TRAITOR BY Ziki nu (Completed

[ngaia]

TRAITOR


Chapter-3



Zing dar 7 vela ka tho chu inhnuai lama ka nu tawng lang lang thawm ka hre hmasa ber a, ka intihfel zawha ka chhukthlak chuan sitting room ah kan kohhran mi tho Nu Êngzami nen ka nu puan zawrhho en pah chuan an lo ti ti malh malh a, nizan lama Pastorte chhungkaw chanchin bawk a ni an lo sawi ni.



"E.. Awmawmi chu I va tho hma ve, I thuannu Christinai te chu nizan an thil zir an rawn haw tlai a, a la mu rei khawp ang" Nu Êngzami chuan a lo ti luam a, ka nu in engnge an zir a lo zawh chuan thawk la hluai pah hian "Karleh lama an fellowship natur maw le, incharge a ni si a, tunlai chu an buai khawp mai" tiin keichu min rawn en leh a,

"Nang I tel ve hman dawn em Awmawm?" a tih chuan "Ka hre lo le, ka hman kher ang emaw" tiin choka lamah ka pheisan a, Nu Êngzami hi chu ka ngai na lutuk lo. Ka nu nen hian an Inkawm ve viau a, nu hlim leh lam peih deuh mai, tawng lamah pawh ngaihtuahawm loh deuh chi hi a ni a, mahse keichuan a tawngkam thenkhatte hi chu chapo ka lo ti deuh thin.
Ka hnathawh leh duh duh huna chawl thei ka ni lo tih te hre ve reng chung hian kohhran thalai lama ka tel ve leh tel ve lohte hi min zawt sek zel a, a fanu Christinai a tih nen pawh khan kan Inkawm ngai lo. Kan chhang rual daih an ni a, kei aia an active theih zawk avang hian an langsar a, ka va itsik chu ka ti hauhlo na in a nu vang hian ka kawm chak hran lo.



Ka nu'n chaw a lo chhum hmin leh diam tawh a, chawhmeh siam belh a ngai lem lo bawk nen kawtzawtah te chuan ka va teikual mai mai a, chawhnu lamah chauh ka duty dawn avangin hmanhmawh a ngai lo va, a hahdamthlak khawp mai.



In chhung ka lut let tur chu kan thenawm pi Nguri'n min lo koh vangin ka ding leh rih a, an kawta thutthleng upa tawh tih hriat deuhah hian tuktina a tih ziah danin a lo thu leh reng tawh a, min lo hui zauh zauh avang chuan keipawh ka pan phei a, kan in ri na pal bawh ran chung chuan "Engnge ni a Pi? I van tho hma leh pek âwm ve" ka ti nghal var a, a tarmit chung atanga min rawn melh kalh chungin min nuih var var mai.


"Ka bp hi min check sak teh" muang feuh hian a ti a, "E... Kan check dawn nia, tunlai i damsam lo em ni?" tiin ka zawt zui luam a, a lu hai nasat thu bak chu insawiselna dang a nei lem lo ani ang. Ka pi Pari hi a fapa nen chauha khawsa an ni a, a fapa U Liana lahin nupui neih nachang a hre lo nge ni, patling pui tawhin a la tlangval tlat mai bawk si a, ruihtheih thil vel a ti lo na in hna pawh a thawk em em chuanglo, tihian ka pi zirtirtu pension hlawh ringin an khawsa a ni ber.




Ka pa zing chhuak rawn haw pawhin ka pi Pari chu a hriselna chungchangte a zawt zui ve luam a, chaw ei kham velah a bp te chu ka check sak tur thu ka hrilh ve bawk.



Ka pa nena kan inzui lut chu Nu Êngzami haw tur nen kan intawk a, ka nu puan zawrh chu pahnih ngawt a zakzeh haw leh tawh, a man a pe nghal dawnlo tih ka chiang bawk.



