LET's LOVE AGAIN BY Ziki_nu (Completed)

[ngaia]

LET's LOVE AGAIN



By Ziki nu



Chapter-15


Ka nu dinhmun chuan ziaawm lam a pan thei meuhlo a, doctor te lahin test hrang hrang an neih hnuah pawh a natna tak an hrechhuak thei si lo. Kan mangang tlang ta deuh chuan enkawlna tha zawk beiseia phai lam pan mai turin min ti hial a, mahse chu chu kei ni chhungkaw dinhmun ngihtuah chuan a harsa em em bawk si.



A khawsik chu a ziaawm viau dawn emaw kan tih laiin kan inrin loh lai hian a rawn sa leh vak zel a, chutianga a khua a sik tawh chuan a tlun titih nghal zel bawk a, chaw a ei thei lovin a ei chhunah a luak a ni zel bawk nen, ka nu hmel chu hmuh theih khawpin a tla chak a, nu lian tak ni lem lo mah se ama tawkah a thau ve hle thin kha a ni a, tunah chuan a dawldangin a cher kuam tawh a, a hmel hmuh chu a hrehawm lam mah tawh a ni.



Rintea chu min pui turin a awm reng thin a, a hun tam zawk chu damdawi in lamah min hmanpui a ni hawt a, lawmawm viau mah se chutia ama hna tul pawh thawk hman lova a han awm ringawt chu ka tan tak pawh a inthlahrunawm ve zo zai tawh.



Damdawi in ah pawh karkhat lai kan awm tling tawh a, cabin ruak kan la chan fuh theih loh avangin ward ah kan la awm ve nawk nawk a, senso chu tam deuh dawn mah se ka nu tana a that zawk beisei na nen cabin ruak a awm velah chumi lama insawn mai chu kan tum thung.



Pathianni tlaia Rintea lo kal tur chu message ah ka hnial ve tang tang a, vawiin ni angah chuan anmahni inah awm ve tawh se ka duh zawk a ni.
A awm ve hian ka thlamuanpui teh meuh mai a, mahse inthiam lohna ka nei tlat tho.


A ni chuan "Nangmah chauh chuan a khawharthlak alawm, tlaiah ka lo kal anga chaw pawh ka lo kensak nghal ang che" a rawn ti a, U Mazari'n U Mama hnenah Rintea chungchang chu a lo hrilh thawi ve deuh bawk nen ka u chuan ka bialpa angah an ngai ringawt tawh a, chupawh chu thil tha ber a ni em ka chiang ngam si lo.



"U Mazari leh ka u an lo kal thei dawn tho alawm, zanin chu U Mazari'n a riahpui ve tawh dawn a, naktuk school kal ka ngaih avangin ka lo haw ve tawh ang" ka ti duah a, aw a pawh ve mai ka rin tawh tehlul nen "I haw dawn tho chuan ka lo kal ang" a ti deuh tlat a, han hnial viau tum pawhin hepa hi chu tihluih a harsa tlat zel.



A tawp a tawpah "Aw le" tiin ka chhang leh ta nge nge a, kan in lama a kal hmasa anih chuan ka u te ho nen an lo insiamrem leh mai ka ring.




Ka nu muhil chu a rawn meng siar siar tih ka hmuh rualin ka phone chu ak tha sawk sawk a, "I lo harh em ni Nu? Na i nei em?" ti vatin ka din hnaih thuai a, min chhang lovin min en vang vang a, a mitmeng chauh hmel lutuk leh a landante chuan min tilungchhe viau zel a ni.



A chal chu dawmin ka ngaichang vang vang a, a pang a dai duk a, khawsik chu a nei rihlo niin ka hria. Thil a ei theihloh avangin thisen chaw an khai reng a, nu hlim thei leh nui huah huah thin tih takah hetianga a han awm ta mai hi chu amah hrechiangtu tupawhin an lainat vekin ka ring.



"Thil ei chak i nei em?" tia ka zawh leh chuan tawi tea min lo nuihin "Nei lo ve, i chau tawh em?" min lo ti let a, natna khuma a awm lai pawhin min la ngaihtuah em em reng zawk chu a ni si a, theih ni se a natna zawng zawng hi tuar sak vek ka inhuam tehlul nen.




"Ka chau hleinem, naktukah school kal ka ngai ve tawh dawn a, zanin chu U Mazari'n a riahpui ang che aw" ka tih chuan zawi t3le hian a lu a bu ve nghat a, chutih laia ka phone a lo rik chuan ka en vat a, ka patea a lo ni.


