STORYFB.COM

DEAR JOHN






CHAPTER 2






Nitin chuan in tihfai leh nau awm chu ka kawpa, hah ṭhin viau mahila ka chungah an sual em em loh bâkah zalên taka ka awm theih avang chuan hrehawm ka ti ngailo, Puipuii lah ka awm a chinah a nu chuan zan lam tih loh a chang ngai meuh lova. Ka bulah a tâp chawt ti ila ka sawi sual kher lovang, min ngaina in keipawhin ka ngaina bawk, u John-a pawhin min duat viaua. Ka vak chhuak ngailo nangin ka pocket money tur erawh min pe ziah thung.








Ka lâwm viau bawk, khâwl zelin ka mamawh ngawih ngawih a nih loh chuan ka hmang mai mai ngailova. Ka nu leh ka unaute ka châwm angai tih hria in ka hmang duh ngailo, amak ka tih deuh erawh chu u Cindy te nupa hi an in pawh lo lutuk chu ani, nupa a han nuih dun leh inkawm bawrh bawrh ang hi an nei khât a, inah an awm tlem viau bawk.








Ka awm hnu phei hi chuan zanlam tih loh u Cindy tak ngial pawh hi inah a awm khât khawp mai. Puipuii lah in a hnute hne hek lo, ka awm bawk nen a nu hian a pawm khat viau mai, hei vâng te pawh hi a nimahna min ngainat em em ni.






Chumi ni pawh chuan Puipuii nen chauh awmin rawng ka bawl pah chuan ka chhaih nui ar ara, ṭawng zir ṭan a ni bawka. Thil ṭhenkhat chu fiah takin a sawi ve fo mai, “Kha chu khawih loh tur le" tiin chemte dawhkana ka dah ka la dah fel hmanloh a lo ban ka hmuh chuan ka dahsawn ta thuaia.







Rawng ka bâwl zawh takah chuan sofa lamah chuan pawm pheiin ka dêka, a nui khêk raih raih chu nuih puiin a biangah chuan ka fawhsaka, chutia kan lo infiam lai chuan kawngka chu rawn inhawngin u John-a chu a rawn luta. A rawn haw hma lutuk chu mak ka ti viau mai, roomah lût zawkin a rawn chhuak leha kan bula rawn ṭhut pah chuan Puipuii chu a lâwma.








A ni hi chuan a hman phawt chuan Puipuii hi a ngaihsak viaua, u Cindy erawhin a ngaihsak lutuk ngai miah lo hi mak ka ti fo,inchei in a chhuak daih zela. Zan reia an nupa a an in hau ri hi ka hre fo mai, mahsela mi hriat an duh lo nge an ṭawng ring ngai hauh lo. Keipawhin hrelo ang maiin ka awm ve maia, a rûk erawh chuan an nupa inkâr hi amak ka ti ṭhin.








“Âpa, pawm" tiin a pa chu a bana, u John-a pawh chuan a lo pawm ve maia. An pafa chuan an inchhun fuh viau mai, ka lo en renga “Felfel, rawng i bâwl zo tawh em ni?" tiin min rawn melha, a chang chuan a mitmeng hi en lêt a har ka ti ṭhin. A mitmeng hi a zahawm ka timai, rei ka en ngam ngai hauh lo “Um bâwl zo deuh chiah" sawi tûr dang ka hre chuang lo, alakah hi chuan ka zama, sawi tûr ka hre ngailo.








Ka la nel tawk loh vang pawh a nimai thei, Puipuiin min rawn ban tâkah chuan lo pawm vatin ka chhaih paha, ding in a theih tawka chaka a tlânchhe ve chu umin kan nui dûn a, a au chul bawk nen keipawh chu ka nui ri hak haka, “Ka man e, ka man che" tiin ka pawm kâng nawlha, a rak ve chul mai.








