We Belong Together BY Becca Lnz (Completed)

[Rebec Nunziri]

Chapter-10



Grace Lalthazuali POV



"Haw i tum lo a mi?" Ka tih sep chuan nuih zat hmel fe in min rawn en a, "Haw turin min va han duh tawh awm em em ve a, min ngai lo hle mai" lei chu ka chhuah zeuh a, "Chutiang lam pawh a nilo, hnathawh tur i la nei in ka hre sia" ka ti leh tawp a, "Khakha chu a hmanhmawh thlak loh, ka lak atangin i in la hrang tlat bawk nen ka ngai tawh che ka tihkha" tiin ka biang chu a rawn chul zeuh a, "Hriatzuali kha kan in kar ah a rawn in rawlh leh ang tih ka hlau ber, diktak chuan kei aiin in in hriat na a rei tawh zawk a, a hrechiang zawk ngei dawn bawk che a" ka ti leh sep a, "Duati, kan in rin tawn na hi a pawimawh ber, tupawn engpawh lo sawi rawh se, kan in kar hi kan tih buai tir tur a nilo, i hrethiam tiraw?" A tih chuan ka bu zeuh a.




"I mut a chhuak tawh a nihkha, pawn thleng in kin thlah dawn em ni, in ka thlen hunah ka rawn hrilh dawn che a nia" ka ham bai bai lai chuan a ti a, ka dang duh lem lo, ka mut a chhuak tawh tak tak, pawn thleng chuan ka thlah a, nidang angin kan in thlah rei lem lo, a tlan liam thleng ka en tur thu ka sawi pawh in lut hmasa turin min ti tlat bawk nen in hnial buai leh ai chuan keimah zawk chu ka lut ta tawp a, ka nui var var bawk, kan in kar buai na te kan sawi fel ta bawk a, tlem chuan thawk a veng ta deuh, chutih rual in buai na tamtak kan la hmachhawn dawn tih ka hailo, buai na lo thlen hun a chak taka hmachhawn tur a lo in puah chah ka ngai a ni.


...

"Mike duhtawk teh, a za a nia aw" office ah chuan kan in chhaih nui kar kar a, kawngka kik ri a rawn awm takah chuan kan in siamtha nghal vat, Mike-a pawh chu a thutna lamah a phei vat a, "Sir, Pu Chhuanmawia a lo kal a, biak che a duh a ni awm e" hnathawk pakhat hian a rawn ti a, "Rawn luh tir rawh" a tih nghut hnuah keichu min rawn en in "Kan la chhunzawm ang, i tan hmasak a nia, keiin a tawp na ka siam thung ang" tiin mit min rawn siai zeuh a, ka lo chhiat khum zeuh, Pu Chhuanawma chu a tih pa chu a rawn lut a, Pu a tih vang khan upa viau turah ka ngai a nia, Mike-a nen an in rual khat viau in ka ring.




"Enge tun ang chhun ah te i rawn kal ve teh mial a?" Mike-a chuan a ti nghal sup a, an in nel hmel hle, "Zanin kha i theihnghilh ang tih ka hlau a rawn hrilh tur che in ka rawn kal" tiin keichu min rawn en a, "Oh.. hnathawk thar i nei maw?" Tiin ka thutna lamah chuan a rawn kal a, a nui sang bawk nen a nelawm hmel hle, "Chibai le, ka hming chu Lalchhuanawma a nia" tiin ka chibai theih tur chuan a kut chu a rawn lek chhuak a, ka chibai rual chuan ka hming ka sawi sap a, "Thiana hnathawk thar chhelo deuh i nei tih te chu min hrilh ve tur che a nia" tiin Mike-a lam chu a hawi leh a.




A thianpa lah chuan melh ngur chungin "Chhuanawm a ni kha chu i hnaih theilo" a lo ti hmuk thung, Chhuanawma pawh chuan a thusawi hrethiam takin a nui hawk a, "I che rang hle mai, engpawh nise a ni pawh hi i lo hruai ve dawn nia, kawp pui hruai tur kan ti tho bawk a, kan thian dang te bulah pawh in hmelhriat tir na te i nei ve ang chu, ka kal ange, helamah ka rawn kal remchang bawk nen ka rawn lut kawi lawk mai mai a nia" tiin Chhuanawma chu a chhuak lehnghal a, a mizia kha a thawven ve hmel hle mai, chutih rual in a zahawm khup thung a, Mike-a nen chuan an mizia a dang hlak.




