ALL THE WRONG PLACES 17 ONGOING

[B.laltlanhlui]

Chapter 16

Zing an harh meuh chuan signal pawh a awm ve ta a, an inthlak fel hnuah Jin a'n security bia in an rawn pui nghal vat a, Julianne chu room thleng a thlah a, an ngaihtuahna ve ve kawm in an ngawi dun reng a

Room a luh hmain Julianne chuan lawmthu a hrilh a, a lo bu nghut mai. A thutak in fiamthu thawh tum lo bur hmel a pu, a ngaihtuah awm ang tur a hrethiam thei lo. Nizana a mipa mutpui kha mi dang ang hlak a ni leh tawh. Nelawm lo leh inveng run ang maiin a awm leh daih

Room chhung a luh rualin message leh missed call a check nghal a, engmah a lo awm lova, Adrienne a be pawp tawp

"Jared a ṭha em?"

"Aw, nang zawk i ṭha maw? Khua chu a kang leh tawh em?"

"Aw, kang tawh e. Ka lo haw dawn"

"Awle, lo lungngai suh aw. Kan ṭha ania. Jared pawh a ngaihtuah awm lo"

"Ka lawm e, Yen. A chang chuan rei tak hnathawk lova awm te hi ka chak ve ṭhin. Mahse nu mal tan chuan Jared a hmakhua ka thlir lo thei si lova, a har a ni"

"Inthiamlo duh suh Ian. Nu chak tak i nih kha. I tih ang hi tumahin an thei bik lo ang. Nu leh pa nih kawp hi a har dawn asin"

"Jared tan chuan eng pawh ka ti thei ang. A ṭha ber zel a phu. Keipawh tlakchham nei lovin ka awm ṭhin a, chutiang chiah chuan Jared hian tlakchham a nri bik lo vang"

"I ti ṭha lutuk ania, Ian. Kan vaia ngaihdan pawh a ni alawm. Engpawh nise ka dah phawt ang e, rawng ka bawl a, Justin a'n straganoff a ei chak tlat a"

"Ei siam pahnih in ruai a ni lawm ni?" Julianne i'n a lo fiam a

"Ruai e, mahse Justin hian ka eisiam hi tui a ti ber a, meeting a neih zawh ah ka peihfel hman a ngai"

"Awle, dah rawh. Kan inhmu vat dawn nia"

Rei tawk fang a inbual hnuah Julianne chuan high neck a ha a, a lo keng tel hlauh chu pawi a ti lo nasa a ni. Jin Starck a fawhna hnu a tam em mai

Concealer leh foundation in Patrick a'n a sawisakna lai a khuh a

Minute reilote hnuah room service ten kawngka an rawn kik a, Jin Starck a'n eitur a lo thawn a

A ei zawhin a bag ah thawmhnaw a khung fel a chhuah a inpeih der mai. Thlipui leh ruah pawh an bang fel ta

Kawng pawh a thiang kuk tawh a, Justin a driver chu a bia a, helai hmun a chhuahsan hma pauh leh ngaihtuahna fim a hmang thei zawk dawnin a hria. Jin Starck nen an mu dun leh kha a thluak in a la pawm hleithei lo

Khualchhawn lamah chhuk thla in a riah luh man pek a tum a, khualchhawn nula chuan screen a en a, hriatthiam loh hmel deuhin a meng awn awn a, chutah manager a bia a, minute khat a liam leh hnuah a lam rawn hawiin "Engmah i pek a ngai lo, Miss Sanders"

"Eng a? Mahse ka la pe fel bawk si lova"

"A man i pek a ngai lo. I room luah kha man chawi ngai lo ania, kan bill thei lo che"

"Eng nge i sawi awmzia chu ni a?"

"Mister Starck a room ania. A mikhual i nih avangin kan bill thei lo. Pek i duh ṭalh leh amah nen insawifel mai dawn nia"

"Awle" Julianne chuan lu a thing a

"Kan hotela i thlen chhung khan buaina i tawh loh hram kan beisei e. Min lo tlawh leh ṭhin dawn nia" Khualchhawn nula chu a nui sang a

A bag chu ak in driver lo thlen hun a nghak tawp. Jin a lawmthu hrilh dan tur a ngaihtuah pah bawk

Car a lo nghah reng laiin Jin chu a rawn lang thut a, jeans leh jacket dum lukhum nei a ha a, a sam chu bualin aṭanga chhuak chiah tih hriat takin a la hnawng chap a

Engmah sawi lovin a bag chu a rawn khai sak lawp a

"Ngawi teh, eng nge i tih a?"

Ferrari hring an piah lawkah a rawn ding a, Jin chuan chhang lovin a hnungzuitu mipa hnenah bag a hlan a, car kawngka a hawnsak bawk

"Lut rawh"

"Chuanna ka nei alawm. Ka lawm tho e"

"I chuanna tur i sawi chu keimah a ni e. Lut rawh"

"Ka driver ka nghak alawm"

"A lo kal dawn lo. Adrienne hnenah ka tlawh tur thu leh a remchang em a, ka phurh nghal mai tur thu che ka hrilh. I lo lut dawn nge ka pu lut dawn che?"

