OBEDA BY Natasha Hrahsel (Completed)

[ngaia]

CH~17





"Obed,Mate in tho tawh em?"Kan room kawngkhar an rawn kik kerh kerh mai! Ala hma viau in ka hre sia!!

U Obeda zawk chuan kawngkhar ava hawnsak a,ka nu chu a rawn lut nghal zat mai.




"I pan "Bawihpuia han la tawh rawh ,a tho tawh ang" a tia" a rawn ti hem mai! Bawihpuia chu amuhil leh deuh chauh zawk a,mahse ka nu chuan a pawm kâng ta tho."Nangni chu in chau ang la mu rawh u"tiin Bawihtea chu apawm chhuak zui mai bawk.U Obeda tak pawh chu a nui anui ta tawp.Kan atchilh tlâng chu anih ber mai hi maw.





Ka inzaina ala dam loh vangin min dîm thiam viau a,Bawihpuia aharh hlekin a harh hmasa ah alo tang hman ziah bawk a,pa nih chu a tlin chho dawn khawp niin alang.






Karkhat kan han mut dam leh hnu ah chuan insawisel na lai pawh ka nei tawhlo.Bawihpuia lah tah dan a hrelo emaw tih tur khawpin atap khât a,a nî Judy hian 'akhawngaihthlak zawk' a ti hial mai.

"Nu Maro, sa khân min daih angem?"ka ti lâng lâng a,Bawihpuia hnute ka pe bawk nen duh angin ka pui hman lo.





Nu Maroi hi min pui tura kan lak thar chu ania,sum leh pai an mamawh sân lai ani nen akum lam naupang chhe zawk zawk tawh lo mahse awmpui kan mamawh tih alo hriatin a rawn dil ve rawih a,kan veng ami ala ni nghe nghe zui a.Pu Kima YMA hruaitu in an chhungkaw harsat zia ka pa hnenah alo sawi bawk nen kan la ta tawp kha ania.Apasal hi a hnathawhna ah accident in tunah hian kawng achin hnuailam zeng in a awm a,a fanu lah pawl sawmpakhat zirlai chauh ala ni bawk a,an chhungkua ah eizawng tu ber ani hrih ani.A fel em em a,ka nu aiin a naupan na tam lo mahse a zuan a zâng in rawngbawl a thiam em em bawk.A bai siam thiam zia lah chu mak tih tur khawpa tui ani!






Vawin tlai hian kan pa hnathawhpui ten nau en pah fawmin zanriah an rawn ei dawn a,mahni insawm chawp an ni mah zawk ang.U Obeda sawi danah mi pangai vel an ni awm e,an dept bik professor ho an ni ngei ang.



"Bawngsa hi atam vaklo a,arsa hi chu atawk khawp ang"Nu Maroi'n a tih chuan ka ngawi deuh vang vang a, "Bawngsa chu lei belh lo mai ang,tlak hâng leh bai lam kha siam tam ila maw,an ban ber zawk ka ring" ka ti a,vawksa hring lei tur kan hmu silo a,tunlai ah chuan Bawngsa hi mi hian an ei tha duh vak lo.Tha lam in angaihloh vang nge ni mi tamzawk hian an ei hreh tlat zel.

"E, changkha a awm tak e,kan tauh dawn ami?" A rawn ti chhuak hluai a,ka lo phûr ngei mai.





"I thiam em ni?A tui ngawt ang" ka ti chu alo nui hak hak a,"i ei ve thei nang,hnute pe lai nih chuan hmarcha pui leh kha lam kan ei ngam ngai hleinem" a ti a,ka hui pap chu min nuih vur vurin" pahnih pathum i neih na ah chuan i hawihai lutuk tawh bik lo ang" a ti leh a,ka nui ve tawp tawh.
Bawihpuia te hi ka pawm fimkhur hi a ti thei lutuk a,"naute chu sawp nawk nawk ila an hrâm duh zawk" a ti mai zel a,keini ho lahin kehthei dawm tak meuh meuh in kan dawm mai sia,Nu Maroi nuih kan ti za thei viau.






