We Belong Together BY Becca Lnz (Completed)

[Rebec Nunziri]

Chapter-11



Mike Lalruattluanga POV



Motor chhung ah chuan dim zetin ka thut luh tir a, ka awm hrang tur chu ka kawr ah a ham tang a, "Min kalsan suh" thlabar hmel zetin min en ran bawk, ka kuah leh a, "I bulah ka awm tlat dawn alawm, ka venghim tlat ang che" ka ti sup sup a, ka bulah a awm tawh a, hmaih tur engmah a nei lo tih hria se ka duh ber, eng ang chiah in nge a thlaphan ang ka ngaihtuah thiam lo, ka hming lam in a au vak vak ngei awm sia, helai hmun ah tumah hmelhriat a neilo tih hre reng chungin engtinge ka lo kal fal tir zawk ni, he thil hi keimah vang vek a ni, a bulah awm tlat ila chu hetiang thil hi a thleng lo nimai tur.




"Ka tihpalh, i bula awm tlat tur ka ni a sin, sh.. tap tawh suh le, i bulah ka awm tawh a nia, tuman an ti na thei tawh lo che, phal pawh ka phal bawk lo" a lu a chul pah chuan ka ti a, "Helai hmun ah hian ka awm duh tawh lo, min haw pui rawh" a rawn tih sep chuan a hmai ah ka khuap a, "Awle, in ah kan haw dawn a nia aw, engmah hlau lo la, i bulah nangmah venghim tur che in ka awm tlat a nia" tiin a chal ah ka fawh sak vang vang a, a tha khur der der chu ka hriat hmaih lo, "Duati inah kan haw dawn nia aw, engmah hlauh tur a awmlo ka tih tawh kha" tiin a kawr teh hnuang chu ka en zeuh a, ka rum chhuak nghut, ka coat chu phelh sawk sawk in ka hak tir leh te te hnuah driver seat ah chuan ka thu lut a.




"I tha deuh tawh em?" An in lam kan pan lai chuan ka ti sup a, a ngaihtuah na a kal bing viau aniang ka aw a hriat rual khan a phu deuh zuk a, "Ka tihpalh tih phut che kha ka tum a nilo" ka ti leh a, "Ih.. enge i sawi?" A tah na avangin a mit chu a bui i deuh chuk bawk, "Thil pawimawh a nilo, hahdam tak khan awm tum la, tui i duh em?" Ka tih chuan lu a thing a, "Hetah hian ding lawk la, ka u in hetianga min hmuh hi ka duh lo" a tih chuan kawngsir rem laiah motor chu ka ti ding a, ngun zetin Duati chu ka en a, mit chhing chungin a thaw deuh ham ham a, ka lainat na leh mahni in thiam loh na in ka khat zual ting mai.




"Duati" ka tih sup chuan rawn meng chhuak in mittui tling pam chung chuan min rawn en a, "Ka hlau lutuk a, ka au vak vak che a, i lo kal tawh dawn lo emaw ka ti hman alawm, ih.. englo khapa khan ka duh lo chung ka chungah kha.. khatiang" a ti bah nawk nawk a, rilru nat hmel lutuk chuan min rawn en bawk, hetianga a awm lai hmuh hi ka tan thil hreawm ber a ni hial ang, rum chhuak hrawk chungin motor kawngkhar chu ka hawng a, Duati awm na lamah chuan ka kal vat, pawm nawlh in motor hnung lamah chuan ka kalpui a, "Duati, i bulah ka awm tlat dawn ka tihkha aw, engmah hlauh tur a awm lo, i bulah ka awm tlat tawh dawn, khatiang thil kha a thleng nawn tawh lovang" ka ti sup sup a.




"Ka ngen a, khatianga ka chungah tilo turin ka ngen lawm lawm chung pawh in engah mah a ngai duh lo, tinge i rawn lan har em em, khapa khan ka chungah engthil chiah nge a tih i hria em?" Tiin ka awm ah chuan hmai a phum a, "Ka tihpalh ka thiam loh vek a ni, ka duat, ka tihpalh aw, ka tihpalh lutuk, min ngaidam rawh, ka thusawi te ka tih hlawhtlin loh avang hian ka in thiam thei tawh ngai lovang, Duati min ngaidam rawh" ka ti mawlh mawlh a, a ri meuh chuan a tap chhuak ta hawm hawm a, ka chhungril tawt lutuk tih thawl tum chuan thawk kan la leh hawk hawk thin, mahse awmzia a awm lo chiang hle.




