My Arrogant Husband BY Becca Lnz (Completed)

[Rebec Nunziri]

Chapter-2



Stacy Ramthansangi POV




Opi chu hmanhmawh zetin a rawn lut a, khum mawngah chuan ka la thu ngawi reng thung, "I biang hi a vung deuh a nihhi, vur ka va la anga, kan dep dawn nia" tiin a chhuak lehnghal vat a. Opi rawn luh leh hnu pawh chuan engmah ka la sawi ta chuanglo, ka biang ah chuan vur in a rawn dep a, ka hma lam chu en in ka ngawi vung vung a, tinge hetiang harsatna hi ka tawh bik reng le, hetianga nun hman ai chuan tinge ka lo pian loh law law zawk loh ni.




"Pu hnenah hian i damlo tih sawi mai la ka duh, hetiang reng chuan i chau chhe mai ang" a ti sep a, mawl hmel zetin ka nui hak a, "Sawi pawh ni ila a tan engmah ka nilo a, min ngaihtuah na a nei dawn chuanglo, chuvang chuan sawi loh law law ka duh zawk, a hmaah tlawm tak anga lan ka duh lo" ka ti hmak a, Opi chu beidawn hmel zetin a thaw chhuak hap a, engmah a sawi tawh bik chuanglo.




Ka pindan atang chuan ka chhuak leh tawh lo, pawn lamah chuan thawm a awm deuh a, mahse ngaihsak tum na ka nei lo, ka mut ngai chuan ka mu reng tawp, ka khua a sik deuh ser ser bawk nen ka awm chu a nuam lo takzet bawk, chumai nilo in ka tha te hi a khur dar dar a, Opi bulah pawh engmah ka sawi duh lo, a chhan pawh min ngaihtuah dawn lutuk tih ka hriat vang a ni, tunlai tak chu ka taksa chak lo lai a ni bawk nen hetianga awm hi ka hrat hrim hrim.




Ngawi renga khuma ka mut lai chuan ka room kawngka chu a in hawng tih ka hre thei, Opi a nih ka rin vangin en pawh en lem hlei lovin "Op, ka ril a tam lo, ka mu hahdam duh" ka ti sep a, chutah pen thawm chu a rawn hnai zel a, Opi a nilo tlat a hriatna ka neih vang chuan muangchangin ka tho chhuak a, Opi emaw ka room ah rawn lut ka tih laiin Mary zawk a lo ni, pheikhawk sang tak a bun a, a kawr hak pawh a tawng chham takzet bawk.




"I nuamlo tih awmpui nu khan a sawi a" a ti sep a, a mitmeng lian kal chuan min en ran bawk, "Nia, ka chau deuh mai mai mawle" ka ti tha ve mai, tun hi pangai taka min biak na hmasa ber a ni hial ang, "Ka hrethiam lutuk che alawm, ka tan thisen pek reng I ngai bawk nen I chau viau ang, Mza bulah pawh enkawl tha deuh tur che in ka chah kha" a ti leh a, za lo zetin ka nui ringawt, "I lak ah pawh hian a inthlahrun awm khawp mai, keimah vangin Mza nen in in neih a ngaih phah bawk si a, mahse i tan hlawk na a ni tho bawk a" tiin a nui a.




"Min lo hrethiam lawk, i sawi awmzia kha ka man lo" ka ti hap a, "Oh.. Mza hi neilo nila chuan in ba leh i pa enkawl na tur pawisa pawh I nei dawn lo tihna a nia, i tan chuan hlawk na a tih loh chi hleinem, nilawm ni?" a tawngkam hman duh dan chuan min khei zak mai, "Mza hi neilo pawh ni ila kan ba leh ka pa enkawl na tur chu keimah ngei hian ka thawk chhuak thei em em ang, nia.. i sawi pawh kha thudik a nihna lai a awm ve bawk a, mahse kei ai maha hlawk na chang tam zawk chu nangmah hi I ni lo maw?" ka ti leh ta nghat a.