Nui chunga u John-a lam ka va en chu hawisawn lêk lo hian kan infiam chu bawp khawkherh ût hian min lo ena. Ka nui lai pawh chu ka tawp chat mai, tinge a bulah hian ka danglam ziah chhan hi ka hrelo, chutia min en reng avâng chuan Puipuii chu sofa ah chuan ka ṭhut thlâk pui leha.








“Naute i ngaina viau a ni maw?" a tihchuan ka bu nghata, Puipuii chu ka kuah nghet sauh bawk. “A va mak ve, nula ila ni lehnghâl. Bialpa i nei tawh em?" a rawn tihchuan a zawhna chu mak ka ti viau nangin engmah ka sawi duh lem lo.






“Neilo e, hnathawh nen bialpa nei turin kan dinhmunin a zir lo a nih hi, ka naute school kal tir ka duh avângin ka nu nen theihtâwp kan chhuah ṭhina, ngaihzawng nei hman pawhin ka khawsa lo" tiin ka nuih var vâra. A hmel hi a nelawm loh chi, nui hmêl pulo chi a ni bawk nen chutia ka thil sawi pawh chuan a tum hmuk reng mai.









“A nih chu, eng nge i nu nen chuan in thawh?" tiin a kut chu sofa bân chu a tuk kerh kerha, “Um.....lo kan neia, i hre tho ang. Thingtlâng ah chuan lo neih hi kan eizawnna a ni bera, chuan thlai kan chinga chung chu kan hralh ve ṭhina, chuan kan sawhthing chinnate nên kan in enkawl ve thei naw nawa, ka pa hian kum 15 ka nih in min boralsan tawha, ka nu hian kan unau za in min enkawl a ni ber" tiin ka ngawi vang vanga.








Chutia ka chhûngte chungchang ka sawi tâkah chuan ka ngai thar vawng vawng mai. A thla chuang chu ka hmu lo ve ta reng maia, in be zeuh zeuh mah ila ngaih an na lo theilo, kan khua leh kan in kha helaia ka awmna ai chuan changkâng lovin chhe hle mahsela ka thlahlel zâwk tlat si a, ka nute chu ka ngai takzet, ka awmlo bawk nen a buai zual viau in ka ring.







Mahsela hlawh ka thawn tawh bawk nen kha khân rei tak chu a daih ve dâwn tih ka hria, “I nu chu nu ṭha tak a nih chu. Nangmah pawhin i chhûn dâwn tih a hriat, kan fanu i enkawl dân aṭang hian a hriat nghal mai" a tihchuan ka nui sak ringawt, ni e hausa lo mah ila ka nu khân a phak tawk chuan min duat in midang kan it hlau reng reng khân a thawk ṭhin a nih kha.









Kan lo titi mawlh mawlh lai chuan u Cindy pawh chu a rawn haw zuia. Chutiang a kan lo ṭhu ho a hmuh chuan mak a tih hmêl em em lehnghâl, a sam vêl chu a thur bama, a chauh hmel viau bawk. “I va rawn haw har ve, khawiah nge i kal ṭhin, inah te hian awm ve ta che. Kan fanu hi i hmu em? Nu te ngai rual lek a ni, engvanga lo vâk chhuak ve fo nge i nih?" u John-a chuan a tihmuka, u Cindy chu inthlahrung viau tura ka ngaih laiin a rawn thinrim hmêl viau mai.









“Hna ka thawk ve, tin, kha a mah awmtu tur kan la tawha, enge buaipui chiam angaihna. Zânah ka awm tho a lawm, chhûnah te chuan ka lêng ve bawk ang chu. Nang pawh i duh duh hunah i lêng ve tho, min khap bik hauh suh" an inhau ṭan chu a ni der, Puipuii hriat ka hlau bawk nen rang zetin roomah chuan ka luhpui ta daiha.








