Thinlung BY Kimkimi tlau (Completed)

[ngaia]

U Mafela'n min kalsan tawh tih ringawt chuan ka thluak aluah khat a, awm ngaihna ka hrelo lek lek ani, ka thinlung hian min tur et et a, eng ber nge tih tur erawh ka hrelo. Nurse nu nen hlim taka an awmdun tur anga ka ngaihtuah chang phei chuan ka mittui bawk alo tla leh ṭhin a, ka mittui avangin ka lukham pawh ahnawng chap tawh a, ka hmai a huh hliam bawk.

Tun hi tawrh hun chu anih hi ti rilru chungin ceiling chu ka melh kara, Ka mipa hmangaih ka kaltira ka tuar tur alawm, Ka tuar ang a, kala tuar chhuak em em ang; mahse, har erawh kavan ti tak em! U Mafela ka ngaihtuahlo theilo a, a kiangah ka hlim ṭhinzia te, a laka kalo in nghah nasat hmanzia te ka ngaihtuah kai a, kalo rinchhan hman mah mah tawh a, tunah chuan atello a awm ka thiamlo ta anihhi.


Nizanah ka tlaivar ṭhaka tunah pawh ka mut achhuak hlawllo, ka lukham bula ka phone chu akhat tawkin ka hmet eng seka, eng ber nge ka beisei tih hrelo mahila ka hmeh en apiangin ka beidawng ngawih ngawih a, U Mafela msg a awm loh vang te pawh aniang, Akal aṭang khan ani chu areh tlawk tlawk a, kaltir tu ni mahila a msg kala chang ru tho chu ani si a, ka awmdan hi min hmu se min nuihzat ngawt ang.


Ka rilru buai nuai nuai chu thlitfim tum teh mahila ka thlifim theilo a, Thinlung a na a, a rum vawng vawng a, mahni insit na ka neilo theilo a, ka mihringpui ngeiin min duh lo ngawih ngawih hi dam taka pawm chu ahar kati a. Ka chapo na achhuak lo thei biklo, tunah tak phei chuan ka rilru te hi chhe tik tek tak ani. Ka mittui avangin ka hmai chu amar veka, ka mit pawh a bui leh luk tawh ang, zingah chuan zawhna ka dawn ngei karing a, eng chhuanlam nge ka siam dawn tih te pawh ngaihtuah kangai.


Ka let ka let a, ka rilru hahchawl lo lutuk chuan minti chau ngawih ngawih a, Nizan lamah ka meng tlaivar chiang bawk nen ka chau tawngkhawng aniang Zinglam dar3 velah ka muhil veta a, ka harh leh meuh chuan alo eng uar tawha, men pawh ka meng ṭha ngamlo, ka mit thap hrup leh ka lu na bur chu ka hria a, ka hmai te chu a ro ruap in kahria, amar ṭhum bawk a ka awmdan chu anuam hlawllo. Room aṭanga ka chhuah hma in Darthlalangah ka in en a, ka hmel landan chuan ka lung ati awi hlawllo a, ka mit men te chu anuamlo a, keimah mai nilo ka chhehvel thil engkim chu a chul ruap in ka hria a, Pangpar par chuai tawh ang maiin ka in ngai, Tuna ka landan hi rawng hmangian sawi dawn ta ila chuan adum anih karing.


Room aṭanga chhuakin engmah ti khawtlai lovin Bathroom ka pan tlanga, Ka ha te nawtin ka hmai te ka phih a, chutia ka in phihfai takah chuan Ka hmai mar lutuk pawh chu areh a, ka mit men pawh anuam ta huai mai. Ka hmai hru mawlh mawlh paha bathroom aṭanga ka chhuah chuan U Nguri'n choka lut tur nen kan in tawk a, ka landan danglam chu a hmu tih kahria a, zawhna min zawt tase tiin chhanna tur ka ngaihtuah kual nghal ruai a ka hrechhuak mai theilo lehnghal. "I tho nuam em? " Atih chuan thaw huai pahin kabu nghat nghata, ka nui lui pah var var bawk, 'Tinge i hmel chu ava diklo ve' min tilo chu lawm tak kani.

" Towel hi kava dahṭha anga kalo pui ang che " kati ve thuaia, U Nguri pawh bu ve nghat nghatin " Puih em em pawh ka ngai tawh chuanglo, i duh leh room ah chuan awm hahdam leh mahla apawilo ania " Min hrethiam zet hian ati a, min hrethiam taka aṭawng vang aniang ka mittui atla leh lek leka, ka ṭahbelh thar ta lutuk leh ka no zual lutuk hi Remruatfela vang vek ani; min duat a, min ngaihsak a, min ngaipawimawh ṭhin bawka. Lalfanu ang maia min in ngaihtir miau avangin ka nihna tak tak theihnghilhin engkim kha ngaiah ka nei hmana, thil nihna diktakin min den leh meuh chuan ka buai chhe der a, ka zawh ngai loh kawng zawh ang mai kani a, ka ṭahbelh lutuk leh no ta viau pawh hi engdang vang anilo Amah Remruatfela vang vek ani.

