REMRUATKIMA CHAPTER 26 BY MAWITEI BAWITLUNG

[mawitei bawihtlung]

REMRUATKIMA



CHAPTER 21



“Ṭhiana vawiin chu” u Kiman a rawn ti dêk dêk chu “In lêng tawh dâwn lo, hetah inkâwm khâwm rawh u. Sual tih tur hi in zawng ang de de a, in ṭhianpa lah hi in bâwl mâwl leh zo dâwn ka ning tlat ania aw. Khawpui chu tih tur a tam si, hetiang chuan haw leh vat angai ang” ka ti deuh hlak hlaka.




Thinrima hau ka nilo tih an hriat avâng chuan an nui sung lehnghâl. Ka ti tak tak, khawpuiah hi chuan thingtlanga la thleng pha lo thil a tamin ruihhlo lah nise thingtlâng miin kan la hmuh ngailoh leh hriat loh thlengin a thleng vek tawha, mipa inkawm khâwm phei hi chu thil tih chhina in pun khâwm an hmang bawk nên ka vêng thâwng lo theilo.




Kan inneih hma a an zia zawng zawng ka hria a, khâng te kha tam takah chuan an la kalsan lo tih ka hre chiang êm a. Vak chhuak vak tawh lo sela ka duh, chubâkah tum loh deuh deuha thi an tam bawk si a, mihring chêng an tam ang bawkin tualthah pawisa lo an tam tawh bawk nên ka thu hriat duh loh ber te hi ka hria ang tih ka hlau ṭhin.




Hma hun hre miahlo in an vâk chhuaka, an rawn haw leh lam erawh a kham phei zawngin an rawn haw leh ṭhin si a, ka pasal hi ring tâwk viau mah ila vâk chhuak reng tur chuan ka phal chuang lo.


“Chutia nu berin a phalloh chuan kan awm dial dial anga a nimai a lawm, card kan khêl leh dâwn em ni? Hetianga awm reng chu a ninawm, keipawh haw zung zung chu ka duh, helam hi ka ning ta riau. A boruak te hi a lum bik” u Remruatan a tihchuan a ṭhiante chu an lo ner nasa mai.



“Chu i pian leh murna chu i sit ta em ni? Nang ngei hi a nih hi thaibawih an lo tihchu, nupui hlau lutuk” u Puia chuan a ti deuh hluk hluka “Nangpawh engnge i nih bik ni, helama i awm dân hi Dorothyi ka hrilh vaih chuan i rawn zin leh hunah chuan i Mark chu a chhe viau ang” ka ti chu a meng phâwk nasa mai.




Ka hmui chu rawn hupin “Nang nu hi engmah hrilh reng reng suh, hmeichhe dang ka tawk lo hrim hrim aw. I lo sawi vaih chuan ka in sawi kuak tawhna i tichhe vek a nimai, i sual leh lo. I ṭhiannu kha ka duh tak tak ania, khatiang khân lo sawi hauh suh” a ti ta zung zung chu midang nên chuan kan lo nui dar dara.




“A nihchuan in ṭhianpa hi lên sâwm tawh suh u, dâwt min hrilh avânga thil thleng kha in hria ang chu maw? Lên nasat lutuk chuan a lenga te nilo in in chhûngte kan buai ṭhin, kan ngaihtuah zia cheu hre lêk lo hian in lêng rei thei em em lehnghal” ka ti chu an in melh hrek hreka “A lenga te mah kan buai loh chuan enga tinge a lêng lo a te hi in lo buai ṭhin le, kan chetsual leh keimahni bawk kan chawh animaia, keimahni in a lawm na pawh tuar ni” u B-a chuan a rawn ti a.




Huiham! Mi hnial dân tur hre tâwk hian an zir sâng ve bawk si a, an hahthlâk chu a ni e. “Rilru na a, buaipui leh tu cheu kha in chhûngte bawk kan ni leh si a lawm, in nat pawhin in chhûngte enkawl tho tho in ngaia, lo thi palh ula in chhûngte rilru na tâwp khawkin insiam tih te hre ve ula, ṭawng thei viau zel suh u” tiin ka ei tur lays vêl ka lei sa chu ka ei hmarh hmarha, an ni pawhin min hnial tawh bik lo.




U Remruata chuan card va la in an in dâwl chuha, an au leh chel chûl mai. An thiamloh tehlul nên hian an la uar ve em em lehnghâl, tûnah pawh pawisa an inchawi leh tawh saw.


