STORYFB.COM

*OBEDA* CH-2






Atuk ka school kal pawh chu rilru kam run rengtu neih chuan class lak pawh aphûrawm loh khawp mai.Chawhnu leh chawhma ah class khat ve ve lak tur ka nei a,chawhma lam pawlsawnpakhat class ah chuan an test paper ka sem ringawt a,an note neihsa ka thiam tir tawp ringawt.Chawhnu lam erawh note ka siam tir thung a,tihian note an insiam a,check sak leh thlap in a that chuan an mahni note siam ngei an ring thin.Tin zirlai an hriat that phah bawk a,Guide book ringa byheart tur pek tawp ai chuan an hlawkpui zawk phian mai.





"Matei, Obeda nen khan engtin chiah nge in in hriat?"U Joshua nen gate lam panin kan inzui chho leh hnak hnak tawh.


"Hria pawh ani chiahlo"ka ti nawi nak ringawt a,kan nu leh pa ten min suihzawm an tum tih hi ka hrilh ve tawp mai dawn em ni? Min nuihzat viau in ka ring.



"Keini aiin ala û hret zawk a,mahse vêng khatah awmin kohhran khatah kan lawi a,inlo inhre teh daih kha amak" nui chung hian a ti a,ka nui tawi tak tawh mai.




"U Joshua,vawin chu U Sawma te inah penkawi ka duh a.Taxi ka la mai ang" ka ti ta daih a,U Obeda chungchang min sawipui zel ka hlauh vang pakhat in ngam mah ilang min thlah turin ka sawm duhlo.
"Ava zialo e,vawin tlai berkher chu ka nu inentir lam kawi ka ngai a.Nilo se chuan ka va thlah zuai tur che nia"pawi tih hmel zetin a ti ve vawng vawng.Nau ang tak tak hian min en ve a,a fel ania.





Kawngpui ah kalphei deuhin Taxi stand ka va pawh a,U Joshua ruala ka haw theihloh châng chuan taxi hi ka hmang haw mai zel.

Ka û te in lam chu ka pan a,ka va thlen chuan ka û alo la haw thleng lehpek lo.Tunlai chu a hah thin viau in ka ring.Ahna nen an insak lai nen,kan puithei thin mang silo a,puih hman hi an chakawm asin aw.




"Naupang ho hi"Jordan bak ka hmuhloh vang chuan ka ti nghal thuai.Naupang an awmloh hi chuan an ina len hian a reh ruih zel.



"An sunday School zirtirtute'n châng zir turin an rawn lam tlat anih kha,an la nau deuh a tel tirloh kan duh viau laiin an rawn ti lui ve deuh tlat bawk sia.Keini kohhran hi indanna ala reilo tih takah naupang an ngah lo a,Sangsangi te unau pawh kha an rawn lam lui tlat a"U Zawni chuan alo ti nghal zung zung.

Jordan lo harh rual chuan ka lo pawm thuai a,"vawin tlai chu ka û biak ngei ngei ka duh sia,alo haw tlai deuh dawn chuan chaw ka lo ei mai aw"ka ti sap a,aw minlo pawh rang ngei mai.





"Thlen chu a rawn thleng har lo ang vawin chu,mahse lo ei hrim hrim rawh ilo ei khat tawh.Dîl sangha kan chhum hluah dawn nia,ka nau awmloh lai remchang chuh ve hi angai a,a awmlai hi chuan Sangha lam hi a ti theilo a eiluih pawh abuaithlak"a ti nak nak a,Sangha hi ka duh khawp a,dîl leh lui sangha phei hi chu ka duh zual.Phai lam atanga an rawn lakluh ang hi chu tui ti tho mah ilang dîl sangha te angin ka ei tui ngai lem chuanglo.U Zawni te pawh hian dîl sangha tharlam an hmeh dawn tum chuan chaw ei ah min sawm fo mai.






U Sawma te ina ka chaw eitur thu ka nu te ka hrilh hnu lawkah U Sawma ber chu alo haw leh zui a,ka tum ka thulh phah tawh chuanglo thung.





