THINGTLANG MISTIRI LEH KEI S2 BY KENNELLY BAWITLUNG (Completed)

[ngaia]

THINGTLANG MISTIRI LEH KEI


BUNG-12 NA
ZIAKTU: KENNELLY BAWITLUNG



Zanriah ei khamah Thanpuii-te inah kan nupa in kan leng phei a, chutah Vivi-a lo awm ve hlauhvin, "Vivi-a hi lawm i thik em em chu," tia ka hrilh zeuh chuan atthlak intih hmel fe hian a ner nang a. Ka sawi reng kha tih melhin ka lo melh thung.




Vivi-a lahin thlalakah alo hmu tawh bawka Ramdina chu pa a tih thu mawlh min hrilh ru a, an starte bula tleirawl ho zak zum deuh ang hian a awm reuhva, amah chu nilo se ka ten reuh ngawt ang.
"Tinge Pialrala alo kal ve emaw ka tia?" Thanpuii'n a tih deuh hu chuan, "Nia lângin alawm alo kal, tlai chaw ei khamah a haw leh nghal. Kan inah tak phei chuan a rawnin nghat ve lo, a Patea te inah a inghat a, rawn tlawh ve eih tur che ania tiraw..?" Ka tihchuan min melh nghal ram ram a.




"Sawilo mai teh ka hmuh leh hun chuan ka hau hrep ang," alo ti hlar a, mipa dang bula alo sawi dan kha a lungawi thlak loh ve bawk dawn em a tin ni. Nula a pumpa zawnglai lehnghal biak ṭhat ve deuh te bula bialpa hluite'n, "A kephah a hlai si pheikhawk a bun uih hmel," intih chu tu hmeichhia mah an lungawi tawp lovang. Keipawh ni ila ka sa viau ang le.




"Hey Lalthanpui, i ṭhianpa ziai zuai sawn min melh singkhaw a nia ka duh miah lo," tiin Ramdina lo phei chuan Thanpuii bulah a rawn ti ru sur sur a.
"Engtin nge alo melh singkhaw che a i pa lo em mai," nui pat pat chungin Thanpuii chuan alo ti mai a. Ka bula rawn ṭhutthlak pah chuan, "Thla a ti muanglo," a rawn ti sup a, ka nui chhuak hawk lo chauh ani. An inkawm theih viau ka lo ring a nia, ka ring sual chhia va ani.




"Awi min phei san daih a kawm tur pawh ka nei hleinem...," tiin Vivi-a chu a rawn kal phei nghal zaw zaw a, chuveleh Ramdina chuan, "Saw saw saw alo phei leh tawh," tiin a ding hluai a, "Ka zung dawn," tih leh bathroom lampan a pen phei pawk pawk a rual nghal zat. Vivi-a chu lo thleng phei ve chiahin Ramdina hmanhmawh zeta bathroom lampan chu en zui vang vang pah hian, "In pa mawng khal zia saw," tiin a nui hak mai.




Ramdinan a pehhel nasat ve tehreng nen pakhata lah chu a ṭhu rem ang sauh sauhva. Bathroom aṭanga alo chhuakin
ka sira Vivi-a ṭhu a rawn hmuh chuan min rawn melh rang kher mai. Ka sirah a ṭhu daih sia Vivi-a bul chiah chu ṭhutna awl a awm tawh. Hreh hmel zet hian a rawn ṭhu thla ve ta thova, "Thanthani'n sa i kah ṭhin thu te min lo hrilh tawh a, engzat vel nge i kah tawh ang?" Ṭhuthnaih sat sat paha Vivi-a'n atih chuan tlema tawlh hnun deuh hrut pah hian, "Kap ve nial nual tawh," rang fahran hian alo ti a.




"Awi silai i han hawl chhuak tur vel ka mitthla hian i pa ngawih ngawih, Rokhumi vanneih zia hi nang ang mipa hi alawm mipa, nang aia pa hi chu an awm leh thei tawh chuang lovang ka mitah hian," tia Ramdina ban puar laia ben ṭawlh pahin no zetin Vivi-a chu a nui nghal har har a. Ramdina chu ner nang chunga nui lui tih hriat tak hian, 'Min chhan rawh,' tih melh tak hian a nia min rawn melh tawh ni. Tihian ral khat aṭanga alo thik ve em em pa hian han chimbuai ve reng reng teh se, a mengphar awn awn te pawh hi mit ti tlei tham a tling ve tlat alawm.




"I ṭhian kawmte hian min ti chau, ka ṭhu mai mai pawh ka ṭang nasa lutuk attention atin ka ṭhu tluan zak. Nang lahin pui ta nge pawh ti lovin a sirah i lo khi ṭhaw reng a," tiin mut dawnah chuan a phun zui ta hluk hluk a. Nui kar kar chungchuan ka mu lut a, "I ho mai mai reuh e a. Vivi-a te ang lo hlauh, i man tawk lo anih chu," ngai ho ang reng tak chuan ka tih liam san mai a. Min han melh ni fahran loh khawp mai.




"A kutte kha hmeichhe kut ang maiin a nem thep reuhva ka ngaihtuah zawng ringawt pawh hian ka la mur chhuak chum chum thei," tiin ngaihtuah let ni awm hrim hian a in thing deuh nawk a. A rap ve ngang ni tur a ni a sawi zing em mai.




"Ka khawih chang che pawha mur ngai hleilo i diklo deuh zawk a ni lo maw?" Tia thutak hmel ang reng deuhva ka fiam chuan ka hnarah a rawn piai tawk a. "I hre ngawt lo, nangpui hi i nghal sawt riau mai tu hi nge maw i chhun le?" A tih rual chuan, "Ele, nangmah...an bula kan awm tam te apiang mizia kan la tih i lo la hre ve nange?" Ka ti let khauhva, ner deuh sawkin ka hnarah bawk chuan a rawn piai leh.




"Ka khaui nuai dawn che a maw'n le.." ti seh chilh rapin a hmui hnuailam chu a pet zeuhva. Ramdina nen kan inneih hnua ka mize danglam ta hret hret te hi kei ngei pawhin ka hai lo, a hmaa ka lo nundan ai chuan tuna ka nundan hi a let tam takin nuam ka ti zawk a, engmah han duh belh leh emaw, thlak danglam duh ka nei hek lo. Ka neih hi a hlu em a, eng dang mahin ka thleng palh tawh lovang.




