DARK DESIRES BY MAWITEI BAWITLUNG (Completed)

[mawitei bawihtlung]

DARK DESIRES


CHAPTER 11



Ka thil ei zawh rual chuan ka pum chu rawn in let but butin ka luak zui ṭhat ṭhat a, ka zawi ngiai bawk nen a hrehawm tih piahlam ani. Chhuatah chuan ka mu ta tawpa, Dominic-a chuan min rawn hnaihin “Engtin nge i awm?” a rawn ti hmuka, a aw chu ala nêl awm loh hle bawk.




Ka chungah a thinrim renga, min hmangaih ti si in min ngaihsakna leh dawhtheihna a nei heklo, “Ka ṭha” ka ti tawi taka, nau ka pai anga ka inrinna pawh hi a dik ngei ka ring bawka. Amah erawh hrilh ka tum rih hauh lo, ka lu ah a rawn chûl chuan amah chu ka melh zawka.




A mitah chuan min ngaihtuahna ka hmu a, mahse rei lang lo in thinrimna in a rawn tuam leh tih hriat takin a mitmeng chu a thim leh khap tawha, a kut pawh chu a la sawn nghal bawk. “Dom, min that mai rawh, hmeichhe dang min pansan renga, min hmangaih i tih pawh kha dâwt bâk a nilo ang, chuvang chuan min that la i duh ang tak chuan nung tawh zâwk rawh” ka ti sapa.





Min chhâng mai lo hian min pawm kâng nawlhin khumah chuan min mut tira “Dom, thi ila i lâwm angem?” ka tileh chu rum zet hian min ena “Ngawi mai mai rawh, thihna thu kha ka hriatah sawi leh tawh suh ang che, ka hlatah i awm dâwn reng reng lo” a tihchuan thawk ka la hak ringawt.



“A nih chuan hmeichhe dang hi i hmu tawh lo thei angem? Hetiang reng chuan i kiangah ka awm reng thei lo ang, min nghâk turin ka duh che a hetiang hian engvangin nge i awm tlat? Min hmangaih tak tak pawh ka ring tawh lo, min neih i duh vâng chauh a ni, hmangaihna chuan mahni hma a sial ngai lo, a hmangaih ngaihhlut zawng leh duhzawng a ngaihtuah pui zâwk ṭhin, nang nên chuan hmangaihna hi a awm tak tak lo” ka lukham a rawn hnek dawt avâng chuan ka thusawi lai chu ka tâwp data.




Amah chu ka en kar bawk, a in seh ruh ṭawlh ṭawlh mai. A hmêlah chuan thinrimna hlir a lang chhuak bawk nên mak ti deuh tak hian ka en renga “Ka hua che” ka ti leh erawh a nui suk ringawt.



“Hmeichhe lemchan thiam lutuk, ka lakah hian ka sum bâk i duh lo, ka hmangaih che tih i hriat avângin i duhzâwng zawng min dila, i thinlung erawh min pe phal hauhlo a nih hi, khatiang kha sawi ve tawh hauh suh, hmeichhe zaktheilo lutuk, chaw hi i ei lo a ni tih ka hriat leh chuan i rinphak bakin ka che tawh ang” a ti hmuka, min en tawh hauh lo hian a chhuak zui daih bawk nên rilru hah zet chuan ka thaw ham ham ringawt.





Tinge hetianga kan awm reng mai le, kei hi thi tak tak ta ila a lâwm zâwk angem tih te thleng chuan ka ngaihtuaha, chu chu a ṭha ber niin ka ngai bawk.




Nihnih min khung leh hnuah min chhuah tir ta hrâma, a hma ang erawh kha chuan kan inkar a ṭha tawh lova, min hruai haw tirh ang mai kha a ni bawk, hmeichhia a rawn hruai lût renga. Kha model nu nên khân an in kawp nghet ta a niang news vêlah te chuan an inneih tur thu an chhuah chuai chuai reng bawk.



Mi zawng zawngin inhmeh an tih thu te chu an sawi renga, an comment na te ka hmuh hmaih bik silo, ka room chhûng chu ka khawvêl a ni ber a. Ka naupai pawh chiang takin a hriat ta bawk, thlahnih lai ka period tawh lo miau alawm.



Ka nun chu khawharna in a khata, dam châkna reng rêng ka nei tawh heklo. Ka neihchhun zawng zawngte'n min boralsan tawha, ka thisen zawmpui awmchhun ka pa ngei lah chuan nupui dang neiin kei chu min ngaihven hauh lo bawk.