Room ah lut leh in towel chu ka khai a, khuma ka phone chu la in ka hmet eng a, ka beisei thil engmah a awmlo, a reh em em laiin ka thinlungah erawh areh theilo a, ka thinlung hian ahming alam tluk tluk ni mai hian ahriat. Thawpui la hakin ka phone chu charger ah ka connect a, ka phone te chu ka hmu hlu lo ta riau a, amak kati zawk. Ka thawhchhuah ngeia ka lei ani a, ka neih tirh aṭangin ka roh in ka dim dawi hle a, tun a taka ka hmu hlu lo ta riau chu U Mafela msg a awm loh vang ni lul suh se.

Ka puan sin chu thlep in bedsheet ka pawt mara, tukverh chu hawngin ka dakchhuak a, Ka lungngaihna min ṭawmpui ve ang hrimin Ni(sun) chu a dul ve raih a, kan kawmthlanga thing ding khup te chu ka hmu ro ruap a, engmah chuan mawina an chhuahlo ni maiin kahria a, ka awmdan chu ka inzahpui khawp mai. Zawi muanga chhum kal riai riai te chu ka thlir a, ka natna te hi kalliam pui ve se kati takzet.

Mihring te hian kan hmahun hi kan hrelo a, mawl mang takin kan hlim a, atthlak takin kan na leh ṭhin, kan hriat loh na kan hlimpui a, kan hlimpui chhung erawh arei ngailo, Chhum in Ni(Sun) reilote chhung ahliah ang mai hi ani a, Hlimna hi chuan min liamsan zung zung ṭhin. Keipawn Reilote chhung chu khawvelah hian natna a awm lo emaw tiin mi pakhat mawlmang takin ka hlimpui a, A kut vuan a hlim taka ka nuih lai kha chuan ka hlimna khan tawp chin aneih ka ring pha ngailo; mahse, tunah erawh atthlak takin ka na mek chu anih hi.
.
.

Chaw chu tui tilo zetin ka ei lui ve a, chaw hmeh kan ngah ve tehlul nen engmah chu tui ti takin ka ei thei chuanglo a, chaw hmeh hian chaw ei tuina alo chhawm lo tawp mai. "Mate, i chaw ei atui vak nange " kapa'n atih chuan ka chaw ei kalo ngaihsak miahlo tih ka hrechhuaka, chhan mai dan tur hrelo in ṭul hleilo ah ka ṭhutdan te chu siamṭha a, " Tui e " ti a chhangin ka nui lui ngial bawk. "Chaw hi kan chakna ani a, kan chak lo deuh anih pawn ei luih hram hram tur " Atih hnuah athleng chawiin akham a, "Mipa pakhat vang mai maia khatia awmkual kha azahthlak tih hria la, anni hmuhsit zui theih turin khawsa suh " Choka aṭanga kapa achhuah fel hnuah kanu'n ati a, tui ti zetin chaw chu a ei chhunzawm lehnghal a, mahni tawka ka rilru anat velaia tui ti zeta chaw a ei leh min vau reng chuan ka thin ati rim leh phat a, tho hluaia hnial let lo turin ka inthunun hram hram ani.

" Eng nge awmzia " U Hlua'n atih chuan kanu'n minlo melh zeuh a, sawi chhuah kher chu aṭullo ti mahila kanu hian asawi chak zek zek tih hria in ka khap buai duhlo. Kanu chuan a huatthlala thei ang ber chuan asawi ta a, a sawi zawh hnu reilote chhung chu kan thawm pawh areh duka, U Hlua chu a thinrim nge thinrim lo tih pawh ka hrethiamlo. " Miin an sawi tih mai mai, a thupui fun lo emai a " Mampuia'n atih khauh chuan Kanu'n a melh rum vaka, Mampuia erawh pawisawilo deuhin anui thunga, alandan chu angeiawm lek lek.


" Miin an sawi theih chhan chu sawi tu an awm tihna ania, mai mai anilo " Ati hlara, mi mah mood off nen an inhnial vel chu ngaithla peih lovin ka tho tharha, " Mate, in ngaihlu thiam ang che, i in ngaihhlut thiam poh leh i tan aṭha animai" Ka kut ka sil laiin U Hlua'n ati a, ṭawngkaa chhang lovin kabu nghat nghat a, Ka u pawn engmah asawi belh tawh biklo, a ṭawng dan aṭangin a thinrim chiamlo tih kahria a, ka u athinrim vakloh avanga ka hahdam deuh sawt chu achhan ka hrethiamlo. " Pasal nei chunga ngaihzawng neite hi uire anti ṭhin em kha, mu dun kherlo tase emaw an tisual lai man kherlo ila uire ti a chhiar anni tho em" Mampuia chuan kanu melh kur chungin ati a, amitmeng chu nelawm vaklo mahse, a landan erawh a hahdam ru phian thunga, a zawhna ber kher lah chu ka beisei loh lam thil daih ani.


" An chetchhuah hma khan an uire daih tawh alawm, pasal nei chunga mipa dang foul taka an be tawh anih chuan an uire tawh tihna animai, an taksa chuan la tisual lo mahse, an mit leh thinlung a uire tawh a, Khuma chesuala uire leh thinlung uire hi atenawm dan a in angreng. Khum kaia uire duhna kha thinlung aṭanga chhuak ani tlat a " U Hlua'n ati duah a, athleng chawiin alo kham ve nghala, tuikhawihna ah kala din tlat avangin kalo tawlhsawn vata, kan boruak chu anuam tehchiam lo khawp mai.

