tihchuan nui hakin theitui chu ka in zui ta khalh khalha “Ka lawm e" tiin amah pawh chu ka in tira, ka tan englai pawha phunnawi miahlova a che ṭhin hian min tihlim tâwk em em si.


COMMENT TE. LIKE LEH CLICK TE KHA AW

[mawitei bawihtlung]

KA LALPA




CHAPTER 17



“Than, saw saw enge?" Riha bengchheng i chuan English hlir chuan Thanpuia chu a bia a, a dîl chhût in a au peih bawk si ka lu hi a hai vek thei. Ka ning lutuk chu car chhûng aṭanga pêt chhuah hmak ka châk ut ut mai, Thanpuia lah chuan ning hmel pawh pulo in a hrilh zela.




Chûngte chuan kan bengchhengi chu a ti nui uar uar reng mai, over lutuk. Tlân laklawhah lai pawh nise pungkhawm an lo awm deuh chuan din a la ti ziah zui, a tâwpah phei chuan ka ning lutuk chu ka lu dawmin ka kûn ngar ngar a.




“Tinge? I nuam lo vem ni?" Thanpuia chuan min ngaihtuah tih hriat tak hian a rawn ti a “Aw, a ngawi ve deuh thei angem ka luak a ti chhuak vek alâwm" ṭawngkam mawi pawh ka hmang thei tawhlo, ka pasal a melh dân zek zuk ka hmuh aṭang khân ka mil thei hauhlo.




Thanpuia lah chu ala nui mai mai a, nuihzatthlâk ka sawi tawp silo, thutak lai laia a lo nui chuan min ti thinrim zual. “Lalthanpui fiamthu ka thawh hauhlo a nia aw, nuih tur pawh ka sawi heklo, a chhiahhlawh em ni kan nih? A duh duhnaah i hruai kuala, a duh chuan amah pawhin a vâk chhuak thei, tûn angah lehkhathiam an tam lutuk a bo dawn lo, a ni lo hnamdang khual zin pawh an awm ṭeuh" tiin ka melh ram rama.




A rawn thu tak ve ta deuh “Mira ka sawi tawh kha, helama a awm chhûng chu a nu leh pa ten ka kutah an daha, kan thlahthlam ringawt theilo, misual leh rukrûk hmang pawh a lo tawng theia, a hrim hrimin tinge i mil theih miahloh? Midang hetianga i tih ngai ka hre siloa, Riha hi hnamdang a nih avangin i hmu theilo a nih chuan sim vat ang che" a rawn tihchuan ka thinrim nghal phat mai.





“A ṭha a nih chu, car hi tiding rawh" tiin ka au tuara, “Engah maw? Enge tih i tum? Thinrim suh, i huat turin ka sawi loh kha" a la rawn ti te chuan min ti thinrim zual deuh deuh mai, chunu thlavang a hauh ringawt pawh chuan min tina thei “Ti ding rawh ka tihchuan ti ding mai rawh" ti tuarin car kawngkhar chu ka sawi dawt dawta, a ti ding ta hram e.





Seatbelt chu phelh mawlh mawlhin chhuah ka tuma, ka banah chuan a rawn vuan nghal chat mai “Khawiah nge kal i tum? Thinrim lo vin in be teh ang, Riha hi ka nau angin ka ena, engvanga ngai theilo tlat nge maw i nih le? I rilru a tê emai" a rawn tileh lek phei chuan min ti sa pup pup mai.




“A mitmeng i hriatthiam hunah chû thû chu min la zâwt zâwk dâwn a nia, min thlah rawh" tiin ka ban chu ka thing thlaa. Car chhûng aṭanga chhuakin ka kalsawn nghal nal nal bawk, ka rilru na bawk nên ka mittui chu tlâk tir duh lovin ka nuai pah nawk nawka.





“Ding teh, Miriam Lalrosang ding rawh" rawn timahse din tumna ka neilo, chutia chak zeta ka kal hlawk hlawk lai chuan ka hminga min ko ri hria in ka hawi chhuaka, ka hmazawna mipa ka hmuh rual chuan ka mak ti leh hrilhhai chu ka ding chawta “Rs i lo dam maw?" kum tam tak ka hmuh tawh loh ka mipa hmangaih hmasak ber chu ka hmaah hian a ding mêk a ni.





Ka mittui chu a tling nghal pam mai, min lo nghâk rawh a tih lai te chu ka bengah a rawn ri thar a, a hmêl chu tlêmin a upa ve tawh nangin hmana mipa hmelṭha tak kha a la ni reng. Ka hnungah Thanpuia pawh chu a rawn ding ve chiaha, min rawn vawn mai a tum leh lai chuan ka awmsawn nghal vata.




“Ka zawng nasa lutuk che a sin" Ruata chuan min rawn kuahin ka dârah a beia, ka hamhaih bawk nen ka che sawn mai theilo “Engvanga ka nupui kha rawn kuah ngam nge i nih?" tih rawn chhuah rualin Ruata lak ata chu ka awm hrang nghal dawrha, Thanpuia thinrim hmêl chu ka hmu nghal zat bawk.




“I nupui hi ka hmangaih a nih hi, Rs min lo nghâk rawh ka ti che sia, hei hi maw i mi nghah dan chu" rilru nat hmêl taka a rawn tih leh chuan ka kûn ngara, Thanpuia pawh chuan mak a ti tih ka hria. Ni e Ruata hi ka tleirâwl chhuah tirh ngaihzawng a ni a, zui pawh kan inzui rei, mahsela ram dangah a kal a ngaih a vangin kan inthlaha, nghah chu ka lo nghâk ngei a lawm.




Mahse a awmna hmunah hmeichhe dang nen an in ngaihzâwn thu a chhûngte ka aṭanga ka hriat hnuah leh min rawn biak tawh ngai loh avangin ka rilru a na bawk nen theihnghilh tumin ka bei a nih kha, tûnah a rawn lang leh si chuan min tina thar lo theilo. Ni e pasal ka nei tawh tlat a ni.




