HMANGAIHTU DIK (Chapter-6)

[Rebec Nunziri]

Chapter-1



Lalrindiki POV



"Nu... vawin chu ka nuam lo lutuk a, dawr ah ka kal dawn lo a nia" room atanga ka chhuah rual chuan ka ti a, "Awle, kha i hmel ah pawh i nuam lo tih a lang alawm, zan i meng rei leh tawh a mi?" a tih chuan "Meng rei hran nang, dar 10 rik hma in ka muhil tawh, khaw in thlak tur vang hian hritlang ka kai mai mai a nih hi" tiin tui chu ka in a, "Ka u te hi an rawn la tho lo a mi?" ka tih leh chuan "Tho tawh, Mama chu I pa Hminga ten an current chiang lo en turin an rawn ko a, I u te pahnih chu an tlan a nihkha" alu vel mawlh mawlh chung in ka nu chuan a ti leh a.




"Khawi ka lo chhawk ang che, hna ka kal dawn chuang lova" tih leh ka nu chemte ken lai chu va laksak ka rual a, "I nawm loh kha lo va mu hahdam mai mai rawh" a tih chuan ka nui a, "Damdawi ka ei alawm" tiin alu chu ka vel zawm mawlh mawlh a, diktak chuan ka ngaihtuah na kawm lova thol dang tih ka ngai a ni.




Ka chhungril a natna thuk tak in phum ru hi ka chhungte laka tih lan loh hram hram ka tum a, a chang chuan a harsa thin takzet, chhungkaw khawsak nuam tak ni lem lo mahila chhungkaw naute ka ni ve a, ka chhungte hian ka dam loh leh harsat na ka neih apiangin kei ai an buai zawk thin a, chuvang chuan ka buai na hi an bul a sawi lo pawh ka ni.




"Bawihte tunlai i awmdan hi a diklo riau in ka hria, buai na i tawk nge, harsat na i neih chuan i chhungte hi min hrilh rawh aw, kei min hrilh duh lo a nih pawn i u te hi chu hrilh hreh lo la, an ngaihtuah em em che tih i hriat kha" ka nu bawk chuan a rawn ti leh a, nu te nge nge ka awmdan pangngai reng in ka awm emaw ka tih laia ka chhungril a buai na ka tawh hi a lo hriat hmaih hauh lo.




"Chutiang engmah a awm lo" ka nu mitah pawh chuan ka en ngam lo, "Awle, ka ngaihdan mai mai a nia, i duh chuan lo va mu hahdam rawh, khakha chu keiman ka lo tih zawm mai ang" ka nu in a tih leh chuan "Damdawi ka ei ka tih tawh kha, ka nuam, vawin chu ka kal peih loh vanga kal lo tur zawk ka nia, min ngaihtuah leh lutuk a nihkha" ka ti zang leh vah a, ka thiltih lai bawk chu ka chhunzawm mial mial a.




Chutih lai chuan U Mama chu a rawn lut a, "I siamthat sak thei em?" ka nu in a lo ti vat a, "La siamtha theilo, wire thlak a ngai dawn a, vawin ah ah lo lei anga ka rawn haw hunah ka va thlak sak leh lawk mai ang" a ti sup, ka u hi chu tawng tam em em lo mahse a nelawm em em a, mi tupawh mai hian an nel em em vek mai ni, u nih a tlin hle bawk, a nau te hi min duat em em a, a bik in keimah, hauh pawh min hau ngailo.




"Nu.. ka u te hi an va rei ve, chaw ei a hun tawh dawn sia, U Mama hna kal a hun tep tawh a nia aw" ka nu bulah chuan ka ti a, dar 8:30 a pel tawh, "I phone em?" ka bu zeuh a, "An chhang theilo, ka call ngun tawh lutuk, ngati em em nge le?" ka ti leh vat, chutih lai tak chuan ka u te chu an rawn haw a, "In va rei em em ve, in tifai vat ula chaw kan ei da n a nia, muangchang lo ula" ka nu chuan a ti nghal zung zung, vawin hi sawrkar chawlh a nih avangin hna kal an ngailo ve ve a, chuvanga rawn rei deuh pawh chu an nih ka ring.




Kan upa ber hi private company ah hna chhete a thawk ve a, U Rdi hi private school ah zirtirtu hna a thawk mek bawk a, U Sawmi thung hi sawrkar ah hna chhete a thawk ve bawk, keihi thawmhnaw dawr lian ve takah ka thawk bawk a, engtik ni ah emaw chuan keima dawr ngei hawn ka la tum ve bawk.




Chaw kan ei kham hnu chuan U Mama chu hna kal turin a chhuak a, keini pahnih hi chu private a kan thawh avang hian sawrkar chawlh ah pawh kan chawl ve theilo, U Rdi hi chu sawrkar hnathawk nilo mahse school lam a nih avangin sawrkar chawlh ah hi chuan a chawl ve ziah tho, chhun a nih chuan ka nu chu thenawm te in ah leng turin a chhuak a, kan unau thum in in kan tifai thung.




"Mami, tunlai hi U Ruatpuia a rawn leng khat riau in ka hria, a hna thar hmuh pawh lawm na kan la nei miah lo a nia, a buai viau a mi?" U Sawmi chuan a rawn ti chhuak hlawl a, "A buai lai a nia, a lo la leng hman lo a nih hi" dawt ka sawi tih an hriat ka hlauh em avang chuan thil dang ka tihdan vat a, "A lawmpui awm khawp mai, a fel bawk si a, a tumruh man a hmu a nih hi" U Rdi pawh chuan a lo ti ve a, ka ngawi reng.




Lalruatpuia ni e kha mipa kha ka mipa hmangaih hmasak ber a ni a, ka pasal tur ang hial a ka ngaih a ni, mahse tunah chuan eng in zawmna mah kan nei tawh lo, chu thu chu ka chhungte ka la hrilh hauh lo bawk, kum 5 chuang kan in zui hnuah in hauh na pawh awm lovin kan in then tawp a ni a, kei tak pawh hian ka in then dan kha ka la hrethiam theilo a ni a, ka chhungte phei hi chu an hrilh hai dawn lutuk ringawt.




Thalai inkhawm zan a nih avangin kan unau li chuan inkhawm turin kan in siam a, kan in leh biakin awm na hi a in hlat len loh, ke pawn minutes 5 kal vel bak a nilo hrim hrim, dar hmasa a rik hma in kan in siam peih vek tawh, ka nu hian inkhawm tura kal har te tan hnua biakin chhung a luh chauh te hi a duh ngailo, kan naupan lai atangin inkhawm tura kal hma turin min ti fo thin a, a hma pawl kan ni ziah, U Rdi phei hi chu hla chang sawi tu ber a ni.




"Nu kan kal a nia, inkhawm banah hlazir a awm dawn a, kan lo haw tlai ang" in atanga kan chhuah dawn chuan U Mama'n a ti a, kan in zui chhuak ta diak, "Mami U Ruatpuia a ni em kan hmaa kal saw?" U Sawmi'n a tih chuan ka hmalam chu ka en vat a, a hnunglam chauh hmu mahila amah a ni tih ka chiang, "Aw.. a nih saw" ka ti sep, an ko ang tih chu ka hlau ru viau bawk, "Ke in a kal tho sia, tinge min rawn sawn loh le, bike in a kal dawn emaw ka tia" U Mama chuan a ti sup a.




Ka ngawi reng tawng chak na pawh ka neilo, mahse a kalpui nu sawn ka rilru a luah hneh viau thung, kan biakin a mi tho U Ruatpuia duh em em tu a ni miau a, ka hmuh duh sawn ka rilru a na takzet mahse tih kan chi a ni silo, "Kan ko ange" U Rdi'n a tih rual chuan ka lo dang vat, "A ngailo, biakin ah kan in hmu dawn tho alawm, a kal hmasak tur thu min hrilh lawk sa vek tawh bawk a, kal pui a neih thu min hrilh lawk sa hrim hrim alawm" ka lo ti vat a, a ko ang tih ka hlauh hman zia kha.




Biakin kan thleng a, kal an la tam vak lo, dar vawikhat na rik hun pawh a pel daih tawh chuti chung chuan biakin chhung a awm chu mi 10 vel bak kan la nilo, tunlai thalai ho kan in thlahdah lutuk hi chu ka rilru ah a lian ve thin khawp mai, zan tlai tak tak thleng kan meng a, zing ah lak thawh kan hre leh silo, hnatlan naah te hian tai tak tak a kal te hi haw hmanhmawh ber ber ah an tang a, a thleng hmasa zawk ten hma an lo thawh sup sup tawh laiin kan han thu khawmuang leh a, ka chhawk ang che tih awm ngai silo.




Inkhawm dawn lah hian tlat hmaah kan thu ang tih hlau ni awm fahran in tlai lutuk a kan kal pawn bathroom ah kan han kal a, a then biakin kawt ah kan awm khawmuang leh a, tan dar a rik rual hian kan han lut a, in siamthat kan ngai takzet a ni, hetiang reng kan nih chuan khawtlang hruaitu tha emaw ram leh hnam hruaitu tha hi an vang pharh tawh in ka ring, kei ngei pawh hi ka fel bik chuang lo tih ka hria, ka theihtawp in in siamthat ka tum ve bawk.




Inkhawm kan ban hnu chuan hlazir tur ang ang te chu kan awm khawmuang a, biakin a lut leh mai lo chuan biakin kawt ah kan awm khawm a, ka thiannu Amuani nen thutna ah chuan thu in kan titi dun mawlh mawlh a, "U Ruatpuia nen in chanchin hi i chhungte i hrilh tawh em?" a tih sep chuan lu ka thing a, "Arin, an la hre dawn tho tho a, sawi vat zawk la ka ti, midang hian in chanchin hi an hre vat dawn a, midang ka atanga an hriat chuan mak an ti lutuk dawn a nia" a ti leh sep.




"Ka hria alawm, mahse sawi mai dan tur ka hrelo lai ber hi a ni, keimah tak pawh hian mak ka la ti, ka chungah lungawi loh na a nei a nih chuan sawi mai se, tinge hetiang hian a awm thut le?" ka ti a, ka ngaihtuah ngial pawn a lungawi loh na tur thil ka tih awm ka hre silo, "Tha deuh in biak han tum teh, rei tak chhung in lo in zui tawh a, a duh zia che pawh kan hre vek alawm, tlawm zawk ah tang in bia la, in in kar buaina pawh hi in siamthat theih ka ring" Amuani chuan a ti leh a.




"Biak ka tum a, ka text leh call pawh a chhang duh lo" beidawng zet chuan ka ti a, "Phone kal tlang ni lovin hmaichhan ah in be zawk rawh u, hlazir ban ah hian biak chu tum la" a tih leh takah chuan pawi tihna ka neilo, U Ruatpuia ka duh zia chu Amuani hian a hrechiang ber ang, kan in kar siam that theih na tur a nih dawn phawt chuan tlawm zawk a tan pawh chu pawi tihna ka nei lo, conductor in lut tura min rawn tih takah chuan biakin chhung ah chuan kan lut leh phawt a.




Hla kan zir lai te chuan U Ruatpuia ka hmachhawn dan tur ringawt chu ka ngaihtuah a, ka zam rual rual in ka phur ru viau thung, a chhan chu kan in kar kan sawi
fel theih ngei ka beisei vang a ni pakhat, hlazir kan ban rual chuan pawn lamah kan thian dun chuan kan chhuak vat a, "U, U Ruatpuia hnenah sawi lawk tur ka nei a, min lo va haw san mai rawh u" ka u te kan hmuh rual chuan ka ti a, engmah min zawt zui lem lo chuan an kal ve nghal mai.




U Ruatpuia leh Cindy-i chu an rawn in zui chhuak a, Amuani nen min hmuh rual chuan an kal lai pawh chu an tawp ve chawt, "U Ruatpui in be lawk ila" zawi te in ka ti a, "Sawi la" a tih chuan a bula ding Cindy-i chu ka en a, min lo en let ve kar bawk, "Kan pahnih chauh in kan in be thei angem?" ka ti leh sep, "Ka va hman awm lo ve, hei Cindy-i hi thlah haw ka ngai si a, nidang ah kan in be dawn a nia" ti a kal a tum chuan Amuani chu a lo tawng vat a.




"U Ruatpui rei a ni dawn hleinem, Cindy-i hi chu ka rual pawn a haw thei a, scooty ka keng tho bawk a, Arini nen hian lo in be rawh u, Cindy-i chu keiman ka lo thlah haw ang" tih leh Cindy-i chu kalsawn pui a rual a, lo tang ve bawk mahse a pawt sawn dawr dawr tho, "Enge i sawi duh chu sawi rawh" kan pahnih chauh a kan awm takah chuan nelawm loh zetin a ti a, a hmel chu chiang zetin ka en a, ka hriat thin ka mipa hmangaih em em U Ruatpuia ngei kha a la ni, mahse hun reilote chhung a a in thlak danglam nasat zia hi a mak a ni.




"Ka chungah lungawi loh na i nei em ni?" ka tih chuan "Neilo" a ti a, "A nih chuan tinge hetiang hian ka chungah i awm tlat a, ka lakah lungawi loh na i nei lo i ti bawk si" ka ti leh a "Arin puitling i ni tawh a, ka sawi kher ngai lovin i hriatthiam mai ka ring" a aw chhuak atang chuan min biak peih loh hmel ngawih ngawih, mahse ka haider lui tlat thung, "U Ruatpui, i lungawi loh na tur a ka awm a nih chuan min ngaidam rawh, khawngaihin hetiang chuan awm tawh lo la, hreawm a ti takzet a ni, min be duh bawk silo a" ka ti a, hetiang em em hian tu lakah mah ka la tlawm ngailo.




"Arin puitling ve ve kan ni tawh a, hetiang hian awm suh, kan in kar chu a tawp fel vek tawh tih chiang deuh in ka sawi tawh kha" a ti ta hluk, "Kum 5 chuang kan lo in zui ve tawh a, message pakhat lek in khang kan in zawmna te kha i ti tawp a, ka tan hriatthiam a har zia hi i hrethiam lo a ni" ka tih chuan "Hriatthiam loh tur a awm lo, ka duh tawh lo che tihna a nimai, nang aia hmeichhe tha zawk duh ka nei tawh, i hrethiam tawh em?" a tih chuan ka thin zawn in a na nghal zawk a.




"I hriat kha ka chhungte pawn mo atan an duh loh zia che chu hrechiang ber tu i ni, khang kum chhung zawng khan kan in ah vawhnih chauh ka kalpui chhan che pawh kha i hriatthiam ka ring, tunah chuan bialnu dang ka nei tawh a, min rawn ti buai tawh suh ang che, hmeichhe lawilo tak anga awm kha bansan la, kan hun kal tawh kha chu kal tawh a ni a, keini lo pawh in then tamtak an awm tawh, nang ang hian an awm vek kher lo a nia" a ti leh ta fak a.




"Engtinge hetiang hian ka chungah i tih theih zawk, ka ring che a, hetiang taka natna hi min pek ka beisei ngailo a sin" ka aw chu sawi tak a ni, "Mipa sual ber ang chuan min chhuah thei lovang, hetiang thil hi a thleng fo alawm, keichuan bialnu ka nei tawh a, min rawn ti buai tawh suh ang che, kan chhungkaw dinhmun pawh a in mil lo, hna zahawm tak ka thawk a, dawr a hnathawk ve mai mai hmeichhia hi nupui ah neih ka tum ngailo" tiin a kalsawn ta a.




Ka din na ngai ah chuan ka ding reng, ka rilru leh thinlung zawng zawng hi tun a ka thil hriat avang khan a na takzet, ka na lutuk chu tah ngaihna pawh ka hrelo, ka mittui tla tur pawh awm lovin a hul vek a, ka melh ngai chu ka melh reng ringawt, "Arin" ka thiannu aw ka hriat na lam chu ka hawi a, "Ngatinge khatianga i duh reng?" tiin a scooty atang chuan a chhuk a, ka lam chu a rawn pan vat, mawl hmel zet in ka lo en reng ringawt.


"Ngatinge khatia nangmah chauh a i lo din char char a, in in kawt ah ka lo nghak che a, U Ruatpuia kha amah chauh in a lo kal sia, ka lo zawng che a nih hi" tiin ka bulah chuan a rawn ding a, chhan na chang pawh ka hrelo, "I tha maw, in sawifel theilo a mi?" min ne uluk hle, "Sawifel tur a awm lo" tiin ka nui chhuak hak a, "Enge i sawi awmzia, i awmdan hi a diklo reng reng, enge thleng, U Ruatpuia chuan enge a sawi a?" a i leh vat a.




"Kan in kar chu a tawp fel vek tawh, engmah sawifel tur a awm tawh lo" ka ti leh tawp a, "Arin" ti a ka kut a rawn vawn chuan "Ka tha, ka chau em mai naktuk lamah kan sawi zawk dawn a nia aw, tunah chuan mut hahdam ka duh" ka tih takah chuan min hnial lo, kan in chu hnai viau mahse a scooty chuan min thlah a, "Cindy-i ka ngei zia chu aw, kan kalsawn hnu khan thinrim deuh in a kla tau nghal nghawng nghawng a nih chu, naupang ang mai" a ti hlak hlak a.




"Engmah ngaihtuah buai duh suh, engtinge U Ruatpuia nen chuan in in biak hrelo mahila i rilru ti hreawm suh aw" in chhung a ka luh hma chuan a ti a, "Awle, mittui aw, fimkhur deuh in khalh la" tiin in chhung lamah chuan ka lut zui nghal a, ka u te chu an in thlak fel vek tawh, "Ka rin aiin i rei daih mai, va in thlak la, U Sawmi'n nimbu a bawl a nia, rawn ei ve rawh" U Rdi chuan a lo ti zung zung a.




"A...thei thut ei chak na pawh ka nei hran lo, tikhan lo ei rawh u, zanin chu kan mi hma teh ang" ka rilru natna tih lan loh hram hram tum chuan ka ti a, room chhung ah chuan ka lut ta vat, keimah chauh a ka awm takah chuan ka thin zawn chu ka dawm vang vang a, min hnaah tu lian tak awm ang mai hian ka awm ho a tawt up up a, ka thaw tha thei lo hial, U Ruatpuia tawngkam te kha ka ngaihtuah let a, khatiang thu kha a sawi tak tak em tih ka la in zawt a, ka hriat sual a nih ka ring hial.




Khatiang tak khan keihi min lo ngainep mah tih rin ngaihna ka hrelo mai nilo ka ring pha ngailo hrim hrim zawk, khatiang tawngkam na lutuk kha U Ruatpuia hnen atanga ka hria kha mak ka la ti tawp theilo, mahse ka mit leh beng hian khathu a sawi lai kha chiang takin a hre thung si a,




Zanah pawh chuan ka muhil mang lo, tinge min ngainep em em tu mipa avangin hetiang hian ka awm le, ka nep takzet a ni, na taka min ṭawngkhum hnuah pawh ka duhna leh hmangaihna hi chhete pawh in a la kiam phah silo a, zing lamah chuan ka lo muhil ve a ni ngei ang ka harh chuan dar 7 a ri tep tawh, ka tho vat a, room atangin ka chhuak nghal, ka chhungte chu an lo tho vek tawh, nizan ah ka mu tlem bawk nen ka mit a kham deuh urh mai.




Hna kal tura ka in siam peih hnu chuan in atanga chhuah mai ka tum a, "Vawin chu in dawr lamah khan kal kawi ka ngai a, ka rual in i kal dawn nia" U Mama chuan a lo ti hlauh a, ka lawm viau, ka tlai tep tawh miau a, ka u nen chuan a scooty ah kan in phur a, "Mami Ruatpuia nen in tha zel em?" ka u chuan a rawn ti chhuak deuh hlawl a, chutiang thil min zawh avang chuan mak ka ti ru viau thung, a chhan chu U Ruatpuia nen kan chanchin hi a sawi lang vak ngai loh vang a ni.




"Ngatinge chutiang te min zawh teh thut " a zawh na pawh chhang lem hlei lo chuan ka ti a, "Engmah nilo e, kan inah a rawn lang khat em a, tun hnai chu Cindy-i nen hmuh tur an tam si a" a ti leh mai a, ka ngawi ta reng, U Mama leh U Ruatpuia te hi an in kawm thin a, U Ruatpuia'n lam chanchin a la hrilh lo tih chi ka chiang a, tunah lah bialnu dang a nei daih tawh lehnghal a, ka chhungte pawh hian midang ka atanga an hriat hma ngei hian keima'n ka hrilh a ngai dawn a ni.




Dawr kawt thleng chuan ka u in min thlah a, a hmanhmawh deuh avangin a kal lehnghal, "Tinge i u kha i rawn luh tir loh a?" ka dawr thawh ma neitu U Masiami chuan a lo ti vat a, "A hmanhmawh deuh a, ngatinge?" ka tih chuan "Ngati vak mah, ka sawi mai mai, i u te a ni sia" a ti leh vat a, "U Masiami zep duh suh, Arini u kha i duh chiang lutuk" ka thawhpui Dingi chuan a lo ti vat a, "Awih awm loh loh, chutiang engmah a awm lo" U Masiami lah chuan a lo ti vat thung.




"Zep duh suh, i duh tih te chu Arini pawn a hre vek alawm, nilawm ni Arin?" Dingi'n a lo tih leh chuan "Aw.. ka hrelo der mai mai" ka lo ti ve vat a, in en in kan nui dun hak hak a, U Masiami lah chu a laih hmel em em lehnghal a, a ni hi chu a fel bawk sia, U Mama nupui tur atan hian ka iai hauh lo, ka u lah a upa tawh si a, hmeichhe lam a ngaihsak lo bawk si, U Masiami'n ka u hi chhai thlu daih se ka ti a nia.




"Khatiang lam sawi lo khan in tihtur ang ang te va ti mai mai rawh u" tiin U Masiami chu a kalsawn daih a, Dingi nen chuan in en in kan nui dun hak hak ringawt, U Masiami hi ka dawr thawh na nei tu mah nise a fel a, kan lakah thu neih a tum ngailo, min tirh dawn te hian a inthlahrung thin zawk hial, a hma a ka sawi tawh ang khan private a thawh hi chuan chawlh te hi a harsa ka tihkha, U Masiami hi chuan phal thin viau mahse kan tan a nuam lo zawk a ni.




