ADIOS MY LOVE PART-4

[Neihpuii Chhangte]

Adios My Love




Numami pawh Rinkima cousin te in neihna ah an kal dawn a, in chei sa diam in a rawn kal a, kan in nalh hleih ang reng khawp mai, thla te kan han in lak sak leh rih



Rinkima a rawn thleng hma ang reng khawp a," I va phur ve a, biakin a hnaih nen" tiin ka lo chhaih fiam a, "Chance te kan nei ve ang chu, i chhawr nileng ziah sia ka ngai ve a lawm" nui pat pat chungin a ti a, ka thiannu lah chuan a lo beng leh hmanghmawh tawh



An tlan liam lai chu ka thlir ve thlap a, bike lo tlan chu Dorris a a ni, lo len a tum a maw ni, lut ta lo chuan ka ngaichang leh rih a, rin ang reng in ka dawr zawnah a ding zui bawk


A helmet a lakthlak rual in, a hmai pilh neng nung chu ka hmu zawm zat


"Ehe! Dorris " , ngawi tur in a kut zai zir in min hrilh a, a nui zui suk bawk, ka en hau ringawt


Dawrah chuan kan in zui lut a, a hliam te chu na ti hmel a pu eih lo nia


"Eng nge ni ngai"

"Tlangval thil a nih hi " a ti duh lek chauh

"I hmai a khem neng nung a lawm" a hliam chu ka kawk kual zui a


Pemthar damdawi leh eng eng emaw dah na pawhdawh chu ka hai nghal rawk rawk, Ka nu khan in tihpalh ni khua a ka hman ah tiin dawrah min chhawp sak diam a, a tang kai vak ka rin loh tehlul nen


Damdawi ka hnawih sak lai chuan a ner leh zawk thin,
"Dîm ve la"
"A na em ni?" ka tih chuan a nui duh lek chauh, nghal thlak hian
"Damdawi i hnawih pah te khan chhem ve la, ti te chuan Patling hliam buaipui i ang a lawm, che romantic lo emai" pakhat chuan a ti a, ka thil tih lai thulh meuh in kan in melh rum leh rih


A sawi ang chuan ka han chhem pah a, a kut te thleng chuan pem lo lai a awm lo, a kut ka chhem sak lai chuan min lo en reng a, min en tih ka hriat rualin ka che buai deuh nuaih


"In sual na ah tel tawh lo la, a tlawm zawk a tan te hi hlauh reng reng loh tur" tiin ka han zilh ve luam a


"In sual te chu tlangval te hna a lawm, tlangval awm mai mai nih loh tur" a lo ti ve bawk, hahthlak hian


"In tih palh a hlauhawm , thih thut te pawh a awl bik a lawm" ka lo ti ve zat a ka tan chhan a tha bawk a ka tawng huai ngam viau mai


" A nih min ngaihsak vang a sawi i ni em?"

"Ngaisak e" ka lo ti thuai a


"Eng vangin?"


"Ka thian i nia lawm"


"Thian a ang a ngaihsak ka duh lo, Mipa ang in min en la, i laka ka rilru put hmang pawh hrethiam rawh, i laka ka beisei pawh chiang takin hria la ka duh"



A kut ka tuam lai chu tawp in ka thut hlat a, kan rilru put hmang a in ang lo der a ni


Ka chet dan chu a hrethiam a ni chêk ang, nui var in min melh a


"Lungngai suh i tan a hnawksak leh harsat na nih ka tum lo" a ti thuai a, a rilru hre reng chung a hnaih zel hi ka tan pawh a tha ber in ka hre tlat lo


Beisei tur a awm loh ro ro chuan, beisei siam lo zawk law law ila kan pahnih tan pawh in a that ka ring


"Dorris, i hriat kha hmangaih ka nei, keini chu thian ni tur a in tawng a lawm kan nih" inthlahrung ang reng tak chuan ka ti zuai raih a


"Tu nge sawi thei, hun lo la awm tur ah hian kan tan hun ruat a awm ve mai thei a sin" a mit a beisei na chu ka laka a hmuh ngai loh tawp tur a beisei vang a ni


"Nang chu tlangval tha tak i ni a, hmangaih awlsam tak, ngaihnat awm tak i ni, kei ve mai tan phei chuan i tha mah mah, hmeichhe tam tak in i hmangaih nih an thlakhleh na karah kei vang mai chuan i hun khawhral suh"


"Thufing i hre duh em" a lo ti daih a, ka bu ve nghut nghut


"I hlimpui a nih phawt chuan, hun khawhral na a ni lo"


"Eng thufing nge" awih lo zet in ka ti a


"Hringnun thufing a nih chu, ka hlim chhung chu hun ka khawhral lo a nia"


A va han mawl mai mai tak," A nih leh i nat pui hun lo thleng ta se?"


