LOVE THE WAY YOU ARE BY Lalrozyee (Completed)

[ngaia]

LOVE THE WAY YOU ARE
CHAPTER – 17
ZIAKTU: ROSY LALHRIATPUII
(LAST CHAPTER)



U Sarah-I pawh an inneih aṭanga karhnih hnuah a rawn chhuk ve leh tawh a, a rawn chhuk hnu deuh lawk chuan a ruak lo tih a in hre zui leh nghal a. Nau a chhiat khan rai a harsat deuh ka lo ring ve ringawt kha nia..a vannei hle mai. A rai takah chuan a pasal leh chhungten Hostela awm chu an rem ti lo a, a zirlai laklawh viau chungin min haw san a. A bungrua zawng zawng chena a haw ta chu a ngaihawm thei vung vung viau a ni.





Class ka kal ṭha in Lehkha ka zir ngawrh ve bawk nen semester exam chu ka ti ṭha ve kher mai. Keimah tak pawh ka hlim ve hle. Rei vak lo ah Class tan leh nghal mai tur kan nih avangin haw pawh ka tum lo a. Zirtawpni chuan kan Hostel ho KRANG SURI water falls ah picnic kan tum ve a. Ka chhuak khat bawk nen ka phur ve hle.





Kan picnic na chu ka lo beisei aiin a nuam daih. Tui lah chu tuifinriat pàwl phut ang mai hian a lang pawl vek a, mawi tak a ni. A hmunah chuan Mi chu an lo tam khawp a. Tourist ho te pawh an lo tel ve nuk. A hmun a zau ṭha hem hawm em a, tumah chu kan in dip dal lem lo a.




Nileng deuh tho chuan tui ka cheng a, ka phone pawh ka en meuh lo va. Ka tui cheng zo ka in bual zawh a, ka phone ka han en chu..ka chhungte missed call ka lo dawng nual a. Ngatinge maw ni le..ti rilru chungin ka nu chu ka han call let a. Ani chuan ala leh tawh mai si lo a. Rilru nuam vak lo chungin kan haw na tur BUS-ah chuan ka lut a.





Hostel kan thlen hnu fe ah ka nu chuan min rawn bia a. U Lawma a chau thut a, damdawiinah an kalpui thu min rawn hrilh ta mai a. Enge chhan ka zawh chuan, TB a nih an ring a, test hrang hrang an tih mek thu chu a rawn sawi a. U Lawma Damdawiin hming pawh hre duh ngai lo in damdawiina awm ngai hial khawpa a awm takah chuan a ṭha vak lo ang tih ka ring thiam mai. Ka nu chuan kan chawlh lai tak a ni bawk nen rei lo te pawh ni se, kei chu naktuk lamah haw turin min rawn chah a. Kei pawh chuan ka lo hnial bik lo.





Ka haw chuan damdawiinah pawh awm lo in In-ah an lo awm tawh a. Test result chu alo Chhuak a. Ka beisei loh lutuk in ka unaupa chuan HIV a lo kai a ni. A lo rei tawh a nih hmel bawk. A kai chhan ber chu Syringe in hman tawm vang a ni.



U Lawma’n min hmuh rual chuan min kuah in a rawn tap chhuak a. “Nunu kei chu ka sual man ka hmu nih hi..fa pawh ka la nei ve lo a sin” a tih phei chuan ka in sum thei lo. Ka lo tah pui ve a. Kan unau chuan kan tap dun a. Ka rilru hi a va na tak em!



ART ṭha taka ei chuan kum 20 Chuang te pawh mi an dam tawh a, tunlaiah chuan heng te chu mi pawn hlauhawm ah an ngai tawh hlei nem te pawh han ti ve bawk mah se, chhungkua in kan han tawn chiah chuan sawi ang mai mai a nih loh zia hi ka hre chhuak a ni. Kan vaiin kan fimkhur tlán angai a, tun laiah mi an fing tawh a, Tumah an in thin hrik tawh ngai lo ti mah se, mi hriat chu kan hlau ru em em tho a. A hrehawm zia chu.



Ka u nun beidawng lutuk chuan mahni in tih hlum duh na hial khawp rilru a pu a, result kan hriat aṭanga zan thum chhung phei chu kan veng deuh tawp a ni mai. Kan chhungkua chu mi hriat loh in kan buai ru em em a.




Ka pate-a te Nupa lo kal in ṭawngtai na an rawn nei a, kan vai hian Pathian hnaih kan mamawhzia leh sim ngai, siamthat ngai kan nih na zawng zawng te in siam ṭhat tum vek turin min ti hlawm a. Pathian leh kohhran kan ngaihsak loh chhung chuan min ei ral tu tur hei aia ṭha lo pawh hi Pathian in a rawn la thlen tir ngei ang tih te chu a sawi a. Kan vai chuan Pathian leh Kohhran ngaihsak thar hlawm tur chuan min chah hlawm bawk.




Ka Patean thu a sawi lai chuan kan vaiin kan ngawi thap a, kan Chhungkua bik chu ka nu chenin keimahni theuh chu kan in en ni mai hian ka hria. Kei pawh chu ka awmdan ka in ngaihtuah ve nasa hle. Ka nun that loh dan leh mipat hmeichhiatna ka hman khaw loh ka ngaihtuah let chuan ka u chunga thleng ang hi ka chungah a thleng ve thei reng tih te ka ngaihtuah chhuak uar uar a.




Ka chhungte hriat loh a, a ruka in test ve chu ka ngaihtuah a ni. Ka mipa lo kawp tawh te leh U Zorema chenin ka ngaihtuah a, mah se, an ni ho kha rinhlelh tur tumah hre lo mah ila..mi hi kan rin ang vek an ni lo tih ka hre chiang. Chuvangin Engpawh ka chungah lo thleng dawn se la, kei chuan in hriat chhuah vat vat kha ka duh a, HIV keiin ka kai hlauhna ai mah chuan mi dang ka lo kai palh ka hlau em em a, lo kai palh ta ila, ka u anga tlai khaw hnu a in hriat chhuah chu ka duh lo bawk a ni.




Kan Veng sub center a in test ka duh loh avangin a ruk thei ang berin Civil ah ka va in test tir a. Vanneihthlak tak chuan result ṭha lo ka dawng ta lo a..ka lawm kher mai. Ka nuna tih tak taka Pathian hnena lawmthu ka sawi ve hmasak ber a ni bawk in ka hria.





U Lawma pawh tlem chuan a rilru a rawn zia chho a. A damdawi nikhat pawh a ei theihnghilh palh chu kan hlau em em vek mai a ni. Chutiang boruak kan neih kara vanneihthlak ve deuh mai pakhat chu…U Hmingtluanga hi a mizia zawng zawng tih tur deuh thaw hi a thlak vek a, a fel sawt khawp mai.. zu pawh a in ngai tawh lo. A thatchhe viau ṭhin na hian hman aṭangin a peih phawt chuan Inchhung khurah thil tih hreh a nei ngai lem lo a, tunah phei chuan eirawngbawl pawh a bawl ziah. Kan tan chauh lo pawh Annu raipuar tan pawh an pa fel ta viau chu lawmawm tak a ni.





Ka zirlai chhunzawm turin ka chhuk leh a. Ka theih tawkin ṭawngtai leh inkhawm ka ti chhunzawm ve a. Baptist in an Biak in an sa zo a, kan Hostel aṭangin a hnai bawk a, chutah hlir chuan ka inkhawm tawh. Hmelhriat thar ka tawng nual a..mah se, ka ṭhian tia han sawi thar tur tumah ka nei tawh lo a ni.





Kan senior te ho an chhuak tawh dawn a. Mizo Unit farewell kan hmannaah chuan ka va tel ve a. Midang chu thuhran, Rudo leh Theodore-a te College-ah hmuh tur an awm tawh dawn lo tawp chu a lunglenthlak duh hle mai.