Julianne chu a rum nghat a, Jin a'n car a khalh laiin tukverh ah a dak vauh vauh a, a lam a hawi duh bau lo

Jin a'n a phurh haw tur thu a hrilh laiin Adrienne chu a lawm hle dawnin a hria. Chhungkaw khat ang vek an ni si a

Adrienne leh Jared pawh thisen a inzawmna nei an lo ni zel nen engkim hi a buaichuar kual vel vek a ni

Jin a'n a kut a rawn hmer sak a

"Hahdam teh, Arabella. Ka seh dawn che pawh a ni hleinem. Khumah chuan ka hre lo le"

Rum tawkin a melh a, a rin loh lutukin a nui huah huah a, a kut chu la kangin a fawh sak a

"Nizan ang chiah khan i rimtui lutuk"

"Jin..." a kut chu lak sawn a tum a "Khawngaihin kan..."

"Eng nge? Nizan thil thleng kha kan theihnghilh ang maw?"

"Aw"

"Ka theihnghilh turah i lo ngaih chuan i tisual hle a ni, Ma belle"

"Mahse tukin zingah pawh kan remtih dun reng kha! Kan chhungte vang pawhin a thleng nawn tawh tur a ni lo"

A mitko rawn san in reilote chu a rawn en a, kawng lam a hawi leh a

"I sawi kha chu ka hria alawm, mahse ka remtih lai reng ka hre lo, Ma belle"

Rum tawka melhin "Jin Starck" a ti hluai a

Jin chu a nui leh hak "Han inen teh! Tunah tak khan hmeichhe mawi ber leh kaelhrawng ber i nih kawp ania. Aih, ti tura min duh kha ka tiam ve thei tlat lo che"

Julianne chu beidawng zetin a thaw halh a "Engkim hi a buai vek"

"Tinge?"

"Adrienne unaupa i ni a! Justin a cousin ka ni bawk. Hotel neitu i ni a, kei chu engmah ka ni lo. Mi hausa fanu nupuiah i la nei dawn a, kei chuan fapa ka nei tawh. Engkim hi a dik lo vel vek" a rum nghat a

"Chuan mi nunrawng, thinlung sak tak i ni a, inzawmna i siam tak tak ngai lo. Nizan thil thleng kha chu vawikhat thil chauh a nih kha. Hma hun kan nei lo. Kan intihnat tawn hma, Justin leh Adrienne kan tihnat hma hian kan tawp vat a ngai" a chawl det a

"Adrienne i'n a hmangaih lutuk che. A chhungkaw hmasa ah buaina a tawh nasat zia pawh i hriat vek kha. Chhungkaw inhmangaih tawn tak an ni a, Justin pawhin Adrienne a hmangaih em em a, kei pawh hi ka cousin leh unaupa hian min ngaihtuah hle tih ka hria asin" a lu a thing a

"Vanessa Bernard pawh nupuiah neih i tum reng kha. Infiampui tur zawng mai rawh Jin. I unaunu i hmangaih a, Justin i zah bawk chuan...khawngaihin kei ni lo tu pawh thlang zawk mai rawh" a heh pet vang vangin a mittui tla tur chu a dang ṭawk ṭawk a

A thusawi laiin Jin chu a ngawi reng. Kawng lam a hawi tlat. Julianne chuan a beng a thleng phak ang em tih leh a bengkhawn reng em tih pawh a hrethiam thei lo

"Nizana kan awm dan kha kan hun kal tawh nen phum bo daih ila a ṭha ang"

Engmah a la sawi chuang lo. Steering wheel chu a vuan nghet sauh a, hma lam a hawi tlat. A mitko a chuar tap a, a lunghnur hmel hle bawk

"Jin..."

A chhang lo

Ring deuh hlekin "Jin" a ti leh a

A rawn thaw halh a, Ian thusawi chu chhang ta lo chuan "Chawl hahdam rawh Arabella, kawng a la thui dawn ania"

'Chu zawng chu maw? Ka thusawi zozai te kha a hre reng reng lo em ni?'

Julianne chu a hui pap a, seat a ngheng daih. A sawi duh chu a sawi tawh a, Jin hi mipa fing tak a ni a, a hmakhua a ngai em em ang. A unaunu a hmangaih a, an vaia ṭhatna tur a hre dawn lutuk

Inhnial thui a duh loh avangin mit a chhing daih. A muhil der emaw a tih kha a muhil tak tak chu niin Jin a'n a rawn sawi a, a ṭhu chhuak hlawl a

"Kan thleng tawh e"

Adam's Mansion kawtah an ding a, Jin chu car aṭang chhuakin kawngka a rawn hawn sak a

"Ka lawm e" a ti sap

Lu a lo bu nghat a "Lut hmasa rawh. Car chuan dun nuam tih hmel deuh anga lan ai chuan a ṭha zawk ang"

"Jin..."