Chuan ani chu ka hmangaiha, tûnah ka hmangaihna avâng vêk chuan ka na mêk a nih hi “Nia, hei ka pasal chu a nih hi, nang nên chuan a rei tawh emai. Ṭhian angin a awm theih a lawm, ka kal phawt ange" ti a kalsawn ka tum chu Thanpuia chuan min rawn vuanin min hnûk titih hian a car lam chu min pan puia; Ruata chuan min en zui reng tih ka hria, dik tak chuan ka la theihnghilh bik lo, a chhan pawh hmuhsitna zawng zawng ka tuar lai pawha ka bula awma min hnemtu ber a ni miaua.



Hmangaih hmasa ber an theihnghilh theilo an tih chu a lo dik a ni, mahsela ka pasal phatsan tumna erawh ka neilo. A ni ka nei tawha, hun kal tawh chu ka hre reng tur a ni hek lo, “Lut rawh in biak kan ngai takzet a ni" tiin car chhûngah chuan min ṭhut luh tira, ngawi reng chuan ka ṭhu ve mai bawk.




Riha chu eng emaw hrilhin in lam pan chuan min tlanpui zuia, engmah ka sawi tawh lêm lo. Ka hun kal tawh rawn lang leh chuan min chenchilh ve lo theilo, ka tân khân a ṭha ṭhin em a, ni e ka lo nghah reng tur thu ka tiam ngeia. Nimahsela, keilo hmeichhe dang a zu tawng a ni tih ka hriat aṭang kha chuan ka bansan zui a nih kha.





Riha pawh chuan thil a hrethiam nge engmah a sawi tawh lêm lo, ngawi reng chuan kan awm ṭhapa, tumah kan in be tawh lo. Kal lam nên chuan a inang lo ta ngei mai, ka pasal laka inthiam lohna pawh ka nei chuang lo, a chhan chu Ruata kha kuah lêt emaw han pan leh ka tum miau lova, Thanpuia ka tawn aṭangin ka hrechhuak ngai tawh lo zawk.



Pâwnlam thlir chuan ka hawi vauh vauha, ka kut chu ka sik neuh neuha, ka thaw ham ham bawk. Engtin tak thinrim ang maw? In kan thlen rual chuan Riha pawh nghâk tawh lêm lo chuan car aṭanga chhuakin ka awmna lam chu a rawn hawnga, min pawt chhuakin in lam chu min pan pui nghal hlawk hlawka.





Lo ṭan buai pawh ka tum lem lo, kawngka chu hawngin min luhpuia, ka zui ve zel ringawt. Chutah room-ah chuan min luhpuiin khumah chuan min nam ṭhu a, a dim erawh min dîm viau mai. Ka nau pai nên chungin min khawih na duh hauh lo, thinrim insûm tih hriat tak hian a thaw hrawk hrawka, engvanga thinrim em em nge maw a nih ni, a ni ai ka thinrim daih zawk sia.





“Kha pa kha i enge a nih? Engvanga ka hmangaih ti che nge a nih? Min kawp em ni?" lungawi lo leh thinrim ṭun hian a rawn ti a,  ka dar ka sân ak ringawt. “I hriat kher a ṭul lo, Riha-i endan ang che khân min en ve a nih kha" tiin ka nui haka, a lâwm loh hmel zual sauh mai, keipawh ka lawm bik reng reng lo.





Engmah sawi lovin kawngka chu a va kalh hmaka, phâwk hra in ka lo en thung. Chutah mitmeng rum tak nên min rawn panin a hmui chu a chip hmaka, engmah a sawi tawh lo. Ka bul a rawn thlen rual chuan ka dârah a rawn hmera “Mira khapa kha tunge ka tihchu?" a aw chu vin hauh lo mahse thinrimna a inphûm ru tlat.




“Ka mipa hmangaih hmasa ber a nih kha" chu thu ka sawi rual chuan thinrim zetin min hmer na salha, “Tunah ila duh em? Nge kha thil kha in ruahmanna a ni zawk? Min hrilh rawh, i la hmangaih em?" a aw chu a chang ṭha beng bâwng tawh viau mai.



Chhâng mai lo in hmun dang ka melha, ka thinrim ve tho bawk nen awlsam taka sawi zung zung ka tum lo “Min hrilh rawh. Hmun dang kha en hauh suh, ila hmangaih em? Khapa vâng kha em ni Riha nen kan kâra thil awm tîr i tum tlat?" tiin min sawi deuh nawka, ka rak ṭhat mai.




Ka pum chu a na deuh zawk bawk “Min tina ania, khatiang in min puh hauh suh, a duhzia che ka hai hleinem, Ruata chungchâng min zâwt a maw? Ni e a ni khân engmah lo mai ka nih lai aṭangin ka tân a ding ṭhin a sin, min hmangaih hle bawk. Keipawhin ka hmangaih ṭhin ngei alawm, chu chu a ni lawm ni i hriat duh? Enge a dang ila hriat duh awm?" tiin ka au khum ve ta piap piapa.




“I chunga ka lungawi lohna hre duh miah lovin keima lamah sawisel tur i zawnga, Ruata kha chuan kan in ngaihzâwn laiin min tina ve ngailo, nang chuan englai pawhin min tina. Zâna khanu bula kala in nuih dun te kha ka hrelo emaw i ti em ni? Khulama i chhuk pawh khân hun in hmang dûn lovang tih pawh a hriatloh" tiin ka au khum tuar tuara.




“Ka hua che" tileh hramin awmsawn ka tuma, a phal tlat lo. “Thil a kawi zâwngin ngai tlat suh, ka tân chuan i danglam bik lutuk. Ka nupui i nih hi, chuan khapa kha i hmangaiha, kei hi engang in nge min ngaih? Min hmangaih ve ngai miah lo tihna em ni?" a aw ah chuan thinrimna nilo in rilru natna a lang tel tawh tlat.




“Riha hi nau ang bakin ka en lo ka tih kha, a ni chuan engtin pawhin min en mahse nangmah lo hmeichhia ka hnaih ngai lo tih hi hre rawh. Keichuan ka hmangaih che, nangmah avângin hei chen ka thleng a ni lo'm ni? Keichuan ka ngaihzâwng hluite ka in tihbuai tîr lai i hria em?" tiin ka hmai zâwnah chuan a rawn kûn hniama.