Rudo’n, “Nakkum January thla hian Album tih chhuah ve kan rilruk a, kan release hunah ilo kal ve ngei a ngai ang aw..Album ah chuan Love & War pawh kha kan telh dawn a” tia phur hmel taka min hrilh chuan, keipawn ka lo phur pui ve khawp mai. Aizawlah an release dawn avangin keipawh chuan ka awm phawt chuan tel ve ngei ka tum thu ka hrilh ve hlawm a.




Chhungkaw kima Krismas kan hman ho loh na rei tawh em vangin U Hruaia te Chhungkua pawh haw turin ka nu in a chah hlawm a. An lo thleng chu..U Hmingtluanga ten naute an nei thar ve bawk nen kan chhungkua chu kan chhangchhe thar khawp a, kan ri deuh mam mam mai.




U Lawma pawh KTP ah kum over lek lek tawh in alo tel ve a, hla an zir chang leh enge maw thil tih naah Thingpui lum leader ah an lo ruat ṭhin. A chan vo chu ṭha takin alo ti ve vek ṭhin a, chu chuan a nunah tam takin a ṭha zawngin nghawng a neih zia chu ka haw leh hnuah hian ka hmu thei a ni.




Remfela leh Joe te chu nakkum June a chhuak tur an nih avangin Krismas hmang turin an rawn haw lo a. Joe leh Ahriati chu an la in ngaizawng reng tih chu ka hria. Ahriati nen tak hi chuan kan in hmu ve zeuh zeuh ṭhin a, a hma ang tak erawh kha chuan pawh takin kan in be tawh ngai lo tluk a ni.




An lo haw khat ve bawk nen U Hruaia’n a ṭhian te, a ngaihpawimawh zual ho chaw ei a sawm hlawm a. Chutah chuan ka rin ang ngeiin U Zorema alo kal ve a. Kan ina an ṭhian te dang mipa Pahnih te nena an lo luh lai chuan Choka aṭangin ka lo thlek zeuh a, a buai ṭhin hle niang, a hmêl chu ka hmu upa deuh tlat. Mahse, a pa zual zawk mah chuan ka hria. Hneichhe dang a tawng ve tawh ngem le? Tiin ka ngaihtuah zeuh a.





Ka awmna lam a rawn hawi miah loh avangin kei chu min rawn hmu ve kher lo ang, ka u leh an ṭhian te ho nen chuan an in kawm a. Hmana kan awm dan kha ka u emaw ka chhungte hian hre ta se la engtin nge an ngaih ang le? Ngaihtuah pawh ka duh lo zawk.


.


“Bt..kha kha em ni I fapa chu?” chu aw ka hriat chuan ka Alu leh cheese rawt lai mek chu ka tawp deuh chawt. Hawi erawh ka hawi let lo.



U Btei chuan, “aw nih hi..in hmuh va khat ve..i dam maw?” a ti let a.



Pakhatin, “Dam lawm..” a tih sup lai chuan, U Hruaia nupui U Mangil hian ka hnung mai aṭangin, “Tluangte…kha kha tlem lo ang maw?” tia min rawn biak takah chuan, hreh ru tak chungin ka han hawi let a, “tlem dawn mi?” tih pah chuan U Btei’ nena in be mek chu ka va melh zawk a. Ani pawh chuan min lo melh ve chiah a, hawi sawn duh bik lo in, za vak lo hian ka nuih a, tawi te hian mi rawn nuih let ve zeuh bawk.




U Mangil’n alu chhum sa ka thil rawt laiah a rawn telh belh chuan ka hawi sawn leh nghal a. Alu a rawn telh belh kher chu a chhung a hmin ṭha vak lo a niang rawt keh sawm a har lutuk chu chem te a zai sawm mai ka tum a, tui khawihna bula kan chem te dah naa chem te la tura ka kun phei tur chiah hi, ka hnung mai aṭangin, aw thum deuh sup hian, “tui in tur ka va duh” a rawn ti a. Ka hawi let chu..ka bul maiah chuan a rawn ding. A rim chu ala ngai reng mai.




Pangai tak hian, “Saw tah sawn aw..” tiin tui khawihna bul maia kan electric Filter chu ka han kawh hmuh a. Ani pawh chuan Filter awmna lam chu a pan ve mai bawk.



“I dam maw?” ka tih chuan, a bu zeuh a, “Nang le?” a rawn ti sup a.



“Dam lawm..” ka lo ti vat a. A thil min pek kha ka hre chhuak zawk a..tunah hian lawmthu hrilh ila ṭha in ka hria tih chu ka thinlungah a rawn lang a.



“Englo..thilpek vang khan ka lawm e aw..” zawi te a ka tih chuan, “keipawh le..” tiin za vak lo hian a nui suk a.



“Ngatinge min pek ka zawt thei che ngem?aa..ka sawi awmzia tak zawk chu..kan thil tih vang khan lawmthu sawi nan min pe mi?” tiin zawh ka chak em em mai chu ka han zawt zui thawr a. Ani chuan, “Ni lo e” tih chiah chuan min chhang a.


“A nih tinge a?”


“I ta ni turin I duh kha” a rawn tih chuan, kha pheikhawk ka hmuh tirh a ‘ka ta ni rawh’ tih ka status kha ka hrechhuak nghal a. Ka chhang tur chu..U Hruaia a rawn ṭawng lung lung vang chuan ka ngawi ta zawk a. Chaw an ei a, an haw leh thleng pawn kan in be zawm leh tawh lo.




Mahse, zánah hian min lo text ve hlawl a. A number ka save tawh lo na in, a mah tih chu chiang takin ka la hria. Ka number chu alo la nei ve reng a nih hmel.




Heti hian a rawn tia.. “sex vanga lawmthu sawi na a ni lo, hriatrengna vanga natna ni lo, hriatreng tlak hun hlimawm tak zawk min pek vanga lawm thu sawi na a nih kha” a rawn ti hmasa phawt a.




A hnuaiah, “Ka lak aṭanga ka kal tir theih nan che pawh. I tana mi ṭha ka ni lo a, ka ni ngai dawn lo tih ka hria, chu chu ka hmuh tirh phat aṭang khan ka hre daih tawh zawk. Mahse, awm tir mai mai che kha ka thei thlawt lo a ni. Ka Tihpalh Malsawm..mahse, kan awmdan vang khan second khat pawh ka inchhir ngai lo..chu chu I hre dawn nia” a rawn ti a. Engtin mah ka va chhang let lo a, mah se.. chutiang thu min rawn thawn avang chuan engtin emaw tak hian ka dam hawk hian ka in hria a ni. Keipawn kan thil tih kha ka inchhir bik lo vang tiin ka ngaihtuah a.


.


Sunday zán inkhawm bana haw mai ka tum chu, Krismas hla zir ve turin min sawm tlat hlawm a. Hla ka rem ngai lo hrim hrim a, ka zai thiam lo si, ka duh thlawt lo, ka han hnial hlawm chu..min pawt deuh ṭawng ṭawng hlawm a, an zingah chuan Ahriati pawh a tel ve. Chuti na na na chu tiin zir ve ka tum a. Bakah U Lawma ten thingpui an lum dawn tho bawk a.





Kan Hla zir chu Kristian Hla bu ami a nih avangin har chu ka ti bik hran lo, mahse, ka zaithiam lo lutuk chu ka zak zawk. Ka bulah Ahriati a thu a, ani chu zaipawla tel thang tih takah zai thei tak a ni. A bulah chuan ka aw pawh a lang ve lo, min khuh hneh lutuk a. A sang kan sak lai phei chuan ka aw ka trick char char hi nimai. Kan Conductor pawh chuan, “Tluangi chu Controlto sa chi a niin ka hria..” min tia..Controlto part lama U Nunpuii te bulah min sawn daih a. Zak ru viau mah ila nuam ka ti daih zawk. Hetah chuan Ring vaka zai a ngai ve bawk si lo a.