Judithi kailawn atang a rawn pên thla chhat chhat a,room ah a tawm in reng a,zanriah kil lai,tukthuan ei lai tih vel lo chuan a room atang a rawn chhuak khât khawp mai.
Ngaihsak zawm lo in "Nu Maro,Ka nu leh pa te lo haw se ka rawn pui ang che aw.Salad vel kha chu ka siam tur ah lo dah tawp rawh" ka ti a,amah a ti vek tur chuan a hautak dawn hian ka hre emai.


"Ka lo pawm ang,va pui la"ti sepin Judithi chu ka bulah a rawn ding a,hospital a rawn chhuah atang min biak hmasak na ber anih ka ring.





"A puar tawh tho chuan"Bawihpuia melh reng chung chuan a ti leh a,ka hnial duh ta lo,ka hlân ve ta mai.
"Kan pawm kual nasa bawk a pangtilum a hre tlat a,amahin amu duh derlo" tih nang nang pahin ka fapa hnute hne puar zo muhil sak sak chu ka nuih sak a,duat tu angah bawk a,amaha mut tir chuan tap silo hian a tre ve ngher ngher zel.





"Anih ka va bawl pui lawk aw,chaw ei tur kan ngah sia" ti sepin choka ah ka lut zui a.





Chawhmeh lam phei chu Nu Marovi'n alo peihfel thuak tawh a,changkha tauh tur alo buaipui mek ani.Artui chhûmin salad ah siam ka tum a,nghah pahin zikhlum leh telh tur dang chu ka lo chan ve bawk.Artui hi ka ngaina lo viau a,salad te nen han sawngbawl erawh in tui ka ti ve viau mai.






U Obeda te lo haw hma a intleuh ve zuai ka duh vang chuan salad ka siam zawh ah room lamah ka chho a,nû ni tawh mah ilang tawphnawk taka lo lan kha ka duh hauhlo.Ka pasal thiante an lo kal dawn a,an tan ni lo in ka pasal tân zawk ani ka inthuam that dawn ni.Tawphnawk deuhin lo awm ilang keichauh ni lo ka pasal ngei pawh ngaihdan tawk an nei ngei dawn a,a hna thawh nen thlengin an sawi zawm bawk ang.Tunlai ah mihring kan changkang tawh viau a,chutih rualin mo intuaihnum peih deuh te sawisel hi kan la ching leh zeuh thin.
Mo an nih tawh vanga tawphnawk lutuk a awm tur ani kher lo a,kum upat hlei hlei hian invawn alo ngai zual zawk.Thatlai chuan vun te ala mar in ala nung tha a,hnawk hnelh hnulh pawh inbel ila 'style' ani zel a,upat lamah erawh tawphnawk tih hlawhna mai ani thung.Chuvang ania thalai aiin upa lam hi invawnfel leh inchei lam peih angai ka tih ni.Lerh vang ngawt ani lo a,hman vang ani miahlo bawk.Keichu fa pa li panga neih hnu pawh a la invawng fel peih leh inchei peih te hi ka ngaisang daih zawk mai.




An hna bâng rawn tlang nghal an ni bawk a an rawn thleng har lo,dar lî leh chanve ah chuan a rawn kal tur ho an kim tawh viau a,kan pa tello in mipa pali leh hmeichhe pakhat an ni.An dept mi vek ni lo in a inkawm khawm deuh ho zawk anlo nia,fiamthu an duh hlawm viau bawk.






"Obed, i fapa i en apiangin i khi ve suk suk dawn anih hi"A upa ber U Zawna chuan a ti luah a,U Obeda alo intithei viau mai.Bawihpuia'n a chhun zia thu hi a dawng ngun ve tawh bawk em ani.



