TRAITOR BY Ziki nu (Completed

[ngaia]

TRAITOR


Chapter-30



November thla tirah man chu kan inhlan fel ta a, ka pa in lama man hlan a rem loh vangin ka ni Mali te inah man kan inhlan a, chhungkua leh thiantha tak takte nen chaw hluite kan kilho ve bawk a, mi tih loh dan deuha kan tih vang a ni mai thei, ka awm a nuam tak tak thei lo.



Chaw eina tifela kan chet sung sung lai chuan ka ni Mali'n pindan lamah min ko hrang a, mikhual pindan anih vangin khumah chuan min thutpui a, ka kut a hum zui rauh rauh chu mak ka ti ang reng.



Ka ni chuan "Mi puitling tak i ni tih ka hria a, I pasal tur lah, hei zep rual lohin hmingchhiatna lo nei tawh a ni a, chuti chung chuan fa hial in neih tawh vangin in han innei ve dawn chu a ni a, I kaihhruai hle pawh a ngai dawn ania, i pa lah hi, a thu a duh em em ringawt bawk si a, hriatthiam hram hram a ngai anih hi" a ti sap sap a, ka ni hi ka pa ang chiaha thinchhe ve bawk a nih vangin ka nel em em ngai lo a, mahse min hmangaih ve hle tih erawh ka hre thung.



"Ka theih ang tawkin Pathian rawng ka bawl ve thin a, Zodinga hi hetiang lam kawngah hian ka hruai theih i ring em?" tia ka zawh chuan a lo bu nghal sawk sawk a.


"Hmeichhia hian thiltihtheihna mak deuh kan nei ania, hmangaihna nen i enkawl anga, nupui tha tak i ni ang tih pawh ka ring, aman a tum ve phawt chuan chhungkaw hlim tak in din dun ngei ngei ang" a ti leh a, hetiang reng renga ka ni thusawi thlamuanpui tum hi ka la nei kherin ka ring lo.




Ka fapa tap ri vang chuan engmah sawi zawm ta lovin pindan atang chuan kan inzui chhuak a, Gideona chu dawhkan tlang zum laiah a lo intauh ni âwm tak a ni.



A chal chu a taih pawng ve lûk mai a, a tap uar bawk nen kan inbuaipui rei viau mai.



Dar 8 a pelh chuan a tam zawkin min hawsan tawh a, Zodinga chu Bawihpuia'n a bawh tlat avangin a la che sawn thei lo.


A chal lah chu a han pâwng lian em em mai bawk nen, a pangchang chuan ka lak pawh duh lovin a pa malchungah ngawt a awm a, Rsa'n a lo chhaih zuk zukte chu a haw thin khawp mai.



Ka pa hmel hmuh tur a awm lo va, Zodinga te lam atanga rawn kal ve mi tlemte te pawh ka ni leh pu Englawma te vekin an lo lawm a, a inthlahrunawmin awm a nuam mawh viau a ni.




Dar 9 a rik meuh chuan Bawihpuia pawh a pa malchungah a muthlu lup lup tawh a, haw an sawi rik tawh vangin a kut atang chuan ka va laksak thuai bawk.




An haw tur pawh chu ka zui chhuak ve ta lova, pindana ka fapa ka mut fel tur hnuah ka intifai a, a vawt deuh tawh bawk nen ka inbual rei lo khawp mai.



Zodinga'n min lo biak chuan dar 11 a ri tep tawh a, tunlai Pu Zuia a chakloh zual deuh avangin Rsa nen an va tlawh kawi leh a, Zodinga chhungten a buaipui dante hi hre ve lo mah se Sangkimi te unau tana an pan ngam awm chhun a nih ve tlat avangin sum leh paiah pawh a pui nasa tawh hle tih ka hria a, damdawi ina admit leh mai an tum lahin ka pu berin a duh si lo a, tihian in lamah Sangkimi'n a enkawl chawt a, school pawh karhnih dawn chu a kal tawh lo in ka hria.



"Kohhran hall ah a ni dawn a, zingkar an ti hi pawi i ti lo tak tak maw?" tia min zawh chuan ka lo nui deuh sak a, an kohhranah an kohhran dana innei tur kan ni a, an rel ang ang chu sawi buai tur pawh ka ni lo maw le..