"I enzui duhtawk tawh em?" Mike-a tawng ri ah chuan ka phu zawk a, "Enge maw i sawi le?" Lungawi loh hmel fe chuan min lo en run tawh chu niin "Chhuanawma chhuak ta kha i enzui nasat em kha, chhelo i ti em ni?" A ti leh hmuk a, kei ka lo nui hak thung, "I ti awm ang lo e a, engvangin nge chhelo ka tih ngawt anga, a ni ai chuan chhelo ka ti zawk che" ka tih pawh chuan a la tum lian hle, "I titau a mi a, ka ti tak tak a ni kha chhelo ka ti miah lo a nia, ka la hmu ngai silo a chuvang mai mai alawm, chuan zanin chu khawiah nge i kal dawn a?" Tiin zawhna dang chu ka zawt ta daih a.




Tun hnai te hi a mizia a thlak ka ti dawn nge tihtauh te hi a ching riau a nihchu, a in hmeh lo ka ti tak tak a ni, "Chhuanawma kha a birthday a nia, kal ve turin min sawm a nihkha, chuan keimah chauh in ka kal dawn lo, nangpawh i rawn kal tel ve dawn alawm" a tih chuan ka lo hnial vat a, "Chutiang a chi loh, ka u in zan chhuah a phal vak lo hrim hrim, nangmah in kal mai rawh" ka tih chuan a nui suk a, "A tha alawm, keimah in ka kal mai ang, hmeichhe tamtak an kal ve ngei bawk anga" rum zetin ka melh a, min tih thinrim hi nuam a ti ve hrim hrim, chhan pawh chhang let peih tawh lovin ka phone chu ka khawih san daih a, a nui hawk ri chu hre mah ila a lam chu ka hawi duh tawh lo.




"Ka duat i tau em ni?" A tih pawh chuan ka chhang duh eih lo, "Duati" tih pahin ka bulah chuan a rawn ding a, "Kalsawn teh, i ninawm" tiin namsawn mai ka tum a, ka theilo chiang a sin, "Zanin chu.." a tih lai mek chuan "Aw aw.. nangmah in i kal dawn nia, i duh leh hmeichhe chhelo deuh deuh te nen chuan va in ti hlim rawh u, keichu min ngaihtuah suh, ka tha" ka ti hmak hmak a, chutah rawn thu hniam in min rawn kuah nghal thuk a, ka che sawn duh lem lo.




"Hetia ka laka i thikthu I tih chhiat hian nuam ka tih zia i hrethiam lovang, min duh ve tak tak tih ka hriat chian phah thin, chuan zanin chu ka rual in kal rawh aw, i tello chuan nuam ka ti dawn lo a nia, bakah hmeichhe dang ka bula awm tur i ven a ngai alawm, i thikthu hi a chhe ve hlir hler bawk sia, tau thlem ka thiam loh zia i hriat kha" tha deuh a min sawm ve mai awm hi a nia, hepa hi chu a va han sual thiam ve chiang tak aw, "Ka thik aw kawng lovang" ka ti leh vak a, a nui chhuak hawk hawk, ka thusawi chu a awih hlawl lo tih ka hre mai, a awm ve tho e, a thikthu chhiat thu min hrilh tawh a, mahse keimah zawk hi ka thikthu a chhe fe zawk.




"Zanin chu aw" ka dar a khabe rawn nghah pah chuan a ti leh sup a, "Ka u hian chhuah a rem tih pawh ka ring chiah lo, bakah amah chauh a in a awm tir chu ka ngaih a tha chiah lova" ka tih sep chuan "I u chu keiman ka lo dil mai dawn em ni, kan haw har lo anga, kal loh aiah kan kal mai mai dawn nia, ka phur lutuk bik chuang lova" a tih leh takah chuan "Awle, a tha alawm, kal ka lo tum ang, chuan ka u chu keiman ka be mai ang" ka ti ta zawk a, in thleng chuan min thlah a, min rawn lam leh tur thu a sawi hnuah a in khalh chhuak lehnghal, in chhung a ka luh chuan ka u rawng lo bawl lai chu ka hmu nghal zat a.




"U zanin chu chhuah na tur ka nei a" ka ti nghal thawr a, "Khawiah nge i chhuah dawn?" A lo ti nghal vat, tunlai boruak ralmuang loh lutuk vang hian zan lamah chhuah hi a rem ti vak lo hrim hrim a, "Mike-a thianpa birthday a nia, lawm naa kal turin min sawm ve a" ka tih chuan "Mike-a a kal dawn te chuan a tha alawm, mahse rawh haw tlai lutuk lo la aw, tunlai kan Mizoram boruak chu i hriat chian kha" a tih takah chuan room lamah in thlak turin ka lut vat a, ka zawh hnuah ka u pui tur chuan ka chhuak zui lehnghal.