Zanriah pawh kan ei har hranlo khawp mai,nau nawi pathum nen kan ri ve nak nak a,chaw pawh kan ei rei khawp.Sangsangi te unau sangha then sak in ka pe a,anlo duh phian nen pakhat ve ve ang ngawt an unau in an ei ve nia!



"Û,inbe lawk ila" ka û bulah chuan thutak zetin ka ti a,naupang mut ala hun chiah silo an awmlai a sawi chu arem chiahlo ani.




"Enge ni a Mate?"a tih chuan U Zawni'n "Room lamah va inbe ru,hei naupang an bengchheng si"alo ti nghal thuai.Tlai ah khan ka û ka biak duh chhan ka hrilh zuai tawh a,ka thutak zia ahre tawh ka ti mai.



"Lo kal la" tiin an room ah kan inzui lut zui a,naupang pathum ngawt nen room khata awm an nih vang ani mahna an choka aiin an room azau daih zawk.





"I pasal neih tur chungchang vel kha ami?"a tih chuan "i hre tawh maw?"ka ti deuh hâ.




"Umm,ka pa'n min rawn râwn alawm"a ti zui sup a, ka pa nen an inbe tawh anih chuan han sawi nawi leh pawh a huphurhawm tawh ngei mai.
"Mate,inhmelhriat ngai miahlo in ni tih chu ka hrelo ani biklo.Mahse kan farnu neih chhun ini a,nuamsaka i lawiluh theihna hmun tur ani tih kan chian sa na hmuna thlahliam che chu kei chuan pawi la ti tawplo mai.Obeda pawh misual anilo a,an vengah phei chuan mi fak rawn ani a.Ani tluka makpa atan a tling zo an awm tawh kher chuanglo ang.A chhungte lah hrawn hrehawm tur an awm miahlo lehnghal a,sum leh pai lakluh lamah lah hna tha leh zahawm athawk bawk a,kei anni kuta hlan che chu ka ngaih angam khawp asin"ka tawng ve hma chuan a ti nghal charh charh a.






Ka rilru no chhuakin chutia ka inghahna ber in min ti chu "ka lam i tan ka beisei asin"ka ti deuh tuau.Ka tap mai mai ngailo a,ka nun ah harsatna ka la palhnem tawkloh vang ani mahna.Tuntum erawh ka din na hmunin a zirlo em a,ka innghahna berin ka lam tang zawnga thu asawi leh silo chu ka tah achhuak ve ngei mai.


"Akhaih! Mate,nula puitling inih tawh kha.Rilru an ti no viau ngailo"a ti deuh hluai a,ka hnungzâng ah achûl pah zat bawk.






"Û, hmangaihna tello chuan rei kan daih i ring em ni? Tunah ka pasal tura in tih lah chu a hmingpum takngial pawh midang ka atanga hrechawp zel ka nia.A chanchin engkim midang kâ atang vek ka hria a" ka ti chhuak sap a,ka tap bik em lo e.

"Mate,kum tam inngaizawnga innei te hi nupa hlim ber an ni kher chuang hleinem,inneih hlenna pawh ani heklo.Obeda nen pawh hian in inrem chho phian maithei asin" a ti chhuak halh a,thaw chhuak ham hamin "nei tur a ka suh chhan che ala awm a" a ti zuai ta raih.





"Engvang maw?" Ka ti deuh hâ.






"Ka pa hi ahrisel na lam a tla hniam riau tih i hre ve em?" A tih chuan ka lu kalo thing rang ngei mai.

