LET's LOVE AGAIN BY Ziki_nu (Completed)

[ngaia]

LET's LOVE AGAIN



By Ziki nu



Chapter-16



"Khawvel nawmna chu hmangaihna hi a ni tiraw? Hmangaihna hi khawvel ti nuamtu a ni ka'n ti zawkteh ang. Min hmangaih ngawih ngawih tute bula awm chu a thlakhlelhawm a, chuvang chuan duhtak te nen nupa kawpchawia awm a, fanau neia tuma tihbuai phak loha awm hi mihring tuihalna a ni. Duhtakte bulah pangchang takin han awm ila, an âwmah bei ila, an ban lukhamin mu ila, chu chauh chu a ni lawm ni he khawvel tah leh rumna min theihnghilh tir Tu chu? Chu chauh chu a ni lawm ni nula leh tlangvalte inhmangaih chhan?"

Zikpuii pa in Hostel awmtu hrang chanchin a ziahnaa kha hostel awmtu hrang ina a thil sawi te chu ka ngaihtuah chhuak a, hmangaihna in thil a tihtheihzia leh mihringte min thunun nasat theihzia te ka ngaihtuah chhuak a, Rintea nena kan hun hmasa ah khan kan inhmangaihlo ka tihna a nilo, mahse kan inhmangaih naah khan kimlo a lo awm a, a famkim tawklo a, kan inthlakhlelhna te kha kan inhriatthiam tawn loh avangin dik takin a lo langchhuak theilo hi a lo ni a.

Induh tak chunga kan inthen chhan kha tunah chuan ka hre thiam tawhin ka hria, Pathian hnenah khan ka hlan thin a, hma hun êng tak kan neih dun theihna turin ka dil ve thin.
Mahse kan mihring rilru kha kan lo thunun zo thin lo a, keimahni harsatna ve ve kha kan lo inhriatthiam pui loh thin vangin kan inkar kha a nghet tak tak theilo a, induh reng chung khan kan inhnem tawn theilo tlat a, rilru na takin kan insiam tawn reng thin.




Mahse hun a liam a, chu hun liam tawh chuan kan ngaihtuahna te pawh a liampui ve lo thei lo a, kan tihdik lohte siamthat lehna hun kan nei hi Pathian remruat a nih ngei ka ring. Keini anga inhmangaih taka inthen te hi engzat tak awm ve ang maw, an inhmangaihna chu a tawpah a par chhuak ve ang nge lungchhiatthlak deuhin a tawp zawk ang.





Rintea nena kan inkar chu sawi thui a ngai tawhin ka ringlo, kum 4 liam taa inhriatthiam loh vanga kan leih mih tâk kan inhmangaihna mei mit tawh kha damdawi in boruak nuam lo takah kan chhem alh leh a, hun kal tawh chu siamtha thei tawh lo mah ila nunna kan la nei ve ve a, damchhung nun nuam zawk nei thei tur chuan beiseina kan la nei ve thei alawm.




Rin lawk ang ngeiin kan haw dawn chuan ruah a tla tan der tawh a, mahse a sur tam hmaa haw tho tho kan ngaih avangin hmanhmawh deuhin kan inphur chhuak a, thui pawh kan tlan hma in ruah chu a rawn baw nghal hawk a, tlan luih zel pawh pawi ka tih loh laiin ka hma ami chuan "I hritlang palh ang" a ti deuh tlat a, kawng sira waiting shed tha vak tawhlo kan hmuh rual chuan a zawnah a ding vat a, kan tlan lut rang khawp mai.





Zan thim a nih tawh bakah ruah a sur bawk nen fimkhur lo deuha ka lut chu a chhuat lo kaw rawngah chuan ka tla hawlh nghal zawt a, ka mal lehlam chu a pil vek nghe nghe.



A phone light a min lo chhunin Rintea chuan min khai chhuak a, ka na vaklo nachungin ka zak ru ve chem chem tho mai.



Ka bul ami lah chu a nui suk suk reng a, min nuihzat deuh nge mawni.



Kan awmna ah chuan thut ngamna tur pawh a awmlo, chhuat chu a lai tak ah zau angreng deuh hian a kaw hiang a, a chung rangva atang chuan ruah mal a rawn far fep fep thei bawk.
A sir lam atanga ruahin min rawn theh theih avangin remlo deuhin kan tawm chawih chawih reng a, a nuamlo tak zet.