"Khawimaw i ke chu a vung leh deuh anih hi," tia ka ke a rawn thlek chuan, "Ka kal nasat deuh chuan a vung zual ṭhin a...a kham ngut ngut mai," ka lo ti nghal nang nang a. Engmah sawilo chuan bathroom-ah min luh san daih a, min hmeh sak ka lo phut ruk ve tehreng nen tum vuau chungin thei leh theilo hian ka ke chu ka hmet deuh chawt chawt a.




Reivaklo hnuah bathroom-a chawhtawlh lian vaklo chuan tuilum hi a rawn chawi phei a, "Lo nghak lawk rawh," tiin pindan aṭang chuan a chhuak leh nghal vut a, khum aṭang chuan a che vel chu bangbo zet hian ka lo en reng ringawt. A




Rei rial lovin alo let leh a, eng emaw hi a kutphah chuan humin eng nge ni ang ti rilru chunga ka lo en reng laiin a tuilum lakah chuan chi hi a rawn phul a. A kuta chawk rualin, "Khawi i ke kha," tiin ka ke chu a rawn ban a, khum mawnglamah chuan tawlh thlain ka ke chu tuiluma min chiah sakin a hmet pah a, ka rinloh leh beiseilo deuhva a chet avang chuan nui sen sen chungin ka en reng ringawt.




"Engtin nge tuiluma chiah a ṭha tihte ilo hriat ve a?" Ka tihchuan min en lem lo hian, "Youtube-ah ka en," alo ti mai a.
"Hetia min tih sak theihnan hian a mi i en?" Ka tih leh pawh chuan, "Nih loh ten tu tan nge ni chuang ang?" Alo ti let khauhva, nuam duh mai mai tak a ni. Ka chawn thleng chuan min hmeh sak a, ka dam nghal sawng sawng thei.


"Ramdin,"


"Umm,"


"Hmangaihna hi eng nge?" tia ka zawh chuan min lo melh chho nghal vat a, keiin ka melh chhuk ve ran thung. Min en vang vang a, thu ril leh tehfung ṭha tak nen min chhang dawn emaw ka tih laiin, "Hengte hi hmangaihna chu anih hi," tiin ka ke a hmeh lai chu a lek kang zeuhva, ka down nghal rawih rawih.




"Naa...mawh fiamthu lovin eng nge hmangaihna hi han sawi fiah teh?" Tiin ka ke chu ka leng deuh bat a, chuvang chuan tui chu per chhuak deuh ṭhatin a hmaiah pawh chuan a kai nghe nghe...
"Tuna ka thinrim khumlo che pawh hi ka hmangaih vang che tho," tiin a ban chuan rem leh remlo hian a hmai tuiin a per huh lai chu a hru thuak a. Aa...kan heti leh tlat tawh! Engmah hi thutak deuh pawhin a sawipui ve theihloh hepa hi chu.




Rei tawk fang min hmeh sak hnuah min hruk hul sak leh tlapin a ti fel zung zung a. A rawn mut luh hma chuan lukham chuang pakhat chu ka ke nghah chhan turin a rawn dah a, ka ke kham leh na ngut ngut te chu lakbo ang huai mai ani.
Mut pawh a chhuak nghal chiai chiai tawh mai alawm.




"A dam nghal sawng sawng mai ka lawm e aw," tiin alo mut luh rual chuan lawm thu ka lo hrilh ve luam a. "A hreawm dawn nen ka lo duat tawk ṭhin lo che a, zantin ka hmeh sak ṭhin tawh ang che," lo ti deuh ngeiin a thutak vei phian a, ni e thil nuam tak zawng chu a nilo chiang alawm. Mahse min hriat sak a, hetiang tih nachang tal te a hriat chuan engdang mah phut ka nei tawh lo.




Nihnih kan cham leh hnuah keini nupa pawh haw turin kan in tintuah ṭan a, ka nau puan lei vel te kha khung ṭhain dawr thil tepawh kan khung fel tawh a.
Ramdina pawn a Mistiri bungraw ṭhenkhat a lei ve a, Ramdinan motor a rawn keng tho bawka tukṭhuan ei khamah muangmara chhuah kan tum a ni.



"Remchangah inkhuaah te chuan la rawn zin ve tur a ni," Kimtei'n a tihchuan lo zin ve ngei ngei turin ka chah a. Kan inkawm laklawh laiin phone call a dawn avang chuang inchunglamah min chhoh san a, ka pa leh Ramdina te pawhin an tih fo ṭhin angin ram chungchang bawk thupuiah an lo nei leh tawh a, eng em em hi nge maw an sawi ṭhin le ka ti?




"Hei dar 9 a pel mai dawn muangchangin kan tlan dawn bawk sia tuna kam chhuah mai loh chuan kan thleng tlai lutuk palh ang nge," Ramdina'n a rawn tih takah chuan ka pa pawhin alo pawmpui khawp a.
"Lo in enkawl ṭha ula, i nu leh pute pawh Pathian zarah lo dam ṭha zel rawh se. Intlawh theih hunna ṭha tepawh ala her chhuak ve mahna," ka nu chuan alo ti dap dap a.




"Inchungah motor chabi ka han la lawk ang nge," tiin Ramdina chu kailawnah a pen chho tharh tharh a. Bungrua kan inhlang fel vek tawh a, mahni motor a kal tur tho kan ni bawk nen ka awm hmun kawr nen tlawng chuan ka ni mai.




"Khua in ti har reuh dawn mang e, hei ai hian han in awm hnaih thei ila ṭha tur mawle. Intlawhpawh pawh a awlsam ve deuh tur a nia," ka nu chuan a ti leh ṭhin a, kei anglo takin mi lungleng thei deuh mai hi a nia. Hei kan haw tur pawh min chelh ngam tawh chiah si lovin a phun a phun leh tawh hi.




"Kan dam anga Pathian zarah kan la in hmu fo dawn alawm," ka pa chuan alo ti ve dap dap a. Ka nu chuan engmah a sawi zawm tawh lem lo, "E Bawihi, khitah i naute pheikhawk lei kha i pindan chhuarah tukin khan ka la hmu tlatin ka hria i la tawh em?" ka nu in a tihchuan ka bag ah lai chu ka hai nghal rak rak a, a awmlo tak tak mawle.




"Sawi lo la chu ka theihnghilh daih dawn anih hi ka han la leh lawk ang nge," tia thawh ka tum chuan, "Keiman ka han la ang nge fridge-ah in theitui in tur tukin zinga Zaii ka sawr tir kha lova la zawk rawh," a tihchuan choka ah ka phei ve mai a. Bur hnih lai lo niin a thar ṭha bawka a hriselin a tui viau ang.