A sawi chu a dik tih ka hriat avângin engmah ka sawi tawh lo, “Ka theih tâwk chuan ka duat ve che a sin Mira, heti chung hian ka lakah i la duhkhawp lo hi a pawi ka ti, khapa kha i la hmangaih a nih chuan min hrilh rawh" chhuatah chuan a ṭhu thla a, a beidawn hmêl ngawih ngawih bawk.




Ruata ka hmangaih ṭhin a ni tih a hriatna chuan a tina hle tih ka hria, ka inthiam lo tawh hle. Mahse engmah ka la sawi chhuak duh mai lo, beidawng zetin a hmai chu a tuai puata “Min lo hmangaih ve ngai miah lo em ni? Mira, i tan hian enge ka nih ve?" tiin ka chhânna nghâk tih hriat takin min ena, a mita mittui tling te pawh ka hmuh hmaih lo.



Ka bialpa hlui nen kan chungchâng a hriatna chuan a tina hle tih ka hre mai, a kutah vuanin, ka kai tho a. A awmah chuan ka bei nghal than bawk. “Ka pasal alâwm i nih? Engah nge ka hmangaih loh ang che. Nang chuan englai pawhin ka lam i ṭang ṭhina, mahsela Riha rawn lan china min khak tâk fo ah kha chuan i lakah ka lungawi lo alâwm, i lakah hian thikthu ka pe chhe lutuk tih i hrelo ang tiraw? Ka hmangaih che alâwm, a ni kha chu ka nunhluia ka hmangaih ania, nang erawh ka tûn hun leh ka hmalam hun thlenga ka hmangaiha ka in nghahna tur i nih hi" ka chawl deuh data.




A biang tawn tawnah vuanin ka en chhoa, “Te ka hmangaih che a lawm, ka hmangaih êm che avângin i lakah thikthu ka pe chhia a, keilo hmeichhe dang i hnaih ka duhlo. Ka tân chuan i hlu lutuk, a ni kha chu ka nunhlui a ni a, hunin a liam pui tawh ah ngai rawh" tiin ka kuai kûna, keimah zawk chuan ka fâwp nghal hmiah bawk.





Ka damchhan leh in nghahna a ni a, a rilru tihnat ka duh bik lo. Min rawn chhang lêtin khumah chuan min bawhtlua, ka chungah bawkin kan duhthawh dûn leh ta viau.



Thinrim a inhnial zo chiah kan ni bawka kan che reng reng chu kan in dim lo dûn hle, a tâwpah chuan hmangaihna chu chên dunin kan in kuah leh ta hle hlea.



ZAWMNA




“I ṭha em?" tiin chau tih hriat taka ala thaw hlap hlap chu ka ena, a lamah in herin a âwm pharh darh leh a dul phiar fat chu ka thai nghal riak riak bawk. A pian hi chu a nalh thlâwt a lawm. Englai pawha a bula awm ka duh, ka thlakhlelhna leh ka hmangaih êm avâng hian alakah ka pangchanga, ka thinrim hma in ka thikthu a chhe em em bawk, hmangaihna vâng vek a ni.




“Chau lo e, mahse tha a zawi thei hle mai. In hauh chi pawh ani tawh lo, ka pilh hrep hrup mai, i ṭha em? Ka dim thei silo chea, kan naute chuan a tuar êm lovang chu maw?" tiin a nui hak haka, nui ve sakin “Ka ṭha e, naute pawh a ṭha ang. Ka pum hian rawn nat zeuh zeuh a ching ṭan a, ka vei dâwn hnai a niang, nau neih dawn hnaih hian pum hi a na ṭhin an tia, rawn piang vat vat se ka duh" tiin ka insiam rem deuha.



Thawk chu ka la zui ham ham bawk. Kan inneih hnu hian kan in hau khat hle, tûn hi a vawikhatna a ni hial ang, tih tauh châng leh inhnial deuh châng chu a awm lo theilo a, tûn anga inhauh nasat erawh kan la nei miah lo thung, mahsela tûnah erawh chuan kan inkar chu a fel leh ang duak lawia.




“Kei chu ka chau lutuk, ka taksa te hi a na ṭhûm mai" tiin ka mit ka chhing diar diara, chu veleh rawn tho chhuakin ka taksa chu a hmet kuala “Muhil leh phawt mai rawh, ka lo malis ang che" tiin a phun supa “Ka mutthilh chhûngin lo kalsawn miah suh aw, ka bulah awm tlat ang che" tihramin ka thaw zui haka, mutthilh tum chuan ka in tintuaha.





“Riha chhuak rawh" tih ri deuh hrawk avâng chuan harh zawkin ka ṭhu chhuaka; chutah ka thil hmuh avâng chuan thinrim deuh tak chuan tho chhuakin ka pasal lo pawm bet tlat tu chu ka va pawt hranga, a samah chuan kek in ka pawt thlu nghal hnawk mai.





“Ka pasal ilo thlêm vel a maw? Zak theilo lutuk, i va han hauisar em em ve" hrethiam dâwn lo mahsela ka thinrim bawk nên ka an khum pah tawn tawna, a ni pawh rak chûlin min rawn khawih lêt a tum nasa mai, lo awm sawn zelin ka hnûk sawna, kan nupa room aṭang chuan ka hnûk chhuak thei ta hrama.





Ka thlah ve chiah bawk “Chhuak ang che, kan in aṭang hian chhuak rawh" a hriatthiam tur chuan ka ṭawnga, thinrim zet chuan min rawn chhâng in ka pasal a duh tih vel a sawi chu ka hre ve nawk mai, zahna reng reng a neilo. Hnamdang hmeichhe rapthlâk tak tak hi chu zah an lo hre miah lo a nih hi.




“Riha chhuak rawh, i pa ka bia ang" Thanpuia chuan a rawn ti ve hrawka, a ni pawh a dawhtheihna in a tlin tawh lo a ni ngei ang. A hmel chu a rum ṭha viau bawk, Riha lah chu zak lo zet hian a la awm lui ngata, Lalpa leh! Hetiang khawpa hmeichhe zah hrelo hi ka la hmu lo.




Thanpuia chuan a ning ta deuh nge, a bânah la lawkin pâwnlamah chuan a pawt chhuak zui dawr dawra, reiloteah rawn lût lehin Riha awmna room ah chuan lûtin a thawmhnaw dahna bag chu rawn khai chhuakin pâwnlam bawk chu a pan pui leha, lo dan emaw pawh ka tum lo. Bâkah engvangin nge ka dan ang? Ka pasal min chuhpui a tum miaua, khawngaihna pawh ka neilo.