"Pawi lo e, mi anga ropui deuha inneih kha a rem lohna chen a awm ve alawm, chubakah zingkara tihfel vek theih chu a tha ka ti daih zawk" ka lo ti a, Tu lai mi innei tam takte hi chu an mawiin a hautak bawk a, tuna kan inneih tum dan pawh hi ka lo suangtuah thin ang chu a ni hauhlo, mahse ka duh leh hmangaih ber ka nei dawn a, chu tluka hlu chu ka tan a awm chuang lo.





Inneih ni chuan Zodinga chhungte an rawn kal tha ang reng khawp mai a, ka pa hmel hmuh tur a awm lova, ka nu leh ka pu englawma te nupa bakah ka pu te chhungkua an ni leh mai a, ka thiante leh thawhpuiten min thuammawi viau thung.



Zingkar a nih vangin a felfai ang reng viau zawk a, chhun lamah phei chuan kan awm awl viau tawh zawk.




Chawhnu lamah thlalak kan duh avangin inneih thla lak vel chu Rsa kutah a awm a, ka dinpui nu Gracy lah chu a zun a in nileng thak bawk nen buai deuh chungin kan nui kan nui leh thin.





Zodinga chhungte lamin resort nuam deuh mai an hawn thar hlim hlawt an lo nei a, chu lama thla la tur chuan kan inzui leh diak a, kan fapa erawh tlai lam a nih dawn vangin kan hruai ve ta lo.



Kan photographer hruai chu a thiamin a duh uluk bawk a, kan thla pawh min lak mawisak viau mai.


Zanriah min lo siamsak nghal thlap a, keini pahnih chu zan lama riak tlang nghal turin min lo ti a, engmah ka hriat ve loh laiin Zodinga chuan a lo hre lawk vek a ni ang, a thianten an lo chhaih pawh chuan a nui suk suk a, a intithei thin viau bawk.



Zan lamah chuan rei pawh awm lovin min letsan thuai hlawm a, riahna tur pindan lah chu a zauin a felfai em em a, boruak a nuamin a hahdamthlak khawp mai.




Ka intifai hmasa a, Zodinga inbual ve hlan chuan ka nu ka call a, Gideona chanchin ka zawh chuan a mutthilh tawh thu leh a fel viau thu min lo hrilh a, ka pa chanchin ka zawt ve erawh "Ngaihtuah duh suh, tunah chuan kan ta i nih tawh loh kha, i pasal leh i chhungte kha ngaihtuah la, keini lam chu ngaihtuah kan ngai miah lo ania" a rawn ti luam a, ka inrin hmaa ka hnuk lo ulh ringawt vang chuan rei deuh chhung chu ka ngawi rauh rauh.



Ka nu chuan "I tap em ni?" a lo ti leh khauh a, insût hraih chungin "Tap lo" ka ti a, mahse ka aw atang chaun dawt ka sawi tih erawh a hrethiam tho ang.




"Nu.. Ka pa mualphona hian min vaw let ang em le..?"
Ka zawhna chu a atthlak ngawt mai, mahse keimah vanga ka pa rilru hrehawmna hi ka haider thei bik si lo a, ama kâ atang ngeia ka hria a nih loh chuan ka awm a nuam thei kher lo ang.



"Ngaihtha tak khan awm rawh, hun hi han liam deuh se la, i pa pawh a nem ve leh mai ang" tiin ka nu chuan min tawng thlamuan ve bawk a, Zodinga a rawn chhuak ta bawk nen rei inbe tawh lovin phone chu kan dah a, ka lam a lo pan lai chuan towel a veng a, a âwm chhah leh inphiar mawi em em chu a la hnâwng viau bawk.



"Tunge i biak a?" tih pahin ka hmaah a rawn thu hniam zui a, ka biang huhte chu lo tuai hul ve sawk sawkin "Bawihpuia ka ngaihtuah deuh a, ka nu ka be lawk" ka tih lai chuan min en chîk khawp mai.



Ka biangah dawmin uluk deuh hian min en a, "Tap tawh suh aw" a tih lai chuan a tawng zawi khawp mai.



"Ka tap dawn lo"
Ka chhanna chuan a tilawm tih hriat takin a nui suk a, ka hmui a rawn fawh rual chuan a duhthawh nghal viau.




Khum tlanga ka thut miau avangin min bawh tlu zui a, ka nighty hak chu thlek kual thuakin min han nuih suk suk a, sawi kher lo mah se ka kawr hak chuan a tilawm tih ka hria.



