CHAPTER 14
“Kum engzât nge i nih ve a?” kan hnunga u Puia leh Dorothyi kal dûn titi chu ka ngaithla pah kara, an in be zeuh zeuh ti ila u Puian zawhna a zâwt char chara Dorothyin a rûl tâwkin a chhâng a ni ber mai.
“Kum 22” a lo ti leh tawpa, heti hi chuan in sawi kuak chu an la hlatin ka hria. An in biak dân chu naupang inbia an ang berin ka hria, “Eee ka rinaiin i upa” u Puia thusawi avâng chuan ka lo nui chhuak haka, u Remruata pawh a rawn hawi lêt nghal vut mai.
Nui pât pâtin kan hnunglama mite chu ka mitmei zauha, ka rinaiin i naupang an ti ve dâwn emaw ka tia. A upat thu a sawi hlauh chuan min ti nui lo theilo, u Remruata sawi ang tak takin hmeichhe chêng chu a hre lo ve khawp mai.
“Keichu kum 28 ka nia, Remruata ai hian kumkhat in ka nau tihna a nihchu, ka upa i ti em?” tihvel chu a zâwt leha. “Upat loh kha” pakhat chuan a lo ti ve mai bawka. Hetiang chuan hmasawn lam chu kan la hlat viau dâwnin ka hria, an awm rei hman dâwn siloa, an in bem tlu hman pawhin ka ringlo.
Zeilo ve ve ngaihzâwng la nei ngailo ve ve an ni bawk nên an tân hmakhua a la êng lo riau hian ka hre lehnghâl.
Lo kan thlenga, kan thlamah kan han innghat meuh chu kan khat der mai. Thlâm kan sa lian lêm loa, kan nupa riah lenna tur tâwkin kan ti kha a nia, thingpui chu lum nghalin kan titi ho nak naka, a châng leh kan nui leh vak vak ṭhin.
An ṭhian ho inkara awm chu rinai fiamthu an lo duha, ka ṭhiante pawhin nuam an ti tih ka hria. Dorothyi meuh pawh a nui nasa lutuk tlat, a chhûngte bula a awm kha chuan a rilru hah kha a nui tam ngailoa, tûna hetia engmah enghelh neiloa a han hlim hmuh chuan ka lo hlim ve em em ringawt.
“Naute hi han pai vat tum ula, innei awm chhun in ni a, neih vat vat tum teh u. Kan upa hlawm tawh si a, nupui neih lam lah kan la hlat hmêl hlawm si a, a nei teuh ber tur Puia lah hian hei bem pawh ala bem ngam lo ania. Dorothy-i pawhin lo hrethiam la, lo nihpui vat mai teh, hetiang chuan kan lêng rei dawn lutuk” u B-an a tihchuan Dorothyi pawh a laih hmel ngang mai.
Keipawh ka zak ve tho, nau neih lam kan sawi thlen tâkah chuan pai vat vat chu ka châk ve reng. Keini aia innei hnuhnung te pawhin an pai der tawh a nia, engtikah nge ka pai ve ang tih ka ngaihtuaha, ka fa hmêl tur ringawt chu ka ngaihtuah zuia, a hmelṭha dâwn hian ka hria.
U Remruata an chhûn a nihchuan a hmelṭha ngei ngei ang. Nui sakin ka ngaihtuahna avâng chuan ka dul la thêp zaih chu ka chûl a, u Remruata chuan a hrethiam nge a ṭhiante hmuh loh tur chuan ka kut chu rawn hûm hnanin “I ngaihtuahna ka hria ania, zânah kan siam dûn leh dâwn ania” a tihchuan ka zak lutuk chuan a dulah ka nghawka.
A chêt dân ṭhin ka ngaihtuaha, nupa nun kan hman apianga lungawi hmel taka min en ṭhin te. Duhthawh taka a chêt dân nên zawng zawng ka ngaihtuah lo theilo, ka zaka, chutih rualin ka hlim tho bawk si. Pasal nei hlim leh ang mai ka ni, a chhan pawh nupa anga kan khawsakna a la rei lo êm bawka.
