TAWNMANG LASI CHAPTER 9 LAST BY MAWITEI BAWITLUNG

[mawitei bawihtlung]

TAWNGMAN LASI



CHAPTER 9 LAST


“Ngurkim ka tlâwm ka tlâwm” tiin ka tlân nui uar uara, thlam lam pan chuan ka tlân ve zel bawk. A ni pawh ka hnungah nui hawk hawk chungin a rawn tlân ve bawka, ka chau lutuk chu thlam tualah chuan dingin thâwk ka la hak haka.



Ka lu chu a rawn hai muai muai mai, “I ṭha em Sangpui” ka bul ah rawn dingin min chelh vata, kei erawh ka awmdân ṭhin te, ka thlabi kim leh kim loh te chu ka ngaihtuaha, ka harh nghâl kawkin ka hria “Ngurkim, nau ka paiin ka hria” ka tihchuan min rawn en vata.



“Ka awmdân hi ka thlabi a kim tawh hauh lo ania aw, ka rai a niang” ka tih leh tâkah chuan min pawm kâng nawlhin a nui nghal hawk hawka, keipawh ka lâwm takzet. Tûnah chuan a sawi ang ngeiin kan indanga, Lalpa te pawhin an dang ta bik lo, a lo erawh kan la enkawl chhunzawm reng thunga, ka nu leh pa te nên pawh in rem taka awm an thlang ta bawk nên boruak chu a ralmuang tawh viau bawk.




“Tunah chuan chhûngkua kan din ve thei dâwn ta e, nang leh kei, tumahin min ṭhen hran ka phal tawh lovang. A hma a kan tih theihloh kan suangtuahna te kha an thleng dik ve dâwn ta e, Ngursangpui nang hian min tihlim takzet tih i hria em” tiin ka kâwngah chuan dawmin a âwm pharh darhah chuan ka kut in ka nam khalh ṭaia.




“Ka hmangaih lutuk che,” ka ti chu ka hmuiah a rawn fâwp leh zauha, “Keipawhin tirawh le thlam chhûngah i lût tawh ang hmiang, chaw fâk vat ila i ril a ṭâm tak tak hma in” tiin thlam chhûngah chuan kan lût zuia, kan mei chhêm pawh alo la nunga, thingte chu tuahbelhin ka che zui sawk sawka.




Ngurkima erawhin thlâm bula maian chu a lo sik thunga, a rawn luh rual chuan hih pahin kan inchhaih a, nau ka pai chuan a tihlim ve hle a ni tih pawh ka hria.



“Hmeichhia ngei rawn piang sela, a pi anu duh miahlotute mithmuha thil tithei leh hmêlṭha ni turin“ a tihchuan ka ngawi vang vanga, keichuan mipa ka duhzâwk a. Chu erawh ka sawi duh lo thung, eng mipawh rawn piang sela amah nêna kan fa a nihna tur erawh chuan min tihlimin ka hmangaih ve ve dâwn tih pawh ka chiang.



Maian ka thlâk zawh chuan thlâm tlaitlanah chuan ṭhu in a dâr ka nghenga, a niin ka dul chu a chûl hauh hauha, nghet zetin min kuah bawk. “Ngurkim duhthusam i nei ve em?” ka tihchuan a nui suka.



“Nang nêna awm dun chiah hi ka duhthusam awm chhun a ni, nitin ka nghâk che a. I rawn kîr leha ka kianga i awm kha ka duhthusam ber chu a ni, nitin ka ngai che” a rawn tihchuan ka nuih saka “Keipawhin ka ngai che, keichu ka duhthusam chu maw? Tûn ang chiah hian inneiha, kan fate nên hlim taka chhûngkua din duna awm ho ka châk a, chuan a thleng chho mêk zel bawk. Hmelma te, buaina te hi nei tawh lovin thlamuang takin awm thei ila tih hi ka duhthusam ani” tiin ka phun sap sapa.





