Thinlung BY Kimkimi tlau (Completed)

[ngaia]

Mathewa pawm chungin room aṭang chuan ka chhuak a, kanin chu nidang zawng aiin thawm atam a, Sitting room lamah chuan an bengchheng zual deuhin kahria, Mathewa lahin ka nghawngah kuah ṭaiin ka darah alu anghat a, a awm zawi reuh lutuk. Sitting room lam chu thawm atam lutuka Inleng kan ngah ve deuh aniang, Choka lamah ka kal ta zawka, Choka ah chuan U Nguri alo awma, rin loh deuhin U Faki pawh alo awm ve bawka, choka ah ka hmu khata mak kati angreng.

" Kan Baby Mathewa chu A-ni angai hle mai maw " U Nguri'n atih hlut pawh chuan Mathewa chu a chechang miahlo a, " A muhil dawn aniang " tiin ka inher a, " Anih kha a chhing diar diar mai " Nui hak hak chungin U Nguri chuan ati a, " U Mama'n alo hruai emni? " ka tih chuan "Aw, kalna tur kanei a, lo awm rih rawhse Saii a buai thei si alo ti a " ati a, ka lu kabu nghat nghat.


Puakpuan awm heklo le Mathewa chu shawl in ka paw ta ringawt a, U Nguri a rit tawh si a, eirawng chu ka bawl paha, " Matei chu chhangchhenu nih i thiam dawn tlat " U Hlua'n ati deuh seka, U Nguri'n lo belhchhah vat zelin an nupa chuan min nuih chiam zela, an ninawm nupa tak tak ani. U Faki pawn Bawihtei a infiampui ve a, room lamah awm in an reh thei viau a, Bawihtei tal alo ngaina ve chu atihzia tak tak ani, Eirawngbawl a peih silo a, asawi ang tak takin chaw hmeh hi a siam thiam hlawllo a, a bawkbawn bai vete hi a khawng fuk zel a, a artui kan nise a al lai bik a awm ziaha, chaw hmeh sawisel ngailo leh engpawh siam ila 'Aṭha lutuk, hei bak bak' ti thei zel ṭhin Kapa takngial pawn 'Faki eirawngbawl eitur chuan hrisel ṭhat angai emai' ati hial a. U Faki pawn huat ah ala chuanglo, a siam tuilo tih a in hre ve miau a, eirawngbawl lah a nin zawng tak ani lehzel a, eirawngbawl ai chuan ram kal pawh a duh zawk ṭhin.


Kan chaw ei chu nidang anglo takin kan ri ve chel chul a, kanu pawn a tute chu a be sawm peihin a duat a, Mathewa chaw ei pawh chu amah vekin a buaipui a, ka buai ve angailo reng reng. Bawihtei erawh a felfai thlapa minti buai zawngin a khawsa velo hrim hrim a, a nungchang ṭha lutuk chu kan khawngaih hlawm aniang chaw hmeh kan suah sak khat tawk reng a, "Ka fanu ei ṭeuh rawh aw, i patea hian i ei tui loh ka hlau teh ania " tiin Mampuia ari hlut zela, Bawihtei te unau avang hian a inla upa ve sawt a ' In Patea ka nih hi ' ati sek a, a sawi zing lutuk chu Bawihtei pawn "Patea chu keini ai pawn i naupangchhia zawk " ati nghe nghea, a inlak upat vei nen Mampuia alawmlo teh asin.


Chaw eina hmun hnawk vel ka tihfe hnuah khawhar in kal turin ka insiam a, in chei vak angailo bawka ka inpeih har hranlo a, ka lu rit bur chu ala reh thei meuhlo ani. Chet vel pawh chu minti nuamlo riau a, nachhawkna ei mai angaih karing. Ka inpeih hnuah room aṭangin ka chhuak a, tumah pawh be lemlo in damdawi kan dahna lam ka pan a, nachhawkna ka kheh rak rak lai chu kapa'n minlo hmu a "Mate, i nuamsam meuh nange " tiin minlo dinchilh a, "kalu hi arit deuh luk a, chutia nuamlo em em chu ka nilo " kati maia, ka nuih lui var var bawk.

