MR. BAD CHAPTER BY MAWITEI BAWITLUNG (Completed)

[mawitei bawihtlung]

MR. BAD


CHAPTER 31



“Remsang ka awm hi anuam theilo, ka lu te hi ana. Ka luak a chhuak lutuk bawk“ tiin ka pasal inbual zo rawh chhuak chiah chu ka pan hnaia. Ka ti tak tak bawk, tûnlai chu ka awm anuam thei meuhlo, ka ni hu a ka mut a chhuak em em zel bawk si, zân men pawh ka thei ta ngai meuhlo.



Thlakhat lai mai an inah pawh ka chêng ve ta a, hrehawm tihna ka nei tawhlo. Remsanga hian engkim a thlâk danglama, a chhûngte pawh ka chungah an ṭha em em tawh zâwk. Ramengi leh Sawmsawmi lahin min ngaina zualin Ramengi pawh kan inrual chiah bawka tûnah chuan ka ṭhianṭha ber ang a ni tawh.




Mihring hi kan inthlâk danglam chiah hian engkim hi a thar ang vek a lo ni leh mai ṭhin. Tûnah chuan chhungkaw thar leh laizawn ṭha tak tak ka nei ve tawha, tu nun mah ka awt ta lo.



“Damdawiin ah rawn kal ve la a ṭha ang, kan in entir dâwn a nia. I pum lam a dik lo pawh ani thei, ka nu te ka lo bia anga, vawiin chu picnic naah pawh kal ve lo mai ang” a tihchuan ka hnial lêm lo, ka eng hi nge dik lo tih hi hriat chhuah vat ka duh ber.



“Um keimahin ka lo zuk hrilh ange, tikhan lo inthlak rawh” tiin room aṭang chuan ka chhuak zuia. Kan chhûngte ho chu choka ah an lo buai leh mawlh mawlh tawh, vawiin chu chhûngkua a picnic an tih avângin an che reng reng chu an hmanhmawh tih a hriat.



“Ee i lo chhuk tawh maw? Khawnge in pa? In insiam ve sa em?” ka nu chuan alo ti nghal sawk sawka “Nu vawiin chu kan lo tello mai ang, ka pum hi a nuam theiloa, ka lu hi a hai reng bawk si a Remsangan damdawiin lama in entir phawt a tia, rawn tello ila a pawi viau angem?” inthlahrung deuh tak chuan ka ti a.




An ngaihdikloh erawh ka hlau takzet “A va zia lo ve, chutia i nawm loh si chuan rawn kal lo in hospital chu pan zâwk mai rawh u. Keini pawh kan rawn haw har nâng, hei midang tel tur an awm tho va, hriselna hi ngaihpawimawh a ṭha. In hi in lo nghâk mai dawn ania” a rawn tih takah chuan ka thaw huai mai.




“Aw le rawngbawl pawh ka lo pui dawn ania, nidangah chuan kan rawn tel thei tawh ngei ngei ang“ ka tihlai chuan “Puipui ilo kal thei dâwn lo maw? Ka ṭhiante'n hmuh ve che an châk a sin, ka bialpa te hmuh tir ve che ka duh nên” Ramengi chuan a rawn ti niah niaha.




“Vawiin chu i u in in entir a ti tlata, ka nuam lo bawk sia hma laia in entir kha ka duh ve tho a. I ṭhiante chu zânah te an lo lêng hman angem? I bialpa pawh chu ka hmu ve châk tho alawm” ka tihchuan a rawn phur thar tih hriat takin ka bânah a rawn vuana “Ka nu hi hrilh miahlo la, amah chu ka u ṭhianpa hi ania. Helamah a awm ngai meuhloa, i hrelo mai thei. U Remsanga ṭhianṭha ber hi ania, kan tleirâwl lai aṭangin ka duh tawh, tûnah hian kan collegeah  hna a hmu chiaha” tiin a rawn phun sar sara.




“Ka nu hi hrilh miah suh, chutilo chu min hau leh char char a nimai. Tunge a nih ka la hrilh lova, vawiinah hre chauh rawh se” a tihchuan ka nui hak haka, ka kut zung chal chu ka hmui zâwnah dahin ka sawi loh tur thu chu ka hrilh zuia.



“A chhuak hauh lovang, i sawi chu ka hre mai thei. I u khân min hmuh tawh tlatin ka hria, chêr lam deuh sâng ve lam kha a ni em? Ngo deuh mai” ka tihchuan a bu nghat nghata.