Thingpui in-a kan chawlh lai chuan zun ka tum a, U Nunpuii a la in zo chiah bawk si lo chu keimah in Toilet lamah chuan ka kal a. Ka zung tan vel dawn chiah tih hian, tu tu emaw te hi Washroom-ah chuan an lo lut a. Tu aw ber nge ka hre thei lo. Pakhat hian, “awii..kei chu U Lawma te ho thingpui lum hi chu ka in tui tang thlawt lo..” a tih chuan min ṭhawng chiang hle ni.


“Engvang ngawt chuan maw?” pakhat chuan a ti let a.


“I hre ve lo mi? HIV patient a nia lawm..”


“Ehe!!! Awii..a ni maw ka lo hre lo reng reng”


“Ni e..hei va thinhrik tur chu ka ti miah lo a, mahse, eiin siam tur hi chuan ruat ve tawh lo se ka ti..tihpalh thil thu ah thisen te hi chhuak thei a nia..ka duh thlawt lo”



“I sawi takah chuan a nau Tluangi pawh hi ka ringhlel tawp…a chhan chu khutah..Shillongah hnamdang a kawp ṭhin an tia..call girl deuh in a awm an ti lawm..”




Ka puakkeh lo chauh a ni. Toilet ah chuan an chhuah thlengin ka awm a. An chhuah hnu chuan muangchangin ka chhuak ve chiah a. Hla zira luh pawh ka tum tawh lo. In Hnuaiah ka u koh tumin ka chhuk a.




Ka u chu midang pathum te nen khaw vawt lutuk karah no an lo sil a. Ka u phur taka no sil ka hmuh chuan ka thling zawng zawng hi engtin emaw ni hian a fan in ka hria. Hriat loh karin ka mittui chu a rawn tla zawih a, min hmuh hma in, ka chho leh ta ringawt. U Nunpuii’n ka lut har a tih avangin min lo call a niang, call chu reject in message in ka haw thu ka va hrilh a.





Kan In lamah chuan Ka haw tlang nghal a. Ka nu chu U Hruaia fate pahnih ho in TV an lo la en a. Ka u nen kan haw loh avang chuan Chanchin min lo zawt vat a. “No an la sil a, alo haw thei rih lo” tih chauh chuan ka chhang a.




Room ah ka chho tlang nghal a. In chung thlir in ka meng kar a. Ngaihtuahna a vak nasa. Ka pa a boral khan kan in sak nan loan kan la hnem em em a, ka pa damlo enkawlna senso nen sum chan mang pawh kan nei lo a, ka u te ho zirna vanga sum an mamawh nasat zual lai tak a ni bawk nen ka nu chuan hna a thawk nasa em em a, kan chhungte ho chuan min han tanpui ve hlawm bawk mah se, Chhungkaw hran vek nei an nia, a zawng zawngin min puih thei bik lo a..ka nu vek hi a ni mai.





Kan unau rualin Hostelah min dah a. Ka Nutei ten an sawi ṭhin dan phei chuan ka nu khan vawk pasarih te a rualin a vulh a, secondhand te hawngin a ṭhut pui bawk ṭhin. Chutianga sum zawng reng renga a buai ṭhin avang chuan Kohhran a ngaihsak hman lo va, Hostel atanga kan Chhuah ve chang pawh hian Krismas lai takngial pawn Chhungkaw inkhawm takngial Pawh hi kan nei ngai lo tluk hi a ni ṭhin a. In-a Chhungkaw nu awm ta lo na na na chu kan unau chuan pawn nuam kan ti tlàng vek a..chu chu kan chhiat na bul a ni.




Ka tho thut a. Inhnuaiah ka tlán thla a, ka thawm ah ka nu leh ka vah te pahnih chu an lo hawi vat a. TV chu ka va off sak hlawm ringawt a. Rinrini chuan, “aaaa niiii” a rawn ti vak a. Ngaipawimawh duh lo in, ka nu chu ka en a. Ani pawh chuan mak tih hmèl tak chuan min lo en a.




“Nu…kan unau hetianga kan awm hi a chhan bulpui ber chu nangmah I ni lawm” ka ti ta thlawt. “ Ngatinge kan tet laia kan mamawh lai ber che khan pawisa hlir kha ilo buaipui.. Lehkha kan thiam loh I hlau a, kan puitlin loh I hlau a, mah se..kan nun kan hloh leh si hian enge awmzia a neih?” ka tih leh chiah chu, “Malsawmtluang eng maw I sawi a?” U Hruaia’n a rawn ti vin ṭhawt a.



Ka hawi phei dawr. A hmel rum takah chuan khatianga engvanga ka nu kha ti ngam zawk nge ka nih tih melh hian min lo melh. Rinrini te unau in, “aaa pa..anî hi..” an lo ti ve bawk. U Hruaia chuan naupang ho chu mu tawh turin a tia..thu awih tak chuan an kal a. Ka nu hmèl dang bai ka hmuh chuan ka thil sawi avanga pawi ka tih zia leh ka inchhir zia chuh.




U Hruaia bawk chuan, “Ka nu kha ngaihdam dil rawh” a rawn ti fiak leh that a. Ngaihdam dil tuma ka ṭawng tur chu, ka nu chu a rawn ṭawng chhuak. “A sawi kha dik lo pakhat mah a awm hlei nem Tea...ka thiam loh a lawm..” a tih lai chuan, ka in thiam loh lutuk chu, “Nuuu” ka han ti ringawt a.



Ani chuan min rawn en in, “Ka fanu hian ka dik loh na min hrilh lo se..tu in nge min hrilh Chuang ang le..” a rawn ti sep a. Ka va kuah ta ringawt.



Zanin ka thil hriat kha a zawng zawng ni lo deuhin ka sawi chhuak a. “Kohhran mi te hian tuma’n min mamawh ve chuang lo, kan tel ve pawh hi engatan mah an ti lo in ka hria..ka tel duh tawh thlawt lo..U Lawma pawh hi tel tawh lo se ka ti” rilru na deuh chunga ka tih chuan, ka nu in, “Chutiang chuan sawi mah ta che..kohhran mi ten min mamawh avanga tel tur kan ni hlei nem, kohhran chu kei ni hian kan mamawh em vang zawkin a nia kan tel ngei ngei a ngaih chu…kohhran leh kohhran mi te do zawng phei chuan awm miah lo tur..keimahni kan in ti chhe zawk mai mai” a rawn ti a. A sawi chu dik lo pakhat mah a awm lo tih ka hria..ka sawi chhuah chhan kha chu ka rilru a nat ve em vang mai a ni.


.

U Hruaia te Chhungkua an kal tawh a, kan reh angreng. January thla kar tawo lamah Rudo te band Album release naah chuan ka va telpui a. Mi chu an sawm tam hran lo khawp mai. Theodore leh a bialnu te nen chuan kan ṭhu ho a. Theodore bialnu Hmai chu cher lam hmai tung lek lek, hlei tling zet hi nia..a aw chu a dam hle bawk. Thinchhe tak a ni lo ang tih chu a vawikhat ṭawng naah ka lo ring thiam mai.




Hmai’n, “saw saw mi..Pete-a fa chu?” a rawn tih chuan a hawi na lam chu Theodore-a nen kan hawi ve thuai a. Hmeichhe naupang kum 2 vel tur hi hmeichhe pakhat in alo in fiampui a. Chu chu a sawi chu ni maiin ka hria.




Theodore chuan, “nih saw..ti sawn Khawvelah fahrah pakhatin a pun belh leh chu ni mai sia..” a rawn ti hul hak a. A sawi hmangah chuan naute nu leh Petera chu an in nei lo a nih ka ring.



“Sex hman dan an thiam ve hi chuan tih rai loh dan pawh hi thiam tel tur a nia maw..Lal Pete-a te ho zei lo lutuk” a tih chiah chu, “Theo..a mak e…khatiang kha sawi ṭhin suh” tiin a bialnu chuan alo khap vat a.