“I ngaihtuahna khawlo zet kha tûnah chuan sawi tawh rih suh, kan ṭhiante an awm ve reng hi. Khatiang kha sawi tawh miah suh” ka ti chu a nui deuh haka, kan ṭhiante erawh u Puia leh Dorothyi chhaihin an bengchheng viau mai, u Remruata nêna kan inchhaihna vel pawh chu an hrelo tih a hriat.
“Ṭan ang u, kan tlai lutuk dâwn” tiin kan in zui chhuak diah diaha, kan mipa ho zâwk hi engkim zirtira hrilh ngai an la ni bawk nên kan hna ṭan reng reng te chu kan nui nasa in ka ṭhiante pathum chu mipa ho zeilo lutuk avâng chuan an nui vak vaka, kan bengchheng viau mai.
“Ti suh” Ruthi au zo chiah chu u Kima chuan dawnfawh zâm pakhat chu a chêk chhum hmawk mai. “I va han mâwl tak, dawnfawh a nih kha a par ṭan leh nghal fimkhur ta che u, hnim thlawh tur hnim. Khatianga kan chhan tur ber thlai in suat zêl chuan hlo thlawh man leh kan tuh hah man a awm nâng” Ruthi chuan a ti zui hlak hlaka, midang chu kan lo nui hak haka.
“Kan tuh tam a lawm, kan ngah ang. Kha chu pawi lo mai rawh se, mahsela fimkhur tawh ula, kha kha ania thingtlângpa leh khawpui pa kan in an lohna chu. Lehkha thiam ve ve ah pawh thiam ngah hi kan lo hlu a nih hi, lehkha thiam bawk. In lam chêt thiam bawk, ram lamah hnathawh thiam bawk si chu kan lo hlu deuh nge nge ania” ti a u Remruatan a ṭhiante a fiam chu an ni lah chuan an lo haw nasa mai.
An khawih rawn nghal awk awk mai, “Sawhthing kûng te kha in delh chhia ange, khatianga awm a hun lo tho vat rawh u” tiin an pali chuan ka va bêng tho zawt zawta. An la nui hawk hawk hlawm mai, ka ṭhiante pawh hian an ngaina tih ka hria.
“In pa hi a lawm, helamah a awm ve a keini ai tlêmin a zei deuh animaia. Thiam ber âwm ang zia zanga a ṭawng hi a ngeiawm ve bawk a ni, engmah a thiam bik âwm tak tak silo. I ṭhiante pawh hi a tluk nâng” tiin u Remruata chu an nek leh sawk sawk hlawma, an awmdân hi a châng chuan naupang chhia ang mai an ni ṭhin.
Chhûn chaw ei turin thlam lam kan pan chho diah diaha, kal pah chuan kan infiam hlawm zauh zauh bawka, hetianga hun kan hman lohna hi a rei tawh bawk nên kan in lâwm ho leh thei chu ka hlim lo theilo.
“Kha fimkhur rawh” Dorothyi chu lung rap pialin a eu deuh awrha, u Puia chuan rang zet hian a kawngah lo vuanin a lo pawm chata. Kan ṭhiante lah chuan kut lo bengin an lo nuih nghal dar dar mai, an ni pahnih lah an in en dûn reng ringawta.
“Va che Romeo leh Juliet deuh ve” u Kima chuan a lo ti dut a, Ruthi leh Ririi pawh an lo nui nasa mai. “In inhmeh vêl e, han inngaizawng ta ula in inhmeh âwm mange” an lo ti zuia, an ni pahnih erawh chu engmah an sawi hauh lo a; ngawi renga inthlahin an kal dûn leh nal nala, u Puia erawh chu a kal nui vur vur mai.
