The Traitor BY Tlantlani Fanai

[ngaia]

Ni tam vaklo Ben-a te nen kan chen ho leh hnuah an chhungkaw doctor chuan ka rai tih a puang ta a,dawtsawiloh chuan,a dawt leha thil lo thleng tur ka hriat avangin ka hlimna leh lungngaihna chu a inzat rengin ka hria.

Thla khat leh tlem hret chiah chu thu hriat nan chuan kan mamawh a,ka rai tih a chian rual rualin Ben-a chuan a nu leh pate hnena min hruaiin kan inthen thu chu a tlangzarh nghal a.

A nu leh pa te chu an hrilhhai kher mai,mahse an fapain a thil duh a duh tawh chuan an ti tawp theilo tih an hria a,lo pawmsak mailoh chu tihtheih an nei bawk si lo a.

Ka Nu chuan nghet taka min kuahin an inchhungah chuan engtiklai pawha lawm ka nih reng tur thu min hrilh a,Ka Pa ve thung chuan a tupa chu vawikhat tal,a thlalak chauh pawh nise a hmuh ve duh thu a sawi bawk a.

A tawp thlengin an pahnih hian ka chungah an tha em em a,mahse an fapa,ka pasal ber nen kan inkar a tawp tawh chuan nakinah ka hmu leh thei tawh kher angem tih erawh ka hrelo. A fa hian tunge a pa diktak a hrelo ang ka lo ti tawh bawk nen.

News a hriat veleh ka cousin Rinfela'n minlo puih nghal bawk avangin in atanga insuanchhuah chu a har lemlo,bungrua ka ngah vak lo bawk a.
Ka tan chuan unaupa ang a ni,ka nu leh pa te an awmloh pawha min enkawltu ber a ni.

Ka rai chhung an bula cheng hrih turin ka nu te chuan min rawn sawm leh bawkj a,mahse hnarin Rinfela thiante zinga pakhat ka va fin ve a.

U Sangtei chu ka awmna thara nuam ti taka ka awm theih nana min puitu niin a fel em em a,ka kalna leh thiltih engkim min hriatpui zelin fimkhur deuhin min enkawl a,chutih chhung chuan thla thum pawh alo ral der mai.

"Awmawm,vawiin chu Noodles kan ei dawn ami niang? Sangha leh seafood te i ei thei em?"Ka chenpuinu chu kawngka atanga rawn dak kerin ka phalna a lak hnu chuan a rawn lut a,dawhkana ka laptop dah ka enna atang chuan hawisawnin ka nuih sek a.

Rinfela tihdan takin ka that hma chu in atanga hnathawh phalsak ka ni a,ka morning sickness leh ka rai vanga zawng zawng nen. Ka thawhna hmun hi an fakawm hi ka tia,in lama thawh theih tur dah hrangin rai tantirh atang an employee te in lam atanga hna thawk turin an ti mai zel a,inthliarhranna a awm bawk si lo a,hmeichhe thawhna chi tak ka ti mai.

Rinfela chuan U Sangtei chu ka that leh thatloh endik tur leh min thlithlai turin a ti reng a,hna ka kal duh vanga tha anga ka awm thin chu min simtir a tum a ni ber,a thian kawmngeih tak min ventir tlat zui bawk a.

U Sangtei chu mu mit lian tawk nei ang mai hi a ni. In chhunga ka che vel chu ngawi rengin chik zet hian min en reng thin a,a inthlahrunawm thei viau nain tianga min enkawla min ngaihtuahtu an awm hriat hian a nuam ve reng. Ka chenpuinuin biak pawh min be duh lo se, ka awm ang angin min awm tir se chu ka inthlahrung zual ngawt ang.

Bakah a thiltih hu a tha lam a ni tih ka hria, doctor a ni bawk a,a hna nen a inkaihhnawih miau a,enkawlna tha ber kha ka dawng lo theilo.