Engtia in chei tur nge pawh ka hrelo, Mike-a sawi hmangah kha chuan party pui tham ve deuh tur a ti sia, kekawr har chu a mawi chiah in ka ring bawk silo, "I la in siam nange, Mike-a a rawn thleng tep tawh a nilawm ni?" Room a rawn luh pah in ka u chuan a ti a, "U enge ka hak ang, kekawr hak chu a ni bawk silo a, kawrfual the ve deuh hak tur pawh ka neilo" ka tih chuan a thawmhnaw bawm chu a hawng a, "Kha heihi ha rawh, i in hmeh ngawt ang" tiin kawrfual pakhat chu a rawn la chhuak a, "A thar a mi, ka la hnu ngai miah lo" tiin ka in teh vel chhin a



"A thar chu ni chiah lo ve, Mami min pek a nia, kawrfual ka ha ngai vak bawk silo nen tikhan ka dah ta reng a, ha rawn, kei aiin i in hmeh zawk ang" a tih takah chuan ka lawm hle, kawrfual senno a ni a, ka khup a khuh zan bawk, tlem in a puk ve deuh laih a, a awm pawh a zau lem lo, ka in chei sa vek tawh bawk nen kawrfual hi ka ha anga ka hman nghal a nimai, "Chu Mike-a a rawn thleng tawh a niang, in ha vat vat la i rawn chhuak vat dawn a nia" tiin ka u chu room atangin a chhuak nghal a, keipawh chu hmanhmawh deuh in ka che zawm ve nghal.




"Hei matei pawh a hman ta alawm, kal nghal mai rawh u, Mike rawn haw har pui lutuk lo la aw" ka u chuan a ti nghal mawlh mawlh a, Mike-a pawh chuan tha deuh in a lo chhang ve mai bawk, motor ah chuan kan chuang lut a, "I chhelo hle mai, mahse i sam kha thlah la i in hmeh zawk ang" ka sam sang taka ka tawn chu a duh vak lo aniang, "Khua a lum bawk sia, tihian ka lang felfai zawk alawm" ka sawi zo chiah tih chuan min rawn hnaih thut in ka samtawn na chu a rawn pawt thla daih a, "Tikhan a nalh zawk, i nghawng sexy tak hi tuma hmuh ka phal hleinem" tiin a nui suk a.




"I va han over ve chiang tak e aw, tuman min melh peih lovang" ka ti hlak, party na hmun tur chu kan thleng a, rin ai daih in thawm a tha, mi an kal tam aniang, "An va han tam hmel em em" inchhung a kan luh hma chuan ka ti a, "Tam ang, Chhuanawma hi chu mi biang biak a thiam a, thian pawh a nei tam alawm" a ti mai a, "Duati ka bulah awm tlat rawh aw, mi an tam dawn a, hmelhriat loh hnaih vak chu a ṭhalo" ka kut ah chuan min rawn kai a, inchhung lamah chuan kan in zui lut nghal, an chhelo hlawm ngei mai, thalai kal khawp tih takah boruak pawh a zang halh bawk.




"Mike in lo thleng thei maw, Grace nuam ti deuh khan awm tum la aw, saw sawlam ah sawn midang pawh an awm, rawn thleng tur an la awm nual a, kan lo lawm ange" tiin a kalsawn a, "Lo kal rawh, ka school kalpui te ka hmelhriat tir ang che" tiin kil lam deuh a mipa leh hmeichhia lo thut thup na lam chu min pan pui a, Mike-a chu an lo ve nghal mawlh mawlh a, keipawh chu a bialnu ka nih thu a sawi nghal bawk, mipa ho chuan Mike-a chu an chhaih zeuh zeuh a, an hmeichhe pathum an lo awm ve bawk a, pahnih chuan nui sang in min en a, pakhat erawh chuan min lawm ve hmel lem loh.




An bulah chuan kan thu thla a, Mike-a chuan thei tui min laksak thlap bawk, "In in hmeh hle mai, Bro hetiang taka hmeichhia i care hi kan la hre ngailo, Grace-i hi i tan a special hle a ni ngei ang" an zing a mipa pakhat chuan a ti a, "A dik alawm, a ni hi ka nun a rawn lut tawh zing ah chuan a tha ber tih ka sawi ngam" Mike-a lah chuan in la zei fahran hian a lo ti a, an thawm chu a tha ngei mai, "I hmeltha e, i vun a nalh bawk si" hmeichhe pakhat chuan a lo ti ve leh a, "Ka lawm e, mahse i hmeltha daih zawk a nia" ka lo ti ve vat, min nuih var var a, a fel hmel hle.