" Kallo maita che, i u Faki kal maise nuamlo chung chunga kal chu itan pawh a hreawm ang " atih leh laiin "A tlaivar vang anihkha, khatiang lek pawh in mutpui zel chuan a buaithlak " Kanu'n alo ti hlak hlaka, a ngaihsakna beisei lo mahila chuti kher khera min ti chu rilru tihnat nan hmang duhlo hle mahila ana tho. U Faki chu nise a phi leh chung tawh anga, a buaipui leh chuk chuk tawh ang tih kahria a, U Faki nen kan inkar zau lutuk leh kanu laka kan chanvo inthlau lutuk chu hrechhuak thar lehin mahni in khawngaihna chuan min fan kual raih raih a, A fanu te ve ve chunga kanu rilru puthmang hi dawnsawn ahar kati ngawih ngawih.

" Lo ngawi mai mai rawh " Lungawi lo zeta kapa'n atih chuan kanu ater leh nghal at a, in hnial cho fe a kapa nen kan dinna lam lo hawiin " Lo ṭan ziah suh, ṭan bik i nei tlat hi alawm buaithlak " ati hlar a, ka nuih aza lek lek hial ani. Kapa'n in sehruh ṭeuha kanu chhanlet atum lai chuan kawngka anlo kik a, kapa pawn engmah asawi talo. " Lo lut rawh u " U Nguri'n ati a, An awm ve tih kalo hre leh tawhlo reng reng. Kawngka chu lo in hawngin U Mafela alo lang nghal zata, kan lo en ṭhup chu mak ati deuh nge lo lut mailo in min en kuala, lai hmel a pu deuh.

Ṭawng tuma ka an zuau laiin kapa'n " Lokal rawh Mafel" tiin minlo ṭawng khalh a, U Mafela chu kalo nuih var var ringawt. " Khar duh tawh suh " Kawngka khar leh atum laia kalo tih chuan a posi alai viau a, " Kan kal nghal dawn mi? " a che lai lutuk chu ka khawngaih deuha, ka pan hnai sawk sawka, Hnunglamah U Nguri'n min nuih char char tih pawh kahria.

" I hman ami? " A bula ka din ve rual chuan alo ti a, "Umm kal maiang, atlai tawh angreng a, haw hunah thingpui chu i in mai dawn nia " kati zung zunga, " Aṭha alawm " atih laiin " Mafel, thingpui i in hmanlo emni?" U Nguri'n alo ti a, " Hotunu hian kal maiang ati si a, kan kal rih maiang " Atih let chuan ka ner nanga, kapa a awm vereng bawk nen ka zak lutuk ringawt.

" Ke in ami ilokal " Pawna kan chhuah hnuah kati a, min chhang mai lovin kan in sir lam chu a kawk va a, hawi ve vatin " eee" kati hliai a, a bike alo in hung reng tak alawm. Kanu te nen khan kanlo inhau thui leh hman lutuka bike thawm ka hrelo reng reng. " Nichin kha i zak em? Hreawm iti viau lo maw? " Hmanhmawh vaklo chuan Kan kal dun a, ruah asur seng seng reng avangin nihliap ka kenga, nihliap khum nan em chuan a sit awm leh deuh sia, khaw awmdan chu a ngeiawm tak tak ani. " Ka laka i lungawi lohna min thungrul emaw kati mai asin " pawisawilo deuha atih chuan ka ner nanga, kawtlai eng vaklo hnuaia kal kan nih avangin U Mafela chuan ka ner chhe lutuk chu min hmu kherlo ang.


" Chutiangin i ngai tih hria ila lo chhuahpui thawt thawt loh tur che ania, i hming hi thlak ila Lallungawitheizela ni tawh ang che" Kati ve ta hlaka, ka ṭawng duhthawhin ka sawi tam bawka ka sawi zaah meuh chuan am zeta thawk lak angai. " Boruak i hak ang e Bawihi" Dam dupa alo la ti chu ka ngei tur tawk hi atling lutuka, " I hneawm, i hreawm hlau in ka ngaihsak che a, in aṭangin ka chhuahpui vat lai che in nang lah " ti hlarin ka sawichhunzawm duhlo a, kan awmna in zir miau heklo le.


" Tunlai chu ngaihdam dil hmasak i ngai leh tawh tih ka hre chiah " Tiin kal pah chuan ka lamah alo kun hnai deuha ka hmuh theih turin ala nui suk zui. " Kal maiteh a " pawr deuha ka tih laiin Ramthianghlima te'n minlo fin veleh a, he mite pawh hian ka lung anla ti awi lo hrim hrim. Kan bula anlo kal bengchheng ve pawh chu kalo be lemlo a, thla khata rilru tet zual lai bik kha ani miau a, U Mafela zawkin alo be sawm peih a, ka ai a awh ti ila adik ber ang chu.