A nuam a ti viau ang chu, Dorothyi a duh thu sawi hmasa tu a ni miaua, u Remruata chuan min kaiin kan thlai rawn nalh chho mêk chu a thlir vang vanga. “Hetianga awm hi a nuam a nih hi, thingtlâng nun hi a lo nuama, a lo hahdamthlak a nih hi. Hnathawkin han chau viau bawk mah ila mahni thlai rawn ṭo a han ṭhang lian hmuh hian a nuam takzet” tiin a nui deuh var vara.
Vawiin chu rin loh deuhin khua a thianga, fur khawthiang tak hnuaia hetianga mahni thlai hring dap mai hmuh hi chu a nuam rêng a ni.
“Dam man kan nei a nih hi, Pathianin Eden huan aṭang khân thlan tla zawih zawih a thawka, mahni eitur thawk chhuak turin min ti a. Chuvang chuan kan thawh ṭauh ṭauh angai a nih hi” ka tihchuan a ni pawh a nui ve hawk hawk mai.
“Hmeichhia avâng alawm hah taka kan thawh a ngaih rêng ni. Hmeichhia hi chu buaina hi in ni ve a, hnamdang kawp in hmang si, ṭhenkhat lah in zawrh an hmang bawk si. In ṭawng thei bawk si, han vêl dâwn cheu ila dân hian a hum cheu tih hria hian mi hi in cho ar maia, ar sual huai ang mai hian in awm ang kera” a tihchuan ka ner nâng a.
“Tun angah te chuan mipa hi in ṭawng thei fe aw, mi chuan fb te hi ṭhian leh hmelhriat siam nân an hmanga. Mizo mipa ho chuan hmelma siam nân leh midang sawisêl nân chiah in hmanga, in ṭawng theih hlawm dân leh hnial in hrât dân te hi, pi leh pute kha rawn kîr leh sela Pasalṭha te ho khân thah châk deuh deuh an ngah viau ang che u. Hmanlai ang rengin a awm theih loh in tia, mahsela hmanlai nun zemawi kha kan chhawm nung tur zâwk a nih laiin ṭawng theih lamah hma in sâwn hlura, insawisel thei bik kan awm lo” ka ti chu min en mâwl tawp ringawt.
Mi chhân dân tur vak a hre tawh lo pawh aniang, a awmdân chu ka nuih haka “Min sawisêl tum rêng rêng suh. Ka sawi kha nangpawhin dik i ti” ka ti chu “I ṭawng thei” a rawn ti tâwi tûk mai.
A thusawi dân leh a awmdân nên zawng zawng chuan amaha ka la hmuh ngailoh thil a ni bawk nên ka nuih deuh hawk hawka. Ani pawh a nui veleh mai bawk, kan ṭhiante lah chuan kan nuih chhan hrelo in min rawn hau leh tawha, kan inchhai angah an ngai tih ka hria.
“Kal zung zung ang, thlam thleng vat ila hahchawl zung zung ang” ka tihchuan a ni pawh chu a kal ve leha, thlam kan lût a. Kan Fanghma no lawh ho chu velin kan ei mial miala, a va han tui tak, hetia ni sat lutuk laia fanghma rah han lawha han ei hian hah hi a dam sawng sawng zêl hian ka hria, a dai nuam bawk si.
“Tu thlawh thui thei thei” tiin Fanghma mawng lam chu an inthlawh siaka, u Remruata hun a rawn thleng ve chu ka en kara, a thiam pawh ka ringlo. Rin ang ngei ngeiin a ṭhiante zawng zawng in an thlawh lên delh delh laiin a ni erawh chu a ri vuta, kan thlang lawka buh kûng chu a che lawiha, a zo der mai.
A ṭhiante lah chuan an han nuih ve leh chhawnga, keipawh ka nui lo theilo. Engmah hi han thiam em em hi a neiloa, thiamloh em em pawh a nei chuang lo, engkim hi a taimakna avâng hian a thawk ve mai ṭhin zâwk a ni.