Sawisêl duh tawh lêm lo in an sirah chuan phone ka lo en mai maia, tûnlai chu AI hmanga an film siam hi ka en ṭhin a, a changtute hi an hmelṭha thei bawk nên siam chawp ni si hi ka vei deuh bur bawk nên ka pasal pawh hian min sawisêl phah ziah zel a, pawisa a ka lei hi a awm veleh zeuh zel bawk nên a phunna pawh hi a âwm ve tho mai.



Chutia an ṭhianho a an au chel chûl lai chuan pâwnlamah mi ṭawng nuaih nuaih ang ka hriat avâng chuan “Ngawi lawk teh u” ring deuh tak chuan ka ti a, an thâwm a bengchheng bawk nên pâwnlam thâwm ka hriat chian theihloh avânga au ring ka ni pakhat.




Ka au avâng chuan an ngawi ṭhapa, chutah mipui mangang au ri avâng chuan rang zet hian kan vaiao chuan kan tlân chhuaka, ka thil hmuh chuan min rap bawk nên ka ding khawng nghal awt mai.



Kan in piahah chuan accident lo awmin bike a chuang zâwk chu a lu pawh hmuh tlâk loh tih hriat lutuk hian a lo darh veka. Ka thi dang lo chauh a ni, u Remruata chuan min rawn pan vata, engmah pawh ka sawi theilo, thisen ka rap sa bawk nên chutiang thil ka hmu leh phei chuan mi thihna mah nise min ti thi dang lo chauh a ni.




“Inah phei phawt ang, Puia lo buaipui mai rawh u. Kan hnaih si a, mi hmuhah pawh a mawi lo ang, a khuhna tur puan angai a nih kha” tiin keichu min kalsawn pui thuaia, engmah ka la sawi theilo. Ka thil hmuh ringawt khân ka mitthla a la luaha, ka lu te hi a na ut ut a, ka luak a chhuak ut ut mai bawk.



“I ṭha em? Tinge ilo chhuah thawt thawt a aw, khatiang chu hmeichhe hmuh atân chuan a rapthlâk mah mah a nih kha. Inah hian lo awm tlat tawh rawh, midang kha va puih an ngai ang”tiin inchhungah chuan min luhpuiin u Remremi chu min buaipui tûrin a hrilh zuia, a nipawh chu ka bulah a rawn tlân nghal vat mai.



Tui min pêk rual chuan ka innghak khawlh khawlha, ka la pângngai thei der lo. Ka thil hmuh rapthlâk lutuk khân min ti danglam hneh lutuk tlat, “I ṭha em? I lo va chhuak duh alawm, hetiang hliam nasa lutuk hi chu mipa tân pawh a hlauhawm a sin, an vanduaina chu pawi tih loh lam nilo in hmeichhe hmuh atân phei chuan a ṭha vaklo, mitthla aṭang hian an bo hara, keipawhin ahma in ka lo tawng tawha, thlakhat chhûng teh meuh kha ka mitthla aṭangin a bo thei hleinem, khami hnu aṭang kha chuan a theih hrâm chuan mi accident ang te kha ka en duh ngai hleinem” a tihchuan ka bu nghata.




A sawi dik ka ring, khatiang thil kha ka vawikhat hmuhna a ni bawk nên hmeichhe tân mai pawh nilo mipa tân pawh en hrehawm a tling ngei ang. “Lir thei neih pawh hi a lehlamah chuan thihna a tam phah a nih hi, kan nitin eizawnna ber zîngah a tel tawh bawk si a, loh theihloha khalh chhuah angaia, mi tam tak thihna thlentu a ni ve leh bawk si a, hmanlai ang te khân lo la awm mai mai zâwk ila thihna te hi a tlêm deuh hian ka ring ani“ u Remremi bawk chuan a ti leha.




Kei erawh chuan engmah ka sawi tawh lêm lo, ka thil hmuh ringawt khân min la tibuai “Ka va mu phawt ange” tiin room lam ka pana, tûnah chuan thil dang ka rilru la pêng thei tih ka mamawh ber a ni. Chutilo chu ka awm anuam thei dêr lo.