"Ramdina chu ava rei ve mawle ka chabi khai kha a han zawng hmu zo lo nge mawni?" Ti nuah nuah chungin choka aṭanga ka chhuah chuan inchungah ka chho ve leh ta nge nge a.
Pindan kawngkhar chu inkhar chip lovin ka nu zai ri deuh rat rat chu ka hre thei a.



Luh nghal mai ka tum laiin ka pindan piah chiah bathlar lam aṭang chuan Kimtei phone hmang ṭawng ri ni awm tak hi ka hre zui a, lut ta mai lo chuan fiah turin ka kal hnai ta kher a. Tlakdal bawhin Kimtei chuan phone alo hmanga, min hnungchhawn zawnga a din avangin min hmu theilo thung.




"Aw, engkim a ṭha an fanu pawhin min ngaina tawh lutuk. Vawiinah an haw dawna an chhuak ṭep tawh ang, chanchin ka rawn hrilh leh zel dawn che nia, ka nu eng nge a an?" Kimtei chuan a ti sep sep a, ṭawng rin a hlau khawp mai.




Thawm dang hriat tur a awmloh avangin a thusawi engkim chu ka lo hrechiang khawp mai a, uluk leh zuala a thusawite ngaihthlak tuma ka beng ka chhit kar laiin, "Awi Ramte!" Ka nu ti ṭhat thawm leh, "Awi ka nu!" Ramdina tirual ṭhawt thawm ka pindan aṭanga lo chhuak chuan min ti phu chiang kher mai! Rang lutukin Kimtein min rawn hmuh hman hmain pindan lamah chuan ka pen phei nghal hlawk hlawk a.




Pindan ka va luh chuan bathroom kawngkhar bulah ka nu chu naute pheikhawk nen alo ding reng a, "Tinge a nu i tlu sual emaw tia?" Tia bangbo zeta ka va pan hnaih chuan bathroom aṭangin Ramdina alo chhuak ve chiah a.
An pahnih chuan hamhaih zetin ka melh tawn zak zak a, "Tinge a in rawn au rual ṭhawt a?" Tia tu emaw zawk zawk min chhan hun nghaka ka melh ren rawn chuan ka nu zawkin, "Hei ka pheikhawk la hian bathroom kawngkhar inkhar chip lo kha ka va hmu a...Ramtea a awm tih reng reng ka lo hre chang tawh lo, kawngkhar ka va khar turin a...englo...," ti bah nawkin sawi zawm ta lo chuan a riat nawi ang reng viau a.




Ramdina pawhin thildang melh tur alo zawng kual ve nghal ruai bawk. An awmdan chu eng nge maw a awmzia le,
"Eng nge i lo tih a?" Tia Ramdina zawk ka zawh chuan min lo melh zawkin a hawisawn leh nghal daih a. Min chhang rawh tia ka nghawk zeuh takah chuan hreh hmel zet hian, "Ka zung," a ti thum ta dut mai. Chutah hrilh nawn ngai lovin thil thleng tur awm ang chu ka hrethiam nghal mai a, ka ka hau ringawt.



Ka nuin ka hmel a rawn hmuh takah chuan a aw thian kharh kharhin, "A..khatiangte chu thilthleng palh ve liau liau a nia Ramte zah phah nan te khan ilo hmang reu reu ang nge khatiangte chu hmu ngailo pawh kan ni bik hleinem, engah mah ka ngailo a nia," te chu a ti ta vel a. "Ka lo zuk chhuk hmasa ang nge," tiin naute pheikhawk chu min pe a, a chhuak nghal nal nal.



Ka nu a kal liam rual chuan ka sira mi chu ka melh chho nghal vat a, "A reng reng thuah nangpawh i lo khai lang vu a mi a?" Ka ti seh chilh rap a, chuveleh, "Teuhlo mai, thawm ka hriaa nangmah emaw tiin ka inher deuhva...i nu zawk alo ni sia...," tiin a thusawi tawp lam chu a zuih ral lek lek a.




Han sawi belh leh tur pawh ka hre tawh chuanglo ka ner nang a. Tikhan kan nufa fain kan hmuhpui ta chu a nih kha.
"A ho e Zoremthanga pawhin i tete a khawih ve tawh tho kha," ngaihsam hmelfea a tihchuan ka melh thip ram a,
"Khangte chu amah pawhin a hre reng reng hleinem, nangte chu ka nuin...a...i inhumhim zo lo chu anih ber kha," ti hlak hlakin ka inher nghal vut a.




"A...khatiang zawng chuan sawilo la itan ka humhim ve hram hram a a hmuchiang hman teuhlo mai. Mahni nu te em chu thik lo la," tia ka bana a rawn dawm chuan, "Ka thik bawk lo aw," ka ti bak hlar a. Ka lung a awi hlawllo.



"Chuti si engah nge i tum bur a..? I thik tihna a nilo mi?" A ti he haw a, inherin ka melh chho kalh a, mitko san uk chung hian min lo melh chhuk ve run bawk. "Tunge mahni nute thik ang? I ti mak e a. Nangmah lo midangin min hmu ve ta se i lungawi dawn bik a mi?" Tiin ka zawt let khauhva, "Teuhlo mai Zoremthanga ang khan an chhuak ani mai," rang fahran hian alo ti a.




"Chutiang chiah chu a ni mai ka awmdan chu," ti ve lehin pindan chhung chu a reh tlawk tlawk a, ngawi rengin kan in melh a, nuihza insum hmel a rawn put takah chuan keipawh ka insum rei thei tawh biklo. Melh ram ram chungin ka nui chhuak ta nge nge a, "Ka pizawn hriatrengna khu zuk nawhreh sak mai ka duh," tia nui ruh ruh chungin min lo kuah a, ka theitui bottle ken zawng zawng nen kuah pawh ka kuah let ve theilo.




"Aa...ka nu ber kher..." te chu ka tileh ṭhin a. Thlak danglam theih ni tawh hek lo a thleng tur chu a thleng zo vek tawh si a,ngaihtiam dan i zir tawh mai teh ang.




Inhnuaiah inzui thlain ka nu pawh pangngai tak chuan alo awm thei tawh a. Gate pawnah chuan Ramdina motor la kan lo nghak ṭhap a, Kimtei chuan ṭha tak hian min thla siam siam a, nichina a mi biak kha tu tak ni ang maw tihchu ka lo ngaituah daih thung a, a hmel hmaiah danglamna hmuh tur a awm lova. A phone hmang lai ka lo hre ru ve ani tih chu a hrelo ni ngei tur a ni. Mak ka tih ber erawh, 'Ka nu' tia a sawi kha a ni. A nu chu a boral daih tawh si a, a chhungkhat hnaivai tak te pawh ani mahna tichuan ka zawhna neih chu ka inchhang ta ringawt.