Theodore lah chuan, “a ni reng alawm..sex hman duh ve si a, mi rai duh loh chuan hman dan zei ve mai tur..ti raw..Mali?” tia nui huk chunga mi rawn zawh chuan, za vak lo a nui chungin ka lo bu ve nghat a. Theodore chuan fiamthu angreng in sawi mah se..dik chu ka ti tho mai..a chhan chu, U Hmingtluanga’n sawn a thlak aṭang daih tawh khan, fahrah siam hi ka hlau ve em em a, keimah ngei pawh hi sex hmang mah ila, hetiang kawngah hian ka in veng fimkhur nasa ve ṭhin.




Bsc ka final na tur a ni ve tawh mai dawn a. Pathian zarah ka lo pass ve a nih chuan enge ka tih zawm ang tih ka in ngaihtuah nasa ve hle. U Gracei sawi ang khan Degree chu a Pawimawh tih ka hria a, mah se..chu chu ka mamawh ber a ni a ngem..tih vel chuan ka ngaihtuah na ka hmang buai ve nasa a.





Hmânah khan Jonathan chuan Engineering a zawh hunah Army a luh a tum thu ka min hrilh a, tunah an chhuak ve tawh mai dawn a..Sipai nih kha ala chak tho a ngem le..





Rei tak kan in biak tawh loh hnuah zanin chu biak châkna in min tur ut ut a. Ka ngai ve bawk nen. FMovies site a War Movie ka hmuh hmasak ber link chu ka va thawn ringawt a. A hmu har angreng.




Ka nghak deuh char char a, ka nghak chhuak tawh lo mai dâwn emaw ka tih hnuah chuan a rawn pawl ve hram a. Mahse, min reply miah lo. Ka lunghnur angreng hle na in, keiman ka va be hmasa chu inchhir na ka nei Chuang lo, vawikhatmah in biak tawh loh ai thlawt chuan..



Mut mai ka tum tawh laia call a min rawn call let ta hlawl si chu mak ka ti hle. Phone ka lak rual chuan, “I movie rawn thawn chu ka en daih tawh lawm..” nui ri deuh chung chuan a rawn ti a. Nui deuh mah se, Hman ang lo takin A aw chu a zawi deuh ruih hian ka hria a.



“A ni maw..ka hmu ve chiah a..” nuam ti chiah lo chuan ka lo ti vat a.


“A hmuhnawm lutuk en rawh”



“Nia..aw..i dam em?”



“Ka dam a lawm..” tih chiah chuan min chhang a. Ka dam ṭhat leh that loh chu min zawh buai ve a tum lem lo a nih ka ring. Pawi lo ve..a dam ṭha tih hriat chu a tawk mai alawm.



“In chhuak tep tawh sia..Army-a luh kha ila tum em?” tia pangai thei ang bera ka han zawh let chuan, “tum vak tawh lo e..” tih te mai chuan min chhang a, “Ti maw?” ka lo ti vat a.




“Ahriati’n sipai nupui nih a duh dawn si lo a” a tih chiah chuan ka thin zawn hi a lo na veng veng thei.




“A nih chu..” ka ti let ve sep a. Kan ngawi ta ve ve a. Sawi tur ka hre tawh thlawt lo.




“I lo dam ṭha zel dawn nia aw..ka dah mai” tia dah ka tum lai chuan, “Furi?” a rawn ti vat a.




“Awih” ka lo ti vat a. Engvang nge pawh ka hre lo, chutia min rawn ko ri ka hriat chuan ka hnuk a ti ulh ringawt nia!



“Lo in enkawl ṭha rawh aw..” a rawn tih leh lek phei chuan ka tap tep a ni. Ngatinge tiang hian ka awm le..ani hi ka duh em ni?




Kei ang tho a, a nun dan, ṭawngkam a thlah dah thin zia te, mipat hmeichhiatnaa a fihlim loh zia te chen in ka hriatpui vek ṭhin a, ngaihzawng a tan ka duh ngai lo..mahse, tunah tak hian khang ka iai ṭhin na zawng zawngte ai chuan amah ka ngaih zia leh a bula awm ka châk na chu a nasa tawh zawk. Mahse..ka duhna leh châk na vang ringawt in Ahriati nena an in kara tlak zeh ka duh ngai lo. Pawh ṭhen phei chu ka duh lo leh zual a, chutiang ti duh mi pawh ka ni bik hek lo.



.


Final Semester kan exam zawh chuan ka haw a. Ka rilru ka siam fel bawk. Ka chhungte bula ka tih Chak zawng ka sawi chuan ka u ten min lo phur pui viau mahse, ka nu chuan a remti vak lo a. Mahse, na tak chuan min hnial bik lo.




Ka tum dan chu kan in hnuai ber dawttu ah hian Movie theatre siam a ni. Aizawla Theatre awm ve te ang lo deuhin Blockbuster movie chauh chhuah lo in, Website vela awm mai mai tawh lo, Classic movies te, a bik takin War movies te chhuah ṭhin a, hawh theih bawka siam chu ka chak a ni.




Ticket tlawm takin kan zuar ṭhin anga..Weekend ah mi duh dan a zirin film request theih in kan siam mai bakah Theatre tawp chu hawh theih in kan siam bawk anga..Movie te chu Tunlaiah mi ten an awm hmunah vek en an duh alawm ti ve bawk mah se, kei leh Joe ang tho a Cinema movies dik tak ngaina tam tak hi an awm ve tih ka hria a ni. A tirah hlawk duai duai lo mah se..chawlh san mai lo a, ka tih ve ṭang tang chuan ka hlawhtlin ve ngei pawh ka beisei hle a, keimah ngei pawh hi ka duhzawng tak ka ti nih chuan ka hlim ngei pawh ka ring.




Final result a chhuah hma chuan han tih vut vut pawh ka la ngam bik Chuang lo a. Kan in hnuai luah tu te..in dang an zawn chhung nghah ve te a ngai dawn bawk nen.




Zankhat chu U Sarah-i’n hian min lo be hlawl a. Ka rin loh deuh in, “Tluang..Pu Bernard-a nen khan in la in be ngai em”? tiin min rawn zawt teh hlawl a.




“Be ngai tawh nang tinge ?” tia ka lo zawh let chuan, “awii…en teh..i la hria em? Hmana NEIGHRIMS -a kan kal tum a, damlo kan kan lai kha” a rawn ti leh a. Kei chuan ka lo la hriat thu ka lo hrilh let vat a.




“Khata ka ṭhiannu Remremi kha maw..MIS ah in Ziak tling a..ka rawn sawi chhan zawk tak chu..a tlin lawmnaah kan va kal ve a..Pu Bernarda kha alo kal ve nih chu..tah chuan Remremi nen inneih an tum thu ka hre thawi a..mak ka tih zia chu” a rawn tih chuan min deng na ve angreng hle. A chhan chu U Zorema chuan a hmangaih hmeichhia theihnghilh a, chuti maia nupui nei tura rilru a siam fel chu ka lo ring pha lo.






Theodore-a hnenah, “I cousin Bernard-a’n nupui a nei dawn mi?” tiin ka va zawt thawr a. Ani chuan a nih thu min lo hrilh. An save the date an la tih chhuah chiah loh hi min lo thawn a. Chutah chuan hawrawp nalh tak hian ‘Bernard Weds Brenda’ tih hi a Chuang a. Ka lo hrethiam chiah lo. U Sarah-I khan Remremi kha a ti sia. An Thlalak an dah tel bawk si lo. Ka han zawh chian chuan Remremi hming pum chu Brenda Lalremtluangi alo nia.. ṭhenkhat in Remremi tiin an lo ko ṭhin zawk a ni.



Theodore lah chuan, “kan monu tur chu Officer ve tho ni dawn mah se…nangang chuan thingpui hang a lum thiam ve chiah lo maithei ni..ka ui ngawt mai che..” tiin min rawn fiam zui lehnghal a. Nuih pawh a za vak lo.




