We Belong Together BY Becca Lnz (Completed)

[Rebec Nunziri]

Chapter-2



Grace Lalthazuali POV



Thinrim lutuk in a office atang chuan ka chhuak nghal, kan in hmuh leh pawh ka ring tawh lo a sin mawle, khawvel hi zawng a lo zim a nih hi, engtinge a hnuai ah ka thawh theih tawh ang ni, khatiang thil kha kan in kar ah a thleng tawh si a, he hotel hi a ta a ni tih hre lawk ngat ila chuan interview tur khan ka kal lo chiang ngawt ang, in hnuai ah chuan ka chhuk a, ka mood a fu lo bawk nen ka tum bur mai.




Asangi lah chu hmanhmawh tawk in ka bulah a rawn kal a, "Midangte sawi hi a dik em, Boss ber Personal Assistant I ni dawn an ti a?" a rawn tih chuan "Ka hre lawk biklo, tunah khan ka hre chiah" a phul nghal hlut a, "Awi.. I van vannei bik tak, ka thik che e" a ti chiam a nih chu, ka peih loh zia hi hria se chuan hetiang hi a sawi awm tawp silo a, "Bengchheng lo teh, ka peih lo teh mai a nia, keichu ban lehnghal daih mai te ka duh" ka ti zuai daih a.




"I mawl a mi, khatiang kha sawi tawh reng reng suh, i vanneih zia hi in hre tawp tawh, kan hnathawh tur ai te chuan a la phurawm daih zawk alawm, I hlawh pawh a in up dawrh dawn tihna a nia, a tha daih zawk" phur zet chuan a ti leh siam siam a, tah khum vak mai te ka duh rum rum, engpawh nise tih theih ka nei tawh chuang lo, he hna hi ka mamawh zia pawh ka hriat hnaih loh kha mawle, chuvang chuan tha taka ka thawh a ngai a ni, kei leh ka u tan.




Sir office ah chuan tim dai in ka va lut leh a, a chair a thu chung chuan min lo en run, "Hetah rawn kal hnai teh" ka thutna tur lam ka pan lai chuan a rawn ti a, ka hma zawn ah chuan ka ding vat, "Enge nita sir?" amah pawh en lo chuan ka ti a, "Min en rawh" a ti leh hmuk, a mit ah chuan ka melh zawk a, mahse rei erawh ka en ngam lo, a dawhkan chu rawn kal hual in ka hnunglam ah chuan a rawn ding a, ka thaw dep dep mai, a taksa lum na chuan min ur ham ham thei hial in ka hria.




Chutah ka hnunglam atang chuan ka nghawng ah a rawn chelh a, a taksa si rawk tur chuan min hnuk hnai nghal zat, "Sir engthil nge I tih hi, min thlah rawh, midang in min hmu ange" tiin ka tal aih a, mahse ka kawng ah chuan a rawn man leh hmiah, "Duhtak ka office ah kan awm, ka phal a tello chuan tumah an rawn lut dawn lo bawk, chuvang chuan engmah ven thawn tur kan neilo tihna a nih chu" ka beng bulah chuan a rawn phun sup sup a, ka nghawng chu a nul kual lehnghal dun dun bawk a.




"Duhtawk teh, i hnuai a hnathawk tur ka ni, hetianga i mi tihtur ni lovin" ka ti fak a, a tawp chawt, a in la hrang a, "Ka hria, a nih chuan i hna chu i thawk tan thei ang" tiin a kalsawn a, keipawh chu rang takin ka thutna tur lam ka pan nghal, ka lungphu ran hman zia chu, thawk la ham ham in ka hmaa computer chu ka ti nung a, mahse eng ber nge tih tur ka hrelo, engmah a sawi bawk silo a, Sir Marcus-a lam chu ka hawi a, min lo en leh run tawh mai.




"Eng ber nge ka tih dawn?" ka ti sap a, "Pdf ka rawn thawn che kha lo en rawh, khakha print chhuah a ngai a, chumi hma chuan i hmaa file nen khan en mil la, diklo a awm a thiang lo" ti nghut in a hawi sawn a, tihtur a sawi ang chu ka ti nghal a, rin aiin check tur chu a lo tam daih a, a ziak a sin reuh sia, ka tisual ang tih chu ka hlau hle, ka nikhat na a ni bawk nen uluk takin ka check zel a, ka check tawh sa pawh ka check nawn leh thlap zel.