Kan hmaah motor alo din takah chuan ṭhu lut vatin ka nu leh pate Kimtei leh Zaii te chu ka mangṭha nghal mawlh mawlh a, ka hmuh theih tawh loh thleng chuan ka en zui a, zanah Thanpuii chuan min lo thlah lawk tawh bawk a, school kal a ngai bawk nen tun chu a rawn lang ve thei talo a ni.




Hmahmawh lovin a hahdam thei ang berin kan khaw lam chu kan pan ding ta zar zar a, "I mut a chhuah chuan mu rawh aw min men pui kher te kha ilo tum ang nge," Ramdina'n a tihchuan thei leh theilo hian ka la meng ve ṭawk ṭawk a ni ber. Han mutthluk san daih bik chu a khua a har hlauvin ka lo la meng lui ve hram hram zawk a. Ka nau pai aṭang hian chhun mutte hi ka thei chho viau mai a, awm mai mai tawh hi chuan ka mu thlurh thlurh zel.




"Ka mut pawh a chhuak vak lo," ka ti ve tak naa a hla play muang leh cool raih chuan min awi a ni ber. Reivak lovah chuan ka lo mutthlu ta tho aniang ka harh leh meuh chuan thingpui dawr kawrah kan lo ding reng tawh a, Ramdina chu alo awm tawh lova, puan chhah vak lo hi min lo sin tirin seat pawh ka mut nawm theih nan alo ti awn bawk a, mutui cherh cherh tak ka ni. Ham bui bui chungin ka zi mar a, chhuah ka tum lai takin thingpui dawr aṭang chuan Ramdina lo chhuak chu ka va hmu a.



"I lo harh tawh maw i thawh peih chuan in ei puar lawk ila," lo ti varin ka sam chu a rawn chul mam thuak thuak a.
Dawrah inzui lutin a ei tur chahte chu alo thleng fel diam tawh chu niin nghah buai pawh ngai lo chuang ka ei nghal mial mial a, dar 1:30 pm a ri thuak tawh a, midang chawl pawh an awm nual mai.




"Ei ṭeuh rawh aw," a tihchuan ka bu nghat a, a chah hnem si kan ei zawh theihloh chuan a uiawm viau ang.
"Bur bur che hian," ti supin a kutzungpuiin ka kamsir chu a rawn tuai fai a, ka mutui lutuk a ka thophang bawk nen ka ṭawng peih meuhlo.




Kan dawhkan sir chiaha hmeichhe pahnihte chuan min lo en reng tih ka hmu thei a, "A pasalin a duat zia saw enteh a nuam ngawt ang?" pakhat zawk chuan a ti ru sar sar a. Ramdina chuan a hre ve lo nge ni a ei mial mial a, ka mood chu ṭha mai mai tak a ni.




Ei tur chu a chah hnem tehreng nen a zo vek! Ka ei hnem ang he huin engtin mah ka awm lo, Zaii theitui sawr chu kan in leh a, ka harh sawng sawng mai.
Zunram te thiar lehin puar a tlak deuh hnuah kan inkhalh chhuak leh ta a.
Ka harh ṭha tawh bawka Ramdina motor khalh chu ka men pui ve ta reng a, titi vawrh tur erawh ka hre hran lo hla kan ngaithla a, ka thiam lai laiah ka sakpui a, thiamloh chinah a theh hmeh ang hmakin ka ngawi leh a,alo nui ve suk suk zel.




Tlailam ni nemah erawh ka khap ban leh charh charh tawh. "Mu leh rawh, a theih anga tam mut tum rawh zinkawng a reilo deuhvang," a tihchuan, "I mut a chhuak velo a mi? Kawngsir rem laiah ding la chhing ve sek rawh," ka lo ti nghal thuai a. Min lo enin lungawi hmel deuh hian a nui a, ka dul rawn chul heuh heuh pah hian, "In pahniha tuitaka in mut phawt chuan keichu ka ṭha," a ti thum dut a. A kut chu lo vuanin ka fawp vang vang a. "Kha pawh kha hmangaihna tho," rawn ti zeuhvin ka lo ner nang a, "Sawi ṭha ve mai la...khatia a khat tawka kha kha hmangaihna tireng lo khan," ka tihchuan hmalam en chungin a nui vur vur a, "Ka sawi thiam hleinem, nang ni la engtin nge i sawi fiah ang?" tia min zawh let chuan ka dang lel mai.



Ka ṭhutna ti awnin puan chu ka sin ṭha a, thlamuang deuh chuan mit ka chhing ta siai siai a.



Naupang ṭawng ri barh barh thawmah chuan ka meng siar siar a, khua chu a thim fel ti tih der tawh. Motor hnunglam inhawng thawm leh, "I chau em?" ti ri te chu ka hrechiang tial tial a. "A Pite, a pite tho tawh rawh in lo thleng tawh ania," tia mipa naupangin min rawn sawi dat dat chuan ka mit ka nuai a.
Sangsanga chuan min lo nuih heu mai.



Motor aṭang chuan kan chhuk a, Dawngdawnga-te unau chuan ka kut leh lam leh lamah min lo kai nghalin min lo ngai ve hle ni tur a ni. Inchhungah kan inzui lut a, Mimi-i chuan min lo chiau au vatin kan tlan tluang em te min lo zawt var a. Ka pu pawhin min lo nuih var var mai.



"Sangsawng, motor seat hnunglamah khan inthil tur a pitein a dah kha va la rawh u," Ramdina lo lutin a rawn tihchuan phur zetin an tlan chhuak nghal a. Ka muthilh lai vel khan kawngsiamin min lo dang reng a ni awm a, chuvanga thlen tlai phah ta pawh chu kan ni. "Chaw kan lo ei san tawh cheu a, chawhmeh lum lai hian ei ve nghal mai ula tichuan muangmarin in intifai zawk dawn nia," ka nu'n atihchuan Thlengthlengin chaw ei min lo siamsak zung zung a.




Ramdina'n ka nute lam chanchin a hrilh nghal vat a, chaw ei tur chuan ka lo nghak a, alo kil rualin kan ei nghal a.
Chhuna ka thil ei leh ka chaw ei kalna lam chu a in anglo nge ka ei leh ṭeuh thei tho. Mimi-i bai siam tui lutuk vang ni berin ka hria. Ramdina ei pawhin ka ei rei zawk hial a ni.