" Kanu eng nge i ngaih ve dan " Pawisawi lo zet hian Mampuia chuan ati leh a, kanu'n harsa tih hmel zeta achil alem khalh chu ka hmuh hmaih lo, chutiang zawhna ho te chu engvanga danglam pui chiam nge anih ka hrelo a, Mampuia zawhna chu 'Aw' ti a chhan mai harsa ani hauhlo bawk. " Uire ani maiang chu chutih rualin tumah hi chhan neilo leh nuam tawl chak vang hrim hrim a uire hi an vang a, harsatna liantham tak emaw chhan ṭha tak annei ngei ngei ṭhin " ati duah a. Kanu thusawi chu ka thlawp ve hauhlo; Ni e, mihringte chuan harsatna te buaina te chu kan tawk ṭhin a, kan buaina tawhte avanga Uire na suala tluk kher hi chu ka hrethiamlo ani, midang chuan an hrethiam mahna.

Khum laizawlah an pasalte'n an tih lungawi zawh loh Nu hi mizoramah hian antam tih kahre ve a, an dinhmun erawh ka hraitthiam pui lemlo, an pasalte an hua in an ngei anih pawn an demawm pawh ka ti chuanglo a, an duhkhawp pe theilo an pasal te pelhe sana mipa dang an pan anih pawn kava hnualsuat hranlo; Mahse, inlak thiamchan tum taka 'Ka pasal hian azir lo em a, tilo thei lo dinhmunah ka ding ani, ka nawmchen duh vang hrim hrim pawh anilo' an ti kual leh ṭhin hi chu a, an tenawm kati zawk. Nuamchen duhlo se an pasal te uire san in mipa dang an mutpui hauh lovang. An tisual a, an pasalte chu an thiamlo pawh ani thei; Mahse, thil sual anti a, uire an nihna leh nuamchen an nihna a bo chuanglo, an tenawm tur anga an tenawm vek tawh hnua thiamchanna zawng kual leh ruai ṭhinte hi chu a zahpuiawm kati ve thlawt, an tisual ngam anih chuan mualpho ngam mai rawh se.
Mipa te pawh anni tho, mipa annih avanga An nupuite an pelhe san hi a thiang biklo a, mipa ṭhenkhat hi chuan nupui nei reng chunga hmeichhe dang mutpui hi thil sual ti ah pawh an in ngailo a, an mak ve thlawt, aṭhen phei chu uire theilo ang ah te an in ngai ṭhin mawle, a rapthlak zawk.



" Harsatna liantham tak an tawh thil te chuan Uire turin a nawr in anawr ṭhin tihna emni? 'Ka tihpalh liau liau' tihte hi keichu ka pawm thei miahlo, Uire na hi tihpalh ni lovin duhthlanna ani a, Nupui emaw pasal nei laiin a duhthlanna hmanga mipa dang emaw hmeichhe dang a mutpui hi atihpalh anilo, an duhthlanna liau liau ani zawk, Hmeichhe phalna tel lova mipa in hmeichhia amutpui hian Uire ni lovin pawngsual ani a, in lungrual taka an kawppui te thlima mipa dang emaw hmeichhe dang mutpui ṭhinte erawh Sawi mawina dang a awmlo an uire animai " Mampuia chuan ati hmak hmaka, a thinrim vang nge athilsawi chu a sehchilh rap rap a, "Thil hi tawn loh chuan hriatthiam ahar alawm " Tiin kanu chu a inthiar fihlim a, kei erawh Gas bulah ka ding a, kanu landan buai ru nuai chu hmuhnawm tilo takin ka thlir reng a, athil tisual lai phawk te pawh kan ang zawk alawm.

" Chaw ei lai laia Uire chungchang sawi chu a " U Nguri'n atih chuan Mampuia chu anui a " Ngaihdan hi a in anglo thei em a, ka sawichhuak mai mai anihkha, ka ngaihdan te kha a dik vek tihna pawh ani chuanglo " Mampuia chuan U Nguri nuih vur vur pahin ati a, a landan inthlak hlawk hlawk zel hian min barakhaih thei lutuk ringawt, A landan adanglam thut chang hian kanau Laldinfela a anglo tlat zela, ka ngaina lo reng reng.


" U i hnatlang ve dawn em? " Thleng ka sil laiin Mampuia'n minlo dinchilh a, " Eng hnatlang " ti a ka chhan chuan "Group te hi en ve ṭhin la, U Mafela biak nan chiah hian i phone hi ihmang a abuaithlak " Ti nang nangin thleng dahna bawm chu atuk keuh keuh a. " I ninawm emai " hnial dan tur hrelo zeta ka tih chuan anui hawka, " YMA hnatlang anihkha, Park ah ṭhutna siam belh tur antia, rawng hnawih pawh atel dawnin kahria " Ati a, chutiang lam reng reng kalo hrelo.