"I la zo lo em ni?" a rawn tih thut chu an la phu zawk mai, ka thiltih lai ah ka rilru ka pe bawk nen room khat ah kan awm dun tih pawh ka lo hre leh tawh lo, a va han hahthlak tak, ka dawhkan hmaah chuan a lo ding reng tawh chu niin, "Ka la zio lo deuh a, i en duh tawh a mi?" ka tih chuan min chhang lo, ka che muang a ti deuh pawh a ni mahna, "Sir, tih sual ka nei ang tih ka hlauh vangin ka check nawn zel a, chuvang in ka la check zo lova" in thlahrung tak chuan ka ti leh a.




"A pawilo, s hmanhmawh thlak loh, dah la thil ei a hun tawh a nia, thil ei turin kan chhuak dawn a nia, lo in siam rawh" tiin a dawhkan lam chu a pan a, ka phone dawhkan a ka dah chu la in ka en vat a, Asangi message a lo awm vang tawh mai, thil ei turin min lo nghak tawh tih a rawn sawi na pawh minutes 5 dawn a liam tawh, "Sir, ka thiannu in min nghak a, ka lo va chhuak hmasa mai ang aw" tiin ka tho a, kalsawn mai ka tum chuan min au let vat, a aw ri a nelawm loh em avangin keipawh chu ka ding chawt mai.




"Kan pahnih in kan ei ang, min lo nghak rawh" a tih chuan ka thaw hak a, "Sir, ka lo thawk thar ve chauh sia, i PA a ka awm nghal ringawt pawh hi midangte hian min sawi duh tawh a nia, chuvang chuan kan pahnih hian thil pawimawh lovah chuan in zui tam vak lovang, ngaihdan diklo midang te hian an pu ang tih a hlauhawm" ka tih chuan a rum deuh nghut a, "Chuchu a pawi em ni, kan pahnih in karah chuan thil a awm nilo thil thleng pawh a awm tawh alawm, midang ngaihdan ngaihsak vak a ngailo" a ti a.




"I tan te chuan a ni ang chu, mahse ka tan chuan a ni ve lo" ka ti sep a, "Ok.. pawn lama ei chhuah dun i duh loh chuan hetah kan ei mai dawn a nia, kan chah ange" a ti leh hmuk a, phone chu a hmet nghal mual mual, "Mahse ka thiannu in min lo nghak tawh a, nangmah in ei mai la, min nghak rei lutuk palh ang" a tawp lam chu a zuih ral ti tih, "Kan pahnih in kan ei dun ang ka tilo em ni, sawi ngai sawi nawn reng hi ka ngaithei lem lo, chuan hetah hian kan ei dun ang chuchu thu tawp a ni" a ti ta hmak a.




Ka hnial ngam tawh lo, Asangi hnenah chuan Sir Mike-a nen room a kan ei dun tur thu ka sawi ta ngawt a, bet lo zetin ka thut na ngai ah chuan ka thu a, reilote hnuah eitur chu a rawn thleng a, dawhkan lam chu ka pan vat, a tui hmel hlawm em em lehnghal, mahse a chah tam mah mah a ni, hetiang zozai hi kan pahnih in kan ei zo thei pawh in ka ring lo e, "I duhzawng ka hrelo, hetah hian i duhzawng a awm lo a nihchuan kan chah tha leh dawn a nia" a ti nghut a.




"Aih ka duh lutuk vek" tiin rice chu ka ei nghal mawlh mawlh a, ka duh em em mai beef soup a chah tel chu ka hawp pah zeuh zeuh bawk, ka ril a tam tawh bawk a, rice chu ka ei zo vek, "Ka rin aiin ei i thei daih mai" a tih chuan ka zak leh hmuh hnawh viau, a ni aiin ka ei tam daih zawk, "Hna kan thawk leh tawh ange, chuan eitur vang khan ka lawm e" tiin ka tho chhuak a, mahse ka pen hman lo, a mal chung ah chuan ka thu thla leh hnawk a, rang lutuk a thawh ka tum chuan ka tai zawn ah a kut chu a rawn dah a, ka che lai pawh ka tawp chawt mai.