Chumi hnu lawk karkhat velah hian ka U leh kan chhungkaw hmingin an in neih sawmna lehkhamawi kan dawng a. U Hruaia’n, “ka rawn haw hman dawn si lo a, inneih na chuan tu emaw ber kha lo va kal hram ru aw..” rawn la ti zui a. Ka nu lah chuan, keimah ber chu, “ni e..Pu Bernarda chuan a lo buaipui nasat em che kha..i hman hram chuan I kal ve dâwn nia..” min la ti deuh deuh. Engmah kan chungchang kha an hre ve der si lo a, chutia an in neih a, kal ve tura min tih chu ka nuih a za zawk.





Remfela a lo haw tawh a, Joe pawh a rawn haw tawh tih ka hria. Hmuh erawh kan la in hmu eih lo thung. Theatre siam na tur chuan U Lawma’n loan min laksak a. Lawm tak ka ni. Kan in hnuai luah tu te chhuah hnuah chuan mi thiam zawk te kan khawih tir a. Nitin in ka enpui hlawm a. Ka buai ve thei hle.




Inrinni zinga ka tho chu ka nu zing ṭawngtai rawn haw hian, “I ṭhiannu Ahriati’n nizanah palai a lo hmu nih awm kha..” a rawn tih chuan ka thingpui in lai ka hak lo chauh.




“A ni maw..avan lawmawm ve..” ka ti chuai raih a. Ka thin chu engtin emaw ni hian a phu dup dup a. Tu emaw ka tana mi hlu tak, keipawh in a ka ngaihhlut theih em em chu ka chàn ta tak tak dawn hian ka hria.





“Ahriati chu a fel bawk a.. pasal pawh a nei ṭha dawn khawp mai” a rawn ti leh a. Chhan pawh ka chhang tawh lo. Ka tha a zawi a, khawvel chu a ruak ta vek mai hian ka hria.



Ka nu bawkin, “Furpuia nen khan an in ngaizawng ve emaw ka lo tia..” a tih chiah chuan ka ngaihtuah na aṭangin ka harh Chhuak zawk.


“Ngaizawng e..tinge a pasal tur chu a ni lo mi?” ka lo ti vat a.


“Ni nang aw..i Nu Marami sawi dan chuan pastor fapa a tia..a hming kha kan theihnghilh chu Shillong a mi a ni âwm e..”


“Andrew ni em?” ka lo ti vat a. Ka nu chhân na nghak chuan ka lo thaw dep dep tawh.



“Aw..a ni tak..Andrew a ti tak e..” a rawn ti chiah chuan hnâra hlit phawi ang mai ka ni. Ka thaw hawk thei.




Hna thawh naa ka chhuk te chu ni dang ang lo takin ka mood a fuh thar em em a, ka hmelah alo lang Chhuak a niang..hna thawk ho ṭhenkhat chuan, “vawiin chu hmuh ṭha I hmu ni maw?” tiin min lo fiam zuk zuk hlawm a. Ka lo nuihpui ve mai mai. Inkhawm zan a nih avangin tlai chu bang hma tur in ka ti hlawm a, daily a hnathawk an nih avang chuan an lawm ve hle in ka hria.




Zan inkhawm bâna Ahriati ka hmuh chuan, “Lalhriat..ngatinge I pasal neih tur pawh min hrilh ve miah lo a..?” ka han ti a. Ka rilru ti na tu ni mah se..ka ṭhiannu a la ni reng a, alakah hian eng rilru ṭha lo mah ka pu ngai lo..hman ata tun thlengin. Nuam tih hmêl vak loh hian min nuih a.



“Nia..vawikhat chauh an lo la kal a, tu bulah mah ka la sawi lo I nu’n a hrilh che mi?” a tih chuan, min hrilh thu chu ka hrilh let ve mai a.



“Mak I ti em?” a rawn ti leh chuan, “aw tlèm chuan” ka lo ti vat a.



“Tluang Joe khan a hmangaih che tih I hria em?” a rawn tih teh daih chuan sawi mai tur ka van hle mai. Joe chuan min hmangaih thu vawitam min hrilh ṭhin ngei alawm, mah se..fiamthu ang maiin.




Amah bawk chuan, “A hmangaih lutuk che tih ka hre reng chung khan..ka hai der luih sak ṭhin a, min hmangaih ve theih beisei vangin. Mahse, maw Tluang hei hi ka hrechhuak zawk a.. hmangaihna hi a hlawh a hlawh chhuah chi a lo ni lo, hmangaihna dik tawk lo chu a hlawh chhuah theih mai theih a, mahse..a dik tak zawk chu an mahni aṭanga Chhuak a lo nih a ngai tih hi” a rawn tih chuan sawi ve tur reng reng ka hre lo.

.


In ka thleng chu ka rin loh lutuk in kan ṭhutkhawmnaah Joe chu ka nu nen an lo ṭhu reng a nih chu! Ka hmu thut chu ka phu angreng. Ani chuan, “I va bang tlai ve..” tiin min lo nuih suk a. Ka ban tlai chhan Ahriati nen kan in biak vang a nih thu chu ka sawi teuh hle.


“Nia.. thusawi a rei deuh a..” ka ti ta ringawt a.


“In chungah chho ila..” ka tih chuan min hnial bik lo va. Ka Room-ah rawn lut lo in pawn Verandah chuan a awm a. Ka in thlak zawh chuan a bulah ka va thu Chhuak ve a.


“I thil tih tum kha I nu in min lo hrilh a..ka chhuang hle mai che..” min tih chuan a ti ve tak takin ka hria.




“Nia..mahse a risky ve lutuk a..” ka tih chuan, “I hlawhtling em em ang” min lo ti vat a. Tawi te in ka lo nuih a. Kan in kar awm dan chu ka sawi thiam lo. Enge maw boruak hahthlak lek lek si, nuam ru tho si hian min daidang ni mai hian ka hria.



Ngawi reng a kan awm hnu chuan, “Nang..Army a luh chu I la tum em?” tiin ka han zawt a.


“Ka hre lo le…ka luh tum loh chhan khan pasal a nei leh daih dawn bawk sia..” tiin za vak lo hian a nui a.


“I rilru na em?” ka tih chuan, “na hran lo e..” tih chauh chuan min chhang a. Sawi leh mai tur ka hre tawh lo.


Chutihlai chuan ka nu in min lo call teh thut a. “Bawihte…I pa Dinga te an lo leng.. thingpui sen hâng an in duh a…” a rawn tih chuan, “Aw…ka lo chhuk…” tiin phone chu ka dah a.



“Ko rawh…thingpui in ila..” din chhuah pah in ka ti a…tawng lo in a bu ringawt a. In hnuai lamah chuan kan in zui thla a. Chokaah chuan min zui ve zel a.



Thingpui ka chhuan chhung zawng chuan tu ve ve mah kan tawng lo, ani Dining chair ah a thu a, kei amah hnung chhawn zawngin gas bulah ka ding thung a. Kan in kar awm dan chu kan in hrethiam tawn ve ve a, sawi chhuak hmasa tu nih kan tum lo ve ve ni maiin ka hria.



A haw dawn chuan, “Coffee ka treat ang che.. min lo thlah la…” a tia..


“U Mahruaii a in hawng tawh lo ang..” ka lo ti vat a.



“A nih..Min lo thlah tho la..” a rawn tih chuan ka lo hnial bik lo.



Ngawirengin kan in zui thla a, ka jacket hak ipte ah ka kut ka zen lut ve ve a. Kan in kawt, kawng sira A bike dahna bul kan thlen chuan….a tawi hrat hrat a, a bike a lâwn pawh a tum Chuang lo.



Chutia minute khat vel kan din hnu chuan, “Muttui aw…” ka han ti ringawt a.


“umm..nangpawh…” a rawn ti a, a tu ve ve mah kal tumin kan awm chuang lo.



“Kal hmasa rawh…” ka han ti ringawt a.