Ka chhan rualin "Khawi laiah tak khan nge in awm a? Hei kan lo thleng chiaha a lo luh nghal theih em?" a rawn ti nghal zung zung a, ka chhuah nghal tur thu hrilhin phone chu ka dah a, ka nu hnenah hrilhin pawn lamah ka chhuak zui ve nghal bawk.



Kar khat lai damdawi in ah kan awm tawh chung hian ka patea te chhung hian min la rawn tlawh miahlo a, a ruk tak chuan ka vui ve khawp mai. Ka u te bulah phei chuan engmah ka sawi duh lem lova, mahse tunah sawi lawk lovin an rawn kal leh thut a, a nachang an hre ve hrim hrim chu a lawmawm.



Damdawi in kawt ka va thlen chuan ka patea leh U Ruth-i an lo awm a, nutei ka hmu ve lo chu a chhan ka zawt vat a, an hna thilah a zin chhuak rih a ni awm e.



Kan awmna ward lam panin kan inzui leh nghal a, chanchinte chu min zawt ve bawk mah se an tawng tam lutuk lo.


Kan thlen chuan ka nu pawh a lo thu chhuak peih tawh a, ka patea'n a biak chuan a chhang ve zel tak na in a tawng chak thei lo va, a tawng chu a zawiin a muang em em mai bawk nen, dawhthei taka nghah deuh tawp a ngai.



U Ruth-i chuan ka hna lam chanchin te min zawtin puan ka la thui leh thui lohte min zawt ve luam bawk a, keima hak tur chu ka inthui mai zel thu ka sawi chuan nui hak hakin "I in dang duh mai mai maw le, tunah te chaun Pathian zarah dawr ka nei ve tawh a, min pui hle hle la tha tur ania" a ti fiamthu hlut a, ka nu pawh a lo nui ve leh sak thin.



Patea chuan "Mai mai a, puanthui turin lehkha a zir hleinem" a lo ti hluk a, pa thinchhia leh tawng nem lo ngang a ni bawk a, thinrim hauhloa a tawng pawh hian a vin viau zel tho.




Ei tur tuihnai leh thei eng eng emaw an rawn kensak nual a, chupawh chu kan lawm tawk tehlul nen an haw dawnah patea chuan pawisa min hmehbel nawk nawk a, ka hnial ve viau pawhin min pe lui tlat tho.



"Kan lo lang leh mai hman lo ang, lo dam zel rawh u" tiin kan inthlah a, damdawi in sira dawr te ah chuan tui leiin keipawh ka lut leh nghal a, khua a dur deuh avangin a lang tlai ruih tawh a, zan lamah chuan ruah a sur mai thei a ni.




Ka nu awmna lama ka let leh lai chuan Nurse in a lo endik mek a, a damdawi pakhat chu a zawh tep tawh thu hrilhin eng nge a an tihte ka zawt vat a, zual lam kan pan lem lo chung hian kan tha chaklo em em a, enkawlna tha zawk pek theih chu ka chak ngawt mai.




Dar 5 a rik chuan U Mama ka call a, "Lo biak che ka tum chiah a" phone a chhan rual chuan lo ti ve nghal zatin Rintea leh U Mazari te pawh an lo chhuah chiah thu min hrilh nghal zung zung a, "I thianpa chu a fel khawp mai kha, nakinah chiangkuang deuh takin kan la sawi dun leh dawn nia" a ti bawk a, U Mama hian ngaihzawng chungchang min sawipui ngai lo viau a, Rintea laka a ngaihdan erawh chu ka hre chak ngang mai.



Min buaipuiin min ngaihsak em em a, phone hmangin inbe tam lem lo mah ila amah hi a rawn kal reng thei a, ka nu damlohna chungchangah ngat phei chuan kan pawh buai ber a ni hial ang.

Ka u te lah chuan ka bialpa angah an ngai nghet hmak tawh tih a chiang reng a, chu chu keiin pawi tilo ve ngawt mah ila amah Rintea rilru ber hi ka la hre si lo a, hetia min ngaihsak viau hi lawm hle mah ila inthiam lohna ka nei tho tho.






Dar 6 bawrah an lo thleng a, chaw min lo kensak chu ka nu ka ei tir a, chhe te tak tak bak hi a ei thei meuhlo a ni, thil a ei hnu lawkah a luak a chhuak leh mai zel a, ei luih tir tum ve viau mah ila ka khawngaih lo thei bawk silo.



U Mazari chuan ei ve nghal turin Rintea chu a sawm a, "Hei i thianpa hi chaw ei lovin anih hi a rawn kal, inah ei ve rawh kan tih lahin a duh mang si lo a" tia U Mazari'n Rintea a melh zawk laiin "Ei ve rawh" tiin keipawh in ka lo sawm ve nghal a, "Ka ril a tam lo, ei teuh rawh u" a ti tlat a, a sawm luih theih der loh.