“Min nuih ve suh, i pasal ka nih hi. Min ṭan tlat tur i ni a sin” a ti chu ka bu nghata, “Ka ṭan tlat che alawm, thingpui in duh leh em?” ka ti chu an duh thu chuan min chhâng sap sapa, lo lama hnathawh hi chuan thingpui in tam hian zunin tur a vêng ve bawk nên keipawh hian ngaina lutuk lo mah ila ka feh hi chuan ka in ṭeuh zel.
Hmeichhe ho chuan thingpui chu sem zung zungin an bulah chuan kan ṭhu zuia, lo ṭhenkhat chu a neitute hming nên in hrilh ve kauh kauhin an chungchâng te chu kan sawia, an hriat pawh ka ring lêm chuang lo.
Mit chhingin lo mawng lam aṭanga thlifîm rawn thaw heuh heuh chu dawngin ka nui pah sâng bawk. Hetianga nun hahdam ka neih lohna rei tawh zia ka ngaihtuah phei hi chuan ka nunhlui kha ka ngai rum rum zel, ṭul thil avângin kan awmna hmun chu chhuahsanin tihian u Remruata nên kan in tawn phah chu a nia.
Engkim hi Pathian lo ruat a ni ngei ang, a ni ka tawn theih nân khatiang hrehawm zawng zawng kha ka tuar hmasa a, tûnah erawh khawvela hmeichhe hlim ber ka ni ka ti ngam sak. Ka hmalam hun tur chu hrelo mah ila tûn hunah erawh chuan midang reng reng hre chang lo lêkin ka hlim ani.
“Ka zawi dêr mai” ti a thlam chhuata u Remruata mu duai chu kan en nghal ṭhapa. A awmdân ngei nguai chu a ṭhiante runluih leh a tum nge mawni “I va che na âwm ve?” u Puian a tihchuan pakhata lah chu a nui suk suka.
“Nupui neih meuh chu nupuite lâwmna siam tumin zo artui hipin in tih chak ṭauh ṭauh angai a nih hi. Kan lakah an lungawi zawh loh chuan min uire san ang tih te hi a hlauhawm sia” a ti chu ka beng nghâl sawka.
“I ngaihtuahna kawi kha a nihchu, khatiang sawi tawh reng reng suh. Zahthlâk thei lutuk mai, i â deuh nge mawni? Thlamang laiah i piang nge hetiang em ema i mâwl ni” ka ti chu kan ṭhiante chu an lo nui dar dara. U Remruata erawh chuan ka thusawi chu a ngai pawimawh lêm lo nge zawi hmêl zet chuan a mu kual vela, a fiamthu thawh dân hi ka ngei chi tak.
Mipa ho fiamthu sân zia hre reng mah ila hetia ka hmuh kher khera a awm kual vêl hi ka zak ve tho bawk nên ka haw hlur mai “I che na âwm tak hle mai a, Nunu i duhkhawp chu a pe meuh che maw? A chhe zawr ve si a” an ti chu ngaihtuah mang hlei lo chuan “Pe pe pe, sawi tawh suh u. Remruatkim khatianga i awm leh chuan zaninah i nghei ang” ka ti chu an lo awi hluai hlawma.
“He mite nupa rapthlâkzia hi, sawi zah hi an nei lo rêng rêng. Ṭhiante bula in awm avângin nge in sawi phawng phawnga, tenawm dûn lutuk; innei tur dik tak in lo innei a nih hi” Ririi chuan a rawn ti a. Midang lah chuan an lo thlawp dial lehnghâl, keilah khatiang thu ka sawi kha ka in awihlo rum tum mai.