"I hmanhmawh tawh em?" tia ka zawh chuan "Hmanhmawh lo e, ruah hi han deuh phawt rawh se" a lo ti ve mai a, tawng hriat a har avangin kan tawng ring dun viau bawk.



Ka pheikhawk chhung chu a huh vek tawh a, kan awmna in a zirloh em avangin inhnaih deuhin kan ding bawk a, ka lungphu rang lutuk chu a hriat hlauin thawk pawh ka thaw tha ngam meuhlo chu a ni e.



Ka kawng a rawn dawm rual chuan ka melh chho ha a, a hmel pawh chu ka hmuh chiang lutuk thei chuanglo, a dar ka chen tawk a, kan in hmuhloh chhung khan a lo than belh deuh em mawni ka ti hial.


Kan inkar kan sawi fel leh tawh bawk a, zak ve tho mah ila zak viau ang chuan ka lang duh bik lo.



"A vawt i ti em?" a tihchuan lu ka lo thing vat a, mahse ka kawr hnawm chap tawh chu ka taksa ah an bet thlar tawh a, a vawt ka ti tawh takzet.



A âwm si chetin amah hnaih lehzual chuan min pawm bet a, min kuah a ni zawk mah tawh ang chu, sawi tur a vang bawk si a, chil ka lem leh khalh thin.




"Ruah sur hnuaia awm kha nuam i la ti reng em?" tia min zawh chuan ka lo nui ve sak a, hritlang kai hma viau e tilo hian ruah do hi nuam ka ti a, inchhir tur tal pawhin ka do lui ngei ngei zel.



Mahse tleirawl at lai a ni a, tunah chuan ka nuam tihzawng ringawt ûm in ka hriselna ka dah nep thei tawh lo, ngaihtuah a tam tawh a, a pawimawh ber chu dam that a ni tih ka hrechiang ve tawh bawk em a.



"A nawm dan chu a la ngai reng?" tia ka chhan chuan "Mahse a tha lo" a lo ti ve leh sup a, sawi tur kan hrelo dun nasa mai si a, lai deuhin kan inen leh ringawt thin chu eng emaw zawng takin a romantic riau in ka hria a, ruah chu sur hunlo ti viau mah ila kan awmdan nen a inrem riauin ka hre bawk si.



"A van sur rei tawh ve" ti hapin ka hawi kual ruai a, kakawngn a dawmna a la thlah miau loh avangin ka che sawn thei lo va, min thlah lah chu a tum hmel si lo.


"I hmanhmawh em ni?" a tih chuan "A vawt ve deuh tawh a" ka lo ti leh mai a, nichin lawkah a vawhloh thu in ka chhang si a, ka hriatchhuah leh chuan ka sawi zo vek tawh bawk si.



Ka kawng a dawmna kut lehlam chuan ka biang a rawn dawm a, a ngaihna hrelo deuha ka melh chho ha chu mawi deuha lo kiai sukin, "Dawt sawi tawh loh tur aw" tih leh ka hmuia min fawh a rual a, chhan let ngaihna pawh ka hrelo!




Dimte leh duhthawh zet siin min fawp a, ami fawhna chu chhungrilah eng emaw zawng takin min fan raih raih ni mai hian ka hria.
Ka hmui ka tihchet ve rual chuan a phur sauh emaw tih tur in min dawmna chu a tinghet salh a, ka insum duh ta bik lo.

Duhthawh leh inthlahlel em em in ruahsur bur bur karah chuan kan in hmangaihna chu âm takin kan lantir dun a, kawl phe zuai zuai te chuan kan inkar chu min dang eih lo.



Min fawhna a duhtawk rual chuan a chalin ka chal a rawn nawr si vang vang a, "Hun kal tawha ka tihsualah khan min ngaihdam rawh Malsawm" tiin ngaihdam min dil zui a..
Hepa hi eng ang mipa nge maw a nih bik chu le, buaina kha keima siam a ni thin a, kan inkar thu pawt chat Tu leh rilru na taka siamtu pawh keimah ka ni. Engtinnge ngaihdam min la dil theih zawk..?