Chhun thil ei a hun takah chuan eitur kan lak thin na dawr ah chuan eitur chah turin ka va kal a, chawl an lo tam deuh bawk nen an buai khawp mai, "A pawilo, nakinah ka lo lam leh mai ang, a hmanhmawh thlak chuang loh a nia, kan hmanhmawh vak lo" tiin ka kalsawn a, a hnathawk te awm ve tho mahse an buai thin em avang hian kan ei tur hi chu kan in chawi phei mai zel, kan dawt chhung a ka luh dawn lai chuan kan dawr piah lawk a dawr chhung ah U Ruatpuia leh Cindy-i ka va hmu fuh hlauh mai a, ka en reng ringawt.




"Arin I van rei em em, enge a?" tiin ka melh na lam chu a rawn melh ve a, "I bialpa kha a nilawm ni?" a tih chuan "Kan in then tawh" tiin harsa ti zet chuan ka nui lui a, "Engmaw, engtik in hmani lawk ah pawh kan dawr ah a rawn kal sia" mak tih hmel zet chuan a ti leh a, "Kan in then tawh alawm, kal ang, U Masiami chauh a awm chuan a lo buai palh ang" tiin ka kalsawn pui nghal dawr dawr a, U Ruatpuia te khan min hmu ang tih ka hlau a ni zawk mah.




"Ka ril a van tam tawh tak, an peih tawh angem le?" Dingi chuan a ti reng a, "An la buai deuh lutuk a, an peih tep ang" ka ti vat, ka mitthla ah U Ruatpuia leh Cindy-i hlim hmel taka an awm dun lai kha a awm reng a, ka eng tih mah a tui tawh lo, "Ka va kal chhin teh ang, ka lo la dawn a nia" tiin Dingi chu a chhuak a, ka kal ngai ta h kher lova a kal chu ka lawm takzet, "An lo peih fel deuh chiah a, a daih hma hian ei ila" tui tray in eitur chu a rawn chawi lut a




Ka thil ei pawh a tui tawh lo, ka ngaihtuah na chu ka kawm melh melh a, "Lo leng rawh u" Dingi'n a tih chuan ka in siamtha vat a, ka hnunglam ka hawi chuan U Ruatpuia te nen kan in melh chat, "In kawr zawrh hi a mawi hmel hlawm lutuk a" Cindy-i chuan a ti a, "Kan nei nalh hlawm a nia lo en rawh u" U Masiami chuan a lo ti vat, "Heihi a nalh lutuk, ka in hmeh i ring em?" Cindy-in a ti ri te chu hre reng mahila ka eitur ringawt chu ka en char char a.




U Ruatpuia'n a in hmeh tur thu a sawi te chuan ka lo in hum ruh ngawt ngawt, U Masiami pawh chu ka bulah a thu ve reng a, U Ruatpuia nen kan in kar pawh a hrechiang viau, zawhna nei tih hriat zet hian min ra n en leh thin tih pawh ka hailo, "Arin" Cindy-in min rawn koh takah chuan an lam chu ka hawi ngei ngei a ngai, "I dawr thawh ma lai tak hi ka lo hre ngailo a, a nuam khawp mai, in nei nalh hlawm si, U Ruatpuia bulah hian min kalpui rawh ka ti a" a ti nghal zat zat a.




"A nihchu, bungrua kan neih that lai tak a nia, in lo kal fuh khawp mai" zangkhai thei ang ber tur chuan ka ti a, "U Ruatpuia hian thil mawi a hre bawk a, nalh deuh min thlan sak beisei ang" nui chung chuan a ti leh a, nui mahse min khei zawng zel in thu a sawi a, midang chuan an hrethiam lo maithei mahse ka tan chuan a tawngkam nem tak kha ngaihtuah hreawm ber a ni tlat, na viau mahila a hmaah hian na hmel put ka tum hauh lo thung.




"Helam a mi hi kan design neih thar ho an nia" Dingi'n a tih takah chuan an kalsawn ta chauh a, ka thaw huai mai, "Thil awmzia chu ka hrethiam e, hreawm tih nan hmang duh reng reng suh" U Masiami chuan zawi te in a ti a, ka nui lui ngial a, a harsa a ni, "Heng ho hi kan lo la ange, in nei nalh hlawm em mai, rawn kal fo tur a nih hi" a man te an in pek lai chuan Cindy-i chuan a ti zat zat a, "Kan lawm lutuk e, in lo la kal leh ngei ngei dawn a nia" U Masiami chuan tha deuh in a lo ti vat.




"Awi.. a tawng tam hman zia kha" Dingi chuan a ti hap a, ka ngawi reng, ka awmdan tur chu min hriatthiam pui nge engmah min zawt lova, thil dang chu an sawi ta daih a, tinge kan in hmuh kher kher ni, ka mood a diklo vek, ka awmdan ah chuan ka ti lang anga, U Masiami te pahnih tan awm nuam lovin ka awm ang tih ka hlauh avangin ka in ti harh lui hram hram a, mahse ka chhungril tawt lutuk chu a hreawm takzet thung.




"Vawin chu kan in khar hma deuh dawn a nia aw, customer an awm lutuk tawh chuang lova" U Masiami chuan tlai lam ah chuan a ti hlauh a, ka lawm takzet, dawr kan khat hnuah chuan kan in then hrang hlawm a, a la tlai lutuk lo bawk nen bus chu ka chang a, a rawn thleng har lo, kan veng bus stand a a din rual chuan ka chhuk vat a, chuan man ka pek hnuah kan in lam pan chuan ka kal ta vat.




"Nu ka lo haw" in chhung a ka luh pah chuan ka ti a, "I va lo haw hma ve, dawr in khar hma em ni?" ka ni chuan a lo ti vat a, "Aw, U Masiami'n in khar hma a rawt a, nu ka in tifai dawn a nia" tih leh room a luh ka rual a, ka u ten rawng an bawk vek tawh bawk a, chaw ei chiah a ni tawh mai, chaw ei nan a la hma deuh bawk nen tv chu kan en a, U Mama erawh current siamtha turin a chhuak leh tawh.




"Mami kan in be lawk dawn a mi?" U Malsawmi'n ka bul a rawn thut pah chuan a ti a, "Sawi la" tiin ka en a, "Hetah lo, pawn ah aw, nu Mami nen hian dawr ah kan va kal lawk ange" a tih zawm nghal avang chuan ka tho vat a, "Enge i sawi duh chu, a van pawimawh hmel em em, pawn lamah min chhuah pui daih bawk sia, i thuruk min hrilh dawn a mi?" tiin ka nui a, U Malsawmi lah chu thil ngaihtuah nei tih hriat takin a ngawi reng bawk si.




"Vawinah Cindy-i leh U Ruatpuia ka hmu dun a" ka beisei loh lam daih a sawi avang chuan ka ngawi reng a, "In awmdan hi min han hrilh teh, tun hnai ah kan in a rawn chuang kai khat si a, i awmdan lah a danglam tih ka hailo, i u ka nia, i mize danglam hi ka hriat loh ring suh, engkim min han hrilh teh" a tih takah chuan zep theih a niin ka hre tawh lo, tun a ka sawi hi a fuh ber zawk in ka ring, ka u hian min hriatthiam ngei bawk ka beisei.




"U Ruatpuia nen chuan kan tawp tawh" ka ti sak talh a, "In in hau nge, i lakah lungawi loh na a nei em ni?" a tih chuan "Chutiang engmah a awmlo, in tih thiam loh na kan neilo, a lungawi loh na tur zawng a awm ka duh loh zia pawh i hriat chian kha, hetianga a awm thut chhan hi keipawn ka hrelo" ka ti a, nizan lama kan in biak na erawh engmah ka sawi duh lo thung, ka mipa hmangaih a ni a, ka chhungten an huat na tur thil sawi ka duh lo.




"Mami ka nau i ni a, ka lakah zep dang i la nei tih ka hria a nia, engkim zep neilo in min hrilh rawh, kan chhungte bula sawi i duh lo a nih pawh in ka sawi chhuak lovang, mahse ka bulah chuan engkim i sawi thei a nia" ka u in a tih leh takah chuan ka mittui chu a rawn hnam tiam tiam a, nizan lama kan in biak na zawng zawng pawh chu ka u hnenah chuan engmah zep awm lovin ka hrilh fai ta vek a.




"U Ruatpuia chu ka ngaih ang a lo ni hauh lo, hna pangngai tak a hmuh hnuah hetiang hian a ti duh che a nia, nilo ka ngawi mai mai theilo, ka nau hnu hniam tur hian eng anga sang nge a nih bik?" ka u chuan a ti ta hlak hlak a, a thinrim hmel viau bawk, "Nilo U, U Ruatpuia chungah chuan engmah ti suh aw, tunah chuan kan in kar pawh a tawp fel vek tawh a, buai na siam sak ka duh lo" ka tih chuan ka u chu a thaw chhuak hak a.




"Khatiang khawp khan a ngainep che a nia, en liam mai mai i thlang amaw?" a tih leh pawh chuan ka bu nghat a, "Ka mipa hmangaih ber a ni a, buai na siam sak ka duh lo a ni, tunah chuan bialnu dang a nei tawh a, keipawn hmalam ka pan ve zel mai ang, khawngaihin engmah ti suh aw, ka chhungte hnenah pawh keimah ngeiin ka la sawi a, mahse khawngaihin kha thil kha chu min zep sak rawh" tiin ka ngen a, lungthlu zan lo chuan min pawm pui ta hram.

Cont...

A ngaihnawm hmel in ti em, true story base a ni a, ngaihnawm in tih ngei ka beisei...

[Rebec Nunziri]

Chapter-2



Lalrindiki POV



Khawvel ah hian vanduai tur reng a piang an awm tia an sawi hi ka hre ve fo a, ka awih ngai lem lo, mahse tun hnuah hi chuan kha an sawi vanduai tur reng a piang an tih zing ah khan ka tel ve tih ka pawm thlap tawh, ka pa in nausen ka nih laiin min boral san a, hmuh pawh ka hmu ve hman lo, Pathan zar ah nu leh unau min hmangaih em em tu ka nei a, harsat na em em nei lovin ka sei lian ve, mahse harsatna hian tupawh mai hi min kal kan lo chu a nih hi.




Ka mipa hmangaih em em in min kalsan a, pangngai taka in then na thu pawh sawi lovin kan tawp tawp a, ka tan chuan hriatthiam a har em em a, kum 5 chuang kan lo in zui ve tawh na te kha a tan chuan engmah lo mai a lo ni si a, a laka ka in nghah nasat zia hrechiang ber tu khan engtinge ka awm tih tak ngial pawh ngaihtuah lovin a hlim na tur a pan a, ka hmangaih em avangin a hlim na tur ka duh, chutih rual erawh in hmeichhe dang nen hlim taka an awm lai hmuh chu ka tan thil harsa ber a ni thung.




Hetiang hian ka awm reng thei bik lo, hmalam ka pan ve a ngai tih ka hria, mahse a har a ni, a hlim chhawn lai tak meuh meuh a la nih vang nge ka rilru hi a la dam theilo, U Ruatpuia'n ka hnen a a sawi zawng zawng te kha ka dam chhung zawng chuan ka theihnghilh leh ngawi tawh dawn lo tih ka chiang viau bawk, chuti chung chuan ka haw thei lo, ni e, hlim rawh se ka hmangaih kha a la ni miau a, keichuan a hlim na tur chauh ka duh.




Hun te a liam a, ka chhungte hnenah pawh U Ruatpuia nen kan chanchin chu ka sawi tawh a, ka tawrh zia pawh an hria, a chanchin chu min zawt ngailo a, huat lah an haw hek lo, pangngai tak a in then angah min ngai miau a, U Malsawmi chiah hian kan in then dan a hrechiang a, a hma ang khan U Ruatpuia chu a nel tawh lova, biakin ah pawh nise a be ngai lem lo, sawi lo tura ka tih vang erawh kha chuan tu hnenah mah a sawi chhuak dawn lo tih ka chiang viau thung.




"Arin, U Hruaia kha I la hria em?" Amuani'n inkhawm ban hnua a tih chuan lu ka thing a, "Aw.. engtinge i hriat loh theih zawk, kan naupan lai pawn chhelo kan tih theih em kha, mahse hmundang ah a awm daih a, han ngaihtuah teh, i hre hrim hrim ang" a tih leh takah chuan ka hrechhuak nghal, "Ka la hria, tinge i rawn sawi chhuah teh thut a" ka tih haw chuan "A rawn haw tawh asin, nimin ah khan ka hmu thut a, mak ka tih zia chu, a chhelo zual sauh lehnghal a" phur zet chuan a ti leh siam siam a.




"I va han lerh tak, i lo star leh hman a ni hrim hrim ang, i phur dan em em ah khan" ka tih chuan a nui nasa mai, "Min lo hrechiang ber a nih hi, nangpawn hmu la i star hrim hrim ang, a chhiat loh zia chu" a tih leh bawrh bawrh a, ka chhang buai vel peih lo, U Ruatpuia nen kan in then atang khan mipa lam hi ka ngaihdam vak duh tawh lova, hnaih lah ka tum hek lo, tunah rih chuan tu mipa mah hi in zawmna siampui ka duh lo.




"Nang angin ka lerh lo tih hre rawh, nang te chuan kan veng a mipa pangngai deuh te chu i star vek alawm" ka tih chuan a duh lo ngang mai, "Ka ti tak tak a nia aw, a chhiat loh zia chu, i hmu anga i hre mai ang" a ti leh hmak a, ka nui ta ringawt, "Awi.. saw amah chu, a inkhawm ve a nih saw, lo kal rawh a bul ah sawn va kal ang" tia min kalpui mai a tum chu ka ring tlat a, "Enge kan va tih ve anga, hriat pawh min hre tawh lovang" ka ti tlat a.




"Min hre awm em mai, lo kal phawt rawh" tiin U Hruaia din na lamah chuan min kai phei nghal dawr dawr a, "U hriat I dam maw, min la hria em?" ka thiani chuan a ti nghal zung zung a, "Ka va hre mai tawh lo cheu ve" ka tin dan chiah a ni, "Amuani ka nia, chuan heihi Arini" Amuani'n a tih leh takah chuan U Hruaia chu a ngawi deuh vang vang a, "Aw.. nangni pahnih hi hmeichhe naupang nghal deuh kha maw in nih a, in va lian tawh ve" naupang ang mai chuan min bia a.




"Kum 10 chuang kan in hmu tawh lova, tunah chuan nula pangngai kan ni ve tawh a nia" Amuani bawk, "Ni e, ka hmu alawm" U Hruaia chuan a ti leh mai a, "Arin, i u t an dam maw, Mama nen pawh kan la in hmu miah lova, vawin lam a inkhawm lo em ni?" U Hruaia'n a tih chuan "Aw.. a nuam sam lo deuh a, vawin chu a inkhawm peih ta lo a nihkha" ka lo ti tha ve mai a, "A va zialo ve, nakin ah ka lo la leng dawn a nia, ka kal phawt ange" tiin a kalsawn a.




"Awi.. a va han chhelo chiang tak aw, bialnu a nei angem le?" Amuani chuan thlir zui vawng vawng chungin a ti a, "Chutiang te i hriat chak viau te chuan kan bula a din lai khan zawh tur che alawm" ka tih chuan ka ban ah rawn beng in "Ka ngam i ring a mi?" a la ti zui, "Kut min thlak ziah suh, i kut thlak a na ropui si" lawm lo zet chuan ka lo ti a, "Awle, ka tihpalh a ni e ka pi, min ngaidam rawh" uang zet a a rawn tih leh takah chuan ka nui ta ngawt.




"Saw mite saw ka hmu peih lo a nia, kal vat teh ang" U Ruatpuia leh Cindy-i rawn in zui phei a hmuh rual chuan a ti a, kei ai mahin ka chungah U Ruatpuia chet dan ah khan a thinrim zawk a, Cindy-i nen a hmuh dun ngat phei chuan a ngaithei lo zual, in lam pan chuan kan haw ta daih a, Amuani chuan U Hruaia chungchang ringawt chu a sawi zawm a, ka ning lek lek, sawi tawh lo turin han ti ila min ankhum leh zek emaw kha a nia nga.




Leng kawi tura ka sawi tlat avangin Amuani chu a rawn leng a, "In va rawn lut fuh ve, eitur kan siam mek a, Amuani nangpawn ei rawh aw, kan siam tam teh mai a nia" U Rdi chuan a lo ti zung zung a, "Tehreng mai, eitur te chu kan hnial phal nang, ka riltam tawh zia chu" Amuani hi chu a rawn chuang kai ngun tawh bawk a, kan in hi chu a in ang maiin a ngai, keipawh an in ah chuan ka tlangnel ve hle bawk, an chhungkua an fel si a, khawsa ve thei tak an ni tih kan sawi tel hram ange.




"Changban ka ei chak ka tih mek laiin ka ei teuh dawn a nia" ka u ten eitur an rawn chhawp rual chuan a ti zang leh vah a, ka u te pawh chu an lo nui tawp, "Han ei tak tak teh, a tam lutuk khek a ngailo a nia" an lo ti ve vat a, Amuani thil ei lai hi ka u te hian hmuhnawm an ti thei khawp a, tunah pawh chhanhban kan thial tuap tuap chungin a tawng a, ka u te chuan hmuhnawm tih hmel zetin an en leh reng tawh, keichu changban kan hi ka ngaina lutuk lova pakhat ka ei hi chuan ka duhtawk viau zel.



"Amuan ka va in thlak lawk ange aw, ka reilo ang" tiin pindan ah chuan ka lut a, ka in thlak zawh hnuah U Mama pindan ah ka lut tlang lehnghal a, "U Mam enge i an?" Khum ah chuan a lo la mu bam mai, "Ka tha lutuk" a aw atang pawh chuan a that vak hmel loh, "I aw atang kha chuan i va that hmel loh ve, chaw te i ei tawh em?" Ka ti leh a, a damlo khat bawk nen ka ngaituah a ni, "Ka ei tawh alawm, tlai lamah chuan ka rawn tho chhuak peih tawh mai ang, Mami min ngaihtuah duh suh" a lo ti leh a.




"Taka U Hruaia a rawn haw tak a sin, i hre tawh em?" Ka hriat chhuah zawk avang chuan ka ti a, "A lo haw tur thu kha chu a hma khan min hrilh tawh a, a hun tak a sawi lo, rin aiin a rawn haw hma a nih chu, hmuh a chakawm tawh khawp mai" ka u leh U Hruaia hi chu naupan lai atang tawh a in kawm ngeih em em kha an ni ve a, ka u pawh hian a khat tawk in a sawi chhuak ve fo thin, "A lo kal tur thu a sawi kha, a ni pawn a hmu chak tawh lutuk che, Amuani a rawn leng bawk sia, ka va chhuak enge" tiin ka chhuak a.




Amuani chuan thleng a sil a, a la in thlak ve silo a, sil a tul lo kan tih pawn a ti lui tlat bawk nen a sil ta nge nge a nihkha, a kawr hak lai a ti bal ang tih erawh ka hlau viau mai, "U Amuani te inah ka leng dawn a nia, ka lo haw har lovang" U Malsawmi hnenah chuan ka ti a, Chawlhni ah hi chuan Amuani te in ah ka leng ve zeuh thin a, hna nen Chawlhni lo hi chu len na hi tur ka neilo ve em a ni, Amuani te in lam kan pan lai chuan kan titi dun pah mawlh mawlh a, U Sawmi hnenah khan U Ruatpuia nen kan chungchang sawi tawh mahila tuna ka awmdan hi chu ka thiannu chauh hian min hriatpui.




Pawn lamah tha tak angin lang mahila ka chhungril hi a damlo takzet a ni, zan lamah mutthilh ka harsat a, thil ka ei tha theilo a, ka chhinte lakah erawh ka la in thup ve hram hram thung, ka eng tih mah a tuilo a, ka ngaihtuah na ka kawm nasa bawk si, Amuani hian min ngaihtuah em em a, hetiang awm hi ka duhdan a ni biklo, mahse hmalam pan ka la harsat em a ni, pangngai deuh a in then chu ni ila hetiang em em hian ka tawrh ka ring lo thin.




"Arin i tan a harsa ang tih chu ka hria a, mahse hmalam pan tum hram hram rawh aw, khatiang mipa vanga hetiang taka i na hi hmuh hreawm ka ti, i taksa hian a la tuar lo vat mai ang, a ni aia tha mipa dang an tam lutuk alawm" Amuani'n a tih chuan ka nui a, "Chutiang chuan ka ngaihtuah ve fo alawm, mahse maw Amuan hmalam pan hi ka la harsat em a ni, ka in chhir ber chu maw, kha zan khan U Ruatpuia kha lo be lo ila hetiang hian ka awm lo tur a nia" ka ti a.




Kha zan khan U Ruatpuia kha biak tum lovin lo haw tlang nghal ni ila chu khatiang ang thu dengkhawng lutuk kha ka hriat a ngailo tur, in chhir viau mahila tih theih a awm tawh silo a, U Ruatpuia thusawi te avang khan mahni in hmuh hniam na nasa tak ka nei a, midang aia ṭhalo bik riau leh nep bik riau anga ka in ngaih na hi a bo thei tawh lo, mipa pakhat thusawi vang mai mai a hetianga ka awm hi nep kin ti a ni maithei, mahse khatiang thu min hrilh thu ngei kha ka mipa hmangaih hmasak ber leh ka rin em em a ni miau.




"Ngatinge maw kan awm na hmun apiangah hian hmuh tur an lo awm ve ziah ni?" U Ruatpuia te pahnih bawk chu bike a an in phur lai kan hmu a, min rawn tlan pelh rual chuan ka thaw chhuak ham ham, "Kal vat teh ang, kan khawvel boruak chhe tawh lutuk hi a buaithlak a nih hi" tiin a hma aiin kan kal chak zual sauh a, Amuani te in ah chuan kan lut a, Nu Mawii chuan min lo be vat, "Khawiah nge Pa Sanga hi a awm?" Thutthleng a ka thutthlak rual chuan ka ti a.