Khumah chuan awmpuiin phone ah nursery rhymes chu ka en tir a, a nu leh pa inhau a hriat fo chuan a la naupang bawk nen a hma hun a chhiat ka hlau, u John-a te pawh chu reilo teah an thâwm a reh zuia, in hauh zeuh zeuh an nei bawk nên a châng chuan hrehawm ka ti ve ṭhin. Mahse mi an duat êm bakah awmna tûr dang zawng leh tûr kha chuan ka hlawh a ṭha tawh kher dâwn lo tih ka hria a, keimah min hauh loh a hnu chu ka awm zel rih mai ang chu.









Kan chhungkaw dinhmunte a kân deuh hunah ka la haw mahna, “Ate," Puipuii ṭawng avâng chuan harh zawkin ka pawma. A mut a chhuah tawh ringin pâwnah chuan ka chhuahpuia, u John-a chu alo la ṭhu renga, a hmêlah chuan a lâwm lo hle tih a hriat theih, ka hlau deuh bawk nen an room bulah va dingin u Cindy chu ka ko va. A ni pawh in kawngka chu rawn hawngin a Puipuii chu a rawn pawma, engmah sawi tawh lo chuan a luhpui nghal daih bawk.








Ka room lam pana ngawi renga ka phei lai chuan u John-a chu a rawn thaw hawka “A hrehawm i ti em Felfel?" a rawn tisupa, a kut chu a hmalamah a khup chungah chuan a suih uta. Thil ngaihtuah muk tak hmel a pu bawk, an nupa boruak avâng hian a chau ve pawh a niang.







“Tilo e, mahse Puipuii hi ala te sia, in hau ri hi hre lo se chuan a ṭha ka ti" ka tihchuan a rawn nui suka, chutah min rawn enin. “I hmuh ang hian hnaah ka buaia, ka nupui hian kan fanu tal hi chu lo enkawl tûrin ka beiseia, mahse a theilo chu a nih hi. A duh anga a chhuaha a ṭhiante a hmuh theih ṭhin loh avang khân ka lo khawngaih ṭhina, chuvanga awmpui pawh lâksak ka nia" tiin a thaw leh hrawka.







Ka en renga, a hmelah chuan hrehawm a ti ve hle tih ka hre thei. Engvanga hetianga min ringa an nupa inkar min hrilh nge a nih ang? Amah chu ka en renga, a chau ve takzet tih pawh a hmêlah chuan a hriat reng mai. Ka khawngaih ru viau, keichu ka awmna a la reilova an nupa inkar ka hre thiam hauh lo, mahse ka hmuh chinah hian ngaihdan chu ka nei tho, nupa in pawh tak an ni lo tih pawh a hriat viau bawk.








“A chânga a len kha ka phallo a ni reng reng lo. Mahse nang i awm a chin khan nitin a chhuak a ni tih ka hria, kan fanu hian a nu hi a mamawh hle tih pawh i hria anga. A pian hlim aṭanga hnute hnêk a phalloh pawh khân amahin a duh loh miau chuan tiin siamchawp hnute pek kha ka rem ti a; mahse a lo ṭha ber hauh lo a nih hi. Kan nupa hi inneih tum em em pawh nilo a chhûngte avâng zawka innei kan ni a, kan nupa inkar chu i hre vek ang chu" tiin za lo tak hian a ṭhen saka.








Chuvang a nimaw an in pawh lo ka lo tih ṭhin, sawi mai tur leh hnem dân tur pawh ka hre mailo, amah chu ngawi rengin ka en tlawk tlawk ringawt.





“U John, engkim ala ṭha mai ang. I hmangaih anihchuan hrilh la, nupa chu in tih thiamloh châng a awm lo theilo va, a tu emaw zawk zawk hi tlawm hmasak angai ṭhin a lawm" ka lo ti ve tawpa. A nui haka “Hmangaihna maw? Ka ring chiah lo, mu tawh rawh"tiin a kalsawna, keipawhin ka be tawh bik lo.







