OBEDA BY Natasha Hrahsel (Completed)

[ngaia]

CH-5







Ni hnih damlo khuma han mut ngawt ngawt chu ahneawm duh khawp mai.Civil angah te chuan awm ilang min zai ni tuk la la khan kan chhuah ngei ka ring a,pvt hospital erawh hi chuan min chelh ngawng ngawng thung.
U Obeda lah hna a chawl ve ngawt a,min awmpui chawt bawk si nen inthlahrun ana duh viau.





Tunah chawhnu lam dar khat a pel awrh a,damdawiin kan luh ni nen ni thum kan awmna chiah ani.Na em em ka neih tawhloh vangin chhuah mai pawh pawi ka tilo a,doctor ward rawn fang erawh chuan vawin ni tal la awm turin min ti thung.U Obeda lahin alo pawm hmiah a,diktak chuan dam reng chunga mu ang thaw thang ka ni tawh nen ka ning ve takzet tawh.





Nurse rawn lutin damdawi lei ngai a rawn sawi chuan ka pasal a tho nghal thuai a, "Kimte,ka han lei lawk ang aw"tiin min rawn leh rih.
Ka lu buk khum nghauh chuan "ka rawn let harlo ang"ti supin a chhuak zui nghal mai.

Tukin a Judy'n ka sam min phiarsak chu ka tuai mam thuak thuak a,ka chapal bunin ka tawm ning lutuk chu chhuah harh ka tum ve ringawt.





Ka cabin awmna tang chuan ka chhuak a,nurse duty ten mamawh ka neih leh neihloh minlo zawt nghal thuai.
Ka chhuah harh mai mai thu ka sawi chuan nui sangin an thutna ngaiah min letsan leh mai bawk.






Inchunglam step pan chhohna ah ka chho a,kan luh tirh atang khan kan room pawn lam ka la chhuak leh miahlo kha ania! Cabin pawn ka rap ringawt pawh chu boruak a dang zar ten kan hre ringawt pek.

Ka chhuakchho hlawl a,in entir tum la nghak mek pawh an lo la tam ngang mai.Kawngkhar lam panin ka pen a,damdawi zawrhna a ka pasal lo la intlar ve mek pawh ka hmu nghal zat.A hnungah ding awm ve nual mahse a sangtha in a pumrua alian hrim hrim a,hmuhloh theih pawh anilo.Min hnungchhawn zawnga a din vangin min hmu ve lo thung.






Tap rawng rawng ri chuan ka pasal lak atang min hawisawn tir a,mitthi an awm anih mai hmel e! Kan piah deuh lawkah hian mi anlo tam khawp.Mitthi chu Ambulance ah anlo hlang lut dawn vel mek bawk.
"Ka fapa..ala naupang asin!Tinge tianga kan inhruai haw a ngaih tak mai le?"Nu pakhat hian tap tuau in alo ti lawm lawm a,mitthi chu a fapa anih hmel.A lo dawm tu te pawh an insut ve faih faih mai.




"Tho leh teh Mapui,inu hi min kalsan hma mah mah iti lo em ni?"a ti leh vawng vawng a,kawngkhar vawnna vuanin ka mittui lo luangthla ve ngiai ngiai chu ka tual hul nghal thuai.
Ka hmelhriat an ni miahlo mahse mitthi in leh khawhar in a ka kal apiang hian an tap ri hian min vilh a,ka mitttui alo tla ve leh ringawt thin!






Ambulance ah chuan an inhlang lut a,mitthi ta nu chuangtur te chu a tah nasat vang nge alawn hleithei meuhlo.A khûr nasa hle tih ka dinna atang pawhin ka hmu thei a,ava han na vawng vawng dawn tak.



"Kimte!"



Ka mittui chu tuai hul thuai in Ka pasal ka bula lo ding reng tawh chu ka melh chho a,ka hnâr a thîp hman hlur thei.
"Tinge i tah a?"bangbo zet hian a ti sup.