" Ka hrelo le, hmeichhe tan tihtur vak a awm dawnlo anih chu " Kati vemai a, diktak chuan engtih mah ka phurlo a, mahnia awm tluka chak ka neilo; mahse, intih thawven erawh ka mamawh ber ani rih a, hnatlanna a kal ve pawh chu ka hnial vak chuanglo. " Mahnia awm chet chet ai chuan hnatlang vela, boruak danglam te han hip la tlemin i zia maiang " Mampuia'n ka dara chelhin ati sup a, min ngaihtuah dan athiam vaklo na in athiam ang tawk chuan min ngaihtuah ve ṭhin.


Thleng ka sil zawha room a ka luh hnuah pawh Mampuia chuan minla zui renga, " Eng nge ihriat a? " Katih chuan "U Mafela nen chuan in inṭhen ami? " ati a, ho ti zeta ner nangin " ava ho tak" ka ti hlak a, " Kahre chak alawm " "Min en la, kan inkar chu aṭhat i ring em? " Katih chuan min thlek vung vunga, hnai deuha te min en kualin chutia a awm kual vel chu ning zetin kalo nemsawn a " Min chhaih kual suh aw kaning" ti hlarin sunblock chu kala a, Laldinfela awmphung chuan mintih thinrim deuh avangin ka che reng reng chu kati deuh sawk sawka, ka inhnawih tur ka hmehchhuah laite chuan " Sun block kha atitau ve ange, i hmet na mah mah " Nui ṭhaw chungin ala ti hram a, melh ram ram mahila eng atan mah min ngailo.

Sun block chu ka inhnawih sawk sawka, ka sir aṭanga Laldinfela'n minlo nuih vesek chu hne tak kani, chhuak rawh ka tih lahin achhuak duh derlo a, vuakthluk tawp ka chak lutuk. Mahni lo maha rilru hreawm ve nak laia minti buai reng leh anui reng te chu ka hne a, ka nau duat ka hauh ṭhat phalloh ni mahse, tun atan chuan vuakthluk tawp ka chak. " Khawfing chah hma hian thim chhah mup awm ṭhin tih i hria em? Kan nunah pawh hian thil ṭha kan tawn theih nan thil ṭhalo hian hma ahruai hmasa phawt ṭhin ania, a thim zual lai taka chhel taka kan awm phawt chuan athim zual hunlai hi arei ngailo ania aw " A chhuah dawnah chuan thutak deuh hian ati veleh lawia, ka chhanlet hma in achhuak nulh a, kanui tawp.

.
.

Angaihi nen Hnatlang tur chuan kan kal ve a, Park hi tlanga awm ani a, ahmun hi chu duhthusam a nuam ani, Sunday te hian leng antam ve ṭhin a, keini ṭhian ho pawh kan leng ve ziaha, U Mafela nen pawh vawihnih chu kan leng ve tawh, U Mafela ka ngaihtuah chhuah rual chuan ka lu ka thing nawka, Angaihi'n min hmu aniang " I a takzet ani " Ati a, " J-Hlua nen in inṭhen tirh khan kei aiin i a daih zawk " ṭawng thlawn ba duhlo a Katih ve chuan Za deuhin anui uar uar a, minti hrilhhai lek lek ani. " ka zak lutuk, enteh ahunlai kha chuan ka atpui deuh tak taka ka tawrhna kha aho kati miahlo; Mahse, tuna ka ngaihtuah let hian ka zak lutuk a, awm ngaihna ka hrelo a, ka ngaihtuah chhuah chang apiang hian ka hmai ka hup tlawk tlawk zel, au chiam chiam te ka chak a, zak tak kani ringawt khatih hunlaia keimah kha ka inten ka in zahpui " ati hlawih hlawih a, amah lah chu anui kur kura, ka nuih veleh tak ngawt hi, thil chu a hunlai a awm katih kha, ahunlai apelh hnuah chuan thil hi adanglam thei lutuk.


A hmun kan thlen chuan midang pawh anlo awm nual tawh a, Thingpui chhuan na tur vel anlo buaipui mek a, "YMA ah hian hmeichhia vek ami awm le, mipa kan van tlem " Angaihi'n ati a, midang chuan nui ṭha chungin "Thlanmual thlen hma a thing kan kih kha anla buaipui alawm " Anti a, " Anih daih chu a " Ti ve maiin Mei chhemna tur buaipui tute bulah chuan akal nghal daih a, Angaihi hi chu khawiah pawh hian aleng halh zel mai ani. "Angaih, Thingpui tur tui hi angai dawn a, Nang tlangvalah i buaipui dawn mi? " Kan nula pachal U Sangtei'n ati a, "U Sangpachal, mipa emaw hi minti ṭhin suh " Angaihi'n ati hlaka, a thinrim pawh ani chuanglo.

" Pi Zami te tui saw hman dil rih mai ila, kan ban hnuah kan..kan thiar khat leh anga " U Liana'n ati bual buala, ameng nu but bawk nen arui tih hairual anilo hrim hrim. YMA hnatlang ah hi Chuan hetiang pawl hi an awmlo theilo a, tlema over sangfal deuh te pawh an awm ṭhin, YMA hi chuan a huam zau em a, mi rilru zau lo chuan YMA hi an ngaithei ngailo reng ani. Khaw khatah hian YMA sawichhe peih deuh hi an awm ṭhin a, kan khua ah pawh hian chutiang chu hriat kanei, an sawi chhiat peih rualin a mamawh berte anni leh lawi a, An faten an ruih sual changa buaina an siam chuan YMA anti buai leh tho ṭhin a, an mak ve ngawt mai.