Ka room-ah chuan lutin an nupa inkar a sawi te chu ka ngaihtuah neuh neuh a, u Cindy a lêng reng chu keipawhin mak ka ti tho. Puipuii lah ṭawng pawh la thiam ṭha ṭhumlo, nu mamawh rual lek a la ni a. U John-a sawi kha a lehlamah chuan dik ka ti viau bawk, nupa chu inpawh taka thusawi dun a ngaih châng a awm fova. A tu emaw zâwk zâwk kan chapo tlat hian kan inkar kan tichhe fo ṭhin, ka nu thu min hrilh ngei chu ka ngaihtuah chhuak rauh rauh mai.









Zinglam thawh hma angaih avâng chuan engmah ngaihtuah duh tawh lovin ka mu zui ta thuaia, chhûn lam ka chau ṭhin bawk nen zanlam hi chu ka mu hma thei viau mai, online pawh ka online khât, ka chhûngte ka bia tih lohah chuan phone pawh ka hmang khat khawp mai.




ZAWMNA





Zingah chuan hma takah thovin thingpui ka lum hnuah rawng chu ka bâwl zawm mawlh mawlha, u Cindy te erawh an la rawn tho chhuak lo thung. Keimah tê chuan ka che mawlh mawlha, mi an mut reh lai hi chuan a khawhar thlak ve riau zêl lehnghâl.







Dar 7 velah an ni pawh chu rawn tho in rawng chu ka bâwl zo titih tawha, thingpui chu ka lo thlit nghal sawk sawka, an inhauh vâng nge an hmel chu a ni deuh lûk mai. Puipuiin min ngen avang chuan pawm vatin choka lamah ka phei puia, an nupa chuan an la in be leh miah lo, u John-a thusawite chu ka ngaihtuah rauh rauha.








Ka hrethiam viau mai, an nupa inkar min hrilh kha keichuan ka hmuhsit phah hauh lo, in hria ang. Mitin hian kan harsatna te hi kan pai reng a nihchuan keimahni kan hrehawma, sawi chhuahna leh ngaithlatu kan neih hian kan thâwl phah hawk ṭhin miaua, chutih rual erawhin rin ngam tur erawh kan hriat angai, tam tak kan ṭhianṭha a kan lo ngaih te hian min bum fo va, kan ṭhian leh hmelhriat ṭha pawh ni em em lo hi an lo rinngam duh zâwk phian zêl.








U Cindy chu keipawhin mak ka ti ve viau
, u John-an hna a thawk tho sia u John-a sawi ang tak takin Puipuii hian chhûnah hian a nu lam chang a neia, kan in thlem fe a ngai ṭhin bawk. Kei min ngaina viau mahse nute nge nge chu naute pawh hian an hria a, ngaih hun an nei ngei ngei ṭhin.








“Felfel chaw ei i peih tawh em?" u John-an a rawn tihchuan ka lo bu nghata, kan bulah rawn dingin Puipuii chu amahin a rawn pawma. Ka antui chhuan lai vêl chu la thla in chaw ei chu ka siam zuia, hna a kal hma ṭhin avang hian zing lam hi chu chaw kan ei hma ṭhina, keipawh ka tho tlai ngai hek lo.








U Cindy rawn ṭhu tum bar chu melh zeuh zeuhin chair ah chuan ka ṭhu thla a, an nupa chuan an la in be leh lo hrim hrim. U John-a chuan chaw chu bar mawlh mawlhin a kham zui thuaia, insiam turin room lamah a lût daih bawk.







“Vawiin chu in ka awm dawna, nau hi i puak mutthilh hunah roomah mut tawp maila. In i tih fel zawh leh i chawl dâwn a nia, a dang chu ka lo ti mai ang" u Cindy in a rawn tihchuan ka lo bu nghata, ka lawm ru viau mai. Dik tak chuan zan lam tih loh hi ka awl thei meuh lova, ka taksa te hi a sil ṭhum thei nia.







“Ka kal a nia" u John-an a rawn tihchuan u Cindy pawh chuan a lo chhâng ve maia, a chhuak zui nghal zat bawk. Thleng chu seng zung zungin ka sil zuia, ka zawh rualin chhuat chu nâwt leh in Puipuii lahin min lo um kual ve bawk, kan buai dûn teh e.