Rin lawk ang ngeiin ka pa pawhin "Kha, puan kha i hawn tir ve leh ngawt a, a ba rei anga i âng i âng leh si ang ka ti" tiin ka nu chu a en ran a, ka nu lah chuan "Thiante an nia, han phal loh a nuam thin si lo alawm, bakah tuna a lak ho kha chu ka kawl rei tawh, a hnukhawi deuh hlek kha an nia, karlehah hian a dang a rawn thlen belh ka ring, min ba ral bîk em nang" a lo ti mai si a, ka pa chuan a awih vaklo aniang a chek tlak tlak mai.



"Nu Êngzami hi chu ka rin zawng a ni lo ve hrim hrim, a duh phawt chuan a puan lakna man zawng zawng hi a ba ral thak thei ang, chuvangin dil deuh sek rawh" ka lo ti ve bawk a, chutia kan tawngho nak nak laia kailawna rawn chhuk thla mek vang chuan ka nu tawng lai pawh a tawp chawt mai.



Uniform ha thlap hian ka naua chu a rawn pen thla tharh tharh a, ka pa'n "Eng nge awmzia, tunah dar 8 pawh a la ri si lo" tia a lo zawh chuan sana chu en ve vatin "Kal hma ka ngai a, chaw pawh ka ei lo mai ang, min thlah hman em?" tiin kei chu min rawn en a, "Hman tho e, mahse engnge kal hma i ngaih chhan?" dilchhut deuhin ka lo ti leh hram.



"Nakinah ka hrilh ang che, nu, tiffin min lo siam vat vat teh" a ti a, a awm dan chu mak kan ti ru theuh tih kan awmdanah chuan a hriat theih ang. Mahse ka nu pawhin sawi buai lovin choka ah a tiffin tur chu a va siamsak rak rak a, a inpeih velah kan tlan chhuak a, a kal hma chhan chu ka zawt leh sek sek tawh.



"Class ka kal dawn lo" a tih chuan a chhan ka zawt leh vat a, "Ka thiannu khan buaina a tawk a, an veng lamah khan kal rawh" tiin an veng awmna te min hrilh zui a, a thutak hmel em avangin ka hnial duh lo a, zawhna erawh ka la ngah khawp mai.



"Eng buaina nge a? Ka hriat ve chiah te a ni em?" ka tih chuan a ngawi deuh vang vang a, "Ka hre lo, keipawn engmah ka la hre chiang bik lo a, ka hriat zawng chu pawisa lamah an harsa hle tih leh apu a damlo tih a ni mai" a ti zawi sup a, min hrilh lem lo mah se an inngaizawng ve ngei a nih chu ka ring nghet hmiah tawh.



A sawina hmuna ka thlah hnu chuan "Ka nute chu lo la hrilh rih suh" a ti a, lu bu nghat pahin, "Haw tlai lutuk lo la, fimkhur ang che" tiin ka chah ve thlap a, ka let San leh hnu pawh chuan rilru ah a awm ve reng mai.




In ka thlen hnu lawkah chaw kan ei zui a, ka pa in Jaydena kal hma chhan min zawh chuan ka lo ngaihtuah lawk lo bawk nen chhuanlam han siamsak vak dan pawh ka hre lo a, ka riat nawi vel mai mai a ni ber.



Chaw ei khamah bp chekna kengin thenawmah ka va kal leh a, ka pi bp chu a lo sang leh pek khawp mai a, U Liana hmel hmuh tur a awm loh avangin ka pi hnenah chuan a awmna ka zawt a, "Zingkara a chhuak kha a lo la haw lo, a ni hi zawng.. " a ti a, a ngawi zui leh rauh rauh a, a rilru tur chu ka hre thiam ve deuh tho chuan ka hria.



A fapa neih chhun a ni a, a innghahna ve na ber hian a beisei a pha lo tih a hriat reng, a pasalin a boralsan tawh a, ka pa te sawi danina nuta pakhat hi chu a la dam ve a, mahse chu pawh Aizawl khaw pawnah daih a awm si a, kum upat lamah ka pi Pari hi chu a khawngaihthlak takzet.



Damdawi leh thildang eng eng emaw ka hawnsak tur thu ka sawi chuan a lawm thiam ve khawp mai a, a tihziah danin pawisa min pek a tum leh tawh. Ka la duh lo chu a thinur dawntitih mai thin a, a lungawi nan tiin cheng 50 chu ka laksak ta nge nge.