"Eng hlawk na nge ka neih ve?" nichin a a nui hmel tawp hmak chung chuan a ti a, he hmeichhia hi ka mil lo, dawt a min puh avang ringawt pawh khan mawi hnai taka biak ka tum lem lo bawk, "Hlawk na I neih min zawt maw, um.. Keihi awm lo ni ila thisen I mamawh zat ang kha i hmuh I in ring em, ring lovang tiraw, bakah Mza pa hian nanghi a mo atan a duh lo bawk che a, tuna Mza nen in la in zui theih chhan pawh hi keimah ka ni tih i hriat ve ngei ka beisei" ka tih takah chuan rum zetin min en a, kei ka lo nui sak thung.




"Ngawi hmak rawh, khatiang thu kha i ngam chuan i sawi leh dawn nia" ka dar ka kan ak a, ka hlau lo nasa, "I zawhna ka chhang mai chauh a nihkha, I thinrim na turin engmah sawi ka tum hran lo a nia" pawisawi loh hmel zet chuan ka ti leh a, engmah sawi tawh lovin a chhuak nghawng nghawng a, he hmeichhia hian eng natna chiah nge maw a neih le, ka hmuh apiang hi chuan a dam that hmel thei hle si a, mahse enge ka buai na tur awm, a natna hriat kher pawh ka mamawh hran lo bawk.




Zanlai a pelh tawh hnu ah chuan room a tangin ka chhuak a, ka ril chu a tam tawh takzet, eitur awm ang ang te chu dawhkan ah chhawp in ka ei nghal zung zung a, ka ei zawh hnuah plate bal te chu sil turin ka dah a, ka ei bang ho chu a awmna pangai a ka dah hnuah thleng ka sil leh a, choka atang chhuak in ka room lam ka pan lai chuan kawngka ah thawm a rawn awm a, light pakhat kan on avangin rawn lut mek te chu ka hrechiang hle, ner sawk chungin room ah chuan ka lut ta daih a.




Chhun a ni a, Opi nen in hnunglam huan ah chuan thlai eng eng emaw kan ching a, hetiang lam hi ka tuina lam tak a nih vang hian a khat tawkin huan ah hian tlai hrang hrang ka ching thin, a lei a tha bawk nen ka thlai chin te pawh an nung tha duh thin khawp mai, "Ka ril a tam tawh e, eitur kan siam dawn mi?" Opi'na tihchuan ka hnial lo khawp mai, keipawh ka ril chu tam tawh tak a ni, room ah lut in ka in tifai hmasa phawt a, Opi pawh common bathroom ah a in tifai ve bawk.


3 Months Later


Ka pa nen kan in biak zawh chuan ka thaw deuh huai mai, karhnih chhung ka hmu tawh lova, naktuk ah hian tlawh ka tum a ni, ka ngai tawh takzet, kan awmna a in hlat san bawk nen tlawh reng theih a ni thin silo, a taksa a chak tawh loh zia ka hrechiang bawk si, ngaihtuah a na duh thin khawp mai, a damdawi pawh a ei zo leh tep tawh anga, naktuk a ka kal dawn chuan lei sak lehnghal law law ila a remchang phian ang.




Tlai lamah chuan Mza leh Mary chu an rawn in zui haw leh tawh a, rawng pawh kan lo bawl peih leh diam tawh bawk, an rawn luh tirh atangin Mza room ah an in khung nghal chawt a, chaw ei a hun chuan an rawn in zui thla ve mai, be lovin dawhkan chu ka kil a, eitur awm chu ka ei mawlh mawlh bawk, "Heihi tu siam nge ni a?" tih pahin bawl chu Mary chuan a kawk va a, "Keima siam a nihkha" ka lo ti sep, "Kaikuang i telh a mi?" a tih leh chuan ka lo aw mai a.




"Ka ei hman lo hlauh chu a tih zia hle mai, kaikuang ka ei thei lova" a tih leh chuan ka chhang tawh lem lo, "Nidangah chuan kaikuang siam tawh suh ang che u" Mza chuan a ti hluk a, "Engvang ngawt chuan maw, kaikuang te chu ka chawhhmeh duh ber te zing a mi a nia, bakah Mary te chuan a ei lo thei reng tho alawm, mikhual a nia, a rawn ei reng dawn chuang lova" ka ti ve hmak a, "Siam tawh lo tura ka tih che chuan siam lo mai rawh" a ti leh hluk a, ka chhang zawm tawh lo.