Tûnah Dominic-a pawh ka hlatah a awm leh ta bawka, ka nun hi hlimna hian a hlau a ni ber tawh hian ka hria. Hlimna aiin lungngaihna ka tawng hnema, ka nun leh lungngaihna hi a inkawp tlat ni hian ka hre tawh bawk.



Dominic-a awmdân chuan ka rilru a ti na a, ka lak aṭanga a in la hrang hmak te chuan ka mittui a ko chhuak hnem na rawh. Ka hnaiha a awm lai kha chuan engmah ka hrethiam ngai lova mahsela min han hlat chiah hian ka lo hmangaih tawh lutuk tih ka hre bawka, inthiamlohna nei siin ka hmangaih lo thei chuang silo.




Chu erawh hrilh ka tum lo bur, a duh a thlang tawha kei chu a nunah ka pawimawh ve tawh lova, hmeichhe dang an awm tawh bawk. A ina chêng ve siin theihnghilh ka ni a, keichu a inchhunga bungraw an hun ve mai mai ngaihsak tu hmu lo ang mai hi ka ni bawk.




Tukverh aṭang chuan ka dâk chhuaka, he room khawhar thlâk lutuk ah hian keimah bâk ka awm ngai lova, maid te tak ngial pawh an rawn lang ngai ta lo bawk. A sawi ang ngeiin a thawmhnaw leh a room te, ka room chen chuan keimahin ka ti faia, biak ka tum lahin min chhâng duh ngai silo.



Rilru na lutuka ka ṭah châng lah a tam, nitina kha Daisy a chhuah puite hlim taka an nui dûn hmuh te chu ka tân a nuam hauh lo.



Pool-ah chengin zangthal zawng hian tui chakna ring chuan ka mu ar ara, mitchhingin ka in ngaihtuah neuh neuh bawk. Tlêm chuan ka hahdam ve deuh bawk nên ka rilru te pawh chu a hahdam sawng sawng mai.



Tihian tuma chîm buai loh hian awm thei ila, hlim takin keimah chauhin awm thei ila tihchu ka duhthusam a la ni fana, Dominic-a hi hre tawh miah lo ila ka duh bawk. A ni chuan enga tân mah min ngai lova, a unaupa thattu ka nihna lah a bo hek lo.




Chutia hahdam taka ka lo mut der der lai chuan tui chu rawn ri bawrhin ka lam pan hian thâwm a rawn awma, ka che sawn chuang lo. Bân tha chak zet hian min rawn pawm kân tâk nawlhah chuan ka meng chhuak ta hrama, Dominic-a nên kan inmelh nghal chat bawk.



Engvanga rawn lût ve ringawt nge a nih, “Engthil phiangsen nge i lo tih hi“ a rawn ti hluka, kei erawhin a lak aṭanga awmsawn ringawt ka tum thung. “Min thlah teh, engthil mah ka tilo tui ka chêng mai a nih hi” tiin a mi pawmna ata chu awmsawn tumin ka che a, a phal hauh lo.




Pool pâwn lam pan chuan min hleuh phei puia, tâl pawh ka tâl buai peih tawh lo. Nidang ang bawkin a bialnu pawh a lo awm leh tawh saw, “Ka hua che, heihi maw i hmangaihna lantîr dân chu” ka ti sepa, min rawn en nghal vut mai.



Min chhâng mai lo hian pool ko tlângah chuan min hlâng nawlha “Engkim hi nangmah vâng vek a nih hi, min hmangaih ve lo tu hmeichhia chu engah nge ka bawh zui reng ang, min hmangaih châk hmeichhia an tam lutuk” tiin min kalsan zuia, chunu bânah chuan va chelhin inchhûng lamah chuan a luhpui zuia.




Ka mittui a luang ngiai ngiai thung, thâwk harsa ti zet hian vanlam chu ka en chho vang vanga, hmangaih loh tur ka hmangaiha, mipa nunrawng leh mahni hmasialna a khat ka hmangaih avângin hetiang thil zawng zawng hi ka tuar phaha, keimah pawh ka inhaw lek lek mai.




Ani hi tawng miah lo ila chuan hetianga nun harsa leh hrehawm ti lutuk hian ka awm angai lo tur, engkim hi a thiam loh vek a ni. A chângin min ngaihsaka, ka thih phal hauh silo in min ngaihsak a tum leh chuang silo, ka lak aṭangin a hla tial tial tih pawh ka hria.