"U Sangte,ka thil ei ang kher i ei a ngailo a nia,ka danglam tan bawk sia ka thil ei duh ho hi i ei ve duh kherlo ang," ka tih chuan a nui sek a,mahse engatan mah a ngailo niawm takin a dar chu a san ak a.

"Thil zawng zawng deuhthaw ka ei thei alawm,ka landan anglo tak hian eitur lamah ka khirhlo ania,"a tih chuan ka lo nui ker ker a,sana ka en chuan tawp a ngai tih ka hria.

Chhun thil ei alo hun der tawh.

"Tinge engtiklai pawh hian zawhte thinchhe deuh hi i an em em reng le,mahse hei, nangmah ni ta ila chu ka ni ve tho anga. I mu ngai reng reng em?"ka tih chuan a lu a bu nghauh nghauh a.

"Ka mu tha lutuk,darkar nga vel a ni em aw?"a phone a en reng vang chuan eitur a chah tur a en a ni ngei ang,a bula kal hnaiin a phone chu ka va bih a.

"Noodles ei chu pawi ka ti miahlo,I sawi takah chuan Donut ei ka chak tawp,"chocolate donut ka mitthla pah chuan ka chil a rawn put thei,ka reaction a hmuh chuan U Sangtei pawh chu a nui suk a.

Thla thum chhung leka tiang em ema ka nel thei hi a mak zawk.

Mi tawng tlem tak a ni a,mi a be khat em em bawk a,chuvang chuan sual hmel angin a lang thin,mahse a chezia ka hmuh te leh a awmdan ka hmuh thinte avang hian mi fel leh rilru tha tak a ni tih ka hre thei a ni. Hmeichhe tha tak a ni.

"Hna thawh tur ila ngah em?"ka laptop thlek zeuh pah chuan min rawn zawt a,ka lu ka lo thing vat a.

"Aih,vawiin chu ni chanve chauh ka la a. Ka in check-up hun a ni tih ka hre reng alawm,ka nu. Min ringlo takzet a nih hi tiraw,huh?"ka hmui chu tihpawrh khumin ka kut ka kuangkuah than a, rawn nui chhuak hakin ka sam ah a rawn chul a.

"Engmah ka sawiloh kha. Thil ei zawh hnuah ka shift a nih tawh dawn vangin Hospital-ah ka kal dawn a,ka rualin i kal duh em?"A hospital thawhna hi ka rai hnua ka monthly checkup neihna hmun ve tho a ni.

Hemi hospital hi U Sangtei nen min inhmelhriattir laiin Rinfela khan min kawhhmuh a,ka lo pawm nghal a. Chubakah ka hnathawhnaa thawkte pawn an a pan thin a ni ve tho a,a pawina ka hrelo.

"Tehreng mai,haw lamah taxi ka hmang mai ang a. Ka lawm lutuk." U Sangtei chu ka nuih sen sen a,thil a order zawh chuan a phone chu a off a.

"A ho lutuk,kan kalna tur a inang tho alawm. Ka inbual dawn a eitur a lo thlen hunah i lo la thei angem?"A room lam a pan tawh a,mahse thil lo la tura min tih vang chuan a dingin a rawn hawi let a,pha buai loin ka lu ka lo bu nghauh nghauh a.

"Tehreng mai. I inbual loh vang anih chiah hi thil engemawni rim ka hriat,"tiin ka chhaih a,a rawn hawi let paha mak tih hmel deuha min rawn en chuan ka lo nuih vak vak a.

Ka thil sawi a duhloh vanga a react dan chu a lawmawm kher mai.

"Hey,tukin zinga ka lo haw hma khan ka inbual aw,chuan ka mut hmain ka inbual bawk,"a ti chhuak nang nang a,ka room atanga ka chhuah hma chuan ka nui leh te te a.

"Ka ti mai mai a nih kha. Kal la va intifai rawh,night shift i nei bawk tiraw?"Ka room chu kharin living room lamah chuan ka phei a. U Sangtei chuan zawi sapa ,"Aw," a tih hnu chuan a thaw hak a,a room lamah chuan a phei hna hna a.
Show post links
Top