"Ka taksa hi a duh duh dan in a khawih kual a sin, ka theihtawp in ka in dang ve alawm, mahse" tiin s tap chhuak leh a, "Ka duat ka tihpalh, ka tihpalh lutuk" a dang sawi tur engmah ka hrelo, "Ka in ten takzet, tunah chuan engmah ka ni tawh lo, nangpawh hian min la kalsan vat ang, tunah hian min kalsan rawh, ka nat zual tak tak hma hian min kalsan rawh" a tih leh chuan ka tang teuh a, "Khatiang thu kan sawi tawh suh, ka kalsan ngai lovang che, ka hmangaih che, khatiang vang khan ka kalsan che ring suh, Duati khapa khan engtin mah a khawih chhe hman lo che, chuvang chuan nangmah leh nangmah i in ten a ngailo, tenawm ber zawk chu khapa phiangsen kha a ni" ka ti nghut a.




"Tinge he khawvel ah hian ka lo pian ve le, ka pian tirh in ka nu leh pa ten min duh lo nghal a, ka u lah hrisel loh na hi a tlan biak reng a, a chhan pawh keimah vang vek a ni, lehkha ka zir theih nan a theihtawp in hna a thawk a, a taksa in a tuar ngang loh avangin hetiang hian a awm a nia, tunah hetiang hi a thleng leh a, keini mi vanduai tak leh midang taka vanduai na thlen tu mai ka nih hi, hetiang tur ai chuan ka nu khan a pum chhung a ka awm lai khan tinge min lo thah zawk mai loh?" A sawi zawh rual chuan in sum hman lovin "Ngawi hmak rawh" ka ti hrawk a, mahse ka in thiam lo lehnghal.




A thusawi khan in sum hman lovin min siam a ni, "Ka tihpalh tawngkam vin hman kha ka tum a nilo, mahse khatiang thil kha sawi tawh suh aw, ka tan hian i hlu lutuk a nia, chuchi theihnghilh ngai suh, he khawvel a i lo pian ve avang hian hlim na tamtak ka tawn ngai loh ka tawng a sin, vanduai na thlen tu anga i in ngaih na kha paih bo ang la, ka hlim na thlen tu ber i ni tih chiah ngaihtuah rawh" nem deuh zawk chuan ka ti leh a, engmah a sawi tawh lo, kan awm ngai a kan awm reng hnu chuan a thaw lak pawh a pangngai ve ta deuh, a thawmhnaw tet hnuang nen hi chuan in lamah pawh ka haw pui theilo ang, hetianga a u in a hmu a nih chuan a ngaihtuah dawn lutuk tlat.




"Duati hetiang chuan inah i haw thei lovang, i thawmhnaw hak tur dang kan buaipui phawt mai dawn em ni?" Ka ti a, "Awle" a tih takah chuan motor hma lamah chuan ka thut tir leh a, hotel lam chu kan pan leh ta phawt, "Ka u kawr ka ha bawk sia, engtinge niang, a that hlim hlak a ni bawk nen a nui ngawt ang" ka office ah chuan kan awm dun ran a, nui suk chungin a lam chu ka pan a, nui suk chungin a lamah chuan ka kal a, "Ngaihtuah buia duh suh, khatiang kawr ang chiah chiah kha ka nau te ka lo zawn tir ang" tiin a hnunglam atang chuan ka kuah vang vang a, a awmdan pawh a pangngai deuh ta bawk a, ka thaw huai mai.

...


Duati ka thlah zawh hnu chuan Chhuanawma ka call nghal, "Khawiah nge kha mihring kha in dah?" Ka ti hmuk, ka thianten police hnen a pek nghal mai tha an tih thu an sawi pawh in ka rem ti tlat lo, keimah ngei hian hrem na pek hmasak ka duh miau, "A ngai ah kan la dah, i lo kal dawn em ni?" Lehlam atanga a rawn tih chuan ka kal nghal tur thu ka sawi hnuah phone chu ka dah a, awlsam taka hrem na pek mai mai ka tum teuh lo, ka hmangaih mangang taka a siam avangin a chungah eng chiah nge ka tih ang tih hi a ngaihtuah pha hauh lo zawk ang, nichin khan thah nghal mai ka duh rum rum a, Duati awm vang chauh a in sum ka ni.