In lama ka let leh chuan zing lama ka nu in thuamhnaw a lo sukfai tawh chu ka pho leh a, ka inbual zawh chuan insiam a hun chu a ni leh der tawh mai.



Inpeih sa thlapin inhnuaiah ka chhukthla a, dar 12 a lo ri ve chiah bawk nen thingpui ka lum a, kan in zawhah hmanhmawh lem lovin damdawi in lam ka pan a, dar 9 thleng ka duty dawn avangin kawr lum ka pai tel thlap bawk.




Damdawi in ka thlen chuan an lo buai hlawm khawp mai a, ka inthlak hman awrh chauh tihah doctor Zari'n min rawn kovin emergency a awm thu leh ICU lama kal nghal turin min rawn ti a, mahse ka thlen chuan pawn lama ka mi hmuh vang chuan hmanhmawh viau e ti lovin ka ding dat a, "Lawmawm" ka ti chu min rawn melh ve vat mai.



A thutna atanga rawn ding pahin "Sangkimi pu hi a nia, va kal ve vat rawh" a lo ti a, a bulah inthlahrun hmel deuhin a thiannu kha a lo ding ve bawk a, zawhna inzawh vakna hun a nih loh avangin "Tikhan lo nghak phawt rawh u" tiin ka luhsan ve a, a tul ang anga doctor ka puih hnuah kan damlo hmel pawh chu ka hmuh chiang ve thei chauh a ni.


A hmel chu ka hmuh hnu ni tlata hriatna ka nei a, khawiah nge ka hmuh tih erawh ka hre chhuak mai thei tawh lo.



Thin tha lo a nih bakah thawhah a nei nasa em em a, a kum a upat tawh avangin han enkawl viau ngaihna pawh a awm tawh lo. Dr. Zari'n emergency a zai a ngai thu a sawi avangin hmanhmawh deuhin ka naute chu ka va hrilh ve leh a, "Zai nghal a ngai dawn a, in chhungte dang an lo kal thei ang em?" tia Sangkimi ka zawh chuan mangan hmel deuhin ka nau zawk chu a en daih a, "U.. Chhungte dang an awm lo, amah leh a nau an ni mai" a lo ti a, an khawngaihthlak hmel khawp mai.



"Eng lo,, pawisa hi kan nei si lo a" hmuk ulh teuh hian a lo ti leh a, mahse ka chhan hma in ka nau bawk chuan "A awm mai ang" tia a lo tawng thlamuan avangin keipawhin "Pawisa chu a awm mai ang, hlauthawng lutuk suh u" ka ti a, ka luhsan leh mai a, Jaydena'n a ngaihven em em mai bawk nen puih an ngaih chuan puih pawh ka inhuam ve mai tur a ni tiin rilru ka siam a, operation kan tan meuh chuan tlai lam dar 3 a pel tawhin ka hria.



Kan beirei khawp mai a, zaipui tak meuh a nih avangin a hautak bawk a, surgery room chhungah chuan darkar 6 lai hun kan hmang nghe nghe.



"Kan hlawhtling thawkhat chuan ka hria, Awmawm, a chhungte kha i hmelhriat em ni?" tia doctor in min zawh chuan ka nau hmelhriatte an nih thu in ka chhang a, pawn lama a chhuak tur chu kanzui ve vat bawk.



Pawnah chuan ka nau leh Sangkimi chauh chu an lo la awm a, "Kan hlawhtling viau e, hlauhthawnna tur a awm lo ania, zanin chuan a lo harh chhuak kher lo anga, ward lamah pawh in insawn vat thei ang aw" tiin doctor chuan a kalsan a, "A hmuh theih ang em U Awmawm?" Sangkimi'n a lo tih chuan "An lo chhuak tep ang, lo nghak lawk rawh u" ka ti a, Jaydena zawk chu enin "Ka nu te i bia em, an ngaihtuah ang che" tiin ka zawt zui a, "Engtinnge ka biak anga, ka pa'n phone a la daih zel alawm" a lo tih chuan ka hre chhuak ve leh.
Vawi khat school a phone an lo pai ruk avangin principal in ka pa hi a ko tawh a, khata tang kha chuan school kal dawn apiangin a phone hi ka pa'n a laksak loh pawhin a lang theiah a dah tir ngei ngei thin.