A rawn lêt leh tâkah chuan thaw hakin ka pana, “Engtin nge kan room-ah khân a rawn luh ngam zawk le? A huaisar hle mai" ka lo tih chuan min rawn kuahin a thaw leh haka, Riha awmdân chuan a ṭhâwngin a thinrim hle tih ka hria, ni e a ni chuan a thawhpuite fanu a nihna angin a ena, khanu lah khân a lakah rilru dang a lo pu daih lehnghâl, chutah ka pasal a ni tih hre reng chung leh nghalin, a rapthlâk lo tihchi pawh a nilo.





“Khatiangin ka lakah a awm ang tih ka ring pha lo a sin, ka nau ang maia ka en a ni a, khatiangin a rawn che ang tih ka ring pha lo. A pa ka biak vat a ngai a ni" tiin room-ah bawk chuan min luhpui leha, engmah ka lo sawi rih duh ta lo, engkim chingfel phawt rawh se, chumi hnuah a awmdân ka en anga, ka be chauh ang.






Phone chu phawrhin Riha pa ni ngei tûr chu a bia a, a chângin ṭawngkam vin a hmang leh zauh ṭhin. A insûm ve nasa hle tih ka hria, lehlam aṭanga an thu rawn sawi dân a duh vak lo te pawh aniang, a tâwp lamah phei chuan a aw chu a chang ṭha beng bawng tawh viau mai.




Ngawi reng chuan ka lo en kara, kha thil a ti ka hmuh aṭang khân rin hlehna pawh ka nei tawh lo, ka pasal hian min hmangaih ve tak tak niin ka hre bawk. Ka tân chu tluka thu lâwmawm dang a awm thei dâwn em ni? Lo kuah lêtin emaw engtin mah tilo se chuan ka kalsan ngei ngei ang, mahse amah zâwkin chêt la in a hnawtchhuak ta hial a nia, a leh lamah chuan ka ngaih a ti ṭha lutuk.





Phone a dah hnu chuan pan hnaiin a kutah chuan ka va chelha “Ka lâwm e, inthiamlo duh miah suh aw, khatiang em em in a ngampa ang tih ka lo ring pha bik lova, i aw ri ka hriat khân ka rawn harh chiah a ni, ka pasal kher kher hi tinge an rawn duh leh ṭhin che" ka tihlai chuan a âwmah min pawm beta, keipawhin nghet zetin ka kuah lêt bawk.




“Ka phatsan ngai lovang che ka tih kha, nangpawh duh tu che i neih reng kha maw? I hmangaih hmasa ber ala ni zui, nang ai ka hlauthâwng fe ania, Riha chu ka ngaihtuah a ngai tawh lo. Amahin in ngaihtuah ve tawh mai rawh se, khatiang rilru ka lakah a pu tih lo hria ila chuan ka ngaihsak miah lo tur. Nangmahin i sawi lai khân ka lo awih lova; mahse ilo sawi dik a nih hi" tiin a nui deuh haka.




“Ka sawi rêng kha, hmeichhia chu kan hmeichhiatpuite bawk hian kan rilru kan inhriatsak ṭhin, lo thlah zalên lutuk phei che ila chuan ka dinhmun a derthawng daih thei, a chhelo ropui sia. I luck lutuk hi tihreh dân ngaihtuah a ngai a nih hi, a khât tâwkin hmeichhia avângin kan buai reng mai, i lerh deuh nge maw ni" ka tichu a lungawi hmêl tehchiam lo.





Kei erawh ka nuih a za ru viau thung, hetianga ka tih hi chuan a lâwm ngai lo reng reng. “Vawikhat mah mitmei pawh ka la hmuh lo, ka nupui hi ka duhtawk ka nupui phatsan duh tur khawpin tu hmeichhia mah itna mitin ka melh lo tih hre phawt rawh" tiin ka chalah chuan a rawn fawp zauha.




Ka lo nui nghal ver ver mai “Ka hria alâwm, ka fiam mai mai che a nih kha, ka neih chhun i ni tih i inhria a, min kalsan duhin ka ring lo. Nakinah he i thisen aṭanga insiam ngei rawn la awm tûr nen, heti chunga min kalsan i duh a nih chuan mipa lelo tak i ni dâwn tihna a nia, chutiang mizia chu i nei der bawk silo; tirawh chaw ei tawh ang, ka ril a ṭam tawh. Thil thleng chu theihnghilh ang" tiin room aṭang chuan ka chhuahpuia.




Ngawi reng chuan min zui ve zel bawk, nu Zari pawhin thil awmzia a lo hre ve deuh nge min lo zâwt rênga, a tlângpui chu hrilh thuak in a zawng zawng erawh ka sawi duh bik hauh lo, ka pasal a mualpho tel thei dâwn tlata, chaw chu bar sawk sawkin room-ah kan lut leh a, Dodoi chu ka text pah bawk, a ni nen hi chuan kan lakah thuruk a awm ngai lova, engkim ka hrilh ngam bawk nên tûn pawh Riha chu chawh a tih hmêl viau mai.

[mawitei bawihtlung]

KA LALPA





CHAPTER 18



“Rs in hmu lawk ang" chu message ka hmuh chuan tunge ka hriat mai loh avangin a dp chu ka ena, Ruata a ni tih ka hre nghal. Engtin nge ka number a neih ni ang? Inhmuh a? A va ngam zâwk ve, hmuh tumna ka neilo, ka pasal phatsan emaw a lungawi lohna tur thil tih ka tum lo hrim hrim.






“Ruata min rawn tibuai tawh suh, pasal ka neia, fa ka nei ṭep tawh bawk. Nang nên kha chuan nunhlui mai a nih tawh kha, tin i zuk awmna lamah bialnu i neih avânga kalsan che ka ni tih theihnghilh suh. Tûnah chuan ka nunah mithar an awm tawh, nang pawhin hmalam pan tum zawk rawh" tihchu ka thawna.







