All The Wrong Reasons BY B.Hlutei (COMPLETED)

[B.laltlanhlui]

Chapter 41

Adrienne chuan Yuan a ban chu a chelh a, zawimuangin dawhsan lam an pan a, a hlim lutuk chu mumang te ang zawk hialin a hria a ni

Thla hmasa kha chuan a chhungte rilru hneh tumin a thawmhnaw a khung kha ania, tunah erawh a suangtuah ṭhin ngei inneihna a hmang mek a, chu pawh Tuscan lal inah lehnghal. Mang lamah pawh a la hmu pha lo ang

Yuan banah chuan na zetin a hmer a

Justin a'n a rawn melh chiang hle tih pawh a hmu thei. A hmaah tak a ding ta a, an mittui a tling dun ve ve

"I chhelo lutuk" a ti zawi sap a, Adrienne chu a nui ker ker mai

Hun serh an hman chhung zawng chuan an invuan deuh chawt mai

Justin a zungbun thlan ah chuan an hming a chuang dun ve ve a, Adrienne zungbun ah 'Justin's' tih a chuang a, Justin a zungbun ah ve thung chuan 'Adrienne's' tih a chuang ve bawk

"Adrienne...ka hmuh tirh aṭang khan ka hmangaih nghal che in ka hria. Khuanu hian i hnen min hruai thleng a nih hi. A ni khatna aṭanga ka hrilh tum che leh hmuhtir che ka tum kha i la hrereng em? I tana beih hi ka inhuam reng asin. Ka ngaihsak reng ang che a, ka hmangaihna che hi a chuai ngai lo vang. Ka tana hmeichhe awmchhun i ni. Tunah leh chatuan thlengin thih hnu piah lam thleng pawhin i ta ka ni reng ang"

Chutiang thu Justin hnen aṭanga a hriat chuan a mittui a rawn luang a, a kutah zungbun a rawn bun tir lai chuan a lo khur der der a

"Justin...ka tawn che avanga ka nun inthlak nasat zia hi i hre ve em le? Ka nun ka han chhui kir chang hian ka chunga thleng atan chuan mumang a ang ka ti zawk lutuk asin. Ka inhriat miah loh ka mizia min hmuhtir avang pawh hian ka lawm lutuk. Nang awm lo la chu ka tana ṭha tur pawh nise ka bei let ngam dawn si lova, ka tawn hnu che aṭanga ka ṭawngṭai nasat zia hi maw, dam chhunga enkawl che a, kan fate enkawl chhoh pui zel che ka duh. Kan chhungkua hi hmangaihna a uap ka duh a, inzahtawnna leh inrintawnna a hma lam pan ka duh bawk. I kiangah dingin i lam ka ṭang zel ang. Hausak leh retheih, hrisel lai leh bawrhsawm lai pawhin ka hmangaih reng ang che"

"Ka hmangaih che" Justin a'n Adrienne thutiam sawi zawh chuan hmui phun in a lo ti sup a, zungbun chu a buntir ve zui nghal

"Nupa in ni ta e. Mo hi i fawp thei tawh ang"

Justin chuan a hmaikhuh zawimuangin a hawn sak a, mittui tling kuangin an nui dun a

"Mrs Adrienne Adams," a ti zawi sup a

Adrienne chu mittui tla chungin a nui ker ker a, a hming thar chuan a rilru a khawih khawp mai

Justin chuan dim deuhin a rawn fawp a, an infawh chu thutiam nemnghehna ang tluk a ni. Justin chu a tawlhsawn deuh det a, a thlek vang vang a

"Ka hmangaih che, Mrs Adams" a ti a

Adrienne chu a nui ker ker a "Keipawhin ka hmangaih che Mr Adams"

Justin chuan a rawn fawp leh a, tun ṭum chu a duhthawh tawh takzet. A kawngah kuah in a lamah nghet deuhin a pawthnai a

Mipui ho chuan kut an lo beng dur dur a

An ṭhiante ho chuan lawmpuina an hlan sap sap a, thla te an la, puithiam leh an mi sawm panga te nen

Adrienne i'n a la hmuh ngai miah lo hi a rawn kal hnai a, a sam a buang thim deuh a, hmel felfai tak mai. Mitmeng hring ralh mai nei a ni. Midang pahnih te chu a hmuh ṭhan an nih avangin a hre nghal mai. Justin chauh a en avang khan a lo hmuh hmaih ve hrim hrim a ni