Damdawi in ah hi chuan chaw ei a tui mawh ve hrim hrim bawk nen keipawhin tlem te tak tak chauh ka ei a, ka ei kham hnuah ka nu damdawi thenkhat naktuka zo mai tur ho chu damdawi dawrah la turin Rintea nen kan kal hmasa leh a,


"Tinge chaw ei lo va i rawn kal reng reng a? I ti awm anglo emai" ka tih chuan lo nui sukin "Thildang ka ei alawm" a lo ti mai a, hei pawh a tihziah dan tho a la ni.


Chaw hi a ei mumal ngai meuhlo hrim hrim a, tlangval chaw heh deuh an tih ang kha chu a nilo chiang khawp mai, zing lamah a mut rei thin avangin a chhungte rualin chaw a ei ve hman ngai lo a, tlai ah pawh hian ei loh mai mai a ching thin.


"Chaw hi i ei nep ve ngawt mai" ka tih leh lai chuan min rawn en in "Ei nep love, hei, tunah pawh heti tiat hi ka ni tawh alawm" a lo ti fiamthu a, ka nui ve ta ringawt.



Damdawi kan lak hnu chuan ward lama lut nghal mai lovin dawr te ah in tur eng eng emaw kan lei a, chumi in pah chuan chawlhbukah kan thu chaw leh rih bawk.



"Ruah hian sur a tum deuh em mawni le? Tlai atang khan khua a dur a, a vawt ve riau" tiin kan chheh vel chu ka thlek thuak thuak a, damlo awmpui tute bakah internship kal lai te chu an la inpel zut zut a, hmuhnawm thlira han thlir tham hi an ni ve hrim hrim.



"A sur mai thei" lo ti ve supin a coffee ken lai chu a lem zui khalh a, boruak chu zan dang zawng aiin a vawt vur tak tak a, ka kawr hak chu a ban tluan ve tho mah se a pan hleng a, a thaw vur reng mai.




"I nu result hi engtinnge?" a lo tih tak daih vang chuan amah chu melh zawkin "A... A natna tak hi engmah an la sawi thei biklo, cabin ruak a awm velah insawn phawt chu kan tum hrim hrim a, phai lama han kal lah keini tan a rem rih silo a" ka ti zuai deuh ruih a, hetiang lam sawi hi chuan awm a nuamlo in thaw lak hi a sak deuh talh zel.




"Imm Pathian zarah a dam leh mai ang" a lo ti ve sup a, thildang han sawi vak tur a hre bik lo aniang kan han ngawi dun leh vang vang a, "I u khan kan inzui rei tawh em tih min zawt a" a lo ti leh khauh a, a hmel ka en chuan a thutak run a, a lungawi vak lo em mawni.


"An hresual deuh a, ka lo hrilh tha ang aw" ban charh hian ka ti a, nuamlo ka ti takzet tawh.



"Engnge i hrilh that tur chu?" lo ti lehin min rawn melh ve zawk a, "Ka.. Englo.. A chhan chu maw" ka ti bah nawk nawk chu lo nui hawk chung hian "A pawi hleinem" a lo ti leh mai a, "A pawi lo Malsawm, an ngaihdan ang chuan ngai reng zawk rawh se" tiin hmalam en chung chuan a nui leh suk a,
"Ngatinge?" tia ka zawhna chu a chhan ka hre chiah biklo.



Kan inkar tak hi sawi fel ngei ka duh tawh a, inhaw lovin inkawm reng mah ila eng emaw a lo awm tawh vang ringawt pawh khan a hma anga inpawh taka awm leh chu a harsa riau tawh a, chu chu a ni pawh hian a hrethiam ve ngeiin ka ring.



Ka lakah eng rilru nge a put a, thian angin min ngai ringawt tawh nge min lo la duh ve reng tihte pawh hriat chian ka duh a, amah lah hian engmah sawi chiang duh lovin beiseina min pe leh thin bawk nen, hmanni tlaia ka bianga a fawh ringawt chhante kha ka hre duh bawk a..



A ngawi tak reng avang chuan a banah nghawk zauhin "Kan inkar hi sawi chiang teh ang" ka ti leh halh a, zaktheilo min tiin ka awmdan chu lo zahpuiawm viau pawh ni se la, he thilah hi chuan zaklo anga ka awm a ngai miau a ni.




"Engtinnge kan sawi chian ang?"
A fiamthu em mawni chu le..


Thawk la hakin a hmel chu ka en vang vang a, min en let duh lovin hmalam ngawt chu a thlir thung a, a awmdan chu ka duh vaklo.



