By Ziki nu
Chapter-6
Kan mut fel hman meuh chuan dar 12 a lo ri leh thuak tawh a, hna hahthlak thawklo mah ila kan boruak ringawt pawh a chauhthlak ve thin khawp mai.
Rdi pawh a chau ve ngang a ni ang reilo te ah a thaw sak sak ri ka hre nghal a, ka phone en in Nunpuia chu ka be ve ta chauh bawk.
Min chhan pawh ka rin tawhloh laiin min lo chhang let vat a, "I mu tawh em?" a rawn tih chuan kan mut chiah thu in ka chhang a, message chu a en reng tak na in min reply lawk lo.
Ka nghah vang vang hnu chuan "Engtiknge I lo let ang" a rawn ti leh a, "Naktukah aniang, buai zualpui a reh tawh a" ka lo ti ve mai a, min be duh tho siin sawi tur a hrelo viau lawi si a, nuih hi a tiza thin a ni.
"I chau ang muhil tawh rawh" a tih hnuah pawh dah mai duh bik lovin a hnung na te chu engnge a an ka zawt ve leh a, Pathian zarah a dam tawh viau a ni awm e, mahse indim erawh a la ngai khawp ang.
Zing lamah chuan tukthuan ei khamah ka haw phei ve a, ka nu ka biak khan engnge Rdi chu thilpek atan ka pek ve ang tiin ka râwn a, mo thian nih chuan thil ho lam lutuk pek a tihchi in ka hre silo a, ka chhungte nen kan inrâwn tlan hnuah shoe rack quality tha ve pangngai leisak mai chu ka rilruk a, thil manto tak han pe thei bik ka nih loh avangin ka pek theih chhunah chuan kan lungawi mai a ngai a ni.
Chhun lamah tihtur tul ang angte ka ti ve a, Nunpuia pawh zan lamah chuan rawn len a tum a, ka hnial duh ta biklo.
Zanriah ei kham hlim hlawtah a rawn lang zui mai bawk a, eng eng emaw hi a rawn khai bawr luk bawk nen ka lo pan hnai thuai a, spicy leh ei tur eng eng emaw a lo lei teuh chu niin,
"Ngatinge I lo lei vak a?" ka tih chuan "Thil I ei that loh hmel emai, I te reuh si, I hriselloh phei chuan naupang emaw an ti ang che" a lo ti duah a, engnge maw a hriat ni.
"Chutiang lutuka te ka ni biklo aw,, ka rualpui kei aia te an tam mai" ka tih chuan a lo nui suk a, TV ka nei ve mang bawk silo, sawi tur kan hriat loh deuh chang chuan phone in en sanin kan kun leh ngur zel a, a ei tur rawn ken thenkhat te chu siamin kan ei dun bawk a, a leng ve reng tho.
A haw dawn chuan kawngkhar bul thleng ka zui leh a, pawn lama han chhuah chhoh tak hi chu thenawm khawvengte ka zah deuh vangin ka ti vaklo a, a ni pawhin min phut lui ngai lo.
"Malsawm.. " a kal tur chu rawn leh hawi meuh hian a ti leh hlut a, "Eng nge a" phawk deuha en chunga ka lo tih chuan "Ka rilru hi a danglam emaw ti suh ang che, a la ngai reng" a lo ti a, eng rilru pua rawn sawi chhuak leh nge maw a nih chu le...
"Immm.. " Tim deuh dai chung hian ka lo ti ringawt a, chhanna dang vak han pek theih ka nei biklo, "Ka la nghak reng che a, I thiantha tak nih chauh hi chu ka duhtawk biklo ania aw" nui chung hian a ti leh a, chhan dan tur a vang kher mai.
Ka awmdan chu a hrethiam aniang "I rilru tihbuai ka tum vang pawh a ni chuanglo, nghak tur che in min tilui lo va, mahse I hriat tura ka duh chu beiseina ka la neih ve vanga hetia awm hi ka nia, ka la beidawnsan lo che ka tihna a nih chu" a ti sup sup a, a tawng ringlo hle na in a thilsawi te chu ka hrechiang viau tho.