"Enge i hriat a, midangin min rawn hmu ange, min thlah teh" tia a kut lak sawn ka tum chu amah hnaih zawng chuan min pawt hnai leh salh a, "Sir" tiin a awm ah chuan ka in nam khalh a, "Hlau suh, tumah an rawn lut dawn lo" ka beng bul vel nul kual thuak thuak pah chuan a ti a, ka za mer mer mai, a hmain kan lo mu dun tawh bawk nen ka awm chu a nuam chiah lo, "Keimah ang tho hian i danglam, chuchu a dik em?" a tih leh sup chuan ka tal leh deuh aih a.




"Khawngaihin min thlah teh, hetiang hian awm suh" ka tih chuan ka beng chu a rawn seh zeuh, na erawh a nilo thung, "Ka hmeichhia ni rawh, ka tan awm reng la, i mamawh engkim ka pe ang che" a rawn tih chuan ka tal vak a, min vawn na chu a ti nghet salh thung, a tha chak zia chu "Sir, i hnuai a hnathawk mai ka ni, kan in mar ah engmah a awm lova a awm ngai bawk hek lovang, a hmaa thil thleng kha chu pawisa ka mamawh em vang a ni a, khatiang thil kha tih nawn leh tum na ka neilo, tihpalh thil angin i ngai thei ang" ka ti chang fak a.




A nui ri deuh suk, enge nuih tur ka hre ve hauh lo, "I mizia te hi ka duh chi tak a ni, chutih rual in hmeichhia ka thu hnial zawt zawt erawh ka ngaina hauh lo" a tih chuan ka nui ve ta sak a, "A nihchuan i hmeichhe duhzawng ka nilo tihna a nihchu" sawi fuh in ti lutuk in ka en a, "Nilo e, nanghi chu ka hmeichhe duhzawng tak i ni, chuan nang anga nawm na vawrtawp min pe thei tu hmeichhia hi ka la tawng hauh lo bawk" ka in hum ruh vak a, a ruh lang rawt a thil sawi kher hi a ngai thin a mawni.




"Hmeichhe dang zawng rawh, kei ni lovin" ka ti leh a, ka tal chuan min thlah ve mai, "Tunah rih chuan ka thu i hnial pawh a ni mahna mahse i taksa pum pui kha ka ta a la ni thuai ang" mahni in ring tawk taka a tih chuan rum zetin ka en a, a la nui suk suk zui, "I suangtuah naah khan cheng tawh suh, chutiang thil chu a thleng ngai lovang" ka ti a, ka thut na lamah chuan ka kal nghal nal nal, hna tha tak ka nei chu ka lawm a, mahse hepa ber kher ka boss a ni hi a pawi ka ti.




Ban hma chu hna kan thawk leh char char a, ban a hun chuan ka bag chu ka sima zung zung a, haw tura ka in peih meuh chuan Sir Mike-a pawh a lo hman ve chiah pawn lamah chuan kan chhuak rual a, kan in be miah lo bawk, Asangi pawh a haaw theih na a rei tawh a, mahse min lo nghah avangin a tlai phah ta duai dawn chu a nih hi, "Ka thlah ang che" ka thiannu din na lam pan mai ka tumai chuan Sir Mike-a chuan ka banah rawn vuan in min pawt let leh a.




"A ngailo ka lawm e, ka thiannu in min nghak a, ka kal phawt ange, tluang takin i haw dawn nia" min man ngheh loh lai chu chuh in ka tal chhuak vat a, ka kalsawn nghal nal nal bawk, ka thiannu chuan zawhna ngah hmel zetin min lo en ran a, "Nakinah kan sawi dawn nia, haw phawt ang, ka u ka ngaihtuah riau" ka bul ka thlen rual rual chuan ka ti a, "A tha alawm, mahse in sawifiah na chu i neih ngei ngei a ngai ang" tiin scooty chu a ti nung a, a hnungah chuan ka chiang ve nghal vat.




Kalkawng ah chuan zawh na min zawt nghal mawlh mawlh a, "Hmani ah kan in hmu fuh a, kan in hmuh dan a fuh vak lo bawk nen min lo la hria a nih kha" tiin dawt chu ka sawi ta ngawt a, "Mahse mak ka la ti tho tho, engvanga a PA a dah ringawt che nge a nih le, e ka hria, Sir Mike-a hian a hmuh hmasak ber atang che chuan a duh che a ni chiang mai" a sawi zawh rual rual chuan a dar ah ka beng thak a, "Thu awih awm loh deuh deuh sawi suh, a ni khan min duh lul lovang" ka ti a.