“Ka lo thlir zawk ang che..va lut hmasa zawk rawh” a tih chuan hnial duh lo in, “a nih leh le..” ka ti a..in her mai ka tum chu..


“Furi..?” tiin min rawn ko leh a. Ka hawi let chiah chu engtik laiin nge mi rawn hnaih thut ka hre lo, Ka biang tawn tawn ah a rawn dawm a, ka mitah Chiang takin min rawn en a, min rawn fâwp ringawt a nih chu!! Ka meng bial kawk in ka ring. A in lak hran leh nghal avangin lo sawi tur emaw lo awm vak dan tur pawh ka hre lo.




Engmah sawi lo in a bike ah chuan a lawn a, a in khalh chhuak nghal a. A tlán liam thleng chu ka thlir a. Ka hmui chu ka han khawih a, ka pet zeuh a. Engvangin nge khatia a tih thut le??




Khuma ka ṭawngtai zo ka mut fel chiah chuan, “Ka thleng chiah…” tih hi message in a rawn thawn a.



“Umm..” tih chiah in ka va reply a. Ani chu a reh leh deuh vang vang a.



Ka in sum thei thlawt lo. “Ngatinge min rawn fawh ringawt a..?” ka va ti hmiah a.


“A chhan chu ka châk a..” a rawn tih chuan ka ner nang a.


“Hmm..” tih chiah in ka va reply a.


“Ka rawn call dawn che..” tih hi a rawn thawn a, ka reply na pawh nghak lo in a rawn call nghal zat.



“aw..” ka tih rual rual chuan, “Tun aṭanga chuan thian kan ni thei lo ang..” a rawn ti nghal tawng a.

Maw? Engvang?”



“A chhan chu Thian in kârah chuan in fawh te chu thil sual tak ania lawm…”



“A hma pawn kan in fawh tho kha…”



“Chuvang chuan a dik lo rêng alawm..”



“Anih chuan enge kan nih ang?”



“Thian ni si lo, nupa nisi lo chu enge an nih ang a?”


“Hmelhriat satliah nimai lâwm..” ka tih chuan a ngawi vung vung a.

“Chu chu I duh dan maw?” a rawn ti zawi sup a.


“aih.” Ka lo ti vat.


“anih chuan enge I duh?”


“Ka hrelo..” ka lo ti leh tawp.



“Min duh em?”


“Min duh mi?” ka lo ti let vat a.



“Duh lutuk e..” a rawn tih chuan, “engmaw I duh chu?” ka lo ti lui hram a. A rawn thaw hak a.




“Nangmah MALSAWMTLUANGI kha” fiah fak a, a rawn tih chuan ka ngawi Chiang hle a. Ka lungphu erawh a rang nasa hle.




“Chuan min duh ve em?” rawn tih leh chuan, “Umm..” tih chiah in ka lo chhâng a.


“Tikhan kan in ngáizawng”


“Phone mai mai aṭanga in ngaihzawn ka duh lo” ka lo ti ve tlat a.


“Nih ka rawn kal dawn..”



“Enga..tunah maw?”



Min chhâng tawh lo! Ka call zui nghal a.



A lak rual chuan, “A tlai tawh em hi..” ka han ti a.



“Ka nghak thei tawh lo..min lo hmuak rawh!”


“Amak hey..Jonathan!!” line chu a tawp zui nghal.



Ka mut kawr chungah Kawrlum ka hak thuah sawt sawt a, thawn dim thei ang berin in-a tang chuan ka chhuak zal zal a.



Bike rawn tlan tawh phawt chu amah aniang tih in ring rengin ka awm a. Minute 15 dawn ka nghak a, a rawn thleng lawk thei lo. A rei tawh lutuk chu ka ngaih ati tha lo. Ka call a, a ring char char a..a la thei lo! Hepa hian min tih der mai mai aniang a..mah se a awm dan ah khan ti der a ang bawk si lo.





A vawi sarih nana ka call leh chiah chuan a rawn pick ve hram. Mahse, ama aw a ni lo. Min rawn chhang tu chuan, thaw hlawp hlawp chung hian, “accident a thleng a, kan buai nuai nuai a, phone hi tu ber in nge thlauh ka va hre thei mai lo ve..” a rawn ti nih chu! Aw Lalpa…Ka hmangaih chu ka hmangaih a ni tih ka hrilh ve hma hauh in ka chán ta niin ka hria.




U Lawma chu tap chungin ka va kaitho a, kan pahnih chuan accident an sawi na hmun ah chuan kan va kal a. A hmun kan thlen chuan Police leh midang an lo awm nual a. Bike pakhat chhe sawp vek ka hmuh chu Jonathana ta a ni lo!! U Lawma’n Chanchin a zawh kual lai chuan, Amah zawngin ka hawi kual ruai a. Hmuh tur a awm lo.





A nunber ah khan call leh ka han tum a, a tlang thei tawh lo reng reng. Ka rilru chu hrehawm tak a ni . U Lawma chuan accident te chu documents hmuh tur engmah an neih loh avangin Police ten tu te nge an nih chiah an la hre thei lo a, Civil Hospital ah kal mai tura an lo tih thu min hrilh chuan rilru chu a hah zual sauh a.



Ka tap deuh pur tawh mai ni. Civil Hospital lamah chuan kan in Khalh phei a. Gate bulah chuan kan chhuk a, ke in Emergency building lam chu kan pan chho ve ringawt a. Ka u chuan Chanchin ngaihven hmasak tumin min chhoh san dawr dawr a. Kei chuan tha ka neih loh em vangin muangchangin leh rilru khingbai tak chuan ka chho a.






Emergency Building kan thlen dawn tep chuan, thlang lama MULCO an zawrhna bul mai aṭanga, “Furi?” tia mi rawn koh chuan ka hawi phei dawr nghal. Ani chuan min lo pan vat a, a hmèl ka hmuh chiah chuan ka tap chhuak hawk a. Chu lai bul vela awm te chu an lo hawi thup a. Joe chuan, “Ngatinge?” a rawn ti ringawt bawk.





“I thi dawn emaw ka tia..i va han mawl ve..” tih pah chuan kut thlak mai chu ka tum a. A ni chuan min lo pawt vat in, mi awm tam loh na lai deuh ah chuan min phei pui a. Ani accident tawk te kha alo hmu a, a lo buaipui na lamah a phone kha alo thlauh a ni âwm e. Ka rilru hah zia ka ngaihtuah let chuan ka haw let ling zawk.




Ka thinrim em vanga kut thlak tur ang dawn dawn a, ka awm chu, “i bialpa te I duat ṭhin em kha..min duat ve tawh rawh” nui suk pah chuan a rawn ti a.




“Ka hmangaih che..” ka han ti ringawt a. Tuna ka sawi loh chuan Pathian in hun min pek tawh loh palh mai te ka hlau.



“Kei pawn ka hmangaih em em che lawm.. tah belh nu” tia nui pah chuan min kuah bet a.



.

Ahriati te inneih ni chuan ka inchei uluk ve hle a. Joe’n rei min ti tawh lutuk chu min lo call chhen tawh. Ka zuk chhuk chuan, car horn alo ti ri vak vak a.



“Ti khan horn rawn pe tuar tuar mah ta che..” tiin ka lo vin hlar a.


“Rawn hmanhmawh mai rawh..” a rawn ti nghut a.



“Min ti hmanhmawh lutuk a, makeup pawh ka in hnawih hman lo hrim hrim..”



“Nih chuan..I mit hnawih kha tattoo ni tih na mi?” a rawn tih chuan ka lo meng kual nasa.



“Rawn lut vat rawh..kan tlai dâwn..”



“Kawngka min rawn Hawn sak rawh!”



“Eng a.. movie kan siam emaw I ti em ni a rawn lut vat mai teh..”



“Aw nih ka let leh zawk mai ang..bye..”



“Va han ninawm e aw…Malsawmtluang” tih nung nung pah chuan a rawn hawng ve ta tho a. ka lo nuih vur vur a.