"Tinge ngaihdam min dil?"
Ka aw chu a ri chhuak chang chang chauh a ni, mahse kan indin hnaih em a, a hre pha tho tih ka hria.


"Khatianga thutlukna duhawmloh zet mai siam tur khan ka lo nawr na lutuk che a, ka laka i beidawn tawpah khatiang khan i awm a, mahse ka tiam ang che, a thleng nawn tawh lovang, beidawngin ka siam tawhlo ang che aw Malsawm" a ti mawlh mawlh a, a thutak hle tih ka hai lo.



A mitah tak chuan chiang deuhin ka en a, a thil sawiha a chian zia leh min hmangaihna thûk tak ka hmuh thei a ni.



"Imm ka ring che alawm" ka tih chuan thaw veng huai hmel a pu a, a hmui chu ka chalah nawr si leh vang vangin "Ka hmangaih reng che" a ti zawi leh sup a, a vawi eng emaw zat nan a lakah chuan ka luangliam nawn leh a ni.




Rei fe ruah sur chu kan nghah hnuah kan tlan chhuak ve leh ta chauh a, ka kawr pan thler chu a lo hmuh hmaih biklo. A kawrlum phelhin min haktir a, a bike hnunga ka chuan leh hnu pawh chuan nghet deuhin a kawngah ka kuah leh thei tawh a, ka hlimna chu eng nen mah ka thleng phal bik lo ang.




In kan thlen meuh chuan dar 10 a ri thuak tawh a, kan thuamhnaw a hnawm deuh vek bawk nen Rintea pawh chu rawn lut kawi tawh lovin a haw tlang ve nghal a, a damloh zui loh hram ka beisei.




U Mama chuan "Phone i va la thei lo ve, ruah a sur bawk si a, ka ngaihtuah che alawm" a lo ti nghal hluk a, kawngka ka khar leh nghal mai chu "I thianpa kha a lo lut ve dawnlo em ni?" a ti nghal zat bawk.



"Aw.. A haw tlang nghal anih kha, ruahin min dang rei lutuk a, kan hnawm chap reng alawm, phone khawih theihna chi pawh a nilo" tiin bual in lam ka pan nghal a, a vawt bawk nen inbual thuak thuakin ka inha lum nghal a, ka ril pawh a tam leh rawih rawih tawh.



Mut hma in chaw chu tlem ka bar leh a, U Mama pawhin "Thawh hma i ngaih chuan mu nghal rawh, naktukah kan ti ti dawn nia" a lo ti ve mai bawk nen khumah ka mu a, a ni thutthleng sei ah a mu thung.




Rintea chu a la reh vang vang a, ka mut nghal thu hrilhin ka chau ve deuh bawk nen min chhan let hun pawh nghak tawh lo chuan ka mu tha nghal sawt sawt a, ka muhil hma khawp mai.





...





Zingah ka u in min kaitho a, eirawngbawl a ngailo bawka ka che hmanhmawh lutuk peihlo.


"School chu kal phawt la, chaw ei hma ila Mazari chu keiman ka va thlak mai ang, duh leh a haw na tur taxi fare te chu kan pe mai anga" a tih chuan ka lo bu nghat nghat a, "Tetei la awm ve se tha tur ania, min chhawk zangkhai ve theih tehlul nen" a tih leh nuah nuah lai chuan chaw ei siam pahin "Khi lamah naupangho an ngaihtuahawm ve tho a, innu pawh a buai khawp ang, U Mazari a awm a, a ni lakah chuan inthlahrun vak a ngai lo zawk alawm" ka lo ti ve a, a ruk tak chuan ka inthlahrung ve viau tho.



Tukthuan ei khamah school kal turin ka insiam nghal a, ka chhuah pahin U Dintei te nufa chu ka tlawh kawi leh zawk bawk a, ka nu chanchinte pawh min lo zawt ve luam a, an ni unau hi chu an awmlo ang tih ka hlau ngawt mai.



School ka thlen rual in ka thawhpuite chuan chanchin min lo zawt ve sap sap bawk a, hmasawnna sawi tur em em la awm rihlo mah se chutia min ngaihsaka min lo ngaihven ve tih hriat ringawt pawh chuan thla a muang ve suai suai tho a, mizo nih hi nuam ka ti thar viau bawk.