"An la committee a nihkha, I damlo em ni, I va cher ve, i chauh hmel bawk si" Nu Mawii'n a tih leh chuan "Chutiang lam pawh a nilo, tunlai chu ka thil ei a tui vak lova" ka ti mai a, "A nihchu mawle, pasal neih i ngai tawh a nihkha" a tih chuan ka nui a, thu dang chu a sawi zawm lehnghal a, "In in ah pawh rawn kal ka duh, ka antan chi hi i nu rawn pek ve ka duh a, keimah ngeiin pek ka duh bawk si, hun remchang a ka lo kal tur thu i nu bulah khan i lo sawi dawn a nia" a ti leh zung zung a.




An ni chhungkua hi chu pathum tlawng an ni a, Amuani hi an fanu neihchhun a ni bawk nen an duat viau, "Ruatpuia nen in la tha zel maw, in in zui rei tawh bawk a, in neih lam te hi in awn ve tawh em, Amuani nen hian in naupang chhe tawh lo a nia, kum 26 in ni ve tawh a, pasal neih vat in ngai, i thiannu lah hi lerh viau e tilo hian bialpa a nei thei bawk silo, nang tal hi chuan han nei teh, a ni pawh a harhchhuak mahna" Nu Mawii bawk chuan a ti leh bawrh bawrh.




"Nu engthu nge maw i lo sawi le, i thawk a phit chang hian pasal nei turin min ti ngawt zel suh, a hun ah chuan kan nei ve mai dawn alawm, i hmanhmawh a nihkha" Amuani chuan pindan atanga rawn chhuah pah in a rawn ti zui lawng lawng a, "Khatiang vel kha in nia, khua hi a var lo thin teh e aw, hei i thiannu te chuan bialpa tha tak a neih tawh hi, nanghi chu i a bawk si a, a buaithlak a nih hi" Nu Mawii chuan a ti leh hlak hlak a.



"Nu, ngawi tawh rih la" Amuani chuan min vengthawng deuh chungin a ti a, "Thil ho mai mai ka sawi lo a nia, in hma hun a ni ka sawi, in tan a tha tur a nih chu, Arini chuan bialpa tha tak a nei a, nangpawh mipa lam hi ngaihven ve deuh tawh rawh" Nu Mawii bawk chuan a ti leh a, "Nu a mak, Arini leh U Ruatpuia chu an in then daih tawh, khapa kha sawi ve ziah tawh suh" Amuani bawk chuan a ti ta hmak a.




Nu Mawii chuan mak hmel zetin min rawn en a, "Engtik in nge, a va mak teh thut ve, in tha viau emaw ka lo ti mai a sin?" a tih chuan chhang lovin ka nui ringawt, han chhan vak dan tur pawh ka hrelo, keipawn kan tha emaw ka tia mahse khatiang teh thut khan kan in kar a rawn ti tawp ringawt bawk nen midang hnena han sawi dan tur mai hi ka hrelo, "Nu, Arini hian nuam lo a tih phah ange, an in then te chuan an in kar a tha lo tih na a nimai alawm" Amuani chuan a lo ti leh vat a.




"A va pawi ve aw, Ruatpuia fel nen, ka duh pui che a asin mawle" Nu Mawii bawk chuan a ti leh a, "Nu mi hi an landan ringawt a teh loh tur, fel deuh emaw kan tih te hi an chhungril a lo kha viau thei a nia, U Ruatpuia pawh i ngaih ang a nilo maithei a sin" Amuani chuan a ti leh hlak a, "Khatiang in mi chanchin sawi suh, Ruatpuia phei chu kan veng tlangval fel a ni a, ka hrechiang ve alawm" Nu Mawii'n a tih leh rual chuan "A nih chu, a fel hle mai, Arini nen an in then atanga hun reilote ah hmeichhe dang a kawp lehnghal thei a nia" Amuani chuan a ni in U Ruatpuia a fak lutuk chu ngaithei lo tih hriat zetin a ti leh a.




"Enga, Ruatpuia chuan kawp pui a nei leh tawh amaw?" Nu Mawii bawk chuan mak tih hmel zetin a rawn ti leh a, "Nei leh daih tawh, Arini nen an in then hma daih atang khan a ni tawh zawk maithei, sawrkar ah hna a hmu te te a ka thiannu hi rilru na takin a siam nghal ringawt a nia, ka ning a chanchin kha sawi reng lo teh ang u, mood a ti off, an ni chanchin sawi man ka chil per hi ka ui" a ti leh hlak hlak a.




"A pawi hle mai, Arin engpawh chu nise hreawm tih nan hmang reng reng suh, chutiang thil a thleng tawh a, Pathian in i tan a tha zawk tur kodang a ruat sak che angah i ngai dawn a nia, Ruatpuia reng reng pawh chu a ti mak hle mai" Nu Mawii pawh chuan a ti ve ta nge nge a, "Dik chiah, Arini phei hi chu i hmeltha a, i nu lian in a pian lah a dik, U Ruatpuia aia fel leh chhelo bialpa i la nei em em ang" Amuani lah chuan a rawn ti zang leh vah a.




"In ti mak nufa em mai, mipa lam ringawt sawi lo teh u, a ninawm" ka tih chuan an nui dun ringawt, Pa Sanga pawh chu a rawn haw har lem lova, kan in kawm ho ta mai mai, "A nih ka va haw tawh phawt ange, rawngbawl a hun mai dawn sia" ka tih chuan "Chaw ei ve nghal la" Pa Sanga'n a lo tih chuan ka hnial vat, "Ka chhungte bulah engmah ka sawi lawk silo a, ka va haw phawt zawk ang, nidang ah chaw chu ka rawn la ei zawk dawn a nia" ka tih takah chuan min chelh lui ta bik lo.




"U Ruatpuia chungchang chu ngaihtuah duh tawh miah suh, khatiang mipa kha chu duh tlak pawh an nilo, hun reilote han liam leh se, a la in chhir leh vat mai ang, mahse a mizia leh a rilru put hmang diktak i hre vek tawh bawk a, a hnenah let leh chu tum miah suh ang che, a ni khan a phu hlawl lo che a nia" Amuani chuan ka haw tur min thlah pah chuan a ti a, "Nia, mahse a in chhir ka ring lo, Cindy-i nen an ngheh hmel tawh em mai" ka ti a.




"An in kawp dan hi a pangngai lo em mai, nang rilru na takin i awm tih pawh an hre ve ve a nia, mahse pawi tih na an neilo, hetiang mihring hi chu Pathian pawh hian an hlim tak tak a phal ka ring lo, Cindy-i pawh hi fel hmel deuh in a lang a, U Ruatpuia nen in in kawp lai reng in a hel char char duh a nia, an in kawp rei tak tak awm lo em mai" a tih leh chuan ka chhang buai tawh lo, "Helai thleng hi min thlah mai rawh, i let leh na tur a hla mai mai ang" ka tih tak avang chuan an in lam pan chuan a kal leh ta a.




Kalkawng ah chuan kal in ka ngaihtuah na chu ka kawm pah mai mai bawk, U Ruatpuia nen kan in kar a that lai kha chuan Chawlhni tlai ah kan leng dun thin kha a nia, a tir ah kha chuan ka lung a leng a, na hle mahila hun a liam anga ka tha leh vat turah ka ngai a, mahse a lo ni hauh lo, ni a liam a, ka natna te khan dam lam ai mahin zual lam a pan in ka hria, a ni tel in U Ruatpuia ka ngaih na a zual telh telh bawk si.




Tum thum ngawt chu ka in sum zawh thlawt loh avangin ka va be tawh nghe nghe, mahse a ni hnen atang chuan natna bak ka hmu chuang lo, na tak tak in min ṭawngkhum a, ka biak hnuhnun ber phei kha chuan 'Khawlai a kan in hmu a nih pawn min biak tum suh ang che, hun hi her liam theih ni ngat se chuan nang nen hian kan in kawp hauh lovang, nang ang hmeichhia dawr a hnathawk ve mai mai hian min phu lo, biakin lamah pawh ni rawh se min biak tum hauh suh, nang aia hmeichhe tha kawp pui ka nei tawh a, zahawm na tlem tal i nei a nih chuan min rawn be tawh suh ang che" tiin phone a dah hmak a nih kha.




Tu hnenah mah chuthil chu ka la sawi chhuak lo, nilo ka be thin tih pawh ka chhungte mai bakah Amuani hnenah pawh ka zep tlat, tunah pawh U Sawmi leh Amuani chuan an haw em em tawh si a, khatiang thu kha an hre leh ngat a nih chuan an ṭawngkhum hreh dawn lo tih ka hria, eng ang pawn dan tum mahila ka dang thei dawn hauh lo bawk, kan in ka thlen chuan lut mai lovin pawn ah chuan ka ding a, naupang ho chu kawnglai ah an in fiam a, naupang kan nih lai kha a lo ngaihnawm ber a nih hi.




Lung kham em em nei lovin kan nung ve a, thiante nen han in hauh chang pawh awm ve thin mahse reilote hnuah kan lungawi leh mai a, rilru natna tih te hi khatih hunlai khan ka neih awm ka hria ngailo, mahse hun te a liam ve zel angin puitlin lam kan han pan chho a, ngaihtuah tur a tam a, mihring kan nih chhung chuan harsat na te hian min kian san ngai dawn lo tih kan hrethiam chho ve telh telh chu a nih hi.




In chhung ah chuan ka lut a, kan thutthleng a mipa thu ka hmuh chuan mak ka ti deuh, mahse vawin lamah pawh ka i hmuh a duh thu a sawi tih ka hre zawm lehnghal, "U i lo tho harh peih tawh maw?" Tiin U Mama zawk chu ka be vat a, "Aw.. zan lamah chuan ka in khawm ve peih tawh ang, vawin lamah ka chawl ringawt tawh si a, zan lamah tal ka in khawm loh chuan" a ti mai a, "U Rd, khakha ka kawr a nilawm ni?" Ka tih chuan "Ni e, ka hak sak lawk che a nih hi" a ti mai a.




"Nei daih rawh, khatiang ka chi ka ngaina vak chuang lova, vawikhat chauh ka la ha" tiin a bulah chuan ka thu a, "U Hruaia hi i la hria em?" A tih leh chuan "Min ka hria, vawinah pawh kan in bia alawm" U Hruaia zawk chuan min lo tih khalh a, "Hruaia naktuk tlai chu kan in khel dawn em ni?" Ka u in a tih chuan "I la dam loh kha mawle" U Sawmi'n a lo ti vat a, "Ka tha alawm, mipa ka nih hi" ka u lah hi a, a dam loh ve teh hian a in ti pa ka ti dawn nge engah mah a ngailo thin lutuk hi chu a buaithlak a ni.




"I hman te chuan a pawi hleinem, a chakawm tawh khawp mai" tiin U Hruaia chuan thingpui a lem zui khawlh a, ka en leh zeuh zel a, ka en apiang lah hian min la hmu fuh thei em em zui a, "Zanin kha Pu Sawmdawnga te in ah tawngtai na neih tur a ti em khah?" U Sawmi'n a tih chuan "Aw.. an nupa in an damlo nasa viau a ni awm e, fa an nei thei bawk silo a, a thei thei an in ah tawngtai na neih an ti a nih kha" U Rdi chuan a lo ti a, chutiang ka lo hre ve hauh lo, ka u te ho kal an tum hmel tho avangin kal ka tum vak lo.




Amuani'n in khawm tura min rawn sawm chuan ka lo hman diam tawh, kan chhuak nghal a, "Thlaleh kha kan thawhlawm khawn a ni em kha?" ka ti a, "Aw, thawhlawm khawn hi ka peih lo thei tawp" a tih chuan "Engvangin maw?" ka lo ti vat a, "Ka hrelo, ka zam a ni tawp, puitling ve uai tawh mahila thawhlawm kan khawn lai hian mipui lam hian min en thup zel in ka hria, thawhlawm ka khawn thlaah hi chuan pheikhawk sang deuh hi ka bun ngam ngailo, ka tlu ang tih ka hlau tlat, zahna thuah hnih a ni nghal ringawt dawn a" ka nui chhuak hak a.




"Thil dang ah i zah loh tehreng nen enge chutiang ah te i zah?" Ka tih chuan "Thil dang nen a in ang lo, U Puia hmuh lai te hian ka che chhe reu reu ang tih ka hlau a nia" U Puia a tih hi a star kum hlun a nia, mahse U Puia hi chuan hmeichhe lam hi a ngaihsak vak lova, Amuani hian hma a la hmasa ngawt te a nih loh chuan beisei a awm vak in ka hrelo.




"U Puia hi i sawi ve ziah a, hma pawh i lak ngam tawp loh kha?" Ka tih chuan "Hmeichhia ka nih hi, mipa in alawm hma la hmasa tur le, ka nghak char char dawn" a ti mauh mai bawk si, "Arin min lo nghak teh u" Tih ri kan hriat rual chuan Cindy-i chu kan bulah a rawn ding a, "Kha nangmah in i kal elaw, U Ruatpuia'n a sawm hman lo che a mi?" Amuani lah chuan a lo ti hmanhmawh a, a ruk in ka va nghawk zeuh.




"In khawm a hruai zan a nia, kan kal rual hman lo mawle, kal pui tur ka nei silo a, kan in hmu remchang bawk a, thu ho ang u aw" a la ti zui, han hnial vak chi ah ka ngai bawk silo nen ka aw ta tawp a, Amuani lah chuan an peih loh hmel em em khawp a, kan in biakin thlen nan minute 1 pawh kal a ngai tawh lo "Nimin ah U Ruatpuia nen kan chhuak dun a, ka pheikhawk hi min lei sak a, nalh i ti em?" Tiin a pheikhawk chu min hmuh a.




"Arini nalh tih leh tih loh chu enga tan nge i tih, in lei vek tawh tho a, bakah a tan a lei a nilo a, i tan a a lei zawk a nia, nalh i tih chuan a tawk mai lo a mi?" Amuani chuan a lo ti leh tawh, "Ka zawt mai mai alawm, enteh u, ka lakah in lungawi lo tih ka hria alawm, mahse U Ruatpuia nen in in then hnuah a nia kan in ngaihzawn, in haw lovin thian angin in en zawk ang u, kohhran khat ah kan awm ho a, hetianga in hmelmak chu a ṭhalo em mai" a ti dam dap a, "Va han zaktheilo tak e aw" Amuani chuan a ti zawi sep a.




"Kan haw lo che a nia, i sawi ang takin U Ruatpuia nen chuan kan in mar a tawp fel tawh a, engah mah ka ngailo" ka ti a, ka rilru ah erawh dawt chiang takin ka sawi tih a ri ring hle thung, biakin compound kan luh dawn thleng chuan U Ruatpuia nen an chanchin a sawi ta char char a, ka tan chuan ngaihthlak a hreawm takzet, "Hna in nei ve ve a, in chhuak dun ngun bawk sia, in hman ka ti" Amuani chuan a ti ta fak a, a ning ta deuh aniang.




Cindy-i pawh chu a ngawi chiang hle, biak in chhung ah chuan kan lut a, U Ruatpuia chu ngun takin ka en reng a, a hmel, a landan leh a tawngkam zawng zawng chu a la pangngai vek, ngatinge hetiang tak hian a danglam tak tih hi ka la in zawt fo mai, Cindy-i lah chu ka bulah a thu ve reng bawk si, Pathian biak in ah kan awm tih theihnghilh lek lek khawp in a ni ka rilru ka kawm nasat ni.




In khawm ban chuan haw tlang mai ka duh thu Amuani hnenah chuan ka sawi a, "I kal dawn loh chuan ka kal peih bik vak lo e" a ti a, "Kal rawn, Pa Sawmdawnga te phei chu an nupa an khawngaih thlak si a, keichu ka kal lo mai ang, U Ruatpuia te pawh an kal ve awm si a, ka tan a nuam lo" ka tih takah chuan min hrethiam zetin a aw ta a, kan kalsawn dawn lai chuan "Kha nangni thian dun chu haw in tum a mi?" u Hruaia chuan a rawn ti a.




"Keichu kan lo haw hmasa mai ange, ka u te an kal dawn tho a" tiin ka lo chhang tha ve mai, "Member tam thei ang ber kal kha a tha alawm, kal tur kan tlem hmel riau bawk si a, nangpawh rawn kal ve zawk rawh" a ti deuh tlat a, keini aia upa daih a ni bawk nen han hnial vak kha ka ngam chiah silo a, "Kal na tur pawh ka neilo" ka ti leh ringawt a, Pa Sawmdawnga te in hi veng mawng lamah daih a awm avangin kan biak in atang hi chuan a hla ve hle.




"Chutiang ah buai na a awm hleinem, ka rual in i kal thei alawm, tumah phur ka neilo" a va han buaithlak leh zel tak, "Amuani pawh hian kal a tur a neilo" kan ti leh ringawt a, "Puia lo kal teh" U Puia rawn kal a hmuh takah chuan a lo ko vat a, "Phurh tur i nei em?" A tih zawm zat bawk, "Neilo" U Puia chuan a lo ti vat a, "A that hlauh chu, Arini te thian dun hi kan phur mai dawn em ni?" U Hruaia'n a tih chuan "A pawi hleinem" U Puia chuan a lo ti leh vat a, tum lo eng ang pawh nin ila chhuanlam tur ka hre tawh lo, kal ve ngei chu a ngai dawn a nih hi.




"A kal hmasa lamah kan tang dawn em ni, midang ho hi an la rei hmel em mai" U Puia'n a tih chuan "Ni e, Amuan Puia nen hian lo va kal ula, kan rawn zui dawn cheu a nia" U Hruaia chuan a ti a, "Awle, a nih kan lo va kal hmasa ang, kal ila" tiin U Puia chuan Amuani chu a en a, an kalsawn tur chu Amuani'n phur hmel zet hian min rawn en a, ka lo nuih ringawt, "Enge nuih tur awm, mahni a i nuih vur vur ni?" U Hruaia'n a rawn tih thut chuan ka phu zawk a, "Engmah a nilo" ka ti sep.




"Kan kal ve nghal daih mai dawn em ni, hruaitute'n kal an ti hnai a nih hi" a tih takah chuan a bike dah na lamah chuan kan in zui a, U Ruatpuia leh Cindy-i te chuan min rawn la tlan pel zui, "Ruatpuia nen khan in in ngaizawng thin an ti a, a dik em?" U Hruaia'n a tih chuan ka bu zeuh a, "In in then tawh a?" A ti leh, in in ngaizawng thin an ti a a ti tawh reng sia, in zawh nawn leh ngai ka ti tawh lem lo, ka aw ta tho a, a nui a, enge maw a nuih ni, nuih na tur a awm pawn ka hrelo.

cont....

Comment leh click kha aw, chuan fb lama post kha min like sak ve hram hram teh unnnn.......

[Rebec Nunziri]

Chapter-3



Lalrindiki POV



Pu Sawmdawnga te in lam pan chuan kan in phur a, han biak dan tur vak ka hre bawk silo nen ka ngawi reng a, nuam pawh ka tilo, kan thleng har riau in ka hre bawk, "Hmuh loh kar in nula tak tak i lo mi ve reng tawh chu a nia" Pu Sawmdawnga te in kan thlen dawn chuan a rawn ti a, "Kum 20 dawn kan in hmu tawh lova, a awm ve tawh alawm, pasal nei rual ka ni tawh zawk" ka lo tih ve vat chuan a nui a, ka chhan dan ah khan nuih na tur a awm silo a, nuih a duh ve hrim hrim nge mawni.




"Chuan pasal neih chu i tum hnai tihna em ni?" a tih leh chuan "Tum hnai chuang nang, nei rual ka nih tawh thu ka sawi ringawt, pasal nei tur pawn mipa ka la hmu hleinem" ka ti leh vat a, "Ka awm alawm, kan in nei ve vat mai ang" a aw ah chuan a fiamthu tih ka hria, ka nui ve ta ngawt a, Pu Sawmdawnga te in pawh chu kan thleng chawp chilh nghal, "In chhung lamah lo va lut ila, midang chu nghak lo law law mai ang" a tih avang chuan kan in zui lut a.




Amuani te pahnih bulah chuan kan va thu ve a, kan hmazawn ah tak U Ruatpuia te pahnih an la thu zui, nuam lo chu ka ti hle, "In lo kal a, in va han ti lawmawm tak em, kan nupa chiah kan ni si a, biak in kan thlen theih loh na chin lah a rei tawh bawk nen khua a har duh thin khawp a, kan ngen na te min ngaih pawimawh sak a, kan lawm hle mai" Pu Sawmdawnga chuan a lo ti a, "E.. kan tih ve theihtawp alawm, kan rawn lang har zawk a, in mi hriatthiam kan ngai zawk a ni" U Hruaia chuan a lo ti ve vat a.




Midang te pawh chu an rawn thleng khawm tak tak a, rin aiin kal kan tha, ka u te pawh chu an rawn thleng tlai deuh bawk nen kawngka bul ah chuan an thu a, kan thalai hruaitute chu an ding a, thu te an sawi hnuah tawngtai rual na te kan nei a, haw mai lovin kan la a m ve reng a, a hmanhmawh zual deuh ho chu an haw tawh a, keipawh chu haw daih mai ka duh, mahse ka kalpui ber U Hruaia lah hi a la thut tui hmel bawk si.




"Haw i duh tawh em?" ka beng bul a a rawn tih chuan "Ka duh tawh tho, mahse i la awm duh pawn pawi ka ti chuang lo a nia" ka ti a, "In lamah thil tih tur pawimawh ka la nei tho a, kan haw dawn a nia" a ti leh mai a, a remchang hlauh e, midang hnenah chuan kan lo va haw hmasak mai tur thu a sawi hnuah in atang chuan kan chhuak a, "In chhung a kan awm lai khan I ngawi chawi riau in ka hria" pawn a kan chhuah fel rual chuan a ti sup a.