"Tikhan sawi ringawt suh, thu diklo ka sawi miah lovang, chuan min beng tawh suh, i kut thlak a na ropui si, kan accident i duh loh chuan" a ti hlak a, "Khatiang kha sawi tawh lo la a nimai, min duh dawn lo tih te chu i hre ve reng alawm" ka ti leh hmak a, kan in hnial char char a, Sir Mike-a vangin kan thian dun kan in hnial chu a nia a va han ho tak aw, kan in zawn ah chuan a scooty chu a ti ding a, ka chhuk vat, "Zanah lo leng rawh aw" ka tih chuan a bu zeuh a, sawm hi chu a awlsam a nia.




Inchhung ah ka lut a, ka u chuan rawng a lo bawl mek, ka hnathawh naa thil thleng te chu ka hrilh ve mawlh mawlh a, a lo lawm ve khawp mai, "Pathian hnenah lawmthu sawi tawngtai na nei ila a tha ang, hna tha tak i nei bawk a, keipawh hna hi zawng ve leh tawh dawn ila ka ti a" a tih chuan ka lo hnial vat a, "Inah lo awm mai mai rawh, keiman hna ka nei tawh a, nangin hna i thawh ve leh zel a ngai tawh hleinem, i rilru ri buai vak duh suh" ka ti hlak hlak a.




"In a awm chu a ninawm alawm, hna chhete lo thawk ve pawh ni ila a tha alawm" a tih leh chuan ka lo hnial leh vat a, "Lo awm hahdam mai mai zawk rawh, hna i thawk lui talh a nih chuan awm nuam in ka awm thei lovang" ka u chu a thaw hap a, "I tan hian phur rit mai ka ni tiraw, keihi awm lo ni ila chu nun nuam takin i awm ngei awm si a" a ti sap a, "U chutiang sawi suh, ka tan hian i hlu lutuk a sin, nanghi awm lo nila hetiang dinhmun hi ka thleng kher lovang" ka ti a.




Ka thinlung tak tak a sawi ka ni bawk, ka nausen lai in ka chhungte an boral tih zawng ka hria a, car accident ah a ni nghe nghe, kaa chhungte dang tumah an hriat loh avangin fahrah inah min dah ta a, hreawm ka ti thei hle, ka u hian ka khawhar na te, hreawm ka tih na te kha min thlamuan thei em em a, a ni hi awm lo nise hetiang dinhmun hi ka thleng lovang, fahrah in atang hian min la chhuak a, lehkha ka zir theih nan rim takin hna a thawk bawk.




A tuk lamah chuan a ngai te bawk in hna kal turin ka in siam a, hna thar thawk chauh e tilo chuan ka va han phur lo chiang tak, Asangi nen hotel lam pan chuan kan in phur leh ta vawk vawk a, "Kan tlai love, han chho vat rawh, chuan chhun ah thil ei tura nghah chu i ni angem?" a tih chuan ka ngawi deuh ren rawn a, "Ka hrelo, ka lo hrilh ang che" ka tih hnuah Sir Mike-a office lam chu ka pan a, a thlen ka la rin loh avangin kawngka chu ka hawng pawp a.




A chair ah chuan thu in min lo en run a, ka kut a hmuh rual chuan a ban a sana chu a melh zeuh, "I va tlai ve" a ti hmuk a, sana ka en ve leh, dar 9 a la ri der silo a, "Sir, dar 9 pawh a la rik loh hi" ka tih sap chuan a thutna atanga rawn tho in ka hmaah tak chuan a rawn ding khup a, "I Boss ka ni a, min thlen khalh hrim hrim tur a ni dawn lawm ni?" a tih sup chuan ka va hna ngei mai mai tak, a thlen hun tur pawh ka hre tawp silo a, "Nidang ah chuan hetiang hi a thleng tawh lovang" lungawi lo ru deuh chuan ka ti a.




Ka thutna lam pan mai ka tum lai chuan min pawt let leh a, ka kawng ah kuah in a lamah min pawt hnai salh a, a awm ah ka lo in man khalh ve vat bawk, "Khawi teh min thlah rawh" ka tih chuan a nui suk a, "Ni mai love, hetah hian rei fe ka lo nghak tawh che a nia, nizan ah nangmah vangin ka muhil theilo tih i hria em?" a tih chuan a thusawi awmzia, hrelo zetin ka lo melh haw a, "Keimah vang chuan engvangin nge i lo muthilh theih loh ngawt, i chungah engthil mah tih ka nei hleinem" ka ti hlak a.