Dik tak chuan ka theinghilh a ni bik reng reng lo, mahsela hriatreng ka duh tawh lo, ka hmangaih hmasa ber a ni a. Khawi emaw laiah chuan amah hriat chhuahna ka neilo theilo; mahse ka pasal, min hmangaih êm êm tu leh ka hmangaih ni bawk, keimah avanga a chhûngte nên hiala in huat phah hi kalsan ka tum lo, a ni tluk hi ka hmu tawh dâwn lo tihpawh ka hria.







“Min la hmangaih reng tih ka hria, i fa pawh kha ka fa angin ka pawm mai ang. Khawngaihin bul ṭan ṭha leh ang, ka hmangaih che tih i hriat kha, engtin nge pasal ilo neih theih zawk. Keichuan nuamsa taka ka dah theih nân che ka bei a sin" tihchu a rawn thawn leha, ka thaw hak mai. Zâwk zamah chuan, kha chen ka nghâk a; mahse enge ka hlawh chhuah kha? Natna chauh a ni.







“I hriatsual a nih chu ka pasal hi ka hmangaiha, kalsan pawh ka tum lo. Ka hmangaih avâng rengin a nih hi a fa pawh ka pai ni, ka nghâk lo che emaw i ti em ni? Ka nghâk reng zâwk che a sin, mahse enge ka hlawh chhuah kha? Phatsanna bâk a nilo, tûnah chuan i tello pawhin ka hlim ve thei tawh, min rawn tibuai tawh lo la ka lawm zâwk, i hlawhtlinna erawh ka lawmpui a che. Keiaia ṭha Pathianin a la pe mai ang che" tiin ka sira ka pasal hna khawih mual mual chu ka ena.





Tûnlai chu a buai a zuala, kei nên pawh inbiakna hun pawh kan nei manglo, mut hun hi a ni tawp mai. Riha pawh a nu leh pa ten an rawn hruaia, a pa leh Thanpuia an la inhauh hrep phah zuia, mahsela thil chiang zâwk an hriat tâkah kha chuan ngaihdam dil leh hnuhnawhin an haw ta kha a nia.







“Nang lo hmeichhe dang neih ka tum lo, i pasal kha ṭhen la innei ang, duat tak leh hmangaih takin ka enkawl ang che tih ka tiam e" ka thaw haka, engvanga ka laka beiseina la rawn nei ngam tlat nge maw a nih le?






“Ruata ka sawi tawh kha, keichuan hmangaih dang ka nei tawh. Ka phatsan ngai lovang, mi pângngai tak i ni a, mi nupui bia a lêm kual vêl chi pawh i ni tawh lo, ka pasal hian min enkawlna ah sawisêl tur ka neilo, duatna leh hmangaihna zawng zawng chu a hnên aṭang hian ka dawng veka, i pêk kher ka ngai love, hetiang lam i rawn sawi leh dawn a nih chuan ka block mai che angai ang" ka tih tâkah chuan a seen kura.







“Aw le, mahse ka beidawng dâwn lo ania" tiin engmah a rawn sawi belh tawh lo. Chhâng tawh lo in a Chat chu ka delete daiha.




“Rilru hahna i nei em ni? Tunge rawn bia che a?" hepa thil chîk lutuk leh hre thei lutuk hi a buaithlâk zawk, hna a thawk reng emaw tia engkim a lo hre leh tawh ania'ng “Tumah nilo e, mi zaktheilo deuh pakhat ka hau lawk anih kha, i zo dâwn tawh em? Ka mut a chhuak tawh ania" tiin a bulah chuan ka tawlh pheia.





Tûnlai chu nau ka neih a hnai tawh bawk nên sehsam an tih ang khân ka awm ve fo va, Thanpuia pawhin min chhuahsan ngai meuh lo. In aṭangin hna a thawka, inbe tam em em lo mah ila ka bulah a awm reng thung, a tello chuan ka mutui thei der lo lehnghâl, a pangtilum hi ngaiah ka nei tawh a niin ka hria.







Min rawn en chuan a nui haka “Ka zo ṭep e, ka duat che i châk tawh em ni? Ka rawn duat thuai ang che" tiin a laptop ah chuan eng emaw hi a chhu leh mawlh mawlha, tihbuai pawh ka tum chuang lo. Keimah avânga hnathawk ṭha theiloa a awm hi ka hlau ber, kan chhûngkaw tân theih tâwp a chhuah tih ka hria.






A pa te nên kan la in be theilova, an monu ni tur chuan min duh lo lutuk tih ka hriat phah bawk. Chutiang vâng erawh chuan ka pasal lakah chuan vui emaw, thinrima tihtauh emaw pawh ka tum lo. Keimah avângin hetiang hian a awm tawha, a chhûngte lo mil loh ve ringawt kha ka tih tur lah a ni hek lo, ka pasal thisen zawmpui te an nihna angin ka en mai tur a ni.





Ka pasal ka hmangaih a nih chuan a chhûngte pawh ka hmangaih pui tur a ni. A zo dâwn ta nge Laptop chu khup thawkin a zi mar ar ara, a awmdan vel chu chiang takin ka lo en reng thung. A pian hi chu a fuh thlawt a ni, hetiang khawpa hmelṭha, chhelo leh hausa bawk si hian kei ang fahrah leh rethei bawk si hi engtin nge min hmangaih theih tih hi mak ka la ti fo mai.






Keiai ṭha leh hausa, vun nalh leh no tak tak, lehkhathiam bawk si a hmuh hnem dâwn tehlul nen, kei a phurrit thlentu leh a chhûngte lak aṭanga la hrang tu hi min la thinrim khum lova, min hmangaihna a ti lang reng zâwk thei te hi mak ka tiin ka ngaihsânna a zual bawk.





Ka bulah rawn tawlh pheiin min kuaha, zan danga a tih ṭhin ang bawkin ka dulah bawk chuan a kut a awm leh ngar tawh. “Tunge rawn bia che, nichin khân ka zâwt chiang duh lo chea, mahsela i awmdân hian mi mai mai chuan an rawn be dâwn lo che tih ka hria" fing ker kawr lutuk mai, ka mitmeng leh awmdan aṭang hian thil hi a hrethiam zung zung nimaiin ka hria.






Alakah thuruk a zêp tak tak theihloh, a hre nghâl zel ni ber hian ka hre tawh. Zêp ve viau ka tum pawhin eng emaw tizâwnga ka danglam hlek hi a lo hre thei si.