"Thiana hetianga chet chu a tha dawn emaw ni aw, police hnenah pe zawk ila, thil pawi zawk a thleng ang tih pawh a hlauhawm alawm, i khawih nual tawh tho a, na a tuar hnem tawh a nia" In chhung lama ka luh hma chuan Chhuanawma'n a ti a, "Teuhlo mai, a na tuar mai mai kha a thiltih lakah chuan engmah a la nilo" ka ti nghut, "Engpawh chu nise in sum hram hram tum ang che, a nih loh chuan nangpawh i tang daih thei a nia" a tih leh pawh chuan engah ka ngai lem lo, ka tha za lutuk hi tih reh na tur ka duh, chuchu kha mipa kha a ni bawk, in chhung ah chuan kan lut a, chair ah an lo thut tir a, a kam sir leh hnar vel chu a thi nuai bawk.




"I thiltih pawi zia kha i hria em?" Melh chhuk run chung chuan ka ti a, "Min chhang rawh" a ngawih reng vang chuan ka ti a, a chungah ka thinrim sa nen a la in la Ngeng ve khanglang chu ka ngaithei der lo, "Hmeichhia vang mai mai in kei i mipat pui hi kut min thlak amaw?" Tiin min rawn melh chho ralh a, "Hmeichhia vang mai mai ni lovin kha hmeichhia kha ka hmangaih a nih kha, chuvang chuan ka chhuah mai mai che chu ring suh ang che" ka ti leh hmuk, chutah min tham lo zetin a nui suk a, a kawr awm ah tham tho lawp in ka hnek thal nghal tawp a, ka thiante chuan min rawn hnaih lehnghal thuau tawh.




"Thiana in sum rawh, hetiang chuan harh chhuak tur a awm lo mai ang tih pawh a hlauhawm alawm, police ka ko tawh a, an rawn thleng har tawh lovang, chumi chhung chuan engmah lo ti tawh suh, i thinrim tih chu kan hria a, mahse dan in hrem na chu pe zawk rawh se" an rawn ti sup sup a, hepa phiangsen hian hmeichhia te zah na a nei hauh lo, ka hmeichhe chunga a thiltih avanga in thiam loh a hnek in a la thu rin ngam zawk a nia, hetiang mihring chunga hian zahngaih na lan tir a tul na ka hre hrep lo ve, thei ni ngat ila chu ka that hial ang.




Police te an rawn thlen takah chuan an la nghal a, "Grace-i chu enge a an?" An tih chuan a that thu in ka chhang sup a, "A pawi emai, keimahni vang vek a ni, lo chhuah pui miah lo tur kan nia" Ziri chuan a ti sep a, Apuii pawh a in thiam loh hmel hle, "Keima thiam loh zawk a ni, a duh lo chung ka rawn kalpui a, ngaihsak a a bula awm reng tur ka ni zawk a, thil pawi lutuk a thleng hman lova a lawmawm takzet" ka ti ve sup a, "Nakin ah kan rawn kan ang, lo hrilh rawh aw, ngaihdam te pawh min lo dik sak la" Apuii pawh chuan a lo ti sap a, ka lo bu nghut, awm rei tawh lovin ka in lamah chuan ka in khalh haw a.



Grace Lalthazuali POV



Zanin a ka thil tawn vang khan ka muhil mai theilo, ka thau ah min la man tlat a, ka muhil dawn chiah tih ah ka harh lehnghal zel bawk sia, ka u chu a mittui tawh hmel hle, ka muhil thei thlawt lo chu ka thu chhuak hlawl a, ka taksa lah chu a na thum mai lehnghal a, dim taka tho chhuak in bathroom ah ka lut a, hmai ka phih ringawt, mahse awmzia a awm chuang lo, ka tawh deuh up up a, ka thawk te hi a chham lo chauh, ka pangngai viau tawh emaw ka tih laiin hlauh na chuan min rawn tuam leh up up tawh mai, ka nghawng a hnu hma thar lam tak ka hmuh leh lek phei chuan ka taksa thleng in a khur chhuak thei.




Ka chunga kha mipa in a dim na nei lek lova a chet lai te chu ka mitthla ah a rawn lang let uar uar a, "Aih..ka duh lo" tiin ka beng chu ka hup a, tawp tura ka ngen lawm lawm laia rapawm zet a min nuih ri te chu ka beng ah hian a ri nawn tlut tlut bawk, chutah ka phone chu a rawn ri thut a, bathroom ah ka meng lut tih pawh ka lo hre hauh lo, call rawn lut pawh chu chhan mai na chang pawh ka hrelo, ka en reng ringawt a, mahse a rawn rik nawn leh tak hnuah chuan ka chhang ta vat a, "Duati" Mike-a aw ril ruih ka hriat takah chuna ka tap chhuak hawk a.