" Nangte hi i lungawi lo emni? " Thianga chuan ka darah min sawi nawk pahin ati a, " Kal teh " Ka tih hlak chuan fiamthu ka thawh ta emaw tih maitur in an nui huk hlawma, " Tunlai chu fiam adawl vaklo " U Mafela'n atih chuan Thianga a nui uar fal a. " Hmeichhe ho buaithlak zia hi chu aw, ka nau nupui ka hnawtchhuaka keipawh ka buai lutuk " Vei neilo zet hian ati zat zata, " Enga!" Phawk zeta ka tih chuan Erica te chu anlo nui huka, " Bialnu ṭhen lai laiin alo phun vesek a, anpa a zah lo bawk nen a chhang let zat zat a, ka ning lutuk khan 'Ar chhuah in chhuak rawh ' kati a, a hrethiamlo aniang thim thleng pawn alo haw silo a, kan va ko anih hi abuaithlak asin aw, bialnu ṭhen rilru nat lai pawn ka nau nupui ka ko a, ka chhel asin" ati zawt zawta a tawp lama a inla khawngaihthlak kual vel chu ka ner khum nang nanga, hepa hi chu amak ve thlawt. Thianga hi chuan awmlo deuh deuh hi ati leh khut zela, khawchin leh nau chin bakah Thianga chin hi chu hriatthiam ahar.


" Ar chhuah a chhuah chu eng nge awmzia " Ka tih leh chuan "Mawl lian" ati hluka, " I mawl fe zawk aw, tinge i nau nupui pawh i hnawhchhuah reng reng, neih tur hmu zo ve manglo hian i nau nupui hi i ti duhdah lutuk " kati hlak hlak a, kal tumna nei kan ni a, din reng chi ni heklo le zawi muangin kan kal pah a. " Ar hi zingah i chhuah a, tlaiah anlo haw leh ṭhin ani lawmni? Ar chhuaha chhuah chu zinga chhuah a, tlaia haw leh animai " ti bul bulin "Bialnu te hi kanei mai mai biklo a, nupui tur atan a duhthusamte hi kan ngaizawng ve ṭhina, kan duhthusamte duhthusam kan ni velo lai tak hi abuaithlak " atih zawm a, kan nui ho dar dar mai.

" Chu I nau nupui chu i Ko haw thei em? " U Mafela'n atih chuan " Dawn lawm ni? Anpa nen in chhaih nui uar uar in an haw tawh kha " ati leh puata, hepa hi chu aw, a va hahthlak bet bet tak. Angaihi te in kan thlen chuan kan pensan a, lut ve tura ka sawm chuan " Ṭhutna ṭha kan changlo palh ang " tiin an kal lui tlata, pathum lek si an bengchheng tak tak ani.

Angaihi te chu anlo ri ve le lu a, naupang pahnih in hlei rual ve ve an awm ve bawka bengchheng viau tur pawh anni. Angaihi vahnu Sarahi chu a ṭap al al renga, a vahpa Sangsanga lah in chhungah chuan cycle khalh kualin a buai ve khawp mai. In chhungah chuan la lut kherlo mahila an awmdan leh an thawm chu pawn aṭang chuan ka hmu in ka hrethei a, an thawm chu pawn aṭangin ngaihthlak anuam tawk vel ani.

" Pawnah hian kan nghak mai dawn mi Lallungawitheipa " Thlek zeuh paha Ka ti kher chu lawmlo tih hriat zet hian aphun hluka, " Chimawm viau lo teh " atih laiin in chhung aṭangin Angaihi U alo chhuak a, an in kawt maia kan lo awm min hmu chu mak ati ve deuh aniang ading data "Kimi, in chhungah lut ta che u " ati vara, " Aw, kanlo thleng chiaha lo luh kan tum mek " ka tih ruala U Mafela nui suk ri ka hriat chuan ka melh rawm a, ka melh rum vang nge nuihza insum hmel hi a pu.

" Kan Angaihi hi chu arei thei ania, han tur rawh u, zanin chu kan zai rei lovang kal khawm hma tur " ti bawrh bawrhin " Mafel, Kan Lalnunkimi chu abuaithlak viau lo maw" nui ruh ruh chung hian atih zawm leh a, U Jeromea hian eng nge maw ahriat le. " Min ti thlaphang ṭhin khawp mai " Ti a U Mafela'n a chhan chuan U Jeromea chu anui huka, an va han ngeiawm dun tak. " Lalkhawngaihi nen hian mipa hi an ngainep teh ania " atih leh zet hnuah min kalsan a, melh rum zui viau mahila awmzia a awm vaklo.