“Nia Ruata khan min rawn bia a, bul ṭan a duh thu leh kan naute chena min enkawl a huam thu a sawi mawle" tiin ka ṭhen deuh saka, chû thû a hre chiah chu a lâwm hmêl vak lo, a meng rum deuh ala. Min kuahna ban tha hrui pawh chu a rawn che ṭalh ṭalh mai.





“Thinrim suh aw, min rawn be tawh lo turin ka tia, ka tân i pawimawh ber thu ka lo hrilh a nih kha. Kîr tumna ka nei miah lo ania, chuvângin ngaihṭha deuhin awm rawh" tiin ka kuah lêt thaka.




“Ka ringhlel nem che, mahsela a rawn tibuai leh che a nih chuan ka enliam mai mai tawh hauh lovang. Ka nupui i nih hi, tu biak tûr mah i nilo, chu kan mihringa chuan boruak a va ngam deuh ve mawle, hmu ila chuan a châk lo khawp ang" a tihchuan a kutah ka chelh saka, a thinrim hle tih ka hre mai.





Ka lo sawi chhuak palh palh a ni, ka laka a thikthu chhiatzia ka hre reng si a “A ho lutuk, ka duh tawh chuang hleinem. Bâkah a hmêl pawh nang ai a chhe daih zawk ania, ka pasal hmelṭha lutuk hi ka kalsan phal dâwn lo hrim hrim, chuvang chuan hlim hmêl pu reng zawk rawh, i thinrim hmêl kan hmuh chuan naute nên hian kan awm a nuam ṭhinlo, a ni kha chu mi lo duh ve tu ah ngai tawp la, keiin ka duh chuang lo tih hre reng ang che. Ka hmangaih hi ka kalsan phal hleinem che" ti duahin a âwm ah chuan ka bei kaka.






A ni pawh tlêm chuan a inthlah dul ve ta deuh “I hmangaih hmasa ber a lo nih tawhnaah ka thik lo theilo, ka khawih phakah awm sela ka khawih duh hial ang. Ka ta chiah i nih hi, ka nupui hi tu tân maha kaltîr che ka tum lo tih hre reng rawh, a rawn biak ngam pawhin awm tawh suh ang che. Khapa kha i hnaih hlek pawh ka phallo" a tihchuan ka nui deuh hak mai.





“Teuhlo mai, ina awm char char chung chuan hnaih a harsa teh mai ania. Min enla, ka dul nen khawiah han lêng chhuak thei pawh ka nih loh hi, bakah ka pum hi ana zeuh zeuh tawh bawk nen ka vei harin ka ring lo, ih maw? Ka sawi tawh kha, ka tan chuan ka hmangaih leh innghahna awm chhun i ni a, i hlatah tu bulah mah awm ka duh lo, i kiangah ka thla a muang ber tih hre reng ang che. Ruata emaw pawh tumah nang lo chu ka nunah pawimawh an awm lo" tiin ka phun sap sapa.





A awih ve ta nge engmah a sawi zawm tawh lêm lo, ka hnungah chuan a chûl leh hliau hliaua, a chânga bike leh motor ring zet zet rawn tlân leh thin vâng erawh chuan mutthilh mai chu a har hle, a bengchheng bawk si. Mi an ti harh leh ṭhin, Thanpuia pawhin a hrethiam a niang ka beng chu min rawn hup saka.



“Lir nei rau rau pawh hi kan lo in ang lo a nih hi, nei leh êm êm te hi chu an khamawm. A ri ringawt pawh hi naute tan chuan phut zawk zawk natham a ni, fate han nei ila a mutui theiin ka ringlo, an duh leh khaw pâwn aṭangin in tlân siak mai sela, miin bike kan neiin kan khalh thiam a ni tih an hriat loh kan hlau nge, heti taka ring leh chak lutuka kan tlân ṭhin ni.





An hetih avanga nunna chân tawk an lo awm, media ah hetiang ho racing hrât ho hi han sawi chhia in khap tûrin han ti tase “Kan thu thu, khaw pâwnah a lâwm kan tlân, tumah kan tibuai lo" an han ti ve a, a tâwpah mi pawisawilo nunna lo la tâwk hi an awm leh ṭhin.




“Kan naute hi a lo pian hunah nangmahin a hming sa rawh aw, kei chuan sak tur pawh ka hre lo ang" tiin a kut chu ka khal neuh neuha, nu leh pa nei ve ila chuan an sa ngei anga, mahse ka nei miau silo. A ni lah a pa te nên kan inkar hetiang hi a ni rih bawk si, ka beisei ngam lo law law.




“I lungawi chiah ang maw? I duh loh deuh sa ta ila i thinrim leh si ange, tak takin kei a pa ngei hian ka sak lohin tunge sa chuang ang, hming satu an chhûn duh an tibawka, kei min chhun chuan a hma hunah a ngaihtuah awm dâwn hauh lo" a tikher chu ka ngei tâwk a tling leh em em tawh.




A dulah chuan sih sak hlawkin ka melh ram rama “Mahni infak kher ṭhin suh, i lerh tehlul nên nang a chhûn che a nih chuan kan inhau nileng zêl ang, oh!" ka pum rawn na leh zawk avâng chuan ka rum chhuak haka, nidanga a nat ai a na zual daih mai; bâkah a na rei bawk nen ka ngaih a ṭha chiah lo.




“I ṭha em? Engtin nge i awm? I na viau em ni?" min ngaihtuah taka a rawn tihchuan ka lo bu nghata “Te, damdawiinah kal tawh mai ang. Ka nau vei hi a hnai riauin ka hria, a hrehawm lutuk" tiin ka thaw haka; chuveleh tho chhuakin a inha nghal sawk sawka, kan mamawh tur ka lo dahkhawm sa bawk nen chu chu la in min rawn pana.




“I tho thei angem? Nu Zari pawh kan be dâwn ania, a ni tello chuan a buaithlâk dâwn emai" a tihchuan ka hnial bik lo, muangchanga ka tho chhuak tur chu min rawn pui vatin room aṭang chuan kan chhuak zuia, ka pum chu a rawn na leh ṭhin bawk nen ka in pet leh fan fan ṭhina, car chhûnga ka ṭhut luh tâkah chuan ka thaw huai mai.