Ṭhenawm naupangho hi zin haw kan awm nikhua chang hian an lo chuangkai ve leh nawlh nawlh zel a, chuvang chuan sweet bawm khat hi Ramdina hian a hawn tel ngei ngei ṭhin. Tunah pawh Mimi-in a sem leh den den tawh hlawm a, an lawm tawk em em zel.




Kawta naupangho pawnto laiin kan chaw eikham pawh kan ṭhu hahdam ve rih a, kan chhungkaw chanchin chu ka pu leh nute ka hrilh ve vek a, an ni pawhin duhthlanna ṭha tak ka siam tiin thla a muang sâwt khawp mai.




Kan haw tawh tih ṭhiante ho in an hre tawh bawk a nakin lawkah an rawn lang ve leh ngei awm si a, rei pawh ṭhu tawh lovin kan intifel zung zung a. Keichu ka mu nasa bawka ka inbual zawh meuh chuan ka harh kawk mai. Ramdina zawk hian mut hma a duhin ka ring, nilenga motor khalh chu a chauh thlak dawn em a tin ni.




"Nu ber a zu thang rei lutuk a helamah lunglengin kan kiau vawng vawng a.
I rawn haw hun pawh kan nghak thleng zo lo a zan a zanin kan rawn inthawn thla ta mai anih kha," nui huah huah chungin Thangtea chuan a ti a. Midangho pawh lo nui dar darin, "Tak takan a Leen, in pa chu maw i tello chuan cooker washer neilo ang vel ani.
Phit luih tir pawh tumin a phit theilo reng reng a hman tlak loh," uarfein u Cki'n alo tih zawm zat a. Ruthi-i chu a nui ring ringah a lo ṭang bawk a, "K'u Ck, in uar mah mah lo maw..." Ramdina'n lo ti dam tluamin, "Uar lo mah mah zawk, hman zana ṭingṭang nen inkawta in zai thum bul bul pawh kan hria alawm le," chiang fek fawkin pakhat lahin alo la ti zui a.




Ramdina chuan sawi tawh suh ti niawm tak hian a melh zeuhva, ka lo hmuhman vek sia. Kan boruak chu a nuamin ka inah ngei ka awm leh ta chu hahdam thlak tak a ni.




Mut dawnah Vivi-a'n min rawn video call ve hlawl mai a, kan thlen tluan leh tluan loh te min lo zawt vein a rawn video call chhan tak chu Ramdina a hmuh duh vang zawk alo nia, Ramdina lahin, "Ka thauah min man bia be lo teh," alo ti deuh nghut a, in la pa ve thei viau si Vivi-a chu a ngam ṭhak lo.




A tuk aṭang dawr lam pawh ka ngaihven ṭan a, ka zin chhung khan u Cki'n order alo buaipui a, a hlawma readymade la duh an awm avangin order chu kan la lutuk ta lo zawk a. Order pangngai hi a tam lutuk ṭhin lo bawka a zia awm phian mai.




Kan dawr pawh a changtlung chho viau a, kan vannei a hriat pawh a hlawh chho viau bawk. Buai hi chuan hunte hi a kal zung zung mai a, ka nau pai pawh a thla riat a tling ve der tawh. Ka rit tawhin puan zaia han ṭhut reng tepawh ka tlin meuh tawhlo.




Nau pian hun tur chu kei ai mahin Ramdina hian a nghakhlel zawk a, zantin hian a chul hliau hliauva, "I lo pian hunah chuan ka va han duat dawn tak che em" a tih loh leh, "Anu tih aiin Apa tih ila rawn thiam hmasa anga, ka koki chhuan ang che nga hlim taka i nuih rik hak hak theinan ka tlan kualpui che anga, ka ke pen ruala i pen ve theihnan nitin kal ka zirtir ṭhin bawk ang che. Tlakchham i neih lohnan leh i mamawh leh duh apiang i neih theihnan, hlim tak leh hrisel taka ilo seilen theihnan itan nitin ka thawk ṭhin tih hria la, kan khawvel ti famkim tura Pathianin min pe che hi lawmthu sawi sen loh ka ba a, ka thinlung zawng zawngin ka hmangaih reng ang che," tiin kan naute lo pian huna a tihpui tur leh a hmangaihzia te hi a hrilh zantin ṭhin. Rilru no chang deuh phei hi chuan a hlimpui lutuk hian hnuk a ti ulh ṭeuh thei ṭhin.




"In naute hi chu a vannei dawn ngawt mai, pian hma hauh aṭangin Ramdina hian a duh hliau hliau bawka alo pian hunah phei chuan a uipui sa hauh ṭung mai anga pawm pawh hi kan pawm ve thei ngût ang nge maw?" Fiamthu ti tak deuh hian u Ṭhakimi hian dawra kan awm chang hian a ti ṭhin a. Chutiang bawkin Mafeli pawhin, "Ni e, lehlam takah chuan in vannei e, hetiang pa in nei dawn bik a. Heti taka nupui leh fate lo piang tur hmangaih em em mipa hi ka la hmu ngailo, in awhawm tak tak ani. Keipawh pasal ka neih dawn hunah chuan u Ramdina ang hi ka zawng ve ang," a ti ve charh charh a. A ni tel hian he thingtlang Mistiri ka lo nei hi ka tihsual loh zia ka hre zel zawng a ni e.
Nghal ṭhin viau mahse...




Inrinni tlaiah Pialrala pawh Sunday cham turin alo haw phei ve a, thla khatah hian a tam berah vawi thum emaw vel chauh alo haw phei ṭhin a. A awmna lamah a tlei bawk aniang a rawn haw khat khawp. Ama'rawhchu thla hmasa aṭang khan a rawn haw zing ve ta deuhva, a cham rei ngailo thung.Lehkha zir aiin hnathawh a thlang zawk miau a a nuam tih tak a thawk bawka a hmel pawh hmuh a nuam thei viau a, ka nu leh Ramdina te pawhin an a duh anga awm tlang tir an remti chu tisual an in tilo ve ve ang.




Tihian thawh chhuah a nei ve tawh a, a hlawh hmasa ber alak ṭuma alo haw khan a farnu leh a nu, a pu leh a u kei thlengin kawr min rawn leisak ve ngei a. Kurta senno zia rang nei, inchei lutuk lo hi a ni a, kurta hi ka ha ngai miah lova mahse kan tlangval meuhvin a thawh chhuah ngeia min rawn leisak ve chu tiin ka ngaih hlut sak viau a, a lian deuh bawk nen ka rai len hnu hian ka ha ka ha ve ta a, hak a nuam phian bawk.