"Na ta ila, ka beidawn i ring em" mi a nuih ang suk reng a, a lak hoh lam hmel hle bawk


''Nat hma a bansan hi a fin thlak zawk, i thufing ai pawh in ka thufing chu a dik zawk ka ring"


" Mimi, tlangval ka nih hi insual in in hliam pheng phung thin mah ila, ka bansan ngai lo, lo na ta viau pawh ni ila ka bansan mai mai teuh lo" a tukhumah ka beng bu lawp, a mawl a ni, hepa hi a mawl takzet


" Bakah nat hlau a tawp san leh tur chuan a thuk tawh tlat" a ti leh a, hepa hi tih ngaihna tak pawh ka hre lo e


Min hlat lo a nih pawh in keiman ka hlat mai a ni ang chu

Dawr kawt a hmeichhe pakhat lo ding reng chu ka lo hmu mai lo a, ka hmu tih a hriat rual in a kal zui daih bawk, ka dem hran lo e, pangpar hi chuan hmeichhe mit hi chu a la em a lawm


In chung zawl ah chho in, a text ka dawn hnuhnun ber chu ka chhiar nawn tlut tlut a, amah a reh a zui vawng vawng bawk si, vawi engzat nge zan in ringawt pawh hian biak ka tum tawh le, message a seen thei der lo a, ka hrilhhai tak zet a ni

'Ka lo tih beidawn tawh naah che ngaihdam ka dil nawn leh a che, i lung a dam thei lo tih pawh ka hria e, thil engkim kha kan in hriatthiam tawn loh vang a thleng mai chauh a ni a sin, mahse ka dem lo che, ka sawi tawh kha hlim tur in duhsakna ka hlan nawn leh ang che, ka beidawn ve hma loh chu khang thutiam te kha hlen ka la tum fan ang, chu chu mipa in a thutiam a ni, engpawh lo thleng se, kan in kar te pawh lo danglam tawh mahse, lo kir leh mawlh ang che, chu erawh i lak a ka beisei awm chhun a ni' ka chhiar nawn leh ngial pawh in ka hrethiam thei der lo, ka kalsan ang mai in thu a la a, min kalsan mek zawk si, ka hrethiam lo let der a ni


Zan rei tak thleng chuan biak tum in ka bei a, mahse ka hlawhchham zel


Hmangaihna hi kan beidawn pui tlang a ni e, tu emaw ka laka beisei nei tu ka ti beidawng a, tu emaw a laka beisei ka neih tlat in min ti beidawng ve leh mek a



Dama chuan eng ang rilru nge a put ve meuh ni, a thutiam a din ngheh a tum thu sawi in min reh san leh lawi a, engtiang a awm tur in nge min duh ni


Chu zan chu a liam a, Ani pawh a liampui zui ve bawk


Dorris a pawh ka be zui ta meuh lo, lo len a tum chang in ka len chhuah san ve hmiah thin bawk


Kan Ubiakmuana pawh in mi a zar buai peih ta meuh lo, a lakah chuan nula hawihhawm lo leh rualpawl thiam lo tak te pawh ka ni mai thei emaw nula mawl tak



Ka thiani chuan harsatna ka neih leh neih loh min zawt ta zeuh zeuh reng a, thil ngaituah leh vung vung hi ka ching a, ka lo ti lang viau a ni mai thei, zep a chin erawh ka la nei ta cheu



"Ka chhuak lawk a nia" tih leh tlan chhuah a rual a, a in pal phei nawk nawk, "I tlu a nge" tiin ka au zui a, lo tlan kir leh in thuthleng a a bag dah chu a ban thuak a, a rang a rang in a che chhuak lehnghal, eng nge maw a hriat ni



Phone ka bih san zui a, kawngka in hawng thawm avang chuan ka hawi chhuak thuai a, ka mi hmuh zet chu


Dorris-a a ni, a lu a rawn tuai lut thuak a, a ngai te in a nui leh var tawh, a thawmhnaw chu a huh deuh chap a, ruah a hmi sep sep reng bawk nen ruah a rawn do phei a ni awm e