“Ka tiam a che, eng buaina mah i tawh ka phal hauh lovang, tumahin min ṭhen hrang leh tawh dâwn lo ka tih kha ka timai mai lo ania, i kiangah ka awm reng anga. Ka hmangaihna zawng zawng nên ka enkawl ang che, khâng i duhthusamte pawh kha kan ti vek ang” a tihchuan ka nui var var mai.




Antui chu chawk leh zauh ṭhin in hmarcha chu ka râwt zuia, ani pawhin min lo en reng mai. Hmanlai mipa chu hmeichhia an pui mai mai ngailo tih ka hria a, phût luih pawh ka tum chuanglo.



“Ka chau hluah hluah reng mai, keimah tawp hi ka zawi” ka ti chu a rawn nui haka “Chaw fâk zawhah i mu dâwn a nia aw, hlo thlawh kan âwl tawh tho hi, kei erawh vauah sangha kan va vai ange, naupai lai chuan sangha ei tam a ṭha an tih kha” a ti ve ngei lehnghâl.




Nuih lam lam a ti za, chutiang thu a sawi ve ngei chu a inhmeh lo hi kan ti khawpa “Rei suh aw, keimahin ka awm rei ngam hauh lo ania, tûnlai phei chu ka hlauthâwng riaua, eng emaw thleng tur ang tlat hian ka hria a nia, rawn lêt vat rawh aw” ka tih tâkah chuan a bu nghata.




Chaw te kan ei kham chuan a sawi ang ngeiin vau luiah chuan a kal zuia, keipawh thlamah chuan ka mu hahdam ar ar mai. Thlifîm rawn thaw heuh heuh nên chuan ka hahdam sawng sawng bawk. Reiloteah ka muhil zui ta riai riaia.



“Sangpui Sangpui” min rawn sawi nawk nawk avâng chuan ka mengchhuak riai riaia, Ngurkima chuan min lo en reng a “Ilo lêt tawh elo? Ka la mutui asin, tinge a” tiin ka mit chu ka nuai nak naka “Haw a hun tawh viau mai, kan haw mai dâwn em ni?” a rawn tichu ka tep chiap chiapin ka ena.




“Riak mai ang, ramah hian a nuam zâwk. Khaw chhûng chu a nuamlo, heti hian a nuam zâwk a lawm, tihian awm mai mai ila. Khaw chhûngah buaipui tur kan nei chuang loa, lo ah hian riak mai ang” ka ti chu a ngawi deuh vung vung mai.




“I haw peih lo viau em ni?” a tihchuan rang zet in ka bu nghata “Um tihian a nuam, tihian puan kan riah tho a, lo ah hian awm ang. Khawchhungah chuan buaina a tam, tihian a nuam daih zawk” tiin ka lamah chuan ka pawt mu a, a ni pawhin min hnial lo chuan ka bulah rawn mu in min kuaha, chutia kan awm leh tâkah chuan a danglam leh tawh tih ka hria.



Lasi a ni a, keini ang a nih loh avâng pawh hian hriatthiamna chen ka neia, a mihringa mah heti hi kan ni a. An ni phei chu a sawi ang khân mihring pângngai an nilo in mihring te ai a lêt in an sâng zâwk a ti a nih kha, alamah chuan inherin ka kuah a, ka zut nghal heuh heuh bawk.




“A pawi angem?” a rawn ti sup chu a aw ah chuan a tim deuh tih ka hria, “A ṭha mai ang, a pawi in ka ring lo, ka pasal i ni tawh a lawm” ka tih tâk sepah chuan a rawn che zui a, zanriah pawh ka ei peihloh avângin a ni pawhin a ei biklo, hma takah thlam chu khâr phui in kan mu zuia.




Kan titi pah bawka, thlam bulah chuan perhpawng leh khauchher an hrâm chiah chiaha, kan piah ngaw ah chuan chhimbuk a hrâm dût dût reng bawka. Boruak chu a hahdam thlâk viau mai, Ngurkima chu nghêng hnai talh talhin ka kuah nghet sauh sauha, fur lai a ni bawk nên khua a vawt viau mai. Tûnlai angin in a la tam loa, ngaw chhah pui mai an la tam avângin khua pawh a vawt zual reng mai.