“Um a sâng lêm lo, mahse a chhelo ka tia. Star tu pawh a ngah tehmai ania, a zirlai naupang ka ni dâwn sia ka hmu reng thei anga a nawm dâwn zia hi” tiin a sawi nghal bawrh bawrha. A ni pawh kan in ngeih a chin hi a rilru lo chhiat loh zia leh nelawm tak, ṭawng duh tak a nihzia ka hre thara keipawhin ka ngaina tawh takzet bawk.




“Kan kal mai dâwn em ni? Ka nu vawiin chu ka nupui hi Doctor kan check tir ange aw, kan rawn tel ve lo mai ang. A ṭul leh chawhnu lamah te kan rawn kal anga” tiin Remsanga chuan ka kâwngah a rawn kuah nghal chata.



Hepa hi chu khawiah pawh awm ila a ta ka nihzia hi midangte hmuhah tihlan a hreh ngai miahlo. Ka rin phâk bakin a langtlang bawk, a ngeih loh zawng thup a thiam ve heklo. Mahse hei tak hi ka duhna a ni bawk si.


Damdawiin kan thlen rualin min lo be sap sap hlawma, Remsangan ka hnathawh phal tawhlo mahsela ka pui ve reng thunga. A bulah nilengin ka lo ṭhu ve mai zela, ka rinloh deuhin damdawiin enkawl dân leh hnathawkte tihdan pawh a thiama, tute pawh hian an zah em em vek tlat.




“Ka nupui hi a pum lam a sawisela, a luak a chhuak bawka. A lu a hai bawk a, enge dik lohna a neih nang lo en mai teh” Doctor Thani bulah chuan a ti nghal tawla. Hepa hi chu aw, biak hmasak ve âwm ania, thil mawi hnai zawng hmasa tur hian ka hrilh ngun nên.



“Puipui lo ṭhu la engtin maw i awm chiaha?” a rawn tihchuan ṭhutthlenga ṭhut thlâk pah chuan ka awm dân ṭhin chu ka sawi mawlh mawlha. Ngun taka lo ngaithla in a bu nghat nghata “Nangman inrinhlelhna châng i hre miahlo em ni? Nurse i ni a, nangmah i awm dân aṭangin i inhre miahlo em ni?” a rawn tihchuan enge a sawi awmzia ka hre hauhlo.



“Eng chu maw?” Remsanga nên chuan kan ti rual a, kan in en nghal haw mai. “Nau i pai a nih ka ring, i awmdân i sawi hmangah raino ho awmdân a lang tlata. Nurse i nia, inrinhlelhna châng i hriat ka ring a nia” tiin a nui hak haka. Chutah test kit chu min rawn pe in “Toilet ah sâwn va ti teh, rawn keng chhuak leh la, i rai a nih ka ring” a tihchuan Remsanga chu ka melh zawka.




A hmela phûrna lang chhuak chu ka hmuh hmaih lo, a êng nghal sarin ka hria. Keipawh engvanga lo inring hlel miah lo nge maw ka nih le? Doctor Thani hian a sawi dik chiah, hei chen damdawiinah ka lo thawk ve tawha, engmah ka hrethiam hauh lo chu ania, inrinhlelhna châng phei chu hrelo tak ka ni.




Toilet-ah chuan lût in ka zun chu ka test zuia, ka chhuah rual chuan ka test kit chu Doctor Thani chu pe in Remsanga pawh a rawn hnai rang ngei mai. “Nghah deuh angai, a lang nghal mai lo ania. Dawhthei tak khân awm la” ka tihchuan a bu nghata, mahse kut a tih chêt sek dânah a hre châk tawh tih ka hre reng.





Nuih a ti za lek lek mai, hetiang khawp hian pa nih a châk tawh ang tih ka ring pha lo. Rei deuh fe kan nghah hnuah Doctor Thani chuan “Hei le i rai a nih hi” a tihchuan Remsanga chu a ṭhutna aṭangin a zuang tho deuh zawka, thâwm erawh a chhuah hauh lova. A hmêl lan dânah erawh a hlim tih a hriat hliah hliah thung.




“Ultrasound tih in duh hunah in rawn kal mai dâwn ania, ka lawmpui hle mai che u” a tihchuan keipawh ka lâwm, hetiang a rang hian ka pai ka ring lo a sin. Ka pum chu ka khawih a, tûnah chuan nu ka ni ve tawh dâwn tihna! Hlim zet chuan Remsanga chu ka ena, a ni pawhin min lo nuih var vara, a hmêl chu hmuh anuam tih piah lam ani.