Thil ti thei tak chu ni ila hetiang mai mai chuan ka awm pui bik lo tur, ka hua ka haw takzet.



Inchhungah chuan lût in a hmeichhe nui har har chu ka hre zuia, maid ho in mak ti a min enna te, Dominic-a ka laka a awmdân avânga hmuhsitna mitmenga min enna te hi ka hmuh hmaih bik lova, chu chuan min ti hrehawm zual.



Engtikah emaw he mipa lak aṭang hian ka zalên thei a nihchuan ka kîr leh tawh lovanga, natna min pêk ang zawng zawng hi pêk lêt ve theih ka châk takzet bawk.


Ka lût an hmuh chuan Dominic-a chuan chu nu hmuiah chuan a fâwp khera, chute chuan ka lung an tina zuala, ka thâwk te hi a tâwp mai dâwnin ka hria, tûnah tak hi chuan bo vang vang mai a ni ka duh ni.


“Dom, nau ka pai a nia” a ngai pawimawh lo tih hriat takin a bialnu nên chuan an la infâwp mawlh mawlha, kei erawh ka mittui nen ka en reng thung. Ka duh lo chung min sual luia, a fa ka pai tih a hre chung pawhin min ngaihsakna chhete pawh a neilo tih a hriat.

Tinge he mihring leh a nau hi ka lo tawn kher kher le? Ka nun zawng zawng hremhmuna chantir tu kiang atâ hi zalen ka châk a ni, mahse ka thei silo, amah ka hmangaihna ringawt pawh hian hlat tak tak tur chuan ka theih dâwn loh zia an ti chiang bawk si, ka mittui chu a far fapa.



Chhuat lam ka bih ngar bawk, ka rilru chu a buai nuaiha, thih daih mai ka châk a ni.



“A ni kha i nei duh a nih chuan kei hi min kal tir rawh” ka ti leh chu a hmeichhe fawh lai chu tâwp chatin min rawn ena “Ṭawng tawh hlek suh Lilia, ka thin i tirim palh hlauh ange, khatiang kha sawi tawh suh ka ti che a ni lo'm ni?” a rawn ti ṭhawt a, ka insûm thei tawh lo in ti huaisen in dâk vah hian ka ena.




“Engah maw ka sawi loh ang, min hmangaih thu i sawia, nupuia min sawmin pawm ngei turin min duh a ni lo'm ni? Mahsela hun min pe tura ka tihna che ngai pawimawh lovin dawh theilo zetin min kalsana, kan inkar tichhe tu zâwk i nih hi, min hmangaihna kha maw dâwt vek, a chhan chu nang khân hmangaihna i neilo, tumahin an hmangaih ngai hek lovang che. Mal taka awm tur i nih kha, hmangaih pawh i phulo, kha hmeichhia pawh khân i sum bâk a duh lo, a chhan chu nang hi hmangaih tlâk miah loh i nih hi, hmangaih phulo ber mihring” ka ti ta piap piapa.




Tûnah hi chuan hlauhna pawh ka neilo, amah huatna hlir in ka khat a ni ber mai, ka thusawi chuan a thin a tirim tih hriat takin a rawn tho chhuaka, ka lam chu a rawn pan pawk pawk mai. A mitmengah chuan min thah mai châk na ka hmu a, chu erawh ka ngai pawimawh duh hauhlo, tûnah hian min that mai sela ka duh zâwk.




A kâwnga apai silai chu a rawn la chhuaka, min tin zat bawk. Maid ho hlau kal sawn pawh chu ka mit sirin ka hmu renga, kei erawhin amah ngawt chu ka en thung.



Thih hi hlauhna tur chhan pakhat mah ka nei tawh lo, ka naute erawh ka rilru chuan ngaihdam ka dil mawlh mawlh thung. Mahsela a pa ber hetiang hi a ni a, a piang a nih chuan a hma hun a chhe lutuk tlat, rethei tak leh hrehawm taka awm turin ka naute pawh hi ka phal chuang lo, keimah anga mal taka awm tur phei chuan ka phallo lehzual.




“Min kap ta che, ka hlau ther tê lo, i bula awm ai chuan thih pawh ka thlang zâwk. Ka lo hmangaih hman che erawh keimah ngei pawh hi ka in hua, mipa tenawm ber i ni, ka mipa tawn tawh zîngah nang anga sual leh nunrawng hmangaih phulo hi ka la tawng lo, a hmangaih phu lo ber ka hmangaih che pawh hi ka inhua” tiin ka phun chhuak sapa.