Mitthi an phurhna lam chu ka melh a,anlo tlânchhuak dawn chiah. "An khawngaihthlak reuh lutuk a"ka ti hnawk tuak mai.




"Inthen angaihna rama awm kan ni miau si a,a kal hmasa kan nih loh chuan tawrhdan thiam kan ngai hle ani.Room lamah let tawh ang le,vawin chu thli athaw riau a hritlang i kai palh hlauh ange" a ti zui dap a,chhanglo in ka inher ve mai bawk.

Room a kan lut chu ka la pik deuh tun a,ngaia neih hi ahar ka ti ve takzet.Ka hmelhriat pawh ni lemlo te tawrhna a ka lo tahpui be hliam hliam thin hi ka zak thin viau a,tunah chuan zah ah pawh ka en tawh lo.





"I duh chuan muhil leh la" a ti chu "ka mu hnem tawh lutuk a ka pang akham vek tawh" tih pahin sofa ah chuan ka thu thla ta zawk a,ka bulah ani pawh a rawm thu thla ve mai bawk.

"U Obeda,i chunga ka thinrim vang khan ka tihpalh lutuk ania aw.Ka inngaihtuah chiang hman lo ani"ka ti sep a,tuna kngaihdam ka dil lo anih chuan nakin ah ka dil ngam ka ring tawhlo.Ka rial rei pauh leh ka hreh telh telh dawn tih ka chiang.






"Ka thiamloh zawk alawm,engkim hrilh hre sa tur che ka nia sin mawle" a ti ve ruih.




"Ka tawrhna chauh ka lo dah lian a,i tawrhna ka lo hmu tel ve lo a"ka tih leh chuan chîk zet hian min melh vawng vawng.
Chutia ngawi renga min en reng vang chuan ka lai leh si a "enge a? Ka hmaiah kai a awm ami?"ka ti ta nge nge.




A lu thing nghutin "ka hrechiang telh telh che a hriatchian lehzual che chakna ka neih belh deuh deuh zel a!" A ti ta sup a! A sawi awmzia chu ka hrethiam mai lo.Min hriatchian a châk ve tih chin chiah ka hrethiam.
"Nupa dang te angin inhmangaihna kan nupa karah tel ve lo mahse thian ang tal pawh a inkawm chhoh tal tum ila tiraw?" Ka ti a,thian anga kan inkawm chhoh hmasak chu a fuh berin ka ring.






"Atha alawm,Kimte ka nupui inih angin hmangaih che ka tum dawn ani tih erawh min hriatsak la,nang pawhin chutiang chuan itih ve ngei phut ngamlo mah ilang ka beisei ang."a ti deuh khawl!
A thil sawidan teh khawl vang chuan ka melh zawk a,a thutak hle tih ka hriat erawh chuan ka hawisawn rang ngei mai.

"Naktuk ah chuan chhuah dil ang aw,ka ning tawh emai"ka ti ta ringawt.





"Kan dil dawn nia,damtha var in chhuak la ka duh viau a,helai hmuna awm ai chuan inlam nuam itih ka ring leh ta zawk" a ti ve leh mai bawk.






Pangai taka kan titi dun tak vang kha nge ni thu ho te te sawiin kan inkawm chho thei ta phian a,tlai lama min rawn kan tum an rawn kal te chu ka lo ui viau.Ka pasal nen a inkawm chhoh zel kha ka duh em ani.Midang rawn kalin kan ze ngai bawk ah min kir tir leh mai ka hlau a,mahse afâl a kan awm leh hnu ah pawh min be hmasa ve ta zeuh zeuh tho.






Atuk khua alo var chuan tuk dang zawng aiin ka inti harh a,doctor in ward alo fan dawn pawhin khumah mu duhlo in sofa ah ka lo thu vel ngei bawk.
Ka nin zia an hre tawh bawk a ka chhuah chu min phalsak ta hram a,indim tur erawh chuan min chah ngun hle.






