TAWNMANG LASI CHAPTER 9 LAST BY MAWITEI BAWITLUNG

[mawitei bawihtlung]

TAWNMANG LASI


CHAPTER 7



Pûk kotlanga a ṭhu chu panin a sîrah chuan ka va ṭhu a, a bânah ka kut rawlh lûtin a dârah chuan ka beia “Min la hua em?” ka ti sep chu a lu a thing zui nar nara, khawvar a hnai tawha thla êng chu a mawi zual nimai hian ka hria a, lung a ti lêng vawng vawng bawk.



“Ka hmangaih che a lawm, kan haw veleh kan innei ang, ka pa ka bia anga a remti maiin ka ring” a tihchuan ka lo pawt chat vata “Tunah tut tut inneih ka duhlo, kan in kalsan chhan a nih kha hre reng rawh, nghâk deuh tawh ang. Tichuan inhre chiang chungin hmalam kan pan dûn dawn a lawm, i kiangah ka awm reng tawh ang. Mahse i hriat angin in khaw mite chuan sal hmuhin min la hmu a, chutia min neih leh si chuan mi ṭhenkhat ngaihdân a nilo thei, min nghâk rih rawh” ka ti sapa.




“Chutiang ka ngaihpawimawh lo, ka nei duh che a nih chuan tumahin sawi theih an neilo, min nei duh lo zâwk a nih kha ” a tihchuan ka thaw haka “Chutiang a nilo, kan inhmu ve leh chauha, nghâk deuh ang ka timai a lawm, kan pahnihin buaina a awm tawh loh hunah, tûnah pawh ral ramah a nih hi kan awm. I nute nên in la in ngeih lo bawka, hmangaih lo che ni ila ka engkim ka hlân lovang che, Hrangkima nên khân in va in ang reng reng ve” ka tihchuan a nui suka.




“Min enthla tura ka nute'n an rawn tirh a nih kha, mihring a ni nângin lasi puihna in tûn dinhmun hi a thleng a nih hi, ka hmêl a an avâng hian keimah emaw an tih phah fo a sin, i rilru tibuai tura an siam a nia, mahse ilo fing hlauha an bum theilo che a nih kha” tiin a nui suka, a awmdân hi a cool raih renga, hmeichhe mize duh zâwng tak a pu a, a hmêlṭha lehzêl bawk nên a zûna uai hi a na ngawtin ka ring, keimah ngei pawh a zûna uaiin ka tâng nghet hle chu a nih hi.





“A va mak ve, ka hmuh tirh khân nangmah emaw ka tia, ka lo fâwp lo chauh” ka ti chu a rawn hawi nghal vuta “Tawk hlek suh ang che, i hnaih a ni tih ka hriat vaih chuan” tiin a ngawi zui daiha, a tha hrui rawn che ṭalh ṭalh ah chuan ka thusawi chuan a ti lâwm vak lo tih ka hre thei.




“Ka hnaih dâwn lo, ka engkim i nih hi. Nang chu ka mipa hmangaih i nia, a ni chu nangmah ang tu satliah mai mai a ni thung, in danglam lutuk. Ka hmangaih i nia, tûnah chuan tu mipa mah nangmah bâk ka melh theilo” tiin a dar nghêng chuan ka hawi kuala.




Ram ngaw thim nguk mai, thla in a ên zawnga lang paw ngauh si chu mawi ka ti, tûnlai angin thing an tê ve loa, thing lian pui pui leh ngaw chhah pui pui hmuh tur a tama, tûnlai angin khaw êng uar hmuh tur a awm heklo, engkim chu a lunglên thlâk em em vek bawk.



“Ka hmangaih che” ka ti leh sepa, ka tawng tawh ngai dâwn lo emaw ka tihchu tûnah chuan ka ta a ni leh ta. “Nang ai nasa khân ka hmangaih che tih hre rawh” a ti chu ka ner nâng a “Keiai chuan a nasa bik lovang aw” ka ti chu a rawn nui deuh hawka.