" Tui point awmna ahla e, khuta ṭanga helaia tui thiar chhoh chu ka peihlo " Angaihi'n ati a, " Tihdan a awm maiang " U Liana lahin ala ti hrama, Pi Zami te in lam chu apan chhat chhat bawk. " Keichu ban hnua tui thiar leh ka peihlo, kan in ahla chuanglo a kan in aṭangin la maiang u" Hlutei'n ati ve a, kan pawmpui aniang hmeichhe lam chu kan bu nghat nghat hlawma, " Angaih, Kimi nen khan lokal ve ula " Hlutei'n atih chuan ka ṭhutna aṭangin katho a, Angaihi pawn ahnial biklo, U Liana ngaihven tawhlo in Hlutei te in lam chu kan pan a, kawngpui lamah kal peih lovin pi Zami te in hrul aṭangin kan kal a, " Tengtere hi ka ei chak, thei ka ei chak hrim hrim Hlute chi keng ang u aw " Tengtere kung kan kalpelh dawn chuan Angaihi'n ati a, "Aw, kan keng dawn nia, ser lawh tur pawh a awm maithei asin" Phur zetin pakhatin alo chhang ve bawka.

" A phallo " Ti pahin kan hnungah U Liana chu alo kal veleh a, "A phal ka ringlo hrim hrim " Hlutei'n atih chuan "Uikawm lutuk mai " Tiin U Liana chu a phun bul bula, kaning lek lek ani, Zurui phunchiar deuh hi chu kati thei hlawllo. "A uikawm si athih hunah pawh kan tlaivar lovang" Atih chuan kan nui a, amah lah chu anui ve duh ṭhaklo a. "Sintex hawh tur kan zawng ang e, Pi Saii tui kan hawn tir anga an tui connection tal chu kan hmang ang " Ati pawr hlara, min kal pelin kan hma ah akal bu luk luk a, ke in sei hleih ang maiin ani akal ni.


" U Liana zu rui hi chu aninawm thei e " Tiin Hlutei chu a phun zui a, Angaihi nen chuan kan sawizui pui lemlo, Hlutei te in kan thleng a, " Chi thak siam sa kanei a, kan keng dawn nia, tui hi bucket hnih keng ila atawk angem? " ati zung zunga, "A pawi lovang, sawhchiar kan siam dawn phei chuan tui kan mamawh tam karing " Angaihi'n ati a, an pahniha an in biak bawrh bawrh laiin in aṭang chuan ka chhuak a, " Sintex ka hawh ania tui chu khai angai lovang, Pi Zami te tui connection kan hmang dawn nia " Kawng thlang aṭangin U Liana alo au lawng lawnga, Ka chhuak fuh nge fuhlo pawh ka hrelo e a. In lamah bawk chuan let lehin Angaihi te chu chanchin ka hrilh a, " Anih chuan bucket pakhat hi aruak in keng ila tiraw? Tui Suah chhuah nan kan hmang dawn nia " Hlutei'n ati leh zung zunga, tui khai a ngailo bawka in ah chuan kan awm rei lo a, Park lamah bawk in zui phei lehin, keiin Tui bottle khat ka kenga, Angaihi'n bucket ruak akhai a, Hlutei'n chi thak akeng bawka, kan in daihzai khawp mai.


Pi Zami alen hman avangin an tengtere chu dil lovin kan lawhsak a, " Dil loh hian an thil phal ber " tiin Hlutei anui har hara, keini pawh kan nui ve tho, kan school kal ṭhin lai pawn aruka thil tih kha nuam kanti ber a, Theihai leh theite te, ser te pawh aruka lawh kher kha nuam kanti a, atui bik tlatin kan hre ṭhin anihkha, alo ho ngawt mai.


Park kan thlen phei veleh meuh chuan tui chu anlo dawh ṭan tawha, U Liana chuan VCP Pu Rd-a sintex a hawh anih awm chu maw ahuai ve khawp mai. U Rci te pawh anlo awm vereng tawh a, min hmuh rualin minlo nuih var vara, " Inva hma bik ve " Abula ka ṭhut rual chuan ati a, " Hma vaklo i hnatlan kalo ring vaklo a " " In ṭhui tur kaneih loh lai tak ania, bakah YMA hnatlang hi chu kal loh anuamlo alawm " ati bawrh bawrha, anuih zawnga a biangsum lang kalh hian ati lang duhawm riau zel, a bialpa luanliamna pawh ani ve ang karing.

" U Lian, ṭawng bual bual lo khan tihtur chu tive rawh, tihtur i sawi zawt zawta engmah iti ve bawk silo " Angaihi'n ati hlak hlaka, angawi rei kati tawh reng ani. U Liana lah chuan an sawiselna chu eng atan mah ati lo aniang tihtur chu ala sawi zawt zawt renga, aṭawng reng bawka, phunna tur ahre si, mimah mood chhiat nen insual pui mai kachak.