Tin, alo haw apiang hian Dawngdawnga-te unau tan thil a rawn hawn sak ziah a, han chhawnchhaihin duat hliau hliau thiam lo mahse a ngaihsakin a hmangaihzia hi a chiktu tan chuan hmuh hmaih chi zia zang a nilo.



"Ka inkhawl hnem hunah kan khuaah hian workshop dawr ka hawng ve ang," a ti a, a tumruh bawka thawh pawh a thawk rim a, duh se chuan a u hnenah a sum lu tur a dil thei reng a, keipawhin puih ka inhuam reng. Mahse amah hian a thawhchhuah ngeia dawr hawn chu a duh ve tlat a, tu pawisa hmang maha din chu a tumlo bur. Ama ke ngeia dinchhuah a tumna leh thawhrimna te ka hmuh hian ka chhuangin mi hnenah sawi chhuak ngailo mah ila a rukin ka fak em em zel.




Zu hi chu han in ve zeuh zeuh ṭhin mahse tlangval tam tak anga theuleu kual lova, chhungte rilru hahna thlentu leh phurrit ni lova. Chawmhlawm mai mai nih duh lova a thawhrimna te ka hmuh hian hmana Thanpuii'n a sawi
'Khawpui tlangval, chhungte thawh chhuah sa hmanga bike man to tak tak leia inkhalh kual fua fua ṭhin hote ai chuan, a rem rem thawka inhlawh chawp, mahni kea din tum thingtlang tlangval-te hi hausa lua lo mahse pasal atan an tlak ka ti zawk fe,' a tih kha ka hrechhuak uar uar zel a, dik ka tiin ka pawmpui viau bawk.




Nawmsak lutukna hian nun hlutna min theihnghilh tir a, kan chhehvela thil awm te leh kan thilneihsa hlutna te pawh a hliah khuh fo bawk. Mi harsate leh dinhmun khirh taka dingte bawk hian dam khawchhuah harsat zia chu an hrechiang a, mahni dinhmun chhiat lutuk avanga in dawm kun a, mahni inkhawngaih a, beidawn avanga khawvel lama tlan mite retheihna chu retheihna rapthlak tak ani ang.




Sunday chawhma inkhawm banah ser bawl ho turin kan inah Ruthi leh u Cki an lo leng a, Thlengthlengi-te ṭhiandunin huanah an zuk lo va, Hmangaihi hi Champhaiah a Nite bulah karkhat zen zawn inentirin a zuk cham a. A ṭhiannu hi a khawngaihthlak rek rek thei asin aw...an ni pahnih hi chu a tak leh a mei an sawi ang mai, a tir aṭanga Khuanuin ṭhian ni tura a duan bik ngawih ngawih ang mai hian an inzui kual dat dat reng a. Mite pawh hian pakhat zawk an hmuh loh chuan
'Khawnge i ṭhiannu?' tiin an zawt fo reng a ni.




"Hmahma, i zinnaah chuan min lo ngai em?" Kan ser vel laia Pialrala tui in in a rawn tihchuan Hmangaihi chu a hawi chhuak vat a, hmel chu pe chhe ve ngar ngar tak a ni. "I hming in ṭanna 'P' pawh kha ka ngaihtuah chhuak lo hrim hrim," alo ti liam puat a. "Khai, i thamral ang nge...," Pialrala chuan chek hluk pah hian alo ti a, a chhan pawh a aw hi a tham ve pangngai ka tih tawh kha. A ṭawng rin ve a a a duhthawh deuh chang phei hi chuan a ṭawng hi hriat a har thei lutuk. Pialrala chu kal ta mai lo hian Hmangaihi ṭhutna ṭhutthleng hnunga a kut nghah pah hian a kun hniam deuhva, "Ka awih lo e...i zep aniang," a ti deuh sup a. Midangho chuan titi dang vawrhin eng he huah an ngai lem lo.



"Engmah ka zep ve ṭit ṭet ngailo ka ka aṭanga chhuak tawh phawt chu awih tawp rawh," ser vel mawlh mawlh pahin pakhat lahin alo ti leh hmiah a.
"Hmm," tih paha Pialralan a bengah a sih zeuh chuan, "Khaw'maw min lo khawih chhenlo teh a za!" ring si lo mahse seh chilh nak hian Hmangaihi chuan a ti deuh hlar a. Kan tlangval lahin chutia han chheih thinrim vel chu nuam a ti teh chek aniang chu a khik pui vur vur reng mai.




"Angaih, tichuan engtin nge i awm zel dawn tak a, zai chu i ngai dawn em?" Tia u Cki'n Hmangaihi a zawh chuan Pialrala pawh a kalsawn ve tawh a. Hmangaihi hi zawng, 'Hmahma' an tih loh leh 'Angaih' te an tia, tute pawh hian duh duh dan hian an ko mai zel a, a aw hi a tham avang hian ṭhenkhat chuan 'Thamte' te pawh hi an ti nawk zelin ka hria.




"Zai pangngai tak chu ani dawn lova, a Ni khan an chhu dawn a ti maiin ka hria ka hrethiam bik chiah lo," Hmangaihi chuan a ti nuah nuah a. A kalah lungte a awm a ni awm a, vanneihthlak takin a lian lo hlauhva, a dam vat turah ngai ang. Amah lah hi natna nei awm ang hian alang der lova, a harh vang ber ber emaw tih mai tur hi a ni ṭhin.




"A ṭhat hlauh chu han in enkawl dam vat vat teh. I awmloh chhungte khan i ṭhiannu a riang rawih rawih lutuk a, in hanin zui hnek hnek hmuh tur in awmloh hi chuan a diklo tlat zel. Engtin emaw ni tak hian ka lo kim lo ve ringawt zel," Ruthi-i chuan a ti siam siam a, keipawhin ka lo pawmpui khawp mai.




Ser chu kan bawl hluah a, Ramdina chuan vawikhat hi a rawn tem ve a, "Eng pum hi nge maw in neih bik le?" Tia si hlarh hlarh pahin a kal tak daih kha. Keini ho lahin tui kan han ti hliam hliam khawp a, thak ngam rual ṭhah awmkhawm tih takah kan bawl uk khurh zel.