"Ka sawi awmzia i hria, hetianga awm ringawt hi chu a fello emai Rinte" ngenngawl deuha ka tih leh takah chuan min rawn en ve ta nge nge a, tawi tea min nuih sak chungin "Engtinnge awm i duh Malsawm? I duh dan angin kan awm dawn nia" a lo ti leh a, engah nge maw min chhaih kual reng mai chu le, a rilru diktak han sawi chiang ve mai se thatur ania..




"Ka awmdan ah hian i laka ka rilru te chu i hre vek tawh ang chu, zaktheilo min tiin min haw ru viau pawh a ni thei a, khatih lai khan keimah chiah ka in ngaihtuah a, i rilru tur kha ka lo ngaihtuah ngai lo va, ka tina che in i nun pawh ka tichhe lo chauh tihte ka hria a, a pawi ka ti.. "

"Malsawm.. "
Ka sawi zawh hma in chang zet hian a lo ti nghut a, ka tawng lai pawh ka tawp chiang ngang mai.



Ka hnar rawn thip hlar vang chuan tah chhuah mai hlauvin ka hmui ka pet fan fan a, min en reng tih hre mah ila a hmel chu ka en let ve duh lo.



"Hun kal tawh kha sawi chhuak tawh suh, a liam tawh" tiin ka sam chu a rawn tuai zauh a, mahse chu chu ka zawhna chhan na tur a la ni lo.



"I laka ka inthiamloh zia hi ka sawi chhuak zo kherlo ang, i awih emaw awih lo emaw, ka la duhin ka la hmangaih reng che a, kan naupanna rilru kha hrethiam lovin i lakah ka vui thin a, mahse i kal tâk hnuah pawh ka theihnghilh ngai lo che" ka ti leh sap sap a, ka tah chhuak nghal tun vang chuan ka aw te chu a zawiin a lawi rat tawh bawk nen, tawng pawh chu ka huphurh zo vek tawh.



A ni lah chuan ka sawi zawm hun nghak ni âwm takin min la en reng a, engah nge maw a rilru chu a sawi chhuah ve mai loh chu le, ka duhloh thleng thlengin ka sawi a ngaih phah ang tih te pawh ka hlau.



"Ngaihzawng ka la nei leh miahlo, eng angin nge min ngaih ka hrelo a, I lo let beiseina pawh ka nei chuanglo, mahse midang lakah ka rilru ka pe thei lova, ka beiseilo che ti chung hian ka.. "
Ka mittui rawn luang ringawt vang chuan ka tawng tawp chawt a, lehlam hawiin ka inhru hul nghal sawk sawk bawk.




Ka bul ami thaw chhuak suai suai ri chu ka hre reng a, a hmel chu ka en ngam tawh lo.
Zaktheilo ka inti in ka inzahpui takzet a, mahse a laka ka rilru diktak hi hria se ka duh bawk si, zanin thil thleng vang hian ka lakah lawm lovin min biak duh tawhloh phah ang tih te thlengin ka ngaihtuah hman a, ka awmdan zet chu aw...




"I tap em ni?" a tih chuan thawk la vakin lu ka thing ringawt a, "Min lo en teh" a tih leh pawh chuan ka la hawi chhuak duh chuanglo.




Ka darah rawn kuahin a lamah min pawt hnai a, loh theih lohin a lam chu ka hawi ve leh ta nge nge bawk.


"Engahnge hun kal tawh siam that theihloh vanga i tah duh?" tia a zawhna chu chhan dan tur pawh ka hre lo.



"Min huatna i nei ve miah lo em ni?" tah aw deuh chung chuan ka ti tiau a, a laka ka inthiamlo lutuk mawlh mai chuan min ti hrehawn zual a, hetianga ka laka that a la chhuah zel te hlei hlei hian ania ka awm ti nuamlo zawk ni, min ankhumin min hau vak vak se nuam ka ti zawk mai thei.



"Ka haw ngai lo che ka tih kha" a lo ti leh sup a, ka mitah tak min en vang chuan dawt a sawilo tih ka hria, "Anih chuan.. " tiin beisei nei fe in a mitah tak ka en let ve kal a, ka rilru hi hrethiam se ka ti takzet.




"Imm, nang tluka hmangaih ka la nei lo, ka la hmangaih reng che Malsawm" a ti a, a aw zawi leh thuk ruiha a thil sswi tawi te vang chuan kan chhehvel boruak chu a ding vek ni maiin ka hria, thildang ka ngaihtuah naah a leng tawh lova, amah chauh chu en in mawi deuha min lo nuihna chu ka nuih let ve thei ta bawk.









Cont...
Show post links
Top