"Tunkum chho hi a insawisel chho leh riau tawh a,inkhata kan chen ho loh vang nge ka hmuh te hian ka hmuh hnuhnun ber aiin ka hmu tar thar riau zel.Natna anei e chu ka tilo a mahse rilru hahna neiin chuchuan a taksa a ti chaklo tel ah keichuan ka ngai a.Chuvanga ka pa'n i pasal neih chungchang a rawn sawi pawh khan hnial thuai lo ka ni,chutah i pasal atana athlan lah mitha lutuk ani tih ka hre zawm nen min rawn hrilh khan aphûr lutuk a,khatiang khan tunhnai ah nung sarh a athusawi ka la hrelo! Zira lah hian ka nu leh pa te rilru a ti hah ve thin mai sia"






"Ka pa chuan damlohna anei em?"chubak a thusawi zingah khan ngaihthlak chian ka neilo.





"Aaa nei lo e,an upa ve tawh a fate vanga rilru hahin an taksa nghawng rual an ni tawh alawm.Thalai zawk pawh min nghawng na thin ania,anni kum ah phei chuan an taksa chak tawhlo nen anghawng nasa zual a" a tih chuan ka en vang vang a,dawt sawi hmel a pu lo tih ka hmuh rualin ka hahdam ve chauh.

Ka pa hi kum nga kalta vel khan chuapa tui tling tih te,mitliam vang te in damdawiin kan lut nasa a,kan ngaihtuah riau tawh tun thleng hian.uk leh hmuam ti miah silo hi mîtliam vang te'n damdawiin kan luhpui kha ania! Damlohna hi chu zuk leh hmuam tih vang chauh pawh hi alo nilo.





"Zira hi tunlai enge a dinhmun?"a tih chuan "engtia dinhmun? Atha viau in ka hria" ka lo ti nghal thuai.





"Ruihhlo temchhin châk rual ani tawh a,kan ram ah ruihhlo ahluar si,ka ngaihtuah deuh thin.Hmanni bazar ah ka tawk hlawl a! Min hmu ve ngei chung khan min hmulo der tlat a,khatianga a awm khan chhan aneih ka ring."nui chung hian a ti a,a za fahran lo thung.

"Chutiang te chu rawn sawi vat ta che" ka tih chuan anui leh mai a, "tiang nen a thunun rual ani tawh hleinem, han daipelh chang nei ve pawh nise ka nau ania,thunun tu leh zilhhau tu tha an awm phawt chuan sualin a chhuak bik lo ang"kan nau anih vang nge a ring ve hle tih ahriat."Lo zilh ve deuh tho la aw,i thu chu a awih em kha" a ti zui a, ka aw ve mai bawk.





Zira hian min ngaina bik riau a,angaihzawng neih hmasak ber tum pawhin kei chauh min hrilh nghe nghe.Ka awm tam a,alo pian ve khan nau awm rual ka ni ve chiah nen ka nu ai mahin kan inawm hnem zawk maithei a ani.Ka lênna ah lah min ngen tlat tum a awm a,ka hruai ve leh nge nge thin.






Ka û in dar riat velah min thlah haw a,U Zawni te nufa an mahni chauha kalsan rei a duhloh vangin a awm reilo viau.
Ka pa chu kan en thin a, ka û sawi tâk ah chuan tunkum chu atar ve bawih in ania ka hriat thar tak ni! Inchenchilh kan nih vang nge angai ang rengin kanlo hmu a,chîk chuan a hmel alo tar ve bawih tak mai!Kei leh Zira vang hian a rilru alo hah thin viau tak tak nge ni ang le? Anih vaih chuan ka inthiamlo viau ang.




Ngaihzawng hi nei ngailo ka ni biklo a,higher ka kal lai te chuan ka nei ve thin.Mahse college ka han rap chho a,ka pa anga mipa tha leh rinawm hi ka college kalpui te leh kalpui lemloh mipa te hrim hrim ah khan ka zawng ta tlat a.Ka pa anga min hmangaiha min dawhthei tu,ka unaupa te anga min duat thei tu kha ka zawng anih ber mai chu.Min rawn duh der ve tu te kha ka hmu tlinglo zel a! Tunthlengin ngaihzawng takngial pawh ka hmuzo ta lo anih ber hi maw! Ka thiannu pawhin min fiam fo a,'chhai ngam loh lanu' ti hian min sawi fo mai.
Ka indah sân vak ka hre lo a,mi hmuh ah chuan nula inchhuang leh ngaihzawn ngamloh hial khawpa inla ang te pawhin minlo hmu ani mahna,mi rin ai hian mipa betu te hi ka ngahlo ang.Min rawn bawh huam huam se ka tihna lam nilo in mî pawh ngamloh khawpin ka lo induh anih te ka ring a,ka nungchang pawh siamrem in mi biangbiak hmasak te pawh ka inzir nasat phah fo.Tunhnu ah erawh ngaihzawng neihloh a zalen deuh a khawsak mai mai hi nuam ka ti chho a,engah vak ka ngai tawh lemlo.