Lalnumami khan eng nge maw a tih ve leh ngei ka ring a ni, hemi te pahnih hi an tang dun chiang a lawm



"Simikhu ang mai a lawm i nih le" a ti zui a, ka nuih tawp ringawt


A in hruk hul na tur in ka showl chu ka theh phei a, rang tak in a lo ban ve mai bawk


A leng ve ta reng a, hepa pui hi chu a hlat that theih ngai der lo


Ruah pawh chu thawk leh khatah a rawn baw hawk a, a vawt zui zar bawk, khua a thim zui a, ruah chuan min dang ta reng


"I va in thuam vawt ve" tih leh a Jacket a min rawn tuam a rual a, taksa deh na hnu tih hriat tak in a chhung a lum nghal thar thar



Ruah pawh chu a bang ve ta hram a keini pawh kan in khar nghal thuai, dawr kawngka pawh kual ngai vel ah pawh min nam san ang dawr dawr a, min awl hneh viau mai



A bike a chuang tur a min tih na chu lo hnial ve in bus ka chan mai tur thu chuan ka chhang a, min kalsan tum lo zet in min nghak run lehnghal, luhlul chhuah ve in ka kal lui a, a bike chuan muang chuang in min zui ve det det


Hnunglam atang a horn ri tuar tuar avang chuan ka ding leh chawt a, "Dorris " ka ti hluk

"Lo chuang rawh" a ner nung duh lek

A tlai tawh bawk nen tiin ka chuang ve leh ta ngawt bawk a


Kanu in chanchin ngaihven in min lo call a, ka haw mek thu ka hrilh ve mai bawk " Ipa inkhawm a ngai si a, chaw kan lo ei mai ang aw" a tih chuan, min lo ei san mai tur in ka ti zui


Ka pum lah chu a ri ruk ruk reng a, ka riltam ve tawh em a ni


KFC kawtah chuan a ding zui a, dawr a min luhsan lai chuan ka rilru a hria a maw ni ka ti rum rum


"Ei rawh" tiin min rawn pe zui a, ka ban rang teh e, "Viri" a tih leh tak ah chuan ka tawp nghal chawt, ka ei tum mek chu ka dah let a, ka tum nghal bûr, ka thinrim leh zak chu ka sa up up thei nia,


Pakhat lah chuan min nuih ang hui a, mi a tih zah zia hi a hre lo zawk a maw ni,ka va han nuih let awm lo chiang tak


"Ka fiamthu a nih kha i ei tur vek" tih leh ka sam a rawn tuai thur a, ka lo teu hlar mai


Ka duh lo nasa, min rawn barh lui leh pek a , hepa tak hi chu!


Pindanah ka chhoh rual in ka nau te in hau thawm ka hre zui a, an thawm an dim lo ang reng khawp mai


Lo in rawlh ve suh tih ang reng a ni nawk, thil tla keh thawm ka hriat rualin ka lut zui rawk a


Amor a chu a khem neng nung a, a duk ang chur lehnghal


Min hmuh rualin Nana-in min rawn pan chat a, a tap zui zat bawk


Thil thleng chu ka zawt zui mawlh mawlh a, Amor-a lah in la pa tawk in a la ding rûn ringawt


"Ropekhlu" ka ti vin that a,
"Thil sual tih ka nei lo" a lo ti ve thung
"Jeremia a nen an in sual" Nana i zawk chuan a ti hlawk hlawk a, hahthlak hian
"Ti nge in sual hi in tih chuk reng le"
"Ngaizawng lo tur in ka ti a lawm" pakhat chuan a lo ti chang fak

"Ka then dawn reng a lawm, sawisa lo tur in ka tih che kha" Nanai a ni a tap tuau reng a, he nau hi chuan tap in ro a rel thin,a tap hmuh hreawm ti ber thin chu kan Amor a bawk hi a ni


"I tan a tha lo tih hi kei tluk a chiang an awm lo, ka thianpa a nih saw, i hriat ve hma pawh khan ka hre tawh" a in hum ruh talh talh a, hlauhawm ve tham chu a ni tawh, a nau hian a hlau lo mai pawh a

"Ka hria, then ka tum rêng a lawm, sual kher a ngai a mi"

"Lalnunfel" a ti thawt a, pakhat a tap chhuak leh hawk

"A tawk, ngawi rawh u" ka ti ve hrawk a


Amor-a hliam chu ka buaipui nghal zung zung a
," Eng nge thleng a?" tha te te chuan ka zawt ve leh a

"Jeremia khan a kawp vel mai mai a ni"

"Min kawp ka hria mahse buaina chawh chhuah kher ka duh hlei nem, mi ten eng tin nge an ngaih a nga?"