"Engtia in tawng nge in nih hrim hrim a, Mike-a hian bialnu a nei tih kan lo hre bawk silo a" min lawm loh hmel deuh nu khan a rawn ti ve khauh, "Chutiang in zawh a ngai em ni, Mike-a te chu a tawng duh lo ve hrim hrim a, tuna kan hre chauh pawh hi thil mak a ni hleinem" nichin Amin be lo tu zawk hmeichhia chuan a lo ti ve khauh a, thian ho vek chu an nih ka ring a, mahse an in ngeih hmel lem loh ka ti, ka ngaihdan mai mai a nihchu, "Mike-an bialnu a nei hi mak ka ti, hmeichhe lam reng reng a ngaihsak tawh ngai silo a" a ti leh hram a, engtin vak ka chhang duh lem lo.




"Grace, kan mipa ho hi lo in kawm se keini chu washroom lamah kan kal lawk dawn mi niang?" Fel deuh khan a tih chuan ka hnial lem lo, a lum bawk nen in tih daih ka duh hrim hrim, "Washroom ah kan va kal lawk ang aw, ka rei lovang" Mike-a bulah chuan ka ti sep a, "Awle, rei lo la, chuan hmundang ah kal miah suh ang che" a tih chuan "Ti teh Mike keimahni alawm min zui dawn, khatianga hauh tung te chu, nakin lawk ah a ning mai ang che" ka nel loh ber ni chuan a lo ti ve leh, Mike-a chuan a thusawi chu engah a ngai vak lem lo a niang en pawh a en lo hrim hrim.




Washroom lamah chuan kan in zui ta dual a, "Engtinge Mike-a nen chuan in in tawn a, a landan ah hi chuan in la in hriat chuan hmel vak bawk silo a?" "Nupui, chutiang zawh vak a ngai emaw ni le, engtiang pawn lo in tawng se kan buai na tur a ni hlei em, in hriat chian loh tih vel mai mai a ho e, an in kawp rei anga, an in hrechiang chho tial tial dawn alawm" pakhat chuan a lo ti leh vat a, an hming ka la hre miah lo, mahse zawhna min zawt peih deuh tu hi chu Nupui a ni tih ka hre ta phawt a, "In hming ka la hre miah lova" ka ti ta tawp a, in biak mawl tawp hi chu a mawi lo bawk nen an hming chu ka zawt a.




"Oh.. min hrethiam rawh, kan hming sawi nachang pawh kan lo hre hleinem, keihi Apuii ka nia, chuan a ni hi Ziri, Nupuii kha chu i hriat tawh tho ka ring" a rawn ti nghal vat a, "I kawr hak chu i in hmeh hle mai, mahse a hmel en atang kha chuan a to vak dawn lo a nihkha mawle" Nupuii chuan a rawn ti leh tawh, "Nupui a mak, tha taka i be theilo a nihchuan lo ngawi ngam mai tawh, bakah thawmhnaw man to leh to loh hian engmah kawng ro a si lo, a ha tu in a in hmeh chuan a tawk, chumi aia pawimawh zawk chu chhungril hi a ni, thawmhnaw man to deuh deuh in bel chhungril kha fak si ai chuan thawmhnaw man tlawm in bel a chhungril hausa tlat te hi an awhawm daih zawk" Ziri chuan a ti nghat nghat a, Nupuii chu lungawi loh hmel deuh in a chhuak nghal nal nal.



Zawmna



"Nupuii kha chu engah mah ngai suh aw, a zia ve hrim hrim a nihkha, thian ho vek mi mahila a ni kha chu ngaihkhat ah kan ngai vek tawh keini pawh hian" Apuii chuan a ti sap sap a, nuam lo ka tih phah ang tih an hlauh hmel hle bawk, "Ka hrethiam alawm" ka ti mai a, "Mike-a khan a duh hmel ropui che sia, nangmah i hmeltha in i fel hmel bawk si, in in hmeh kan ti teh mai nia aw, in then reng reng suh u" Ziri lah chuan phur zetin a lo ti ve vat a, "In hmeh min tih chu ka van lawm, midang hian in hmeh min ti vak lo a sin" nui ver ver chung chuan ka ti ve leh a, "In hmeh ti lo tu cheu chuan an thin che tihna a nimai, kan sawi chu awih tawp rawh" an ti leh a.