Room-ah chuan lût in thawmhnaw vêl chu ṭul hleilo in ka thlep fel leh veka, thawnthu ka ngaithla pah bawka. Chutia thil dang ka tih tâkah chuan tlêm in ka pângngai ve leh deuha, kan room kawngkhâr rawn inhawnga ka pasal rawn lût chu lo pan vatin ka kuah ta vata.



“I zia tawh em? Tûnah chuan an la sawn tawh e, kawng kawi laiah khân mahni side lo ah an tlân a nih hmela, khavanga accident an nih kha. A pawi ṭhin a nih hi, lir theih neih hi chuan tlangvâl tân phei chuan lo in lâk hi a awla, in tihtheihna leh eng emaw riaua inhriatna an nei ṭhin nge ni dâwn ni. A khât tâwk hian an accident reng mai anih hi, i ṭha em?” a rawn tih leh tâkah chuan ka bu nghata.




“Ka ṭha tawh e, tunge a nih an hria em?” a tihchuan a lu a thing nar nara “Police ho khân an buaipui mai ang, ngaihtuah tawh suh. Khatiang ngaihtuah kha a ngai lo, tûnah chuan fa kan neih theih dân tur chauh ngaihtuah rawh, khatiang i ngaihtuah avânga i hmêl dâng vek te hi ka duhlo, hlim tak leh i hmai sen suah ang kha ka hmu reng duh zawk” a tihchuan ka nui ta haka.



“Hma hun hi kan hre lo a nih hi tiraw? Nitin hian kan pianga, nitin kan thi bawka. Lirthei avânga chetsualna te hi khawpuiah phei chuan a tam a nih hi, tlangvâl awm ṭha duhlo bike neih inchhuang em em ho in a mi an suthlum tam tawh dân te hi, a tuartu mi rethei an nihchuan ṭantu mumal pawh an neiloa, a pawikhawihtu hmêl lah an thupsaka, mi rethei fate chu nisela an pho lang leh ngei âwm tho si a, Mizoram pawh hi kan ringtu nih dân te hi a lem tawh a, a da tawh chu a nih hi, kohhran leh khawtlang engkimah hian sum ngah ngah rorelna hnuaiah kan kûn a, ram leh kohhran hmasawnna aiin mimal thil ti thei den ro an rêla, dikna meuh pawh a ding chang thei tawh lo chu a nih hi tiraw?” tiin ka phun sapa.




“Mi rethei fapa thil tisual chu thah hial leh tihmualpho a an awm laiin mi hausa fapa thil tisual chuan thlavang hauh tu leh ṭanpui tu an leh ngaha, sawi mawi sak phet kan tum leha. Hei vâng hi ania nangpawh ka ngaihtuah em em ṭhin che, tu emaw kut te hi ilo tuar anga, a nih loh pawhin i lo chesual palh ang tih hlau reng rengin ka awma, keichu helai hmun hi nuam ka tilo, haw zung zunga thingtlanga kan nun hahdam tak leh tumah inthlei bik awm lohna kha nuam ka ti ber, helaiah chuan rilru hahna tur hlir a ni ka hmuh ni” ka ti ta thlâwt a.




Nitin hian lirthei chesual, insuhlum chulai khawi emawah tualthihna a thleng tih hriatreng ngaite hi a tuar tu nilo mah ila ngaih a ṭha theilo. Kan chungah a thleng ve palh ang tih hlau reng renga awm reng hi hrehawm ka ti.


“Aw le kan haw vat dâwn ania, a ṭha em? Kan haw ṭep tawh ania” a tihchuan ka bu nghat nghata, helama awm reng chu nuam ti viau mah ila thil ṭha lo a tam si a, a hma inneih hma ang reng kha chuan a awm theih tawh loh. Ka pasal a ni tawha, a hma anga ngaihtuah lo a enliam tawp ang kha ka thei tawh lo, ka ngaihtuah tawh tlata.




“A hrehawm ka ti, hetiang nupui englai pawha khuahkhirh tum che i nei hi min hua em?” ka ti chu a rawn nui deuh haka, “Engtin nge ka huat phal ang che, min hmangaih leh min ngaihtuah avâng tih ka hria a, ka hua ang che maw? Ka nupui i nih hi, i pasal ka nihna angin i thusawi te pawh ka zâwm ve tur a lawm, ka rawng i bâwla. I pasal hi hmangaih takin hah sawi lohin min enkawla, nangmah avânga hetiang dinhmun thleng thei ka ni bawk. Engvangin nge ka huat ngawt ang che” a ti chu ka thaw huai mai.