Chaw pawh tam ei lovin ka tho chhuak ta daih a, ka kut te ka sil hnuah choka atanga chhuah ka tum chuan Mary rawn ding ve chiah chuan min rawn su a, amah zawk chu thutthlengah chuan a thu thla leh hnawk a, "Engthil nge I tih kha?" ti thawt in Mza chuan thinrim hmel lutuk in min rawn en a, "Engmah tih ka neilo, amah hian min rawn su a nihkha" ka ti a, "Ka thiam loh a nihkha Mz, Stacy chungah khan thinrim duh suh" pawi sawi loh hmel zet a Mary'n a tihchuan ka lo nui hak a.




"Ni e, a thiam loh a nihkha, min awm su lo nise khatiang thil kha a thleng hauh lovang" ka lo ti vat hmak a, kalsawn ka tum laia Mary thusawi avang chuan ka tawp leh chawt, "Engmaw tunah khan I sawi?" ka ti fak a, "Nang hian min lawm lem lo tih ka hria alawm, mahse i hriat kha Mza nen hian kan in hmangaih a, nang i rawn lan hma daih tawh atangin kan inkar ah hian hmangaih na a lo awm tawh, chuvang chuan Mza nen a kan inkar a inrawlh i tum hi bansan la ka duh a ni" a tih leh chuan ka thaw hak a.




"Engvangin nge Mza nen in inkar ah chuan in rawlh ka tum teh hrep ang ni, nangni pahnih inkar ah hian ka in rawlh peih reng reng lo, chu lovah ka tan engmah in ni hleinem, vawikhat te mah in inkar hi ka la ngaihven ngailo, chuvang chuan lo hlauthawng vak duh suh, engtik ah mah in inkar a thlak zeh hi ka tum ngai lovang" ka ti chang leh fak a, "A nihchuan engvangin nge Mza pa hnenah ka chungchang mawi lo tak tak in I lo sawi thin?" a ti leh ta that a.




"Oh.. i chungchang hi Mza pa mai nilo tu hnenah mah hian ka la sawi ngailo, i chungchang mai mai sawi tur hian ka chil per hi ka ui zawk tih i lo hre dawn nia, nanga chungchang lo thil dang tamtak buaipui tur ka nei ve tho, chuvang chuan Mza hnen a dawt a min puh i tum tlat na rilru zawk hi paih bo tum vat la, chuchu i tan a tha a nimai" ka ti hmak a, "Ngawi hmak rawh, khatiang khan Mary hi ṭawngkhum hlek suh" Mza rawn in rawlh veleh Mary chuan a mittui a ti tla nghal a, lem chang thiam lutuk.




"Mz, duhtawk rawh ka thiam loh a nihkha" A ti tiau a, ka va han ngei mai mai tak, "Dawt ka sawi em ni, engtinge Mary hian i pa hnenah a chanchin ka sawi thin anga a ngaih ka hre chak khawp a sin" ka ti ta hlak a, "I pa nen kan in hmuh apiangin keimah ni chiah in kan awm khat khawp, chulo rengah vawikhat pawh in chanchin hi ka la sawi ngailo, chuvang chuan dawt in min puh tawh suh se, a nihloh chuan maw i pa hnenah hian in awmdan zawng zawng hi loh theih lova ka sawi chhuah a la ngai zawk hial maithei" ka thle sawk a, ka nui lui sak bawk.





"Mz" Mary chuan a lo ti vat a, hlauhthawn hmel zeta a awm hma khan a nui ru lai kha ka hmu reng, ka biang a ben na chu a na in ka lu te chu a hai mum mum thei, mahse he mi tenawm pahnih te hmaah hian ka chak lohna hi ka hmuh tir dawn lo hrim hrim, "A tawk ta viau e, engmah ka sawi peih tawh lo, mahse ka sawi tawh kha, i pa hnenah engmah ka sawi ngailo tih hria la, vawikhat mah ka thil sawi ni lo pui ka sawi angah min puh tawh suh ang che u, chuti a nihloh chuan thudik hi ka sawi lovang tih ka sawi theilo ka tihkha" tiin ka kalsawn a.