"He i taksa mam han mai ngaihtuah lo thei lova min siam vang a ni" tiin ka ban chu a chul thla dan dan a, ka lo awm sawn vat, "Thu lawi lo sawi mai mai lo teh, hnathawk turin ka lo kal, nang in fiam pui tur che ni lovin" ti hmak in ka thutna lamah chuan ka kal nghal nal nal, "Ka sawi tawh kha kha i taksa pum pui kha ka ta a la ni ngei ang" tiin a thutna lamah chuan a kal ve nghal a, "Teuhlo lutuk" tih pahin ka bag chu ka dah sawn a, thinrim tun in laptop chu ka en a.

Zawmna



Chhun thil ei hun a nih chuan Sir Mike-a lam chu ka va hawi zeuh zel a, a thil khawih laiah chuan rilru a pek hmel hle, ka phone chu ban in ka ding hluai a, "Sir chhun thil ei a hun tawh tho a, thil ei turin ka chhuak dawn a nia aw" tia ka sawi zawh hnuah a tlan in ka tlan chhuak nghal, min auh zui na pawh chu hre reng mahila ka hrelo der tlat, ka thiannu hnathawh na lamah chuan kal vat in "I hman chuan kal nghal mai ang, let leh vat ka ngai dawn a" ka ti nghal sawk sawk a.




Pawn lamah chuan kan chhuak a, ka thiannu chuan min rawn un zui dawr dawr mai, "Em em a che, I va kal chak ve, hlauh nei ang mai" tiin min rawn pawt ding deuh dat a, "Ka hmanhmawh alawm" ka ti ringawt, diktak chuan Sir Mike-a khan min rawn um zui ang tih ka hlau em a ni, restaurant changkang vak lovah chuan kan lut a, mi nawl pui chawlh thin na a ni bawk nen customer pawh an nei tam khawp mai, hotel a hnathawk ve te pawh hmuh tur an awm nawk bawk.




Eitur te kan chah zawh hnu chuan kan ti ti a, ka tawng mawlh mawlh lai chuan Asangi chuan ka ban ah a rawn sik deuh nawk nawk a, "Enge i hriat a, a na lutuk, i kuttin a sei si" ka ti hlar a, engmah sawi lovin restaurant luhna lam chu a en a, en ve tura min mit mei avang chuan leh hawi in ka en ve a, chutah Sir Mike-a a rawn lut mek chu niin, "Enge a rawn tih ve dawn ni?" ka rilru chuan ka ti neuh neuh a, pawn lamah thil ei dawn mahs helai hmun ah ber kher hi chuan a ei duh ka ring lo ve em bawk a ni.




Chutah keichu min rawn hmu a, ka thutna lam pan chuan a rawn kal vat, rang lutuk in ka hawi let a, kan bulah hian rawn thu ve lo hram se ka ti takzet, "Ka rawn zawm ve mai ang cheu, a pawi na a awm em?" Kan dawhkan sir a rawn din pah chuan a ti thum dut a, ka chhang lo, amah pawh en lovin dawhkan chu ka melh ngar a, "A pawi na a awm reng reng lo, rawn thu rawh Sir" Asangi chuan a ti vat a, ka bul chet ah chuan Sir Mike-a chu a rawn thu nghal zat.




"Min lo chhuah san daih a, midang ah chuan kan ei rual tawh dawn a nia, chuchu hre reng la" a ti thum dut a, ka chhang lo, ka thiannu nen chuan kan ngawi ran a, nuam pawh ka ti tawh lo, eitur chu a order ve nghal a, customer te lah chuan min rawn en huang huang hlawm a, hotel a thawk ve tho te phei chuan mit tla lek lovin min en hlawm tih ka hre reng, ngaihdan diklo tak an neih loh hram ka beisei, ka thawk thar ve chauh bawk si a, chuta karah Sir Mike-a hi chu an duh rawn mipa kha a ni miau a, hmelma neih ka peih hauh lo.




Ngawi reng in thil chu kan ei a, ka thiannu pawh chu a ngawi dak mai, keimah ang chiah in a tim tih ka hria, "Grace-i thiannu maw i nih a?" ka ei zawh dawn lamah chuan Sir Mike-a chu a rawn tawng chhuak hlawl a, "Aw ni e, ka hming chu Lalhmunsangi a nia" a lo ti vat, "Naktuk atang reception counter ah i thu tawh dawn a nia, i tan pawh a nuam zawk ang, I hlawh pawh a pung bawk ang" Sir Mike-a chuan a ti leh a, ka thiannu nen chuan mak ti zetin Sir lan chu kan en a.