“Hmet puak rawh, thih hi ka tân a nuam zâwk. Ka hahdam thei tawh bawk ang” tihmakin ka mit ka chhinga, thih in peih zet chuan a ni ka hmachhawn ni.




Mahse silai ri ka hre mai lova, chu ai chuan ka pum rawn chûl tu an awm a, ka chala rawn fâwp tu nên, ka men chhuah rualin Dominic-a mitmeng dam dup chu ka hmu nghala, mak ka ti zâwk.




Min thah duh ngawih ngawih tu hmêl kha a bo a, tûna ka hmuh erawh Dominic-a mize ṭha lam zâwk a ni, ka hmuiah chuan a rawn fâwp a, kei erawh che châng lovin ka ding khawng reng ringawt.



“Min hmangaih a maw? Dâwt i sawi lo tiraw?” a rawn tihchuan ka chhâng lo, he mihring hian aipui leh aite a nei nimaiin ka hria, a duh loh zawngah a thinchhe em em a, a duh zâwngah erawh mi fel tâwp khâwk a ni leh thung si.



Biak pawh ka châk lo, kha thu kha engvanga sawi chhuak nge ka nih tih pawh ka hre hek lo “Tunah chuan engmah ka sawi peih tawhlo, bialnu i nei tawh. Kei nên kan inkar chu tâwp rawh se, min tibuai tawh suh. Ka chungah engpawh tila ka pawisa tawh lo ka tih kha, ka dam chhûnga ka nat theihna tur phâk bâka na ka tuar tawha, nat leh chuanna tur ka nei tawh lo” tiin a kut chu ka laksawn saka.




Kal mai ka tum lai chuan phal hauh lo hian min pawm beta “Lilia innei ang” a tihte chuan lâwmna ka neilo, chu ai chuan thinrimna leh huatna in ka khat tawh zâwk.


.“Nilo e nang nên hian inzawmna kan nei theilo, kan unaute ve ve kan inthahsak tawh avâng pawh hian awm dun hi kan tih tur a nilo, min kalsan la. Hmangaih dang nei zawk rawh, i zia hi keichuan ka tuar thei tawh lo, min dawhtheihna leh hriatthiamna i nei ngai lova, ka thusawi avâng khân kan inkar khi hi a siam ṭhat theih tawh loh bawk. Kan pahnih chuan tihian tawp ang” ka tileh sepa, ka sawi zâwng te chuan ka na em em thung.




Mahse hetiang ringawt chuan ka awm pui theilo, a duh duh hunah min thinrim khum anga, a duh duh hunah min duat leh ang maw? Chutiang reng tur chuan ka duh velo “Lilia alfero” a rawn ti deuh hrawka, ka ding dat nâng in a lam chu ka hawi duh hauh lo thung.




“I duh i thlang tawh Dominic, min hmangaih lo” ka tih lai chuan bungraw vawm chhe ri ka hre zuia, Dominic-a chu a au tuar bawk. Engvanga thinchhe em em nge maw a nih le, thinbutut a nei ni ngeiin ka hre tawha, hlat ngei ka duh takzet.


Ka thih hma loh chuan min kal tir dâwn lo tih pawh ka hria “Ka kaltîr dâwn hauh lo che a nia” a rawn ti zuia, engmah ka sawi duh lêm lo, chhân pawh ka châk lo. Buaina dang a tam mai mai, ka room lam chu ka pan hnak hnaka, inrem taka awm hi ka duhlo a ni bik reng reng lo, mahsela a mizia chhelai hi a siam ṭha lo a nih chuan engtikah mah hlim takin kan awm thei tak tak dawn lo.




Ngaihdam min dîl turin ka duh bawk, chuti nilo a hetiang renga kan inkar awm tur chuan nupa pawh ni tehreng ila engtikah mah kan hlim ngai lovang.




Ka khumah chuan mu thla in ka in ngaihtuah neuh neuha, ka timah mah em tihchu ka in zâwt a, mahsela ka chunga a chêt dân ngaihtuah chuan ka la ti mah mah lo zâwk tiin ka nui saka, ka unaupa leh ka ṭhiannu phuba chu ka la ṭan mêk niin ka ngai bawk.