Sitting room ka thleng phei chiah chu ka khuh nghal bawrh bawrh a, ka tha chu a hma ang bawkin a khur leh dar dar tawh bawk, ka khaw hmuh a phe a, ka lu chu a hai muai muai bawk nen thutthleng pawh thleng zo tawh lovin chhuat ah chuan a thu sawp hnawk a, ka ka atang chuan thisen a rawn chhuak tih ka hriat rual chuan ka kut in ka hmui ka hup vat a, ka khuh pawh chu a la reh hleithei lo, thutthleng banah chuan ka kut pakhat a vuan chungin thawh ka tum a, ka theilo.




"Enge thleng?" tih paha Mza a rawn kal pawh chuan ka la ding chhuak theilo, ka awmdan chu mak tih hmel zetin min en a, ka kut thisen kai a hmuh chuan a ngaih a that loh hmel hle, "Mz, min va thlah tawh la, a tlai tawh emai" choka atanga Mary a rawn chhuah chuan ka lo in siamtha vat a, "Thil diklo a awm em ni?" a rawn ti sep a, "Engmah a thleng lo, ti rawh ka va thlah ang che" Mza chuan a ti nghut a, ka mit chu ka chhing sawk, mahse enge ka beisei san vak a ni tan hi chuan hetianga ka awm lai hi engmah a ni hleinem.




An chhuah hnu chuan muangchangin ka tho chhuak a, room ah lut in damdawi ka ei hnuah ka mu nghal vat, kan chaw ei na pawh chu ka seng fel peih tawh meuh lo, Opi lah chaw kan ei hma khan haw turin ka ti tawh bawk si, a pawi lo, ka mu hahdam deuh anga ka zia deuh hunah ka seng fel mai ang, Mary khan pakhat mah a seng fel dawn lo tih lah ka chiang, mit ka chhing vang vang a, ka damdawi ei in min hneh deuh hnu chuan ka muhil ta daih a.




Ka harh hlawl a, chutah Mza chuan min lo en reng chu niin, khum atang chuan ka tho chhuak vat a, ka sam chu chul mam thuak thuak in khuma atang chuan ka chhuk nghal bawk, "Enge i an?" a ti sup a, amah pawh en lem lo chuan "Ka tha" ka ti tawi tak a, room atang ka chhuah chuan min rawn zui chhuak ve nghal, choka ah lut in thleng vel chu ka seng fel a, "Kha chu naktuk ah Opi in a ti mai ang, va mu hahdam leh rawh" a rawn tih leh pawh chuan chhang lovin ka thil tih lai chu ka tih zawm mawlh mawlh a.




Engmah sawi tawh lovin choka atang chuan a chhuak a, min ngaihtuah awm ang taka a awm lai vel hmuh kha ka peih lo, tunah leh lek phei chuan a hmel pawh hi ka hmu peih lo zawk, a bialnu vangin vawihnih ngawt kut min thlak tawh a, tun atang chuan ka ngawi mai mai tawh bik lovang, ka mize diktak ka hmuh a hun ve tawh a nihhi, a hma kha chuan ka pa a enkawl vangin a thu a kawi a ngil in ka zawm vek zel a, tunah chuan ka harh chhuak ve tawh.




Min pui tihchu ka pha lo, mahse a ni pawh hian min mamawh ve tho tih ka hria, kan in rul tawk chiah, chuvang chuan a thu hnuai a ka kun reng na chhan tur ka hre tawh biklo, thleng ka sil zawh hnu chuan room lamah ka lut leh a, ka lu hai te pawh a reh fel vek tawh bawk a, inbual turin bathroom ah ka lut a, ka chhuah leh hnuah ka pa nen kan in bia a, a aw chu a zuai ruih in ka hria. "Pa i damlo a mi?" ka ti sep a, chutah ka pa khuh bawrh bawrh ri chu ka hre zawm zat a.