"I duhlo em ni?" a ti leh takah chuan "Duh e, ka lawm lutuk" rang zetin Asangi chuan a ti a, a hlim hmel hle, keipawn ka lawmpui takzet a ni, thil kan ei zawh chuan a man pek na lamah kan kal a, Sir Mike-a chuan kan thian dun a kan ei man min pek sak vek, nuam chu ti chiah lo mahila a hnial theih loh, a thu duh lutuk hi chu a buaithlak a ni, pawn lama kan chhuah hnu chuan Sir Mike-a hnung ah kan thian dun chuan muangchang in kan kal a.




"Sir huan a duh chiang lutuk che, a awmdan ah hian ka hrethiam vek" ka beng bulah chuan a rawn phun sar sar a, "I ninawm sawi ve ziah suh, amah te hian a lo hria ange, min ban nghal a nimai" tiin ka kal chak zual pui sauh a, "Ka ti tak tak a nia aw, keipawh i thiannu ka ni tih a hriat ve leh min kai san tir nghal a nia, nangmah vang liau liau a tih theih ang chu" a tih leh chuan chhan pawh ka chhang peih tawh lo, hetiang thil a tih chhan hi keichuan ka hrethiam nghal vek.




"Hnathawh tur a la tam a nia, muangchang chi a nilo, hun hi a hlu" kan thian dun chuan kan kal muang a ti deuh a niang, rawn hawi let in a ti deuh hmuk a, a kal zawm lehnghal zat bawk, keini pawh chuan kan um zui nghal dawr dawr a, "Banah min lo nghak leh rawh aw" Ka tih hnuah ka kalsawn a, Sir Mike-a chu a office kan pan in a kal daih tawh thung, office chhunga ka luh rual chuan vang chu ka ngheng deuh dawt a, thil kha a thleng rang lutuk a, au pawh ka au hman lo, phawk zetin Sir Mike-a chu ka en ringawt.




"Engvanga min chhuah san nge i nih?" lungawi loh hmel zet chuan a ti a, "Ka thiannu khan min nghak bawk sia, ka hmanhmawh alawm, bakah khatiang hmun ah khan thim ei duh ka ring lova" ka ti nghal zung zung a, "Nimin khan ka sa i chiang viau a nilawm ni, engpawh nise naktuk atang chuan kan ei rual ziah tawh ang, ka thu i awih lo a nih chuan i hlawh ka cut tawh ang" tiin a thutna lamah chuan a kal a, rum taka en zui bak tih theih ka nei silo, ngam ngat ila chuan a tukhum ah sawn ka beng pawl ngei ang.




Ban hma deuh chuan ka phone a rawn ri a, ka laklawh em avangin ka chhang lo, ka tih zawh hnuah ka call back mai ang ka ti ta ngawt a, ka thil buaipui lai ka zawh chuan ka phone chu ka en a, miss call vawithum lai a lo awm tawh, chupawh Asangi nu hnen atangin, ka call back chiah tih chuan Sir Mike-a office kawngka a rawn ri ve chiah a, hlauhthawn hmel zetin Asangi chu a rawn lut nghal, ka phone keng chung chuan Asangi chu ka lo en heu a.




"Sir min lo hrethiam la Grace-i hnenah hian thu pawimawh tak sawi tur ka nei a" tiin keichu min rawn en a, "Nichin khan i u nikhaw hre lovin ka nu in a hmu a, tunah damdawi inah an awm mek, phone i la thei silo a, ka nu in chanchin min rawn hrilh a" a tih chuan ka tho nghal vat a, ka hlauthawng takzet, "Kal ve nghal ang, ih.. englo" ka hlauthawng lutuk chu sawi tur ber pawh ka hrelo, ka bag chu ka ban tawp a, chutia ka chet buai vek lai chuan Sir Mike-a chu engtik laiin nge ka bul a rawn thlen hman pawh ka hrelo.