Tûnah chuan ka duh ang ngeiin keimah avângin a tâl buai ta takzet ta tih lah ka hai lo, ka tichhe vek dâwn a ni. Ka hmangaih, mahsela ka hmangaihna avângin ka chunga a thil tih te kha ka theihnghilh ngai rêng rêng lo, ka tum ang ngeiin min hmangaiha, tûnah hian keimah avângin ana ngei bawk.




Nui sakin ka khumah chuan ka mu zui than a, damlai hremhmun awmzia chu a tem ve ngei tur a ni, amah hi ka that lo a nih chuan keimah hi ka thih ngei ngei a ngai, chutilo chu engtikah mah kan inkar a ṭha thei dâwn lo.



Zînga ka harh chuan ka bulah mu an awm tih hriat takin kut lianpui hian min lo kuah rûn a, Dominic-a tih ka hre nghal. Nizânah khân khatiang khan kan awma, engtin nge tûnah ka bulah a mut theih zâwk.



Awmsawn mai ka tum chu a lo harh sa nge nghet zet hian min man chata, alam chu ka hawi nghal ran bawk.



“Nau i pai tih kha a dik em?” a rawn tihchuan ka chhâng mai lo, rawn inbeng khalhin ka chungah chuan a rawn bawk zuia.



“Lilia nau i pai tihkha a dik em ka tih chu ka zawhna min chhâng rawh” a rawn tileha “I ngaih pawimawh hauh loh kha, chu chu enga tâna tinge i nih? Min ngaihsak hleinem, dik pawh nise engtia tih nge i tum?” tiin awmsawn ka tuma, a theih tlat loh.



Rawn kûn hniamin ka hmuiah chuan a fâwp vang vanga, namsawn pawh ka tum tawh chuang lo. Hepa hian mize engzât zo zai nge a neih dawn ni “Ka tihpalh,min hnawl kha na ka ti êm a, ka nupui ni ngei tura ka duh lai che in engmah i sawi duh bawk siloa, ka thin rim a nihkha, a hma in hetiang chiah hian hnâwl ka lo ni tawha, engkim hian hlauhthâwnna min pe a ni ber tawh, ka hmeichhe rin leh hmangaih em em in min phatsanin min thah a tuma” tiin a nui suka, tû a sawina nge ka hre hauhlo.




“Nangmah ang chiaha duhawm a ni a, ka hmangaih a engkim kha pêk ka duh a niber mai. Mahsela bum hmang mai a ni, min thah a lo tum renga, min kâp rêng bawk, mahsela tûn thleng ka la dam chu a nih hi, min kahna avâng khân hmeichhia ka hmuh dân te, ka mizia engkim ka hlauh a ni ber mai, i chunga râwng taka ka chêt ṭhin chhan pawh a ni,ka lu ah hian hliam ka tuar a, ka buai ṭhin bawk” a tihchuan mak ti deuh tak hian ka ena, chutiang chu ka hre ngai hauhlo, Alfred-a khân a u chanchin hi a sawi ngai vak lo miaua.




“A ni leh keichuan enge inzawmna kan neih?” ka tihlai chuan a khi suk mai “A chhan chu khanu ang tho khân min thah i duh ani” a ti chu ka en kâwk mai, engtin nge a hriat theih? Ka thusawi a hre ru nge ka awmdân aṭangin a hria ni zâwk ang.




Mak ti deuh taka ka en lai chuan za lo tak hian a ṭhen saka “Lilia min thah emaw min tihnat emaw i duh avânga min hnaih i ni tih hi ka hai reng reng hleinem, i awmdân te ka laka i chêt dân zawng zawng te hi ngaihtuah la, min duh tak tak silo a min hnaih luih tlat chhan te hi ka hai bik hleinem, i unaupa phuba lâk i duh avânga ka bula la awm lui leh min duh ang taka awm i ni bawk” a rawn ti dam dapa.




Tûnah hi chuan sawi mai tur ka hrelo, a thusawi chu a dik chiah bawk. Mahsela hriat loh a nei, chu chu ka hmangaih tih kha dâwt a ni hauh lo, chutihrual erawhin ka huatna erawh a la ngai reng thung.



Thâwk la hakin ka hawisawn dâwn a a phal hauh lo “I tum hi ka hria a sin, i duh chuan tûnah hian min thah theihna hun ka pe ang che. Min hua tiraw? Tûnah hian min that thei ang, ka dang hauh lovang che, ka hmangaihna che i ringhlel tiraw? Tûnah hian i fiah thei ang” tiin a silai chu min rawn pe a, phâwk zetin ka en thung.