Ka kawngah rawn kuahin pâwnlam min pan puia, ka chalah chuan rawn fâwp zauhin “Ka lawm e” a rawn ti supa, a lawm tak tak tih ka hria, keipawh ka hlim “Ka nute rawn haw zung zung se ka hrilh châk tawh, naute an nghâkhlel hlawm si a, an lâwm viau in ka ring” tiin ka phun sepa.



“Keipawh ka lâwm alawm, an ni pawh an hlim ngei ang. Tûnah phei chuan ahma aia nasa in ka duat leh zual ang che, i ei duhzâwng eng pawh min hrilh hreh lo la, i ei vek ang” tiin A office chhungah chuan min luh puia, sofa a ka ṭhut thlâk rualin ka dulah a bur nghal chata.



“Keima fa, ka thisen ngei ka fa liau liau” ti a a phun sup sup chuan eng tin emaw tak hian min ti danglama, ka kawchhûng lam aṭang hian min ṭhâm deuh er er tu a awm bawk. Ka dul chu hlimin a fâwp vang vanga, “Tunah chuan ka lo ngaihtuah ngai loh chhûngkua ka din chho ve ta tak tak dawn e, hetah hian ka thisen aṭang ngeia insiam chu a awm tawh tlata” tiin a nui suka.




Ngawi rengin ka en thung, a chêtzia chu hmuhnawm ka ti a ni ber mai.



Chawhnu lamah chuan haw in rawngbâwl puih ka tum pawh a phal ṭhak lova, hahdam taka awm turin min ti char char ringawt. Ka hahna vak tur a awm loh nên, a nu leh pa hrilh a châk tawh lutuk chu a sana a bih seka, phone aṭanga hrilh chu a duh bik derlo.



Tlaiah chuan a nghahhlelh em em chu rawn thlengin kan chhûngte chu an rawn haw a, kawngka bula kan lo awm an hmuh chuan mak an ti tih a hriat. “Bawiha thil thleng a awm em ni? Enga tinge min lo hmuah ve teh khiaha?” ka pa chuan a rawn ti a, midang pawh kan bulah chuan an rawn ding nghal ṭhap a.




“Ni e, Puipui in in entir chu enge in an? I ṭha em? I chungah thil ṭha lo thleng a awm em ni? Doctor in engtin nge an lo tih che?” ka nu in rawn tiin min rawn hnaih zuia, Remsangan a sawi loh chuan lo sawi thawt thawt kha ka duh bik lo nên amah chu ka en ta tawpa.




Sawmsawmi leh Ramengi chenin kan lam an ngaihven vek tawh tih ka hria, “Nu, Puipuii khân nau a pai, in tu tur a pai mek a nihchu. A nuam lo pawh kha a raino vâng a nia” a tihrual chuan midang chuan ka lam an rawn hawi nghal ṭhap a, Sawmsawmi phei chu a au chûl mai.



“Eng maw? Tak tak em ni? Puipui i rai a maw?” ka nu leh pa chuan rawn tiin an hmêl êng sawr sawr aṭang chuan an phûr nghal hle tih a hriat. “Aw, nu, pa ka rai a lawm. Vawiinah khân damdawi inah kan in check nghala” ka tihchuan an nui nghal hak haka, inchhûng lamah min kaih luh phahin an lâwm thu chu an sawi pah mawlh mawlha.




Ramengi leh Sawmsawmi phei chu an phûr fâl emaw tih tur in an rak chûl reng mai. Zanriah ei lai te chuan ṭawngṭai in ka naupai chu tluang taka ka pai theih nân Pathian hnênah an dil thlapa, hetiang khawpa hmangaihtu chhûngkua ka nei leh thei hi ka phuloh malsawmna a niin ka hria.



Zân mut hmunah chuan Remsanga nên chuan titi in kan hmalam hun tur kan sawi duna, Ramengi bialpa pawh a sawi ang ngeiin reilote chu ka hmuh puia, rei erawh an awm lêm lo. Bâkah Remsanga hian mut hma a tih tlat avângin room lam kan pan ta Kha a nia.



“Ka fa i pai ang tih hi âwih har ka la ti reng mai” a rawn tihchuan ka nui haka “Chuti maw? Keichu ka hlim a sin, ka ching ang tih ka hlau lutuka, mahse tûnah chuan ka hlim tawh” tiin ka nui sen sena.