Ka chhuah theih tur thu chhungkhat laina hnai te kan hrilh hnu lawkah keima nu leh pa te zawk an rawm thleng nghal a,bungrua ka nu'n a siam chhungin ka pasalin bill vel alo han tifel bawk.

Durtlang lamah chuan kan inphur chho a,ka nu leh pa ten kan hnungah min zui bawk.Ka ban chu tuam rei ala ngaih deuh dawn vangin a awrhna tur U Obeda chuan angaihtuah nghal sa thlap a,dah thlak tawp ai chuan awrh in awm pawh a ti nuam zawk.Inven rûn angai lo bawk nen a rem hre phian mai.






In kan thleng pawh ka nu leh pa (Obeda nu leh pa) ten minlo lawm thiam ngei mai.Room lama hahchawl turin min ti nghal lawm lawm mahse mut ka nin tawh thu sawiin an zing ah chuan ka thu ve ta tlat thung.






Kan thlen atanga darkar khat a liam awrh tih ah U Zawni te nufa ho an rawn lang ve hlawl a,kan ri ta chuah chuah ani ber.
"Naupang aharh rual an la nisia,damdawiin a i awm chhungin vawikhat bak ka rawm tlawh hmanlo cheu a hei ka rawn hruai tel tawp anih hi"inthlahrung zet hian a ti nang nang a,Jordana chu apu in pawm nghal in Sangsangi te unau pawh ka pasal nu in choka lamah eitur a buatsaih sak nghal bawk.Naupang an lawm khawp mai.





"I buai dawn nen min rawn thlawh kher duh a,ka tha lutuk ania"ka ti ve luam a,an in chhak a accident tawk ka ni nen alo inthiamlo viau ani awm a,a zialo tak tak.

"Obeda chu i chawl ve tawp mai a,i hna lamah an buai phah viau lo ang maw?"tiin ka pasal chu abe zui a,ka pasal pawhin "buai phah lo ang" alo ti ve mai bawk.





Thingpui te kan infel hnu ah U Zawni chu ka bul a thu turin ka hui zeuh.
Ani lah a hrethiamlo nge ni "mamawh inei em Mate?"alo ti lauh mai!




Ka then chak a "Ih..ka nu leh pate awmlai hian maw,ka inbual minlo pui thei ngem ka ti deuh"sawi rik duhloh viau mah ilang hrethiam heklo le midang awmlai chuan ka sawi ta lo theilo.

"E thei lutuk e le" a ti zui hluai a,nithum dawn inbual lo in ka inhru fai ringawt tawh a,ka tlin tawh ngang dawnin ka hrelo ka inbual loh chuan.





Room lamah inzui chho in ka thawmhnaw hak tur te chu ka la chhuak a,U Obeda chuan ka zak dawn tih ahria nge min zui chho ve lo thung.





Inbual chu alo buaithlak reuh khawp,ka bân tihhuh ngam ala ni silo nen zah pawh a sawi theih tawhloh hrim hrim.
U Zawni chuan ka lu nen lam min suk sak vek a,kan inbual zo zet chu ka zân phah hawk te in ania ka hriat tak ni.
Bathroom atanga kan chhuah hnu ah U Zawni chuan kan room anawm thu te a sawi ve mawlh mawlh.






"I U Lawmi hi a rawn lang ve em?" A rawn ti chhuak khauh mai.




"Inlam an nghah tir thin a"ka lo ti mai thung. "Mate,ka nu hi ka ngaihtuah ania.Lawmi rai hi chet vak an phal dawn silo a,nang i awm tawh silo ka nu hi alo rim lutuk ang tih ka hlau.Awmpui te hi Lawmi nau hrin hma chu la mai se ka ti"a ti nak nak a,a pasal nu chutiang taka angaihtuah chu ka lawm viau rualin angaihtuah ang kalo ngaihtuah thleng pha ve leh pek lo tih ka inhrechhuak bawk.Ni e,U Lawmi nau pai chhung chu awmpui te la ve hrih se atha ang.Ka nu kum upa lam ani tawh a,ahah lutuk anga ataksa in a zo loh phah te ahlauhawm.