Ka ngaihtuah lêt leh phei hi chuan ka zak bawk si, ka nuih a za ve tho bawk si chu ka pasal chu ka ena “Nang mah vâng vek, ka neih a chin che hi zahmawh sawi te hi ka hmang zo“ ka ti chu “Nupa kan nia, a zahthlâk loh emai. An ni pawhin an nei vek alawm, titeh lo mu ve zâwk teh, neih tur pawh hmu zo lo ho thusawi mai mai avângin khatiangin in pa min ti reng reng suh” tiin a bulah chuan min kuai mu zuia.
Kan inneih hnu hian a mizia ka hmuh thar hi ka zo lo lek lek chu a ni.
Tlâiah chuan in zui haw diah diahin lo feh ve ho nên chuan kan in au haw pah paha, u Puia te ho pawhin nuam an ti viau in ka hria. An tân chuan thilthar vek ania, zirlaibuah bâk loh an zir ngai loh avângin hetianga a taka an han tawng ve hi anuam an ti tih a hriat lutuk tlat.
Midang min rawn au tute chu an mahni zâwk zâwk chuan phûr zet zet hian an lo chhânga. An nui pah sâng reng bawk “Hahthlak mahsela thingtlâng nun hi a taka han tem phei chuan alo nuam a nih hi, kan lo hmusit ṭhin a, mahsela an thawhrimna ang zât ve pawh hian khawpui mite hian hna kan thawk hauhlo, keini chuan daihlim hnuaiah kan thawka, a la hahdam zâwk zuia. Hlawh kan la nei ṭha zâwk zui nên thingtlâng mimawl ti a kan sawi kan sawi a kan nuihsawhte thawh ang hi thawk ve dâwn chiah ila kan tlin dâwn lo tih a chiang” tiin an titi zui nak naka.
An sawi dik ve tho mai, fb leh ig vela thingtlang ho neih phâk loh. Thingtlâng ho ei phâk loh, thingtlâng nula vun hâng ti te a post duh hi a hmei a pa hian an awm veleh ṭhin a. Hêng mite hi chu mi pângngai pha lo, in la changkâng satliah chhûngkaw châwm hlawm an ni duh phian hian ka ring.
Thingtlâng lo la hmusit ho hi chu mi inhnuai luah leh thil tlêm te hre ve, in la fing satliah an lo ni duh phian zel, kan thawh ang hi rawn thawk ve sela an hrethiam in an thawk reng peih hauhloa, tûnlai phei chu a hmei a pa hian in tih no kan inkawhhmuh bawk nên an pilh phung zel hian ka ring.
“Ehe! Khuai, zu an nei hrim hrim” tih leh u Kima chuan kan piah lawka khawifung bu chu a awmna zâr chawp chuan a va thliaka, a rawn tlân phei rual chuan khuai chuan an rawn um vut vut mai. Keini erawh kan lo tlânchhe vata, min rawn ûm phâk meuh chuan a thlan hluama, a kut vêl te chu an zukna ani ngei ang a sen pheuh pheuh mai.
“Awi! A zu a tam lutuk ei ang u“ ti a Ririin va pan mai a tum chu a chalah a lo nam dâk sak awrh mai. “Zak theilo reuh mange, min tlânsan veka. A nuam chinah ei i tum amaw? Zak rawh u, a na leh hrehawm zawng zawng min tawrh tir hnuah nangniin nuamsa taka ei in tum anga maw? Rawn kal miah suh u, keimahin ka ei vek dâwn” tiin a hnuai lam thlar chu a keih thla nghal hmawka, a zu chu a far nghal duah duah mai.
Zu an neih ṭhat lai tak a ni ngei ang, a thlâr zawng zawngah chuan a awm vek mai. In tih theih hmêl tak leh tui tih hmêl em em mai hian a ei vela, a ṭhiante chuan an tuar thei tawh lo nge a mah chu va man betin an lâk sak zuia, hmeichhe ho chu min pe ve in a la bâng zawng chu an ei sak ta veka.