“Kan kal thei..” tih pah chuan kawngka chu ka khar a.



“Min rawn muah phawt rawh..” a rawn ti nia.



“Enga?”



“I thu angin ka ti zo chiah ni lawm ni? Ka thu I awih ve hun..min rawn muah rawh..”



“Va hahthlak thei..” tih pah chuan a biang tawn tawn ah ka va vuan a, a hmui ah chuan ka va fawp zeuh a. Alo khi vûr vur mai. Ka hlim a ni. A chhan chu ka ṭhian ṭha ber hi ka bialpa a ni tawh miau a, a lakah chuan engkimah in thup mawi vel ka ngai ve hek lo. Ka thla a muang a ni.



Nupa tuak thar te chu an in hmeh dun kher mai. Thla an lak dawn lai chuan thla la tur an la tam bawk nen ruai theh turin chhuk san kan tum a. Innei te chu an lawmpui awm ve bawk nen inneih chhim tu te chu kan ṭha hnem takzet.







Ruai theh na tur Hall kan pan thlak dawn lai chuan, kan kal na tur kawng bul lawkah mipa leh Hmeichhe Pakhat mipui awm na lam hnung chhawn zawnga lo in buaipui mek te ka hmuh chuan ka hriat hnu an ang ka ti riau a. Hmeichhia chuan a puan tlang chu a Pheikhawk buckle ah a lo ti tang a nih hmèl, mipa chuan chu chu alo siam sak a. An Pahnih chuan an nui dun hak hak a. In ngaizawng emaw nupa in ngaih tak an nih hmel.





Joe chuan a ngaihsak hran lo a, mahse, kan chhuk pah a, ka va melh leh thuak chuan ka hriat hnu an ang ka tih te chu tu dang ni lo in, U Zorema leh a nupui kha an ni. Remremi..ni lo..Brendai kha. An in neih ni khan ka kal ta lo a, ka u ai awh in present chu kan thawn ve tho a ni. An nupa chuan an rawn hawi chhuak a. Rang takin ka hawi sawn a. Ka hmangaih banah chuan ka vuan ta vat a.


.


“Dam lai lu I sun sia..rálna pek I duh em”? fiam thu ti taka ka tih chuan, “ka hnek ang che” a rawn ti hluk a. A nui ve tho.



“Tak takin an lawmawm pui awm tiraw?”




“Kan la ti ve vat dawn alawm..” a rawn tih chuan, “Mipa hi chu rin leh duap in kai…” ka han ti ngawt a.



“Eng maw I sawi a..?”



“A ni lawm..Engtin nge kum 5 kum 6 vel an hriat tawh hmeichhia aia kar hnih khat lek an ngaihzawn pawh hi in neih leh nghal mai theih ṭhin le?” ner nang pah chuan ka han ti a.



“Chutiang mipa chu ka ni ve miah lo ang..”



“A lawmawm viau ang..” ka lo ti nghat a.



“Min ring miah lo mi?”



“Ring lo che ila ka bialpa I ni dáwn mi?”





“Min ring ringawt mai rawh…ih maw Fûr-I, ka hrilh tawp mai ang che…kei hian Nupui ka lo nei ve dáwn anih chuan, nang bâk hi ka bula ding turin ka duh ngai lo ang, Midang bula ding tur lek phei chuan maw ka phal teuh lo che…”





“hmm..I sawi awmzia chu nupui ineih hunah I thian aṭang turin min duh tih na maw?” ka lo ti fiam a.





A thaw hawk a, “I hrethiam lo tak tak nge, I hrethiam lo der?” a rawn ti hul hak a.





“A pahnihin..ka hriatthiam tur in sawi ve mai la..” ka lo ti a. Thu tak fahran hian min rawn en a.





Chiang takin ka mitah min rawn en a, “Nih leh le…chiang deuh in ngaithla rawh..ih maw..kei hian nupui ka neih huna ka bula ding tura ka duhna chhan che chu…NUPUIA NEIH CHE KA DUH ka tih na nih chu thluak thawl nu…” a rawn ti nih chu! Ka lo nui chhuak hak…



“Thluak thawl deuh nupui atan I duh mi”?



“Aw nang I nih chhung chuan ka duh vek…chuan min nei duh ngem?”



“Zungbun tel lo in min propose vel tih na mi?” Ka han ti leh hrâm a. Min en vung vung a, chutah a tho chhuak thut a, “Khawnge I kal dawn..?” tih leh din chhuah ka rual ve nghal.





“Tah khan lo awm mai mai rawh…” a rawn tih chuan thu awih deuh chuan ka lo ding ve mai a, a che zia chu ka en zui reng tho.



Bawlhhlawh bawm a kan vawm luh hnu Mountain dew can bur ruak hi a kuta kengin ka lam pan in a rawn kal a….Ka hmaah a rawn thing thi ta mai…



“Hey..i ti tak tak dawn mi?” ka lo tih chuan, min chhang lo in a nui suk a.



“Tunah in nei nghâl ang ka ti lo, ka dinhmun ka sawh nghet anga, kan chhungte ve ve in min remti sak phawt pawh a ngai tih ka hria. Mahse, tunah chuan I chhân na ka ngaipawimawh hmasa ber…” a rawn tih lai chuan tawng pawh ka lo tawng lo.




A aw a han thian kharh a, “He khawvela ka thiantha ber bulah hian ka damchhung hun hman ka duh a, war movie sawi dun a…in hnial pui a, hlim taka siam a, ka hmangaih thu nitin a hrilh pawh ka duh…chu mi tur chuan I phalna kher kher hi lâk a ngai khanglang a… chuan…I phal mai em Fur-i”? a rawn tih chuan Ka tawng mai dawn a…ka tawng chhuak thei lo…ka hnuk a ulh…hetiang hi movies leh thawnthu ah chauh a thleng thin emaw ka tia..keima nun ngeiah a thleng a, ka tawng mêk chu ani sia..



“Mawh…?”




“Engtik lai atang khan nge tawngkam ilo thiam tak em em a?” ka ti chhuak thei hrám a.



“Ka hmangaih che tih ka hriat chhuah nî atang khan a nih ka ring…chu chu sawi a hun lo, ka khup ana tan ania…min phalsak dawn em?” hetiang hian Jonathana hi alo hmeltha tih ka lo hre ngai lo reng reng


“Umm…”



“Umm..chu enge?”



“Amak…aw aw…phalsak i ni e..” ka tih chuan hmeltha ka tih dan em em thin hian alo nui suk a…



“Ka lawm e…khawi I kut…” a rawn tih chuan ka kut chu ka lo phar chhuak vat a.



“I va han zei lo tak…vei lam rawn phar chhuak rawh…”



“Tihpalh…hahha…”



“Naahh…a romantic ve tawh teh reng nen..I ti bam vek…” ati nui nui a…ka lo nui hak a… Ka kut zung u-ah chuan mountain dew can hawnna chu a rawn nawr lut a….



Kan pahnih a thawnthu ah hi chuan ‘Romantic’ tih thu mal hi chu a awm lo ve thlawt alawm….mah se kei chuan heng a romantic loh na zawng zawng hi kan pahnih thawnthu a duh em em lai ber chu a ni, a chhan chu…fairy tale thawnthu ang maia a changtunu leh changtupa perfect em em te in hmangaih na thawn thu ang a ni ve lo a, thil tih that em em sawi tur leh nun chhuan tlâk sawi tur nei reng reng lo pahnih kan nih vang hian…kan thawnthu chu a tak bik!



“Hei chiah hi ka la pe thei bawk si che a, kan inneih zungbun in a thlâk hma chu phelh miah suh ang che…” nui chung chuan a rawn ti a


“Ka phelh phal teuh lo mai ..mahse…?”


“Mahse enge?”


“Sipai nupui nih ka duh bik lo a nia..”ka tih chuan A rawn nui chhuak huk a.


“Awle…kha chu I thu vek..” a rawn ti a.