"Pa i tha em?" hlauthawng zet chuan ka ti a, "Bawihte, ka tha, ka hrawk a za deuh mai mai a nihkha" a tih takah chuan ka thaw huai thei, "Pa naktuk ah ka lo kal ang aw, damdawi te ka rawn lei dawn nia, inhaler te kha I la nei em?" ka ti a, ka pa hi thaw hah nei a ni a, a lung lam a tha lo bawk nen ka ngaihtuah zual takzet a ni, "La nei e, rawn kal rawh, ka ngai tawh hle che a ni" a rawn ti thawp leh sut a, keipawh chuan ka ngaih thu ka lo sawi ve vat.




Ka pa in a kal tur chuan ka chhuak a, damdawi te ka lei hnuah ka kal tlang nghal, in chhungah ka lut a, ka pa chu ka hmu mai lo, thenawm ah a leng pawh a ni maithei, room ah ka lut a, ka pa chu khumah a lo mu bam a, "Pa" ka tih sep chuan a rawn meng chhuak riai riai a, "Pa I tha em?" tiin ka pan hnai vat a, "I rawn thleng tawh a nimaw, ka tha, ka mu hahdam mai mai a nihhi, min ngaihtuah lutuk duh suh" tiin muangchangin a rawn tho chhuak a, ka lo pui vat.




"Pa i dam loh hmel emai, in entir ang aw" ka ti nghal ruai a, "Bawihte, ka tha ka tihkha, min ngaihtuah suh" tiin a nui suk a, a hmel ah chuan a ṭhalo tih ka hrechiang hle thung, a cher kuam bawk nen ka ngaih chu a tha theilo, mahse ka pa hi pa luhlul ve tak a ni a, eng ang pawn in entir turin ti lui mahila a duh dawn chuang lo tih ka hriat chian em avangin ka ti lui duh ta biklo, khum ah chuan a thu mu a, a bulah chuan ka thu ve reng bawk.




"Zanin chu hetah ka riak ve dawn" ka tihchuan "Nilo e, pasal nei tawh i nihkha, i pasal in a phal lovang" a tihchuan ka ner nang a, a ni khan khawiah pawh awm ila engah mah a ngai dawn lo tih ka hrechiang emai, "Ka be mai ang, engmah a sawi buai lovang" ka pa bulah chuan ka ti a, min ngai ve tawh bawk a, engmah a sawi buai tawh biklo, Mza chu phur lo zetin ka call a, a la la theilo zui, a vawihnih nan ka call nawn leh a, a chhang ve ta hram e.




"Hello" hmeichhe aw hian a rawn ti a, chiang takin Mary aw a ni tih ka hre nghal, "Khawiah nge Mza a awm?" ka tihchuan "A inbual" a ti zang vah a, "A nihchu, zanin chu ka pa inah ka riak dawn tih lo hrilh rawh" tiin phone chu ka dah leh ta hmak a, ka pa hnenah chuan Mza ka biak tawh thu leh engmah buaina a awm loh thu te ka sawi a, a lawm hmel hle, tlai lamah chuan rawng te ka bawl a, ka pa nen chaw kan han ei dun leh chiah chu ka chaw ei pawh a tui ngei mai.




Zanah chuan thutthleng ah ka mu a, ka mut chu a chhuak lo hle, ka pa erawh a muhil tui viau tawh thung, phone ah video ka en mai mai lai chuan Mza call a rawn lut thut a, ka la dawn nge dawn lo tih ka ngaihtuah fe hnuah ka la ta hram, "Khawiah teh hrep nge i awm?" call ka chhan rual rual chuan a rawn ti vin hrawk a nihchu, "Ka pa inah ka riak dawn tih ka rawn hrilh che kha" ka ti ve hmak a, khatiang teh fa ko a a rawn vin kha ka lawm hauh lo.




"Engmah i sawi hauh lo" a rawn tih leh chuan "Tlai ah khan i in bual laiin ka rawn call che, chuan i bianu duh tak khan a lo chhang a, a bulah ka sawi kha" ka ti leh fak a, "Engmah sawi tur i neih tawh loh chuan ka dah a nia, ka mut a chhuak tawh" a ngawih vung vung takah chuan ka ti a, ka dah nghal daih bawk, a bialnu a rin em em khan a lo hrilh lo te pawh a ni ange, ka phone pawh chu khawih peih tawh lovin ka dah a, muthilh ka tum zui nghal mai bawk.