"Duati i tha em?" min ngaihtuah hmel zet chuan a rawn ti nghal a, "Mike, engtinge ka tih ang, ka mitthla atang hian a awm bo theilo, ka beng ah a ri nawn tlut tlut bawk si, ka hlau, khapa kha a rawn kal leh mai angem?" ka ti bah nawk nawk a, "Hahdam rawh, engthil mah a thleng dawn lo, Duati ka lo kal dawn, lo mangang suh, ka lo thleng har lovang" a tih chuan hnial ka tum lo, ka bulah min thlamuan turin awm se ka duh ber, tunah tak hi chuan Mike-a bula awm bak thlakhlelh ka nei lo.




Sitting room ah chuan ke hlang in ka thu kawm ngal a, ka phone a rawn rik takah chuan ka chhang vat, "Duati pawn ah ka awm, i lo chhuak dawn em ni?" minutes 10 vel bak a ral hman lovang, kawngka ka hawng chiah tih chuan Mike-a hmel ka hmu nghal zat a, rang zetin a awm ah chuan hmai ka phum nghal a, "Shh... engkim a tha vek a nia aw, hlau reng reng suh, tuman engtin mah an ti dawn lo che, i bulah nangmah venghim tur che in ka awm reng dawn alawm" a thusawi chuan engtiang chiah in nge thlamuan na min pek a hrethiam pha hauh lovang




"Ka pangngai tawh viau emaw ka tia, mahse" motor chhung ah chuan kan thu dun a, "Duati i hlauh na khan a la chen chilh che a nihkha, i bulah ka awm tawh a, engmah hlauh tur a awm lo, ka venghim tlat dawn che, khatiang thil kha I chungan tuman an ti tawh ngai lovang" a tih sup chu an hriat chhuah zawh ka nei, "Khapa kha enngtinge a awm?" Ka tih chuan "Police hnenah kan pe a nihkha, a chungthu pawh rel a ni vat ang, a phu tawk hrem na a hmuh theih nan tan ka la ngei bawk ang" a aw chhuak chu a nghet charh a, a sawi mai mai lo tih a hriat hle bawk.




Khaw var dawn thleng chuan a motor chhung ah kan thu dun a, mahse hetia awm reng thei kan nilo, ka u in min hmu lo a nih chuan mak a ti lutuk palh ang, kawngka thleng chuan min thlah thlap a, hna chawl mai tura min tihna erawh ka hnial tlat thung, a chhan chu dam loh na ka nei chuang bawk silo a, hna ka kal lo ringawt a nihchuan ka u ngaih ka ti tha lo mai mai ang tih ka hlau a ni, muhil tawh lem lo chuan khum ah ka mu meng kar a, phone a Mike-a nen kan thlalak chu en in ka nui leh ver ver thin, a tir ah kha chuan tlan bo san vang vang ka duh thin kha a nia, tunah erawh ka tawng lovang tih ka hlau em em thung tawh chu a nia.




Vawin chu kan bhai deuh phian bawk nen office lamah pawh ka awm hman meuh lo, in fiam mi ten in el na an nei dawn a, Mizoram mai nilo phai lam atang an rawn kal tam bawk nen hotel a kan room neih zawng zawng chu kakhat mah a ruak lo hrim hrim, tlai lamah chuan kan buai zual a reh ta deuh a, office ah Mike-a nen chuan kan thu hahdam a, chutih lai tak chuan kawngka a rawn ri a, Mike-an kut tura a tih rual in police pahnih chu an rawn in zui lut a, ka thut dan chu ka siam rem nghal thuai a, "Pu Mike police station ah min rawn zui lawk a ngaih hmel" a lal zawk chuan a ti nghal sup a.




Nizan chungchang kha a nih ka ring ringawt, "Pu Rintluanga'n i lakah FIR a theh lut a" a tih leh takah chuan ka tho vat a, "Enge awmzia, tunge Rintluanga chu?" Ka ti haw a, Mike-a thung chu hahdam hmel takin a la thu awn duai a, hlauhthawn na pawh a neih hmel lem loh, "Enge awmzia ka tih chu?" Tiin Mike-a chu ka en a, "Duati thil hriat fuh loh deuh a awm a nih hi, hetah hian lo awm la, keichu min ngaihtuah suh aw, engkim a tha vek" tiin a sen ding chhuak a, "Mahse tinge police te hian hruai che an tum si, enge i tih sual?" Ka ti leh hram a, "Nizan ah khan Pu Mike-a hian Pu Rintluanga kut a thlak a ni awm a, a ni phei chu kan kut ah a awm mek" Police in a lo tih leh takah chuan ka hrethiam ta uar a.