" I lu ahai vek ang " Ti thum dutin ka darah a kuah a, in chhungah chuan min hruai lut a, " A-ni, eng nge intih dawn " In chhunga kan lut chu Cycle khalh kual chungin Sangsanga chuan alo ti a, henau hi chu a polite asin. Kan kalna tur velte chu ka hrilh a, inla hrethiam zetin abu lap lap a, anui pah sen sen bawk. Sarahi erawh chu ala ṭap bang miahlo a, a aw rawl aṭha bawk nen, aṭap thawm chuan ka beng ati khat nghal mup in ka hria.

Ṭhutthleng awl ah chuan kan ṭhu a, "Sangsang, A-ni Angaihi va ko rawh " Ka tih chuan bu nghatin cycle aṭang chuan achhuk a, ani room lamah chuan atlan phei nghal chan chan a, Sangsanga tlanna lam ka en reng lai chuan kan ṭhutna aṭanga room hnai ber U Zosanga (Angaihi u nupui nei ) te room aṭang chuan inhnial thawm hi a awm a. Kan luh tirh aṭang khan ka hre tawh, an ṭawng ring lemlo na a, an in hau ngei chuan kahria, U Mafela chu ka melh zawka ani pawn min lo melh ve kura tawitea ka nuih chuan amit ko min san khum ak a, "Pawn ah kan awm leh zawk dawn mi? " ka tih sar sar laiin "Ngawi hmak rawh, min chhang zawt zawt suh " mipa aw chang bawl hi ka hria a, ka phu zawk thei mawle, U Mafela chu phawk zet hian ka en a ani erawh alo danglam miahlo.

" Duh leh ka ṭawng ang i duh duh danin min awmtir tum suh" U Mawii chuan a chhanglet zat zata, mi in hau laia lo ṭhut ve kur chu nuamlo kati takzet. Rilru nuamlo deuha ka awm lai chuan Angaihi thawm ka hria a, ka hahdam nghal huai huai mai. " Dawih reuh lutuk " Ka beng bulah alo phun sup a, aṭawng zawnga a ka aṭanga boruak lo chhuak avang chuan ka beng kawm chu a lum hak a, ka ring ka thle kawi nghal chaih mai.

" Lawmsangpui, i cycle kha a hmunah dah la, i nu te room ah va lut rawh " Ati vin hlak hlaka, a vahpa lah in a hlau derlo a, cycle chu ala khalh kual tho, " I va han luhlul e aw, Sarahi lah chu i ṭap bengchheng sia " ti hlak hlakin asam chu a ṭawn pah mawlh mawlh a, a chezia vel chu U Mafela nen chuan kanlo nuih tet tet a, ka ṭhiannu hi chu a thin hi a chhe ve asin, nula zaidam tak chu anilo chiang alawm.

" Malsawm, i inpeih dawn tawh em? " Ti a au leh lang langin Room aṭang chuan " I inpeih hma in ka inpeih tawh" Malsawmi'n alo ti a, Room aṭangin alo chhuak nghal bawka, U Mafela nen min hmuh chuan min nuih sen sen a, amah zawk chu a lai in kahria. Kan kal dawn thleng chuan U Zosanga te chu anla inhau a, " Ka beng maiang che min chhang sek suh " U Zosanga'n atih laiin bat zat hian "Duh leh min beng la, ka tello a awm thei hleilo che inla pa ve vak suh, ka chhuahsan leh mai ang che " U Mawii'n ati pang pang a, a sawi zawh rualin thil ri ṭhawk a awma, U Mawii ṭe ṭhat thawmin azui a " Min vo ve khanglang alaw " ati khur khura, Kan chhuah tak avangin an thawm chu kan hre zui tawhlo.


Angaihi a phun hlak hlak laiin Malsawmi erawh angawi renga, U Mafela chu a zah ve deuh ani maithei, Khawhar in kal ve tur dangte nen a kan kalrual takah chuan Angaihi pawh angawi veta a, kan ruala kal vete chu titi puiin anui leh uar uar tawh a, a ze inthlak kual chak lutuk chu U Mafela pawn mak ati ngang aniang athlek vung vung mai.