Karkhat lai ka kalloh avangin midang zawng ai chuan ka buai a, chhun chawlh pawh ka nei hman ve meuhlo a ni.



Aruata lah chuan min chhuahchhal pah deuhin Nunpuia hming lam rik leh zauh hi a ching a, engah vak ngai duhlo mah ila keimah zawk min dem leh lutuk chu ka lawm vaklo thin.



"Han hnawl kual vel lo la chuan tunah te hian ram pawnah nuamsa takin I zinkual ham ham ang mawle" ka dawhkana ka coffee dah rawn lem khalh paha a tih leh takah chuan "I hneawm hle mai, sawi sek suh" ka lo ti hlar a, ka duh aiin ka vin deuh naa pawi ka ti lutuk duh tawh biklo.


"Awi awi Lalmalsawm, thinchhe lalnu" te chu min la ti tak ang deuh deuh a, tawngkam vina ka biak khat tehlul nen.



"Ka duhzawng a nilo a ni mai a, engahnge maw min dem reng chu le" ka tih leh chuan "I demawm alawm" a lo ti leh hmak a, vei tak hian.


"Ka demawmna chu sawi la" ka ti leh ngat a, "Mahni tana tha tur pawh hrelo, mawl thlak lutuk" a ti leh zet chu ka ngaihdan a ni tawh lo nasa mai.


"Keima tana tha tur chu ka hre ve bawk e, i thianpa hming kha ka hriatah sawi sek tawhnlo la a tha a ni mai, bialpa ka nei" ka ti ve ta hmak a, min en phawk ngang mai.




Ka thil sawi chu hriat chian chak hmel lutukin kawngkhar atang Riny a rawn tlan lut nghal a, "Awi tunge sawi vat teh? Engatinge thil hi min hrilh ve nghal vat thin loh a?" ti sawk sawkin ka thutna bulah chair a rawn hûng hnai zui a, a va han over tak.



"Sawi na hun pawh a la awmlo alawm" ka tih chuan Aruata zawkin "A nei tak tak awmlo emai, rim tlut tlut pawn awmzia a awm hleinem" a lo ti leh tawh a, "Lo ngawi mai mai rawh, nanga nupui hmu zolo khan midang chanchin lo ngaihven ve lo mai teh" ka thiannu lah chuan a lo ti pek a, an inmelh rum nasa mai.



"Ve tak che hian, pasal i hmuh zawh bik tawp loh kha" ti hluk hlukin Aruata chu a kalsawn ta hlauh a, thawk ka lo la huai mai.


"Va han tawngthei zep zuap tak, kan duh zawng an nih miau loh chuan min rim tlut tlut mah se kan ten tulh tulh zawk thei tho alawm tiraw" tia ka thiannu in min rawn melh ralh lai chuan ka lo nui ve hak a, ka chhang let tawh lem lo.


"Tunge i bialpa chu? I nei tak tak em?" a hma aia zawi leh hriat chak hmel zawk hian a rawn ti leh sar sar a, min thut hnaih tawh viau mai.


Lai deuh chunga lu ka buk nghat rual chuan a hmui hupin zat hmel deuh hian a che sek a, hei pawh hi Aruata nen an inang reng, an over thei lutuk.




"Ka ring chhin dawn, I bialpa hlui kha a ni em, Rintea tiraw?" a tih leh takah chuan aw ka lo pawh leh thuai a, "In awmdan i sawi atang khan in inzui leh chu ka ring sa hrim hrim, han sawisel viau dawn in amah ka la hrechiang ve vak si lo a, mahse nula fing leh puitling tawh ina i thlan chu a chhe lo tur ah ka ngai" a ti leh duah a, chu chu keipawhin ka beisei alawm.




Tlai ban hnuah pawh midang zawng zawng haw hnuah thildang tiin ka la thu kawi leh rih a, ka thiante pahnih chu an inhnial nasa bawk nen inphur haw thei lovin Riny zawkin taxi a la a, naktukah chuan an rawn kal dun leh thoin ka ring.




Ka haw tur chu ka scooty ka tinung thei ta hauhlo a, petrol lah chu a la tam hle si, ka beih ngial hnuah pawh a nun theihloh avangin ka beidawng chuan Rintea ka call ta ringawt a, a ni lah chu Venghluia a pu te in ah chaw ei turin an chhungin an lo phei vek hi a lo ni a, ka inthlahrung chuan "Taxi ka la mai ang" ka han ti leh zet a, mahse a lo kal theih thu a sawi tlat avangin ka lo nghak leh ta zawk.