"Chutiang engmah a awm lo, kal ila, ka u te kha an la awm bawk sia, ka ni amah chiah in a awm a" U Hruaia chu a bu zeuh a, a bike chuan kan in lam pan in kan in phur chhuak leh a, kan in kawt a a din rual chuan ka chhuk nghal a, "Zan dang ah ka lo la leng dawn a nia" tlan chhuak mai lo chuan a ti a, ka u thianpa a ni a, engvanga chutiang thil keimah min hrilh daih nge a nih pawh ka hrelo, tha deuh chuan ka chhang ve mai bawk a, kan in mangtha hnuah a tlan chhuak nghal.


~


Vawin chu min dawr tu an tam deuh bawk nen kan hahdam hlan mang lo mahse a tha zawk, ka ngaihtuah na te ka kawm nasat loh phah zawk a, chutih rual in ka nuam lo hle thung, "Lo leng rawh u" dawr chhung ah mi an lo lut tih ka hriat rual chuan in her in ka ti a, chutah U Hruaia ka hmu nghal zat, mitmeng dam zet hian min lo en a, "Hetah hian maw i thawh a?" Tiin kan dawr chu a en kual a, "Aw.. eng lam nge i en a?" Ka lo ti vat, "Eng em em en lo ve, nangmah ang deuh ka hmuh avangin ka rawn lut a nih hi" a ti mai a.




"A nih chu" han chhan dan tur hi ka hrelo thei lutuk a, a hreawm zawk, "I damlo em ni, I va chauh hmel ve" tiin uluk zet chuan min en a, "Ka tha, ka chau ve deuh mai mai a nih hi, lo thu la, thingpui ka lo thlit ang che" ka tih chuan a lo aw vat a, Dingi chuan min lo en ve reng a, thingpui awm na lam ah chuan ka kal a, mahse ka lu a hai riai riai mai, ka kal lai chu chawl in mit ka chhing vang vang a, tlem chuan ka zia ta deuh.




"Arin" Dingi leh U Masiami min koh na chu ka hre ruai ruai ringawt, ka harh leh chuan damdawi in ah ka lo awm reng a, mak ka ti hle, drip min lo khai sak bawk, ka hawi kual a, U Hruaia chu khum bulah a lo thu a, "I lo harh tawh maw, enge i an?" A lo ti vat a, "Ka tha, enge thleng a?" Ka tih chuan "Nikhaw hrelo in i tlu a, doctor in thil i ei that loh thu a sawi a, i taksa a chak lo viau bawk" a ti a, "Ka chhungte bulah i sawi em?" Ka ti nghal vat a, engmah a la sawi loh thu a min chhan chuan ka thaw huai mai.




"A that hlauh chu, engmah lo sawi suh aw, min ngaihtuah lutuk palh ang, tunah chuan ka that tawh em hi" ka ti nghal zung zung a, "I tha vak lo, doctor in i taksa a chak loh thu leh in enkawl uluk turin a ti che, thil i ei tha lo viau bawk tih a sawi" a ti deuh nghut a, "Puitling ka ni tawh a, keimah pawn ka in enkawl thei alawm, ka chhungte bulah chuan sawi miah suh aw, ka ngen che a nih chu" lungawi vak loh hmel chuan min en a.




"A tha alawm, engmah ka sawi lovang, mahse in enkawl tha ang che, khatiang thil kha a thleng tawh tur a nilo" a tih chuan "Awle, ka lawm e" ka ti vat, ka thawveng huai mai, "Drip kha a zawh hunah damdawi in atang hian i chhuak thei chauh dawn a nia" tha tak chuan a ti leh a, "Um keimah pawn ka awm thei tho a nia, I buai awm sia, i duh leh min kalsan rawh" damdawi in thleng in min hruai tawh bawk a, in nghah tir ve reng chu ka in thlahrung a ni.




Min en reng avang chuan sawi dik loh ka nei emaw ka ti hial, "Engmah tihtur ka neilo, ka rual in i haw dawn a nia, chuan i hnathawh na lam chu ngaihtuah buai lo la, i dam that hun hun a kal tur che in in dawr neitu nu khan a ti che" hnial chi ah ka ngaih tawh loh avang chuan ka ngawi ta reng a, ka phone a rawn rik chuan ka chhang vat a, "Haw rual ila, ka haw hman tawh a, ka lo lam dawn che a mi?" Amuani chuan a rawn ti zang vah a.




"Tunah chuan dawr ah ka awm lova, lo haw hmasa rih mai rawh" ka ti sep, "Khawiah nge i awm?" Hrilh che a ni angem tih ka ngaihtuah hnu chuan a ni chu hrilh mahila a pawi na tur a awm in ka hre ta lo, thil thlen dan te chu ka hrilh zung zung a, "A va zialo ve, khawi damdawi in ah nge i awm, ka lo kal nghal ang" min ngaihtuah zet chuan a rawn ti vat a, "Lo kal kher duh suh, U Hruaia'n min awm pui a, lo va haw tlang zawk rawh, zanah i lo kal dawn a nia, chuan ka chhungten engmah an hrelo a nia" ka tih chuan min hnial bik lo.




Drip min khai sak chu a zawh hnu chuan damdawi in atang kan chhuak a, "U Hruai, damdawi in a min buaipui avang khan ka lawm lutuk a nia aw, chuan engzah nge i in sen, min hrilh la ka pe nghal dawn che a nia" a motor chhung a kan thut hnu chuan ka ti a, "Engmah min pek a ngailo" a ti awlsam mai a, mahse nuam ka ti chiah lo, "Chutiang ngawt a ni thei nang, a zat min hrilh la ka pe ang che, hetiang ringawt te chu ka tan pawh a nuam lo" ka ti leh vat a.




"A ngailo ka tihkha, min hnial leh chuan i u hnenah engkim ka hrilh ang" a tih leh takah chuan ka ti lui ngam ta lo, min thlah hnuah a ni pawh a kal nghal a, in chhung a ka luh chuan ka nu chauh a lo awm, "Mami i lo haw maw, Mama hi a lo thleng tep tawh in ka ring, i u te pahnih chu hmundang ah chaw an ei chhuak dawn tih min rawn hrilh tawh a, han in tifai phawt la, i u lo thlen hunah chaw kan ei dawn a nia" ka nu chuan a lo ti zung zung a.




Zan ah chuan Amuani chu a rawn leng ngei a, min ngaihtuah hmel khawp mai, "Pawn ah sawi zawk ang, ka chhungten an hre palh ange" ka tih avang chuan pawn lamah kan chhuak a, "Enge thleng chiah han sawi teh, min ti mangang lutuk a nia" a tih chuan "Vawin lama ka sawi ang kha a nimai, ka taksa a chak lo lutuk a, thil ka ei tha bawk silo a, chuvang mawle, ngaihthat loh na tur vak a awm lo" ka ti a, "Chutiang ngawt a nilo a nia, i cher sawt zia te hi, Arin rei tak chhung kan lo in hre ve tawh a, i rin aiin ka hrechiang che tih pawh i hriat kha" a ti sep a.




"U Ruatpuia nen in in then na avang hian i na hle tih pawh ka hria, eng ang pawn tih lan loh tum mahla i thiantha ber ka nia, i awmdan ah hian ka hai lo, i chhungril natna kha ka hriatthiam phak sak kher lo che pawh a ni thei, mahse ka bulah chuan engmah zep suh, in sawi thawl na tur i duh a nih chuan i tan ka awm reng tih hria la, hun a la liam tam lo em a, i la na hle tih ka hria" a ti a, ka chhungril natna te chu a rawn thar leh nimai hian ka hria, Amuani thusawi ah khan diklo a awm lo, ka na alawm, ka na takzet.




A nun atanga min paih chhuak tu avangin hetiang tak hian ka na a nia, nep ka in ti a, mahse ka natna hi ka tih reh theih rual a ni silo, min hmusit em em tu ngai in zantin ka tap chu a ni si a, midang te hian ka awmdan hi hria se nep min ti viau angem tih te chu ka ngaihtuah a, ka natna hi keimah chauh a tuar chhuah ka tum a, mahse ka chak na hian a tlin ngang lo a ni, ka ngaih em em rual in a ni ṭawngkhum na zo zai te kha ka theihngilh thei chiang bawk silo.




"Amuan, diktak chuan U Ruatpuia hi ka lo duh em a ni, a chang chuan kan in kar a tawp tak tak mai hi mak ka ti a ka ring lo hial thin, a lakah khan ka lo in nghat thuk mah mah a, tunah ka tuar phah ta a nih hi, ka pasal a nih hma hauh in a lakah khan ka lo in nghat thuk lutuk kha ka thil tih sual lian ber a ni tiraw, keihi hmeichhe mawl tak ka ni, U Ruatpuia sawi ang chiah khan hmeichhia engmah lo mai ka nih hi" ka ti a, ka aw chu a zawi hle.




"Nilo e, khatiang zawng khan ngaihtuah reng reng suh, U Ruatpuia hian engtik ni ah emaw chuan a thil tih sual hi a la hre em em ang, han ngaihtuah teh, tunah hian U Ruatpuia nihna diktak i hria hi lawm zawk tur i niin ka hria, na viau rih mahla pum khat in nih hmaa a rawng diktak a chhuah hi i tan malsawm na zawk a ni, a ni khan a phu lo che, a ni aia mipa tha kha I la tawng em em ang, in ti chak hram hram rawh aw, khawvel ah amah chauh mipa a awm hleinem" a tih chuan a nui ringawt.




Chuchu ka hrelo a nilo, mahse ka mipa duh leh hmangaih em em a ni miau a, na takin min siam mahse ka hmangaih na kha a la danglam hauh lova, ka ngaihna leh thlakhlelh na pawh a ni tel in a zual a, mit hmunah te hian ka ngai lutuk hi biak mai ka duh thin, kan in biak hnuhnun ber khan na takin min ṭawngkhum a, chuti chung chuan in sum zawh loh chang ka nei teuh thin hle.




Zan mut hmun ah chuan zan dang ang bawk in U Ruatpuia nen kan hun kal tawh tho chu ka ngaihtuah leh a, ka mittui a luang leh ngiai ngiai tawh mai, ka chhungten an hria ang tih hlau tak chuan puan in ka in khuh a, tinge ka natna hian min kian san theih hauh loh le, ka rawn ang hi midang pawn an tuar ve tho, kei chauh in ka tuar lo, mahse ka nat ang em em hian an na ve angem, nge ni a keihi ka nep hrim hrim zawk.




Zing khua a var a, ka rit bur mai, thawh pawh ka tho chhuak peih lo, U Sawmi'n chu pindan ah a rawn lut a, "Mami dawr ah kal i ngaih kha, a tlai tawh a nia, rawn tho vat la" tiin ka khum ah chuan a rawn thu thla a, "U ka nuam lo lutuk a, ka kal dawn lo" ka ti sep a, "Ngatinge, i dang vek a nia, I tha miah lo, damdawi in ah kal a ngai a nih hi" a tih chuan ka lo hnial leh vat a, meng pawh ka meng tha theilo, "A ngailo, ka mu hahdam anga ka tha mai ang" ka ti leh mai a.




"Mami enge awmzia le, tunlai chu thi i ei ṭhalo bawk si, ka nu leh ka u hian an ngaihtuah che a nia, U Ruatpuia vang zawk nge?" a tih leh chuan "Nilo, ka nuam lo satliah zawk a nih hi, u ka muhil rih duh a nia" men pawh meng mang hlei lo chuan ka ti a, "Aw.. lo mu hahdam phawt rawh, ka nu hnenah ka lo hrilh ang" tiin a chhuak ta aniang a thawm ka hre zui lo, ka nu chuan min rawn ngaihven ve vat a, mut ka duh thu bawk in ka lo chhang.




Chhun ah chuan ka nu in eitur min rawn pe a, ka taksa chhung lam hi a chau ngawih ngawih, ka tho harh peih thlawt lo, nileng chuan ka mu ta thak a, ka taksa zawi viau mahse ka muhil thei lo, "Mami chu enge a an?" U Rdi tawng ri chu ka hre reng a, "A la tho harh peih lo, khum ah a la mu a, a awmdan saw ka ngaih a tha theilo, damdawi in a kalpui mai a ni ka duh" ka nu chuan a ti a, reilote ah U Rdi chu pindan ah a rawn lut a.




"Mami i harh em?" tiin ka chal chu a rawn khawih a, "Aw" tih chauh in ka chhang, "Hetianga i awm chhan hi U Ruatpuia vang a ni tiraw, a nilo ti pawh nila ka awih hauh lo, in in then hnu khan i mizia a danglam a, i chak loh hmel em em bawk a, ka nau i nia, ka chik thin che a nia" a ti a, "U ka taksa a chak loh vang a nih hi, ngai ka awh leh vat mai ang" ka tih chuan "Kan lakah hian zep i nei tiraw, U Ruatpuia nen in in then hnu reilote ah Cindy-i nen an in zui lehnghal a" a ti a, a aw ah chuan a lungawi vak lo tih ka hria.




"Kan in then hnuah tho alawm an in ngaihzawn engmah sawi buai tur a awm lo a nia, tunah chuan kan kawng zawh a hrang tawh a, keipawh that lam ka pan ve zel mai ang" ka ti duah a, "U Ruatpuia pawh hi ka ngaih ang a lo ni hauh lo, a hma zawng in in in zui nasa em em a, hna a hmuh hnu hian a awmdan a danglam tih pawh ka hria hleinem, ka nau i nia, i lam ka tang tih chu ka pha lo, tih sual pawh i nei ve ang, mahse hetiang em em a a in thlak danglam chak hi a mak a ni" a ti a.




Tawng leh ka tum chiah chu ka mit deuh sulh a, "Mami, Nu lo lut vat teh, Mami awmdan hi a dik miah lo a nia" U Rdi'n a ti ruai chu ka hria a, chiang lo riai chuan ka harh a, mahse ka tawng peih lo, "Enge thleng?" mipa aw ri chu ka hre leh a, ka meng ngam loh avangin tunge a nuh ka hrelo, U Mama a nilo tih erawh ka hre chiang hle thung, "Damdawi in lamah kal ila a tha ang, a chau em mai" mipa bawk chuan a ti a, U Hruaia aw nimai hian ka hria.




"A taksa hi a chak lo lutuk, rilru natna emaw rilru hah na a nei niin ka hre bawk a, a rilru lam hi a damlo a ni, hetiang ah chuan amah hi tih hmin hram hram a ngai, amah chauh in awm tir lo ula, enge a chungah thleng chiah chu ka hrelo, mahse a ngaihtuah na kawm tam lutuk lo se a tha, chuti lovah chuan natna dang em em a neilo e" doctor in a ti ri chu ka hria a, ka meng lo thung.




"Khapa vang vek kha a nia, hetiang hian ka nau a awm phah a, a ni lah hmeichhe dang nen hlim takin an awm a nia, ka nau nat em em laiin" U Sawmi chuan thinrim takin a ti a, "Sawmi khatiang khan Ruatpuia chungchang sawi suh, midang pawh an in then thin tho a, keini lo dem ngawt theih a ni hleinem" U Mama chuan a lo ti vat, "Nilo U, kan nau chungah hian U Ruatpuia chet dan i hrelo a nihkha, hetianga kan nau a awm chhan hi amah vang vek kha a ni" U Sawmi bawk chuan a ti leh hlak a.




"Enge awmzia kan hriat ve loh thil thleng a awm em ni?" U Mama chuan a ti a, U Sawmi chuan a sawi chhuak ang tih hlau takin ka meng chhuak vat a, "U" ka tih chuan ka lam a rawn hawi vat a, lu ka thing ringawt a, "Nilo Mami, i bulah sawi chhuah loh ka in tiam tawh nangin ka thutiam chu ka hlen theilo ni rawh se, midang ka atanga U Ruatpuia an fakna ringawt pawh hriat hreawm ka ti tawh a, ka chhungte atang leh zel a U Ruatpuia thlavang an hauh na hi chu ka hre duh lo" a ti hmak mai bawk si.




Chutah U Sawmi chuan thil thlen dan engkim chu ka chhungte hnenah a sawi ta vek a, U Hruaia leh Amuani te pawh an awm ve reng bawk, U Sawmi'n a sawi zo chiah chu ka chhungte rilru pawh a nat hmel hle, "Bawihte chutiang thil chu i chungah a thleng a nia, ngatinge engmah i sawi loh?" ka nu chuan min duat na aw nen chuan a rawn ti a, U Sawmi thusawi zawh chiah khan ka hnuk a ti ulh deuh tun bawk nen in sum theilo in ka mittui chu a chhuak ngiai ngiai a.




"Lalruatpuia chuan engtinge ka nau chungah chutiang thil chu a tih theih, eng ang taka chhungkaw ropui nge an nih, ka nau hmusit tir hian? A hre khawp ang" U Mama pawh chuan thinrim takin a ti a, "Chumai a la nilo" Amuani chuan a rawn ti ve leh chiah, "Thil engkim in hre ta sa sa, Arun i hnenah pawh engmah ka la sawi lova, mahse i la hre dawn tho tho, chuvang chuan tuna i hriat hi a tha zawk" a tih chuan a sawi tur awm ang ka ngaituah thiam lo.




"U Ruatpuia leh Cindy-i kha in in then hma daih atangin an in kawp tawh" a ti ta mai, chu chuan mak min tih tir in ka rilru a ti na thar hle, "Engmaw i sawi?" U Rdi chuan a ti vat a, "A dik alawm, a tirah chuan ka awih bik lova, mahse Cindy-i unaunu ka ngei atanga ka hriat hnuah kha chuna dawt a nilo tih ka chiang" a ti leh zel a, "Lalruatpuia mai mai chu" tih leh ka u chu tlan chhuah a rual a, "Nu ka u kha dang rawh u, buai na siam belh ka duh lo" ka ti vat a.




Mahse chelh hman a nilo, rang lutuk in ka tlan chhuak ve nghal a, U Hruaia chu engtik laiin nge ka bul a rawn thlen ka hrelo, "Motor chhung ah hian lut rawh, a kalna tur ka hria" a tih chuan sa i buai lovin a motor chhung ah chuan ka lut vat a, "Engmah a thleng lovang tiraw?" ka ti a, "Lungngai suh, engkim a tha vek ang" tiin motor chu a tlan chhuah tir a, ka nu te kha engtinge an awm chhunzawm zel tih ka ngaihtuah hman tawh lo.




U Ruatpuia hnathawh na lamah chuan kan tlan a, ka u chu school kawt ah a lo ding a, eng buaina mah a siam hman lo hlauh chu ka lawm takzet bawk, "U eng buai na mah siam suh aw, keichu ka tha mai ang, khawngaihin haw ang" tiin a ban ah chuan ka va kai a, "Mami, lo va haw tawh, Ruatpuia chu ka be ringawt dawn alawm, lungngai suh, i u ka ni a, khatianga a ṭawngkhum hnuah che khan ka en liam mai mai theilo" ka u lah chuan a ti deuh tlat bawk si.




"U haw zawk ang aw, school a nih hi, buai na i siam chuan kan hmingchhe lutuk zawk ang" tih zawng in ka thlem a, mahse kalsawn mai a tum hmel loh, "Hruaia ka nau hi min lo va thlah haw sak dawn em ni?" a ti ta daih a, "Aih khawah mah ka kal duh lo, kan rual in lo let zawk rawh" ka tih lai mek chuan U Ruatpuia chu school building chhung atang chuan a rawn chhuak a, ka hlauthawng zual sauh.




"U khawngaihin eng buaina mah siam suh aw" ka ti a, min chhang lovin U Ruatpuia ringawt chu a melh thung, "Enge ka hnathawh naah te in rawn kal a?" U Ruatpuia'n a tih rual chuan ka u in a kawr awm ah chuan a tham sak a, "Nangpa hian ka nau rilru na taka i siam hnuah engtinge in thiam loh na nei miah lova i awm theih zawk?" vin si zawi fiah tak si chuan a ti a, "Engthil nge ka tih, kan in then vang kha a nih chuan khatiang kha chu in ngaizawng te in kar ah chuan a thing fo alawm, engmah tih sual ka nei lo" U Ruatpuia lah chuan a ti awlsam then bawk si.




"Lalruatpui, pangngai takin ka nau then chu nila hetiang hian ka ti hauh lovang che, ka nau i phatsan hnuah diriam takin i ṭawngkhum a, chutiang chung chuan tih sual i neih loh thu i sawi amaw?" ka u chuan a ti leh a, "Thudik chauh ka sawi, i nai hnen a ka thusawi te kha diklo pakhat mah a awm lo, ka lo mawl em avangin i nau hnenah khang kum 5 chuang kha hun ka khawih ral a, mawl ka in ti takzet zawk" ka awm ve tih hrelo ang mai chuan U Ruatpuia chuan a ti sak a.




"Lalruatpui" ka u chuan a ti ṭhawt a, U Ruatpuia thusawi chuan min ti na takzet mahse ka chhungril a ka chapo na a kai harh chiang hle thung, "U, khawngaihin in sum hram hram rawh, U Ruatpuia hi biak ka duh, U Hruai ka u nen hian in lo va kalsan lawk dawn em ni?" ka tih chuan "Mami he mihring hi nangmah chauh i biak ka remti lo" ka u chuan a lo ti vat a, "Ka tha, thil hrilh tur ka neih vang a nia, ka reilo ang" ka tih leh takah chuan U Hruaia chuan min hrethiam takin ka u chu a kalsawn pui a.




"Nangni chhungkua hi eng ang taka tlak tlai lo nge maw in nih le?" ka u te kalsawn hnu chuan U Ruatpuia chuan a ti a, ka in hum ruh vak, "I u leh zel in hetiang hian min rawn ti chu a nia, in chhungkua hi ka rin aiin in nep in in lo hnuai hnung a nih hi" a tih leh lek phei chuan amah ka duh na lam ai mahin ka huat na a nasa tawh zawk, "U Ruatpui, min ngaihnep zia hi ka hriat hmaih lo, ka duh lutuk avang che in i nihna diktak hi ka lo hre har a, pawi ka ti takzet" ka ti ta hmak a.




"Enthu maw i sawi kha?" thinrim taka a tih chuan ka nui a, "Eng ang taka hnuai hnung nge ka nih min hrilh a tiraw, ni e kei dawr a hnathawk ve mai mai hian nang ang mipa hi chu ka lo phu lo che a ni mahna, tunah chuan i milpui ngei kawp pui I nei tawh bawk a, keichuan ka rawn ti buai tawh lovang che tih ka tiam a che, ka chhungte lak atang pawn buai na i nei lovang" ka tih chuan "A tawp ah chuan i hrethiam ta alawm" a ti a, ka nui leh.




