LET's LOVE AGAIN BY Ziki_nu (Completed)

[ngaia]

LET's LOVE AGAIN



By Ziki nu



Chapter-9



Hun chu a kal ngaiin a kal bek bek reng a, kan awmna hmun te pawh la ngai reng angin lang mah se mihringte chu kan danglam thin a, kan awmna hmun leh thiltih te a hran rualin keimahni pawh kan danglam thin.
Ka bula thu ka mipa hmangaih em em chu ka thlek vang vang a, thil tam tak danglamna khawvelah hian a ni chu la ngai reng se ka duh a, hmana amah kha la ni reng sela, 'Danglamna' an tih hian a nunah danglamna thlen ve lo se ka duh a ni.



"Eng nge i ngaihtuah?"
Ka mit chu ka la sawn vat a, ka lo en rei deuh a ni mai thei.

"Min huat viau ka lo ring a" tiin za lo deuh in ka nuih sak a, a thaw chhuak ham ham bak chu thil dang a sawi mai bik lo.



"Rinte.. " sawi tur hrelo in ka han ti leh ngawt a, kan awmdan leh boruak te chu a ipik riau tawh a, a hrehawm lam mah tawh a ni.


"Hmalam i pan nia ka hriatna hian min tina asin, a mak khawp mai" a tih chuan a hmel chu ka en vat a, "Eng nge i sawi awmzia?" tiin ka zawt let thuai bawk.


"Ka hmangaihna che hi hmangaihna dik a nilo anih ka ring" a tih leh lek phei chuan harsa ti deuhin ka lo thaw chhuak halh a, a rilruah hian eng chiah nge maw awm bik le...


"A rei tawh em?" ti lehin ka mitah tak min en a, a sawi awmzia ka hriat miau loh avangin chhan mai ngaihna pawh ka hre lo.




Tawi te hian a nui suk a,
"Hmasawn tur chuan ka duh ngei che alawm, I hlim phawt chuan keichu engtin pawn awm ila a pawi lo aw Malsawm, ka haw lo che, ka haw ngai hauhlo ang che"


"Duhtawk teh" ka awri chu a vin kher mai, engvangin nge hetiang thu hi a sawi vak vak chhan ka hrelo, ka thlakhlelh ve zia leh amah ka ngaihtuahzia te hre duh hauh loa hmalam pan San tura min ngai nghal ringawt chu ka hua a ni ber.



Sana chu a en zawk a, a thutna atangin a ding pah vut bawk a, phawk lek leka ka lo en lai chuan "Thawh hma I ngaih thin kha, meng reilo la, zan dangah ka lo leng leh ang" a ti a, han dan beh hman pawh a nilo.





Ngawi rengin ka zui chhuak a, Nunpuia ang lo takin kawngpui thleng ka thlah bawk.
A tlan chhuah dawn chuan mawi deuh hian min nuih leh suk a, "Muttui aw Malsawm" zawi deuh maia a tih leh hnuah a tlan chhuak nghal a, a liam tur chu ka thlir vawng vawng ringawt mai a ni.






Kan inmangtha dan chu ka duhkhawp lo takzet a, engtikah nge kan inhmuh leh ang tih ka sawi lawk ngam bawk si lo. A thilsawi khan awmzia chu a nei ngei a, ngaihtuahna a kalthui takzet.



Hmasawn turin min duh a, hmalam ka pan avangin a na thung bawk si a, eng chiah nge maw a rilru ah hian awm ve le... Engmah kan sawifel ta lo a, ka lakah ngaihdan mak tak a nei nia ka hriat tlat vangin ka awm a nuam theilo.



Dar 10 a pelh thui tawh avangin keipawh chu ka mu ve nghal a, phone ah tal min lo biak beisei chuan ka ngaichang ran a, mahse rei fe hnuah pawh a ni chu a reh tlawk tlawk a, rilru nuamlo deuhin ka awm reng mai.




Zingkarah ka nu in min lo call a, kartawp lamah Pathianni châm tura lo zin mai chu a rilruk a niâwm e.

A nuamsam lo hle a ni ang kan inbiak lai pawh chuan a khuh deuh reng a, a aw atang ringawt pawhin a chau hle tih chu a hriat theih a, sumo a amah chauha a rawn kal tur chu ka ngaingam lo deuhin "U Mama nen lo kal rawh u, keiman ka lo bia ang" ka ti ta ngawt a, ka n phei chuan ka u te han tihbuai a hreh avangin tul a tilo a, mahse kan inbiak zawh chuan U Mama chu message ka thawn ta tho a, ka nu hriat loha biak a ngai a ni.