Ka ph ri vangin ka harh zawk a,dar khat chauh ala ni! Min rawn call tu lah chu Zira ala ni zui!
"Zir, ava la hma ve" ka ti nghal hap

"Û, kawngka min lo hawn"zawi sup hian a rawn ti a! Ka meng nghal kawk mai.




"Tunang hunah khawnge i chhuah chen chen a? Room ah khan lehkha izir reng e maw tih lai a?"ka ti chhuak nawk.





"Ka chhuak lawk a,minlo hawn" a tih chuan ph dahin inhnuai lamah ka chhuk a,thawm dim thei ang berin kawngkhar chu ka hawng.
"I rim chuh!"ka ti chiah chu tawng zawi turin min ti nghal mawlh mawlh.






A room ah zui lutin U Thanpuia te room leh a room a inhnaih lo bawk a "Zirsanglian,engvanga zu in nge inih?"ka ti chhuak nghal hlar.
Khumah a thu ngawi ngul a,inthlahrun hmel deuh hian min melh chho leh zuk thin.

"Zirsanglian"ka ti leh that.




"Ka thianten an in vek a" a tih chuan ka thaw chhuak hliai ringawt.





"Zira,i thiante pawhin in vek mahse i in ve kher angai hleinem.Thil sual ani tiih i hria ani lawm ni? Tinge ilo in ve kher kher ni aw? A reng reng in kan mut hnu ah i chhuak leh tihna ani maw?" Ka aw pawh a zawi deuh tawh.

"Min rawn ko lui tlat a,ka rilru alo hah ve tho nen intihthawven ka tum mai mai kha ania" a tih chuan ka thu thla ve a,dam deuh zawk hian "tinge i rilru chu ahah a?"ka ti ta sap.





"Ka nu leh pa te'n pasal i duhlo chung neih tir che an tum sia" a ti ta reuh a! Han sawi leh mai tur pawh ka hrelo.
"Û,i duhlo chung chuan nei lui suh."a ti leh sap.





"Ka duhlo hran hleinem"ka ti ta ringawt.Min melh zawk a, "tak tak maw?" A ti chhuak hliai.
"Umm,nu leh la thu awih chu dam rei na an tih kha.Dam rei chauh lo pawh malsawmna tam tak akeng tel alawm.Mipa fel deuh ania ka pasal tur chu" ka sawi atan chuan amak mah mah ani, mahse ka in ngaihtuah a,ka nu leh pa thu awih phawt chu atha ber in ka hre tawh.Ka tlin ta nganglo anih leh kan inlamah ka haw leh mai ang.Tunlai ah chuan nuthlawi te dinhmun pawh a tha tawh a,ka huphurh hranlo nuthlawi han nih pawh chu.
Pasal neih hma hauh atanga nuthlawi nih han ngaihtuah nghal mai chu hmabak a thim teh e.






"Fel deuhin awm tum tawh rawh aw Zira,kan te ber inia hetianga i awm fo chuan ka nu leh pa te rilru i ti hah dawn asin" ka ti a, "mu tawh rawh naktuk ah school kal i ngai dawn si"ka ti zui sap bawk.


"Ka nu leh pa te i hrilh dawn em?"hrilh lo se min tih hmel zetin min melh chho ran.