Ka pasal nu leh pa te'n ka nu te chu chelh luih an tum ve ngial na an chelh lui thei biklo a,ni dangah zanriah kilho chu an ti ta zawi.Ka thla hual te kha an sawi lang a! Thi tep pawh ka ni lo a chutiang ngai ka lo ti lo khawp.





Zan lamah inleng kan nei zui nak nak a,ka û Mathana te nupa pawh an rawn lang ve hlawl bawk.
Nileng a ka mut loh vang nge ni ka chau deuh riau pek a,ka taksa te chu dam inti hle si in a sil ka ti dawn nge ni akham ta urh mai.





Ka hâm ka hâm leh thin chu ka pasal in alo hmuh hmaihlo khawp ,"i mut achhuak tawh em ni?" A ti ta sup a,ka û te nupa leh kan inleng te pawhin min en ta thup.
"Ka hâm mai mai"ka ti mai nangin kan thenawm nu Pi Hruaii chuan "keini chu zah kan ngailo Kimkim,han mu hahdam tawh rawh u.Damkawr ila ni bawk si i la chau anih kha.Kan fanu ke ruh tliak an zai pawh kha a sil awng rei ania,inzaina paltlang hrim hrim hian taksa a hmet chau ve thei a"a lo ti mawlh mawlh.





"Ni e Mate,keini pawh kan hawthla harlo ang.Han chawl hahdam tawh rawh u.Ila chau anih kha i mitmeng pawh ala dik zán lo mai"ka û in a ti ve chiah chu ka pasal chuan ahma zawng aiin min en chik a,"room lamah kan chhohsan phawt mai ang che u"kan inleng te bulah chuan a ti ta nghut bawk.
"Obeda,zanin chu la ngaiven deuh angai ang aw Matei kha.Damdawiin inrawn chhuak hma bawk sia,khawsik te pawh anei leh thei reng ania"ka nu in min ngaihtuah zetin alo ti ve lawm lawm bawk.






Kan in mangtha hnu ah inchung lamah kan chho a,ka awm ang angin ka mu deuh tawp dawn anih hmel.Inthlak leh pawh chu ka peih hran chuang hauhlo bawk.
Ka ha te nawt in ka hmai ka phih bawk a,U Oneda chuam minlo veng rûn ka ti mai.Ka ha nawh lai pawhin bathroom ah alo awm ve tlat!






Khuma ka lawnkai te chu min han veng khawp a,chet minti khawr zo vek.
A intihfai hnu reilo te ah rawn mu ve lehin "na ineih chuan min hrilh thuai rawh aw"a ti nghal sup.





Mutchhuak a hâm bai bai reng si kha ka muhil nghal mai thei derlo thung a! Ka inlet ka inlet ta mai.





"Kimte,na inei em?" Alo la muhil biklo!





"Aih..ka hnungzâng hi ka mu hnem tawh lutuk aniang akham riau a"ka ti sep.




"Ka hmeh sak dawn che em ni?"a tih chuan angaihloh thu in ka chhang rang khawp.
Khum lu lamah chuan atawlh chho ta zat a,"lo tawlh chho la"tiin a awm anga awm ve tur chuan min pawt ve nghal zat.Ami tawh na te reng reng chu adam dup a,a mah en chuan a inhmehlo hial zawk.
"Minlo ngheng la,muthilh tum rawh.I hnung delhin i mu rei tawh lutuk a akham ve tawh aniang"tiin amah ngheng thei turin min siamrem zui a,a tir ah chuan ka tîm viau nangin ka hab ngheng chiah erawh a taksa lumin ka hnungzâng a rawn ur nghal ham ham a,a nuam ta phian!





"U Obeda"





"Sawi la" a lo ti thuai.





"Ihmaw,i bialnu nen kha ahmel tha ee"ka ti chhuak thut a,ka inveng hmanlo ani.