Ka banah chuan a rawn man a, "Hahdam rawh, engkim a tha vek ang" tiin ka bag chu min rawn laksak a, "Ih.. ka haw hma thei angem?" tiin ka en a, "Awle, a tha alawm, keipawn ka rawn zui ang che u" a tih leh pawh chuan hnial nachang ka hrelo, office atang chuan kan in zui chhuak a, parking lot a kan lut hnuah "I thiannu hi chu ka rual in rawn kal mai rawh se" Asangi hnenah chuan a ti a, a motor dah na ni nei tur lamah chuan min kalpui a, ka bag pawh a la khai reng bawk.




Damdawi in kan thleng a, ka u awmna lam chu kan pan mek, "Ka u chu a tha em?" Nu Mapuii (Asangi nu) ka hmuh rual chuan ka ti a, "Aw.. a la harh lova, engkim a tha vek tawh e, hlauthawng suh, a lung ṭhalo a chhuak leh a, thu thin thawng tak hriat a tan a ṭhalo tih Doctor in a sawi a, a rilru ah ngaihtuah a nei tam bawk nen khatiang khan a awm phah a lo nia, awm hahdam deuh se engkim a tha leh vat mai ang" a tih takah chuan ka thawveng deuh huai mai.




"Nu heihi kan thawh naa kan pu ber a nih hi" tiin Asangi chuan Nu Mapuii hnenah Sir Mike-a chu a in hmelhriat tir a, a awm ve tih ka lo hre leh tawh reng reng lo, ka u kut chu vuan in ka en reng a, min kalsan mai ang tih ka hlau takzet a ni, thisen a in zawmna neilo mahila ka in nghah na leh ka chhungkaw neihchhun tak meuh meuh a ni a, min kalsan thei lo, a hma kha chuan in sawisel na pawh a nei ngai miah lo kha ania, tun kum hnih thum chhung lek hian hetiang khawp hian a hrisel na a chhe te hi hriatthiam har ka ti thin.




"Buaina in neih chuan min rawn hrilh thuai ula, hnathawh na lamah buai na a awm deuh a nih hmel a, ka va let lawk ange" Sir Mike-a chuan a ti sup a, "Awle, ka lawm lutuk a nia" ka lo ti ve sep a, "Grace pawn thleng in Boss kha va thlah rawh, kei ka awm tho a, Asangi pawh a rawn let ve tep tawh ang" Nu Mapuii chuan a ti a, hnial ka hreh bawk si, helai thleng ka u vangin a rawn kal ve bawk nen thlah chu ka tihtur ve reng ah ngaiin pawn lamah chuan kan in zui chhuak a.




"Helai thleng hi a nimai, chuan i u chu a dam leh thuai ka beisei, harsat na i neih chuan min rawn hrilh vat dawn nia" a kal hma chuan a ti a, "Awle, ka lawm e" ka lo ti nawn leh sep, a in khalh chhuak lai chu ka en liam hnuah hospital chhungah chuan ka lut leh a, "In Boss chu a fel kha, Asangi'n min lo hrilh a, a ni pawh a kaisan tir a ni awm a, in vannei hle mai" Nu Mapuii chuan a ti a, ka rilru in Sir Mike-a chu ka ngaihtuah reng a, ka rin ang em em chuan a lo sual lo a nih hi.




Asangi pawh a rawn let leh tawh a, "In duh chuan va ha erawh rawh u, chuan Nu Mapui ka lawm lutuk a nia a, nang awm lo la chu ka u chungah hian enge thleng dawn ka hrethiam lo" ka tih chuan "Akhai khatiang an sawi ngailo, nangni te chu ka fanu alawm in nih, ka tihtur ve reng ka ti a nihkha, lawmthu sawi a ngai miah lo a nia, chuna naktuk lamah ka lo kal leh anga, I u chu keiman ka lo awmpui dawn a nia" a tih chuan ka lo bu nghat nghat a.




A tuk lamah chuan hma takah Asangi te nufa chu an rawn lang a, Asangi'n ka thawmhnaw hak thlak tur min rawn ken sak thlap bawk, a la hma bawk nen ka in bual leh te te a, ka u pawh a harh tawh a, ngaihtuah awm a ni tawh lo, "Rilru hahdam deuh in hma chu va thawk rawh, keimah ka awm dawn tih kha hre reng la" Nu Mapuii chuan a ti a, "Ka lawm lutuk a nia, nang i lo awm hlauh hi chu kan unau tan vanneih na a ni" ka ti a, ka chhuah hma chuan ka u muhil lai chu ka en nawn leh hram.