"Hrilh lo ang, an rilru tih hah ka duh hleinem.Mahse U Thanpuia emaw U Sawma chu ka hrilh tho ang aw,thilsual tih inthup pui hi atha lo a, anni talin an hriat chuan ka rilru pawh anuam deuh ang" ka ti nghal sa thlap.Thil sual tih inthup pui hian sual kan vulh liam deuh deuh a,tun tum erawh ka nu leh pa te rilru hah hlauh vangin ka hrilh lo anga.Zira tân athat zawk nan kan ûte erawh ka hrilh thung ang.Anni chu mipa te an nia,kei ai ngawt chuan Zira fuih dan leh zilh dan an thiam zawk ang.Hmeichhia hi chu kan rilru te no in khawngaih mai te hi kan chîng leh thin a,ka bulah Zira ano bik bawk nen ka û te chuan zilh se atha ber ang.Tin,thinrim in an hau pung pung dawnlo tih ka hriat chian vanga anni pawh hrilh tum chauh ka ni bawk.Tawngka vîn a inzilh hian kawngro a su ber lo tlat ani.




School kal tur a ka insiam mawlh mawlh laiin kan vice principal nupui aboral thu ka hria a,school chawlh ani nghal dawn bawk.Ka thawmhnaw thlak leh in kawr dum ha in puan dum ka bih zui a,mitthi in lama kal nghal law law chu a fuh berin ka ring.


U Joshua an min rawn lam dawn vangin sitting room ah ka lo nghak a,ka nu chawhmeh rêp inchunga apho zo rawn chhuk in chanchin min zawh chuan ka hrilh ve mawlh mawlh.Ka pa leh ka û erawh an hna kal hma in ka hrilh tawh thung.





Kan vice principal nupui hi kâl chhe tawh dialysis ti ngar ngar ania,thla dawn chu Civil Hospital ah an awm tawh ang.A teaching staff ang zawng pawhin kan va tlawh ve tawh nghe nghe.A pasal kan vice principal nibawk hi Sir Zama niin mi inngaitlawm deuh mai hi ania,kei pawhin ka thawh tirh a ka ngainat hmasak ber ani hial ang.An fate an puitling thuau tawh chungin an hmeichhe rual a,an lainatawm takzet.





Doorbell ri ka hriat chuan U Joshua nih tawh ringin ka tho thuai a,ka nu choka lama aw in kawngkhar min hawn khalh hman tho.





"Kimkimi rawn sawm ka tum a"U Joshua aw ani ta hauhlo!




"Hei,Mate Obeda hian rawn sawm che atum anih hi.Kalrual inlo tum elaw?" Ka nu pawh chu ahrilhhai hmel ve viau tho mai.
"Mitthi inah asin ka kal dawn" ka lo ti hap.





"Keipawh, i pa in a sawi a ka rawn sawm che"a tawi tha viau mai.




"Anih chu,in kal rual theih chuan athat hlauh chu.Mate Obeda hi zui ve mai rawh,i thlen tlai bik lutuk chuan amawilo ang.Obeda,Matei te thawhpui chu ilo hmelhriat reng reng ani maw?"ka nu chuan a ti zui a,awmdan tur ka hre derlo thung.
"College kan lut ho a,a fanu pakhat hi ka zirlai ani bawk a"tiin achhang ve mai a,ngawiteh U Lawmi khan U Obeda hi MZU ah professor anih thu a sawi tawh tak e.





"I hman chuan kal nghal mai ang" zui ve ngawt chu ka va hreh tak.U Joshua pawh chu ka ngei ta hlur mai.





Ka nu in min tur nasat em vang chuan ka zui ta tawp a,motor a ka luh atang U Joshua call ka tum nghal char char bawk.A la la thei miahlo zui chu ning zetin ka thaw hak mai.

"Tunge biak i tum?" A rawn ti dut a, ka phu teuh kher mai.




"U Joshua mawle,min rawn lam a tum a, arawn kal thlawn ka hlau"





"Kal thlawn lo ang" a ti sup!





"Enga?"ka ti deuh ha.