"A dik alawm"ka beisei loh zetin alo ti ve mai bawk."ka tihpalh,ka insum hmanlo anih kha"ka tih chuan anui che dawt a,"apawi hleinem,zawhna i ngah dawn tih ka hria a chhang turin ka inpeih bawk" a ti ta sup.Ka beisei loh zet zet hian min chhang ziah mai a!





"Khawnge in intawn? I chhan hreh loh chuan"






"Kolkata ah,Ph.D ka tih laiin kan intawng a.Ani hna thawk turin a awm thung a"a aw ah chuan alunglen hmel riau in kan hre ngawt pek a,nge ka ngaihbel mai mai zawk ni.
"Engvanga thi nge?" A taksa chu atang nghal hru tak tak a,ka zawt ta kher kher chu ka inchhir ta viau bawk.






A ngawih deuh rauh rauh hnu ah "Thluaka khawsikpui lut vangin a boral a,rei kan inenkawl hmanlo" a ti vawt ta raih.



"a hmeltha sia,a uihawm emai.Lily var kha angaina ve em ni?" Ka ti leh a,a taksa tangmar lutuk pawh a inthlahdul ve ta riai riai bawk.





"A pangpar ngainat ber ania,a rawng ngainat ber erawh a pawl ani daih thung a"





"Ehe!" Ti hluai in "kan van in ang! Keipawh pangpar ah chuan Lily par var ngei mai hi mawi ka ti ber a,rawng pawl nalh ka ti leh daih bawk a!"ngaihtuah chiang mang hleilo chuan ka ti chhuak hliai a,alo nui mai thung.
"In anna in ngah viau mai,mahse nang angin ahuaisen ve lo thung a" a ti zawi ruih a,eng a sawi tum na nge hrelo mah ilang ka zawh belh duhloh.
Ka pasal nen ka pasal bialnu hlui thi ta chanchin kan sawidun chu ani mai sia,ngaihtuah chian chuan amak lamah te lawh akal zawk ta ve ang.




Mahse inkawm nel chhoh ka duh em a,a hun kaltawh ama kâ ngei atanga hriat chu ka mamawh ve reng reng bawk a.Midang kâ atanga ka hre zel anih chuan nuamlo ti ber tur chu keimah bawk ka ni tih ka chiang.






Zankhua chuan U Obeda nghengin ka muhil nge ni zing ka harh pawhin ka lo la ngheng reng a,tihharh hlau zeta ka thawhkan pawh chuan achau ve tawh takzet tih hriat takin a harh eihlo.
A muhil hmel chu ka thlir vawng vawng phawt a,ka pasal hi han sawisel na lai tur chu avâng ve ngawt mai.Hmeltha tih ai chuan hmel pa tih lam apawl maithei a,mahse ka mit ah chuan mizo mipa hmeltha tak ani thung.
A ngo hranlo a,avun chuan a sen lam apawl mah a,a inhmeh pui em em lawi.





Inphihfai a bathroom atanga ka chhuah hnu ah pawh alo la muhil reng a,kaitho duhlo in inhnuai lamah ka chhuksan ta zawk.A harh hma chu muhil ve rih rawh se,a chau tawh dawn emai.





"Ui..U Matei, tinge i lo thawh duh a?"Judy chuan rawng alo bawl mawlh mawlh tawh! Hemi te unau fel zia hi aw! An tho tlai ngai miahlo! Tunlai thangthar in mut an han duh tawh vei nen.
"Ka dam tawh alawm,ka nu hi alo la tho lo nge?"ka ti zui zat a,an la thawhloh erawh ka ring hranlo thung.

"Zingkar bazar turin an inzuichhuak.Hetia han bazar dun vel hi nuam an tia,ka pa hian a thawh harh peih chuan zui ve aching a"a ti zui siam siam.





"Nizan ka rawn haw tlai deuh a,ka rawn haw khan room lamah in lut deuh chauh chungin in chauh ka ring a ka rawn tibuai duh talo mai cheu anih kha"a ti leh siam siam a,"tukin chu ilo haw lawm nan vawksa rep kan chhum hluah ange aw"a ti leh hak.