Washroom atang a kan chhuah hnuah kan thut na ngai lam chu kan pan a, ka thut naah Nupuii kha a lo thu than a, "Lo kal rawh kan bulah i thu mai dawn nia" Apuii chuan tiin a thut na lamah chuan min kai nghal a, Mike-a chu a thiante nen an titi tui hmel hle, a chang in min rawn melh leh zawk zel a, a bul a ka thut loh vang chuan ka thinrim hran lo, Apuii te bula thut nuam ka ti daih zawk hrim hrim a, an vai chuan beer an hun far hlawm a, Apuii leh Ziri te pawh chu an bang lo, "I in ve duh lo a mi?" Ziri chuan a rawn ti sar sar a, "Ka in ngailo a" ka tih chuan "A that chu, keiin zawng kan in na a rei tawh bawk nen nghei mai hi kan harsat tawh a, mahse nghei chu ka tum ve tho a nia" tiin a nui hak a.




"Nia hmeichhe zu in tih vel hi chu a mawi lo bawk sia, a tir ah kan in chhin a, kan in zel a kan zawng chhang ta daih a, tih ve loh hi a tha ber mai, kan in vang hian midang zilh thei chu kan ni miah lova, mahse i in min rau rau chuan in duh miah suh, keini ang hian i awm ve daih mai ang" Apuii pawh chuan a lo ti vat a, "A.. hetia mipa bul a awm reng chu a nuam lo, bakah an thusawi ah hian sawi ve tur kan hre bawk silo a, hmin dang ah kan va kal mai mai dawn a mi, Grace i peih ve em?" Ziri chuan a ti hluai a, pawi ka ti hran lo.




"Khawiah nge in kal dawn, in rawn let chauh amaw tia?" Mike-a chuan kan din rual rual in a lo ti nghal a, "Pawn lamah kan fak harh dawn, inchhung chu a uap emai, kan rei lovang" tiin Ziri chuan a lo chhang vat a, Mike-a ngaihdan chu a nih hmel vak loh, "Kan reilo ang, a lum bawk sia, pawn lama kal chhuah hrim hrim ka duh" ka tih takah chuan engmah a sawi buai duh ta lo, "Mike-a over zia kha, khatiang em em a han ngaihtuah che, a bialnu ni lovin a fanu i ang zawk hial alawm, mahse a nuam ngawt ang" pawn lama kan chhuah rual rual chuan an ti nghal bawrh bawrh a.




Nichin khan an in ve nual bawk nen a hma zawng aiin an tawng duh a mahse an bula awm nuam lo ka tih phah chuang lo, "Awi.. ka luak a chhuak lutuk" tih pahin Apuii chuan a ka a hup a, "Hei i luak ringawt ange aw, enge i in ve vak zel" Ziri chuan a lo ti nghal hlak hlak, "Washroom ah kal ka ngai" tih pah in a tlan sawn nal nal a, "A va han buaithlak thin tak, a ni hi chu buaipui a ngai ve ziah, a lo va chatthla daih ang tih te a hlauhawm sia, ka va buaipui ange aw, nangmah in i lo awm hreh em, i duh chuan lo va lut la, kan lo lut ve vat ang" Ziri'n a tih chuan "Min ngaihtuah duh suh, reilote ka awm leh anga, ka lo lut ang" tia ka chhan takah chuan a kalsawn ve vat a.




Keimah chauh a ka awm takah chuan a hmin vel chu ka en kual a, picnic spot chu a nih hmel loh, chawlh hahdam na a ang zawk mah, Mike-a khan Chhuanawma te chhungkaw ta a nih thu min hrilh tawh a, an chhungkua chu an mi hausa tak an ni tih a chiang reng mai, chutia keimah te chauh a ka lo thut lai chuan ka bulah mila pakhat hi a rawn thu ve a, ka en vat, ka hmuh ngai awm pawh ka hrelo, "Ka ti buai che em, inchhung lam chu boruak a rit lutuk a, thli fim dawng turin ka rawn chhuak harh lawk a nih hi" a ti sup a, "Pawi lo ve" ka ti ringawt.