Garage ah chuan ka nghak reng a, chhunah thil ka ei mumal hman loh avangin ka ril chu a tam riau bawk nen, nghah chhunga lo ei mai mai tur kamram leiin ka chhuak chho leh rih a, khua lah chu a dur leh khui khui tawh, zanah chuan a sur leh ngei ang.



Dawr kawta kamram tur leia ka din lai chuan ka hnung lam atangin Tu emaw hian ka darah a rawn kuah uai hnawk a, ka lo inring lawk lo bawk nen ka che dawt mai.




Ka hawi let chuan tum loh deuhin Nunpuia ka hmu a, a hma ang chiahin nui vur vurin min lo en leh tawh.


"Ehe.. Engnge awm zia? I zin emaw ka tia?" ka ti ve hluai a, "Ka lo haw leh tawh" tia hawi kual thuakin "I va haw tlai ve?" a ti leh nghal zat a, ka scooty chhiat thu leh min lo hruai tur thu ka sawi chuan a meng nur deuh nang a, "Ka awm loh hlanin hruaitu tur dangte i lo nei hman a ni maw?" fiamthu titiha a tih leh lai chuan chhan mai ngaihna pawh ka hrelo.

Ka inhmuh hnuhnun ber kha chuan ka lakah lawm lovin min haw hle kha a ni si a, a zin tur thu pawh engmah min hrilh lo a, a thianpa lah chuan min demin min haw em em bawk a, tunah tihian tha deuhin min be leh bawrh bawrh a, hepa awmdan hi ka hre thiam lo.




Dawr nghaktu in pawisa min kir fel hnu chuan han kalsan mai chu ni chiahin ka hre bik si lo a, "Eng nge hetah i tih reng reng?" tia ka zawh chuan "Ka leng kual mai mai, i scooty chu a englai nge chhia a, ka lo enpui dawn che em ni?" a lo ti vat a, Rintea a lo kal dawn tho chuan tul pawh ka ti lem lo.



"A nung theilo ringawt a, workshop ah kalpui ila an siamtha vat thei tho ang" ka ti ve mai a, kawng ka kân tur chu min lo zui ve zel a, "I la haw dawnlo em ni a?" nui chunga ka tih leh chuan a dar lo chhin akin "Ka lo nghahpui ang che" a ti mauh mai.



"A tullo emai a, a tlai tawh hi, a lo thleng ve tep ang" ka tih pawh chuan "Ka nghahpui hman che alawm" a ti tlat a, school kawtah chuan min dinpui ve leh ta reng.


Rintea lah chu ka rin ai daihin a rawn thleng har a, khua a dur chakin ruah lah chuan sur a chak tawh hmel mai bawk nen, ka awmdan chu a lai ru riau tawh.



"I be chiang lo em ni a? A va han rei em em" a phone hmet mual mual chunga ka bul ami in a tih chuan "A lo thleng tep ang" tih chauhin ka chhang a, ka tum bar tawh mai.



"Hmeichhia zawkin i nghak reng mai zel a ni maw" nuihzat hmel deuha a tih leh phei chuan ka baga ka phone hu phawrh chhuak sawk sawkin call mai ka tum a, chutih laia bike chak deuha rawn tlan thaw fua chuan min rawn hnaih êm avangin ka hnung lamah ka tawlh let dawrh a, Nunpuia'n min lo dawm hman hlauh lo se la chuan mawng sawh dawpin ka tlu ngei ngei ang.


"A van mawl e aw" ti hlak chung chuan ka inbih thuak thuak a, "A tai hman che em, zawnga mai mai chuh" lo ti ve hlukin Nunpuia chuan min thlek ve thuak thuak a, na ka nei hauhlo na in ka lungphu erawh a su ve dup dup hman tho mai.



"I na lo tak tak maw?" ka banrek dawm meuha lo ti lehin min en uluk viau a, kan hma lawka bike rawn ding ri hrawk ah chuan kan hawi rual zawt bawk.