Rintluanga an tih chu nizan a mi kha a ni ngei ang, "Mahse engmah tih sual a nei hleinem, khapa khan..." Ka tih lai mek chuan "Duati hlauthawng suh, ka chungah engmah a thleng dawn hleinem, hahdam rawh" Mike-a zawk chuan a lo ti a, "Chupawh nise, engmah tih sual i neih loh na na na te chuan engvangin nge an man ang che" ka ti leh hram a "Ka pi lo lungngai lo la, a lakah complain a awm vangin kan hruai dawn a, nizan thil thleng te khan kan hre vek bawk a, a thiltih kha kan hrethiam viau a nia, chutih rual in dan anga kan chet a tul miau si a, lo hlauthawng lo la, Pu Mike-a chu a lo chhuak leh vat ang" police te chuan an lo ti a.




Mike-a chu police te nen chuan an chhuak ta a, hlauhthawn tur a awm lo pawh tise ka hlauthawng lo theilo, keimah vangin hetiang thil hi a thleng tih lah ka hai der silo a, ka bag chu la in police station lama kal tur chuan ka chhuak ve nghal, hotel atanga ka chhuak chiah tih chuan Mike-a te tlan liam lai chu ka hmu hman hram a, two wheeler taxi chu phar in police station lam pan tur chuan ka hrilh nghal vat a, pawn lamah Mike-a chu ka lo nghak reng a, enge tih ber tur pawh ka hrelo, darkar hnih dawn chu ka nghak tawh, ka thu mai mai thei bawk silo nen ka vei tawn chhen a, a chungah engmah thleng lo hram rawh se.




Khaw thim dawn ruai ah chuan Mike-a chu a ukil ni ngei tur nen chuan an rawn in zui chhuak a, an lam ka pan vat, "Tinge hetah te i lo kal duh a, in lamah lo va haw ta che, i awm na a rei tawh em?" Min hmuh rual chuan a ti nghal zung zung a, "Engtinge inah ka haw theih bik anga, ka ngaihtuah che alawm, enge thleng, thil engkim a tha em?" Ka tih chuan nui suk chungin ka sam ah chuan a rawn chul zeuh a, "Engkim a tha, Lalrintluanga kha ka bia a, eng emaw sawi dun tur kan nei" tia a sawi zawh hnuah a ukin chu a melh zeuh a, a ni pawh chu a kalsawn nghal.




"Enge i sawi duh chu?" Ka tih chuan "Motor lamah kan sawi dawn nia" tiin min kalpui a, in lam pan a kan tlan chhuah rual chuan "Lalrintluanga kha in rem siam pui na nei ila enge i ngaihdan, in khin kher i duh pawh in a pawilo, i duh dan ka ngai pawimawh ber" a tih sup chuan ka in ngaihtuah vang vang a, in khin vek chu keipawn a buaithlak chu ka ti ve deuh, hrelo tur tur in an hria ang tih leh ukil rawih na man tur pawisa nen lam buaipui vek a ngai dawn si a, Mike-an min tum sak in huam viau dawn mahse nupa em pawh kan la nih lova tih buai vak ka duh rih lo.




"Tha I tih ang ang kha a nimai, in rem siampui pawh ni ila hrem na a hmu dawn tho a, in khin buai vel ai chuan tha ka ti zawk, bakah ka u in a hre kalh ang tih ka hlau a" ka tih chuan a ni zeuh a, in thleng chuan min thlah in a in khalh haw lehnghal a, zan a a lo len tur thu a sawi hram kha, zan ah chuan a rawn leng ta ngei a, ka u pawh a awm ve ran bawk, kan titi ho dial dial a, Mike-a leh ka u pawh an in nel tawh bawk nen a nuam takzet, in ka thlen hnu khan ka tai hi a na riai riai a, enge a chhan pawh ka hrelo, a na zual zel bawk si, ka u leh Mike-a bulah erawh ka sawi duh lem lo.