Zu rim lah chu a nam rum tum bawk sia, diktak chuan nuam ka ti zan tawh lo, keimah chauh a ka awm khan nuam ka ti a sin le, "Nichin khan ka lo hmu tawh che a, nidang ah ka la hmuh ngai awm che pawh ka hrelo" tiin min rawn be leh a, "Um.. ka thianpa in min hruai ve a" ka ti leh mai, min biak reng avang hian han thawh chhuah san mai pawh a theih loh, min rawn thut hnaih tial tial in ka hre lehnghal a, min rawn hnaih anga ka hriat apiangin ka tawlh phei ve zel bawk nen thutthleng hmawr te ah bak chuan ka thu tawh lo, ka hriat ngai pawh a ni silo a, min nel mah mah in ka hria, a mitmeng lah hi zu mai pawh nilo thil dang rui a ang ka ti bawk nen kalsawn vat chu a tha zawk in ka hria.




"A nih chuan ka va lut tawh ange, pawn lamah ka awm rei tawh bawk nen ka thianpa in min lo zawng tawh ang" tih paha thawh chhuah mai ka tum chu ka kut ah a rawn man avang chuan ka tawp chawt a, "La awm ve rih la, kan la in kawm dawn alawm, inchhung lam chu mi an tam a, tuman an ngaihsak vak chuang lovang che" nui sung chungin a ti a, "Ka va lut tawh zawk ange" tih pah a ka kut thin thlak ka tum chu a lo vuan nghet sawt, "Min thlah rawh" ka ti chang fak a, "I chhelo hle mai, ka duhzawng tak i ni" tiin ka chhip atanga ka ke ler thleng chuan a en chhuak dap a, "Min thlah rawh ka tihchu, ka au vak hma hian" ka ti leh a.




"I duhtawk in au rawh, mahse tuman I au ri an hre lovang, inchhung lamah music ring takin an play a, tuman I au ri an hre dawn chuang lo, hetia in hnial buai lo hian in hriat chian kan tum zawk dawn em ni, kan in mil dawn riau in ka hria, nang ang hmeichhia hi ka duhzawng tak in ni" tih paha min en te chuan ka ten hluah hluah, "Min thlah rawh, i ngaih ang hmeichhia ka nilo a nia aw, chuan hetianga hmeichhe chunga chet hi a la viau lo bawk" thinrim tak chuan ka ti nghat a, ka hlau viau bawk, mahse ka hlau tih ka ti lang duh chuanglo, min zuam sawt palh ang tih ka hlau a ni.




Min vuan reng chung chuan a rawn ding chhuak a, "Ngeng viau duh suh, nangni ang hmeichhia hi chu ka hrechiang alawm, duh lo ang deuh in in lang a, mipa in kan thlem kan thlem cheu chuan in tlu duai duai thin tho tih ka chiang ve alawm, chuan zanin hian chhuah che ka tum hauh lo bawk" tiin min rawn hnaih sauh a, ka hlauthawng takzet tawh, "Ka kut hi thlah rawh, i duh ang ang a i khawih tur ka nilo, hetianga i che lui a nih chuan buai na i tawk ngei ang" ka ti leh fak a, "Ka hlauh i ring em ni, engmah hlauh ka neilo, nanghi ka chhuah dawn lo che" a rawn ti leh.




Chutah rawn che thut in ka nghawng vel ah chuan rawn fawh a tum ta mai, duhlo lutuk chuan ka lo tal a, rui viau mahse a tha chu ka hneh chuang lo, ka tih ngaihna hre tawh lo chuan a hmai ah ka beng ta pawp a, a thle ve sawk mai, "Nang hmeichhia" tih ṭhawt pah in ka sam ah chuan a rawn kek dak awrh a, a na lutuk chu ka te nghal that, "Aih.. min kaltir rawh, ka duh lo" ka ti nghal ruai, ka thusawi chu hrelo ang hmak a awm in hnun fal leh thim lai deuh ah chuan min pawt lut zui a, chhuat ah chuan min bawh bet in ka hawt te chu a pawt thler nghal thawt thawt.




"Aih ka duhlo, hetiang hian ti suh, i tan a pawi thei a nia" tiin ka in lo dang ve tang tang, "Kut min thlak vang hrim hrim khan nanghi chhuah tum na che ka neilo, hmeichhia mai mai lehnghal" min ngainep hmel zet chuan a ti leh hmuk a, rui ang pawn a awm tawh lo hrim hrim, ka bra chhan ah chuan ka hnute te chu a rawn tham salh salh a, chumai pawh duh tawk lovin ka nghawng vel chu a fawp kual ruai bawk si, hetiang thil hi ka chungah a thlen ka ring lo hrim hrim a sin, ka au vak vak a, mahse tumah min chhan turin an rawn kal silo, Mike-a chu ka au mawlh mawlh a, mahse a rawn lang thei bawk silo.