Park ah chuan Mipa 10 vel bawr an awm a, abak zawng chu Thing kih na lamah ankal a, Hmeichhe lam kan tam bawk nen thawm kan ngah a, U Liana leh Angaihi an in sual ṭep ṭep zel bawk a, aninawm lek lek laiin a hlimawm phian lawia, an nuih rualin kanui a, thinlung taka nuih erawh aharsa kati, ka phone chu vawi tam tak hmet eng in en mahila ka beisei ang thil engmah a awm ngai chuanglo a. Whatsapp ah ka luh apiangin U Mafela hming alang hmasa bera, a msg awmlo mahse, a hming chu ka pin miau avangin tuman an hmakhalh thei chuanglo.


Group msg leh pvt msg pawh ka dawn ve nual laiin mipa khat hnen aṭanga eng msg mah ka dawn loh vang nge whatsapp chu a ruak huaiin kahria a, thaikual thaikualin status te chu ka view leh ringawt zela, engmah chu anuam hlawllo. Archived ah chuan ka lut mai mai a, U Cindy msg alo awm tih ka hmuh chuan kathaw haka ka Archived aṭangin a msg hi ka seen ngai tawhlo a, chuti chung pawn minlo la bereng zel chu ani sia, a hman kati ve ngawt mai. A msg hnuhnung ber chu minlo thawnna ala reilo a, 'Ka u nen in inṭhen chu aṭha hlemai, mahni nihna hriat...' ka chhiar zo theilo a, Chhiar zo turin a msg chu seen ka tum chuanglo, minlo hmusit leh hle ang tih chu ka rin hriat a, ka ring suallo bawk ang.


Ka phone chuan thaw pik na bak min thlen loh avang chuan hmet thimin ka ak daih a, ṭhiante titi bawrh bawrh chu ngaihvenin ka ṭhutdan ka siamrem a, "U Liana over zia saw " An tih chuan kan piah deuha ṭhutna lam chu ka hawi ve vata, U Liana chuan kan khaw nula senior pahnih lo ṭhutpuiin Ar puah tuma insiamrem mek U Josepha chu 'Thla min lo lak teh' tiin atir a, U Josepha chuan hnial vedeuh mahse, ati lui leh tlata, Akut lehlama Ar thi keng chungin thla chu ahan laksak leh rih a, 'Iti buaithlak thei e" ati nang nang bawka, U Josepha chu ka dem miahlo, kei ni ila ka dawhthei tawh miah lovang. Kan thlen tirh aṭangin sintex a hawh bak ama kut zalin engmah ala tilo a, 'chu chu ti rawh u ' 'hei hi tihian ti ula ' tiin a sawikual zawt zawta aman engmah ati duh chuanglo a, an hnial deuh hlekin 'Nangni aiin ka upa, min zah ve ru' ati ziaha, min be buai velo na in haw daih se kati tawh keichu.

Mipa lam chuan U Rci chu an fiam khat tawk renga, vawiin chu Angaihi aiin an fiam nasa zawk tlat, U Rci an fiam apiangin Angaihi chu alo inrawlh ve ziaha U Rci'n a melh rum thei khawp mai. " Kum 7 te kum 10 dawn te inzui ho hi an innei lo tlangpui asin, ho te avangin an inṭhen daih duh " Angaihi'n atih chang chuan U Rci a ner nang zela "Khawngaih i over emai aw, rilru tinuam lo zawng hlirin thil sawi suh Ati hlar zela, a rilru a nawm loh hmel tak tak. Ani hi zawng arilru hi abuai hma ve a, tih lungawi loh a awl rualin tih lungawi pawh ahar lo a, a bialpa chungchang ah phei chuan a hlauthawng hma lutuk; abialpa alerh vang ni lovin an inzui rei ve tawh si a, Angaihi lah hian 'Rei deuh in ngaizawng ho hi ho deuhin an inṭhen duh' ti a fiam hi ahrat a, Angaihi chauh nilo midangin an fiam tel chang phei chuan a mood a inthlak vek thei a, hmeichhe nu hnep mai ani bawk nen dimdawi angai lutuk a, tuna abialpa nen hian an inhmeh em em bawk tih kan sawitel hram ang e, buaina liantham fe an tawk anih loh chuan keichuan an inneih ngei ka ring a, a chhan pawh palai hmel ahmu ve dawn tawh tlata, inneih an hnaih sawt khawp mai.


Hnatlang kan banga, thil hahthlak ti velo mahila ka chau nghulh tho a, heihi chu ka hnatlan vang pawh anilo maithei ani. Khuma thatchhe zeta ka mut laiin U Faki'n minlo bia a, a nawmsam loh thu leh U Mama pawh a dam loh thu minlo hrilh a, phur lo teh mahila eirawngbawl turin U Mama te in ah chuan ka kal veleh tho chu angai dawn anihhi. U Nguri hnenah thil awmzia ka hrilh chuan 'Vakal rawh helam chu lo ngaihtuah angailo ania, Duati a tlei ve tawha Mampuia'n min pui thei dawn bawka' ati zung zunga, thil a hrethiam thei lutuk hi a in thlahrunawm lek lek zawk ani.