Ka pa in atanga ka chhuah chuan dar 11 a pel leh daih tawh, in ka thleng a, Opi chu ka hmu nghal zat bawk, "Room ah in bual turin ka lut dawn a nia aw" ka ti a, room lam pan a ka kal lai chuan Opi chu ka room ah a rawn lut ve nghal, "Nizanah i riak chhuak sia, Pu kha a mood a off hmel lutuk tunah pawh hna kal lovin inah a la awm" a ti sep a, "Tinge hna chu a la kal lova?" ka ti haw a, a ni ang hna ngai pawimawh lutuk hian tun anga hi chuan inah a awm tawh ngai tawp silo a.




"Ka hre tawh biklo, i rawn haw hunah hrilh nghal turin min ti a, va inbual vat rawh, biak duhna che a nei a niang" a tih leh takah chuan bathroom lamah ka lut vat a, ka in tifai zo bathroom atanga ka chhuak chiah chu ka mi hmuh avang chuan ka phu zawk a, chiang zetin min lo en run a nihchu, "Nizanah chuan khawiah maw i riah bo a?" a ti nghut a, a kekawr ipte chu a zen ran a, "Ka pa inah ka riak ka tih tawh kha" ka ti sep.




"I va rawn haw tlai ve" a ti leh a, ka ning takzet, "Mz ka chau a nia, khawngaihin tunah tak hi chuan kan in hnial hrih lo thei angem?" ka ti ta hap a, min en run run in a ngawi hmuk a, "Lo va chhuak rawh, ka in thlak duh a nia" ka ti leh a, chet sawn pawh tum lo tih hriat zetin a din ngai chuan a la ding reng a, ka va han ngei mai mai tak, ka thawmhnaw hak tur khuma ka dah chu la sawn in bathroom bawk ah chuan ka kut leh ta daih a.




Ka in hak fel hnuah ka chhuah chuan ka khum bula phone ka dah chu a lo ri ral ral a, "Hello" ka ti sep a, lehlam atanga an thil rawn sawi avang chuan ka khum chungah phone chu ka thlauh nghal tawp a, Mza pawh chu a la awm ve reng a, ka awmdan chu mak tih hmel zetin min en reng a, "A ni theilo" tiin khum ah chuan ka thu thla nghal tawp bawk, "Enge thleng?" Mza chuan min rawn din hnaih pahin a ti sup a, ka chhang lo.




Ka bag la pah chuan room atang chhuah ka tum a, ka kutah chuan a rawn man bet vat a, "Khawiah kal nge i tum leh tak?" ka va han kham zo zai tak, "Thil pawimawh tih ka tum, ka hmanhmawh a nia" tiin ka ban a vawn chu ka thing thla a, engmah pawh a sawi leh hman hma chuan ka tlan chhuak nghal dawr dawr a, police station lam chu ka pan vat, ka thleng a, police ka hmuh hmasak ber hnenah chuan ka pa awmna ka zawt a, police duty pakhat hnen a kal tura min tihchuan ka kal vat.




Police lo duty hnenah chuan ka pa hming chu ka sawi a, Lock up ah an dah thu a sawi chuan ka mangang takzet, "Ka pu ka pa chu ka hmu thei angem?" ka ti sep a, "Thei hrih lovang, engmah a la chiang lo bawk nen naktuk lamah i rawn kal leh dawn nia" an ti a, ka dil luih ngial pawh in an phal chuanglo, beidawng zetin station atang chuan ka chhuak a, kalsawn mai lo chuan station chu ka en reng a, tunah hian ka pa chu engtinge a awm ang, engmah damdawi a keng lut awm bawk silo.




In lamah chuan ka haw a, Mza chu a lo awm tawh lo, ka pa chu dawr rawk tumah an puh a, mahse hetiang thil hi a tih ka ring theilo, nilo a ti lo tawp ang, ka pa hi ka hrechiang ve tawk, thil ru duh tur khawp a midang te thil awt thin mi a nilo, Mza rawn haw se ka pa min lak chhuah sak turin ka dil mai ang, engpawh tih ngai rawh se, ka pa chhuah na tur a nih phawt chuan engpawh ka ti mai ang.