Mike Lalruattluanga POV



Duati te rawn let har lutuk avang chuan ka ngaih a tha tawh lo hle, mahse a bulah Apuii leh Ziri an awm bawk a, chhuah ve kher chu tul in a hrelo, ka thiante nen chuan kan hna lam te kan sawi a, chutah Apuii te pahnih chu kan bulah an rawn kal a, Duati hmuh tur a awm ve lo, "Khawiah nge Duati a awm?" Ka lo ti vat a, "A rawn la let nange, Apuii hi a luak chhuah vangin kan kalsawn a, a rawn kun ve vat tur thu kha a sawi a sin" an tih chuan ka tho chhuak vat a, "Mike i ngaihtuah leh lutuk a nihkha, puitling alawm a nih tawh, a rawn lut ve vat mai ang" tiin Nupuii chuan ka kut ah a rawn vuan vat a.




A kut chu dim lem lo taka thing thla sawk in pawn lamah chuan ka chhuak nghal, Ziri chuan min rawn zui vat bawk a, "Khawiah nge nichin khan in awm?" Ka tih nghut chuan "Saw sawlam ah sawn a nia" tia a kawh takah chuan ka kal vat a, Duati reng reng hmuh tur a awmlo, "A awm bawk silo a, khawiah nge a awm ang, tumah hriat a nei silo" ka ti sup a, Duati hmel hmuh tur a awm lo chu ka rilru a hah takzet, "Inchhung khawi emaw ah a awm a nilo maw, heta a awm siloh chuan kalsawn vak na tur a awm silo a" Ziri chuan a lo ti sep a, "A ni maithei, ka va zawng ange, midang bulah lo va kal rawh" tih paha inchhung luh mai ka tum chu Duati aw ang deuh ka hriat ruai vang chuan ka tawp chawt a.




"Mike enga tinge i din leh daih a?" Ziri in chhung lut tep tawh chuan a rawn ti a, "Duati aw ang deuh ka hria" ti supin thawn chu ka ngaichang a, mahse hriat tur a awm tawh lo, ka bengchhe di a nih ka ring leh ta deuh zawk a, ka pen leh tur chiah chu Duati aw ri bawk chu ka hre leh a, nilo ka hriat sil chu a nilo tawp, in chhung ah nu lovin pawn lamah Duati a awm chiang a ni, ka hawi kual a, tumah hmuh tur an awm bawk silo, "Mike" Ziri bawk chuan a rawn ti leh a, "Duati aw ka hria, pawn lamah hian a awm chiang a ni" ka tih chuan ka bulah a rawn kal hnai vat a, "Thawn engmah hriat tur a awm loh hi, i hriat sual mai mai aniang, lo kal rawh lut ila kan zawng dawn nia" a tih pawh chiah ngaihthat loh na in min tuam tlat a, ka kalsawn theilo.




Ka hawi kual a, ramhnuai lam chuan ka mit a ka deuh tlat, "Khawiah nge i kal dawn?" Tih pah in Ziri chuan min rawn zui ve zel a, "Duati ka zawng dawn, sawtah sawn eng emaw a awm tlat in ka hria" ka tih chuan "Sawifiah thim lutuk ah sawn a kal ngam lovang, in chhung lamah a awm ka ring zawk, lut ila zawng vat zawk ang, kan thut na lamah khan a lo let daih tawh pawh a ni thei a sin" A tih pawh chuan ka ngaih a ṭhalo sa in ramhnuai lam sawn ka rilru a la peng laklawh a va en fiah hrim hrim ka duh, Ziri pawh chuan engmah sawi tawh lovin min zui ve mai a.




A thim tak em avang chuan phone light chu kan on a, Ziri chuan s hlau deuh aniang min rawn kal hnaih sawt sawt a, chutah le kan kal thui ta deuh a, thawm ri deuh ruk ruk chu kan hre leh a, Ziri pawh chuan a hrechiang tih hriat takin ka ban ah chuan a rawn vuan vat a, thawk la ri te pawh chu chiang takin a hriat theih, thing buk phen ah sawn tu emaw chu a awm chiang a ni, "Ziri hetah hian lo awm tawh, ka va en dik ange" ka tih chuan min hnial lo, chutah le, ka thil hmuh avang chuan ka mit nghal sulh a, enge ka tih pawh ka hre hman lo, Ziri au ri tung thawm chu ka hre vuai vuai chauh a ni.