Ka phone ka phawrh chhuak chu ka nu leh pate miss call a lo tam ngang mai a, call let vatin ka nu in a lo chhan rual chuan "In va buai âwm ve, i nau a lo la haw lo va, kan mangang tawh lutuk" a rawn ti zung zung a, ka bul a mite chu melh zawkin "Damdawi in ah an awm, a thiannu pu a damlo a" ka ti a, ka nu chuan zawhna a rawn ngah nghal khawp mai.




"Kan lo haw hunah kan sawi tha dawn nia, lo mangang suh u, kan lo haw dawn" ka tih hnuah phone chu dahin thawk ka la halh a, "An rawn nawr chhuah hunah ward lamah kan dah anga, zanin chu nangman i awmpui mai dawn em ni?" tiin Sangkimi chu ka en a, "A.. Aw, zanin chu ka riahpui anga, mahse U Awmawm, damdawi in awm man vel hi.. " a tawng zawi khawp mai a, a inthlahrunzia chu hai der chi pawh ni in ka hre lo.


A dara dawm pah chuan "Kan awm hi, hlauthawng lovin thlamuang deuhin lo awm rawh, i pu pawh a tha leh mai ang" tiin ka nui lui var var a, ka nau in awmpui mai chu a inhuam viau na in ka remti lova, ka nu leh pate ngaihdan a nih chiah pawh ka ring lo.



Kan gda zinga ka nel ber Tetei chu Sangkimi pu lo ngaihven pui deuh turin ka chah a, dar 10 rik dawnah Jaydena nen chuan kan inphur haw a, khalh a tum viau na in ka phalsak lo thung.


"Sangkimi te chanchin hi i hrechiang em?" tia ka zawh chuan "Nu leh pa a nei tawh lo va, a nau mipa nen a pu khan a enkawl tih chu ka hria, a bak chu school a kan inhmuh hi a ni mai, an khawsak a harsa" tiin min chhang a, "Zaninah a pu a riahpui dawn chuan a nau chu tu bulah nge a a lo awm a?" ka ti leh nghal zat a, belh tur chhungte tumah an nei lo chu mak ka ti viau bawk.



"Kan kal dawn khan an thenawmnu hnenah kan dah tawp a, a hma pawhin an dah fo thin aniang" a ti a, thawk a la zui halh ri ka hre bawk nen ka zawt zui zel duh ta lo a, in kan thlen chuan in chhung kan luh hma hmain ka nu leh pate an rawn tlan chhuak a, "Eng nge in awmzia ni a? Lawmawm, vawiin ah school I kal miahlo a ni maw?" ka nu lah chuan a ti nghal hlak hlak mai a, ka pa zawkin lo khapin inchhungah kan inzui lut a, insawifiah a ngai nasa ve khawp ang.



Min hrilh chin ang tho kha ka nute bulah paw a sawi ve a, Sangkimi hming erawh sawi lang lovin a classmate a nih thu chiah a sawi a, an hau lem lo na in chanchin hrilh dan kawng ngaihtuah zel tawh tur erawh chuan an in chah uluk viau mai.




A tlai deuh tawh avangin mu turin kan pindan theuh kan pan nghal hlawm a, inzaina room ah ngawt hun ka hman avangin keipawh ka inbual leh te te a, khuma ka mu kai chiah chu ka chauh zia ka hre chhuak vawng vawng a ni ber e.



Darkar 6 ngawt mai kea han din char char chuan taksa a na them thum a, a chang phei chuan darkar 7 atanga darkar 8 laite a nih thin avangin a chauhthlak thin khawp mai.