Hotel kan thleng a, Sir Mike-a office chhung a ka luh chuan hmuh tur a la awm lo, vawin chu ka hma ve hrim hrim bawk, Sir Mike-a dawhkan lamah chuan ka kal a, file vel a lo awm hnawk nuai mai, ka dah that sak mawlh mawlh a, ka zawh hnu deuh lawk ah a rawn thleng chawpchilh ve nghal mai bawk, ka lo wish vat a, nimin lamah khan min ṭanpui nasaa bawk nen a lakah that chhuah ka tum ve tawh hle, amah vangin ka u pawh cabin ah a awm theih phah kha a nia.




"Hetah lo kal teh" laptop ka en lai chuan a ti a, a dawhkan hmaah chuan ka va ding vat, "Heihi em rawh" a tih chuan ka en vat a, lehkha pakhat hi a ni a, ka hrethiam lo hle, "Heihi enge awmzia?" ka tih chuan "Khakha laptop ah lo chhu lut rawh, tun kar chhung kan mikhual neih tawh te an nih kha" a ti a, ka bu zeuh, "Awle" tia kalsawn mai ka tum chu min ko ding leh rih a, a ngawih leh tak reng ah chuan hrethiam lo zetin Sir Mike-a chu ka en a, nui suk in a chair nghen chhan chu a ngheng ar ar a.




"I u chu enge a an?" a tih sup chuan "A tha tawh e, tlai lamah khan a rawn harh a, vawin lam pawh a a harh tha khawp mai" ka ti a, "A tha a nihchu, chuan thil pakhat kan sawi dun dawn em ni?" a tih leh chuan "Engmaw?" ka ti haw a, "Ka hmeichhia nih chu ni mai rawh" a ti a, ka thaw hap, a hma khan ka sawi chiang tawh hle si a, "Sir ka sawi tawh kha, kan in kar ah khatiang thil kha lo thleng tawh mahse thlen nawn tir leh tumna ka nei tawh lo, hmeichhe dang tamtak i hmeichhia nih chak an tam alawm, keichuan ka duh lo, min hrethiam dawn nia" ka ti a.




"I chiang amaw, I u khan enkawl a la ngai dawn chauh, i hlawh hmang ringawt hian i enkawl zo dawn lo tih chu kei ang bawk in i hrechiang, ka hmeichhia ni la i mamawh engkim, I u enkawl na tur nen lam ka tum sak ang che, chuchu a tha viau lo em ni?" a ti leh, "Nilo e, ka u chu keimah ngeiin ka enkawl ang, ni e, tuna ka hlawh hmang chauh hi chuan ka enkawl thei dawnlo, mahse khatiang thil kha chu tih nawn leh tum na ka neilo, min hrethiam dawn nia" ka ti leh a.




"Ka sawi chu i hria tiraw, ka thu anga i awm lo a nih chuan i u hian a tuar ang, amah vanga khatiang thil ti i ni tih kha hre ta se engtinge a awm i rin?" tiin a nui suk a, huat na nen ka melh ngawt ngawt, hepa hi mihring pawh a nilo, ramhuai a nih hi, ka u natna a hrechiang tih pawh ka hria, ka u hian thu thin thawng lutuk a hria a nih chuan a nun na pawh in a tuar hial thei tih hepa hian a hrechiang lutuk, mahse a duh a neih theih na a nih phawt chuan engmah tih hreh a lo neilo a nih hi.




"Engthil nge ka lak atang hian i duh chiah, ngatinge hetiang hian min tih tlat a?" ka ti ta thlawt a, "Ka duh chu i hrechiang alawm" tiin ka chhip atanga ka ke ler thleng chuan a en chhuak dap a, "Aih ka duh lo ka tihkha, nawhchi zuar ka nilo a nia" ka sawi zawh rual rual chuan a nui ri suk a, a chhan ka hrechiang hle bawk, hepa lakah hian ka thianghlim na ka hralh tawh miau alawm, hepa kher hi engvanga lo tawng nge maw ka nih le, ka nun a harsat tawh tehreng nen ani lah hian harsatna min thlen belh zel bawk si.

Cont...

Comment leh click kha aw, chuan ka sawi tawh ang khan zankhat danah zel ka dah dawn, Sunday chu ka awl thin hrim hrim tih in hriat vek bawk kha, zawmna te a ni ngawt loh chuan Pathian ni a nih angin ka serh ve thin aw...