Zawhna mitmengin Rintea chuan min lo en ran a, helmet fullface a khum a vangin a hmel tak phei chu ka hmu theilo. A mitmeng atang chuan kan lo awmdan chu mak a ti tih a lang reng a, Nunpuia kher a lo ni bawk nen insawifiah ngei ka ngai dawnin ka hria.



"I van rei" sawi mai tur ka hrelo chuan ka han ti nghal ngawt pek a, a ni chuan ka bul ami zawk chu melh zawkin "Engnge in lo tih?" a ti thum dut a , a lungawilo chiang a ni.



Ka chhan hma in Nunpuia chuan min lo tawng khalh a, "I rei hle mai a, kan lo nghakhlel che alawm" nui sung hian a lo ti a, kan hma ami chu a nuih a za ve hauhlo tih a mitmengah a hriat reng.



"I lo thlen hma chiah khan chak deuhin bike a rawn tlan a, min su thelh alawm" ka lo tih chuan a bu nghut ringawt a, 'chuang rawh' ti ni âwm takin a bike hnung chu a thlek zawk bawk a, ka lawn rang khawp mai.



"A nih aw Sawmi" tia Nunpuia min thlahna pawh chu ka chhang let lo. A ngainat loh zia ka hre ve reng a, a hmuh lai ngat phei chuan biak that chu ka hreh ve riau a ni.




Kan tlan chhuah hnu pawh chuan min be mai lo va, ka inthlahrung ru em em ringawt. "Ka rin aiin i lo thleng har a" ka han ti hmasa te te a, ka eitur lei ho pawh chu ka ei ta lo.


"Traffic a jam nasa lutuk" tih zawngin min chhang a, sawi leh mai tur pawh ka hre tawh lo.
Min lo hmuh dan kha a fu chiah bik silo a, ngaihdan dang a nei deuhin ka ring tlat.


"I ngaih ang kha a ni miahlo ania aw, dawra thil ka lei laiin Nunpuia kha a rawn lang hlawl a, engtik laiin nge a lo haw pawh ka hre lo" ka ti mawlh mawlh a, "In va inngaihsak hmel ve" a lo tih nghut vang chuan ka ngawi leh dâk mai.


"In awmdan kha inngaizawng in ang" a la ti zui a, awihawm loh lutuk.


"Bike a rawn tlan chak lutuk a, ka tlu tep alawm" tum barin ka ti ve leh a, a ngawi vang vang chu a helmet hnung lam ka lo melh tlawk tlawk ringawt.


In kan thlen hma chu kan inbe leh ta miahlo a, bike atanga ka chhuk rual in a helmet chu a lo la thla ve chiah a, a hmelah chuan han lungawilo viau hmel phei chu a lang hran lo.



"I lo lut dawn em?" ka tih chuan a lu thingin, "Khapa kha hnaih tawh suh aw, a tha lo" a lo ti sup a, kan sawi tawh dawnlo emaw ka tih hnuah..


"Imm, I thik a ni maw?" nui chunga ka tih chuan lo kiai ve sukin, "Ka duh phawt chuan ka thik thei alawm, hnaih lo la a tha a ni mai" a ti leh a, keipawh ka nui var var tawh.



"Lut tawh rawh, keipawh ruah sur hmaa thlen phei leh hman a ngai" a tih hnuah in mangtha in ka kalsan a, inchhung ka luh rualin a tlan chhuak thawm chu ka hre zui bawk.




Inthlak sawk sawk pahin U Mama ka call a, an buai deuh nge mawni a chhang lawk lo, ka call nawn leh naah chuan a rawn chhang ve ta hram a, "Aw Sawmi, I haw tawh em ni?" a rawn tih nghal thuai a, a hah hmel riauin ka hria.


"Aw in ka thleng chiah, engnge ka nu chu a an?" tiin ka lo zawt let ve thuai a, "Chhunah khan eng eng emaw a ei ve nual a, kan lawm hman tehreng nen hei a luak chhuak leh vek, amah hi a chau lutuk a, Mazari nen khan kan inbe tawh a, in hman hunah rawn kal dun mai rawh u, chaw pawh rawn ken a ngailo, ka haw hunah ka ei mai ang" a rawn ti zung zung a, ka nu tha chaklo lutuk mawlh mai chuan rilru a ti hrehawm.