"Keichu a ngo puak bawk sia,Ladyboy an tih te pawh hi ang tihna deuh ka nei"U Hruaitea chuan nui duh miahlo hian arawn ti ve a,chutah U Obeda chuan thutak zet hian "Hruaia,i in lamah zanriah i ei angai ange" a ti ta hmuk.A fapa sawichhiat chu haw ve tak ani,an fiam mai mai tih te hi ahre lo emawni?

"A ang tak tak alawm,a hmel ah hian 'She' ka hmu thei"la nui duh miah lo chuan U Hruaitea chuan ala ti leh a,U Obeda hmel chu a rum tha tawh viau mai!





"Vanlalhruai" U Obeda'n a tih hmuk rualin an zavai chuan an nui chhuak ta hawk hawk.Patling rual nui hawk hawk thawm chuan Bawihpuia a ti hlau deuh nge ni tap ngai mang hlei lo kha a rawn ngek ta ve rek rek a,a tap hmel lah chuan khawngaih thla ala ngawih ngawih.
"In che mawi lo hle mai"A fapa awih dur dur pah chuan U Obeda'n ala ti nghut zui a! Ka va inthlahrung tak, an fiam mai mai tih hi a hrethiam duh tlatlo.





"Apa ka awm hi,bang rawh le" damthlup a Bawihpuia chu be leh si in a awi dur dur a, "hlau suh le,bang rawh le" a ti leh a,Bawihpuia pawhin ahrethiam ve nge ni a bâng ve leh mai bawk a.
A thiante laka ka lo inthlahrun em em laiin a thiante lah an lo nui ru tet tet hlawm a,U Obeda tihdan haw ber tur a ka rin U hruaitea lah chu nuih insum nasa sa ah ala tang zui a! An in ngam tlak zek dawn hlawm mai ka ti!





"Rochan,fapa i nei hmeltha khawp mai" a tawng mawh ber U Jona a'n a rawn tih ve leh chuan en mang hlei lo in U Obeda chuan "a dik ang" alo ti deuh nghut a,in melh kualin nuih rin hlau insum bawk si nen an nui khur ngat ngat hlawm a,hrehawm an ti viau maithei ani.

Ka nu leh pa te an rawn thleng ve leh a,vawin lam chu an ni pawh chhuak peihlo viau mahse ITI lama ka pa ram lei an teh tha a,ka pa hi pa fing ka ti mai,a sum khawl atang ram alei zel a,tunah hian ka hriatsual loh chuan Aizawl hmun rem lai deuh deuh hmun thum ah ngawt ram anei a,pahnih ah chuan assamtype in ding in pakhat erawh ram ruak ani thung.Vawin a an zuk teh aber pawh chu assamtype lian vaklo ding in chhungkaw khatin an luah a,tunhnai ah abul lawk ram rawn lei tu ten pal hungin an rawn nêk viau ani awm e! Chumi vanga zuk kal an ni pakhat a,chumi piah lamah LSC lamah buaipui fel ngai deuh ala awm bawk ani.






Ka pa in tawngtaina hun a hmang zo a,dawhkan a kan len vek loh vangin ei hmasa pawl kan awm angai ta a,hmeichhe ho chu a ei hnuhnung ah tan kan tum ta zawk a,U Zikpuii kan mikhual erawh mipa ho kianga ei turin kan ti ta thung.
Buaithlak ta ber erawh U Obeda bawk ani,ka ruala ei kher aduh a,keiin a thiante kilpui se ka duh si, a tawp ah phei chuan ka hnial thei ta ngang lo a,a thianten pawi an tih hmel vak loh bawk nen ka in nghah tir ta tawp.An nuih tet tet tih lah a hrelo nge ahai der hmiah zawk ni?