“Tuar hrâm hrâm rawh aw, a na viau em?" a rawn tihchuan ka lu ka thing nar nara, hrehawm ti lutuk ang chuan ka awm duh biklo, a chhan chu keiai a chi ai leh dâwn tih ka hria, car chu tinung in a tlân chhuak zuia, ka dul chu dawm bet ṭaiin ka ner ru leh sak sak ṭhin.



Nau vei natzia an sawi ka hre ṭhina, a taka tawn ve tâkah phei chuan ka hrechiang leh zual, kalkawnga tlân lai lai chuan ka tui bâwm ala keh zui, chûngte hlei hlei chuan Thanpuia chu a ti hlauthâwng in a chi ai zoa, keimah zawk chuan ka han thlamuan leh rih thul, kan pahnih chauh pawhin kan buai tâwk ngei mai.



THANPUIA POV...




Ka nupui nau vei a rûka in pet leh fan fan ṭhin chu ka en leh zauh ṭhin. Tihdân tur vak ka hre bik lo nên ka buai ru ngei mai, a tuarchhel lutuk chu mak ka ti zawk, hmeichhe tam tak ang chu nise a au tuar tuar tawh ang, mahse thawm a chhuah lutuk duh hauh lo, chu chuan a tawrhchhel zia a tichiang hle bawk.




Damdawiin kan thlen rual chuan ka au nghal tuar tuara, amah chu ka pawm lût nghal bawk. Nurse te chu rawn tlân khawmin reilote hnuah ka ṭhianpa pawh a rawn lang zuia, Doctor a lo ni kher kher chu kan nupa hian kan vânneih phah a nih hi, “Nau neihna hmun lamah innawr luh nghal mai a ngai ang, ṭhiana nang chu hetah pâwnah lo nghâk rawh" a tihchuan ka hnial duh bik lo.




An nawr luh takah chuan in ngaihtuah harhin nu Zari chu ka phone, thil awmzia ka hrilh chuan a ni pawhin a rawn kal vat tur thu a rawn sawia, ka thaw huai mai. A ni a lo awm kher kher hi chu ka lâwm viau bawk, tûnah tak hi chuan ka nu ka mamawhna a sâng ngei mai, ka bulah awm se tih tluka châk ka neilo, keimah chuan ka nupui hi ka buaipui thiam lutuk dâwn der silo.




La dam sela chuan tûnah min thlamuan tûrin a awm anga. Ka nupui ngei pawhin a thlamuanpui in ka ring, ka pa leh ka unaute ho lah heti hi an ni si a, Mira lakah pawh ka inthiam lohna a zual, nu leh pa a neiloa, ka chhûngte lah a lakah an lo hel ve leh zêl si a, ka nu ka ngai ngei mai.



Pa niin chhûngkua hial din tawh mah ila ka thlakhlelhna a rawn pung zual “Nu ilo hmu em? I sawi fo ṭhin hmeichhe hmangaih tawngin chhungkua ila din ve ang i tih ṭhin kha. Chutiang hun chu ka tawng chho mek a sin, i fapa hian ka mamawh hle mai che. Keimah chauh chuan ka nupui hi ka buaipui thei angem ka hrelo, thlamuan tûr talin la awm la ka ti hle mai" tiin keima hriat tâwk lek chuan ka phun sap sapa.




Nau lah chu a vei rei phian lehnghâl, car a naute mamawh tur vel kan dahsa chu ka la lût a, nurse te chuan an rawn la ta bawk. Nu Zari pawh a rawn thleng har lo, ka bulah rawn dingin min thlamuan nghal mawlh mawlha, ka hmela chi aina chu a hmu pawh animahna, a ni hi ka nu awm loh hnuah chuan nu anga ka en awmchhun a ni a, chutia ka bula a awm pawh chu ka zân phah huai mai.





Nu Zari rawn thlen hnu rei vak loah chuan nurse rawn chhuakin Mirain nau a neih fel tawh thu a rawn sawi chuan kan thaw dûn huaia, “Mi enge a neih?" ka lo tih lai chuan “Mipa a nei e, kan buaipui meka, in hmu thei thuai ang. Pathian zârah a hriselna pawh a ṭha e, a nu pawh a ṭha a nia" a rawn tih zawm tâkah chuan ka lungphu rang lutuk pawh a zia ve deuh.





Darkar chanve vêl kan nghah hnuah Mira-ite nufa chu kan hmu thei ta hrâm a, hmuh theih an tih rual chuan ka lût rang ngei mai. Khuma an nufaa an lo mu ka hmuh rual chuan keimahah thil che dawt a awm nghal, hmuh an nuam hluah hluah mai.




Pan hnai vatin Mira kutah chuan ka vuana, a ni pawhin min lo nuih sen sen mai. A chau hmêl kara min rawn nuih hrâm hrâmna chuan min hneh viau bawk, ka hmangaihna pawh a zual sawt te hian hria “I ṭha em? Na i la nei em?" ngaihtuah zeta ka tihchuan a ṭhat thu chuan min rawn chhangin kan fapa lam chu a ena.




Kg 4 lai a ni reuh lehnghâl, a pian tirh aṭangin a rit nghal nalh mai, keipawh chuan kan fapa chu a vawikhat nân ka ena. A hmêl ka hmuh rual chuan hai rual lohin ka fa a ni tih a hriat nghal hliah hliah mai, chu mi ka hmuh avâng chuan ka nui nghal haka, ka nupui thusawi ka ngaihtuah vâng a ni pakhat, amah a chhun a duh êm êm kha ania.





“A chhûn tak tak che, keichu min chhûn ve miahlo. Thla 9 chhûng ka paia, chau takin ka hringa. A ṭangkai lo ber a pa hmêl a la chu a lâwmawm miahlo" a rawn tihchuan a fiamthu tih hria in ka haw duh lêm lo.



“Mipa a nia, a chhun che chuan a nû dâwn lutuk a sin, kei a pa, mipa pâ em em hi chhûn sela a ṭha zawk" ka ti chu a rawn nui ta haka, a chau bawk nen a muhil zui nghal mai bawk. Naute chu nu Zari chuan a buaipui chawta, keichuan tih dan tur em em hre ve heklo, ka lo en reng ringawt.