Kan intawn tirh khan ka pasal a ni ang tih ka ring pha ngai lo, tunah chuan ka pasal, ka fapa pa, ka chhungte hial ka kalsan chhan mipa a ni tawh a, ka engkim tak meuh a ni tawh.




Zinga ka harh chuan ka tho sil thum mai a, nimin lama kan boruak tawn a hahthlak deuh bakah nizan thil thleng te nen, ka taksa chu a na thum a, ka lu a rit deuh luk bawk.


Ka bula mu chu tihharh hlau deuhin ka tho chhuak a, bathroom a ka va intihfai chhung pawh a rei khawp mai.



Dar 7 bawrah Zodinga pawh a rawn harh a, boruak a dai bawka zing lam pawh a nuam viau.



Hmanhmawh lo deuh in kan haw a,in kan thlen chuan ka nu leh pate bakah Rsa leh Bawihpuia an lo awm bawk a, Geena-i nen an inkawm a min hmu pawh chu engah vak min ngai lo.



Ka nu chuan "I bungrua ho kha chu in pindan lamah kan dahlut tawp tawp kha a nia, engmah pawh kan la khawih leh lo, vawiin chu hahdam pahin inrem fel rawh u, Diktei khan chaw ei siam se la, ei zung zung ang" a lo ti sawk sawk a, "Chaw in la ei lo maw?" ka lo ti ha chu "I pa'n nghak ang a ti anih kha, chaw ei rual hram hram hi a duh thin a" a lo ti leh mai a, tunah dar 10 a ri tawh a, a inthlahrunawm khawp mai.




Karhnih dawn lai ka lo awm tawh bawk nen a tira han zam leh hrehawm tih rukna ang pawh kha ka nei ta em em lo va, Diktei nen chaw ei kan siam lai pawh chuan kan ti ti thei khawp mai.



Nilengin pindan tifelin hun kan hmang a, Gracy a rawn len phei bakah Diktei'n min pui thei bawk a, Zodinga erawh chawhnu lamah dawrah a kal leh nghal a, kan buai nghal khawp mai.




Tlai lamah pawh ka thiannu chuan chaw a ei ve nghal a, zanah a pasalin rawn lamin dar 7 bawrah min hawsan a, Gideona a tah reng vangin in chung lamah ka chhohpui leh thuai thung.





Chutiang chuan ni a ral ve zel a, nitin Zodinga chu dawr lamah a kal a, thlasik rim a nam tan vangin chakkhai lama khawpui rawn pan an tam tan viau mai a, Aizawl khaw chhung pawh a tawt leh viau tawh.



Tlai khat ka pasal rawn haw chu zu rim a rawn nam lut thar thar mai a, kan inneih atanga a zu in ka la hriat loh vangin mak ka ti deuh a, ka thinrim viau rualin eng emaw rilru tibuaitu a nei niin ka hria a, ka zawh lah chuan min chhang tha duh der lo.



Inbual tura ka tih chuan ngawi rengin bual in lam a pan ve mai a, a inbual te chu tum dang zawng aiin a rei a, ka ngaih a tha lo tulh tulh.



Darkar chanve dawn a inbual hnu chuan a rawn chhuak ve ta hram a, ka lo en reng lai chuan min en duh lovin ngawi rengin a inthlak mawlh mawlh a, "Ngatinge zu i in a?"
Ka zawhna chu min chhang lo.


"Zodinglian?"


Thawk la hluai pahin ka lam a rawn hawi a, "Kartawp a nih hi, ka chau deuh a, ka in ve mai mai, ka rui lo" a ti sup a, mahse zep nei a ang ka la ti tho.



"Thil thleng a awm em ni?" ka tih leh pawh chuan engmah a awm loh thu in min chhang tlat a, kan in en ran ran lai chuan in hnuai lamah thawm ri deuh bur hi kan hria a, naupang tap ri in a zui bawk nen kan nupa chuan in enin kan tlan chhuak nghal a, kailawnah te chuan kan tlan thla dawt dawt.




Sitting room a kan luh chuan U Elise-in a fanu pawm chungin Bawihpuia chu a lo hau chiam mai a, ka fapa lam chu panin ka pawm kang lawp a, a hmui chhunglam atanga thisen rawn chhuak vang chuan ka chi ai nghal khawp mai.