Zanriah kan eikham chuan thingpui sen hâng dawmin thutkhawmna lamah kan ti ti laih laih a,ka pasal thiante chuan titi vawrh an thiamin ka nu leh pa mai nilo kei a sawi duh tur zawng thlenga thusawi chhuah an thiam ngang mai.U Zikpuii lah fa pathum ngawt nei tawh ani bawk a,naupang enkawl dan tha ni a ahruat te chu min hrilh ve mawlh mawlh bawk.

Current chu a rawn thim ta hmuk a! Kan nghah deuh hnu pawh a a rawn en leh mai loh vang chuan U Obedan Generator ava on ta ringawt bawk.







"Kan changkang tawh mang e aw.."Ka nu chuan a rawn ti hliai a,"tunhma te kha chuan bombati pawh nilo,saideûm ah khawnvartui thunin êng ah kan hmang thin kha ania"a tih chuan an lo sawi zui ve sap sap mai.

U Zawna chuan rawn sawizawm ve in "ani ngawt mai,tunhma chuan khawnvartui a hek loh nan ka nu khan zanah hian hma takah min mut tir thin a,kangmei lakah lah fimkhur tak te a fimkhur atul thin.Kan la naupan ve deuh lai ti ilang kum sawmhnih chu kan hnaih ve tawh tho ang.Sihfa ah kan awm thin a,ka la hre reng mai.Zankhat chu current a thim vang khan bati kan chhi a,Nu Mapuii sawi ang khan khatih lai khan saideûm ah khawnvartui thunin puan hraw deuh kha kan chhi thin a.Ka nu hi thuthleng ah mu in thuthleng bân ah bati siamchawp chu a dah a,tichuan lehkha achhiar ta alawm.Kei a fimkhur lo chuan ka nu lu chunga bati chu alam ah ka tai thlu pek a,ka nu sam chu a alh ta hluah mai! Ka pu khan tui in rawn thelh vat lo se tawngthu chhiat suh ah ka nu kha a kânghlum ngeiin ka ring.Kan vanneih asiamin a kâng na lo hlauh a,pânhnah leh chini rawtpawlh a that thu an sawi a,ka nu lû ah tatin kei chuan ka mutsan ta daih a.Ka pu sawi leh danin ka nu kha kha zân khan alo mu miahlo ani awm e.Tunhnu thleng hian a lu vun thenkhat ah sam ala to theilo" a thusawi chu ngaihnawm ti zetin kan ngaithla thap a,anu chu tuar chhel ka ti hle bawk.Kei tel sa in min per hlek pawhin na ka ti ania! Ani chu kâng tak takin zankhua in a hel tuar tawp mai dawn chu ani sia.







"Bati lam in sawi takah chuan Mapuii te chhung hian hmawlhte an nawr nasa thin ania" ka pa'n a rawn ti fiamthu ve hlut a,kan nui ta ham ham.Hmawlhte nawr te kha khawpui lam chu ka hre chiah lo a thingtlang lamah alar thei viau a,motor hian an rawn phurthla ruih zel.






U Obeda thiante chu an ti ti tui bawk a dar kaw pelh ah an haw ta hlawm chauh a,an haw dawn thlengin ka pasal chu an la chhaih zuk zuk zui!






Min dap rek rek tu an awm vang chuan meng mang hlei lo hian inleh ka tum a,mahse ka kawr hlim tum an awm tih ka hriat rualin phu nghekin ka harhchiang ngang mai.

"Sorry, ti harh lo che a lo hnek tir tawp ka tum a"U Obeda chuan Bawihpuia ka hnute lo hnek tir a tum alo ni!





"A mu duh nange?" Phak chuap a tiin ka kawr ka hlim sawk sawk a,a hne nghal dawk dawk mai!





"Umm bottle kha ahne tha duh leh tawhlo a" a tih chuan ka lawm lamah a tla daih.Bottle aia min thlang tial tial hi keipawhin ka hre thiam ve a,a tui hal tak tak châng erawh chuan feeding bottle chu duh zawk châng la nei mahse atam zawkah ka hnite ahne tha duh tawh zawk.