U Cindy lahin a rawn pawm dâwnin a ṭap dawn zêl bawk nen a tawpah ka bulah chuan dingin a theih tawk chuan min um ve a, ka nui hak mai. He naute anga duhawm leh fing tih hi ka la neilo, “Pawm pawm" huiham! Chhuat nawh pah chuan pawmin ka zawh hnuah sofa ah chuan ka ṭhutpui hnawka, ka thaw ham ham bawk.







U Cindy chuan phone ah mi a be mawlh mawlha. Rawn leng tur te in a tiin ka hria, a tu tak chu ni ang maw? A aw aṭang chuan mipa a ni lehnghal, a ṭhianpa pawh a nimai thei. Engmah lo sawi ve tûr ka neilo, keichu awmpui mai mai ka ni tlat miaua.








Reilote hnuah mipa pakhat hi a rawn lût hlawla, u Cindy chuan a lo chhâwn nghal vat mai. “Felfel thingpui kha min lo pe teh aw. A thlum khan rawn siam la, ka ṭhianpa a nih hi" a tihchuan ka bu nghata. Choka lamah chuan pheiin thingpui chu ka siam zuia, Puipuii ka paw phah bawk nen ka dar chu a kham ve takzet.









Thingpui ka va pêk lai chuan an lo nui dun hak haka, ka hriatsual nge ni ang a mipa hian u Cindy hi a duh hmêl ka ti, an awm dân hrim hrim chuan ṭhian satliah an ang hauh lo. Engmah sawi lo chuan thingpui chu ka pe a “I duh leh bawihtei kha khumah va mut la hahchawl tawh rawh. Kan inna ruak hi chu ka lo ti fel mai ang" a tihchuan ka hnial bik lo.







Mi inkawmna kara lo awm ve reng ai chuan ka hahchawlh theihna hun remchâng chu bawlh pelh ka tum bik lo. Puipuii chu a harh palh tâkah tiin ka khumah chuan ka mutpui tawpa, a ni pawh a mutui viau mai, a samah chuan chul sakin a sirah chuan ka mu thla vea, phone chu phawrhin thawnthu ka chhiar malh malh ringawt.







Mi kara awm a titi a ṭhian kawm ai chuan keichuan thawnthu chhiara suangtuahna rama chên veng veng hi nuam ka ti a. Khuaa ka awm pawhin ka vâk chhuak ngailo, thawnthua a changtupa te hi ka vei in ka suangtuah ve fo a, an mahni anga hmangaihtu tawn ve ka châk bawk. Englai pawhin ka thil hmuh leh hriat thar apiang thawnthuah ka chana, chu chuan min tihlim tâwk em em bawk.







Bâkah mi kawm vak chu tûn ang laiah chuan rinsual kan nei ang tih hi a hlauhawm tawha, chu ai chuan hmangaihna thawnthu hi ka tuipuia, ka hlimpui bawk. Ka ṭhian berah ka nei ka tilo theilo, a chângin ka ṭah puia, a chângin ka nuih pui bawka. Ka tan chuan ka khawhar hnemtu ber a ni.






Reife ka mut hnu chuan pâwnah ka chhuaka, chutah kawngkhar bula u Cindy leh a ṭhianpa lo in pawm ka hmuh chuan thawm neilo in bang phena awm chuan ka en tawpa. An awm dân chu ṭhian mai mai an ni hauh lo tih ka hre chiang ta viau, a mipa lah chuan a la fâwp zui. Ka phu zawk mai, u John-a a phatsan tihna?