"Puih i ngai em? Ka kut na mahse ka pui thei tho che ania"




"Ngailo reng reng lo thu mai mai rawh,thingpui i duh zawk em?" A ti chu ka insiamtheih mai thu in ka chhang a,min hnial ta em biklo in a vawksa chan lai a chan zawm leh.

No a chini ka dah zo thingpui ka thli thla tur chiah chu "ka lo ti ang" ti dut ri vangin nthingpui bel ka thlauh teuh hle a,U Obeda chuan alo chawi thuai.Dawhkana anghah rualin "i kut kha akâng em? Ala sa asin"mangang zetin ka ti nghal ruai.





"Ka tha,a sat tawh vaklo kha.Ka ta tur nen kalo siam nghal law law ang lo chet ve tum tawhlo la"a ti zui dap a,"ka ti ve thei reng asin"ti nang nangin min melh ngur vang chuan ka thu tha leh ta hle hle.
Thingpui chu siamin a intur a siam tel nghal a,ka bulah a siam zawh hnu ah a rawn thu thla ve leh mai bawk.





"E taka! Û,vawin tlaiah ka thiante ho in chaw an rawn ei dawn a"Judy in a tih chuan a thingpui lemkhalh in U Obeda an "Judy,Kimtei ala dam silo a ava tihchi awmloh ve" alo ti sup.A mal ah chuan ka beng dat a,keimah vanga anau ruahmanna thulhtir chu atullo takzet.A hre lo der hmiah thung a!

"U Matei chet angai dawn hleinem,kan thianho in eirawngbawl chu kan buaipui thei vek a.Kan eikhawm duh chhan ber chu kan thuan zing ami pahnih hian college bangin thildang an zir dawn a,chaw ei khawm na tur hmun dang remchang a awm hrihlo a"Judy chuan a ti zui mawlh mawlh a,U Obeda pawhin "chutiang anih chuan athat chu" a ti ta nge nge.






"U Matei,tlaia rawn tel ve tur pakhat chu ila hria em? 12 kan kal laia i zirtir ve tho Khawngaiha kha ania" Judy bawk chuan min melhin a ti a" hre tawh lo aniang a"ka lo ti thung.
Ka thawhna school hi alian ka tih tawh kha,12 ringawt pawh sec li ah lai an inthen a,class tinah mi sawmnga chuang deuh thaw an awm bawk nen an vaia han hriat chu aharh ve ani.

"Anih chu, sec B ah khan a awm thin a.Teachers day ah pawh rose boquet lian deuh apek che kha! A star thei teh mai che ania aw"anui zui hak hak a, ka lo nui tawi tak ringawt.Ka hrechhuak leh si,teachers day ah Rose bawr lian zet ka dawng hlawl a! Ka thawhpui te pawhin min chhaih zui nak nak hlawm anih kha maw.Min pe tu hmel awm ang erawh ka mitthla thiam tawh derlo thung.





"Ala vei teh mai che nia,a sawi reng thin che alawm.Keilah in ka u nen in ineih thu ka sawi khum ham ham a,a tuar na teh ania"a nuihza ber ber ah atang a,a thilsawi lai pawhin anuih nasat lamah a sawi hleithei lo.






"A la naupan vang anih dawn chu"ka lo ti mai a,ka rin loh deuhin U Obeda an anau hnenah "Judy,mahni zirtirtu te ngaihzawn ching chu kawmtlak pawh ani dawn emawni?" Alo ti dit mai! Judy aner nasa asin aw..





"Aw enge ithîk ami? U Matei pawhin naupang mai mai a tih kha, khang hunlai te kha chuan duhzawng kan pe na ve alawm.Khawngaiha pawhin tunah te chuan fiamthu lamah ala daih tawh zawk ang"a thianpa tan zet chuan a ti ta hlak hlak.A û chu a thaw deuh hak ringawt.