"In inpeng ah kan intawk a,lam ka tum che tih ka hrilh khan a tlang nghal" a tih chuan U Joshua ka ngei na chu a zual hlur.Min rawn lam tlang ve mai tur ania,ava ti awm ang lo tak.





Sir Zama te chu I.T.I ah daih an awm vangin kan tlan rei khawp a,ngawi rengin kan chuang bawk si nen ka muthlu lo chauh ani.
A hmun kan thlen rualin ka zirtirtu pui te bulah ka kalhrang nghal hmak.Ka thaw ve leh thei chauhin ka inhre hial bawk.

Inchhungah chuan ka thu lut ve nghal bawk a,zing lam dar ruk a boral ani a.Group ah ka lo lut lo nen ka lo hre tlai bik hle hi alo ni.Information group ami chauh kha kalo chhiar hrim hrim bawk a.






Sir Zamte a chu a inhru leh zeuh thin a,mipa tan pawh thihna hi chu ana in atawp chiang em a,a nupui ahmangaih a a enkawl nasat zia hriatpui tu kan ni bawk nen a mittui tla chuan tah a tu chhuak ve hial mai.
Ka rawmawl la chhuakin ka mittui tla chu ka hru ve leh zeuh thin a,ka tap khat viau na in hetiang hunah hi chuan insum har ka ti thin.Khawhar in te,mitthi in ka kal ve chang hian lusûn chhungte an tah hum hum tawh chuan ka mittui a lo tla ve hman ziah!







Vuina hun kan hmang zo a,keini pawhin thla lakpui in Sir Zama nupui hrechiang MadamTeremi phei chu a tap ve rawng rawng mai.An fate mawlh chu an puitling ka ti a,an tap a,an nu an sûn an pa an hnem pah bawk a! Tunlai thangthar zingah a hlimchhawn laia mahni pa te ngei han hnem thei chu an vâng ve tawh viau in ka ring.





"U Joshua,min kalsan daih a!"Thlanmual atanga kan let leh chuan U Joshua ka chhuahchhal hmasa ber.




"Obeda khan rawn hruai tum hek che,bakah chance ka pe ve cheu a"nui heu a a tih chuan ka melh kawk! "Mak ti viau lo teh,I u Sawma'n min hrilh vek tawh alawm.Mahse nakin ah thil pawimawh deuh sawipui tur che ka nei" a ti zui mauh mai.

"I rualin ka haw duh ania"a engamah hma chuan kan ti ngawt pek.





"Aaa Mate, Obeda ruala i haw leh ringin haw na tur neilo Miss Zuali phurh haw ka lo tum tawh asin.Kal lam pawh taxi in akal a" a tih chuan ka ngei ngei mai.Han hauh chiam na tur ani bawk silo.Ka rilru te te in 'taxi ka la mai ang' ka ti ta ringawt.Mahse U Joshua chuan "Obeda,Matei hi i phur haw leh ang chu tiraw?"ka hnunglam melhin a ti ta hluai a,ka hawi let nak chuan U Obeda alo ding reng!

Alo bu nghauh ringawt nge ni U Joshua chuan inchhung min luhsan ta daih!





"Taxi pawn ka haw..." Ka tih laiin "kan inlamah zanriah i rawn kil tur thu i hrelo em ni?"a ti sup.


"Keimah in maw?"ka ti deuh ha a,ala bu nghut zui."ka hre lo reng reng"ka ti chhuak hluai, ka duhlo hrim hrim."I pa'n a hrilh theihnghilh che anih ka ring,ka chhungte'n anlo nghak reng tawh ang che" a ti zui a,"chutiang ngawt chu.."ka ti nang nang.





"Zanriah ei pangai ani mai" awlsam zeta tiin "zuk lut ila,kan haw tur thu hrilh phawt ang" tiin inchhung lam ala pan daih zui a,ka thu lo thin viau mai kei zawng.