Engmah ei ka châk loh avangin phurlo deuhin ka insiam nghal a, Riny a lo kal ve theih tawh dawn vang erawh chuan tlemin awm a nuam deuh zawk a, midang bula awm phei chu ka chak lo khawp mai.




U Mazari te ina ka pen kawi zawk lai chuan ka tum loh deuhin U Aldrina ka hmu a, zingkar karah eng nge maw a tih ni..



"Chaw I ei hman em? Hei I U Aldrina'n chawhmeh min lo suah teuh a, bar ve lawk rawh" U Mazari chuan a lo ti sawk sawk a, u Aldrina pawhin min lo sawm ve nghal var bawk.



Ka tlai deuh tawh thu hrilhin ka hnial a, ka ngaihbel nge mawni U Aldrina chuan inthlahrung hmel a pu deuhin ka hria a, a unaupa vang anih ka ring.



Midang an awm ve bawk nen engmah phei chu a sawi lemlo a, zan lama inkhawm ngei ngei turin min sawm nasa viau thung.




School lam pana ka inkhalh chhuah lai chuan ka phone a rawn ri a, ka tlan laklawh avangin thlen huna chhanah ka dah a, thawhtan tuk hi chuan traffic a zam nasa lehzual thin bawk nen, dawhtheih a ngai thin khawp mai.



Ka thlen chuan Riny pawh a lo thleng reng tawh a, a hmel a la dawldang deuh naa ka hmuh hnuhnun ber ai kha chuan hmuh a nuam hle tawh zawk.

1st period a neih avangin kan inbe mumal hman lo va, keipawh ka phone chu la chhuakin min lo call Tu chu ka en a, Rinfeli hming ka hmuh rual chuan ngaihdan ka nei thiam deuh ruak a, ka call let thuai bawk.




Rei pawh a ring hma in a lo chhang thuai a, "I buai em Sawmi?" a rawn tih chuan school ka thlen chiah thu leh ka buai rihloh thu ka lo sawi vat a, "Nizanah Rinsangzuala a rawn leng em ni?" a tih laia a awri chu a lungawi loh hmel riau in ka hria.


"O.. Aw... " ka ti bah deuh nak a, "A mak ngawt mai, hrilh lawk lo pawh ka nilo asin maw le" zawi ang reng taka a tih chuan min bia ni chiah pawhin ka hrelo.


"Ngatinge a?" ka lo ti leh vat a, "Thian chu kan ni reng tho a, mahse Rintea hi ka unaupa ania, in inthen dan kan hre vek a, a nat nawn leh chu ka phal tawh biklo ania aw, ka sawi tlang tawp anih chu, ka haw hranlo che a, mahse ka unaupa hi fiam kual mai mai atan chuan ka phal biklo" a rawn ti ta mai a, a thil sawi awmzia chu ka hrelo nasa mai.




"Ka fiamkual lo" tih ngawt chuan ka chhang a, lehlam atanga a nui ri chu a ngeiawm ve lek lek mai.



"Mizoram hi a zim lutuk Sawmi, thil hi hrelo viau turah min ngai bik suh, hmalam pan ve tura i duh tak tak anih chuan Rintea rilru hi lakpen sak tawh suh" a ti leh siah siah a, a thil sawi engpawh mai chuan min thawng em em vek a, chhan let dan tur thlawt ka hre rihlo a ni ber mai.




"I thilsawi awmzia ka hrelo" ka ti a, "Rintea hi lo hnaih tawh suh" ti leh hmiahin phone chu a dah zui hmak bawk a, zawimuanga ka phone ka lakthlak ve lai chuan Sir Zautea'n min rawn hui zauh zauh a, a bul ka va thlen chuan a nupui damdawi in tlanpui thut a ngaih avanga a haw nghal a tul thu leh amah ai a class chu lo la mai turin min lo ti a, aw ka lo pawh ve thuai bawk.




Ngaihtuahna buai hle e tilo chuan rilru fim tak pua han inngaihtuah hmanin ka khawsa silo a, class te chu ka la mawp mawp a, ka mimal nun leh hna thil dah hran tlat duh mi ka nih ve avangin Rinfeli thil sawi te chu ngaihtuah loh hram hram ka tum rih a, Riny a awm ta bawk nen nileng hun chu ka hmang ral ve mai a, tlai lamah pawh Ramdin'an a lo hruai dawn avangin ka haw San a, dar 4 ah chuan in ka thleng tawk khawp mai.