"Duhtak ka ṭhian ṭha tak te zinga mi River Jefferson a nih hi. Harvard aṭanga inkawm tawh kan nia"

River chuan chibai tumin a ban a rawn phar chhuak a, a nui var var bawk "Justin a'n nupui a nei dawn thu min hrilh khan min tihder emaw ka tia. Ashton Kutcher rawn lang dawnin ka ngai tlat a, mahse nangmah i rawn chhuah chiah khan a fiamthu lo tih ka hre chiah. I lo hmelṭha em bawk a, lo buai lo chi a ni hleinem" Adrienne kut chu a kun hniam in a fawh sak a

River chu Justin lam a hawi leh a "Min hmelhriat tir i duh vat loh chhan kha ka hre ta mai" tiin a han fiam zui a, Justin pawhin a dulah na lo deuhin a rawn hnek a, River chu a nui huah huah a "Ka fiamthu a nih kha" a tih zawm leh zat

Abi chuan inneih thlalak a hun tih a rawn hrilh a, lal in chu fanna hun an nei thei chiah dawn e

"Lal inah kan innei thei hi mak ka ti e" Adrienne chuan a ti sap a

Justin chu a ṭhen suk a "Surprise chu eng nge ang i tih?" a ti a

Adrienne chu a nui ker ker a "Ka duhzawng tak a ni Justin. A mawi lutuk. Lal fanu inneihna ang mai a ni"

Justin chuan kun in a fawp leh a, camera chuan engtik lai mahin a kalsan lo. An chetzia engkim chu an lo chhinchhiah vek

Adrienne chuan Abi chu mitko san zawkin a melh a

Abi chu a lo nui sen sen a "An awm ve lo ang ah ngai tawp rawh u. In inhmangaih tak tak a, lem in chan a ngai hleinem. In nihna ang tawp khan awm rawh u. Titi ula, inbe vel rawh u. Nakinah in la en duh dawn asin. Lawmthu min la hrilh zawk hial maithei a ni"

Justin chu a nui suk a, Adrienne lam hawiin a beng kawm a fawh sak zeuh a "Zanin ni vat vat se aw" a ti sup a, Adrienne pawh a nui chhuak hawk mai. A sawi tum chu a man nghal mai a ni "A rei tawh em mai" a tih zawm leh zat a

"Ka hria alawm. Zaninah i nghak chhuak dawn e" a ti ve a

"Hmangaihna lipui ah ka zuan pui bawrh bawrh dawn che. Kan inneih zan chu hriatreng tawh turah ka siam ang" Justin a'n a han chhaih a

"A behbawm ah hian ka chau viau mai lawng maw" tiin a chhaih let ve a

Justin chuan a lu a thing a "Aih. Chhuanlam a awm tawh tur a ni lo" a beng bulah a rawn phun leh sup a "Khumah i zei zia ka hre tawh tlat" a ti a

Justin a thusawi vang chuan a meng zau kawk a, a hmai a sen vek tih a inhre nghal mai. A kal hma deuh a, a nui var var bawk. A heh petin a hlim lutuk ringawt

An fang kual hneh bawk a, huan lam an fang ve leh thung a, rose leh pangpar chi hrang hrang. Hrui nei duah thleng chuan a kim viau mai. Tuikhuah lian deuh deuh hmun li ah a awm thluah bawk

Darkar khat a liam leh hnu chuan chawlh an duh thu Justin a'n Abi chu a hrilh a "Thlalak chu in ngah thawkhat in ka hria. Ka nupui hi a chau tawh" a ti deuh nghut a, Abi pawh chuan a hnial zui lem lo

"Justin, ka ṭha alawm" Adrienne hlim lutuk chuan chauh pawh a hre tawh lo

Nghet deuhin a kuah a, a beng bulah a rawn ṭawng leh sup a "Naute i pai kha i hre tawh lo em ni?" a ti dam dup a "Chu lo ah i tha i hman nasat lutuk chuan zanah i che thei lo palh ang" a ti a

"Min fiam chhunzawm reng i tum em ni?" tiin Adrienne chuan lu a thing a

"A rei tawh em a ni duhtak. Min dem viau em ni?"