Khawharin kan thlen chuan anlo zai ṭan tawh a, In chu a te deuh bawka anlo ṭhu khat deuh titih tawh a, Pawna YMA hruaitute lo awm chuan " hmeichhe lam kha zu lut ula ṭhutna a awl " Anlo ti zung zung a, U Mafela chu ka en zauh a, lo kun hniam in " Kal rawh u, Pawn ah kanlo awm ang e "Ka beng bulah alo ti sup a, ka buk nghat rualin anui suk a, ding mar vutin ka hnungah chuan nalo te hian anam a, midangin anlo biakna chu chhang dut dutin Angaihi'n ' Lut ila ' ti a min pawh takah chuan in chhungah kan luhsan a. Khua anuam silo a, pawna a awm tur chu ka khawngaih reuh mange, midang pawh an awm ve dawn na chungin U Mafela erawh ka Thinlung in a thlan tawh leh bik nihna apek tawh mipa ani a, midang nen chuan ka ngaihtuah dan a in ang theilo hrim hrim.

A hma lam chiah chu awl a awm tawh avangin kan ṭhu a, langsar deuha ṭhut hi chu anuam ka ti theilo reng reng, ṭang ṭung in kaṭhu a, ka inthlahdul leh theih hunah chuan ka taksa hi a kham ṭun in ka ring ani. Ṭhalai kal kan ṭha a; Ka sawi tawh ang khan Chhiat ni ah hi chuan kan in lungrual a, Mi in chhiat an tawh laia in a lo awm mai mai kha thil zahthlak takah ngaiin, in a lo awm mai mai nih kan duh ngailo a, Kan in ṭawiawm ṭha ṭhin lutuk. Thingtlang nih nawmna ani ve a, khawpuiah chuan mitin an buai ṭheuh a, Thingtlanga kan in ngaihsak ang hian an in ngaihsak hman tawhlo a, an tihtur zo takin an hlen a, abakah erawh an mahni buai buaiin an buai a, thingtlang lama in ngaihsak tak a kan in lenpui zantin ang kha an hmanlo a, an demawm em em na chu ka hre chuanglo.

Hla hnih kan zai tawh ang tih ah ka phone chu alo vibrate chur chura, ka en chuan number hlang hi ani a, kan awmna hmun in a zir lo bawk nen ka ring ral tir ṭhak a, a tawp rualin alo vibrate lehnghal a, Number ngai bawk ani a, ka awm anuam tawhlo khawp mai. kan hla zai pawh chu rilru ah alut thei tawhlo a, tunge ni ang tih ka ring thiamlo a, thil pawimawh ani angem tih ngaihtuahin ka buai ru viau thunga, ka la ta chuanglo. a tawp ruala alo tih leh ṭhin avang chuan " Call ka chhang lawk dawn aw " Angaihi bulah kati a, ring zeta zai al al chungin abu nghata, heti zat zat minlo call anih chuan a pawimawh hle turah ka ngaia, ka tih loh dan deuhin Khawharin ah call chhang turin ka chhuah phah a, thil ho deuh anih leh si chuan ka thinrim viau ang.

In chhung aṭanga ka chhuak chu Pawna lo awm ho chuan min en deuh ṭhap tih ka hria a, ka zak lutuk a tumah pawh chu ka en ngamlo hrim hrim, in sir thim chin chu ka pan a, call chu ka chhang nghal bawk. " Hello " kati hmak ṭawk tih ah " Kimi, keimah I nu Rengi, tunah i u te in ah lokal rawh u, hei kan buai lutuk ania " Hlauhthawn hmel zet hian alo ti a, ka thinphu arang nghal dawt dawt thei. Nu Rengi hi ka u te ṭhenawm lawk ani a, dawt min hrilh chu ringlo mahila athusawi awmzia chu ka hrethiam hlawllo. "Nu Reng, eng nge awmzia " ka tih chuan " I u hi athinrim lutuk, kan bengdai thei lovang, Rinhlua ka call a a chhang thei silo a, zawhna in zawh chiam hun pawh anilo, Rinhlua ahman loh pawn midang i ṭhiante emaw lo hruaila lokal vat rawh u" Mangang zet hian alo ti leh zung zunga, a ṭawng buai nuai leh athilsawi zozai te chuan minti mangang chhiava ani.