Mike-a haw dawn pawh chuan ka thlah peih ngang lo, mit hmun ah chuan ka mu kawm ngar a, ka tai zawn chu ka dawm ngar bawk, "Mate na lai i nei a mi?" Ka u in a rawn tih chuan a la muhil lo tih ka hre ve chiah, "Ka tai hi a na deuh a, ka period dawn aniang" ka ti mai a, "A va zialo ve, tui vawt a deh i duh em?" A tih chuan "A ngailo ang, a nat zual deuh chuan ka lo hrilh ang che" ka ti a, dar 11 a pel tawh, ka u chu a muhil tawh a, ka la muhil ve theilo, bathroom lamah chuan ka kal a, ka kal ngil hleithei lo, zung tura ka kekawr ka hlim chiah tih chuan ka kap atangin thisen a rawn chhuak a, a chhuak tam em em lehnghal, ngaihthat loh na lian tak ka nei nghal, ka period ti dawn ila a tir ah hetiang em em hian thisen a chhuak tam ngai silo.




"U.." ka u chu ka ko nghal vat a, ka kekawr chu ka ha leh phawt, "Enge nita, awi... Mate" tiin ka u chuan min rawn vuan vat a, "Ka tai leh pum hi a na lutuk" ka thlan pawh chu a tla hluam tawh mai, "Damdawi in ah kan kal dawn nia, lo nghak deuh la, Nu Mapuii te ka va kai harh lawk ange" tiin in atang chuan a chhuak a, thut pawh thu tawh lo chuan thutthleng hming chu ka dawm ran a, ka thaw chhuak hak hak bawk, Nu Mapuii te nupa leh Asangi te chu an rawn lang thuai a, Asangi'n ka awmdan a hmuh chuan a hlauhthawn hmel hle, Nu Mapuii chuan a pasal hnenah motor la chhuak turin a ti nghal ruai bawk.




"Grace tuar hram hram rawh aw, Sir Mike-a pawh ka hrilh tawh a, damdawi in lam a rawn pan nghal tur thu a sawi a nia" Asangi chuan a ti sep sep a, ka khaw hmuh te chu a vai ruai tawh, damdawi in kan thleng a, nurse te chuan min lo buaipui nghal thuai a, doctor in min en hnu chuan in zai na room ah min nawr lut turin nurse te chu a hrilh nghal a, nikhua ka hre mang tawh lo, ka thil hriat hnuhnun ber pawh min chiu lai chu a nimai, a hnuah chuan a thim nghal khup a.


Mike Lalruattluanga POV



Duati damdawi in lamah an kalpui thu min rawn hrilh rual chuan damdawi in chu ka pan ve vat a, "Sir" Asangi ka hmuh rual chuan Duati chanchin ka zawt nghal vat, "Tunah khan in zaina room ah an nawr lut chiah" a tih chuan ka hlauthawng hle, "Enge awmzia, ka haw dawn pawh khan a la tha vek si a" ka tih chuan Asangi hmel ah dik lo a awm tih ka hmu thiam nghal mai, "Engthil chiah nge thleng min hrilh rawh, Duati chu a tha lo viau em ni?" Ka tih leh chuan "Chutiang lam pawh a ni chiah lo, ih.. hmundang ah kan in be dawn a mi?" Tiin midang te chu a melh kual zawk a, Duati u chu s hlauhthawn hmel em avangin Nu Mapuii chuan a thut pui a, an bulah a pasal ni awm tak tur chu a thu ve bawk.




Hmun danga kan kalsawn hnu chuan Duati chanchin bawk chu ka zawh chhunzawm lehnghal a, "Ih... Nau a chhiat a ni awm e" a tih rual chuan ka nghing deuh lawih mai hian ka hria, "Khawi ah emaw in sawh na a nei pawh a ni maithei, naute chu a puk chhung ah a lo thi daih tawh a" a tih leh pawh chuan ka melh ngai chu ka melh reng a, Duati chuan kan pahnih a fa tur a lum chhung ah a lo pai reng amaw, mahse chuthil kan hriat rual rual chuan kan naute chu kan chan nghal bawk si, mipa mah ni ila hriatthiam har ka tiin na ka ti hle.




"Naute chu thla engzah nge ni tawh?" Ka tih leh sup chuan "Thlathum a tlin an la rin loh thu doctor khan a sawi a, Sir nangmah hian i hrechiang em, vawin emaw nimin lamah pawh nise Grace-i hi tluk na a nei em?" Asangi'n a tih chuan zan hmasa lama thil thleng kha ka hrechhuak zawk, khathil vang kha a ni ngei ang, ka ngawih reng avang chuan Asangi pawh chuan nuam a tih chuan hmel loh, "Let phawt ila, Grace-i chu a tha leh em em ang" tiin a kalsawn a, kal ve na chang pawh ka hrelo, a pum chhung ah khan ka fa tur a lo awm reng chu a nia, mahse ka chhan hman silo.