“Nasa deuh chuan ka hria, keichuan kalsan che ka duhlova, nang chuan khawvêl dangah min kalsan a nia, i rawn lêt mai lo lehnghâl” a tihchuan chhân dân tur ka hre tawh der lo. Ka ngawi chiang lutuk, enge han sawi tûr pawh ka hrelo, a sawi dik miau sia lawm.




Chutah ka lamah rawn âwn hnaiin ka hmuiah chuan dam raih hian a rawn fâwp a, ka lo chhâng ve nghal vat bawk. Pûk chhûng lamah chuan min luhpuiin khumah chuan min muta “Muhil leh rawh, naktûkah kan haw dâwn a nia” a tihchuan ka bu nghata.




“Ngurkim ih i châk reng em ni?” a kap lam puar luah chu ka ena, a en ve vut rualin a nui nghal huka. “I bulah chiah, hmeichhe dang bulah chuan nilo e” a tihchuan ka lei ka chhuah zuka “I hrisêl e” ka ti leh chu min rawn bawhin “Lasi ka nih hi, mihringte nên chuan huang khatah min dah suh, tûnah pawh hian ka insûm hrâm hrâm a nia” a tihchuan a sawi dik ve tho.





Lasi a nia lawm, keini ai danglamna tam tak an nei ngei ang chu. Thawnthuah pawh lasi hmeichhia chu an lerh in pasalṭha an zâwl kuala, pasalṭha tam tak phei chu nupui nei lo in an awm phah ṭhin a nih kha.




Ngurkima chu ka en vang vanga “Thawnthu ah ka lo hre nual tawha, hmeichhia i zâwl kual ve vak lo maw? Chutiang a nih vaih chuan ka kalsan vang vang ang che, mi lerh deuh ka duh miahlo a nia” ka sawi zawh rual chuan ka chalah a rawn tuk lawlha, ka aiah zui ṭhat mai.




“Hrangthankim” a hming pakhata ka ko kher chu a duhlo nge ka hnute chu a rawn ṭhâm ṭawk a “Khatianga min ko leh a nih chuan ka chêt pui leh ang che, i sawi ang khân lasi chu” tiin a kap lam chuan min rawn nawr khera, ka thaw hak ringawt a sawi tum ka hre chiang lutuk.




“Mu mai mai rawh, ka...ka tho dâwn” ka ti bah niah chu a rawn nui leh hawk hawka, min khan bet tlatin “Tikhan mu rawh, mipa ka nih hi lasi tlangvâl in hmeichhia an zâwl thu i hre tawh ngai em ni? Chutiang chu lo ni tehreng pawh nise keichuan nangmah chiah ka zâwl che tih hria la, i zûnah ka uai hlum lo chauh zawk a nih hi” a tih tâkah chuan ka thaw huai mai.




Inherin ka kuaha, ka mit ka chhing zui nghal chial bawk, zîng ka harh leh chuan Ngurkima chu a lo che leh mawlh mawlh tawha, sa chhum rim hmui ram ram chuan ril a ti ṭâm nghâl rawih rawiha, ka pum chu a ri kuar kuar bawk.




“Ilo tho tawh maw? I mutui em?” a tihchuan ka bu nghata, ṭhu chhuak vatin tui ûm chu ka bana, ka ha te chu nâwt in ka hmai ka phiha, ka khawvêla lêt zawk chu ka ngai hrim hrim, ka ha nawhna tur pawh ka neiloa, helaiah siam ringawt dâwn ila siamna tur a awm der silo, Ngurkima erawh lasi tih takah a ha a var nalh renga, a thaw pawh a rimchhe ngai lo. Englai pawhin a fresh vur reng mai.