U Mama chu a zin in ka hre si a, a zin dawn avangin a fate pawh kan in ah alo dah a, ' Saii abuai thei si ' ati anihkha. Anih chuan tunah khan Nu Rengi khan 'I u athinrim' ati bawk si a thil thleng chu kavan hrethiamlo em aw..tuna tana ka tih tur erawh ka hrechiang ani, ka u te in ah ka kal angai; Mahse, U Rinhlua'n Keyboard atum a, tihbuai chi ani silo a, ka rilru buai zet avang chuan thawk kala kawk a, ka mit ka chhin vang vang rualin U Mafela ka ngaihtuah chhuak zawka, duhthlan tur ka neilo. Hmanhmawh deuhin anlo ṭhut khawmna lam chu ka pana, in chhunga an zai chu zawmin anlo bass ve nasa hlawma. Thianga te ho pawh kun deuh chha chungin an aw anti thum ve nasa mai, ka kal pelh avangin an aw ti thum chawp chu ka hrechiang viau ani, An bass dan chu a dik em em pawn ka hrelo, an ti thum ve mai mai ani.

U Mafela chu a hnunglam ah aṭhu a, Midang chu YMA ṭhutthlengah an ṭhut laiin U Joe nen chuan ahnung ah an pahnih chauh chuan chair ah lo ṭhu bika. A sira ka din rualin U Mafela chuan min melh chho vut a, U Joe chuan minlo ngaihvenlo niin ka hria. " Ka u te in ah min kalpui lawk la " Kum hniam deuhin kati a, inthunun viau mahila ka aw khur dar dar chu ahriat tho karing, ka hlauthawng lutuk a, ka hmel landan chu thunun hram mahila ka aw chu ka thunun thei biklo ani.

Min en vung vungin abu nghata, zawhna min zawt miahlo chu ka lawm khawp mai, chhanna ṭha ka nei rihlo a, tunah rih chuan engmah ka hrethiam biklo. U Joe chu a bekbawr zeuh a, kei erawh kal turin ka inher a, ka pensawn rualin ka hnungah minlo zui ve nghal tih ka hria.

Ke in kan in thleng kan kal a, ka rilru buai zet chu a hrethiam aniang min be buailo a, in khat na lai kan kal chang chuan ka kut alo vuan leh ṭhin a, ṭawngkamin sawi kherlo mahse, min hnem viau mai. Kan in kan thlen chuan in chhungah pawh lut lovin a bike chuan ka u te in lam kan pan leh vang vanga, kan hnaih telh telh avang chu nge ka thinphu a rang telh telh a, awmdan tur hrelo in U Mafela Jacket tlang chu ka hmer ngawt ngawt ṭhin.


Ka u te in zawnah bike a tih din rualin ka chhuak nghala, In chhunga luh nghal mai ka tum chu " Bawihi, fimkhur rawh " U Mafela'n atih avang chuan ka ding leh rih a, kawngka in hawng huau aṭanga thinrim in hrosa thawm leh hmeichhe ṭawng zat zat thawm lo chhuak chuan ka kawchhung hi a hrawm bawrh bawh ni maiin ka hria. In bengdai tura in khap thawm a awm bawka, pawn aṭang chuan in chhunga thil thleng chu hmuh theih pawh anilo.

" Kal ang le " Dam dapa tiin ka kutah U Mafela'n alo chelh a, min kalpui rualin ka ke chu ka pen ve a, thawm pawh a chiang zual ta viau bawk. " Ngawi hmak rawh Ka that duh maiang che " In chhunga kan pen luh rualin Ka u aw hriam hrak ka hre nghala, ka tim chawih rualin ka kut chelhtu chuan ahmer nghet salh a, U Mafela nena kan inzui lut chu in chhunga lo awmte chuan minlo ngaihvenlo a, amak Kati hranlo.

U Mama chu bangah Patling pahnih hian an lo nambet a, U Saii chu Nu Rengi'n U Mama te piah deuhah alo dinpui a, Zirtirtu Zara pawh pawr fapin alo ding ve bawka, an buaian chu ka hrethiam ṭanin kahria. Nghet lo zeta ka ding chu U Mafela'n ka darah min kuah a, a tha ringin ka ding anih ber chu, " In bengdai rawh Mama " U Mama chelhtu pakhat zawk chuan ati dam thluam a, U Mama chuan na zet in thawk ala hrawk hrawka, in bengdai thei mai hmel hi a pu thlawtlo. U Saii chuan pir vah hian ka u chu a en a, a mitmeng a phelhphanga, ruih nei hmel hi a pu.