"A tawk e" ka tih rualin a ding hluai a

Nanai pawh hmanhmawh zet a zuang tho ve in " Khaw nge i kal dawn " a ti pah hluai a


"Ka mu dawn " Amor an a tih takah chuan a vêng rûn ta bik lo


An thu buai pawh chu han rem vak ngaihna ka hre lo a ni, Nana i erawh a u in tha a tih loh chu kawp lo mai tur chuan ka hrilh thung a, tum dang ang lo tak in mi a chhang buai lo ve khawp mai


Fur a in tan chho der tawh a, dawr kal pawh a phur awm loh thin viau mai


Nau te ho exam chawl pawh an lo lang ve zut thin, tu emaw zawk zawk an lo kal tawh chuan pangpar an la ziah reng a, Amor a ngat phei chu nghal tha tak a ni.


Numami hian Dorris a chanchin hi min sawi pui a tum reng thin a, kei erawh in thian bak kan karah engmah a awm loh thu in ka chhang mai thin


"Dama, hi hmalam pan san ve tawh rawh, khawvel a nih hi kan thil duh tak chan chang a awm thin, pawm thiam a hlimna thar hmu leh rang a piang hi mi fing an ni ngai" Numami chuan a ti hlawl a, Dama vanga mipa dang inlaichinna siam pui ka duh lo chu a ngai mawh ve hle a ni


Biak ka la tum fo a, a number a thlak nge ka be thei ngai hauh lo, beidawng takin min siam nawn leh ta a ni


Hma lam pan ka duh em tih chu keimah leh keimah ngei pawh ka in zawh tam ber thin a ni


Numami a chhuah apiangin Dorris a a rawn lang ve zat thin a, an thil tih kual dan pawh ka chiang viau tawh, thian tha ah an in chhuah der tawh


Beisei ang rêng in Dorris a rawn leng leh a, a ninawm zawng leh ka duh loh dân ang in a awm ngai lo bawk a, kan kawm thei phian mai


Ruah a sur reng avang in, ahan deuh lai tiin dawr ka khar a, Dorris a min thlah haw tum pawh chu ka hnial hran lo


Ruah chu a rawn sur leh tan a, Dorris a din tum chu ding lo tur in ka lo ti ve thung

"Ruah sur do chu a tha lo" a ti nachung in a ding lui ta bik lo


Mahse, ka rilru a lo lang erawh in ngaituahna a
luah leh vek tawh


Ani nen a ruah sur han do dun te kha ka hun ngainat ber a ni tlat a lawm


Ka kianga awm reng lakah chuan ka in thlahrung hle a, mipa tha tak a ni chungin ka thinlung ah hmun ka siam thei lo, ka kianga awm lo leh min ngaihven tawh ngai hauh lo tu tana hmun ka lo siam ve reng te chu thil tha ber a ni em tih ka ngaihtuah zui


In kan thlen meuh chuan huh zawr tak kan ni, Dorris a inkhalh chhuah leh mai tum pawh chu in a lut kawi tur in ka sawm a, a vawt bawk nen mi a hnial lo khawp mai


Choka a Ka nu thawm ka hriat rualin ka ding chawt a ka bula mi pawh chu ka pawt let nghal dawrh, Kapa awm leh awm loh ka thli thlai hmasa leh te te a, ka hmuh tak loh ah chuan dim tak in kan in zui chho tham tham


A inhruk hulna tur Towel ka pek chuan a in hru ve mawlh mawlh a, ka thawmhnaw lain bathroom ah ka luhsan zui


Ka chhuah leh chuan tukverh lam hawiin a lo ding reng a, a thawmhnaw a huh hle bawk


Kapa kawr leh kekawr lian ber tur a ka ngaih te chu ka va lak ruk sak a , a in thlak zo lo chhuak chu ka lo nuih nghal tha


A kawr chu a tawt khawp mai a, a kekawr hak lah chu a chhing ang vah lehnghal


A in pawt a in pawt a, eng mah awm zia a nei der si lo


Ka lo nui leh thin chu min melh no lo teh e


Ka nau te thawm ka hriat rualin kawngka ka kalh nghal chawt chawt a, min hmuh hloh chu ka hlau a ni