"Kal rawh, Ma belle. Ka rawn zui ve vat ang che" Jin chuan a bag chu a rawn phawrh a, Julianne i'n lo ban a tum chu a lu a thing a "In awmpui te ka pe mai ang"

"Ka bag chu ka khai thei alawm"

"Ka hria. Mahse khai tir che ka duh hleinem"

"Jin!"

"Kal rawh, Ma belle! Jared a'n a ngai tawh ang che"

"Nu!" Jared a aw an hre zui nghal. A aw lo chhuahna lamah an hawi a

Jared chu pawn kailawn ah a rawn chhuk a, jeans leh kawr dum a ha a, a rawn tlan chu Julianne i'n a lo kuah chawt mai

"Ka ngai tawh che. Ka rei lo vang i ti a, ni hnih lai a liam tawh hi"

"Ka hria alawm bawihte, Tihpalh. Hna ka thawk a, thlipui na lutuk tleh in kawng a hnawh phui vek alawm"

"Hna hi thawk reng lo la ka ti e" tiin a tum bur a "Tinge Nute Adrienne hi hna a thawh ve ngai miah loh? Kan bulah a awm chawt bawk si a"

"A chhan chu...." naupang kum ruk mi hnenah engtin nge a hrilhfiah tak ang le

"A chhan chu maw i pate Justin hian chhungkaw tan a thawk chhuak thei a, i nu hi chuan Pate Justin leh nute Adrienne nihna a chelh kawp alawm" Jin a'n an hnung aṭang a lo hrilhfiah a

"Pate Jin!" Jared chuan Jin a hmuh chuan a phur nghal sarh mai

Jared chuan Julianne thlah in Jin a banah a kai per lawp a

"I rit telh telh mai a nih hi, ka nau"

Julianne i'n an pahniha a han hmuh chuan a lu te pawh a hai rum rum hial mai. An inang lutuk a, Jin a'n Jared a pa chungchang a zawt miah lo chu mak a ti zawk hial mai

"I cham ve dawn em?" Jared a'n a zawt a

"Cham maithei...."

"Tak tak maw? A hma ang khan ka room ah i riak leh dawn em?"

Julianne chuan Jin chu a lo melh rawl rawl a, ani rawn hawi zawk chu mitmeng in a lo chhuahchhal a

Jin a'n insawifiah tum lovin Jared lam hawiin a nui hak a "Kan thuruk ni rawh se kan ti si a" a ti a

Jared chu a meng zau kawk a "Pate Jin, buaina ah i luh phah dawn em?" a ti a

"Buai phah maithei. Mahse nakinah ka chingfel mai ang. Ka rawn kal leh hunah lemziah min entir i tum kha. Ti rawh i lut vat ang"

"Aw ni tak e, lem ka ziak hnem tawh lutuk. I pen min pek kha ka hmang a, tirawh ka hmuh ang che" Jin a banah kaiin kawngka lam a pan pui a, a nu lam hawi lehin "Nakinah aw, Nu" a ti a

"Jin!" Julianne i'n Jin a te pafa kal nghauh nghauh chu a au vak a

Jin chu a rawn lehhawi ve leh a, Jared a tihdan zirin "Nakinah aw, Nu" a ti ve a

'Eng thil nge maw ni ngai le?'

Inchhung an luh thleng chuan a thlir zui reng a, Jin leh a fapa nui her her ri pawh a hrechiang ngang mai. An inang bawk nen an lo inpawh hle tih a hre ve chauh a ni

'Engtik in nge Jin Starck hi Jared a room a, a riah le? Engvang nge ni ang?'

Kailawn ah chuan chho in Inchhungah chuan a lut ve ta a, Viktor In enkawltu chuan a lo hmuak a

"Ni hman nuam, Miss Julianne. I lo haw leh chu kan lawm hle mai"

"Ka lawm e, Viktor. Ka awm loh hlanin engkim a fel vek maw?"

"Aw, I awm loh hlan chuan fel vek e"

"A nih tunah?"

Viktor chuan dar a chhin ak a

"Eng nge ni Viktor?"

"Ka sawi theih chu a ni lova, mahse...Mister Justin leh Mister Jac a'n tunah tak hian inleng pawimawh tak an nei a"

Julianne chuan Viktor a hmel a en in thil dik lo a awm tih a hria. Hriatchian a chak zek zek mai

"Tu nge ni a?"

Viktor chuan a chhang hreh lutuk

"Tunge?" a ti nawn leh ngat

A tawpah Viktor chuan thawk a la halh a "I pa mawle"

Julianne thinphu chu a rang nghal zawih zawih. Tlu mai dawn te in a inhria

****

End of 16

CHHUNZAWM LEH TUR