In aṭanga ka chhuah hmain kapa hnathawk bang alo haw a, vawiin chu nidang aiin an bang hma tlat " In va hma ve kapa, i chau em? " Kati a, Min nuih sukin "Chau nang aw ka chau thei hleinem, hmanrua in min daihlo deuha vawiin chu kan hma anihhi " A lu hiat sut sut pahin ati a, enge ka ka hriat pawh ka inhrelo lungawi taka kapa chekual vel chu ka khawngaih tlata ka mittui atla teuh lutuk. In sangmar in ka mittui chu ka dang kir hram hrama, thingpui te ka siamsak hnuah ka awmdan tur chu ka hrilh hre ve a, "Titi dun mai mai ila kati deuh ania; Mahse, i hman silo a, zanah kan inbe dawn nia, keipawh intihfai kaduh " ati a, ka buk nghat hnuah in aṭangin ka chhuaka, zawimuang leh tha tho lo zet chuan ka kal a, U Mafela leh a chhungte ka hmuh loh nan ṭawngṭai chiam mai kaduh.


U Mama te in ka thlen chuan kawngka a in khar deuh ṭhiap a, U Faki te an awm in kawngka a in khar ngai silo a, an thawm areh bawk nen amak kati angreng a, Kawngka chu kik hmasa lemlo in ka hawng a, in chhung ah chuan lut in U Mama auh ka tumlai tak chuan U Mama room kawngka chu alo in hawng a, hmeichhe ṭawng thawm hre zatin" Fa pahnih lai i nei tawh a, inti pangchang viau zel suh " titu chu phawk zet hian kalo en a, Min hmuh ve rualin anni pawh an ding chata, mak antih ve hmel tho. "Eng..enge awmzia? " Bah naka katih chuan " Mate, i hmuh ang hi animai " Umama chuan dam thlap hian ati a, Ka ṭhiannu darah chuan kuahin alamah ahnuk hnai hrat bawk, " Lalkhawngaih eng nge ka lakah i zep " Pawr zeta ka tih chuan Angaihi chu aphu zuk a, alandan chu nidang nise ka khawngaih viau ang tunah pawh hian ka khawngaih reng; Mahse, ka laka thil zep aneih avangin ka lawm hlawllo a, ṭha deuha biak nghal mai chu ka tumlo, ka hmuhdan hi thil thlen dan anih chuan U Mama leh ka ṭhiannu ngawih ngawih Lalkhawngaihi hi an in ngaizawng tihna ani a, thil thleng tura ka beisei loh ber ani tih kan sawi tel hram ang e.

" Dawt min hrilh pawh ilo thiam ta hlemai, i ṭhian nge i hmelma kanih, min bum chiang hlemai " Kati chang leh faka, Angaihi mita hreawm tihna, hlauhthawnna leh manganna in lar zut zut chu ka hmuh hmaihlo a, en hreawm kati viau bawk "Chu..chitiang anilo Kim, hrilh che ka tum a..nilo hrilh ngei che ka tum alawm mahse, ka..ka ngam thlawtlo ani " Ati bah nawk nawka, ṭap mai tur hmel hi a pu tawh. Ka u leh Angaihi ber kher chu amak ve thlawt ani. " Mate, khatin i ṭhiannu dang chep mahta che hreawm atih em hi, puitling inni tawha engkim in hrilh arem loh changte a aw ve alawm " U Mama'n atih chuan ka ner nanga, " I bialnu chu i va ṭan ve" tiin ka nui haka, Angaihi akhuh bawrh bawrh thung, ka thinrim tak taklo a, ka laka thil a zep avangin ka hrem ve mai chauh ani, a landan chiai leh buai ru zet chuan ka nuih ati za viau a, nui chhuak lo turin ka insum hram hrama amah ka hmuh reng hi chuan ka insum rei theih pawh ka ringlo.


" Kan in phawk animaw " U Faki leh Naupang pahnih anlo lang ve nawlh a, U Faki chu anui ṭha a, keipawn kalo nuih let ve vur vur tawh, " Nia..Naute anlo siam nge pawh ka hrelo " katih chuan " Lalnunkim" Arual in U Mama leh Angaihi'n anti a, U Faki nen erawh za zetin kan nui a, ka thinrim lo tih ahriat vang nge Angaihi hmel pawh hmuh a hahdam ta deuh.

U Mama chuan Ṭhutkhawmnaah kuah pheiin aṭhutpui a, an chezia chu ka thlir renga, amak kala tireng, rinhlelh tur ik pawn an awm ngailo a, an inthup thiam lutuk chu inthup thiam chawimawina hlan mai kaduh zawk. Matthewa lah chuan Angaihi chu a bawh chung chunga, Bawihtei pawn nui var varin thil ahrilh ve mial miala, chutia ka enreng lai chuan thil hrechhuakin ka ṭhen saka, ahma pawn Bawihtei'n 'Anu Angaih' ati tawh tak alawm mawle, khatah pawh khan rinhlel ngaihna ka hrelo hrim hrim a, U Mama nen kher hi chuan an in ngaihzawn ka ringlo ve lulai em atin ni.