Kanu call ka hmu zui a, ka la haw lo emaw a ti ngei awm si a, chhan dan tur lah chu ka hre mai lo lehnghal


Ka la haw loh thu hrilh in chaw min lo ei san mai tur in ka ti ta ngawt



Dorris a pawh khumah a thu ve vâng a, a bula va thu ve in, tukverh a ruah sur chu kan thlir dun rauh rauh


"Eng nge ka neih loh ang neih a neih bik?" a ti chang bal a, amah ka en lah chuan hma lam ngawt chu a thlir thung


Chhang lo a ka ngawih vang vang takah chuan min lo en a ,"Lo in tawng hma deuh ila, tiang lo deuh hi kan ni ang ngem" a tih leh chuan, keipawh in ka melh rân a, thu a chhang lo in ka lu ka bu nghauh nghauh


Ni e, lo in tawng hmasa ni ta ila, thian aia thuk mah chu kan nih ngei ka ring, mahse, tuna kan dinhmun hi kan tana ruat a ni tlat a lawm


"In chanchin ka hria, engvanga la thlang fo nge i nih?"


" Mihring te hi kan in thlak danglam thin a, sik leh sa te pawh a in her danglam zut thin, arsi te pawh an awm ngaiin an awm reng bik lo a, khawvel ngei pawh a in her kual thin, danglam ve ngai lo thil pakhat hriat ka nei a chu chu hmangaih tu thinlung a ni", ka ti teh duah a, min hriatthiam pui ngei se ka ti bawk


" I beisei ngam tawh meuh lo a ni lawm ni ", a ti leh tawl a, ka rilru hi a hre thei a maw ni, ka beidawng lek lek thin a lawm


" Hun min pe ve ta che, i beisei lo bo ta te kha i hmu let leh thei mahna" a tih leh chuan ka en kar ringawt tawh


Rilru a kal kual ve hle a, hmeichhe pakhat chhungril ruak leh khawhar tak ka ni ve tlat a lawm


Ka nghak reng a mahse engmah nghah chhuah ka nei lo, ka beidawng hma mai thei, mahse nghak tu tan chuan rei tak a ni, a reh vang vang a, thlaler a pangpar chawm tu nei lo ang mai in min hnutchhiah a ni



Ani chuan min en reng a, ka mitmengah chuan a khawvel a hmu ta emaw tih mai tur a ni


" Hun min pe rawh", tih leh ka hmui a rawn fawh a rual a, ka hnung ah chuan ka lo in nam ding ve a, ka in la hrang nghal thuai, a mit chu ka melh ran a, sawi tur lah ka hria a zeng pawh a ni lo, a mitah chuan ka chân tak beiseina kha ka hmu a ni


Min rawn hnaih leh in dîm zetin ka hmui bawk chu a rawn fawp leh a, ka hnar ta bik lo, a sam hnawng chap chu ka chul pah rauh rauh a,
amah zawk in la hrang in," Ka hmangaih che" a rawn ti a, ka hmui bawk a fawp leh tawh, hmangaihna thu chu ka hlan ve thei rih meuh lo a ni


Ka chhungte inkhawm tur chhuah fel vek hnuah kan in thlah ve leh a


A bike bulah chuan kan ding dun leh vang vang a, ka sam a rawn chul in," In thuam lum tha la, i dam lo a nge" a ti zui a, thu awih hmel fahran in ka lo bu ve nghat nghat a


'Ka thleng chiah e' tiin a message a rawn thleng a, in thuam lum tha tur in ka ti ve mawlh mawlh



Kan hun hman te chu ka ngaihtuah let a,mahse, Amah kha phatsan ang mai in ka in hria a ni, ka rilru a nuam meuh lo a, Dorris a lakah pawh ka rilru pumhlum ka hlan thei hauh lo ang


Zingah ka hna kal tur min lo lam thlap a, tum dang ang bawk in a hmel hmuh a nuam leh khawp mai


Numam in min chhaih zuk zuk reng a, a hlim ber ber ah a tang ni mai hian ka hria, duhthlanna ka siam dik thu a sawi reng bawk


Dorris a kiangah chuan khawvel chu a kal dik ruih a, ka thla pawh a muang


Mahse engtin nge Ani khan a khawvel a hmachhawn ve mek ang, nun thar a bul tan in, kei ngei pawh hi min hre tawh kher lo maithei, ka hriatchhuah fo ang hian a rilru ah ka châm ve kher in ka ring lo, tu emaw tawng in hlim taka a awm ka ring a chu chu ka duhsak hle bawk