“Ka lawm e” tiin ka kuah ta thana, ka pasal hi ka hmangaih a ni. Tûnah phei chuan a mizia duhawm ber ber ka hmu chho bawk nên hmangaih loh theihlohin a awm ka timai.




Tlai lamah chuan kan nu leh pa te pawh an rawn haw ve ta nge nge a, thil thleng chu an rawn hre ve nge ka pasal chu an zâwt nghal mawlh mawlha. A ni pawhin a mawi tâwk chuan a hrilh ve bawka, ka hmu ve tih an hriat chuan min rawn hnaih vata “Tenu ilo hmu ve amaw? I ṭha em? I hlau lo em ni? Hetiang hi rilru ah a châm rei duh lehnghâl, hmeichhia phei chu hetiang thil hi chu hmu lo mah ila a pawilo a nia” ka nu chuan a rawn ti nghal vara.




“Khatiang a ni dâwn tih ka hreloa, i sawi dik alawm. Mitthla aṭang hian a bo hleithei meuhlo” ka ti chu min kuah vang vanga “Tunlai chu thihna a thleng mawlh mawlh reng mai, fimkhur a ngai a nih hi. Keini pawh i pa nên hian kan fimkhur khawpa, khawpui chhûng phei chu lirthei a tam ang ai hian kawngpui a zîm leh si a, fimkhur hi angai teh mai ania” a ti chu ka pawmpui thlap.



“Naktuk hi kan la châm anga, a tuk leh lam chu kan haw chho ang kan lo tia. Engnge in ngaihdan le? Nunui hian khilam a ngai tawh aniang a sawi reng mai, chubâkah hnim an ṭhang chak si a, kan thlai vêl te pawh an ngaihtuah awm. Sanghal leh Sakuh vêl an chhuak ṭhin si a, thlai an lo suasam a hlauhawm” ti a puitling taka a nu leh pa a dil tâkah chuan an ni pawhin an lo hnial lo hlauha, ka lo thaw huai thung.




Helai chu ka sawi ang tak takin nuam ti ve bawk mah ila thingtlanga kan nun mâwlmang tê kha ka thlahlel zawk, nakinah helaiah chuan awm hun kan la nei ngei dawn a. Chumi hunah erawh chuan ka rilru siamfel dân tur ka thiam tawh ngei pawh ka ring.




Zânah chuan hma takah kan mu duna, ṭhenawm vêl erawh an la bengchheng viau mai. Birthday an lâwm nge mawni ṭhenawm hotel chu kan hnaih si a, an bengchheng bawk nên u Remruata pawh chuan a ning ngang aniang a phun deuh hluk hluka.



“Hetiang hian kan lo bengchheng ve ṭhin chu a ni awm sia, mi hian min lo ning viau dawn a nih hi. Mi tâna hnawksak nih loh hi mi pawi pawh kan lo sawi lo nge nge in ka hria, ka nupui hi ka lo tawng lo ang che tih ka hlau” tiin ka hmui vêlah chuan a chuk zauh zauha.



Ka nui deuh hak mai “Tikhan zân reiah woofer ring deuh deuha i ngaihthlâk ka nin tur zia i hrethiam em?” ka ti chu a nui pût pût mai.



“Theihai ka ei châk lutuk” ka ti leh thut chu min enin a ner nawng a, “A ti leh ta, nangmah te hi i thur vek tawh lo maw? I sa te hi a thûr fukin ania ka rin ni” a rawn ti a, a ṭawng thei lutuk hi chu kuk fawk ania ka châk ni.



“Nang pawh nghapih i heh em em a i uih huam ve tho ang chu, Nghapihruata ni tawh la a ṭha ang, Nghapih heh” ka ti chu a nui kur kur mai. A ni tak tak, helamah chuan saum tih vêl hi an ei nasa bera, Nghapih chu an ina ka awm chhûng khân kan ei ngai hauh lo.




Kan khuaah kan awma, hmarcha vêl nên ka kan pawlh a ei fuha, khata ṭang kha chuan nghapih hi a heh em em a. A duh bawk nên ka siam sak deuh ziah a tih theih ang, “Aw le a nih leisa kan nei siloa, kawm chhakte khian step bulah rah bâwr deuh an neih kha, kan rûk mai angai ang. An nu ber khi a uikawm lutuka dil chi pawh anilo” a ti chu ka nui deuh haka.