" I duh leh min that la ti nia, i pa pawn mi athat tawh tho a, i tan te chuan a harsa vak nang, nunna pawh hlut lo chhungkua " U Saii thusawi chuan minti nghing lawih a, Nu Rengi'n a khap na te chu eng atan mah angai hlawllo tih ahriat. U Mama chu a thinrim zual sauh a, Pahnih laiin chelh mahse, a tal thut vang chu aniang a tal pit puat a, U Mafela pawh a che chuak ve vata, kei erawh ka rinchhan ber a kalsawn vangin ka tlu lo chauh ani, U Mama chetdan leh U Saii ṭawngkam te chuan minti vai riai a, chutia awm tur chu ka nilo tih leh ka u avang pawha chhel taka hmachhawn tur kani tih in hria in ka insangmar a; Mahse, a har kava ti em! Ka u mita natna lang chhuak chu ka hmuhsak a, chu chuan minti tawt in minti hreawm ve ngawih ngawih ani.

" Saizampui nang hmeichhe lepchiah Uire lehnghal, min lova ngainep ve a, kan chhungkua chu ilo hmusit hle mai maw, Chhuak rawh chhuak nghal ang che, hmeichhe ṭenghneng lutuk " U Mama chu a ṭawng ring hranlo a, a aw erawh thinrim vang in a khur dawt dawt thung. "Ka chhuak awmlo emai, he in hi nangmah chauah i sak anilo aw, ka thawhchhuah atel ve a, ka chhuahna chhan tur ka hrelo, mipa dang ka mutpui lai pawh hmulo khan uire chhuah chuan min chhuahlo mai rawh. Mahni nupuite pawh ti hlim zo lo mipa nep lutuk i nihkha, i nep takzet, zantin i bula mut te hi e ka hne ngawih ngawih " Ka che phat a, engtik laiin nge abul chu kava thlen pawh ka in hrelo, Nui sawnga ka u en kar tu hmeichhia chu ka nam sawka, alo beisei lo nge a petek nawka, pan hnaih leh ka tum lai chuan Nu Rengi'n min lo pawt a, a ṭe chul bawk.

" I va zaklo ve Lalnunkim, kan buaina ah lo inrawlh suh" Ti paha min lo pan atum rualin Zartenawma chuan alo man bet ve a, an pahnih chuan ka ten ngawih ngawih. " A zahthlak emai, ṭha te te in thil sawi ang u " Patling lo awm ve pakhatin atih chuan "Sawi ṭhat tur a awmlo, Saizampuii kha a uire a, a uire na pa pawh khapa kha ani a, ka insum theih lai hian arang lamin in thiarfihlim rawh se " U Mama'n zawi fiah zetin ati a, nichina tal buan buan kha a ang tawh miahlo.

" Ka chhuak lovang, he in hi ka in anihhi, ka uire lai i hmulo a, uire ang chuan min puh theilo " Saizampuii chuan ala ti ṭang ṭanga, a zaktheilo lutuk chuan minti thinur takzet. Hmeichhia hi titak hian kanlo rapthlak thei ang tih ka ring phalo reng reng, ka hmeichhiatpui ani a, a chetphung engkim chu ka rap em em mai ani, ani aia rapthlak hi an awm leh thei tawh pawn ka ringlo.

" Thawmhnaw mumal pawh ha lo a, he ṭhutthleng ah ngei kha mipa nena inlo in bawh ur ur chung khan 'ka uire lo' ila ti fo dawn maw? Saizampui, Ka dawhtheih lai che hian chhuak la, ka fate hmuh ah leh ka hmuh ah hian lo inlan tawh suh. He in ah hian mamawh i ni tawhlo a, kei phei chuan mamawh tawhlo tak che kani, lawmna chang reng reng hrelo hmeichhia tih lawm hi ka bat anilo a, Pasal fanau te aia khawlai leh mipa dang thlang tu Nu leh nupui hi keini pafa za chuan kan mamawh lo tih i hre tawh dawn nia " Ka u aw chu hriat anuam tawh hle a, thinrimna nei tawh miah lo a ang.