"Khang kum 5 chhing khan engtinge i nihna hi ka lo hriat chhuah loh theih ka ti, mahse a pawi lo e, Pathian in a hun takah i nihna min hmuh tir angah ka ngai mai e, nang ang mipa hi in zawmna neih pui ka hlauh ber te zing a mi in ni, in chhungkua chu eng ang pawn lo hausa ila ka awt bik lo che u, hlimna diktak hi hausak naah a in nghat lo tih hi engtik ni ah emaw chuan i la hriatthiam ve ngei ka beisei" tiin ka in her a, mahse ka la duhtawk mai lo in her let leh in "I chungah hian lawmthu sawi ka ba in ka hria, kum 5 chuang lo in zui tawh mahila a hun takah i nihna min hmuh tir avangin ka lawm e, Cindy-i nen chuan hlim reng turin duhsak na ka hlan a che u" ti leh sak in ka hnungchhawn ta hmiah.

Cont...

Comment leh click lamah khan tan min han lakpui ve deuh teh u, fb post pawh like a la tlem lutuk a nia, tiang chuan regu a har ang aw...

[Rebec Nunziri]

Chapter-4



Lalrindiki POV



"U kal ang u" ka u te bul a ka va din rual chuan ka ti a, "Mami saw mihring sawn na takin a siam che a, ka en liam mai mai dawn lo, eng ang chiah a dinhmun sang nge a nih ka hre ve duh alawm, hetiang taka hmusit tur che hian" ka u chuan thinrim tih hriat zet chuan a ti a, "Nilo U, engkim kan sawi fel tawh a, kan in kar pawh a tawp fel tawh, ka ngen a che, buai na hi tawp tawh rawh se" ka u chu a ngen in ka ngen a.




"Thiana i nau thusawi hi a dik a ni, buaina siam in awmzia a neilo, i nau ber in duhtawk tur a a duh che a nih chuan a thu chu i zah sak dawn lawm ni?" U Hruaia chuan a lo ti ve a, "A tha e, kal ang u" tiin ka i chu a kalsawn nghal a, "Ka lawm e" U Hruaia bulah chuan ka ti a, a ni hi awm lo se chuan ka u hian buaina a siam maithei a ni, "Engmah a nih loh kha, kan let dawn em niang?" tha taka a tih chuan kan kalsawn ve ta nghal a.




Ka u chu a bike in a in khalh haw a, U Hruaia motor ah ka chuang haw thung, U Hruaia chuan ka awm dan tur min hriatthiam pui takin min be lo hrim hrim a, kan in kan thlen hma chuan kan ngawi reng, kan in kawt a motor a tih din rual chuan ka chhuak vat a, "Ka lo lut kawi lo mai ange" a tih chuan hnial buai duh lovin "Awle, vawin avang khan lawmthu ka sawi nawn leh e" a nui a, "Chak takin awm la, khatiang vang mai mai khan na duh miah suh" ka bu zeuh a.




"Mami khatiang thil a thleng tawh a ni a, engvangin nge engmah min hrilh loh?" ka nu in a tih chuan "Nu.. in rilru nat a hlauh vang a nihkha, Mami hi dam na tur a awm lo, dem tur an awm a nih chuan U Ruatpuia a ni" U Sawmi chuan a lo ti hmak a, "Khatiang tur a ni ngailo Sawmi, Ruatpuia leh Mami hi in then mahse Ruatpuia kan hriat phah tur a nilo a nia" ka nu bawk chuan a lo ti leh vat a.




"Aw.. Ruatpuia thiam loh alawm maw a nih le, tha taka in then chu nise huat na chhan tur kan nei reng reng lo, mahse ka nau a tih dan ah hian engtinge kan lungawi theih tehlul ang, eng ang dinhmun ah pawh lo ding ila midang te hian min hmuhsit theih na dan an neilo hrim hrim, Lalruatpuia pawh hna a neih hnuah hetiang hian engtinge a awm ngam zawk ni, a hma zawng a eng a nih loh nen, hna a hmu ta cheng a ka farnu na takin a siam a" U Mama chuan lungawi lo tih hriat zet hian a ti leh hluk a.




"U Mama sawi kha a dik chiah, tih tak em ah te chuan U Ruatpuia khan Mami hi rawn hel ngat ngat lo se chuan hetiang dinhmun hi kan thleng tawp nang, hun liam tawh haider hmak a hetiang a a che duh hi a huat awm hrim hrim" U Rdi chuan a lo ti ve leh, "Khai a, khatiang kan sawi loh tur, puitling in ni tawh a, naupang chhia taka tawngkam neih te kha a ngailo, hun liam tawh chu hun liam tawh a ni a, sawi in awmzia a awm tawh lo" ka nu bawk chuan a ti leh a.




"Mami pawh khatiang vang khan beidawng reng reng suh, i tawn ang hi midang tamtak pawn an lo tawng ve tawh a, chhel nan i hmang zawk dawn a nia, Ruatpuia nen chuan Khuanu Ruat in nilo a ni ange" ka pawm khawp mai, tun atang chuan U Ruatpuia theihnghilh ka tum ve tawh takzet a ni, nilo ka theihnghilh thei ngai dawn lo tih chu keimah ka in hriat chian tluk zet in ka hrechiang, mahse amah hre reng chunga hmalam pan ka tum ruh viau thung.




Karkhat zet a liam leh hnu chuan keipawh hma ka sawn a, U Ruatpuia chu la hrechhuak ve reng mahila a hma ang em em khan ka na tawh lo, ka duh na a reh tawh tih na erawh a ni chuang hauh lo a nia, duhna leh hmangaih na te hi awlsam takin a rawn luang chhuak zung zung lova, chutiang bawk in awlsam takin a reh zung zung theilo tih hi ka ngaihdan a ni a, midang ngaihdan a ni ve em tih erawh ka hrelo.




Mitthi kan neih avangin zanin chu tlaivar ve ngei ka tum a, Amuani a dam loh avangin ka u te nen kan kal ho a, ka u amah chauh in a awm bawk nen ka u ten haw hma turin min ti a, pawi ka ti hran lo, mitthi in kan thleng a, kan kohhran upa a ni bawk nen thalai kalkhawm kan tam hle, a kal hma pawl kan ni chungin in chhung ah kan leng tawh lova, pawn lamah kan thu thap, "Hruaia pawh a kla ve a nih saw, amah chauh in a nih hmel" U Mama'n a tih chuan a en na lam chu ka en vat a.




"Kan ko ange, kan bulah thu ve se nuam a ti zawk ang" tiin a kut chu a lu chungah a vai zauh a, U Hruaia pawh chuan a lo hmu ve thuai, kan thut na lamah chuan rawn kal in ka bulah chuan a rawn thu a, "I kal dawn tih hria ila chuan kan in thurual tur a nia" ka u chuan a lo ti nghal vat a, "Dawr bungrua a rawn thleng a, kal ka tum lem lo mawle, rin aiin ka haw hma leh ta sia" a lo ti ve vat a, hla te chu kan sa a, thawm a tha viau mai.




Kan han zai a, kan zai tui phian mai, ka bul a thu U Hruaia chu a nui leh thin a, ka en chuan a lo in siamtha vat zel, a nuih a nuih takah chuan ngaih tha zan lo chuan "Ngatinge i nuih reng a?" ka ti ta tawp a, "Engmah nilo e, zai zel rawh, i zai tui hmel bawk si" a tih chuan a sawi awmzia chu ka hrechiang mah mah, zaithiam lo min tih avangin a nui, ka va han zak tak, zai pawh ka zai ri ngam tawh lo hrim hrim, ka ngawi ta hmak a.




"Ngatinge zai zel ta che" a rawn tih leh te chuan ka ngei ru viau tawh, ka zaithiam loh avangin min nuih tih ka hrethiam lo emaw a ti emaw ni, "Zaithiam lo min tih te chuan sawi tha ve mai ta che, khatia min nuih kher, nangpawh i zaithiam vak biklo a nia, ka nuih bik chuang lo che" ka ti ta hlak a, "Zaithiam ka tih vang che in alawm ka nuih, i hmel en ang aiin i zaithiam daih" a la ti ta deuh deuh, a thusawi chu ka awih a ring em lovang chu maw.




"A lo nihchu" ka ti leh hmak a, ka zun a chhuah em vang chuan U Sawmi hnenah ka sawi a, a ni pawh a zun a lo chhuak ve tho hi a lo nia, tenawm te inah chuan kan zung a, kan thut na ngai ah kan va let leh vat, sawhchiar sem tura min rawn tih avangin kan kalsawn leh a, sawhchiar kan sem zawh chuan kan han ei ve a, sawi mawi lo a ni em chu ka hrelo mahse mitthi in a sawhchiar an sem hi tui ka ti thei lutuk, a sawhchiar bik ngawih ngawih hian ka hre thin.




"Mami haw lam hnaih tawh mai la, hei dar 2 a pel tawh a nia" U Mama'n a rawn tih chuan ka hnial hran lo, "Hruaia Mami hi a haw hma a ngai a, ka va thlah anga ka rawn let leh dawn a nia" U Mama chuan a tih zawm a, "Keihi haw mai ka duh tawh a, dawr a kal leh nen kan buai dawn si a, i nau chu keiman ka lo thlah mai dawn em ni?" U Hruaia chuan a lo ti a, "Mami i hreh em?" U Mama'n a ti nghal vat, "Hreh lo e" ka tih avang chuan U Hruaia nen haw tur chuan kan thut na atangin kan kalsawn a.




"Tunlai te enge i chanchin?" ke in kan haw a, zan boruak a thiang bawk nen a nuam viau, "Engtia chanchin maw?" ti a zawhna ka zawh let chuan "I rilru na te a dam tawh em?" a nui a, "Dam tawh mah mah chu a ni" fiamthu chuan ka lo ti a, "Naupang te emaw ka tih lai che in nula tak tak i lo ni ve mai chu a nia, hun hi a kal chak a nih hi" a ti leh a, "Ka rual pui ah te chuan pasal fanau nei te pawh an awm tawh alawm" ka lo ti vat a.




"Nangpawn neih ve vat i ngai a nihchu, a nih loh chuan i fa ten i thiante fa te a ngam lo lutuk ang" ka nui a, a ni pawh a nui ve tho, "Nei tur pawh pasal tur ber kan la hmu zo lo chu a nih hi" ka ti a, "Ka awm alawm, zawn buai vak a ngailo, in neih i duh a nih pawh in ka hnial lo" a fiamthu tih ka hriatchian em avang chuan ka nui leh vak a, engtik atangin nge U Hruaia hi ka lo nel hman viau ka hrelo, mahse a bul a awm hi nuam lo ka ti hran lo tih erawh ka hrechiang viau thung.




"Ka ti tak tak a nia" a rawn tih leh pawh chuan "Na.. fiamthu i thawh thiam lo em mai" ka ti leh ringawt a, ka la nui teng bawk, chutah U Hruaia chuan ka ban ah rawn vuan in min pawt ding a, ka nui lai pawh ka tawp chawt, "Arin ka fiamthu lo tak tak, nanghi ka duh che a ni" thutak hmel zet chuan a rawn ti leh a, a hmel chu chiang lo riai in ka hmu a, a thutak hmel bawk si, mahse min fiam mai mai ah ka la ngai fan a.




"U Hruai i ti mak e a, midang ten an lo hre reu reu ange, khatiang fiamthu nan hman chi pawh a nilo" tiin ka nui leh a, ka nuih erawh a za lem lo hle, "Ka fiamthu lo ka tih kha, ka duh tak tak che, ka hmuh hmasak ber che atang tawh khan ka rilru ah I awm tawh, sawi chhuah na hun ka neih loh vang leh a rem thin loh avanga sawi ngailo mai ka ni, ka zep thei tawh lo, nanghi ka duh che" a thusawi in min thawng bawk nen enge ka sawi ang pawh ka hre tawh lo.




"Chuan engtinge min chhan dawn?" a rawn tih leh chuan "Nangchu ka u thianpa i nia" ka ti ringawt a, "Ka hria, i u thianpa pawh ni ila kan in ngaizawng thei dawn tho lo em ni?" a tih leh zel bawk si, "U Ruatpuia nen kan in kar pawh i hriat vek kha, tunah tih chuan bialpa neih lam ka la ngaihven vak lo" a tih leh takah chuan "A tha alawm, ni e, ka sawi hma mah mah bawk a ni, i in peih hun ka nghak thei che alawm" ka ngawi reng.




Kan in lam pan chuan kan in zui leh hnak hnak a, kan boruak chu nuam pawh ka ti chiah tawh lo, sawi tur a vang duh takzet, "Tun kum chu khua a vawt hma deuh dawn a ni maithei, ber thla kan chuang kai tan chauh a ni a, zan lamah chuan khua a vawt deuh tawh a nih hi" pangngai taka a tih te chuan han sawi mai tur ka hriat loh avangin ka ngawi reng a, "Arin" ka hming a kin rawn koh thut chuan "Enge?" ka ngaihtuah na ka kawm bawk nen ka chhang rang mah mah.




"Ka thusawi avang khan nuam lo tih phah nan hmang suh aw, ka lakah te i lo in thlahrung ange, ka sawi ve mai mai ah ngai rawh" tha taka a tih chuan "Awle" ka ti a, kan in kawt a kan din tawh avang chuan kan in mangtha a, "In chhung i luh thleng ka lo en liam ang che" a tih tlat avangin kan in lamah chuan ka kal a, min en zui reng bawk nen ka hnungzang hi a za mer mer in ka hria, hmanhmawh zetin in chhung ah chuan ka lut a.




Mut hmunah te chuan U Hruaia thusawi ringawt kha ka rilru ah a awm a, khatiang rilru kha ka lakah a put ka ring miah lo a sin, kei chuan ka u thianpa a nih na angin ka u ang maiin ka ngai a, ka bialpa ni tur angin vawikhat mah ka la suangtuah ngailo, pangngai taka a bula awm turin min ti mahse ka thei chiah in ka ring lo, a hma ang khan ka nel mai mai theih pawh ka ring tawh lo.




Hna a kan buai lai chuan U Hruaia a rawn lut hlawl a, amah chauh ni lovin a bulah hmeichhe pakhat a rawn kal tel ve bawk, "Eng lam nge in en?" Dingi chuan a lo ti vat a, "In nei nalh hlawm bawk sia, kan lo en kual thin phawt ang" a hmeichhe rawn kal pui nu in a tih chuan Dingi chuan a kawh hmuh zung zung a, ka thiltih lai ah chauh chuan ka rilru dah ka tum nghet hle bawk, mahse U Hruaia chuan min en reng ni a ka hriat tlat avangin nuam lo chu ka ti ru hle.




"Hruai heihi ka in hmeh i ring em?" hmeichhia chuan a ti a, a aw chu a tham deuh chhal a, a nalh viau bawk, "In hmeh ang, va ha chhin la" U Hruaia chuan a tih ri pawh chu ka hrechiang viau, a ruk chuan ka ve em ru leh zeuh thin a, a rawn kal pui nu thawmhnaw ha zo rawn chhuak chu a in hmeh thu a lo hrilh leh, a hmeichhia chuan I Hruaia chu a duh hmel hle a, an in ngaizawng ah ka ngai hmiah bawk.




U Hruaia lah chuan a ngaihsak bawk sia, an in ngaizawng lo pawh tise ka awih lo, nizan a a thusawi te kha enge awmzia ni ta ang, a ni hian min lo fiam kual mai mai zawk nge ni, a thusawi ka lo awih lo chu ka lawm hle, a chungah lungawi loh na ka nei hran lova, bialnu nghet a lo nei chu ka lawm zawk daih, "I haw tlai angem?" U Hruaia chu thawmhnaw ka khai that na bulah engtik laiin nge a rawn din ka hre miah lo.




"Haw tlai ang ka ring, vawin chu kan buai reuh em a" tha tak chuan ka lo chhang ve mai a, "Ka lo lam dawn che a nia" a tih leh takah chuan "A ngailo, keimah pawn ka haw thei alawm, ka ti buai mai mai zawk ang che" ka lo ti vat thung, "Min tih buai na chhan tur a awm lo, ka lo lam ang che" a kal pui nu chuan darthlalang atangin min lo en ve reng bawk nen nuam chu ka ti chiah lo.




"A ngailo tak tak, keimah pawn ka haw thei, ka u in min rawn lam hman maithei bawk a" ka tih leh takah chuan engmah a sawi tawh lo, a kal pui nu in a rawn koh takah chuan a kalsawn vat a, ka thaw deuh huai mai, kawr te an lei fel hnuah chuan an chhuak zui mai a, "A mipa nen khan in in hria elaw, a chhelo tawp" Dingi chuan ka bul a rawn din pah in a rawn ti vat a, "Ka u thianpa a nihkha" ka ti ve mai.




"A chhelo tawp, pa ka tih chi, a bialnu nen khan an in hmeh si" a ti ve hluai a, ka chhang lem lo, ka thiltih lai bawk chu ka tih zawm a, U Hruaia te lam kha chu ka ngaihtuah chhunzawm lem lo, dawr kan khat meuh chuan khua a thim deuh ruai tawh mai, vanneih thlak tak in U Mama'n min rawn lam hman dawn a, ka lawm takzet, bus tlan hun a pel tawh si a, taxi hman dawn chuan a to leh dawn si.




"Saw i u pawh a rawn thleng chiah a nih saw" Dingi'n a tih rual chiah chuan ka i chu dawr kawt ah a rawn ding a, "I va rawn thleng hun ve" ka lo ti vat a, "A hun chiah hi ka hre thei alawm" a tih chuan ka nui a, "Masiam in tha zel maw?" tia ka u in U Masiami a biak chuan Dingi nen kan lo in melh vat a, "Aw, tun hnai tak chu ka pa pawh a tha viau e, a lawmawm tak tak a ni" U Masiami'n a lo ti ve vat.




An ni pahnih hi engtik ah chiah nge maw pangngai taka an in ngaihzawn ve ang ni, an awmdan leh an in biak dan atang hi chuan an in haw lo ve ve tih a chiang tawh si a, ka u lah hian hmalak tum na a neih hmel bawk siloh, "Naktuk ah kan in hmu leh dawn a nia" ka u bike a ka chuan hnu chuan ka ti a, "Awle, tluang takin in haw dawn a nia" U Masiami chuan a lo ti vat a, kan in mangtha hnuah kab tlan chhuak nghal.




"U, U Masiami nen a in awmdan hi ka hrethiam lo, in in haw lo tih lah a chiang ropui si, hetianga awm reng lo hian hma te la ve tawh la" bike a tlan kan ni bawk nen ka au deuh ti tih a, "Ringawt zel che hian, min duh em tih pawh hriat loh" ka u lah chuan a lo ti hluk si, "Chu te chu chiang reng alawm, a awmdan ah te hian i hrethiam ve mai lo a mi, a hnar lo che tih te chu a chiang a" ka ti leh.




"Mami thin hi, i ngaih anga awlsam a nilo, min duh chu nise min hrilh ang chu" zawk za mah chuan, ka u han zei loh dan em em hi chu aw, "Hmeichhia in hma lak hmasa te chu a ngam bik nang, mipa i nia, nangman alawm hma la hmasa tur, i hetih vang hi alawm tun thleng a kawp pui I la neih loh, mite pawn tlangval senior an tih reng tawh che hi, i ning ve em em lo a mi, U Masiami hi keichuan ka duh a nia aw, a fel si" ka ti leh zung zung a.




"A la hun lo pawh a ni mahna, a hun ah chuan kawp pui te chu ka hmu ve em em ang" a ti awlsam leh mai a, kum 40 a tling tep tawh, a hun lo pawh ni mai lovin a hun mah mah tawh zawk alawm le, "Hma la vat rawh, U Masiami hi i rin aiin a luck a nia aw, dawr ah pawh amah rim tura hrim hrim a rawn kal hi an awm thin, hma I la vat lo a nih chuan i chan ropui viau ang" ka ti leh hlak, ka u chu nui tih hriat takin a taksa chu a che a, engtin min chhang chuang lova.




Ka thusawi hi a awih lo a nih chuan a la in chhir dawn chiang alawm, ka sawi zing tawh, engah mah a ngailo a nih chuan a thu ni rawh se, U Masiami anga tha hi chu a hmu leh mai mai tawh lovang tih ka chiang, kan in hriat na a rei tawh a, ka u nen hian lo in nei pawh nise ka nu leh ka unau dang te hi a chhungte ang tak tak in kun ngai in min hmangaih dawn tih ka hria, ka u ber hi a hi buai na chu.




Zanah chuan U Hruaia chu a rawn leng a, ka u nen an titi dun mawlh mawlh, "Mami thingpui va lum ta che, in a chakawm alawm" U Mama'n a rawn tih chuan ka tho vat a, thingpui ka lum zawh chuan ka chawi phei a, "Mami thingpui lum hi a tui a nia, hmelchhe dang te chuan pasal zawn na bai an nei a, ka nau hi chu bai siam lam hi chu ti tam lo mahse pawi kan tilo, mahse pasal zawn na thingpui chu a nei" U Mama'n a tih zawt zawt chuan ka ngei hle.




"I tawngthei in mai mai rawh, nidang ah ka lum sak tawh lo tawp mai tur chu a nia" ka lo ti hlak thung, "Chi nang, i thingpui lum ka in loh chuan ka pangngai lo vek zel" uang thuang tak chuan a ti leh hram a, U Hruaia lah chu a lo nui ve suk suk zel bawk, "I u te pawh hi an va rawn haw har ve mawle" ka nu in a tih chuan sana ka en vat a, dar 8 pawh a la ri tawp silo a, "Nu, an kal na a la rei loh em kha, an lo haw ve mai ang" ka tih chuan engmah a sawi buai tawh chuang lo.