A rawn nui chhuak hak a "Aw, ka pasal khawngaihthlak" Adrienne chuan khawngaih hmel deuhin a aw a han siam danglam a, a sam tuai thur sakin "Tihpalh" a ti a

Justin chuan a mitko san zeuhin a han melh ve leh a "Tihpalh tih hi ka pawm tawh lo. Min rulh ngei chu a ngai a ni" a ti a

Adrienne chu lo nui ker ker in a dul a dawm a "Ka pum a naute hi i theihnghilh em ni?" a ti zawi ve sap a

"Lungngai suh. Ka theihnghilh dawn lo. Mahse ka kaltir dawn chuang lo che" a ti a, Adrienne chu a nui nasa mai. Justin chuan a lamah a pawt hnai lehzual a, a hmuiah fawh sakin "Ka hmangaih che, Adrienne" a ti a

Adrienne pawh a mit chhingin thawk a la vang vang a "Ka hmangaih che, Justin" a ti ve leh a

Abi chuan mikhual te an rawn thlen thu a rawn hrilh a, khualchhawn lamah kal nghal vat turin a ti bawk

Metre za vel ke a kal leh a ngai dawn a, Justin chuan Adrienne chu a pawm kang lawp a

"Justin min dah thla rawh, ka kal thei alawm"

"I thei tih chu ka hria. Mahse i chau ang. Chau thiang i nih loh kha aw"

Adrienne chuan mitko a san zak a "Zanin atan maw?" a ti a

Justin chu rilru nat hmel deuhin a han awm vel a "Naute tan mawle. Mut dun ringawt ka rilru ah a awm emaw i ti a ni maw?"

A rilru nat hmel em avang chuan Adrienne pawh a inthiamlo ve lutuk. Mahse Justin hi a hrechiang a, hmangaihna chen dun a chak ṭhin in insum har a ti ṭhin alawm. A chang chuan a sawifiah thiam bik chiah lo. Inhiptawnna nghet tak mai an nei a, an inhlat rei thei tak tak ngai lo. Khumah phei chuan an inrem lutuk mah mah. An hahdam vawng vawng ṭhin. An inkawmngeih hle bawk a, chung zawng ai chuan an inhmangaih a, tu emaw zawk zawk tel lo chuan an dam thei lo hial ang

A pasal chu a han thlek vang vang a "Ni e, mut dun hi i ngaihtuah reng maiin ka hria" tih el deuhin a han fiam leh a

Justin chuan a rawn thlek vang vang a, a nui suk a "Min hrechiang hle a nih hi ka nupui duhtak"

Adrienne chu a nui chhuak hak a, Justin a darah a bei hle hle a, a ni lah chuan a zo vah vah bawk si. A kawrfual hak pawh chuan a tichau pha lo a ni ngei ang

"Nizanah ka pa'n min rawn bia a"

Adrienne chuan meng zau kawkin a lo melh a, a chhunzawm hun a lo nghak deuh tawp mai

Justin chu a nui a "Ngaihdam min dil ve ta alawm. Ka hlimna hi a pawimawh ber tih a hriatchhuah thu min hrilh a, kan haw hunah chuan tu pawh lo ni la, an pawm tur thu che min tiam asin"

Adrienne chu a hlim lutuk ringawt. Justin a'n a chhungte hriatthiam tir tura a beih nasat zia a hria a, Adams Industries aṭanga hnawhchhuah hial pawh a tawk kha a ni a, mahse a thinlung thu a ngaithla zel tho mai a ni

Gate chu an thleng ta a, Abi chuan lo nghak rih lawk turin a hrilh a, an luh theih nan an lo hawng a

Justin chuan Adrienne chu a thlah ve ta a, an thawmhnaw an siam rem sawk sawk a, mipui lo ri nuaih nuaih thawm an hre nghal. Adrienne chuan an thawm aṭang chuan mi panga an niin a hria

Justin a han melh chuan a lo nui mai mai

"Ka chhungte khan mo anga an pawm thlap theih nan che ka hrilh thlap a"

"Chuan?" Adrienne chu a zam lutuk

Justin chuan sam et hian "Ka hlim phawt chuan an hlim ve mai tur thu min hrilh a" a rawn sawi zawm leh a "Inneihna min hmanpui turin ka sawm tho a, mahse an hre tlai deuh a ni maithei. khawlchhawnna hmun an lo thleng ve thei hram

Adrienne chu a meng zau kawk a "Eng a?"