Intifai zung zungin U Mazari chu ka sawm chho a, u Aldrina leh u Linda-i te an lo awm ve bawk a, chanchinte min lo zawtin U Aldrina chuan "Nunpuia pawh nimin khan a rawn haw a, I nu chu rawn kan ve te kha a sawiin ka hria" a lo ti var a, mahse ka uksak lutuk lo.



U Mazari hman velah damdawi in lam panin kan inphur chhuak leh nghal a, "I u khan a hrilh che em?" a tih chuan "Eng?" kka lo ti let he haw a, "Cabin ruak kha a awm thei tawh dawn a, hmunpui lamah an refer a ni âwm e, zanina an chhuah loh pawhin naktukah chuan an chhuak fel tawh ang" a ti a, "A va lawmawm ve" lo ti ve hluaiin kan ti ti phei bawrh bawrh a, khua a thim tawh avangin ka tlan chak lutuk ngam bawk lo nen, kan thleng hma vak lo.




Ka nu chu a lo muhil leh mek tawh a, U Mama ka hmu mai lo.

Ka call chuan a chhang lo va, zunram thiara a kal lawk anih ringin U Mazari nen chuan kan thut chilh a, rei vaklo ah ka u pawh chu a rawn let ve leh mai bawk.



"Doctor nen kan inbe zo chiah a, zanin chu cabin lamah kan insawn ve thei tawh ang" a rawn ti a, kna phur tlang khawp mai.


Zanriah ei hun âwm velah an insawn chhuah avangin keini pawh chu chawpchilh deuhin kan insuan lut ve nghal a, dar 8 bawrah kan intifel thei chauh a ni.




U Mama chaw ei lo a la nih vangin rei pawh awm tawh lovin kan haw leh nghal a, u Mazari nen an inriah chhawk dawn a ni rih ber mai. Kei ka hmaah chawlh a rem tawh chiah si lova, inthlahrung ve viau mah ila an awmlo ang tih ka hlau takzet.



U Mama'n motor a ken ve tho avangin a hran ve ve in kan haw a,in kan thlen chuan chaw ei siamsak sawk sawkin a ei chhung chuan a inbual tui tur ka lum bawk a, phone ka en ve hman meuh chuan dar pawh a lo tlai ve leh tawh.



Rintea hnen atangin message a lo awm va va tawh a, a thian hlui te nena an inhmuhkhawm tur thu a rawn sawi a, "Aw le" tih bak chuan han chhan vak ngaihna ka hre lo.


Min chhan mai pawh ka rinloh laiin ka message chu a rawn chhang let vat a, a haw tawh thu a rawn sawi chuan mak ka ti ang reng khawp mai.


"I va haw hma ve" ka tih chuan "Rei tak tak ka leng ngai hleinem" a rawn ti vel ngei a, kan tleirawl lai kha chuan dar 12 rik hma in a haw ngai meuhlo a, kan inhauh tamna ber pawh a ni thin.


Chutia a rawn inla fel vel lutuk chuan ka nuih a tiza khawp mai a, ka lo nui rei deuh nge ka u chuan "I va khi nasa ve" a rawn ti zauh a, ka hmui ka chip leh rang khawp mai.




A chaw eina ka sengfel zawh chuan thutthlengah kan thu dun a, rin ang ngeiin Rintea chanchin chu min zawt a, han sawi viau ngaihna pawh ka hrelo.
"Tlangval fel tak chu a ang a, eng hna nge a thawh?" a tih chuan ka ngawi deuh vang vang a, ka u lah chuan nuihza hmel deuhin "Hnathawh a neilo em ni?" a lo ti leh kher a, ka melh rum khawp mai.


"Sorkar hna thawklo mah se a talent hmangin career a insiamchawp thei alawm, music a tum thiam teh mai ania, hmusit miah suh" ka lo ti khar khar a, "Ka hmusit tihna a ni hleinem, ruihtheihthil te a tih loha a nungchang a that chuan a tha a ni mai a, mahse tunlaithangtharte hian inngaihsan zawng hi an maksak thin lutuk a, khawlaia bike chak deuh deuha khalh chunga inla changkang, chhungte thawhchhuah hmanga thaw lian ve mai maiho ngaisang pawl hi an awm a, I lo ni ve ang tih ka hlau mawle?" a ti duat a, a ngaihtuahna chu âwm lo ka ti hranlo.