Ka u te pawh chu an rawn haw ta vat reng a, "Zanin kan kal na chu nuam lo tak a ni, U Ruatpuia leh Cindy-i an rawn kal ve a, ka hmuh atang khan ka hun hman a nuam lo nghal vek" U Rdi chuan a rawn ti lut hlak hlak a, "Rd, in sum rawh, Mami hriat laia khatiang sawi kha a tul lo a nia" U Sawmi chuan a lo ti vat, "A ho lutuk, engah mah ka ngai lo" ka lo ti ve vat a, "Chu chiah an ni vang mai mai a.." U Rdi'n a tih leh lai mek chuan "A mak bawrh bawrh thin em mai, in sum rawh" ka nu in a lo tih avangin a ngawi ve ta hram.




"Taka Mami thawhpui thar mipa kan nei a sin, a fel sia, biak a nuam bawk si, kei aiin a naupang deuh bawk a, in in hmeh viau in ka ring, i chanchin pawh ka hrilh tawh a sin" U Sawmi'n thutak deuh a a rawn tih chuan ka thingpui in lai ka hak tep a ni, "U chutiang te chu a" thil dang sawi tur pawh ka hrelo, "Enge, in in hmeh dawn hian ka hria a, ka duh pui te mai che a nia, bialnu a neih loh thu a sawi lehnghal a" a la ti ta deuh deuh, chhang mai lo chuan U Hruaia ka va melh zeuh a, min lo melh ve kur mai.




"I ti awm ang lo em mai, enge kei nen chuan min sawi zawm phet i tum a, hei U Rdi pawh a awm ve reng a, kei aiin a upa zawk bawk, kei aiin amah hi zawn pui zawk rawn, tun a i sawi pa nen pawh khan an in hmeh zawk ang" ka tih chuan U Sawmi chuan U Rdi chu ner nang chung hian a en a, "Ka duh teuh lo, a thinchhe ropui si, keimah ka in ti hmingchhe mai mai" U Rdi chuan lukham in a vawm nghal a, "Ngawi mai teh, kei aiin i thinchhe fe zawk" a ti vin hlar bawk.




"Khatiang vel kha a nia maw, pasal pawh nei se amah zawk hian kut a thlak char char ang chu, a thinchhiat lutuk vang hian alawm bialpa pawh a hmuh zawh miah lo" U Sawmi chuan U Rdi chu a chhaih a, U Rdi huat tawk a lo tling bawk si, "Bialpa i nei bik a mi, i neih bik miah loh kha, khatianga min ti tur kha i ni bik miah lo a nia" an in hnial ta char char a, ka nu in a lo khap ve pawn awmzia a awm lo.




Kan unau bik rau rau ah pawh U Rdi leh U Sawmi hi an in hnial peih em em a, U Mama lah hian thelh a hnek in an in hnial lai hi hmuhnawm thlir hian a lo thlir thin bawk nen a buaithlak thin tak tak a ni, U Sawmi sawi ang khan U Rdi hi chu a thinchhe ve hle a, a ri phawng phawng zel bawk, chutih rual in a rilru hi a chhe lova, midang te biang biak dan a thiam bawk nen mite hian an ngaina thin hle thung.




"A ninawm, in hnial tawh suh u, naupang ang mai, a hrim hrim in bialpa neih lam chu ka la ngaihtuah peih lo, in pahnih a in neih hma chu neih mai mai ka tum tawh hleinem" an in hnial reng takah chuan ka ti ta tawp a, "In nau thusawi hi a dik chiah, u zawk pawn neih nachang in hriat loh lai a in nau tan a bialpa lo sawn pui vak hi in tihtur pawh a nilo, chu ai chuan nangmah ni zawk hian ngaihtuah hmasa rawh u, hetiang reng a in khawsak chuan pasal chu sawi loh bialpa pawh in nei thei hauh lovang" ka nu chuan a lo ti ve hlak hlak a.




"Ka nu duhtak, lo lungngai mah ta che, pasal ka rawn ka ru haw dawn alawm, makpa tha i chhawr tep tawh" U Rdi chuan ka nu fiam pah chuan a rawn ti a, ka ni chu nuih pawh a nui peih lo, U Rdi lah chu a nui ring em em bawk a, chutah kawngka kik ri a rawn awm a, "Mami va hawng la" U Mama'n a tih rual chuan ka tho vat a, kan thenawm nu a lo ni, "Nu Puite lo lut rawh" tiin ka awm sawn deuh a.




"Mama i awm remchang hlauh chu a va tihzia ve aw, Bawihi room saw a eng thei miah lo mai a, min va en sak chhin dawn mawni ka ti a, kan pa lah chu a zin lai a ni sia, a room a eng thei silo nen lehkha zir a duh si a, ka rawn ti buai tawp che a ni" Nu Puitei chuan a ti a, "A nihchu, kan va en dawn a nia, Sawmsawmi te kha an exam mek a nilawm ni?" ka u chuan a lo ti a, "Aw.. chuchu a nia, zanah lehkha zir dei a duh thin a, room lovah pawh zir thei tho mahse a buaithlak ve deuh a" Nu Puitei bawk chuan a ti leh a.




"Kan va en nghal mai dawn a mi, Sawmsawmi lehkha zir nan a tlai zel zawk ang, Hruai lo la leng ve reng rawh aw, ka rei lovang" U Mama chuan a tih chhunzawm a, "Kan in ah I lo leng khat emai, nangpawh lo leng ve la, thingpui kan in dawn a nia" tiin Nu Puitei chuan ka nu chu a sawm a, "Nia, in thenawm chiah e tilo hian ka lo kal khat em mai, ka rawn kal dawn a nia" tiin ka nu nen an in zui chhuak ve nghal.




"U Sawm, kan hmai chiah a hun tawh a nia, va chiah lawk ila" U Rdi chuan a ti a, ka nu te awm loh veleh enge maw an ni hian tihtur an lo neih ve ni, U Hruaia nen chauh a awm ka duh lo a sin, "Mut dawn ah chiah zawk ula, a tha daih zawk ang chu" ka lo tih chuan "Darkar chanve chiah a ngai a, chumi zawh ah phih leh tur a ni sia, mut dawn a chiah chu a buaithlak alawm, i chiah ve duh mang bawk silo a, kan va chiah lawk ang, U Hruai lo la leng rawh aw, kan rawn chhuak har lovang" tiin ka u te pahnih pawh chu pindan ah an lut ta daih.




U Hruaia nen chauh a kan awm hnu chuan sawi tur a vang hle, a ni lah chu tawng tum lo tih hriat zetin a ngawi reng a, min en kur bawk si, "Thingpui i in leh duh em?" Kan ti ringawt a, "No khat kha ka duhtawk viau" tha tak chuan a lo ti leh mai bawk si, "Tikhan lo thu rawh, no hi kan seng lawk ange" tiin no chu ka seng a, thingpui no hi chu sil vat loh chuan a a ban hi a bet nghet ka tih thin avangin ka sil nghal a.




"Chuan Sawmi mipa sawi kha bawh zui i tum em?" Ka hnunglam atanga a rawn tih thut chuan ka phu zawk a, "Min ti phu alawm, engmaw i sawi kha?" Ka ti a, "Sawmi mipa sawi kha bawh zui i tum em ka ti a nihchu" tiin chiang tak chuan a sawi nawn leh a, han chhan dan tur mai ka hrelo, ka in ngaihtuah vang vang a, bawh zui chu ka tum hauh lo, mahse a ni hian min duh thu kha a sawi tawh si a, a bulah hi chuan bawh zui tum angin in sawi pawh ni ila a pawi na tur awm ka hrelo.




"Ka duhzawng te a nih chuan pawi ka ti vak lo" ka tih chuan a nui ri chu ka hre zawm zat a, amah hnungchhawn zawng a ding ka nih avangin engtinge a hmel a awm chu ka hrelo, "Chu hmalam pan chu i tan a harsa hran lo a nimaw, a nihchuan keipawn ka duh ang takin i lakah hma ka la thei angag ka ngai a nia" ka rilru rem lo deuh a thil a rawn sawi tak daih ah chuan ka hnunglam chu hawi in U Hruaia chu ka en haw ringawt, a thutak hmel bawk si.




"U Hruai ka thusawi awmzia..." Ka tih lai mek chuan "Sawi suh, i duhzawng ka nilo a nih pawh in i duhzawng anga awm ka tum mai ang" a ti leh hmiah a, sawi tur pawh ka hre tawh lo, "Aa.. U Hruai nangchu bialpa angin ka en theih che ka ring lo, rei tak chhung ka u ang mai in ka en tawh che a, ka u anga en che hi ka duh zawk bawk" ka ti ta tawp a, ka thusawi hi hrethiam ngei se ka ti takzet bawk.




"I tum loh chuan engtinge i thei tih i in hriat ang, keichuan nau angin ka en ve lo che a, ka en thei lo bawk ang che, chuan i u anga awm pawh ka duh lo bawk, i bialpa nih ka duh, chuzawng chu" a ti leh bawk si, bei a va han ti dawng tak, ngatinge ka thusawi hi a hriatthiam duh miah loh le, "U Hruaia ka thusawi awmzia hi i hrethiam lo nge i hrethiam duh lo der zawk?" Ka ti tlang ta tawp a, kei aiin a upa a, tawn hriat pawh a nei tam zawk bawk, ka thusawi awmzia hi a hrethiam tih pawh ka hai lo.




"Ka hrethiam lo ni mai rawh se, i lakah hian beidawn mai mai ka tum lo tih hria la, chuchu tun atan chuan ka duhtawk rih viau e, hun a la tam a, i rilru hneh nan hian engtiang a rei pawh hman ngai se ka beidawng mai mai dawn lo bawk tih hria la ka duh, chuan mipa dang hnaih i tum na pawh chu ka dang lovang che, nichin a I thusawi kha i rilru tak tak a sawi i nilo tih ka hria, min hnar nan chauh a sawi i ni, ka sawi tawh kha, ka beidawng lovang" tiin choka atang chuan a chhuak a, ka en zui reng ringawt.

Cont....

Rei tak hnuah kan han dah leh thei ta a, a lawmawm takzet, kan website nei tu a hah viau dawn tih a hriat bawk, a chungah lawmthu kan zavai ai awh in ka sawi e...

[Rebec Nunziri]

Chapter-5



Lalrindiki POV




U Hruaia chu kan in ah zantin a rawn leng ta reng a, ka sawisel hran lova, ka chhungte hnenah ka laka a rilru put dan te a ti lang ngailo bawk nen ka tan lo ngai mawh viau kha a rem chiah lo bawk a ni, chutih rual in a bul ka awm hian nuam tih loh na lian tak ka nei thin thung, "U, karleh ah kan zin dawn a nia aw" tlai ah khan ka nu hnenah ka sawi tawh a, U Mama ka la hrilh lo hrim hrim thung.




"Khawiah nge in zin dawn, nangmah chauh in nge midang an tel ve dawn?" Ka u chuan thingpui no dawm pah chuan a ti a, "U Masiami te nen, dawr kan khar anga kan zin dawn, Thenzawl ah a nia, tihtur em em pawh kan nei chuang lova, U Masiami'n in tih hlim pah in kal ang u a tia" ka tih chuan a ngawi vang vang a, a phal dawn lo emaw ka tih hnuah "Kal na tur a va buaithlak duh awm ve, thil pawimawh ah a nih hran lem loh chuan kal kher tul ka va tilo ve" a ti a.




"U Masiami'n an motor a keng dawn alawm" rang zet in ka lo ti leh a, "A tha alawm, mahse fimkhur ula, kan tunlai khawvel awmdan chu i hriat vek kha" a tih takah chuan ka thawveng sawt, ka nu ai mah in ka u hian min khuah khirh zawk a, phal lo ngat se zawng ka kal thei hauh lovang, "Amuani te in ah ka leng dawn a nia" ka tih zawh rual chuan kawngka kik ri a rawn awm nghal a, "Mami va hawng lawk mai teh, ka thil en lai khi a laklawh lutuk" U Sawmi chuan a ti a.




Kawngka ka hawn rual chuan U Hruaia nen kan in hmachhawn nghal ran a, "Lo lut rawh" ka ti vat, kan in ah a ra n chuang kai ngun a, a hma ai daih in kan in ah pawh a tlangnel tawh zawk bawk, "Ka kal nghal mai dawn a nia, ka rawn haw har lovang" ka nu te bulah chuan ka ti a, "I kal hma in thingpui lum hmasa phawt la" U Mama chuan a lo ti leh tawn,via va han ning tak.




"Tlangval senior tih takah thingpui hi i heh lutuk mai" tih hlak pah in choka lamah chuan ka kal a, ka siam zawh hnu chuan ka va sem a, "Ka kal a nia, khi ka tlai vek dawn a nih khi, ka rawn haw har dawn a nia" U Mama en zeuh chuan ka ti a, ka fiamthu tih hrethiam in a nui ringawt, in atanga ka chhuah hma chuan U Hruaia chu ka va melh zeuh a, min lo en ve reng avang chuan ka en rei lem lo thung.




Amuani te in ka thlen chuan Nu Mawii chuan eng eng emaw min lo zawt a, Pa Sanga erawh YMA thil ah a chhuak thung, "Nu ka pindan ah kan lut lawk dawn a nia" Amuani chuan a tih hnuah pindan lam chu kan pan a, "Thawh pui thar kan nei a, a chhelo tawp, a fel sia maw, ka duh chi" phur zet chuan a ti a, "I lerh lutuk, U Msa i duh viau emaw tia, enge mipa dang I lo tih leh daih tawh a?" Ka ti hlak.




"U Msa te chu ka duh kum hlun kha a nia, mahse beisei a awm lo ve em alawm, ka star na a rei tawh nen tun thleng in engmah kan in kar ah pawh a la awm loh hi, chuvang chuan mipa dang ka melh ta mai" thawven hmel zet chuan a ti leh a, a ngaihna a awm thlawt lo ka thiannu ve hi zawng, a thawveng em em a chu zawng chu a ni e, "I lerh hrim hrim, U Msa hi keichuan ka duh pui che" kan ti leh hram a.




"Kan in ngaihzawn theih ka ring lo, hmalak a tum silo a, ka nghah chungin ka tar hman vek dawn a sin" a ti awlsam leh et a, "Nangman hma la hmasa mai ta che, a laka i rilru put dan pawh a hre tawh nang, chuti chung chuan engtinge hma la vak se I tih, nangmah zawk I chet hmasak a ngai tihna a nimai" ka tih chuan "Ka duh teuh lo mai, min lo duh lo ta se, ka zak dawn lutuk a sin, in hmuh reng a ngai dawn bawk si, in khawm pawh ka in khawm ngam tawh lovang" a ti leh zat zat a.




"In ni thei ngai dawn lo a nih chu a, U Msa mizia i hrechiang a, hma u lak hmasak a ngai tih pawh vawitam ka hrilh tawh che, i zawm duh miau silo a, i sawi ang tak tak khan U Msa chu beisei a awm lo em mai, midang zawng tawh zawk mai rawh, bakah U Msa chu a zeilo si, a ni aia tha an tam em mai" Amuani en chung chuan ka ti a, "Khatiang khan sawi kher suh, zeilo pawh ni se enge pawi, a zei loh na lai tak kha alawm ka duh chhan" a tih leh lawk bawk si, ka thiannu hi zawng hriatthiam a har thin zawng a ni e.




"Kha a thlavang i hauh leh tho bawk si, a ngaihna a awm lo, sawi pawh ka sawi pui peih tawh lo che" ka ti ta hmak a, "Ka duh thu hi hrilh ila min hnar i ring em?" Min rawn thut hnaih sat sat pah chuan a rawn ti a, "Chutiang te chu i duh thu i hrilh hma chuan hriat lawk theih a ni hleinem, hrilh phawt la i hre mai ang" ka ti a, "Mahse min lo duh lo ta se, aaa... Ka zak dawn lutuk" a va hahthlak e aw, hetiang rilru a put chhung chuan an in ngaizawng ngai lovang tih ka sawi ngam sak.




"Amuan, U Msa hi i duh na a rei tawh a, a mizia pawh i hriatchian tawh kha, i duh thu chu hrilh tawp rawh, a hnar che a nih pawn zah na tur a awm hleinem, bakah mi zawng zawng hriat ah I duh thu sawi tur pawh i nilo va, a ma bulah chiah alawm i sawi dawn, U Msa chuan tu hnenah mah a sawi chhuak dawn lo tih i hrechiang a nilawm ni?" Ka tih chuan a bu nghat nghat a, "I sawi dik alawm, i sawi ang khan ka duh thu hrilh te chu a pawi na vak tur a awm lo, remchang hmasa ber ah ka hrilh ang" a ti ve ta nge nge.




"A tha khatiang tur kha a ni, chhuak tawh ang, kan awm rei tawh em mai, pindan a in khung char char chu a nuam lo, haw hma ka ngai bawk si" ka tih tak ah chuan pindan atang chuan kan chhuak a, Pa Sanga pawh a lo haw ve tawh, "Arini chu I lo leng a nimaw?" Dam dap hian a ti a, Pa Sanga hi chu a hmel hmuh ringawt pawh hian pa fel leh zaidam a ni tih hi a hriat ngawih ngawih.




"Aw, ka lo leng khat sia ka tia, ka rawn kal a nih hi" tha tak chuan ka lo ti ve a, "Ni e, i rawn lang duh ta lo lutuk a, min hua emaw kan lo ti hman a sin" a fiamthu tih ka hriat avangin ka nui a, "I ti awm ang lo e, engtinge nangni chhungkua te ka hriat theih tehlul ang cheu ni?" Ka lo ti ve vat a, "Enge zanin i kal na te chu?" Nu Mawii chuan an pa chu a lo zawt vat a.




"Tha tak chuan kan va hrilh a, saw lai ah sawn lei paih vak hi a chi lova, a lei a nghet lo bawk nen a buaithlak tak zawng a nih hi, thal a ni tep tawh si a" Pa Sanga chuan a ti a, an sawi awmzia ka hre ve vak lo, "Lei paih phal loh tih pawh a in tar ve vek a, paih lui talh hi chu hrem na pek chu ka ti, an ngeiawm hrim hrim" Amuani chuan a lo ti halk hlak a, "Enge in sawi awmzia?" Ka ti haw.




"Pa Tluanga te in piah saw mawle, lei paih phal loh a ni tih tupawn kan hre vek chungin paih lui hi an awm leh talh thin a, chuchu mawle, Pa Lawma te saw, an in sak a an lei vung saw an lo paih a, paih phal loh tih an hre ve reng a, ruah a sur anga, lei min thut a hlauhawm avangin Pa Tluanga te pawn hruaitute hnenah an rawn sawi tawh a nia, Pa Lawma te chhungkua saw chu an mak ve hrim hrim, hetiang hi chu vengkhat ah chhungkaw pakhat tal an awm thin an tih hi a dik a nih hi" a ti leh a.




"Khaih khaih, Bawihi khatiang kha an sawi ngailo, vengkhat vek kan ni a, tha te te a in hrilh hriat kha a tha ngai" Pa Sanga chuan a lo ti vat a, "Chutiang ringawt a ni hleinem, a hma pawn a fapa in bawlhhlawh paih phal loh na hmun ah an in sak na vungraw chhe vel a lo paih tir tawh bawk a, a em em hi chu a awm, midang te hi engah mah min ngailo emaw tih mai tur alawm a nih, hetiang ringawt te chuan an pawng pawrh telh telh dawn a sin, hrilh ve fak an ngai a nih hi" Amuani lah chuan a ti leh hmak hmak a.




A hmel ah pawh chuan a lungawi loh hmel ngang mai, "Ni e, Bawihi sawi hi keipawn ka thlawp, an chhungkua saw chuan an ti ve mah mah bawk a ni, eng ang pawn lo hausa se midang te ngaihdan te hi an vengthawng ve tur a nia, Tluanga te in piah phei saw chu a hma pawn a lo min tawh a, nasa lo mahse an in nen a in hnaih bawk nen an tan sawn a hlauhawm tawh tih pawh hmuh sawn a hriat vek a, Lawma tak pawn sawn a hriat hmaih hauh lovang, Tluanga te chhungkua saw engah mah a ngailo tih a lang reng alawm" Nu Mawii pawh chuan a lo ti ve a.




"Ni e, in sawi pawh chu a dik lutuk tho a, mahse a hming a hruaitute kan nih na angin mite han tih deuh pawng pawng hi thil tih chi leh nuam a ni hauh lova, tha takin kan in hrilh hre tawh bawk a, an paih nawn tawh bik lovang" Pa Sanga chuan a lo ti leh mai a, Nu Mawii chuan eng eng emaw a sawi chhunzawm a, sana ka en chuan dar 8 a lo pel duai tawh mai.




"Ka va haw tawh mai ange, a tlai tawh em mai" tiin ka ding deuh hluai a, "Haw hma i va tum ve, thingpui te in hmasa phawt la" Nu Mawii chuan a lo ti vat a, "Nidang ah aw, nula te kan ni ve sia, haw tlai vak chi loh" ka ti a, "Pa Arini hi ka va thlah lawk ang" Amuani chuan a lo ti ve vat a, "Nangni enge i awmdan hi, mipa biak deuh hlek i nei nge?" Kalkawng a kan kal lai chuan Amuani'n a rawn ti hlawl a.




"Tunge bia se min tih a, a awihawm loh em mai" ka lo ti vat, "Dawt sawi lo mai teh, biak i nei chiang lutuk i awmdan ah hian" a ti leh zel a, "Biak ka nei lo, i mak, tunge bia se min tih vak a" ka ti leh hlak a, "Anih nangmah be tu tal che an awm hrim hrim, ka lakah hian zep i nei tlat in ka hria" a tih leh takah chuan U Hruaia ka hrechhuak zawk a, Amuani hnenah engmah ka la hrilh lo, keimah chiah in ka la hria.




"Min hrilh teh, ka lakah zep i nei tiraw?" A tih leh takah chuan a ni hi chu hrilh mahila a pawi na tur ka hrelo, U Sawmi hnenah tak ngial pawh ka sawi ngam lo a nia, Amuani hnenah tal chuan sawi ila U Hruaia beidawng theih nen eng emaw tih tur min hrilh tur a hre zawk mahna, "A nih ka hrilh ang che, thla hmasa a kan mitthi kha I la hria ang chu, khatah khan kan unau in kan kal a, mahse haw hma ka ngaih avangin U Hruaia nen kan haw dun a" ka ti hmasa te te a.