A chêt dân hian min ṭhawng thut thut reng chu a nih hi, kan mut ngai reng chuan kan la mu a, keipawhin engmah tih nachâng ka hre mai lo, ka kuta pistol awm chu ka en vung vunga. Kah pawh ka tum chuang lo, a chêt dân hian mak min tih tir êma, engtia han tih tur nge ka hre mai lo tlat a ni.




“Min kap ta che, keipawhin buai reng hi ka ning ta e, nun hi ka thlahlel bik viau lo ania Lilia, i phuba chu la la min that zâwk mai rawh” a tihchuan ka ngawi renga, engmah ka la ti chuang lo. Engvangin nge tûnah hetianga a awm? A chêt dân engkim hian min ṭhawng dawt dawt reng a nih hi, a mitah tak chuan ka ena, min lo en ve reng bawk.




A mitmengah chuan hlauhna pawh a neilo, ka chêt dân ngaichâng tih hriat lutuk hian keimah ah chuan a mit a fu ngar ngar bawk.



Kah ka tuma, ka thei tlat lo, tual thah chu ka ngam ngang lo a ni. A silai chu ka pe ta zâwk a, a kâwngah kuahin a âwmah hmai ka phûm ta ringawta, tûna thil thleng khân min ti hlauthâwng in min ti hamhaih bawk nên ka thâwk thlengin a ranga, ka sa pup pup bawk..




Khatianga a rawn tih kha ka ring lo lutuka, min ṭhawng dawt dawt a ni ber mai. A ni pawh chu a thaw chhuak suai suaia, ka hnungah rawn kuah ve in nghet zet chuan a âwmah chuan min kuah bet zuia




“Tunah chuan ṭha taka awm i tum teh ang, in nghirngho leh in phatsanna tel tawh lovin, kan pahnih hma hun tur ngaihtuah zâwk teh ang” a rawn ti a, ka la chhâng chuanglo. Ka duh chiah em pawh ka hrelo, mahse ka hnial em em lo bawk.




Mit chhingin a âwmah chuan ka nawr ṭawk a, a thusawi chu a timai mai lo tih ka hre bawk nên ka in ngaihtuah buai viau mai. Tûnah ngaidam ta ila a hma ang khân awm leh si ta ila keimah bawk a tuar tu tur ka ni tih lah ka hai bik lova, Dominic-a hian ka rilru a ti buai takzet a ni.




“Lilia bul ṭan ve dawn ang hmiang, in hauhna, thinrimna leh kut thawh tel tawh lovin hmangaihna nên in en tum tawh ang hmiang, kan hun kal tawh kha in theihnghilh sak tum chungin kan fa lo piang mai tur nên hian hmalam pan tum ila” tiin ka dulah chuan a rawn chelh zuia, chu chuan min ti phu deuh zawk mai.



Ka dul a khawih rual chuan engtin emaw tak hian feelings ka neia, nuam tihna riau ka nei bawk. Vawi tam tak lo in ti hrehawm a, in hau vak kan ni tih pawh a hriat theih tawh loh, a kut chu ka vawn hnana, thâwk ka la hak bawk.



“Ka chungah i thinrim tawh lo ang tih min tiam la, hmeichhe dang te in sawisak tih vêl kha awm tawh bawk suh se, chung chu i tiam thei em?” tiin dâk chhuakin a mah chu ka ena, min chhâng ngei sela ka duh bawk.




“Ka tiam a che, nangmah chauh i ni tawh ang. Kur ka thlâk avâng che khân min ngaidam dawn a nia, ka sawi tawh ang khân ka nunhluiah khatiang khân ka lo tuar tawha, hmeichhia han rin mai hi ka harsat tawh. Khatianga ka tilo che a nih chuan hnunglam aṭanga min kah ve duh mai ka ringa“ tiin a khi suka, chu a hmeichhe hmangaih ṭhin chu ka hmu châk ve takzet bawk.




“I hmeichhe hmangaih chu tûnah ala dam em?” ka tihchuan a nui leh suka, a ngawi deuh rauh rauh bawk. Min chhâng tawh dâwn lo emaw ka tih hnuah “A thi tawh, ka that” a ti ringawta, engmah a sawi zawm tawh loh avâng chuan ka zâwt tawh biklo. Hepa hian ka hriat loh hian eng thurûk zozai nge a neih ang tih pawh ka ring thiamlo zâwk.