Phone ka en chuan number hlang atanga miss call hi a lo awm a, scooty a kan tlan lai vel kha a ni mai thei, tunge ka hriat miau loh avangin call let lem lovin message te chu ka en kual leh a, Dr. Ramkima min lo biakna chu ka hawng rang khawp mai.


"Vawiin ah zaipui in nei tihte ka lo hria a, I chau em?" tih ringawt chu ka nuih pui var var a, ka chhan letna pawh a hmu leh rang khawp mai. Rei fe chu kan inbia a, ka chauh teh reng nen ka mut meuh chuan zanlai a pel der tawh.

Dr. Ramkima chuan naktuk tlaia zanriah ei chhuahpuiah min sawm a, ka hnial hreh tluk zetin aw han pawh mai chu ka hreh leh zual a, zing lama ka hrilh tur thu in ka chhang ta ngawt kha a nia. Mahse mutnaah pawh ka ngaihtuah zui ve nauh nauh a, tun hnai te hian min lo biak ve a chin ve leh zauh thin avangte hian thil ni lo deuh deuh ngaihtuah a awl riau a, naktuk chu ka awl ni tak a ni dawn bawk nen ka nu leh paten an remtih phawt chuan kal ngei chu ka duh.




Zingah chuan min rawn sawi nawk nawk vangin thei leh thei lo hian ka meng tawk tawk a, Jaydena hmel ka hmu chu ka hamhaih khawp mai.


"Eng nge a, zing kar karah?" phal chuala tiin mit ka nuai zui nawk nawk a, "Damdawi inah ka kal dawn, min thlah rawh aw" a ti chu ka en ran ran mai.

"School kal I tum lo em ni?" Ka tih chuan "Vawiin kal lo ang, ka ngaihven loh chuan an hrilhhai dawn lutuk a, pawisa min pe bawk rawh aw, ka rul leh ang che" a ti ta zel a, a tumruh hmel em avangin ka hnial duh hauhlo thung a, dar 7 tlanga a thawh ve ngawt danah pawh hian a thiannu chu a ngaipawimawh ve hle tih a hriat tlat.



Inhnuaia ka chhuk chuan a tiffin tur a lo siam mawlh mawlh a, ka nu in rinhlelh hmel taka min rawn mitmei chuan "School dang nen an sport dawn a nih kha" ka lo ti mai a, min zawt zui lem lo.



A insiam zawhah damdawi inah bawk ka va thlah leh a, "Tiffin kha I pai kep em ni?" ka tih chuan a pai kep thu in min chhang a, hmuh ve leh reng reng thaa ka hriat avangin keipawhin ka zui lut ve leh a, mahse Sangkimi bula ka mi hmuh vang chuan ka hamhaih khawp mai.



"Nang maw?" a mitah tak chuan ka en reng a, Sangkimi sama tuai sak zauh pahin chupa chuan min rawn pan hnai a, ka banrekah rawn man lawkin min chhuahpui nghal dawr dawr ta mai a, "Eng nge I hriat a? Min thlah vat teh" tia ka tal ngial chung pawhin ngawi rengin min kalpui hlawk hlawk a, pawn ka chhuah hnuah chauh ka kut chu a thlah.



"Nurse hmeltha" tiin rum deuha ka melhna chu min nuih sak a, "Nangmah hi I ni maw?" ka tih chuan ngeiawm deuh hian a lo kiai suk bawk a, hmanni zana min rawn betu kha amah a ni ngat mai, ka block zui tak daih avang khan a reh zui ve mai a, engtinnge maw ka number te alo neih zawk chu ni.

"Khawlaia insual kha bansan ang che" ka ti chu mit ti zim suna min en in "Thu min pe turin tunge I nih?" a ti nghut a, a hmel chu a nelawm loh leh nasa tawh mai.


Thaw halhin "Sangkimi nen khan eng inzawmna nge in neih a? I chhungte em ni" ka ti leh ta daih a, a dar kan akin "A ni mai ang chu" tih ngawt hian min chhang pek a, hepa hi hriatthiam a harsa tulh tulh dawn in ka hria.





Cont..
Comments mawlh kha aw, thui deuh zawka dah zel kan tum dawn nia☺
Show post links
Top