"Kan haw kawng ah khan min duh thu a sawi a" ka tih leh takah chuan mak a tih hmel ngang mai, "Engmaw i sawi tunah khan ka hresual lo tiraw, U Hruaia'n a duh thu che a sawi maw, engtinge i chhan?" A ti cheng a, a la phur hmel em em zui, "Engtinge chhang vak se min tih, ka duh zawng a nih loh thu ka sawi" ka sawi zawh rual rual chuan ka dar ah min rawn beng chawrh a nih chu, a va han mawl thei tak, a kut thlak hi a nat zia a hrelo emaw ni.




"I va han mawl thei tak, engtinge U Hruaia ang te i hnawl theih zawk a, a hmeltha in a fel bawk si, i dinhmun a ding chak hmeichhe tamtak an awm laiin engtinge i lo hnial theih zawk a?" A tawng ring bawk si, kan bul hnai a tumah awm lo mahse tawng zawi turin ka lo khap thuai a, "Engtinge ka chhan vak ang, ka duh miau hleinem mawle, duh loh na na na engvangin nge min duh na chu ka lo pawm ngawt anga?" Ka ti hmak a.




"Mawl min ti a, nangmah a nih hi lo mawl zawk chu, i vanneih zia hi aw, kei ni ila ka hnar teuh lo mai, U Hruaia te chu mipa rintlak leh in nghah na ngam tih a hriat ngawih ngawih, a nih tunah hma te a rawn la la em?" Hriat belh chak hmel deuh chuan a rawn ti leh a, ka hrilh tawh lo tawk zawk dawn emaw ni ka ti hman hial, "Aw.. kan in ah a rawn leng ve deuh reng mai, hman zan ah phei chuan beidawn mai mai a tum loh thu te kha a sawi a" ka ti leh a.




"A that hlauh chu, in ngaihtuah chiang hle rawh aw, U Hruaia te ang chu hnar phal chi ah ka ngailo, a ni aia tha chu i hmu leh mai mai tawh lovang, i vannei bik e" an ti leh a, "I ninawm, za cheng zel suh, a awmdan avanga rilru hah mah nak a laiin, engtinge ka tih ang tih min ngaihtuah pui zawk rawn, ka laka a beidawn na turin enge ka tih ang?" Ka ti hap a, a beidawng har lutuk hi keimah zawk ka beidawng tep tawh.




"Keichuan in ngaizawng ula ka ti, han ngaihtuah la, U Hruaia te chu a puitling si, a rawn haw na a la rei loh nen kohhran leh khawtlang ah a theih ang tawk in a in hmang nghal a nia, biak a nuam bawk si, chutah amah ngei in dawr a hawng a, hausa viau mahse mi te ber thleng in puih an ngaih na laiah chuan a en san ngai miah loh hi" a ti leh zung zung a, chung te chu ka hre ve tho, mahse hi a awm tlat a ni.




"Vawikhat mah ka bialpa tur angin U Hruaia hi ka la ngaihtuah chhin ngailo, ka u thianpa a nih na angin ka u angin ka en a, chuzawng chu a nimai" hahthlak min tih hmel fe hian min han en te te phawt a, "Midang pawh an ni ve tho, an bialnu bialpa tur te hi an in ngaihzawn hma in an ngaihzawng ang turin an ngaihtuah vek kher lo a nia" a sawi chu a dik leh viau ang lawi bawk sia, "A.. U Hruaia ber kher chu ka theilo a ni tawp" ka ti leh ringawt a.




"I hahthlak em mai, a ni ang mipa tha hi i hnar a nia" a tih chuan "Amuan ka dinhmun hi han ngaihtuah teh, ka bialpa hlui nen kan in then na pawh a la reilo, chutah kan in then chhan lah khatiang kha a nia, pangngai taka in then pawh kan nih loh kha, tunah bialpa nei nghal ila miten mak min tiin min sawi duh dawn lutuk a sin" a in siam chhia a "Chutiang mai mai a ho, U Ruatpuia pawn bialnu a nei daih tawh tho alawm, midang ngaidam tur dah pawimawh viau duh suh, i nun a nia, midang i dah pawimawh lutuk chuan i hlim thei ngai lovang" a thusawi chu a la sawi that ve ber a ni hial ang.




"A.. engpawh nise tunah rih chuan mipa dang han hnaih vel ka peih lo, U Hruaia pawh fel viau mahse ka duh rih lo a ni tawp" ka thiannu chu a beidawng hmel ngang mai, "U Hruaia ang i hnar hi i mak ka ti dawn nge pawh ka hrelo" an ti leh ngawt, "Chutiang lam a nilo, mipa rin mai hi harsa ka ti tawh tih i hriat kha, U Hruaia pawh ni rawh se, U Ruatpuia pawh kan in ngaihzawn hma in rei tak ka lo hre ve tawh a, mahse a mize diktak chu kan in kar tawk hnuah chiah alawm ka hriat" ka tih leh takah chuan ka thusawi chu a pawm hmel ve ta deuh.




"Mahse U Hruaia chu ka la duh pui tho tho che" a tih leh chuan "Tunah rih chuan ngaihzawng neih ka la in peih lo, hun te han ral leh deuh se, U Hruaia hian min fiam mai mai pawh a ni thei tho bawk a, thutak khuk a lo khuk pui chiam kha chu ka duh rih lo" dawr kawt ah chuan kan ding a, "A fiam kual mai mai che ka ring lo, a ni ang mize nghet lutuk hian midang a fiam kual mai mai duh ka ring lo" Amuani chuan a ti leh a.




"Thil hi a lan ang ngawt a nilo a nia, min duh thu a sawi hnu lawk ah kan dawr ah hmeichhe pakhat nen an dawn kal dun alawm, a ngaihsak lutuk bawk a, a hmeichhe rawn kalpui phei kha chuan a duh hmel ngawih ngawih" ka tih leh chuan "Um.. i ngaihdan tur chu ka hrethiam, thil hi a lan ang ngawt a nilo tih I sawi kha chu hre reng la" rei vak chi a nih loh avang chuan in mangtha in kan in lam ve ve chu kan pan ta a.




Ni a kal ve zel a, thlahnih lai a liam leh hnuah pawh U Hruaia a la beidawng duh chuang lo, ka dawr thawh naah a rawn kal khat tawk reng bawk a, U Masiami te pawn an hre tawh hle, kan in kar ah eng emaw awm angin an ngai tlat lehnghal a, nuam lo chu ka ti ru ve hle nangin eng ang pawn pha ila ka thusawi an awih duh miau silo a, U Hruaia lah a rawn kal apiangin eitur te min rawn ken thin bawk nen, a tih ngaihna tak pawh ka hre tawh lo.




Diktak chuan vawikhat mai nilo vawitam tak ka duh loh thu ka sawi tawh a, ka thusawi engah mah a ngailo lutuk hi ka thin in a tuar lo lek lek zel, a chang phei chuan ka be tha peih vak ngailo, kan dawr a a rawn kal chang te hian biak that peih loh chang ka nei thin a, hre reng chungin a haider hmiah zel thung, zan ah lah kan in ah a rawn leng reng a, ka u kawm tur hrim hrim a rawn leng angah ka chhungten an ngai hlauh zawk a.




"In buai vak na nge vawin chu?" U Hruaia aw ka hriat rual chuan ka thaw hak a, "Buai lo, mi an tlem deuh a, lo thu rawh" U Masiami chuan a lo ti zung zung a, thutna a awl ah chuan a thu a, dawr a nei ve tho sia, ngatinge maw kan dawr ah hian a rawn ka reng thin ni, diktak chuan min zar leh lutuk hi amah hrim hrim ka hne phah vek, tha deuh chuan lo be ve thin tho mahila tih luih na tak meuh meuh a ni tawh.




"Ka ril a tam e, thil eitur kan la tawh mai dawn a mi?" Dingi'n a rawn tih takah chuan keipawh ka riltam thu ka lo sawi ve vat a, "Ding I va kal lawk mai dawn a mi?" U Masiami'n a tih chuan "Keimahni kan va kal zawk ange" tih leh U Hruaia chuan ka kut a rawn vawn a rual a, "Nia va kal rawh u, ka ke hi a na riau a, ka lo thu hahchawl ang" in la zei fahran chuan Laldingngheti chuan a lo ti a, ka ngei tak tak a ni.




"Kal ila" U Hruaia'n a tih tak mai ah chuan hnial chu ni hek lo dawr atang chuan kan in zui chhuak a, "I va zawi ve, i nuam lo a mi?" a tih chuan lu ka thing a, "Ka tha, kan thu hahdam mai mai kha ka zawi pui a niang" ka ti a, ka tawng peih hlawl lo, chuchu a hriatthiam ve ngei pawh ka ring, mahse a hrelo der tlat thung ang, "A nihchu, engpawh nise in hah lutuk lova a zia alawm" a ti leh mai a, thingpui dawr kan thlen chuan kan eitur duhzawng te ka sawi nghal zung zung a.




U Hruaia ei duhzawng ka zawh erawh chuan thil a ei tawh thu in min chhang tlat a, engmah a chah ve ta lem lo, an pack lai chu kan nghak a, "Lassi kan in mai mai dawn em ni, nghah chungin" a tih chuan ka hnial a, "I in duh loh chuan ka in lo mai ang" a ti a, "In tho rawh, thil kan ei dawn sia, ka puar hman ang tih ka hlauh vang mai mai alawm" ka ti leh vat a , chutah nui in "Lassi no khat chuan i puar viau lovang" a ti a.




"A nih chuan in ila" ka ti ta nge nge, lassi chu min rawn pe a, ka rin aiin ka in tui, U Hruaia ai chuan ka in zo hmasa zawk lehnghal, "Hei aw pawisa" kan eitur chah min rawn pek rual chuan ka ti a, "Ka lo pe ang, lassi man te nen khan engzah tur nge?" dawr neitu bulah chuan a ti a, "U Hruai, a ngailo a nia, hei pawisa ka keng tho alawm" ka lo ti vat nang in kan thil chah ho chu a man a pe vek.




Kan let leh lam chuan "Kan in be lawk dawn em ni?" a tih chuan "Sawi la" ka lo ti mai a, "Hetah lo, mi awm tam vak loh naah" a tih leh chuan "Dingi te kha a ril a tam tawk sia, muang chi pawh kan ni chiah lo, a dai hman ang tih a hlauhawm" a thusawi tur ka tih zawn thiam avang chuan ka ti a, "A reilo ang" tih leh min kalsawn pui a rual a, hnial hman na pawh a awm lo, midang awm tam vak loh na laiah chuan min kalpui a hmaah tak chuan min din tir a.




"Engtik ah nge ka bialnu i nih dawn, ka duh che tih i hriat kha" ka hmaa mipa chuan a ti leh tawh a, ka va han ning tak, ka sawi ngun tawh nen a beidawng har ka ti ngawt mai, "U Hruai, ka sawi tawh kha, keichuan bialpa neih ka tum lo, hmeichhe dang tamtak an awm alawm, engvangin nge kei kher min zar buai reng a, duhtawk tawh teh" ka theihtawp a nem chuan ka ti a, mahse ka aw ah chuan ka lungawi lo tih a hriat viau thung.




"Arin, engvanga min hnar tlat nge i nih ka hrelo, mahse beidawn mai mai ka tum lo tih erawh i hre dawn a nia, a tha alawm, tun atang chuan i lakah ka lo in thiar fihlim tawh dawn a nia, chutih rual erawh in i lak atangin ka beidawng tih na a nilo a, ka lam a i rilru i pek hun tur ka nghak mai chauh a ni, ka duh che ka tihkha ka sawi mai mai lo tih hre bawk la" tiin a kalsawn a, ka en zui reng, a thusawi te kha a rilru diktak a sawi a ang hle nang in vawikhat ka ti sual tawh a, hlauhthawn na in ka chhungril a la luah hneh em a, rin tur a ni em tih ka hrethiam lo, ka natna hian min la luah hneh em a ni.




Ni a ral a, U Hruaia pawh chu a rawn leng ngai ta mang lova, dawr ah lah a rawn kal ngai tawh lo, biak in a kan in hmuh bak chu kan in hmu ngai mang tawh lo a tih theih, pawi ka tilo bawk a, keimah tak pawh chu ka thawveng sawt mai hian ka hria, chutih rual in ka thiannu ber hian U Hruaia chanchin min sawi pui hi a ching leh thin a, a chang phei chuan ka ning lek lek zel, kei ai hian amah hi U Hruaia'n lo duh daih zawk se tih chang ka nei ngah mai.




Vawin chu dawr kan hawng lova, Amuani nen chhuah na hun remchang kan nei thei hlauh bawk nen a tih zia tak tak a ni, MC ah kal hmasa ber ila, a hnian bazar pui ah kan kal dawn a nia" a ti a, eng vak mah a lei leh awm der silo a, lei tur hleih loh en kual hi Amuani hian a ching ve hrim hrim, hei vang hian a nia, chhuah pui ka peih lo thin ni, kan pahnih a kan chhuah dun tawh hi chuan ka chau hnap zel mai a ni.




Chhawng hnih naa kan awm lai chuan U Hruaia leh a hmaa a hmeichhe kalpui tho kha ka hmu fuh a, min hmu ve lo thung, min hmu ang tih chu ka hlau ru hle bawk, "Kal vat ang, i lei tak tak dawn chuang lova, hun kan khawh ral thlawn mai mai a nia" Amuani bulah chuan ka ti a, "Saw U Hruaia te an nih saw" a tih chuan a en na lam chu ka va en zeuh a, an ni pawh chuan min rawn hmu tawh, kan lam pan in an rawn kal mek bawk a, Amuani lah kalsawn a tum hmel siloh a, ka ding ve ta ngawt.




"Nangni thian dun chu in chhuak a nimaw?" U Hruaia chuan hriat nuam zetin a ti a, "Aw.. nangni pawh chu enge in lei dawn a?" Amuani chuan tha takin a ti a, "Dinthari hian chhuah pui ah min sawm a, thil pawimawh lei tur a nei a ni a awm e, kan chhuah pui a nih hi" a ti leh a, kalsawn vat vat ka duh laiin Amuani lah chu a ding tlat bawk si, a hmeichhe kalpui lak chuan min la hria ni awm tak hian chik zetin min en bawk nen kalsawn vat vat ka duh ber.




"Kan kal phawt mai ang, kan hmanhmawh deuh bawk sia" ka ti ta tawp a, Amuani chu ka kai kal nghal dawr dawr bawk, "A hmeichhe kalpui kha a hmeltha reuh lutuk" Amuani chuan a ti a, "Khakha alawm dawr a a dawn kalpui ka sawi chu, tikhan i hrethiam tawh mai em, a hmaa ka sawi kha" ka tih chuan "Hrethiam e, in ngaizawng an ang ka ti keipawn, mahse kan rin dan mai mai a nia, thudik engmah kan la hre chuang lo, thian mai mai pawh an lo ni thei bawk a" a ti zui leh a.




"Thingpui dawr ah hian chawl phawt ang, ril a tam tawh alawm" a ti a, kan lut nghal, chawl ve dang an lo awm nual bawk a, kan ei duhzawng te kan nghah lai chuan U Hruaia leh a kalpui nu chanchin ringawt kha a sawi lehnghal a, "An in hmeh tawp, a hmeichhia nen khan in in chen vel viau kha, U Hruaia lah khan i sawi ang tak tak in a ngaihsak hmel bawk sia" a ti reng a, enge ka hriat pawh ka hrelo e, U Hruaia leh a hmeichhe kalpui nu chungchang hlir a sawi chu hriat nuam ka tilo hle.




"Sawi reng lo teh, a ninawm, thil dang sawi tur i hrelo a mi?" Ka ti ta tawp a, "Ka sawi duh a ni ve mai a, nanghi i thik chiang lutuk i awmdan atang khan" a tih chuan ka melh ngar a, "Teuh lo lutuk, engvangin nge ka thik ngawt anga, ka bialpa pawh a nilo a, duh pawh ka duh lo bawk, i sawi ngai i sawi ngun lutuk a, a ninawm ka ti mai mai a nihkha, ngai kawi reng reng suh" ka ti hlak a.




"Enge i thinrim ringawt a, nanghi i thik tak tak a mi?" a rawn tih leh pawh chuan chhan pawh ka chhang buai peih tawh lo, eitur rawn thlen hnu chuan ka ei zung zung a, ka rilru ah thil dang daih a awm avangin a tui leh tui loh pawh ka hrelo e, Amuani chuan ka awmdan chu mak tih hmel deuh in min rawn en leh zuk zel tih pawh ka hre reng, mahse ka hrelo der hmiah, thingpui dawt atanga kan chhuah hnu chuan khawi khawi ah emaw kan kal kual leh a, reilo te ah in lam pan chuan kan haw a.




In a ka haw hnu pawh chuan U Hruaia leh a hmeichhe kalpui ringawt khan ka rilru an la luah a, enge ka hriat ni, U Hruaia hi kei hian ka lo duh tak tak tawh tihna em ni, nilo chutiang chu a ni theilo, mahse ngatinge kha hmeichhia nen a ka hmuh khan ka chhungril hi a tawt up up mai le, vawin chu ka chiang lo a ni, U Hruaia te chu ka u thianpa a nia, a bak engmah dang a awm lo tiin ka in hrilh ru mawlh mawlh a.

Cont.....

Comment leh click kan pachhe sawt riau a, min han tih sak leh liam liam ula aw......

[Rebec Nunziri]

Chapter-6



Lalrindiki POV



Eng ka hria nimaw zan ah chuan U Hruaia rawn len hun chu ka lo chang ru deuh tlat a, mahse dar 8 a rik pawh chuan a rawn la lang theilo, ka hnual deuh ruih a, "Mami in leng i nei dawn a mi, kawngka lam chu i en en ni?" ka nu chuan a ti a, "Nei dawn nang" rang zetin ka lo ti a, U Mama chu pindan atangin a rawn chhuak a, "U khawi ah nge i kal dawn a?" ka lo ti nghal vat, "Rma te in ah kan kal lawk ange, thian te nen leng ang u kan ti a" a lo ti mai a, U Hruaia pawh a tel ve ngei ka ring.




U Mama chhuah hnu chuan keipawh pindan ah ka lut a, ka mu nghal daih, la mut erawh a chhuak vak lo, phone chu ka khawih mai mai a, whatsapp a ka luh chuan status ka en mai mai a, thenkhat hi chu an status atang hian engtinge an awm mek tih te hi a hriat theih vek zel, an lungngai a nih pawn status ah an rawn sawi a, hlim em em te pawh an awm a, bialpa te nen in hau mek leh in ngai ngawih ngawih te pawh an awm.




Kei tak hi chu status neih hi ka tih mi vak a nilo, a chang hian ka nei leh zeuh zel a, chupawh thlahnih dan ah te a nih ka ring, nidang ang lo takin U Hruaia status pawh a lo awm ve ran mai, a no hi ka save na a rei ve tawh a, status erawh a neih ka hmuh vawikhat na a niin ka hria, en chu ka chak deuh tlat, rei fe ka en angam tih ka ngaihtuah hnu chuan ka en ta nge nge a, vawin lama a hmeichhe kalpui nen an thlalak a lo ni.




Ka thik deuh tlat, en pawh en rei duh lo chuan ka phone chu khum ah ka dah ta hmak a, 'Min duh thu a sawi a, beidawng a tum loh thu te nen lam a chil per pawh a la hul tawp nang, tunah lah hmeichhe dang nen an chhuak dun leh dawk dawk tho sia, mipa hi chu an lo in ang tlang vek a nih hi, lerh hlawm lutuk" ka rilru chuan ka ti deuh hlak a, ka mu te chu ka mu tha mai ami theilo, ka tal deuh sek a, ka thinrim bawk nen ka thu chhuak leh hluai zel bawk.




Ka phone a rawn rik tleng chuan ka en nghal vat a, U Hruaia hnen atangin a ni, rang taka en nghal mai ka tum chu ka in sum leh tih, kan nghal te te phawt a, minutes 5 vel a fal ta maw tih ah chuan ka en ta chauh, "I mu tawh em?" tih te mai hi a lo nia, mahse ka hlim pui em em tho, "Mu tawh e" tih ringawt in ka chhang a, "I va meng rei ve" tih chu a rawn lut lehnghal zat, sana ka en a dar 9 chiah chiah a lo ni, "A la tlai loh em hi" ka ti leh a, ka nui deuh var var bawk.




A rawn voice ve ta thung a, a rawn luh leh rual chuan ka ngaithla nghal vat a, "Zing ah thawh i hai ange" a rawn ti a, chu aia ka beng a ti ring zawk chu a thusawi tawp dawn a hmeichhe aw in a hming a an ko ri kha a ni, vawin a a hmeichhe chhuah pui nu aw ngei kha a ni tih ka chiang bawk, ka nui lai chu ka tawp ta hmak a, chhang pawh ka chhang let duh tawh lo, phone bawk chu a rawn ri leh a, "I muhil tawh em ni?" tih a rawn thawn leh pawh chu ka chhang duh tawh lo.




Zing ah chuan ka tho hmasa ber a, chaw ka chhun fel chiah tih chuan ka nu a rawn tho ve a, "I va tho hma ve, min thawh khalh ve ngei a" ka nu hi ka thawh khalh ngai meuh lo, nizan khan ka rilru ka kawm melh melh pah in ka muhil daih a, chuvang a tho hma pawh chu ka ni, "Nizan ah khan ka muhil hma em a, tukin chu ka harh hma ve a nih hi" ka lo ti vat a, ka nu nen chuan rawng kan bawl chhunzawm mawlh mawlh a, U Sawmi pawh a rawn tho har lo.




U Rdi erawh dar 8 rik dawn ah a rawn tho ve chiah a, U Mama ai pawn a tho tlai zawk, "Rd nangpawh zing thawh hma ve deuh tum rawh, nula i nia, tlai tak tak a thawh hi a tha lo, zing thawh hma hi hrisel na a ni bawk, tunlai thang thar ho hi in buaithlak hlawm em mai, zan ah mut na chang in hrelo a, tlai tak tak thleng in meng a, zing ah thawh nachang in hre bawk silo, hmeichhe tan ngat phei chuan tlai tak tak ah thawh hi thil mawi pawh a nilo tih hriat tur" tiin ka nu chuan a lo hau nghal a.