Khûr hlak hlakin puan chu ka sin ṭha sauh sauha, vawt ka ti tih a hria nge eng emaw chham supin puan chu a rawn hmul thepa, a nal han bawk. Chuan a lum nuam takzet, nui ver verin “Dawithiam bialpa ka neia, engkim hi a nuam” ka ti chu a rawn nui ve haka.




“Ka hma hun li awm tur leh ka tûn hun thlengin ka kiangah hian awm reng ang che” tiin min kuah hlu hlua, ni e keipawhin ka kalsan tawh lovang. Hetiang khawpa ka tâna awm leh min hmangaihtu hi keipawhin ka kalsan leh tawh ngai lo ang, a lak aṭanga bo daih hi ka hlau hluah hluah zâwk.





“Ngurkim ana lutuk” ka nau vei chu ka in pet fan fana, in chhûngah chuan Lalpa leh khawnbawlte chu an awm ve a, an ni erawh pindanah rawn luh phalsak an nilo thung. Ngurkima erawh kalsawn duh heklo ka bulah chuan a awm ve ngar ngara “Ka thi dâwnin ka hria” tiin ka au ṭhat ṭhata.




“Chutiang sawi suh, fanu min hrin sak dawn kha” a tihchuan ka nui haka, pi Kawli chuan ṭang turin min lo fuih ve reng bawk. Mahse a na takzet, “Nau i har hle maia, a vawikhat na a nih vâng te pawh animai thei” tiin ka pum chu a rawn chula, chutah san chu pe leh vakin ka zâl ta hnawka.




“E he a rawn chhuak nawlh mai, mipa lehnghâl” an tihchuan ka nui saka, Ngurkima erawh fanu a beisei laia fapa ka hring chu mak a deuh nge a en vung vung mai.




Naute chu hru faiin an tuam zui mawlh mawlha “A piang him e, a kut ke pawh a kim vek a lian em em mai lehnghâl, hei vâng hi a nih hi i hrin har em em, a hmêlṭha lutuk” tiin nau chhartunu chu a phûl hluta



“Ngurkim i lâwm lo êm ni?” ka tih tâkah chuan rawn harh chhuak zawkin “Chutiang anilo, ka hlim lutuk zâwk alawm. Fapa ka nei ve ta e, tûnah chuan fanu chu khuanu'n a rem ti rih lo a nia nga, heipawh ka duat tur tho a nih hi, ka lâwm e” tiin ka chalah chuan a rawn fâwpa, keipawh ka thaw huai mai.




A duhlo ang tih ka hlau hman kha ania, Lalpa te pawh an phûl hluta, ka fapa chu an thinlung takin an lawm tih a hriat “He Lalram rawn tung dinga, hmunsang taka daha, kan khaw tâna pasalṭha mipuite innghahna tlâk rawn ni tur, tlangtin thanga a hming an hriat ringawt pawha mi tam tak ti khûr tu ala ni dâwn, he Lalram rawn rochung tu ni turin a hmingah Ngurthanzaua ni rawh se” Lalpa in a tih tâkah chuan keipawh chuan hmuhnawm tizet hian ka ena.




He ka fapa hian chhungkaw inremna rawn thlen sela, remna leh muanna thlen tu a nih ngei ka beisei.



Tûnah chuan ka hmangaih bulah awm in chhûngkua kan din ve ta e, min ṭhen hran tumin mite'n min beihna kârah pawh a mi hmangaihna chuan min hruai lêtin a tiam ang ngeiin chhûngkua chu kan din ve ṭan dâwn ta e.



Ka hmangaih ka Pasalṭha leh ka lasi tlangvâl kha a ni miaua.

A TÂWP TA, A FAMKIM LO VIAU ANG, PEIH LEH A FAPA HIAN KAN ZAWM LEH DAWN ANIA