Zodinga'n thil awmzia a zawh chuan U Elise-i chu a pawr khawp mai a, a fanu la pawm bet reng chung chuan "Naupang zawk a nih vangin in fapa hi ka dawh hram hram zel a, ka peih tawh lo, nichinah pawh Geena-i lo seh a tum a, ka hau anih kha" a lo ti phar a, naupang pahnih lah chu an la tap hlawp hlawp bawk nen in chhung chu a rikin kan ri nawk nawk a ni ber e.




Zodinga chuan min lo panin Bawihpuia hmui thi chu a rawn en chiang a, "Tihfai sak vat rawh, a kak thui vak lo in ka hria" a tih chuan rang deuhin choka lam ka pan a, Diktei'n min lo pui vat bawk a, a thi te kan han tihfai hnu chuan a tap pawh a bang ve leh mai a, mahse a hmui chunglam chu a kawh deuh lûk a, engtiang chiahin nge maw u Elise-i chuan a lo tih ni.




Sitting room lama ka pawm phei leh lai chuan ka nu leh pate tlai leng pawh an lo lut ve chiah a, Zodinga leh U Elise-i in en dan chu a dik lo tih ka hmu thiam nghal bawk.



Min rawn en in U Elise-i chuan "Mipa naupang anih hi, a nu in a enkawl tha lo tih hriat reng reng, mi seh te a tum ania" tiin min ner kum sak a, ka pasal che hrut chu lo vuan bet ve bawk mah ial awmzia a awm vak lo.


"Lalenkawl.. Ka nupui fa enkawl danah hian sawi theih i nei lo tih in hria ang che, i thiltih hi i hnu em?" tiin Bawihpuia ka pawm lai chu min rawn chhuh a, a u lam pana pen hnai pahin kan fapa hmui kawh lûk chu a han en tur zui a, ka nu leh pate pawh chu an hrilhhai hle tih ka hria a, kei lah ka hnuk a lo ulh ru leh tun tawh bawk nen, kan boruak chu a rit khawp mai.




Geena-i leh Gideona te hi inngaiin inkawmngeih viau mah se naupang tih takah thil han inchuh leh intihtah chang hi an nei ve fo a, chutiang a thlen chang chuan U Elise-i hian a fanu hi a tan thin khawp a, mo ve mai ka nih bakah naupang an la nih vangin kei hi chuan ka enliam thei viau a, mahse U Elise-i tawngkam ngeiawm thin lutuk hi chu ka lo helh ve deuh thin.





Ka pa chuan dam leh khauh zet hian "Naupang vanga inhnialte kha in zak lawm ni? An intipalh ve a ni mai, buai hluaina tur a awm loh kha" a ti a, mahse ka pasal rilru chu a dam thei mawlh lo ani ang, vawiin tlaiah ber kher zu a lo in ve bawk nen, a rilru chu a tikhauh lui tlat a, U Elise-i chu a kutzungchala kawk siah pahin "Ka fapa hi i ngam chuan kut i thlak leh dawn nia, ka unaunu i ni tih theihnghilh thakin ka khawih duh ang che" a la ti khur khur mai a, ka pa insehruh hmel chu ka lo hmuh ve reng vangin ngawi tawh se ka duh takzet.



U Elise-i lah chuan ngawi mai duh bik lovin a chhang let ve zel a, kan inneih dan thlenga sawi kaiin kan kohhran te chu a sawi tel ta zel a, "Kohhran leh thurina buai chhungkua atanga lo seilian ve ania, nungchang mawi tak ka lo beisei hi ka tihsual a nih dawn chu"
A hmai chu a ri nghal thlawp a, ka nu pawh a thutna atangin a rawn ding hluai mai.




"Zodinglian" ka pa'n a tih laia a aw chu a vin viau tawh a, kan chhungkua chu kan buai ta nuai mai a ni.



Ka pasal chu ka lo pawt bet ve tawk tawk a, a pawm lai kan fapa lah chu lungchhe em em in a lo tap ve bawk nen a thinin a tuar ta ngang lo a ni ang, "He in chhungah hian kan awm rei thei dawn lo tih ka hre sa reng a ni, kan chhuak ang, naktuk zingah kan chhuak anga, nangmahin i fanu chu i lo enkawl dawn nia, nangmah ngeiin" tiin a u chu a han kawk leh siah a, kei chu ka banrekah rawn manin kan fapa nen chuan kailawnah min chhohpui nghal dawt dawt.






Cont...
Show post links
Top