"Nunpui.. " tiin ka thaw chhuak halh a, ka tana a inhuam thuizia leh min duh ve zia hre reng mah ila ngaihzawna bialpa han neih mai chu ka la ngam rih ngang si lo a, eng chen nge Rintea theihnghilh nan hian hun la ngai dawn hrelo mah ila tunah mai chuan ka thei tlat lo a ni.
"Sawi loh tur tur ka sawi in ka hria, ka kal dawn nangpawh mu nghal daih rawh" tiin a kawrlum lukhum chu a khum a, min rawn hnaih leh ruak lai chuan ka lo pen hnung ve hrat a, a kiai suk hnuah thildang sawi tawh lovin a chhuak zui nghal a.
A thawm a reh rual chuan ka thaw chhuak hawk mai, ka chalah emaw, ka biangah emaw pawh ni se, inngaizawng kan nih loh avangin infawhtir leh chu thil tha ber a ni lo ang, a..a tha lo hulhual zawk ang.
Ni a liam zel a, inneih dawn zanah chuan keipawh riak phei lehin zan lam atangin kan sam chu min khawihsak nghal hlawm a, an duh uluk bawka min khawih rei khawp mai.
U Stewarda te pawh an rawn lang ta rihlo a, chhunnte leh thiantha te nen erawh kan ni nak nak reng thung.
"Rintea awm ve se tha tur ania" titu lam chu ka hawi vat a, college kan kalpui thin tho Rebecca-i ka hmu chu ka hamhaih deuh.
"Helamah I awm em ni?" ti hlutin ka pan hnai thuai a, "Changtunu in pasal a neih dawn te chuan kan lo thlawk haw vang vang mai alawm" a tih chuan kan nui ho hak hak a, College atanga intawng vek ni hlawm mah ila kan inzui tamin kan Inkawm nasa hlawm bawk a, Rdi pasal neih ni a rawn ngaipawimawh viau pawh chu a awmlo hranlo.
Kan sam khawih tuten min chhuahsan hnu chuan kan thian thum chauh kan ni bawk nen tawng kan inchuh a ni ber a, Rebec-i lo haw chu Rdi pawhin a hre lawk biklo a ni âwm e.
College kan zawh khan master zir turin Bangalore ah a kal nghal daih a, a rawn haw khât khawp mai. Zirna lam a tihtheih bakah an chhungkua an lo neinung ve bawk nen a ni tan chuan thil tih a harsa lutuk lo a, hnathawh tur la nei chiahlo mah se a thiamna a sang tawh hrim hrim a, a ni tan chuan a lungngaihthlak vaklo ang.
"A mak e... Lalruatdikin pasal a nei ve tawh mai dawn chu ania, Malsawm nangni hi in tawp hlen ringawt em ni?" a tih chuan Rdi nen in melh zawkin ka nui tawi tak ringawt a, a hrethiam aniang chu a sam tawi deuh mai hui chho pap chung hian "Heiham" a ti hluai a, sawi tur bik vak a hrelo chu a meng kual leh rulh rulh thin.
"Rintea te chu kan lo sawi peih tawh hleinem, a ni aia tha an awm daih tawh" Rdi'n a lo tih chuan Rebec-i ang thoa hawi haiin ka lo en ve a, "Bialpa thar I nei tawh maw?" ka hau chunga tiin Rebec-i chuan min en ran bawk a, "Ka nei maw?" ka lo ti ve chu kan nui zui ta hak hak hlawm a.
Rdi hnenah hian Nunpuia chanchinte ka sawi ve nual avangin Rintea lak atanga move on nan tal pawh min duhpui viau a, Riny nen an rilru an inang chiah.
Rebec-i hnena a han sawi ve chuan rilru dang daih a lo pu leh tawh bik a, ka tana Rintea theihnghilh a harsat tur zia te chu hrethiam hmel takin a sawi bawrh bawrh a, "Move on nana mipa dang hman chu a tihchi loh, karma hi a awm tak tak ania" a tih chuan ka chhanglo. Karma chu ka la tawng chiahlo naa, Move on nana mipa dang hman erawh chu ka tum biklo thung.