“Mahse maw…fura.” Ka tih lai chuan a lo hawi vat a.


“I in chhir ang tih ka hlau”



“a engah chuan maw?” a rawn ti deuh hu a.



“I hriat kha..kei chu nupui tur atan chuan ka nun hi a..” ka tih lai mêkin… “Thu pakhat ka hrechhuak…” a rawn ti teh daih a.


“Eng thu maw?”



“You learn to love not by finding a perfect person, but by learning to see an IMPERFECT PERSON PERFECTLY…tiang hian mipakhat in a let a.. ‘Hmangaihna chu mi famkim táwnah a in nghat lo a, mi famkim lo HMUHFAMKIMNAAH a in nghat a ni tiin”





“I hria em Furi..i bulah chuan ka nih na ang angin ka lang chhuak ngam a, tu emaw in a thinlung duhthusam nih tir phet min tum ang kha I ni ve ngai lo. Nang chuan ka nih na ang angin min pawm a, ka pek theih phak bak a aia tam ka lakah I phut ve ngai hek lo. Ka nihna leh ka mize paw lawh lutuk te hi a paw lawh ang angin min pawm a, min tih danglam phet I tum ve ngai hek lo…”





“hey…min tih tah I tum mi mawla..” tiin lehlam ka hawi nghal a. Ka tah chu a chhuak ngawih ngawih mahse ka hlim lutuk avang ani zawk, hlim lutuk avanga tah chhuak an lo tih thin chu hei hi nih dawn hi.





Ka dârah chuan alam ka hawi theih nan min kuai her a, “ lo tap rih Suh..a pawimawh ber pawh ka la sawi lo” tiin a han nui suk a.



“aw nih sawi rawh..”



“A pawimawh berah chuan, Midang te ngaih chuan hmeichhe zahawm leh fel taka an ngaih I ni lo maithei, hna zahawm tak I thawk lo pawh a ni thei. Mahse, mahse maw Fûr-I, ka tan chuan hmeichhe zahawm ber I ni fo ang…ka chhuang ber zel bawk ang che. Chuvang chuan Midang ngaih dan leh sawi dan emaw I nun hluiah buai Suh..i nunhlui avanga buai ngai lo tur nunhlui chhuan tur nei ve lo ka nihhi…”



“Ka hmangaih che.. Fura” ka ti ta thlawt…


“Keipawn ka hmangaih che.. Furi” tiin a nui suk a.



Kan Verandah-ah ni tla tur chu thlir in..in si rial in kan thu a.


“Mawi keih keih hle mai..” a rawn tih chuan, “Ni tla tur nge mawi kei mah..” ka lo ti vat a.



“Engtin nge ni tla tur nen I in tehkhin theih zawk a.. ni tla tur fê…”


“Suala…misual nunrawng”



“Eih Hmeltha nunrawng”




A hmuia ka nghawng rawn bul thuak thuak pah hian, “Thla hnih chiah angai tawh..” a rawn ti zawi sup a.





“hmm..i in Ziak tling ngei dawn em tih pawh ala hriat loh chu…” ka lo ti vat a.



“Ka tling dawn…ka tling lo peih lo hrim hrim….mo kawr tur lo hual lawk la tha ang..” a rawn ti! Ka lo nui hak a…a kutin ka kawrtlang a rawn zen chho a… ka dul nem lai rawn chûl thuak thuak pah hian min rawn fâwp a uar tak leh dam tak si hian… ka hnute chu ka bra chhan ah rawn tham a, ka lo thaw deuh hak a. Mahse, chu baka thui kan kal lo. Kan thianghlim tawh lo ve ve a, mah se..kan pahnih in karah chuan thianghlim taka nun kan tum tawh a ni.





“Catholic ah chuan raipuar chung pawh Biakin hawng vek in an in nei thin sia, keini pahnih hi Biakin hawngin kan in nei ve ngam tak tak dawn mi..ka ngaihtuah zawng pawn ka khur thei mawle..”



“I bestfriend Lalhriatzuali te pawn an ngam chuan enge kan ngam loh bik ang…”




“Ka bestfriend ini nange?”



“Aih I pasal hual…”



Ka va melh chho vat a, min rawn en chhuk run hian alo nui suk a, ka lo nui hak a, chutah duhthawh zet hian min rawn fâwp zui lehnghal a.



“Elazovate Bel aw…” ka tih chuan a rawn nui chhuak hawk a…



“Nge a…?” ka lo ti vak!



“Engmah?”



“Enge I nuih si.. Ka hmangaih che tihna ni lo mi?” tia ka zawh chuan ka rin loh takin za tak hian a nui a.



“A awmzia min hrilh tak tak tawh rawh..”



“I hre duh tak tak maw?”



“Aw..vat vat..”





“Mmm..nih leh le..tiang hian a in tan a… Swedish novel ziak thin pakhat hian zan khat chu mumang mak deuh mai hi anei a. A mumangah chuan putar Pakhat in a Fanu tlángah láwn puiin thla (wing) tel lo a thlawh dan alo zirtir a, a hma pawh in a ziaktu chuan mumang mak danglam tak a nei fo na in, chumi a phuah dan chu ropui tak ani….”





Nghâkhlel deuhin ka lo ngaithla a.





“Putar fanu Fidelis-I chuan Lalfapa nun chhan na’n a nun a thap a, chutiang vel chuan thawnthu a phuah chhuak ta a…”





“Chu chu Elazovate Bel tih nen enge in kungkaihna a neih a?” ka lo ti ha a.





“Ka sawi dâwn alawm..chumi Bunga changtu ber leh engkim lo hmutu chu a ziak tu chu ani a, Fidelis-I te chu Red Indian an ni a, a ziaktu chuan chapter dangah chuan Sweden ramah hmarcha an chin ve ngai loh thu leh hmarcha an ei ve ngai lo tih thu Italian pa hnen atanga a hriat chuan mak a ti em em a, chu ai maha mak a tih zawk chu maw….”





“Aw”?



“Chu thu sawi tura a thinlung alo pe chu a ni, Elazovate Bel…Ka lung a ti leng ani..a ti e an tia..”



“Chuan?” ka lo ti vat a..



“Chuan..enge chu zawng chu…” mak tih hmel zawk zamah chuan min raen en a.



“Ka hmangaih che tih pakhat mah awm loh chu…” ka lo ti vak.



“Awm lo reng e…ka hmangaih che tih a awm tih ka sawi reng reng ami?” a rawn ti hu zawk zamah..Awi awi…thinrim tak ka ni..thinrim tak!!! Ka hmangaih che min lo ti ve char char thin in ka lo ngai…





“A nih chuan enge ka bulah I sawi ve ziah si..” ka lo ti bak hlar a..





“Ka hrelo..ka lung a ti leng a…” a ti nih chu!..a la nui suk zui…ka vaw pawp châk lutuk!!





“Chuti khawpa a awmzia I hriat duh chuan, kan inneih hnuah Sweden ah Honeymoon kan hmang anga, chuan kha author kha kan zawng chhuak anga, a awmzia chu kan la zawt chhuak dawn nia..” a rawn ti sup a…





“I duh leh nangmah in han kal vang vang la, han zawt rawh..” ka lo ti hmuk a..ka thinrim takzet…





“I thinrim hian I sexy ve thlâwt…ka fâwp chawrh chak ziah che..”





“HUNREMPUI!!”





“Ka hmingpum khan min ko ve ziah suh!!! Ka ti dawn che maw I ti tiraw…I duh duh in min ko thei ang Bawihte..Ka hmangaih che..”





Ka tihngaihna hre lo lutuk chu ka nui ve ta ringawt….


Káwla ni liam tur chu nghet taka in kuah chungin kan thlir a…Pathianin kan pahnih a pumkhat kan nih ve theih nana hun tha min pek ve ngei beiseiin, kan hmalam hun hlim awm tak chu beiseina tam tak nen kan hmuak dun mêk a…




A TAWP TA….
Show post links
Top