"A ti harh che nge i la mu miahlo?" Ka tih chuan a te thawmah aharh thu in min chhâng ve mai a,ka harh ve ngai mang miahlo hi amak ka ti! Ka mut hi a tui em em reng zel.

"Muhil leh rawh,hei amuhil ve mai ang" ti sepin ka insawi pah hlu hlu a,min muthilh san mai chu a tum hmel bik vak loh thung.






Dam chuan nî a ral ve zel a,Bawihpuia pawh in thlasarih na ahmang chho ve tawh a,beisei ai zetin a changkang chak! A ring te kha a tun hma lutuk ringawt.Tunah la bawk vak thei chiahlo mahse a tawlh ve hrut hrut tawh nia mawle! Duhloh a hre tawh lutuk erawh abuaithlak lam hret chu ani.Chak viau e tilo hian bawk vak a kal hi a thiam lo nge ni a thu tawrh a,thu chunga a tawlh loh leh hmalam bawh a bawk in a tleng ka ti mai.Ka nu'n "vâk lo in akal tawp dawn aniang,Judy pawh kha a vâk reng reng hleinem" a ti a,vâk kher lo mahse a pawi tihna ka nei hranlo khawp mai kei chuan.


Judithi pawh tha chho ve zel in Delhi lamah company lian ve tak hnuai ah hna ahmu a,thla hmasa lawk khan a chhuk nghe nghe.Mahni intihhlum duhna rilru apu tawhlo in kan hria a,amah pawh in dam a inti ve tawh bawk nen ka nu leh pa te pawh in ram dang a hna thawh an sawi khan an hnial em em lo.Judy pawh final sem exam lai ani bawk a a bei ngawrh ve viau mai.






"Bawihi,insiam hmasa la"U Obeda'n a tih chuan ka aw ve thuai a,vawin hian vaccine kan la dawn a,U Obeda pawhin chawhma lamah min kalpui a duh vangin hna akal lo a,chawhnu class erawh a zuk la hram dawn thung.Buai viau mahse kan nufa tan hian hun hi a insiam ve hram hram zel.

"Ka kawr thlak chiah angai tawh a,Bawihpuia hi ka siam chhungin lo inha ve la"ka sam leh makeup vel ka zawh rualin ka ti ve leh a,a ni pawhin ka sawi ang chuan a ti ve mai bawk.






Vaccine kan lak zawh ah kan inpui lamah kan lengthla nghal dawn a,Bawihpuia inthlakna tur vel pawh ka ak tel nghal.Nau pawm lai chuan bag alo ah tet theih tak tak loh zawng anih hi maw.







Damdawiin ah kan kal a,Bawihpuia an han chiu tur chiah chu U Obeda chuan a en ngam ta thlawt lo a,hriau an vit lut Bawihpuia tap rawng rawng laiin alo inhum ruh ve ngawt ngawt nia mawle! Hrehawm tilo a khawngaih lo ka ni biklo mahse U Obeda ang em em hi chu ka nilo thung.a

Bawihpuia tap thlemin a awi hlu hlu a, Bawihpuia lah tap zo hlim a insut che leh dat dat thin a,apa hmel ber zawk chu hmuh a hrehawm takzet ani.






Canteen a kan ineipuar hnu ah Bawngkawn lam kan pan a,kan in pêng ah tlân lut lo turin ti mah ilang kan pa te kawt thleng min thlah a,kan chhuk hnu ah muangchang vaklo hian a inkhalh chhuak leh nghal.


"Kimkim"





"U Jenet" ka ti sep, khang thla liam ta chhung khan kan inbe ngai hauhlo...





"Kha kha em ni i fapa chu"net nak a tiin chiang tak hian Bawihpuia chu amelh a, "Apa hmel reng hmuh tur a awmlo" a ti chu ka sa ngei mai.
Show post links
Top