“Ruk chi a ni dâwn em ni? Min hmu palh ta sela a hlauhawm viau lo ang maw?” ka ti chu “Chi e, lei pawh dil la a phal chuang lo ang, kan rawlthar chhuah lai aṭang tawhin a zia ka hrechiang tawh alawm. A phal dâwn chuang lo, uikawm ah pawh uikawm ultra pro max ang kha” a ti leh duah chu ka nui lo theilo.



“Aa ti lo mai ang, chutia an phalloh viau chuan” ka ti chu tho chhuakin keichu min kai kal nghal dâwr dâwr a, a awmdân chuan min ti hlim letling.



“I ei châk êm kha, i thil ei châk neih ve chhunte pe theilo che a awm ka duh hleinem. Min lo nghal la, i ei khawp ang” tiin min chhuahpuia, zân a rei lam ve tawh bawk nên thâwm a reh ve deuh tawha. Chutihrual erawh chuan lirthei tlân erawh a awm reng thunga, chutiang chuan thla an timuang chiahlo, mahsela kan thil lawhna tur chu kawngpui aṭanga en a har deuh avâng erawh chuan ngaih a ṭha deuh.



Thawm nei lo chuan kan inzui chhoa, theihai bâwr zeta lo rah kur dup ka hmuh chuan ka chil a ti put chiang hle lehnghâl. Thawm neilo thei ang ber chuan kan hnaih hriau hriaua, lei aṭanga ban phâk ah tlêm a raha, chu chu ka pasal chuan a ban nghal zata.



Pal hungchhungah a awm bawk nên a buaithlâk lam mah chu a ni e. A lawh hmasak sak chu min rawn pe zela, chutah pumngana tur a lo leh dâwn chiah tihah chuan “Tute nge kan theihai ru a” ti a nutling rawl rawn chhuak avâng chuan rang zet hian tlân ka tuma, ka pasal pawh chu a rawn hmanhmawh bawk nên a kekawr chu palin a la awk zuia.




Min rawn hmuh hman a hlauhawm bawk nên ṭang lui deuh tuarin kawngpui lam pan chuan kan tlân thla a, nutling phun ri leh âng ri chu a hriatchian theih viau lehnghâl. Nui deuh hakin min hmuh hman hma chuan inchhungah kan lût hmana, kan luh fe hnu a a âng ri pawh ka hre chiang khawp mai.





A sawi ang tak takin a ân chu chhe tak a ni, “Tu fa zaktheilo phiangsen nge” tihvel te chu a ri nawk mai “Kha nangmah avângin ka kekawr kap te hi a ṭet in ka hria” a ti chu ka nui chhuak haka, inhera a kekawr min entir chu a mawng a lo ṭet tak taka, ka nuih a za zual sauh mai, thil rûk avânga kekawr ṭet kha a ṭha hrim hrim e.





Theihai chu la vatin pum hnih chu ka bâwl nghala, ka bulah ṭhu in ka che vêl chu min lo en char char thunga. “Ka nupui hmelṭha leh fel êm êm nu” a ti chu ka lai bawk nên ka lei ka chhuah vaka, a nui suk ri pawh ka hre reng.




Theihai chu sin te te a chanin chi uih vêl nên chuan ka bâwl kuala, hmarcha hmui dip chu ka telh belh bawk nên ka pasal chuan ner suk suk hian min en a, hmarcha ei nasa lo turin min hrilh fo a. Mahsela ka zâwm hleithei lo, hmarcha tello hi chuan ka eng ei mah hi a tui lo ni berin ka hria.




“I duh ve em?” ka ti chu a lu a thing nasa mai, theithur hi a ngaina lo a. Ṭhianhoa kan ei pawhin tlêm a ei ve hlek tih loh chu a ei nasa lo khawp mai, hmarcha erawh keimah ang chiahin a ngaina.



“A tui zia hi ka dam sawng sawngin ka hria” tiin mit chhing kual vêl hian ka theihai bâwl chu ka eia, “Over reuh lutuk, ei vat la ka lâwmman lâk a hun” a rawn ti chu “I hur” ka lo ti vak chu a rawn nui hawk hawka.