Intifai sawk sawkin eirawng ka bawl a, inkhawm ve hram ka duh avangin muangchan theih pawh a ni lo. Ngaihtuahna ah chuan Rinfeli thilsawite kha a champ ve reng a, mahse a awmzia ka hriat miau loh avangin tihngaihna vak pawh ka hre chuanglo.



U Mazari a inkhawm hman loh vangin keimahin ka kal hnak hnak a, Biak in kawtah Nunpuia leh tlangval dangho lo ding khawm ka hmuh chuan be loa han kal tlang mai ka tum a, mahse an zinga pakhat chuan "I va fel ve Sawmi" tiin min lo be hram a, chhang lem lovin ka nuih ringawt a, Nunpuia erawh chuan engmah a sawi ve lo thung.




Inkhawm chhung zawng pawhin Rinfeli thil sawite bawk chu rilru ah a awm a, Rintea tibuai tawhlo tur leh fiam kual mai mai lo turin min ti anih kha, khatiang thil a sawi chhan kha ngaihdan chu ka nei thiam a, mipa dang nena han kawp kual vel turah min ngai niin ka hria.




Mizoram zimzia leh thil a hriat ve theih zia te pawh a sawi a, ka chungchang nilo pui puia lo sawitu an awm anih chu ka ring nghet nghal hmiah bawk.



Inkhawm e tilo chuan ka rilru chu a vak kual ruai a ni ber a, ka chanchin chu eng tiang pawhin lo hre mah se amah Rintea ka biak phawt a ngai tih ka hria.


Zan dang zawng aiin inkhawm chu rei ka ti a, ka sa phat phat a, ka awm nuamlo lutuk vang chuan ka thaw lak te pawh a sak talh a, ka hrehawm hluah hluah a ni ber.



Kan ban rualin chak deuhin ka kal nghal hmawk hmawk a, hmanhmawh nak alaiin ka hnung lam atanga min lo ko tu vang chuan ka ding leh hnuhnawh a, Nunpuia rawn inlan hun chu a fu lo takzet.




"I va hmanhmawh awm ve... Min be duh tawh lo em ni?" a zawhna chu ka chhan chak zawng pawh a nilo, "Nia ka hmanhmawh khawp mai" tih zawngin ka chhang a, "Thlah I ngai em?" a lo tih leh chuan melh hrak pahin "Ngailo" ka ti a, inherin ka kal leh nghal nal nal bawk.




In ka thlen chuan thaw a sa phat a, tui ka in zui nghal khawlh khawlh bawk.
Ka phone chu en vatin Rintea number chu ka hmet chhuak a, call ka tum chuan ka tîm leh hnuhnawh a, han call ngawt ila eng enge ka sawi ang ka hrelo a ni.





Ka phone chu nghet deuhin ka hmer ngawt ngawt a, a laka insawifiah ringawt turin atan eng nge ka nih? tih chu zawhna lian tak a ni leh ta.



Ka ngaihtuah thui poh leh rilru buaina tur thil a tam ni maiin ka hria, ka hah hlui a, awm ngaihna ka hrelo a ni ber mai.





Call tuma phone ka tin zuau zuau lai chuan Nunpuia hnen atangin call ka dawng a, chhan loh mai tur em mawni ka tih rilruk laiin call chu a tawp a, mahse a rawn call nawn leh ngat avang chuan ka chhang ta hram.




"Eng nge ni?" ka ti nghal khawl a, a laka ka lawmloh zia chu thup buai ka tumlo, a awmdan kha a huatthlala em a, min dem thei lo ang.



"Lo len I phal em? Thil sawi duh ka nei a" a rawn ti a, hla deuh tak atanga a thiante ni awm tak tawng ri nak nak chu ka hre vuai vuai bawk.



"Mut ka tum tawh" ka ti leh tawp a, a thaw chhuak halh chu ka hre reng bawk.
"Reilo te chiah ka lo kal ang, min haw viau ang tih pawh ka hria a, mahse Sawmi.. Ka thusawi tal chu ngaithla ve la" ngenngawl deuh hian a rawn ti leh a, Rintea vanga ka rilru a buai tawh tehreng nen, a rawn inlan leh hun chu fu lo ka ti takzet.



"I sawi duh chu phone ah sawi mai rawh" ka to pawhin "Ka lo kal ang, reilo te bak a ni dawnlo, thil hriattir ngei ngei duh che pawh ka nei a" a tih tlat avangin 'aw' ka pawh ve leh ta nge nge a, reilo te ah a rawn thleng zui mai bawk.