Duati an zai na room pawn lam ka va thlen rual chuan an rilru a buai hmel hle, "Enge thleng?" Ka ti nghal vat a, "Grace-in thisen a hloh hnem bawk nen thisen pek a ngai a, mahse an lo kawl mai bawk silo a" Asangi chuan a lo ti vat a, "Eng blood group nge?" Ka tih chuan "B+" a loti leh vat, "Keiman ka pe thei alawm, doctor keihi B+ ka ni a, ka pe thei ang" ka tih takah chuan an hahdam hmel huai mai, "Helamah min lo zui tawh, unit khat bak pek a ngai dawn chuang lova, a dang zawng belh pawh a ngai lovang" a tih hnuah kan kalsawn a, ka thisen an hip chhuah chhung zawng chuan mut chhung in Duati chu ka mitthla ah a lang reng a, a chung a thil thleng hi a hriat hunah a rilru a va na dawn em.




Duati an zai zawh hnu chuan doctor hnenah chanchin kan zawt vat a, a that thu leh a harh chhuah har vak loh tur thu a sawi chuan tlem in thla a muang ta deuh a, "Engkim hi keimah vanga theng vek a ni, min hrethiam hram dawn nia" a chhungte bulah chuan ka ti a, "Ekhai, engmah thiam loh na i nei hleinem, a hun hmaa in chesual erawh in pahnih thiam loh a ni a, naute chungchang ah erawh Pathian in a nu leh pa ni turin a la ruat lo cheu a niange, in thlahrung reng reng suh" Asangi pa chuan a lo ti vat a, "Ni e, ka nau pawh eng em a tilo a, hreawm ti reng reng suh" Grace-i u pawh chuan a lo ti ve sap.




Duati khum bulah chuan kan awm thap a, a lo harh chhuak hun chu kan nghak a ni, zan rei tawh viau mahse Asangi te chhungkua chuan haw an tum tlat lova, Duati te unau an hmangaih zia ka hmuh hian ka lawm takzet a ni, an fanu ang maiin an ngaihtuah tih lah hmuh hmaih zia zang a nilo, Nu Mapuii phei chu a khat tawk in a tawngtai leh thin a, thisen zawm ni miah lo mahse an in hmangaih na hi a chak tha tawk tih mi mawl ber pawn an hriat hmaih lovang, Asangi chu a thiante ber thil tawn avang chuan a rilru a na hle tih hriat takin a mittui a hru leh thin bawk a, a u pawh a bang bik chuang lo.




Darkar khat hnu vel ah chuan Duati chu a rawn meng siar siar a, "U" ti sap pah thawh mai a tum chu ner sak chungin a tawp chawt a, an ,ai na kha na a ti a ni ngei ang, "Enge ka chungah thleng?" A tih leh sep chuan midang ho chu an in melh kual raih a, Duati u chuan keichu min rawn en a, engmah sawi lo mahse a ngaihtuah na awm ang tur chu ka hrethiam nghal mai bawk, "Mate, Mike-a nen hian lo in be rawh u aw, pawn lamah kan lo va awm ange" tiin midang ho chu an in zui chhuak ta dial a, "An awmdan kha a va mak ve, thil ṭhalo a thleng em ni?" Duati chuan a ti nghal vat a.




"Nilo e, Engthil ṭhalo mah a thleng lo, an zai che a, mahse hlauhthawn tur a awm lo a nia" ka ti sup, "A nih te chuan tinge ka u te awmdan kha a va mak si ve?" A tih leh haw a, "Duati ka thusawi tur hi ngun takin lo ngaithla rawh aw, i tai nat vak chhan kha naui pai vang a nia" ka tih chuan mak tih hmel zetin min rawn en a, "Ka rai maw?" Tiin a pum chu a en a, a awmdan chu uluk zetin ka lo en, chutah rawn nui chhuak hawk in "Ka van lawm tak, Mike kan pahnih a fa ka kum chhung ah hian a awm mek tihna a nihchu, tinge khatiang hmel kha i put a, i hlim ve lo a mi?" Tiin min nuih var var a, engtinge naute a pum chhung ah a awm tawh lo tih hi ka hrilhfiah ang, tun a a hlim hmel hi lungngaih naa thlak sak hi ka thil tih hreh ber a ni.