Riak ve turin kan sawm viau naa kan thiannu chuan a duh tlat lo a, dar 11 vela rawn lamtu mipa chu Rdi nen chuan tu nge kan hre ngailo ve ve, Rebec-i hi chu mipa hrang hrang hmelhriat hi a nei kual duah thin hrim hrim a, Mizorama a awm loh na a rei tawh tehlul nen tunah pawh hruaitu tur a lo nei leh der tawh.
Zingah pawh chuan hma deuhah kan tho a, kan inbualfai zawhah kan hmaite chu kan chei nghal mawp mawp a, chaw pawh ei lovin nepnawiin kan inhnawhpuar a ni ber.
Nunpuia nen kan inbe zauh zauh reng a, lo kal ve turin ka sawm hle naa a duh bik tlat lo, Riny zawk chu nise a duhte pawh a duh ve mai thei a, Rdi nen tak chuan an la inhrechiang ve vak silo a, ka sawm lui duh biklo.
Dan thianghlima innei an ni bawka lawmpui Tu pawh an ngah khawp mai, Biak in chhunga lenglo khawpin veng chhung mipuite an kal tam a, a hlu in a ropui takzet.
Mo lawmna pawh an kohhran hall ah kan nei nghal vek a, thilpek pawh mi hrang hrang hnen atangin an dawng nual a, ka thiannu chu a hlim bawk aniang a nui var var reng a, hmuh a nuam a ni.
Ruai kan theh zawh chuan mo neitu te in lama lawi lut turin kan inbuatsaih zui leh mai a, hun awl ka neih deuh lai a nih ve avangin ka phone ka en ve a, Rinfeli hnen atanga ka thu dawn chu a hunlo ka ti a ni.
'Vawiin ah Rintea a lo haw a, Famkima nen Airport ah kan hmuah vangin inneih naah pawh kan lo lang theilo a nih kha, Rdi chu ka lawmpui lutuk tih lo hrilh rawh'
A rawn ti a, a thil rawn sawi teh duah chu chhiar vek mah ila ka rilru ah chuan thil dang a leng lo, 'Rintea a lo haw' tih mawlh mai chu.
A lo haw a nih chuan Aizawlah a awm ve tawh tihna a ni a, hmun khatah kan awm leh tawh a ni.
Kum 4 chhung khan hmuh theihloh leh biak theihloh turin a tawn bo tlat a, chanchin hriat zui tur engmah min hnutchhiah lo a nih kha.
A tan engnge ka la nih ve tih chu ka han inzawt a, zaktheilo ka inti.
A tan mi pawimawh ka ni ve thei tawh lo a, keichu amah kalsantu leh tibeidawngtu chauh ka nih avangin a tan chuan a mihring huat ngawih ngawih tur bak ka ni lo.
Ka thaw chhuak halh a, ka awmdan chu a danglam deuh a ni ang ka thiannu chuan a bana min rawn nghawk zauhin "I chau tawh viau em?" a ti sap a, lu ka thing rang viau thung.
"Ka ke hi a na tawh lutuk a, pheikhawk hniam kan bun tawh mai dawn em ni?" a tih leh takah chuan ka tho vat a, pindanah lutin pheikhawk hniam chu ka lak chhuah sak a, Rdi lawi luh hun leh boruak che vel te chu ka hriatloh karin a ral zel ni mai hian ka hre tawh.
Hei vang tak hi ania Nunpuia pawh chhanna ka pek mai theih loh chhan chu..
Mi tha tak a ni a, tlangvel fel leh innghahna tlak tak a ni tih pawh ka hai lo, mahse Rintea hi a lo thar leh thin a, reh vang vang mah se a hming ringawt pawhin keimah ah danglamna a la siam nasa hle bawk si a, kei hi hmeichhe le lo tak chu ka niin ka hria.
Zan lamah pawh mo thian ber ka nih avangin riahpui turin min ti a, Rdi a zam ve deuh bawk nen hnial chia ka ngaih loh avangin an pindan ruakah chuan ka riak a, muthilh a harsa khawp mai.
Eng eng emaw ka ngaihtuah kual duah laiin Rinfeli kha ka reply miahlo tih ka hre chhuak chauh a, tunah lah dar 10 a pel thui leh tawh bawk nen inthiamlo ru deuh chung chuan ka reply lo tlang ta ringawt a, Nunpuia message chu ka hawng nghal thuai bawk.