“Chuvang a lawm nupui ka neih, nupui ka neihte chuan hmeichhe dang beisei ngailo in ka nupui ah khân zawn mai tur a lawm. A dik i ti em? Ka nupui i ni tawha, insûm ka tum miahlo, bâkah helama kan chhuh hnu hian engmah ka la tilo” a ti deuh bui buia, mipa tak hi chu aw, insûm theihna hi chu an va han neilo ve tak.



Engmah sawi duh tawh lêm lo chuan ka thil ei chu duhtawkin ka kam ṭhuahin ka kut vêl chu ka sil zuia, u Remruata lah chuan hmanhmawh turin min lo tur ve sek bawka.



Ti em em a phi nasa zel mai, ka hman tih a hriat rual chuan min pawm kâng nawlhin room-ah chuan min luhpui zui nul nula. A hmêl êng sar ka hmuh chuan min ti hlim ve ringawt, khumah chuan min mutin a che zui nghal sut suta “Naute insiam ngei tawh turin kan che tak tak ange” a ti kher erawh nui hak hak hian a âwmah chuan ka ben sak zauha.




Hah hnâpa kan mut hle hle hnu chuan ka samah chulin ka chunga a lâwm zia chu a sawi leh mawlh mawlha.



“Nang ang hmeichhia hi ka la tawng ngailoa, ka hmeichhe lo kawp ṭhinte kha chuan ka tih ang ang kha sawisêl ngamlo in min en liam ṭhin a. Ka tân kha chuan khatiang an nih miau avâng khân nun siamṭhat kha a har a, mahsela i rawn langa. Ka thiltih ṭha lo te min khap ngama, ka tâna ṭha lo tur ah chuan thinrim hmêl min hmuh hreh loa, khatiang a nih avâng khân ka tân pawh tihluih kha a inthlahrunawm zâwk, nangmah avâng liau liauin ka nun ṭha lo tak ka thlah theia, ka chhûngte nên in rem takin kan awm theih phah a nih hi, ka tawng che hi mipa vânnei tak ka ni” a ti chuan min ti lâwm veng veng.




Mi tam tak chuan pasalte khuahkhirh lutuk pawh min ti mai thei, mahsela kan pasal te an awm dân ang anga kan enliam hian kan beisei loh tawp a awm hun an lo nei leh ṭhin a. Chutih hunah chuan insiamṭhat ngaihna leh in remna tak tak a awm thei tawh ngailo, ka pasal pawh a zawng zawng chuan ka khuahkhirh hauh loa, a sawi ang tak tak hian kan nupa tâna ṭha lo tur erawh a tih ka phallo bur thung.




Mipa phei chu hmeichhia in an zar an zar chinah chuan insumtheihna an nei tlêm a, an duh miahloa chetsual hun an nei leh ṭhin a. Chutiang tawng tur chuan ka in dah chhin ngam loa, ka pasal lung ka tih awi hi ka tâna ṭha tur ani tih pawh ka hria a, min mamawh hunah tlânsan ka tum ngailo.



“Keipawhin ka tawng cheu hi ka lâwm a sin, a hma chuan keimah hian ka rilru natna te, ka lungngaihna leh hlimna thlengin keimahin ka tuara, ka lâwm a. I rawn langa, hahdamna ka hmu a, nghen chhan tur ka neih ve phaha, keimaha engkim ngaihtuah ngai tawh loin nangmah ka rinchhan che a, in chhûngkua avâng liau liauin hetiang dinhmun hi kan thleng ania, ka tân chuan vantirhkoh in ni ringawt” ka ti ve sap sapa.



“In chhûngkua avâng chiaha ka nu leh pa pawh hahdam taka awm thei an nih hi ka theihnghilh ngai reng reng lo, ka tawng che hi nang ai mah chuan ka lâwm fe zâwk ang. A hma a i mizia aṭang kha chuan misual tak ni turin ka lo ngai ṭhin che pawh a niang, tûnah chuan ka neih zawng zawng chunga thuneitu i nih tawh hi” tiin ka kuah nghet sauh sauha, thuamhnaw hâk a la phallo bawk nên ka awm thiam chiah lo.




Ka ni deuh hu hian ka hria, a mah lah chu ka âwmah a kut a dah ang rûn lehnghâl. “Tihian kan pahnih tân kan ṭha ber ber tih kan inhre tawna, tumah mamawh lo ila a nimai. Nangmah chiah ka mamawh ang che hian keimah chiah min mamawh la, kan chhûngte ho chu sawi tello mai ang” fiamthu a a tihchuan kan nui dûn hak haka.