In chhung chu areh tlawk tlawka, Patling pahnih leh Nu Rengi te nupa chuan min ṭinsan tawh a, Saizampuii pawh a chhungte ko in kan hruai haw tira, tikha chuan ka u in ah hian tihtur leh sawitur engmah anei ve tawhlo. U Mafela nen ka u chu kanla ṭhutpui a, ani erawh a mal ah akiu nghatin muk zet hian a ṭhu ngawi ran a, kan awm ve tih chu hria ang pawn a awmlo. Ka u chu ka en a, ka rilru hi ana vawng vawng a, hetiang thil rapthlak lutuk a tuar mai hi hriatthiam ahar kati lek lek a, keiin hriatthiam ahar kati anih chuan U Mama phei chuan hriatthiam har ati zual ngawt ang.

" Choka ah ṭhu phei ila " U Mafela hriat tham leka ring in kati a, haw chu kala tumlo. U Mama hi kalsan kala duh rihlo a, aṭul leh hetah ka riak maiang, " A pawilo " ti sup in ading a, choka ah chuan kan inzui lut a. U Mafela lakah pawh ka inthlahrung khawp mai, ani bak tihbuai ngam kanei miau lo a; Nilo, zawng ngat ila chuan kanei ang, Mampuia pawh a awm renga mahse, ka rilru buai lai taka ka rilru a lo lang hmasa ber ani miau a, zanin a U Saii thilsawi te avang khan ka zah thara, hun rei tak chhung paidam ka tum leh theihnghilh ka tum ṭhin, ka chak loh na ber chu zanin khan arawn thar leh a, sawi tur ka hre lovin U Mafela chu phulo ka inti zual kher mai.


" Ka tibuai che a apawi kati lutuk, U Hlua a hman silo a, nanglo sawm tur dang ka hrelo a" Amah pawh en lovin kati zung zung a, amah en ran chung chuan ka sawi ngamlo ani, " Tiang khan sawi suh, zanin hian mipa dang kalpui la ka lawm dawn miahlo tih i hrethiam ang chu tiraw? I buai ber laia min hrechhuak hi ka lawm asin" Ti cool ruihin " I bialpa ka ni a, bialpa saltiah tak nih erawh ka tumlo, i rin ngam leh i hahdamna nih ka duh a, engtik lai pawha i tlan tauhna nih ka duh bawk. I hlim changa i hriatchhuah hmasak ber leh lungngaihna vawrtawp i tawn changa i thlakhlel ber nih ka duha, ka laka i lungawi loh chang pawha i tlan tauhna nih kala duh fan asin, ka duham min ti em? I laka ka thil duhte avanga mipa duham ber kani dawn anih pawn apawi kati lo, nangmah vang anih phawt chuan mipa duham ber nih chu ka chak hliah hliah zawk asin " A aw thum cool ruih mai chuan min fan chhuak chiai chiai a, Gas bula ka ding chu min khuap run in, akut pakhat chuan ka kawngah a chelh a, pakhatin ka biang dawm a, chiang fe in kan in melh bawk.

"Ka lakah hian inthlahrung suh Bawihi, I chawlhna in ah min ngaila, keimah ah hian intulut ṭhin rawh, ruah a sur changte, kawl a phet zuai zuai laite, ni a sat a, thli a thawt vuk vuk laia i tawm hulna, i bihrukna leh i rinchhan tur, i hahdamna i chawlhna in ah min ngaila, ka angchhungah hian ni sa do dai ṭhin bawk ang che aw " Atih chuan ka mittui a parawl kuang tawh a, ka hnuk no lai berkher a chutiang thu asawi chu ka haw lutuk, min vel ani ringawt alawm. Kan in ngaihzawn tirh aṭangin hetianga thu sei leh ril zet hi min hrilh ngailo a, ka phut kherlo bawk, ka hriat takah erawh ka hlimpui a, hmeichhe special tak ang ah min in ngaihtir in min ti hlim takzet ani.

Cont..

Ka regu lo viau a, ka buaina chu ka sawi tawh kha, pck ka neih loh bakah ka type khawl ho kha a zo tawha, chhunah type na hun ka neilo a, ka regu theilo ani. Tunkar chho pawh ka regu leh thei lovang, MṬKP inkhawmpui kalve ka tuma, kan bial kan zai dawn bawka, hlazir leh neuh neuh atam a, rilru pawh ka pe theilo. Rilru pelo deuha ziah chu ka duh ang thlapa ka ziah chhuah theih loh ka hlau a, rilru pe taka ziah ka chak tawh, kalo regu theih hma chu minlo hrethiam hram hram ru; Chuan leh lawk comment hi atlem lutuk a, hei vang hian hman lo chung chunga type te hi a phurawm loh ṭhin. A ngaihnawm loh chuan sawi tawp rawh u.
Show post links
Top