Rei ang reng tak chu kan inbe leh a, ka chauh ve deuh avangin ka lo mutthluk san pek a, zinga ka harh chuan a message a lo awm teuh mai a, ka rilru chianglo lutuk chu ka chauhpui ni berin ka hria.
Tukthuan pawh ei pui tawh lovin an phal vaklo chung chu ka haw San ta rih a, U Mazari te in ah lut kawi zawkin inneih boruak te chu ka hrilh ve luam hlawm a, chaw ei ve turin min lo sawm mah se mut ka chak zawk avangin ka hnial a, inneih ni tuk chu nilengin ka mu a ni ber mai.
.....
"Vawiin chu min bazar pui la, naktukah school kan luh leh tawh dawn chuan eng eng emaw lei te ka duh ve a" tiin Riny'n call a chhan rual chuan ka sawm nghal zat a, "Awiii" a lo ti hluai ringawt chu "I hmanlo maw?" ka lo ti leh vat a, "Vawiin chu ka ni te huanah chawhmeh la tura kal kan lo tuma, hei kan insiam mek" a rawn ti a, a inthlahrun hmel viau mai.
"A nih chu... A pawi chuanglo" tia dah mai ka tum laiin "Vawiin kher a ngai em ni? Kartawpah kal ila" a lo ti leh a, mamawh ka neih ve nual tawh avangin vawiina chhuah chu a tha ka ti bawk si a, ka thiannu chuan "Nunpuia sawm la, a hman lo em ni?" a lo ti leh var a, kan inbe ve reng tak na in sawm nachang ka hre miah lo a, chutia Riny ber a hman tak siloh ah chuan sawm mai ila a tha ang.
"Ka'n sawm ve chhin ange" tiin kan inbiakna chu kan titawp a,ka call hreh deuh avangin message ka thawn ta zawk a, a buai deuh nge mawni a hmu har khawp mai.
Keimaha kal mai ka rilruk tawh laiin a rawn call ta hlauh a, "I hman tawh em?" a rawn tih chuan ka inpeih chiah thu in ka lo chhang a, "Kan buai lutuk a, ka reply hman thlawtlo che a nih kha, chaw ka ei kham chiaha ka lo tlan chho nghal ang" a lo ti vat a, a buai tak tak a niang phone chu a dah zui hmak mai.
Kawngpuiah ka lo nghak a, a rawn thleng har vaklo, min hmuh rual chuan mawi deuha kiai suk chung hian "I va chhe lo ve" a ti a, a uang viau na in ka lai titih ringawt tho.
Bazar lamah kan inphur phei nghal a, lehkhabu bakah inchhungkhur mamawh eng eng emaw te kan en kual hnu chuan kan bawr tawh viau mai.
"I hmanhmawh loh chuan saw lai music instrument dawrah sawn ka û guitar Capo tur en sak ve lawk ang" a tih vangin inkhai bawr teuh chung chuan kan lut leh a, Nunpuia'n dawr neitu hnena a thil duhte a zawh lai chuan kawngkhar piah deuha chair ah chuan ka thil khai lai ka lo nghat then ve chiah a, chutih laia ka awmna ep chiah atanga rawn kal mek ka hmuh rual chuan ka ding khawng nghal at a, ngawi rengin a rawn pen hnai lai chu ka lo en reng ringawt mai a ni.
A hmel chu a la ngai reng a, a vun erawh a hma aiin a ngo deuh zawk a, tenawm khawpa ngo erawh a ni chuanglo.
A sam a buk viau a, a bana sana a bun tih loh chu uchuak deuha thildang inbel a neilo bawk.
T-shirt dum hlarh mai a ha a, kekawrbul a hak avangin a chawn chu chiang deh hian ka en thei bawk a, a pian chu a dik thlap mai.
Ka en uluk viau aniang chu Nunpuia zawkin min rawn koh avangin ka hawisawn thuai a, Rintea nui suk ri chu a hmel hmu tawhlo mah ila chiang takin ka hre bawk.
Cont..
Ads click leh comment kha aw khawngaihin
Show post links
Top