“Ngurkim lêt leh zawk chu ka ngai a ni, ka ha nawhna tur te ka inbualna tur te ngaihtuah ka ngai” ka tih lai chuan “Kha hei hi hmang rawh, ka siam chawp a nih kha. I mamawh ka ringa, ka sawi tawh ang khân ka ngaihven reng che a, hnaih thei lo che mah ila i che tla ka thlir reng ṭhin“ tiin ha siai ang chiah chu min rawn pe a.





Tûnlai thiamna mil zêlin a insiam rem thei chu a nih hi, lasi a ni bawka. Thil tih theihloh vak pawh an nei lo tih ka hria, lawm zet chuan ka la nghal sawk sawka “Hetiang kawl reng te chu tinge a hma khân i sawi vat loh, lo zêp reng kha a ngai lo” ka ti chu a nui ringawta.




“I mamawh thu i sawi hleinem, i mamawh thu i sawi hunah zel thil ka tihsak thei che, i mamawh lêm loh chuan pêk che ka duh bik lova” a rawn ti chu chhâng tawh lo chuan ka ha chu ka nâwt nawn leha, tûnah chuan nuam ka ti ta sawt mai.




“Chaw ei ang le, a hmin tawh” tiin changel hnahah chuan chaw chu a bun chhuaka, sakhi sa a chhum chu rawn chhûng veleh in a rim chuan min ko chiang teh a sin.



Hmarcha râwt leh chi a awm bawka, duhtawkin kan ei teh ang. Ṭhu thla vatin amah nên chauh kan ni bawka ka zak peih si se lo ka bar nghal tawn tawn mai, sakhi hâng chu hâwp khalh khalhin a ti ṭha ṭha chu ka eia, Ngurkima pawh chuan a ruh a a ti ber te chu min rawn pe zel bawk. Min ngaihsakna avâng pawh chuan nuam ka ti.




“Hetiang thil tui ka ei lohna hi a van rei tawh tak, khuaah kan lêt anga min ti duh dah leh hrep ang tih ania ka hlauh, danglam tawh miah suh aw. I nau Saikimi kha ka ngeih miahlo, unau angin a en ve miah lo che a nia aw, hnaih lutuk hauh suh ang che” ka tihchuan min rawn en vuta.




“Kei vak rawlai mai mai tur min enkawltu te an nia, an chungah ṭhat kan chhuah ve angai alawm, an mahni avânga hetiang zahawmna hi nei thei ka ni bawk. Nangpawhin mil hram hrâm i tum dawn a nia” a tihchuan ka chhâng tawh lo, ka ner sak sak ringawt.




A thusawi dânah ka thu chu zawm a tum hmêl viau loh “I chhûngte an nih avâng chauhin ka insûm ang, mahse ka sawi tawh kha Saikimi laka ka chêt dân tur erawh ka sawi theilo, amah avânga buai pawh ka duh miah lo bawk. A awm dânin a zir loh viau chuan ka ngawi mai mai dawn lo a nia” tiin ka tho chhuak zui ta daiha.




Ei leh tura min tihna pawh ka chhâng tawh lêm lo, khanu Saikimi thlavang a hauh kha ka duhlo, a mah a ngaizawngin min tiduh dah thei bawk nên ka thin a rim leh ṭun tawh mai. Ka hriatna hloh lai phei kha chuan min tir kual reng a nih kha “Sangpui” ka eih duhlo, a duh leh min zawng kual ve rawh se.




Eih duh miah lo chuan pûk pâwn pûk aṭanga chhuaha hmuh theihlohna laiah chuan ka ṭhu daiha, min zawng tih hriat takin a au tuar tuar bawk. Ka inthiam chiah lo nên manganga a au ka hriat tâkah chuan ka chhuak zuia “Hetah ka awm” ka tihrualin mangang lutuka a hawi chu rawn inherin ka lamah chuan thli ang maia chak chuan a rawn thleng phei fua a, min kuah nghâl thlawp mai.