“Keipawh ka hlim a lawm, nang nên fa kan han nei tur chu ka ngaihtuah pawh hian a hlimawm dâwn tih ka hria. Buai tak maia ka fa te ngei i enkawl tur hi ka hmu châk tawh a sin, nang hi chu ka ta tur liau liaua khuanu min pêk che i nih hi” a tihchuan ka chhûngril tak thleng a fana, ni e a ta tur liau liau ngei chu ka niin ka hria, Evan-a ka theihnghilh ta tihna erawh a nilo.




A ni nên chuan khuanu in awm dun turin min ruat lo miaua.



Hun liamin keilah ka chhûngte ho in min duat bawk nên ka thau lutuk ṭep zâwk ani. Ka naupai lah huat em em ka neiloa, ka ngeih lutuk zâwk an ti fo ṭhin, keima tâwkah ka hrisêl ṭha a. Thil ei tui loh ka nei hek lo, ka pum puar lah nên ka vâk kual ṭhin chu Remsanga hian hmuhnawm hi min ti ṭhin a, room chhûnga in zo lo taka ka vâk kual hmuh châk hian khumah a ṭhu lui ngur zela, a châng leh kan inhau leh ṭhin.




Sim erawh a tum ngai lo, nitin hian min hmangaihna a ti lang bâng lova. Ka thlan sual loh zia ka hrechiang leh ṭhin, ka rinhlelh turin hmeichhe dang a awmpui-in a be ngai lova, ka hmuh phâk loha a awm lai pawhin ka tân a rinawmna a tilang bâng chuang lo.



A chhûngte lahin min duat a, eitur leh naute pianghlim mamawh te hi hman sên loh tur an lei khâwl ṭun tawha. Kan in khap ve nângin awmzia erawh a awm lo viau mai.



A tâwp a tâwpah chuan ka nghahhlelh em em mai ka fa chu rawn piangin mipa duhawm tak leh lian ṭha tak ka hringa. A pian hlima a pa awmdân erawhin ka lâwm na a siam thung, midang zawngin kan fa an nghaka, a ni erawh ka chhuah hma loh kan fapa pawh en lo in min lo nghâk thunga.




Chu thil chuan thu maia min hmangaih loh zia a ti chiangin ka hria, “Ka nupui duh tak, tûnah chuan nu leh pa ti tu tur kan nei ve ta e” tiin ka chalah chuan a rawn fâwp vang vanga, damdawiin khum a mu chung chuan kan chhungte'n kan fapa an pawm laih laih chu kan en duna.




Chutah ka pa chu rawn ding chhuakin thu a sawi dap dapa, an lâwm zia leh a hming pawh ka nu nên in rawn chunga an tih thu a sawi lai chuan nghakhlel takin kan lo en ṭhap a “Bawiha hriat reng nân Evan Rinmuansanga ni sela kan ti a, enge nang ni in ngaihdan. A nu leh pa in ni a, in rem tih loh chuan an pawi chuang lo ania” a rawn tihchuan Remsanga nên chuan kan in ena.




Ka bûk nghat rualin a nui suka “Kan lo tum sa ania, ka u avânga in tawng leh innei thei kan ni a, a hming in sak chu kan rem ti e. Evan Rinmuansanga a mawi hle mai” tiin kan fapa chu va pawmin ka lamah a rawn phei pui zuia, ka en chian chuan kan fapa chuan Evan-a a ang tak tak viau lehnghâl.




“Evan tûnah chuan fa ka nei ve tawh ania aw, i hming anpui tur ngei. I thlarauin rawn vêng la, a ṭhan lên hun thlengin min enkawl pui rawh aw, tûnah chuan nu ka ni ve tawh ania” ti a keima hriat thama phun sep sep chung chuan ka fapa kut chu ka vuana.



Remsanga chuan ka kut chu rawn vawn hnanin “Ka hmangaih che, ka hmangaih reng ang che. I nunhlui chu theihnghilh lo la, mahse hmalam erawh kan fa avâng tal pawh hian min pan pui ang che” tiin ka hmui hil deuh rapah chuan a rawn fâwpa, ni e a sawi dik.



Evan-a hre reng chung siin ka damchhung in ka pasal leh ka fate tân hian ka theihna zawng zawng ka hlan tawh ang, Evan-a chuan pialral aṭangin min lo nghâk anga, Remsanga erawhin nitin a ruala pên thei turin hmangaih chin tâwp lo vin min enkawl dawn tih ka hria ani.


A TAWP TA TAK TAK E