Tlai khat ka bazar chu Dama nau Etheli nen kan in tawk leh hlawl mai a, a bawr ang reng khawp mai, min hmuh chuan min nuih leh sen sen tawh

"In zin dawn em ni?" tiin ka zawt ve thuai a

"Delhi ah kan chhuk ve dawn a", a tih tak ah chuan, ka thin phu a rang ve zat mai, a u chanchin chu ka zawt dawn em ni, mahse, eng tin nge min ngaih ang


"Board exam result kan han nghak deuh a, Pathian zarah ka pass hlauh chuan, College kal te a ngai ve dawn sia, kan nufa thum mai kan ni bawk nen, ka u zuk fin ve mai kan tum a", ka zawh hma hauh in a lo ti thuai a, ka nui tawi tak ringawt


"Ethel...." min lo chhawn nghal thuai na in ka ngawi leh vang vang


"Umimi, ka u nen hian in in then em ni?" a ti leh a, ka lo bu nghat nghat


"I u chu eng nge a an a, a dam tha maw" ka zawt ta rawih a , a chanchin hriat chu a pawi bik in ka ring lo


"In in duh viau si a.." a ti vang vang

"Kan hun tawn in a zir lo deuh a ni e"


"A dam tha e, hna a atchilh hle a, tunlai ngat phei chu a hna ah fak a hlawh ve hle a sin, Umimi in then lo ula, ka u pawh hian a nunphung a hlauh lo chauh a sin" a tih erawh chuan, ka rilru a kal thui tir leh hle tawh


"Kan in be ngai tawh lo a" ka ti ve sap


"Eng thu buai pawh lo nei ula, sawi fel theih a nih ka ring, in be tha rawh u" a ti leh zel a


Ethel in a u number thar min pek chu ka en ngawih ngawih a ni ber


Biak mai ka tum leh thin a, ka insum leh thul, duh ni se min be awm si a, be tur hian tu nge ka nih tawh le, tu emaw ngaihzawng ka ni tawh a lawm


Ni e, tunah chuan hmalam ka pan tawh a, ka tan a mi tha tak pek in ka awm a, be ta ila ka rinawm loh san mai dawn asin, Ani ngei pawh in ka rin phak bak a nun duhawm a lo nei maithei a


Number chu paih bo ka thlang ta zawk a, duhthlanna dik tak ka siam ngei pawh ka ring.


Dawr an sak that dawn avangin thla eng emaw chen chu ka hna ka chawlh san a ngai dawn a, in ka nghak ve ta chawt



Vanneihthlak takin Amor-a leh Nanai pawh an pass hlauh mai a, chhungkua pawh kan hlim ve hle


An pass lawmnan tiin Kapa in Vawka talh sak a, then rual tha te nen chaw kan eikhawm ve a, chhungte pawh an kim ve hle a, lawmpui tu an ngah in kan ri nak nak reng


Zan ah thalai ho in, a lawm nawn leh ngat a, Dorris a pawh a lo tel ve nghe nghe


Rin ai takin Amor a leh Dorris a pawh an in kawm thei, Nani erawh tih dan a thiam hle a, ka nau te chuan an ngaina ve hle


Nau te ho an rik nak nak laiin, pindan lamah kan chhoh san thung


Ka sam a chul riak riak reng a," Rimtui ka tih ber i hria em?" a tih chuan "Eng nge " ka lo ti ve thuai a, nui suk in,"Zonuntluangi sam rim" a ti pek


Ka hmui a a rawn fawh leh chuan ka lo chhang let ve thuai a, a duh thawh telh telh, keimah zawk chu in la hrang hmasa ah tang in, ka thut hlat zui a, a mitmeng hrilhhai zet chu ka nuih san zui


A chang chuan thian that na hi kan inkar chhung khat tu ber niin ka hre thin, thil engkim ah Dama a lang lo thei lo, teh khin chang lah ka ngah Dorris a ah hian Dama hmuh phet ka tum thin, chu erawh hun in a liam pui ve mai ka ring



Chhunah pawh in ka nghak leh chawt a, ka nau te pahnih erawh in an awm hman meuh lo


Nanai'n Higher a rap ve dawn der a, Amor-a ah
pawh in College a rawn rap chho ve bawk a nga, naupang tê emaw tih laiin hun hi a liam ve duak duak mai