Kum sawmparuk sawmpariat chho vel hi puitling rilru la pu pha chiah silo,naupang rilru kalsan tawhsi rual an ni a.Judy sawi ang tak tak khan an thil vei an vei na in inngaihzawnna kawngah pawh an lak nat lai ber ania.Kei ngei pawhin kalo paltlang ve tawh a,mipa lamah ka rilru pe lo mah ilang khawthlang zaithiam ho ka vei thei hle anih kha maw.





Chawhnu lamah Judy thiante chu an rawn thleng ta nak nak a,mipa pathum leh hmeichhia pali ngawt an nia.An zuan azang in mipa ho te pawhin hmeichhe ho ei rel chu an pui ve mawp mawp.

An zingah thu ve in ka tih theih ang ang chu lo tih ve ka tum a,awm mai mai pawh aninawm em a tin ni.





Ka tihtheih awm chhun purun var an phel sa chu ka lo kheh ve mawlh mawlh.Khawngaiha ber chu min melhin alai leh dawn dawn thin a,athiante lah chuan an chheih peih mai sia! Ka engah a thawh tawhloh laiin anla nau ve bawk nen a lai thei viau.





"Kimte" choka luhka ah dingin a rawn ti leh dut tawh.





"Aw enge ni?" Ka lo ti var.Hna ah ala kal ta bik chuanglo a,tunkar a chawl tlang law law dawn anih hmel .




"Room lamah lo awm tawh la,an indaih viau tho kha" a tih chuan "ka che ve hran hleinem" ka lo ti sap.

"Lo chho lawk la" ala ti fan tho.Kilkhatah Judy alo nui ru char char a "U Matei,han chho mai rawh tlangval bula i awm aphal lo anih kha"Judy bawkin a rawn tih chuan U Obeda chu ka en thuai a, alo then chak chak ringawt.





"Ni e,puih kan ngai hleinem i kut ana bawk si" a thianten anlo ti ve leh bawk nen an inkawmna te ka dal ang tih hlau in ka pasal chu ka zui ta tawp.

Room ah ngawi rengin kan inzui chho a,dawhkan ah paper alo inchhawp leh hnur tawh! Hna alo khawih char char anih hmel.




"Khumah khan mu hahdam la,i duh chuan laptop ah hian movies te en la.Ka duh aiin i indimlo riau mai"ati dap dap a, ka indimloh vak pawh ka hre tawp silo.
A laptop chu la in movies en tum chuan khum lam ka pan ta tho a,ani pawh sofa ah thuthla in paper abih leh nghal mawlh mawlh.






Ka movies en pawh ngaituah lo in ka pasal chu ka lo en leh thin,tarmit a vuah a a inhmeh leh em em tho!
Naupang test paper a check nge mawni a changin a ner leh nang thin a,chutia a tih chuan ka lo nuih leh tet tet thin.A ner khum nang nang tawh paper neitu naupang chu zirna lamah akhawlh ve viau in ka ring ani.





"Puih i ngai em?" Ka ti chhuak ta nge nge,paper a inchhawp hnem mai sia,engtin emaw tal lo pui thei ila ka ti.




"Ngai lo e,eng nge i Major?" A tih chuan "english" ka lo ti ve thuai.





"History ania" paper lek kang zeuhin a ti a, ner nak in ka movies en lai chu ka melh ta daih.A nui ri sukin ka hria,alam ka melh duh tawhlo thung.History hi chu ka tuilo ve em ani,hun kaltawh chanchin kan zir kan zir a,atangkaina leh kan nitin nun ah han hman tangkai na tur a awm in ka hre tlat lo.Pawl sawmpakhat leh sawmpahnih ah a awl deuh ringin ka la ve ringawt a,min pawthniam tu hi ani ringawt! College ah chuan ka lâk zawm tawh lo chiang kher asin.









#zanin chu ka ziak tan tlai em a,zan dang aiin tawi hret mai rawh se aw.

#Chhiar zawh rualin a hnuaia ads khu kan click theuh dawn nia aw, click lo a out daih awih loh
Show post links
Top