U Kima chu a au tuar tuar mai, a hmai lah chu a rawn vûng ṭan bawk nên ka khawngaih deuh bawk si ka nuih a za bawk nên ka lo nui pah paha. “A lâk pawh in la ve peihloa, min zuk chungin ka la a min puih chu sawi loh min tlânsan vek a nih kha. In ei ve duhte chuan min pui ve ta che u“ tiin a vui nasa mai.
A vuina chu âwm ka tihpui ve tho, mahsela a ṭhiante lakah chuan a thinrim tak tak chuang lo tih ka hria. “Aw puih hman pawh i nih loh kha, i phe phei fua a nih kha. Thinrim lo la, ṭhiante tân chuan thih thleng pawhin kan tih ṭhin kha, i zârah i ṭhiante'n kan thil ei khât êm êm kan ei thei kha kan lawm a nia, ti rawh u haw vat ang u” u Remruata chuan dam dap hian a lo ti a.
U Kima pawh chu a inthlah dul ve ta bawk nên kan inzui leh thliah thliaha, rei pawh kan kal leh hma chuan u Puia chu rawn au tuarin Dorothyi taksa ah chuan a zuang kai nawlha. A hmeichhia zâwk chuan a kaihza ah dawmin a pawm kâng ani ber mai, enge ti a kan hnaih rual chuan hmalam chu a kâwk ringawta.
Kan han en ve chu engmah kan hmu hauh lo, “Enge a, khatianga i au vak?” ti a a ṭhiante'n an zawh chuan “Rul ṭial a rawn tleng puat alawm, rulngan a ni'ang” a tihchuan midang chuan kawngsir vêl chu an en ha ha a “Rul ngan chu a nilo, chawnglei a niin ka hria, kal vat ang u. An tur a hlauhawm ania” tiin Dorothyi chu rawn ṭawng chhuakin u Puia chu a nghat thla dawta.
A rit a ti ngang aniang, a ni rêng bawk ang chu. Mipa ngat phei chu an chêr viau emaw tih pawh hian an lo rit riau zel, kan in zui haw leh diah diaha. Thil dang chu kan tawng tawh lêm loa, khawchhung kan thlen chuan ka ṭhiante chu peng zui phak phakin kan in mangṭha hlawma.
Keini erawh kan in lam pan chuan inzuiin min lo hmu tu ho chuan min lo bia in u Puia te ho pawh an lo la hria tih hriat takin “In rawn zin elo?” tih vêl chuan an lo be deuh renga, an ni pawh chuan ning lo in an chhâng ve zel bawka.
Nula leh tleirawl ṭhenkhat lo hmu tute erawh chuan lai deuh deuh hian an lo ena, an be ngam meuhlo. In kan thlen rual chuan rawngbawl tumin ka buai nghal mawp mawpa, mipa ho erawh chu a ruala inbual an duh bawk nen bathroom ah an in zui lût diaka, an va bengchheng leh nuai nuai tawh mai.
An awm dân hi naupang chhia hi an la ang ṭhin, naupang ai pawha naupang lehchhawng. Huanah chuan chhukin khanghu rawn chawr no ho chu balin ka chho leh thuaia, an ni ho inbual pawh chu an lo chhuak tawha.
Khanghu chu buhchiar tumin ka sil nghal mawlh mawlha, an ni pawh an inthlâk zawh rual chuan min rawn puiin an infiam paha. Mipa ho hi chu an awm khâwm tawh chuan fiamthu zahmawh rawngkai sawilo hi chuan an awm thei meuh lo a nih hi, an hmeichhe duhzawngte, an star te hming te chu an sawi tak zuah zuaha.
An in dem bel zauh zauh bawk, ka pasal erawh ka awm ve avâng nge hmeichhe chungchâng chu a sawi meuhloa. A ṭhiante ngaihzâwng erawh a sawipui ve nasa mai, u Puia chu hma la vat vat tûr chuan an tur ve bawka. A ni lah chuan a zah thu sawiin a hnial ve zel bawka, an hahthlâk ṭhin ania.