"Rintea chu chutiang mi a nilo, Tunah pawh hian a eizawnna tur a buaipui ve mek alawm" ka tih chuan min en run runin, "Kan dinhmun heti hi a ni a, pasal i thlan fimkhur a ngai khawp ang" tig zawng sawiin inbual turin bual in lam min pansan ta daih a, chutiang thilte chu hrelo ka ni bik tawp si lo.





Ni a liam ve zel a, ka nu dinhmun pawhin ngai a la awh a ni ber mai, u Mama leh u Mazari ten an inriah chhawk mai thin a, kartawpah keiin riahpui ka rilruk thung.



Zirtawp ni tlaiah Rintea'n an ina chaw ei turin min sawm a, ka hnial tang tang chung pawhin min sawm lui ngar ngar mai a, engnge maw a hriat ni.


Kum 4 liam taah kha chuan kan inkar min hriatpui vek avangin keipawh ka tlangnel a, an inah pawh ka kal ve fo thin. Mahse kan inthen hnua Rintea awmdan leh dinhmun zawng zawngte ka nfgaihtuahin a chhungte tan chuan ka demawm êm a, an fapa duat em em rilru tina Tu leh ruihhlo hial a khawih chhan ka ni a, an ina han chuankai leh pawh chu hreh tak te in ka hreh tawh a ni.




"Hreh chhan tur a awmlo, an ngainat thin em che kha" a tih chuan thawk la hapin "Chutiang ringawt pawh a ni tawh lo, thil thleng vang khan min ngaihdante pawh a dang vek tawh dawn a, tunah thawt thawt chuan ka lo la kal duhlo" ka ti a, a ngenin ka ngen a ni mah tawh.



"Tunah a nih loh chuan engtikah nge ni ang? Hmachhawn ngai apiang chu hmachhawn dun vat zawk teh ang Malsawm" a ti deuh nghut a, phone call a inbia ni mah ila a hmel landan tur thlengin ka mitthla thei vek.




A mi ngenna lah chu a thutak ang reng bawk si a, ka hnial hreh tluk zetin an ina kal pawh chu ka hreh.


"I chhungten engpawh sawi se la ngawi mai mai rawh aw, ka laka an lawmlohna te an sawi chhuah pawhin chhang let lo la" ka tih chuan aw a lo pawh ve mai a, ka thlavang a hauh dawn tih ka hre lawk reng a, keimah vanga an chhungkua an buai chu ka hlauber a ni.





School banah min rawn lam a, ka scooty erawh workshop ah a la awm thung. A siamthatna tur ber part kha an lo neih loh avangin an chah chawp a, an khawih muang ang reng khawp mai, kartluanin ka dah tawh.




An in kawta kan ding hnu thleng pawh chuan "Let leh mai ang" ka ti leh thin a, ka huphurh tulh tulh mai.



Ka banah kaiin min luhpui a, a hmaa ka lo tlangnel em em tawhna in kha a la ni reng a, mahse tunah chuan ka t(r)ih a ni deuh ber tawh.



In chhung kan han lut chu a lo reh deuh thap a, thaw dep dep chunga sitting room lam kan pan lai chuan tumloh deuhin Rinfeli pasal Famkima leh an naute an lo awm a, nui heu chunga min lo en in "In rawn inhruai haw thei maw?" a lo ti var a, a ni pawh a awm chuan a nupui chu a awm ve ngei anga, kan inbe fuh vaklo bawk nen an ni chu awm ve lo se ka ti takzer.





Choka lam atangin Rintea nu Nu Nutei a rawn chhuak ve chiah a, hmel hmuh nuamlo a pu lemlo na in min be lova, a fapa zawk chu en in "I pa in motor lo sil rawh se a tih kha, naktukah kal leh nghal a ngai dawn anih chu" a ti a, kei chu min kalpel in a tupa chu a pawm a, an pindan lamah a luhpui ta in ka hria.




A hma a ang thei tawhlo tiin infuih ru ve mawlh mawlh mah ila ka inthunun zo meuhlo chu a ni e, min dawnsawn that thinzia leh an ina ka len changa min be siam siam thinte kha ka ngaihtuah let a, a hrehawm ka ti, ka ipik tun mai.