"Mike, duhtawk rawh, i that thei mai ang" tih pahin ka ni khawih pa ka thut neh na atang chuan ka tho chhuak nawlh a, ka harhfim ta deuh, Duati lam ka va en chu Ziri'n a lo kuah a, a thlabar hmel hle bawk, ka thiante chu an lo kal khawm vek tawh chu niin engtik laiin nge an rawn thlen pawn ka hrelo, Ziri hian a phone pawh a ni mahna, ka sawisak pa chu thi hnuang chungin lei ah a mu sawp reng a, hei ai na hian khawih ka la duh, engtinge ka hmeichhe chungah khatiang thil kha a lo tih ngam zawk, nichin a ka thil hmuh kha ka mitthla let a, chhuat a mu sawk nuai mai na tuar tih hriat taka rum vawng vawng mai chu khawih leh mai tum in ka hnaih lehnghal ruak laiin ka thiante chuan min lo dang nghal vat a.




"Mim thlah rawh u, he mihring phiangsen hi ka that dawn" ka ti ṭhawt a, "I thinrim na kha thunun tum rawh, tunah chuan Grace-i hian a mamawh che" Chhuanawma pawn chuan a rawn ti ṭhawt a, Duati ka en chu a mit atang mittui a luangthla ngiai ngiai chungin min lo en kar a, a kawr thler nuaih chu chu puan in a khuh ve tawk tawk bawk, Duati lamah chuan ka kal vat a, "Engkim a tha vek, i bulah ka awm tawh a nia, tuman engtin mah an tih dawn lo che" ka ti sup sup a, "Ka hlau lutuk a, ka au vak vak a, mahse tumah min chhan turin an lo kal silo a" a ti bah nawk nawk a, a aw ah pawh chuan hlauh na in a la tuam hneh zia hriat hmaih chi rual a nilo, chu chuan mahni in thiam loh na nasa tak min neih tir a ni.




"Heta awm reng zawng a ṭhalo e, eng lai deuh ah kal ila kan sawifel zawk dawn a nia" Chhuanawma bawk chuan a ti leh a, Duati chu pawm nawlh in ka kalpui a, midang pawh chuan min rawn zui ve nghal, in pawn lama awm ngawt chu in chhung lama awm te kan ti phawk lek ang tih leh Duati a mualpho ang tih hlau in in te lam ah chuan kan kal a, kha mihring phiangsen pawh kha Chhuanawma ten an rawn kal pui ve bawk, "He mihring hi khawi a mi nge a nih?" Ti hmuk in thutthleng a thu ner deuh sawk sawk chu ka en ngur a, ka khawih na avang nge pawh ka hrelo a harh chian loh hmel hle bawk, Duati chu Ziri leh Apuii'n an awmpui thung.




"Ka hre chiah biklo, engtinge helai hmunah a rawn kal ve pawh ka hrelo" Chhuanawma chuan a lo ti hluk a, "I thiltih pawi zia kha i hria em?" Tiin a thut na chu ka tlawh deuh sawk a, chhuat ah a let thla nghal tawp, "Min chhang rawn, nang hian ka hmeichhe hmangaih hi engtinge tih luih na hmang a I lo khawih ngam zawk?" Ka ti leh ṭhawt a, ka khawih leh mai hlau in ka thiante chuan min rawn din hnaih nghal ruak bawk, khawih chu chak viau mahila Duati ka ngaihtuah avangin ka in sum hram hram a ni, chutih rual in chhuah mai mai ka tum hauh lo thung.




"Kha hmeichhia khan kut min thlak hmasa a nihkha, a phu tawm chiah a ni" a rawn la ti ngam zu nia, "Engthu maw i sawi kha?" tih leh a kawr awm a tham chu ka rual a, ka pawt tho nghal lawp bawk, "Kha hmeichhia" a tih leh lai mek chuan ka kut chu ka lek kang uai a, "Mike, lo kal teh, Grace-i thawk dan hi a diklo a nia" Ziri'n a rawn tih that rual chuan chupa kawr awm a ka tham lai chu thlah sawk in Duati lam chu ka pan vat, "Damdawi in lamah hruai vat chi a nih ka ring" Ziri bawk in a tih leh lai chuan "Duati i bulah ka awm aw, engmah hlauh tur a awm lo, ka tihpalh keimah vang vek a ni" ti sup sup in ka motor dah na lamah chuan ka pawm phei a.

Cont....


Hei aw zawmna, naktuk zanah a awm dawn bawk e...