Hetia an zia ka hriata, u Remruata nên kan inngeih tâk chinah hi chuan keipawhin ka nela, an ṭhianpa kawppui ka nihna angin ka lakah pawh an ṭha thar nilo in a hma ai an nelawm zual sauh bawk. An awmdân hian min tihlim ve em em ringawt bawk, han kawm thui tâkah chuan mipa mah nisela fiamthu duh tak leh ho ve thei tak an ni tihte pawh ka hre thara, hei vâng te pawh hian ka nêl zual.
Tûnlai mipa ṭhenkhat hmeichhia ai pawha ṭawng thei tawh zâwk ho nên chuan danglam tak an ni. U B-a chuan Vawk chaw pêk a chuh tlat avângin kan pêk tira, a rawn haw leh chu u Remruata ang chiah khân a rawn berh haw ngei mai.
Va insil leh in a va inthlâk leha, kan bula a rawn ṭhut rual chuan kan Vawk chu mâwl a tih thu mawlh a rawn sawi veleha. “Ran an nia, an fing thei lo alawm, u Remruata pawh hian a ti ve tho ania. Mahsela khu a thau nalh in ti ve lo em ni? Kan talh hunah in ei ve ang chu” ka tihchuan an phur ta phiana.
“Khulamah hna nghet kan nei bawk siloa, kan nu leh pa te bia ila helamah hian in awm chhûng chu awm ila a ṭha ang. Remruata a awm loh chuan Aizawl pawh khu a nuam chuanglo, hmeichhe ho lah hian min phone seka, a bialnu hlui pawh a thinrim viau kha” u Puian a tihchuan u Remruata chuan a mitmeng in a lo khap vata, ka hmu lo emaw a ti nge mawni.
“Chu a bialnu hlui chuan a lo la ngaihven viau animaw? Amah teh hian a lo be leh a nih vaih chuan” ka sawi zawh hma hma chuan “Ka be ngai lo, nangmah bâk loh ka nunah hmeichhia an awm tawh lo ka tihkha. I pasal hi min ring tawp rawh, ka rinawm ka tihkha” a lo ti zung zunga, a ṭhiante nuih lah chu a zar hmel em em mai lehnghâl.
Chaw eikhamah chuan games khêl ho in an bulah chuan reilote ka ṭhu ve a, ka chau deuh bawk nên rei pawh ṭhut pui peihlo in room lamah chuan ka luhsana.
Ka muhil dâwn tihah ka pasal rawn mu ve avâng chuan ka harh leha, ka kawr a rawn phelh leh avâng chuan a duhzâwng hria in alam hawi chuan ka inhera.
“In zo tawh em ni?” ka ti chu “Umm” rawn ti zawi sapin ka hmuiah chuan a rawn bawh thuah zuia, keipawh chuan ka lo chhâng lêt ve vat bawk.
Kan thawmhnaw chu in phelh sak tawnin kan in entawn rana, ka taksa chhûnga a rawn luh leh rual chuan nghet taka kuahin a nghâwngah chuan ka seh zauha. Ka thaw ham ham bawk, kan ṭhiante'n kan thâwm an hriat ka hlau bawk nên ka rum leh deuh hak ṭhin, a thlan tla hlap chunga min en reng tu chu en lêt ve karin ka hmui chu ka pet fan fana.
Ka bula a rawn mutthlak tap rual chuan alam hawiin ka inhera, a âwmah chuan beiin ka mit ka chhing zui nghal daih bawk.
“I chau em?” a rawn ti chu ka lu ka bu ringawta, nui nghawr datin “Muhil rawh le, zîngah i harh vâk mai ang, ka duat dâwn che ania” tiin ka chalah chuan a rawn fâwp zauha, keipawh ka chau tawngkhawng ta bawk nên rei pawh meng thei lo chuan ka muhil zui ta thuaia.