" Sawitur kan ngah dawn hlemai " Ka tih laiin ka phone ari a, kapa anih avang chuan rang zetin ka chhanga athu lo sawi erawh chuan minti buai chhelo chauh ani, ka landan danglam chu an hrethiam aniang "Thil thleng a awm ami?" Phone ka dah rualin U Mama chuan alo ti vata, "Mampuia khupah oil pump hling alut a, kut a pawrh mai theih anih loh avangin damdawiin ah kal angaia, kapa'n kalpui turin minlo ti anihkha " kati zung zunga, thil pawi chu ni tho mahse, a serious vakloh vang aniang ka chiai vaklo. Awm erawh anuam chuanglo a, " Ava han zialo em em, Mampuia hi chu a fimkhurlo mah mah ṭhin " Angaihi'n atih chuan " Nia, hepa hi chuan minti mangang ṭhin lutuk a" kati ve hlaka, " Kawng pengah kanlo nghak dawn mi? Faki naupang lo awmpui la" U Mama'n atih chuan " Ni dawn tak, kal ang u " tih leh kal karual a, ka u te chuan minlo zui ve nghal nge minlo zui lo pawh ka hrelo.


Ka hmanhmawh bawk nen kawng peng chu ka thleng harlo a, ka thleng fel chiah U Mama te pawh anlo thleng ve nghala, kan hah tlang aniang kan thaw arang hlawm lutuk. Rei vaklo kan nghah hnuah kan bulah car alo ding a, kan ṭhenawm te car anlo hmang anih hmel, " Mate lo lut la, kal nghal maiang u " U Hlua'n a chhung aṭanga alo tih chuan hmanhmawh zetin motor ah chuan kaṭhu lut a, "Bike in kanlo zui ang che u " U Mama'n atih chuan U Hlua chu bu nghatin a tlan chhuak a.

Mampuia ke chu ka en a, thisen a chhuak nasa tih hairual anilo, " Ana em? " Ka tih chuan min nuih in " Nalo e, mipa tan na lua a awmlo" ati khanglang a, ben chawrh kachak, Mampuia ka hmuh hma zawng kha chu ka awmdan a pangngai vek kha ania, Mampuia ka hmuh takah leh atak ngei a ahliam ka hmuh erawh chuan ka khur ru dar dar a, ka hlauthawng hle bawk. Ani lah chuan na ti hmel a pu duh ṭhaklo a, a tuar hi chu a chhel ve thlawt mawle.


Damdawiin kan thleng a, motor a din rual chuan kawngka hawngin ka chhuk vata, ka hawi chhuah ruala ka mihring hmuhte avang chuan ka thaw halh a, anni pawn minlo hmu ve tih kahria, ngaihven zui lovin motor chu ka kal huala, U Hlua'n Mampuia lo chhuak tur chu alo buaipui a, "I ke na lam kha ring vak suh aw " ati bawka, puih ve ngaihna hrelo zetin an sir ah kalo ding tawp. " Mampui i chesual animaw? Kalo pui ang che u " Ti hlut tu chu U Mafela ani a, kan bul alo thlen lai ka hrelo reng reng, min hmuh loh der mai ka ring kha ania ka ring diklo hul hual anihi; Motor aṭanga ka chhuk khan kan piah deuha Nurse nu nen anlo ding dun kha kahmu a, an pahnih chauh anni chuanglo mahse, an pahnih khan an in dinhnaih deuh bika, ka thik hle tih ka inhria, tihlan arem lo lai erawh ahreawm kati a, inhmu lo vang vang mah ila pawi kati rih hauhlo.


" Kan in buaipui thei maiang Mafel " U Hlua'n atih pawh chuan kalsawn ala tumlo a, aluhlul ve asin " Emily, lokal lawk teh " A chhung aṭanga Nurse Emily lo chhuak chu a ko a, Emily hi chu kan hmelhriat ṭha vedeuh ania alo lang hlauh chu kalawm tak tak ani. " Awi! Nangni maw..ehe! Mampuia i inti palh animaw, lokal ru helamah " Emily chuan ati zung zunga, A lokal na lamah alet leh nghala ka u te pawn an zui ve vata, kalve ka tum chuan U Mafela'n ka banah a chelh avangin ka kalsawn theilo a, " Tinge chanchin engmah minlo hrilh loh" dam dap in ati a, kan inkarah engmah thlenglo anga a awm chu mak ti zetin ka melh reng ringawt, nizanah kan inṭhen a, U Cindy msg aṭangin a chhungte hnenah pawh asawi vek tawh tih ka hre bawka, tuna takah in ngaizawng ang hrima "Engmah min hrilh lo a'' tih kual leh vel hi angai hlawllo, " Hrilh chhan tur che ka neilo " Ram hmaka ka tih chuan athaw hawka, a in thlah dul deuh tih hria in ka kut chu kalo phih ve sawk a, athlah vemai bawk, ka u te kalna lamah ka kalsan nal nal a, engvang ber nge ka hrelo ka thinrim ṭun a, ka thinrim lutuk hi cartoon ni ila chuan ka sen chhuak vek anga ka khuk rum rum ka ring.


Cont..
Show post links
Top