"Ser bawl pawh a nilo hmarcha bawl anih hi," Pialrala chuan a ti ve bul bul a, an unau thak ngamlohzia hi chu aw...an farnuten an han ngam vei nen. "Hmangaihdawngkim a luh theih chhung kha chu ei te kha ilo tum ve leh ringawt ang nge. Hmarcha ei ve vak vak suh i ṭhan theih tawh der loh kha," tiin a kal hmain Hmangaihi chhipah chuan a kuk zeuhva, "I ninawm Pialhnap ka lu hi i duh duh huna kuk tur a siam anilo," tiin pakhat lah alo ṭeu leh hlar tawh a, vawiin chu an inti ṭe reng mai.




"Ti daih ila Leen, in naute hming turte hi in ngaihtuah ṭan tawh em? Tuin nge phuah/sak tum reng reng che u?" Tia u Cki'n min zawh chuan, "Keichuan ka lo la ngaihtuah chhin lo reng reng. Ramdina hian a nghakhlel sia keichuan ka chuhpui lovang, ama tih dan dan a ni mai," tiin ka lo chhang a. A hlimpuiin a phur tawh si a, aman phuah ngei se ka duhpui khawp mai. Sawipui nachang ka lo hre ngai miah lova, nakinah hming hual lawk a nei em ka la zawt ang.




"Angaih tlaiah chaw i ei nghal dawn em? I u Mimi-in rawtuai bai tui tawk a siam a nia aw," ka nu leng lo hawin a rawn tihchuan phur zet hian, "Dawn e le, u Mimi-i rawtuai bai te chu ka hmaih phal teuhlo," alo ti var a. An ṭhiandunin an Korean film en ṭhin a chhuah avangin ṭhuthleng seia ṭhut ar ar pahin TV chu an en a.



Andrew-a pawh Sunday hi chu a hman ni a ni ve bawka a rawn chuangkai ve leh nawlh a, Thlengthlengi chuan nuam alo ti thei viau mai. Mahse u Cki nen hian eng emaw ri rek rek chu a awm ve ṭan niin ka hria an inmelh danah. An chanchin zawh nachang ka lo hre leh pek ṭhin lo bawk nen an inbiak dante hi a hma a ang tawh lo riau.




"Drew-a zanah i inkhawm dawn em?" U Cki chuan pangngai tak hian a ti a, "Umm khawm hram chu ka tum, banah i thingpui lum in turin ka rawn tlang nghal dawn a nia," Andrew-a chuan alo tihzawm zat a, ka sawi reng kha maw. Andrew-a hi a leng thla ve zeuh zeuh tawh a ni...Nuthlawi Stacy-i chu kan chawk zero hneh viau dawn niin a lang.




In leng an ṭin a, ei rawngbawl ṭanin thim hlimah kan ei a. Inkhawm turin a ṭhen an insiam nghal sap sap a, Ramdina pawh inkhawm turin a insiam ve a, keichuan ka peih ve leh ta lo.
Puan cheh/zai khawlsa ka ngah bawka tiin ka muzal a, ka nu bia in eng nge an an zel te ka zawt a. A aw a zangkhaiin an ṭhat tlang thu min hrilh chuan hah a dam sawng sawng thei.




Ka nu hi nu rilru nem hma tak leh tluangtak, mi haw ve mai mai ngailo mi a ni a. Keipawhin ka chhun ve viau chuan ka hria, mi a nazawngin ka haw ngai lova, mahse ka mil theih tawhloh chin hi chu a der pawhin ka be ṭha thiamlo tih tur khawpin ka inthup thiamlo ve leh tlat a, ka mi ngainat loh leh mil loh mi nih chu a nuam fahran lo khawp ang.




"Awi a mak e...! Midang awm laiin min chheih ziah suh ka tih kha...ver vur mai!" Tia phun deuh hlak hlak ri chu kan pindan bul lawk aṭanga lo chhuak chu niin ka hria. Mahni chauhva awm ka ni bawka ka beng a var vang hrim hrim nge ka hre fiah thei khawp mai.
"Eng nge pawi engah mah an ngai chuang hleinem," titu chu Pialrala aw ni thanin ka hria.



Ka hriat chian chakna chuan a tur hian min tur et et tawh a ni ber. A tawp a tawpah chuan tho chhuakin tukverh bul lam chu ka pan phei a, parda chu chhete a keu de dein kawtkai maia Hmangaihi leh Pialrala te lo indin chilh run ka hmuh chuan mit zim meuh hian ka en reng a.




"I ninawm min piai reng suh!" Tiin Hmangaihi zawk chu a tawlh hnung hret a, Pialrala chu nuisukin a kekawr ipte a zen nghal at a, "Tinge i biang hi a tai tek reng a..? Hetiang hian mipa dang bulah a tai ve ṭhin tho em? Nge keima bulah chiah i taih tir ṭhin zawk?" nuiza insum hmel zeta a tihchuan Hmangaihi chuan a kut khinghnihin a biang tawn tawnah chuan a dawm nghal vat a.




"Chutiangin ka duh duh hunah ka ti tai thei bik lo, a duh hun hunah alo tai ve tawp zel alawm," tiin hnuailam chu a bih ngar a, a aw pawh a zawi lam mah a ni tawh. Chutah Pialrala chuan din hnaihin a chhipah chuan a tuai zeuhva,
"A ṭha, ka bulah chiah tai ṭhin rawh se.
Mipa dang chu hmuh tir ve miah suh," ti thum dut dutin a nuih zui sang a. Awi aw ka thil hmuh hi eng nge ni ngai?!




"Hmangaih! I chhuk tawh a mi?" Tia inchunglama Thlengthlengi au thawm hriat tur a awm takah chuan Hmangaihi chu a phu deuh zawk a, "A..aw! Hetah ka awm tawh!" Tiin a au let lauhva, a hmaa Pialrala la ding khawng luah chuan nem deuh chawt chawtin, "Lut rawh lut rawh lut hmasa teh vatin!" Tiin Thlengthlengi hmuh hman hlau ni awm tak hian Pialrala chu lut hmasa turin a ti chul tawh a. Pakhat lah a u iangin lo nghal thiam bawk, "Kal turin tha pawh ka neilo vawikhat muah phawt loh chuan," alo ti teh tlat a, a ban bul chu ri nghal chawrhin, "I ninawm...lut vat mai teh!" ṭawng rin hlau bawk siin Hmangaihi chuan a ti seh chilh nawk a, a ṭah te chu a chhuah hmel ngawih ngawih tawh zawk.