Lalpa leh! Thawnthu leh tv vela uire an lo sawi fo ṭhin hi a takin ka tawng ang tih ka ring phâlo, Mizo ah pawh hian lo awm zeuh zeuh mahse hetianga ka hmuh ve mai ka ring lo, mak ka ti lutuk chuan an pahnih chuan ka melh tlawk tlawka. Ka rilruah u John-a thusawite chu a rawn langa, in hmangaih vanga innei an nih loh thu a sawi a nih kha. Mahse chumi avanga midang u Cindy'n a kawp kher chu mak ka ti a, rapthlak ka ti bawk.







Pawna an chhuah tâkah chuan rang zetin room-ah chuan ka lût leha, Puipuii chu ka en reng. A nu in a pa a phatsan a ni tih hria se engtin tak awm ang maw? Ka thil hmuh chuan keimah pawh min ti danglam vek mai, ngampa taka he inchhunga an awm theih danah an in ngaihzawnna a rei tawh ang tih a hriat bawk.






U John-a ka hrilh ang nge hrilh lo ang tihah ka buai a, hrilh ta ila u Cindy lo insawifiah ta in finfiahna ka nei der silo, bakah an nupa inkar tichhe tuah ka ṭang duhlo. An fanu a awm tawh bawk si; keimahin ka tuar zâwk ka hlau bawk nen ngawi renga awm rih chu ka thlang ta tawpa, u John-a hian a mah ngeiin a hriat chhuah hun pawh a la awm mai thei zawk a sin.







Keiin lo sawi ngawt ila an nupa inkar chiang takin ka hrelo a, min ring kher lo thei bawk. U Cindy lah hmeichhe fing tak tih a hriat bawk si, a chhan chu hei chen a pasal a bum thei miaua, thawk la ham hamin ka ṭawngṭai mawlh mawlha, awmpui mai ka nih bâkah fiahna nen lo chuan mi nupa inkar tihchhiat tum tiin keimah ngeiin ka tawrh phah thei bawk si.







Lo inṭhen ta ang se Puipuii lah heti mai a la ni bawk nen a pa kuta awm tawp tur chuan ka lainat bawk nen sawi rih loh chu ṭha maia hria in khumah chuan ka ṭhu renga, u Cindy pawh in a rilru thlâkin a pasal tan chauh a awm leh thei mai thei a sin tihchu ka ngaihtuah bawk nen ka ngawi renga.








Puipuii rawn harh ṭah tum ri ka hriat tâkah chuan en vatin ka pawm zuia, ka thlêm pah mawlh mawlh bawk. He naute avang pawh hian ka ngawih rih mai a ngai a ni, in siamṭhat hun a la nei mai thei a sin.






“Hnute hne rawh aw" tiin pâwnlamah chuan ka pawm chhuaka, a hnute chu siamsakin ka pe zuia, u Cindy pawh a rawn lût chiah bawk. “Bawihtei kha lo buaipui la rawng chu ka bâwl mai ange" a tihchuan ka bu nghata.







“I ṭhianpa kha a haw tawh em ni?" ka tihchuan min rawn melh zawkin a mitmeng chu a danglam zawka “Um haw tawh e, high school aṭanga in kawm tawh kan nia, a rawn lêng ve zeuh zeuh zêl" a tihchuan ka nuihsak a, engmah ka zâwt tawh lem lo. Ka thil hmuh avang erawhin u Cindy ka hmuhdan chu a dang ta daih thunga.









Pasal fel tak leh hmelṭha zet, chutah hna nei ngei lehnghal a nei chung pawha mipa dang a kawp thei chu mak ka ti takzet. Sum leh hmel ringawt pawh hi a lo ni lo a nih hi, nunnawm duh luatah kan hmangaih loh pawh kan neia, a tâwpah kan phatsan leh duh ṭhinna hi hmeichhia te pawh hi kan lo mak ka ti ṭhin.







Miin uirena lam an sawi apiangin a mipa zâwk an dem fo va. Mahse hmeichhia pawh kan lo bâng bik lo a lo nih hi, u Cindy pawhin fanu hial a hring chung pawhin hetiang thil a ti duh a nia,ka awmna hi a fuh chiah em pawh ka hre tawh lo e a.