Kawngkhar ka hawnsak lai chuan inthlahrun hmel deuh hian min lo en a, "Lo lut rawh" tiin kawngka chu ka khar tha leh thuai a, thutthleng seia kan han thut dun vang vang hnu chuan a tawng chhuah mai loh avangin "I sawi duh chu sawi vat la, mut hma ka duh" ka ti a, ka aw ri atang ringawt pawhin a laka ka lawmlohzia chu a hrethiam ang.





"Hmanni thil thleng vang khan ngaihdam dil che ka duh a" a tih chuan ka lo bu nghat ringawt a, "Sawmi, khatianga awm kha ka duhdan a ni biklo" tiin a thaw chhuak halh a, "I lungawi lohna tura awm kha ka duh hauhlo a" a tih leh lai chuan lo pawt chat in,
"I zu in ngawr ngawr te kha chu ka demlo che, inngaizawng pawh kan nilo a, khuahkhirh chiam che pawh ka tumlo, mahse I rui chhe leh lutuk kha chuan min tizak khawp mai" ka lo ti hlak hlak a, ka tum aiin ka aw pawh chu a vin lek lekin ka hria, ka lawmlo thar êm bawk a ni.




"Zu in pawh kha ka tumlo, mahse Tha-i kha an rawn sawi chhuak a" a tih lai chuan a hmel chu ngun deuhin ka lo en a, kun ngul mah se kan inthut hnaih avangin ka hmu thei tho.


"Tha-i chu I bialnu hlui maw?" ka lo tih chuan a bu nghut a, "I la move on thei bikna nge?" tiin ka nui hak a, min chhang lovin a kekawr ipte chu a zen rak rak a, a phone a rawn phawrh lai chuan "A thi tawh" a ti sup a, tawngzawi hle mah se ka hrechiang lutuk tlat.




"Engmaw?" a sawi ka hriat loh vang ni hauhlo in ka zawt nawn leh a, min lo ena tawi te a min nuih in "Ka then theilo a nilo a, ka then ngei alawm, mipa dang nen min kawp nia ka hriat avangin ka then a, chumi hnu lawkah Phai ah a chhungten a dah a, thla khat pawh a ral hma in In chhawng sang atangin a zuangthla a ni" a aw ri chu a rapawm lek lek mai, a khur a, a mittui a luang bawk.
Ka beisei loh lutuk thil ka hriat vangin keipawh chu ka chawmawlh vek a,ka bul ami chu han hnem dan tur pawh ka hre lo.



"Nangmah vangin maw?" ka ti sap a, a lu a bu nghut tih loh chu eng thu mah a sawi tawh lo.




Kan ngawi dun rauh rauh a, rei deuh hnuah "I thiante khan a thi tih chu an hre ve lo em ni?" Tiin ka zawt leh a, mitthi tawh chungchang khatianga an sawi mai kha mak ka ti deuh tlat a ni.



"Hria e... Tih el che nan an sawi lang mai mai anih kha" a tih chuan mak ka ti zual ting mai, "I thiante chu an rilru a va mak ve" tiin za lo deuhin ka nui a, min rawn en in "Tha-i thih atangin kum 3 dawn a ni tawh, a thih chhan kha keimah vang anih ka rin avangin rilru nuamin ka awm ngailo a, inthiamlohna hlirin ka khat thin, ka tawn hma che kha chuan hmalam pana hmeichhe dang ngaihven tumna pawh ka neilo a, mahse nangchu I danglam" a ti a, tawi te in min nuih suk bawk.




"I rilru tur chu ka hrethiam ve deuh tho a, Tha-i vang pawh chuan pawi ka tihpui lutuk che, mahse ka laka i rilru put dan hi chu tihdanglam theih ka chak a ni" ka ti ve tawl a, khawngaih viau mah ila min duhna rilru hi chu paihbo daih thei sela ka duh.




Thaw chhuak hawkin a hmai chu a tuai puat a, "Midang hnenah ka chanchin hi ka sawi ngai lo khawp a, zanin chu min hrethiam rawh aw, khatiang thil kha a thleng nawn tawhlo ang tih ka tiam a che, zu ka in tawh dawnlo" a ti a, min nui suk vangin keipawhin ka nuih let ve a.




A haw tur chu zui chhuakin stepa a chho tur chu Rintea lo chhuk mek nen chuan an in hmachhawn siah a, ka chunga thil thleng hi sawi ngaihna pawh ka hre tawh lo, ka vanduaina a kaltluang hle a ni ber mai.







Cont....
Show post links
Top