Mza chu a rawn haw a, "Mz, ka pa police ten an man a, khawngaihin min lak chhuah sak rawh" ka lo ti nghal chul a, a rum nghut a, "Mary damdawi inah a lut leh tawh a, naktuk ah thisen pek I ngai tih i hriat kha" a ti hmuk a, "Ka pe ang, mahse ka pa chu min lak chhuah sak hram rawh, a dam tha bawk silo" ka ti leh a, min nin hmel zetin min en a, "Engvangin nge ka lak chhuah ang, thil a tisual a, a tang mai tur a nilo em ni?" a ti a nihchu.




"Nilo engmah tihsual a neilo tih ka chiang a ni, mi thang kam ah a awk mai zawk a ni" ka ti leh a, ka mittui chu a luang zung zung bawk, "Engang pawn min ngen mahla i pa chu lak chhuah sak tumna che ka neilo, i duh a nihchuan nangman lak chhuah chu i tum dawn nia" tiin inchung ah chuan chho in room ah chuan a lut ta hmak a, ka beidawng takzet a ni, ka ngen a nihchuan min puih ve mai kha ka ring a nia, mahse ka lo ring sual let der a nihhi.




Room ah chuan ka lut a, Mza pa hnenah ṭanpui na ka dil tawp mai dawn em ni tiin ka ngaihtuah a mahse chutiang chu thil ni thei niin ka hre bawk silo, zanah pawh chuan chhing khat te mah ka chhing lo, ka pa ringawt chu ka ngaihtuah a, tunah te hian hreawm ti takin a awm mek angem tih te chu ka ngaihtuah a, zing khua a lo var a, Mza hnenah chuan ka pa ṭanpui tura ngen leh chu ka tum ruh hle.




Damdawiin a kal turin ka in siam a, sitting room ah chuan Mza chu ka lo nghak reng, step a a rawn pen thla lai ka hmuh chuan ka lo ding chhuak vat a, "Mz, ka pa chu khawngaihin min lak chhuah sak hram rawh" ka ti leh a, dur khui in min en a, "A dawr rawk te kha tu te ta nge i hria em, Mary nitei te dawr a nihkha, chuvang chuan i pa chu ka lak chhuah sak che beisei duh suh, khatiang thil tenawm tak tih a tum vang khan a thiltih man chu a hmu ngei tur a ni" a ti chang hrawk a, chhuat ah chuan ka thingthi rawp a.




"Khawngaih takin ka pa chu min lak chhuah sak rawh, a taksa a chak tawh bawk silo, in enkawl reng ngai a nih avangin jail a a awm rei chuan a thi vat mai ang" ka pasal hmaah chuan thingthi chungin ka ngen tawk tawk a, "A thiltih man chu a hmu ngei tur a ni, kei hian ka la chhuak dawn hlek lo tih hria ang che, chuan khatianga in la khawngaih thlak kual lo khan Mary tan thisen i pek leh a ngai dawn tih hria la, damdawiin lamah kan kal vat a ngai dawn ania" a ti nghut a.




Ka beidawng takzet a ni, ka pa khan a duh vang reng a khatiang thil ti kha a nilo tih lah ka hrechiang, nilo mi thang kam ah a tal awk zawk a ni, ka pa hi pa fel tak nilo mahse hetiang thil em hi chu a ti thei ngai dawnlo tih ka hrechiang lutuk, Mza ka neih na chhan ber pawh ka pa vang a ni a, mahse min pui thei tura ka rin ber lah hian min hawi san in a hmeichhe hmangaih dam na tur ringawt a buaipui bawk si.




Damdawiin chhunga ka luh lai te chuan ka lu a hai lutuk ringawt, tunlai chu chaw ka ei tha bawk silo, mut pawh ka mu mang ngai lo bawk, ka cher kawk kawk mai ni, mahse ka pasal ve hi chuan min ngaihsak na pakhat mah a neilo, tunah pawh hian damdawiin kan thlen rual rual in keichu doctor hnena kal turin min tih hnuah a hmeichhe hmangaih awmna room ah min kalsan lehnghal daih a nihhi.


cont...


Comment leh click kha aw.. a that chuan kan zawm leh vat dawn nia..