Mira rawn harh leh hnu chuan ka ṭhiana te pawh rawn kal in nau hming sa tûr chuan min tizuia, a birth certificate vel siam nghal a ngai bawk nên ka ngawi vang vanga, ka nupui min enkar tu chu en lêtin a biangah ka chûl saka, kan pahnih nun hre reng chung chuan “Vanrohlua" tihchu ka sawi chhuaka, midang pawh chuan engmah an lo sawisel lêm lo.





Midang chhuah hnu ah chuan “I hming sak chhan kha ka hre ve duh" a rawn ti ta renga, a bula ṭhut thlâk pah chuan ka fawp zauha “A nu tân chhûngkaw thar, a pa tân pawh a nun tikimtu tur a nihna angin chung lamin kan pahnih tâna thil pêk hlu min pek avâng leh kan nun bul ṭan ve na tur a nihna angin mawle," tiin ka nuih suka.





“I awmdân hre rengin tûnah chuan nu i ni ve tawh dawna, kei leh i fapa hi min kalsan ngai loh ka beisei" ka tihchuan ka thusawi a hrethiam tih ka hailo, ni e; ka nupui hi fahrah a ni a. Tûnah nun thar neiin chhungkua a din ve dâwn tih ka hriatpui miau avanga kan fapa hmingah pawh sa ka ni reng a ni, kan nun kan hrechiang duna, vân lamin a thil pêk hlu tak min rawn pe ta chuan kha hming kha ka ngaihtuah ta renga.





“A mawi lutuk, ni e nu leh pa neih chak em em khân tûnah chuan nu dinhmun ka luah dâwn ta thunga. Ka kalsan ngai hauh lovang che u, ka fapa chu ka lo pawm ve tawh ange, a hnute a hâl tawh ang" tiin nu Zari kut ata chu kan fapa chu a la zuia, zeilo taka kan fapa hnute a pe kual vêl hmuh tluka nuam chu a awm kher lovang.





Kan fapa lah chuan a hne nghâl dawk dawk lehnghâl, nui sukin ka en renga. Khawvela thil hmuh nuam ber ni hial in ka hria “Bawiha ka lo va haw tawh mai dâwn em ni? I pu zinlai a ni sia, ka fate ho in min lo nghakhlel tawh ang" nu Zarin a rawn tihchuan ka chhân hma in ka nupui chuan a lo chhang thuaia.




“Va haw tawh rawh, kan lo inbuaipui thei mai ang. Kan nupa tân a i lo awm kher kher hi chu kan vânneih pui a nih hi, min ngaihtuah suh. Min pui tûrin nurse te an awm reng a lâwm" a tih tâkah chuan nu Zari pawh chu a haw zui ta thuai a.




“A hmelṭha tiraw? Mak deuh chu maw khatia a hmêl ka hmuh rual chiah khân ka hmangaih nghâl em ema, venhim tlat ka tum bawk" ti a a rawn phun sap chu an bula ṭhut thlak pah chuan kan fapa chu ka ena.



“Ni e, in nufa hian ka venghim tlat dawn cheu a lawm, ka tân chuan ka chhûngkua leh ka neihchhun te in ni dâwn a, in nat ka phal ngai hauh lovang, chuan fapa min pêk a ka nuna i lo lût hi Pathian hnênah pawh lâwmthu sawi kan ngai a nih hi, ka fapa ka hmuh hian keimah ka inhmu a ni" tiin ka fapa hnute hne dawk dawk leh mitchhing chal mai en chung chuan ka ti a.




“Ni e, keipawh ka nuna ilo lang hi ka lâwm asin, nang hian engkim min pe a, ka nu leh pa nih i fawm bawka, ka hmangaih che" rawn ti ve sapin naute chu a mutthilh tâk avâng chuan a sîrah chuan a muttira.




Amah pawh a in hliamna vêl nên la chêt an phal loh avângin a mu ṭha a, ka lo pui vat bawk. “I chhûngte i hrilh hrim hrim em?" a rawn tih khauh avâng chuan chhan mai dân tûr pawh ka hrelo. Ka en renga, ka awmdanah engkim a hrethiam tih ka hria.




“Mira, i rilru an tihnat leh ka duhlo. Ka lo hrilh tho ang, mahse an rawn biak che erawh ring lutuk suh, an rilru a kal sual tawha. I rilru an tihnat ka phal hauh lo ania" ka tih tâkah chuan a bu nghat nghata,




“Ka ṭha alawm, i chhûngte an nia, an thisen zawmpui chu an haw reng bik nâng, hriat ve chu an phu alâwm. Miin min dem lutuk palh ange, keichu min ngaihtuah suh, nangin i biak chuan keiin lo hriat ve leh vek kher angai hleinem. Kan fapa tân hian a hma hun kan siam a ṭul tih i hriat kha" a rawn tih leh tâkah chuan ka bu ta nghata.




Keiai a ngaihtuahna a puitling zawk tih hi ka hre nawn fo dâwn chu a nih hi, keichuan hrelo tawp mahsela pawi ka tiloa, mahse a ni chuan thui tak thlengin a lo ngaihtuah leh diam tawh chu a nih hi, hmeichhia nge nge an duhnaah chuan pasalte tlinlohna hliahkhuh dân an thiam a nih hi.



Hmeichhe khawsak ṭha chu a pasal tân lallukhum an lo tih fo kha maw? Hmeichhe ṭha chuan chhungkua an huikhawm foa, hmeichhe ṭha lo erawhin a pasal chhûngte erin chhûngkua a um darh thei thung, mo dinhmun hi a namai lo va, mi fel na na na chu mona chhungkaw tân pawh huat reng theih an nilo.




Engtikah emaw ka nupui avâng hian keini chhungkua ngei pawh kan danglam ka la ring tlat bawk, chu hun chu a hla in ka ring lo, ka nupui rilru puitling leh dawhtheihna ngah tak hi ka fak lo theilo, a pasal nimah ila ka zahin ka ngaisang bawk. A ni ang hi mi tam tak an awm ka ring lo, a mah haw em em tu pawh haw miahlo in a la awm thei ania, hmeichhe ropui tak chu a ni ve in ka hria.



Fahrah niin seilian mahsela a nun erawh a zahawm hle thung si.

MUTTUI U