"Thianpa,chhel takin aw"U Obeda chuan adar a hmer vang vangin Sir Zama hnenah chuan a ti a, "Professor,i lo kal ve a kan lawm lutuk"Sir Zama fanu zawk chuan alo ti var thung.
"Sir, kei pawh ka let tawh phawt mai ang aw"ka ti ve zui a, Sir Zama chuan kan tel ve avanga lawmthu sawi supin tawngchhuah pangai ala harsat viau mai.
Miriami zawk chuan "Miss Kimkim,ka pa inrawn tawiawm a kan lawm lutuk ania"alo ti leh var thung.Nula fel zet hi ania,anu kan tlawh tum pawh khan alo awmpui nghe nghe,a zuan zang in apuitling khawp.






"Kan in lamah kan haw hmasa phawt dawn lo ami?"Durtlang lam min phur chho daih chu ka hawihai khawp mai.

"A tlai tawh deuh hlek a,hrehawm iti viau em?" Lehlawi si chuan,an in ah chaw ei dawnlo ilang hrehawm ka tilo chu ani mai.





An in kan thleng chu alo pui hem hem khawp mai! An kawtah chuan pangpar nge thlai an phun fur a,khua a thim tan tawh nen ka hmu chiang theilo.An veranda ringawt pawh chu zau tham tak ani.An hausa tih chu ka hria a,ti khawp hian an hausa tih erawh ka hre miahlo.


Inchhung kan lut chu anu leh pa ten minlo chhawn a, "Kan fanu chuan kan in min rawn hmuhpui ve ta nge nge alawm"Pa Hruaia chuan zâng vah hian alo ti a,pa ngainat awmloh zawk zawk chu ani miahlo.





"Mate...inu te koh danin kan ko ve mai ang che aw? I pa Hruaia hi chu i hre sa anga,kei hi Obeda nu Mapuii ka nia,chuan anaute pahnih hi lawk aw Judy,in unau khan rawn phei teh u" a ti nghal lang lang.
Choma atang hian nula pahnih an rawn phei a,pakhat zawk chu ka hriat hnu ang ka ti khawp.Min la nuih vur vur zui a!





"Hei i û nupui tur Matei anih hi"ka chhing sawk mai.




"Kan fanu upa zawk Judithi Lalremruati anih hi"Nu Mapuii chuan tiin alian zawk nen chuan kan in chibai nghal zat.
"Chuan apang ber.." "Nu, kan inhria alawm Higher ah khan min zirtir hman"a nau in alo tuh chuan "Ehe! Judy kha tiraw?"ka ti chhuak ve hliai,anui hak hak a,abu nghauh nghauh bawk."I nula ta reuh nge ni i dang ta hle mai! Atha zawng in ania ka tih"ka tawngkam hman diklo deuh chu ka siam tha nghal zat.
Judy te chu ka hre chiang khawp mai,tuna ka thawhna school ah hian lut ve in ka zirtir hman alawm.Naupang tam tak kar ah ka hruat chian chat chhan pawh Vitiligo kan tih mai vun natna ang kha anei a,ahmai ah chuan neilo mahse aban leh ke velah khan anei a.Naupang dang thenkhatin an lo chhaih nawmnah thih kha ania,ka chhan a a chhaih tu te ka hrem tawh bawk.Amah ngei pawh hi ka kawm fâl tawh bawk a,alo nula ta hle mai.






"Keichuan ka hre sa che a,ilo kal hun kalo nghakhlel teh mai ania"A ti ve hluai a,a chhungte'n an nuih hak hak mai.An duat ve viau in ka ring.




Thukhawmuang lo in zanriah kan kil nghal a,an siam tui bawk a puar khawp chuan ka ei ve leh mai tho bawk a.Ka vannei a,ka tlângnel loh na ah pawh zakzum hle si hi puar khawpin ka ei ve leh thei mai zel.





"Matei, ei teuh rawh aw.I Puar lo anih chuan i pa ka ngam dawn miahlo ania"Pa hruaia chuan a ti fiamthu a,ka lo nuihpui ve sak sak tho.Pa fuamthu duhtak chu ani ngei ang.