"A hma kha damdawi te kha ka lo ei vel a, ka in chhir a sin aw, naute ka neih theih loh phah te ka lo hlau a" a ti leh siam siam a, "Duati ka thusawi tur hi ngun takin lo ngaithla rawh aw, naute chu i lai ngei a, mahse i pum chhung ah khan a lo thi hman tawh a ni" ka tih chuan thawk leh khat ah a nui hmel chu a tawp hmak a, ngun zet a min en hnuah nui chhuak leh in "Mike, in tihder na chi a nilo aw, nau ka pai tih ka hre ve chauh a, engtinge ka chan lehnghal theih anga?" Tiin a la nui hak hak a, ka lo en ngut ngut thung, ka awmdan avang chuan a nui lai chu a tawp riai riai a, "Nilo nang hian dawt min hrilh a ni tiraw, ka naute chu a thi lo tiraw?" A ti sap a, harsa ti zetin ka thaw chhuak hak.




"Duati hriatthiam hram tum rawn, naute chu a awm tawh lo, i pum chhung ah a lo thi hman a, chhan hman a ni tawh lo a ni" ka tih leh takah chuan nichin a mit a hlim na lang te kha lungngaih na in a rawn thlak riai riai a, "Nilo chutiang chu engtinge a nih theih zawk, nau ka pai tih ka hriat rual in ka chan thu ka hre zawm nghal amaw, nilo ka mumang mai mai a ni tiraw, nang hian min fiam a nihkha" tiin a tap chhuak hawk a, "Hahdam rawh, engkim a tha leh vek mai ang" tiin ka kuah a, a tap khur ngawt ngawt, "Nilo engtinge a nih theih zawk?" Tiin a phun sap sap a, hei aia thil sawi harsa ka tih zawk chu ka hrilh leh ngai a ngai si a, Lalpa chakna min pe hram teh.




Ka sawi lo a nihchuan doctor in beisei na thlawn a nei anga, a thil duh a puitlin theih loh chuan amah leh amah in thiam loh na in a khat anga, a rilru lam thleng in a nghawng thei, chuvang chuan tuna in hrilh nghal hi a tha a tih vangin ka sawi ngei ngei chu a ngai si a, "Zan hamsa thil thleng vang kha a ni, chuan Duati thil dang hrilh tur che ka la nei" ka tih rual chuan min rawn en a, a tan nasat em avangin a tawng maithei lo thung, "I chul ah harsat na a awm a, naute i pai thei tawh loh mai theih thu doctor in a sawi a" ka tih leh rual chuan a taksa chu a zawi hnawk a, ka buaipui vat, pawn lama awm te chg ka au nghal that bawk.




"Doctor ko rawh u" ka tih chuan Asangi chu a tlan chhuak leh vat a, doctor rawn luh hnuah Duati chu a check nghal zung zung a, "A taksa chak lo nen a thu hriat in a a thawn em vangin hetiang hian a awm a nih hi, ngaihthat loh na tur a awm lo, tunah rih chuan rilru lamah harsat na tamtak a nei dawn a, in ngaihsak viau a ngai ngei ang" a tih hnuah doctor chu a chhuak lehnghal a, tumah tawng na chang reng reng kan hrelo, Duati chu lainat zetin kan en hlawm a, hetiang hi tinge a chungah a thlen bik, a naupan lai atang tawh harsatna tamtak a lo tawk tawh a, Pathian pawh hian tawk a ti ve em em tawh lo em ni tiin ka ngaihtuah hial.




"Nu Mapuii hei khua a var mai dawn, nangni chhung chu lo va haw hmasa rawh u, Mike-a nen kan awm tho a, chanchin kan rawn hrilh zel zawk ang che u, Pa Nuna naktuk hna kal te a la ngai dawn si a" Grace-i u chuan a ti sap sap a, an hnial ta biklo, pawn thleng chuan an in thlah a, kei erawh Duati kut chu vuan in ka thu reng a, kan naute kan chan na chuan min tih nat mai bakah Duati'n naute a pai thei tawh lo maithei tih ka hriat na chuan min ti na em em a, mahse chumi avang ringawt chuan kalsan ka tum chuang lo, a nih na ang ang hian ka hmangaih a, a bulah ka awm tlat bawk ang.

cont....


click leh comment kha aw...