"Zan ka meng rei em em pawh a nilo, tunlai chu mut ka duh lutuk a, ka thau dawn aniang" U Rdi lah chuan a lo ti mai a, "Chutiang chhuanlam mai mai a nihchu, in thawh hma loh avang hian chhuanlam eng eng emaw in siam a, thau dawn avanga thawh hma loh thu a awm lo, zan i meng rei thin hrim hrim, dar 12 a rik tawh hnuah pawh phone i la khawih thin tih ka hria a nia, zanin atang chuan muhil hma tawh ka, zing ah i tho hma a nimai" ka nu chuan a ti leh hmak.




Dawr ka thlen chuan Dingi pawh a lo thleng daih tawh, vawin te chu ka kal hma ve tehlul nen kei ai a thlan hmasak ka ring lo a sin mawle, "I va han thleng hma ve" ka ti a, "Ka nu in min tir kawi pah a, chuvang mawle, zing ah lak tuk dang aiin min kai tho hma a, mit ka kham lo" tih pah in an ham bai bai a, U Masiami chuan eng eng emaw a lo khawih mek thung, tunlai tak chu dawr tu kan nei vak lova, kan buai vak ngailo, hahdam viau mahila in hralh theih loh chu a nuam lo duh khawp mai.




Dawr nei tu nilo mahila tan hi a lo na ve thin si a, U Masiami tak phei chuan engmah a sawi ngai lem lo, nuam lo kan tih ang tih a hlau zawk, kan in hralh theih loh thu kan sawi te hian "In hralh reng theih a ni hleinem, nakin ah kan la in hralh leh chur chur mai dawn alawm" hi a ti mai thin a, mi a ngaihtuah thin bawk nen a rilru a tha tih a hriat ngawih ngawih, hei vang tak hian a nia ka u tan a ka duh em em chhan pawh.




"U Hruaia chu lo leng rawh" Dingi'n a tih chuan kawngkhar lam chu ka en vat a, U Hruaia chu a lo ding reng mai, "A va nuam awm dawr dawr ve" Dingi thatchhe zet a a thu lai a hmuh chuan a ti a, "In dawr piah ah hian bungrua ka rawn dah a, ka rawn kal kawi nghal a nih hi" tih leh in ka bulah chuan a rawn thu a, en pawh ka en leh tawh lo, ka phone chu ka khawih mial mial a, mahse ka bul a a thu chuan ka rilru a la zawk miau a, ka phone ah chuan eng ber nge ka en pawh ka hrelo.




"Rawn kal kawi ziah rawh, tunlai chu kan reh thei lutuk a, kan khua a har thin a nia" U Masiami chuan a lo ti vat a, ka la ngawi reng, "Eitur lak a hun dawn bawk a, Ding kan pahnih in kan va la dawn a mi niang?" U Masiami'n a tih leh rual chuan an lam chu ka en vat a, "U Masiam lo thu zawk rawh, Dingi nen kan va la dun mai ang" ka lo ti vat, "A ngailo, vawin chu nidang a ka la ei vak ngai loh ei ka duh a, ka va kal ang, Dingi kal ila" Dingi pawh chu a tho nghal vat a.




U Hruaia nen chauh chuan dawr ah kan awm a, biak ka tum lem lova a ni lah a ngawi reng bawk si, "Nizan khan min rawn chhang let ta miah lova" rei fe hnuah chuan a rawn ti a, "Ka lo muhil daih a" ka tih chuan ka thusawi chu a awih hmel lem lo, a phone chu a phawrh chhuak a, "A hmasa a mi hi i hmu a, mahse min chhang let chiang lo, i muhil tawh em ka rawn tih na lah hi tin thleng in i la en lo bawk a, zing ah tal chuan min rawn chhan let ka ring a" a ti leh a.




"Chhan let che a ngai in ka hre tawh lem lo a nihkha, zingah chiah ka hmu sia, zan a I muhil tawh em tih zing lama han in chhan daih thu a awm silo a" tiin chhuanlam ka lo siam a, "I hmu tawh em ni, tun thleng in ka phone ah chuan i la hmu hauh lo" a ti leh zel bawk si, ka hmu ngei a mahse amah ah ka lut lo mai mai kha a nia, "Nia.. mahse ka hmu tho alawm, chuan dawt lam te I buai vak lo a mi?" tiin thil dang ka sawi ta daih a.




"Buai lem lo, hnathawk an awm tho bawk nen kei phei chu ka awl viau mai" tiin min rawn thut hnaih sawt a, ka lo tawlh sawn ve vat, "Ngatinge min hlau deuh em ni?" ka awmdan hai lo tak chuan a rawn ti a, "Chutiang lam a nilo, midang an rawn lut thut thei a, in hnaih deuh a lo thut chu a mawi lo alawm, U Masiami te pawh kha an rawn let tep in ka ring" tiin kawngkhar lam chu kan en pah kher a.




Tawng leh a tum lai mek chuan mi an rawn lut a, ka thut na atang chuan ka tho vat "Lo leng rawh u" ka hmaa mipa ding ka hmuh rual chuan "Ramropui" ka ti nghal hluai a, "Arini chu, i dam maw, kan in hmuh loh na a va rei tawh ve" a lo ti zang vah a, kum 5 dawn chu kan in hmu tawh lo, "Dam e, engtik ah nge i rawn haw a?" ka tih leh chuan "A la reilo thla hmasa khan ka rawn haw chiah" a hma ang bawk in a la nelawm.




"I rawn haw thu te chu min hrilh ve tur che alawm, Amuani pawn a ngai lutuk che a sin" ka ti leh a, "Ka tihpalh a ni, ka rawn haw hma khan ka phone min ruk sak a, rawn biak ngaihna cheu ka hre tawh lo a ni" a tih leh chuan ka hrethiam hle, a phone ti bo lo chu nise min rawn be em em ang, a bul a hmeichhia chu ka en a, a bialnu a nih ka ring ringawt a, "Eng lam nge in en a?" thawmhnaw en tur a rawn kal an ni bawk nen thil dang lo sawi pui chiam kha chu a rem teh teuh lo a ni.




"Ka hrelo, a nalh hlawm sia, kan en kual phawt ange" a hmeichhia zawk chuan a rawn ti a, a kal kual nghal, "Bialnu i va nei chhelo ve" Ramropuia bulah chuan zawi te in ka ti a, ka chal a chuan ka beng zeuh in "I va hahthlak e aw, ka bialnu a ni reng reng lo, ka nau a nih saw" a tih chuan ka nui ta hak a, ka ngaihdam atthlak zia kha aw, "Sorry, unau ve si, in in hmelthat hleih em mai a" tiin a nau dun na lamah chuan ka va kal a.




"U heihi kan ha chhin ang aw" tiin thawmhnaw pahnih hi a u hmuh theih turin a khai lang a, "Va ha rawh, i in hmeh dawn lutuk" a nau a biak dan atang chuan a duat thawkhat dawn tih a lang reng mai, "Chuan i thil zir te chu i zir zo thei tawh maw?" ka ti nghal vat a, "Zo ve tawh e, remchang hmasa ber ah thiante nen chaw ei khawm ila a tha ang, in ngaihawm hlawm si a, in hmuh khawm vat vat a chakawm" a tih chuan ka lo pawm thlap.




Ramropuia te nen hian naupang te kan nih atangin school kan kal ho a, khatih hunlai kha chuan hmeichhia bik kha kan in kawm lova, mipa te nen kan in kawm vek, Ramropuia hi mipa ah chuan ka nel ber a, kan thian ho zing ah khan lehkha pawh a thiam thei ber reng bawk, damdawi lamah hian a tui em em a, mahse doctor pangngai ni lovin vety doctor nih a chak ber thung a, tunah chuan a ni der tawh a, kha iah tak nge a thawh ka hrelo thung.




"Kan rei em?" U Masiami te pahnih chu an rawn ri lut nghal bawrh bawrh a, customer an awm tih an hmuh rual erawh in an tawp chawt thung, Ramropuia nau chu a rawn chhuak a, "U a pahnih hian ka ha tawk ve ve a, min lei rawh aw" a tih chuan Ramropuia chuan a lo aw vat a, a man te an pek fel hnuah chhuah mai an tum a, "I no. min pe la, in biak pawh na tur neih loh ringawt chu a ṭhalo" a tih takah chuan ka phone no chu ka pe a, min rawn be ngei ngei turin ka chah bawk.




An chhuah fel hnu chuan "Khakha tunge a van chhelo ve" Dingi chuan a lo ti nghal zat a, "Ka thianpa a nihkha, school kan kal ho thin a" ka lo ti vat, "Engpawh nise han in hnawh puar phawt teh ang u, ril a tam tawh" U Masiami'n a tih takah chuan sawi buai lovin an bul ah chuan ka zuk thu a, "A chhelo e, bialnu a nei angem?" Dingi lah chuan a ti reng a, henu han lerh em em dan hi chu aw, U Hruaia a hmuh hmasak ber pawh khan a chhiat loh thu a sawi chamchi tawh bawk a.




"Ka hre bik nang, kan in hmuh loh na a rei tawh a, chutiang lam ka zawt ngai bawk silo, i hriat chak viau chuan ka lo zawh sak ang che" ka tih chuan "Ka duh teuh lo mai, zawt reng reng suh" a ti leh ang lawi a, "I hre chak a nilawm ni?" ka ti a, "Ka sawi mai mai a nihkha" a ti leh, Ramropuia te chungchang kha chu sawi tawh lovin thil dang kan sawi ta daih a, U Hruaia chuan ei loh a tun viau nangin eitur kan lak kep avangin a ei ve ta nge nge.




A awm rei ta phian bawk a, "Kan va let tawh ange, ka thang fei tawh em mai" a tih hnu chuan a chhuak nghal a, "Nangni hi enge in awmzia ka hrethiam lo, U Hruaia kha a rawn kal reng bawk sia, in in kar hi enge awmzia han sawi chiang teh" U Masiami chuan a ti a, "Engmah kan in kar ah a awm lo, U Mama nen an in kawm thin a, chuzawng chu a nimai" ka thusawi chu an awih hmel teh chiam lo hle, mahse engmah sawi chhunzawm ka tum chuang lo.




Zanin chu hlazir an koh avangin biak in lamah kan kal a, kal kan la tlem bawk nen pawn ah chuan kan awm khawm a, Amuani nen thu dun in kan titi palh melh melh a, "U Hruaia nen enge in chanchin?" a tih chuan "Enge ni vak se I tih, a hma ang reng kha a nimai" tiin ka lo chhang a, "Arin keichu i rilru put hmang hi tha ka ti miah lo a nia, i nun hlui a thil thleng chu engpawh lo nise U Hruaia ang mipa tha lutuk hi i chan mai ang tih ka hlauh pui che" tha tak chuan a ti leh a.




"A.. I hriat vek kha, kan hlauthawng tawh alawm, a hma ang kha ka tawng leh lovang tih pawh hriat loh" ka ti a, ka ngaihdan chu min pawm pui hmel teh chiam lo, "Ka hria, mahse U Hruaia chu a dan a dang alawm, U Ruatpuia nen chuan an mizia pawh a hrang hlak, i ti sual lovang" chutiang chuan ngai ve thei ila ka ti, mahse tun a ka dinhmun ah chuan a har a ni, diktak chuan nat nawn leh ka hlau lutuk hi mipa lam ngaihtuah rih loh ka duh ber.




"U Ruatpuia pawh a tir ah te chuan U Hruaia ang chiah hi alawm a nih, min ngaihsak em em a, keichuan khawvel a mipa tha ber angah ka ngai hial a nihkha, a lakah ka in nghat em em bawk a, mahse enge thleng kha, khang kum chhung zawng khan a mize diktak ka hre hauh lo a nia, kum 5 lai a ni nen ngawrh taka kan in zui chung khan khatiang mizia kha a nei nag tih rin ngaihna ka hrelo, a tawp ah chuan keimah ka na a, diktak chuan maw, mipa hi rin leh mai mai ka ngam tawh rih thlawt lo" ka ti ta tawp a.




"Ka hrethiam che alawm, ni e, i tan chuan a har dawn lutuk tlat, i duh ang chuan awm rawh, i thiannu ka nia, i lam ka tang reng a nia, i duhdan kha a pawimawh ber" a ti ve ta nge nge a, min hrethiam chu ka lawm takzet, hlazir tan tawh tur an tuh avangin biak in chhung ah chuan kan lut a, alto part ka sa a, Amuani erawh soprano part a sa thung, kan hlazir hi a sang ve hrim hrim bawk nen alto ni mahila ka aw chu a lawi rut tawh mai.




"Awi ka aw hi a kham" kan haw lam chuan Amuani'n a ti a, "I aw ni lovin i hrawk zawk a kham a nilo maw?" nui chunga ka tih chuan a nui ve tho, "A sang e, tam viau mahila hetiang em em a sang hi chu min zir pui tawh lo se a tha ang, hetiang te chuan kan hrawk a thler mai dawn alawm, zanin phei kha chu ka thut pui nu lakah khan ka in thlahrung zawk, tlat tin kha ka sa lai vel vek" ka lo nui hak hak a.




"Kan part a hniam zawk chung pawh in kei tak ngial pawh ka aw a pawi vek thei alawm, mahse kan thian ve tawh reuh ka ti" ka thusawi chu min lo pawm pui leh viau a, "Ka lo thlah ang che, dawr ah kal kawi hrim hrim ka duh a" kan in a lut mai lo chuan ka ti a, "Keipawh thil lei ka duh, tunlai chu zanlai riltam ka nei a, dar 12 vel ah hian thil eitur ka dap ruai zel" a tih avangin dawr ah chuan kan in zui lut a.




Rin loh lutuk in U Ruatpuia leh Cindy-i te an lo awm ve a, thil an lo lei mek, "Thil lei turin in rawn kal ve tho elaw?" Cindy-i chuan min hmuh rual in a lo ti a, "Nilo se kan kal tawh nang" Amuani lah chuan zawi te in a lo ti hman hram, ka va nghawk zeuh a, "Aw" tha tak chuan kan ti a, ka chhang tawh viau mai, mahse han hian lum lam vak ka thiam lo, kan thil duh ang te chu kan la a, "Pawisa nawk kir tur cheu ka va neilo ve" dawr nghak tu U Emi chuan a ti a.




"Ka lo pek sak ang cheu" U Ruatpuia chuan a lo ti ve khauh, "A ngailo, kan thil lei hi 200 man chiah chiah a nia, hei keiman ka nei alawm" ka lo ti nghal vat a, U Ruatpuia thil min lei sak chu ka duh lo, kan in kar a tawp na pawh thla thum awrh chauh a la nia, vengchhung a thalai thenkhat te hian kan chanchin an la sawi ti zeuh zeuh tih pawh ka hai lo, chuvang chuan a ni nen a min sawi zawm reng theih na tur thil engmah thlen tur ka tum lo bur.




"A nih mangtha ule" pawisa kan in pek fel rual chuan U Ruatpuia te bulah chuan ka ti a, kan chhuak nghal nal nal, "A va han zaklo tak, engtinge khatiang te kha a sawi ngam zawk ni?" Amuani chuan a ti a, "A ho em mai, an chanchin kha sawi zawm lovang" ka lo ti vat thung a, "Nia, mood an ti chhia, a tlai tawh em mai, tawi khawmuang tawh lo mai ang aw, zing ah thawh hma leh a ngai dawn si" a tih avang chuan in mangtha in kan in lam chu kan pan a.




Ka khum ah ka mu fel chiah tih chuan call ka dawng a, no hlang atanga a nih avang chuan lak loh ka tum zet a, mahse vawin khan Ramropuia hnenah min rawn be turin ka tih kha ka hrechhuak a, ka la leh ta vat, ka tawng hma hma chuan a rawn tawng nghal phawr phawr a, Ramropuia ngei a lo ni bawk, "Min va rawn call tlai ve" ka tih chuan "Tlai a mi, dar 10 pawh a la ri lo" tiin min rawn chhang let a, "Ka muhil hma thin alawm" ka lo ti leh mai.




"A nihchu, ka hman ve chiah a, chuan Amuani hnenah chuan i lo sawi em?" tia min zawh rual chuan engmah Amuani hnenah ka sawi lo tih ka hrechhuak chiah, a va han haihawt theih thin tak aw, "Ka la sawi miah lo, ka lo theihnghilh daih alawm, ka lo hrilh dawn nia" ka ti nghal vat a, "Min ngai pawimawh lo hle mai, min theihnghilh thei a nia" te a rawn ti a nihchu, hepa over zia hi aw.




"Tak tak in, i la hrilh loh chuan a no min lo pe rawh, kan fiam ange, engmah lo hrilh suh aw" a tih chuan ka nui a, kan in biak na kan tih tawp hnu chuan Amuani no chu ka va thawn nghal a, engtin tak Amuani chuan lo ti ang maw, Ramropuia a ni tih a hriat chhuak rual in a thinrim leh dawn mange, ka phone chu khum sir ah dah in muthilh ka tum a, mahse a rawn rik lehnghal avang chuan ka phone chu ka ban leh vat a.


...


Rin lawk ang ngeiin Amuani chu a thinrim khawp mai, ka bulah a ang vak ringawt a, a sawt lem hlei lova, chaw ei khawm pawh a rang lam in kan rawt a, Ramropuia te in ah kan nei dawn nghe nghe, an in an hian vawi hih khat chu kan leng ve tawh a, a chhung te chu an fel hle bawk, naktuk hi kan chaw ei khawm ni tur a ni tawh bawk a, a tam zawk chu kal thei dawn mahila hna leh nupui pasal nei te an awm nual tawh avangin kan kim thei dawn lo thung.




U Hruaia a rawn leng a, a hma ang khan ka ning em em tawh lova, a rawn len hian nuam ka ti riau zel zawk in ka hria, mahse phir hurh anga awm chu ka duh miah lo thung, "Naktuk ah dawr i kal dawn em?" ka bul a rawn thut pah chuan a ti a, "Aw kal ang, mahse ka haw hma deuh thung ang" ka lo ti a, "A nih chuan min chhuah pui lawk ta che" chhuah pui a min sawm vawikhat na a ni a, mahse tihtur dang ka lo neih avangin ka hman dawn lo, pawi ka ti ru viau bawk.




"Naktuk chu ka van hman hmel loh, thiam ho a chaw ei khawm kan rawt a" ka tih chuan a ngawi deuh vang vang a, a lungawi lo ringawt em ni dawn le, "A pawi lo, nidang ah pawh a theih tho a, i hman veleh a nimai" a tih leh chuan "Enge ni hrim hrim, ka kal ve kher a ngai a mi?" tia ka zawh chuan "Khawi ah emaw hruai che ka duh a, chuvang mawle, nuam i tih viau pawh ka ring" tiin a nui a.




"Awle, nidang ah chuan nimai rawh se aw" ka lo ti tha ve mai, a hma ang em em chuan a lakah ka hel tawh lo tih pawh a hriatthiam ka ring, U Hruaia hnaih ka tum ve apiang hian ka chhungril ah min dang tlat tu an awm nimai hian ka hre thin, engvang nge ka hrelo thung, mipa fel leh tha tak a ni tih chu ka hriat hmaih bik hauh lo, mahse in zawmna siam pui erawh ka la hlau that thung si hi a ni.




Ramropuia'n min rawn call chuan ka chhang vat a, a thusawi a la ho em em zui, naktuk ah eng sa nge kan hmeh ang tih min rawn zawt a, ka hre der silo, "Group an khan sawi chhin teh, keichuan engpawh pawi ka tilo a" ka tih chuan "Kan sawi nghal ange, keichuan bawng sa ka duh a, an duh ve vek kher angem a hriat siloh a" a rawn tih leh duah hnuah phone chu a dah a, ka nui ringawt, mipa si hi a buai na a ho ve thei thin khawp mai.




"I va hlim awm vur vir ve, lawm loh a i nuih vur vur ni, hmani a mipa kha em ni?" U Hruaia chuan a rawn ti hlawl a, "Aw ni e, naktuk ah hian an in ah chaw kan ei khawm dawn a, kan chawhmeh tur min rawn zawt a nihkha" ka lo ti tha mai a, "A ni nen khan in in ngaina viau a nih hmel, a bula i awm pawh khan nuam i tih hmel takzet, i hlim tih a hriat bawk si a" a aw ah chuan thik na ri a ri tel deuh tlat in ka hria, nuam chu ka ti ta chiah lo.




"Chutiang lam pawh a nilo, ka thianpa a nia, kum tel reh meuh kan in hmuh loh hnuah kan in hmu leh thut bawk a, chuvang alawm" ka lo ti vat, "Ka hrethiam e, a tlai tawh si a, ka va haw ange, muttui" tih leh thawh a rual a, a chhuak nghal nal nal, a awmdan teh thut avang chuan a kal na lam chu ka en zui reng, enge maw a hriat ni, a ni khan Ramropuia kha a thik tak tak em ni dawn le.




Mut hmunah pawh chuan U Hruaia awmdan kha ka ngaituah leh thin a, mahni te in ka nui leh vur vur zel, Ramropuia kha a thik nia ka rin avang chuan ka lawm ve em em ringawt bawk a, ka inet deuh sek a, zan dang zawng aiin ka muhil tlai a, zing ah thawh ka hai ang tih ka hlau viau, dar 12 tlang ah pawh chuan ka la muhil lo, U Hruaia a online em ka en a, a lo online mek, zan dang ah chuan a online apiangin min rawn be thin sia, ngatinge zanin hi a reh em em le.




Min rawn biak hun chu ka lo chang reng a, mahse min rawn be chuang miah lo, ka muhil tawh a nih a ring ti dawn ila a ni thei chiah in ka hre silo, ka online tih a lang vek sia, whatsapp a ka luh reng lai chuan status a rawn up leh a, ka en nghal vat, a status ka en chiah chu ka thinrim nghal em em ringawt, phone chu ka dah tau hmak a, a bula a hneichhia ka hmuh thin nu nen bawk a an thlalak kha a lo hmang leh chu niin.

Cont...

Click leh comment a that chuan kan regu ang aw...