Ka hriat tak chu Pa Hruaia te chhungkua ah hian U Obeda zia hi a dang hlawk tih! A naute pahnih an tawngduhin min be siam siam reng a,Pa Hruaia leh Nu Mapuii lah chuti bawk.An fapa ber hi chu biak pawhin tlar khata chhang zel ang kha! Professor te chu ala ni leh ta nghal a!







Kan thutkhawmuan leh hnu ah puan te nen ka la inbih tup vangin U Obeda bawk chuan min thlah leh a,Nu Mapuii te ho chuan tlawh fo turin min ti lawm lawm.


Leitan pelhthlak ah Motor a ti ding dut a,ka ti nghal hra mai.




"Tinge i din thut a?"






"Inbe lawk ang aw"a ti dam thlup mai.Ni e,inbiak chu kan mamawh khawp mai.






"Min nei duh em?"a tih chuan chhang lo in "Min nei duh zawk em?"ka lo ti let kauh.






"Ka zawh na zawhna bawkin min chhanglet lo la"a ti damthlup a,"sawi rawh le,min nei duh em?"a ti nawn leh sup.


"Thudik ka hrilh ang che aw"ka ti hmasa te te a,alo bu ve nghut.
"Ka duhdan in engkim thleng dawn se chuan ka neilo ang che"ka ti a,a hmel ah danglamna pawh anei chuanglo."Min chhân ve hun"ka ti erawh akiai suk thung.






"Neih che chu ka duh alawm" a tih chuan ka melh deuh haw a "engvangin?"ka ti fak.Mipa lerh ru deuh te hi alo ni reu reu ange.






"Ka nu leh pa te hlimna ka thlen dawn a,ka nauten an ngaina viau bawk che a.Mo leh nupui tha tak inih ka ring bawk a,chutih rualin nupui nei rual ka ni ve tawh takzet bawk nen, tichuan i zawhna ka chhâng em?"a ti nghet churh a,"kan in ang chiah"ka lo ti sap.


"Tunah hian ka duhdan in engkim thleng dawn ta se, ka nu leh pa te hlimin inu leh pa te hlim bawk se,in nei chuanglo ila tih chu ka duhthusam ani.Mahse,ka pa te thu awihlo nih ka duhlo a,an lungngaihna siam sak tu nih ka duhloh vangin nang neih che hi pawi ka ti tawhlo" a tawplam chuan a zuai ngawih ngawih in ka ring.






"Kan nu leh pa te tan ti ila,i zalenna erawh ka dal lo ang tih ka tiam thung che.Kan chhungkua leh kei min ti hmingchhe zawng i awmloh phawt chuan i nuam tih zawng apiang i ti dawn nia.Ka pa hi Cancer treatment la lai ani a,hrisel tha pangai nise i dinhmun ngaihtuah in ka hnial ngei ang,mahse a rem hrih ngang lo ani."a ti ve duah a,huat awm in engmah a sawi miahlo bawk.A tawngkam chhuak tinreng chu a dam dap.

"Chuan...Palai kan rawn tirh a rem em?" A ti leh sup a,"in rawn tir dawn nia" ka ti ve ta nge nge.







Ngawi rengin kan inlam kan pan zui a,inchhungah reilo te tak tak a rawn thu khawmuang a,a haw leh nghal mai bawk.
Ka pa in ka kalna chanchin chu phur zetin min zawt a,ka nu pawh abang chuanglo.An hmel nung sarh ka hmuh chuan U Obeda ka nei tur chu ka rilru pawh a sak lutuk tawh biklo.Nu leh pa hlim hmel nung sarh hmuh hi alo nuam ngei mai.













#An la kal zung zung thei hrih tlatlo a,lo la dawh hram hram ulang aw.Fb lamah comment kha min hnutchhiah sak ve zel ula,zirna lamah ka buai deuh nen comment te ka la en hman lo a,ka hman veleh ka rawn en nghal zar zar ang aw.

Ads click kha theihnghilh awih loh
Show post links
Top