Justin a'n a sawifiah hma chuan huana ṭhutna lo awm ho ah chuan a hruai phei a, hla deuh aṭang chuan roses tam deuh an hun a hmu thei a, phengphehlep an thlawk chum chum bawk

Music chu a ri reng a, an mikhual te pawhin kut an beng sup sup mai. Inneihna hunserh an hman ai khan tuna an mikhual sawm te hi an tam tawh zawk. River chu Mason leh Abi bulah a ṭhu a, Mike leh James New York a Justin a ṭhiante pawh an lo tel thei

Yuan leh Jill chu Jada leh a kawppui bulah dawhkan khat an kil ho a, an piah deuh lawkah a mi hriat ṭhan em em hian Adrienne chu mittui tling kuangin a lo en a, a ni pawh a insum thei bik lo

Justin chuan Adrienne ṭap a hmuh chuan a pu zawn awmna lam a pan pui a

"Ka pu" Mr Miller chu chibai a buk a

Adrienne pawhin a pa chu a vuan a, Pu Miller chu a lo nui a

"Pa" ti sapin nghet deuhin a kuah a, a thiltih vang khan a la ngaidam chiah chuang lo. A nu phei chuan khin a la tum fan a nih kha. Chung vel chu engah mah a ngai tawh lo. A pa lo tel ve thei chu a lawm tawk viau a ni

"Ka chhuang lutuk che Yen. Inneih ka rawn hmang hman lova pawi ka ti. Justin a'n ticket min pe a, mahse a hun takah kan thlawk thei lova, chuti ni lo se chu keiman ka hruai dawn che asin le"

Adrienne chu lo bu nghat in a mittui a hru zeuh a "A pawi lo pa, i lo thleng thei tho alawm" a ti a

A pa chu Justin lam a hawi a "Ṭha deuhin lo enkawl rawh aw?" a ti a

Justin chuan a kut a vawn sak leh a "Tehreng mai" thutak zetin a ti a

Chumi hnu chuan Adrienne chu hmun dangah a kalpui leh a, a nu leh pa ṭhutna bulah a ni

"Nu, pa, ka nupui Adrienne a nih hi" a ti a

Adrienne chuan zam deuhin a han melh dun a, Christine Adams chuan mittui tling pur chungin Adrienne a rawn kuah a "Kan hmu har lutuk che a, pawi ka ti bawihi. Mahse ka fapa i hmangaih a, hlim taka i siam avang hian ka lawm e aw" a ti a

Adrienne chu a ṭawng chhuak hleithei tawh lo. A lu a bu nghat a, Justin a nu chu a nuih ringawt. Justin a pa'n a rawn chibai a "Kan chhungkua ah kan lo lawm a che ka nau" a ti a

"Ka lawm e"

Justin chuan a la duhtawk mai lo tlat "Nu, pa, Adrienne hming dang hi in hria em?" a ti a

A chhungte chu an bang bo map mai

Justin chu a nui suk a "Ka hmuh tirh chuan Adrienne Miller ania mahse a birth certificate ah chuan Andrea Blanc tiin a indah...." a ti a

A chhungte chu an meng zau kawk a, mit khap sawk in Adrienne leh Justin chu an melh tawn zak zak a

"Mahse chu te chu..." a nu'n a ti ṭan chiah

Nupa tuak khat te an rawn thleng ve leh a, an awmna lam an rawn pan nghal

Justin a chhungte nen chuan inchibai in an biangah inlawmna entirnan an inchuk a

"Tihpalh kan rawn tlai alawm le. A hun takah kan rawn thlawk thei lova" Adrienne nu chuan Christine chu a bia a, Justin a lam hawiin a chibai a

Adrienne a hmu thut chu a phu chiang teh e, a meng zau kawk a, a hmui a hup bawk

"Adrienne?" a ti hau mai

Adrienne chuan a nu a hmu chiah chu nuih tur nge ṭah tur pawh a hrethiam mai lo

"Hi, Nu..." a ti ve ringawt

A nu chuan zawhna ngah tak hmel hian a ka a rawn ang a, Abi chuan phone ah thu a rawn sawi daih a "Pi leh Pu duhtak te u, kan nupa tuak thar te hi lamtualah lam dun turin sawm ang u aw!" a ti a

Abi rawn chet hun hi a fuh nge fuh lo pawh hriatthiam a har tawh

Justin chu a chhungte lam a hawi a, an la ni deuh chuai mai "Nakinah kan la hrilh dawn che u nia, chhungkaw hlim tak kan ni dawn e....in duh ang chiahin. Chutih chhung chu ka nupui hmelṭha em em hi kan lampui phawt ang e" tiin Adrienne nen chuan an inkai phei a, an chhungte chuan dawhkan kilin mak ti lutuk in an la en char char. An ṭhawng thiam ve em bawk a ni

****

End of 41

CHHUNZAWM LEH TUR