“Min tih hlauh thâwn zia i hria em? Ka....ka .. chân leh dâwn che emaw ka ti a sin” a aw rawn chhuak avâng chuan ka en vata, chutah a mittui tla ka hmuh chuan ka inthiamlo nghal ngawih ngawih mai. Keimah avângin a mittui a tla a maw? Chupawh ka bihruk vâng mai maiin lehnghâl.




“Ka tihpalh, ka kalsan hleinem che ka lungawi lo deuh mai mai a lawm” ka tihlai chuan ka hmuiah chuan a rawn fâwp tawn tawna, nghet zetin min kuah bawk. Ka kuah lêt ve vata, hlauthâwng tih hriat lutuka a la thaw kâwk kâwk chu a hnungah ka bensak thek theka, “Ka kalsan dâwn lo che, i kiangah ka awm reng tawh ang. Saikimi thlavang i hauh tih ka hriat khân ka thinrim mai ania, ka kalbo dâwn a nihchuan ka hrilh ngei ang che” ka tih tâkah chuan a thaw huaia.





“Ka farnu a ni a, a bâk engmah a awm lo. A ni rilru tur erawh ka ngaihtuah lo, ka lakah eng rilru pawh lo pu sela ka tân a pawimawh ve lo. Nangmah ai bâka ngaihpawimawh ka neilo tih hre reng rawh” a tihchuan ka bu nghata, chutah min zuanpuiin van lamah chuan kan kâng leh ta delh delha, a âwma bei chial chung chuan kan hnuaia ram ngaw chu ka thlira, lei lam aṭang chuan tumahin min hmu thei hauh lovang.




A chhan chu lasi te hian an thil tihtheihna an hman hian hringmi te hian an hre thei ngai hauhlo, an duh a an ti lang lui a nih loh chuan.



Reiloteah khaw kawtchhuah chu kan thleng zuia, a ṭhiante kha an thleng vek tawh tih pawh ka hria, khaw chhûngah chuan thâwm a lo awm nuaih nuaih bawk. Muangchang chuan kan inzui lût a, Ngurkima zâwk chuan ka kut chu kaiin hmalam pan chuan min kalpui zêla.




Mipui min lo hmu tu a piang chuan mak ti tak chungin min zui duah duaha “Lawmpa in lo lêt tawh maw Zaliana leh Saichhunga chu an rawn lang zui zata, Ngurkima chu an rawn kuah thuak thuak bawk. “Ka pa te engkim in lo hrilh ang chu maw?” a tihchuan an ni pawh an bu nghata.




Lal mual kan thlen rualin lalin leika aṭang chuan Lalpa leh a khawnbawl te chuan min lo en ṭhap a, lalfanu Saikimi ngei pawh a lo awm ve bawk. Min ngei hmêl tak chuan min lo ena, Ngurkiman min kaihna a hmuh phei chuan a thinrim hmêl viau mai, Lalpa pawh chuan mak a ti tih a hmêlah a lang thei.





“Ka pa kan lo lêt tawh e” a tihchuan Lalpa chuan a aw a thian kharha “Engkim in rawn chingfel chu a ṭha e, kha enge a awmzia?” kan inkaihna melh chunga a rawn tihchuan Ngurkima chuan min enin a nui suka.



“A ni hi he khua ka rawn luh tirha ka hmeichhe hloh tak ka sawi, ka lawmnu Ngursangpuii chu a nih hi, rei tak chhung kan in hloha, ka chân tawh emaw ka ti bawk. Mahse hei hriat lohna lamah kan intawnga, a tirah kha chuan ka huat deuh avângin in lakah pawh hmelhriatloh angin ka bia a nih kha, mahse ka pa hei hi ka hmeichhe hmangaih ka sawi fo kha a nih hi” a tihchuan ka lo lâwm veng veng mai.



Thu khuh dân pawh a hre hle bawk, mipui chu an phun nghal mur mura, ni e khawnbawl fanu kha a lawmnu angah an lo ngai tawh miau si a mak ti tur pawh an ni rêng a ni.