Pialrala pawhin nui ruh ruh chungin inchhunglam chu a rawn pan ve ta hram a, a rawn lut fel chiah tih awm velah Thlengthlengi chu a rawn thleng chawpchilh ve nghal bawk. "I lo chhuk daiha ka zawng nasa lutuk che," a rawn ti nghal var a. Keia pawh hi ka chhe den dun mang e. Rai puar ul tawhin naute ho ka bih duk duk a, ava han hawkdak thlak mai mai tak! Mahse thilmak deuh ka hriat phah ve leh tlat thung a, ka rinloh leh ngaihtuah ngailoh anih avangin mak pawh ka ti viau mai.
Tihian a hmaa rawn haw khat thei viau si a rawn haw zin chhan pawh ka hrethiam uar uar tawh. Hmangaihi ṭawngkam aṭang kha chuan midang tumahin an hre velo anih hmel a, an hriat pawh a hlau hle niin alang.




Ka ngaihtuah neuh neuhva, a engtitia lo ni ve teh daih chu nge maw an nih ang le? An inthup thiam ka ti dawn nge keini ho hian ngaihbel nachang kan lo hrelo zawk ni ang? Mahni naute ṭhianṭha ber nen eng emaw boruak neih chu engtiang tak ni ang maw. Chutiang bawkin mahni ṭhianṭha berte u nena a ruka inngaihzawn vel chu a nawm dawn a dangdai viau in ka ring. Ka thil thar hriat chu ka nuihpui var var a, hmeichhia ve tho ka nihnaah hrilh tur ka duh zek zek mai, tu emaw han sawipui tur te ka duh ve a, Ramdina inkhawm bang lo haw hi ka hrilh thawr mai dawn mawni te ka ti rum rum tawh.




Ramdina a lo haw chuan a inthlak laiin ka lo en kar a, ka hrilh ang nge hrilh lovang tiin uluk fein ka inngaihtuah a. Miin midang hriat duh lova an thup ṭang ṭang anih chuan han sawi chhuah sak em chu a ṭawng theih thlak ka tiin inzahloh naah ka ngai ve tho bawk si a, lehlamah ka hrilh tuma hi mi hrang ni lovin Ramdina a nia, a sawi chhuak ve zawt zawt dawnlo tih ka chiang a, thil engmah pawi thui tur awm pawhin ka hre hran lo.



"Tinge khati fa kova chianga min en a? Min en laih i tum ve deuh em mawni?" Ti deuh bul bulin Ramdina chu alo phei a. Ka ke min hmeh sak lai chuan, "Pialrala hian bialnu a nei in i hria em?" Ka ti chhuak ta nge nge a, sawi tlang rawt aiin tihian bul ṭan ṭhain ka hria.




"Nei ve deuh nge mawni tinge a?" Tiin min lo zawt let vat a. Chuveleh, "Anih leh tunge a bialnu chu i hria em?" chik zeta en pah hian ka ti leh a. Chutah min en lem hlei lo hian, "Angaihi maw?" alo ti a nih chu! Ka meng phawk nasa lutuk chu miin min hmu se ramhuai ka hmu ta emaw an ti ngei ngei ang.




"I lo hre daih tawh maw? Engtin nge i hriat a?" tiin rang lutukin ka zawt nghal zat a. Keimah chauhvin ka hria emaw tia engtin nge alo hriat leh pek tawh ni.
Kiai deuh suk chung hian min lo en a, a sawi duh mai lo lehnghal a ngeiawm thei a nia.


"Tak takin ṭha deuhvin min chhang teh engtin nge Pialrala leh Angaihi te an inngaizawng tih chu ilo hriat teh daih?" tiin ka zawhna ngai bawk chu a hriat fiah loh hlau zetin ka zawt nawn leh a,
"An inngaizawng a mi?" vei zui loh hmel zet hian alo ti let zawk zawmah a. Min va han ti hamhaih thiam ṭhin tak!




"I hria a ni lawm ni engah nge min zawh let daih...? Hre awm ang deuhvin i awma chuvang alawm i hriat dan ka zawh reng che ni," dawhtheilo zeta ka tihchuan, "Ka hria ka tih loh kha...Angaihi maw? Ka ti mai a nih kha. Ka thusawi kha i man vaklo nge i la kawi zawk?" Techu ala ti tak ang deuh deuhva. Vawikhat tal chu tuk ṭawlh hi ka chak tak tak a ni.




"Heiham! Nichinah pawna an inbia ka hre fuh a, mak ka ti ema hrilh ve che ka tuma lo hre sa i ang em alawm," ṭha deuh zawk chuan ka han ti a. Ka ke hmeh chu duhtawkin ka mal kham chuan a mu ar ar a, "Ka nau a nia ka hrechiang a ka chik ṭhin bawk. Danglamna a neih chuan ka hria a, tun hnaia a rawn haw zin ziate hi ka hai hleinem. Angaihi lo len changa ina a awm ziahte hi in hrethiam har ka ti zawk ngawt alawm. Mahse an inkawp em chu ka lo ring bik lova," ti sup supin ka dul chu ka chul pah a.




Keipawh a thusawite ngaithlain ka lo bu ve nghat nghat a, a sawi chu a dik vek mai. Alo haw chang pawhin tlaiah a len chhuah loh leh a pindanah a tawm deuh chawt a, zanah zanriah ei khamah a lengchhuak lehnghal ṭhin bawk a. Eng ngati nge ka lo hriatthiam ngai miah loh le? Mahse ni thei tur pawha ka rinloh leh a farnu ang maia a en ve nia ka rinna khan rinhlelh nachang min hriat tir lo ni ta berin ka hria.




"Awi a mak e...i sawi takah chuan ka hrethiam uar uar mai. Rdi nen khan an ni emaw ka lo ti char char a, chuva-"



"Ehe! Ehe! A rawn pet a nia! I lo hria em tun maiah khan kan nautein a rawn pet a nia," tiin ka ṭawng lak lawh lai lai chuan a rawn phul deuh hlut a. A ṭhu chhuak rangin phawk zet hian min en reng a, ka dul chu ala dawm reng bawk.
"Umm tunlai chu a rawn pet nasa thei lutuk ka hrilh theihnghilh daih ṭhin che a," nui var var chungchuan ka lo ti a.



Phur zet hian a kun hniam a, "Bawihte ka thusawi hi i hriat theih chuan vawikhat tal apa tan han pet leh teh," a ti dam dap a. Ngawirengin naute lo pet hun chu a nghak a. A duh ang ngeia ka pum chhunga nautein a rawn pet leh takah chuan a zuang hian a zuang lo chauh a ni ber.




"Aw a ṭha lutuk ka nopui i van fel tak em tikhan pet zel rawh i ti ṭha lutuk a nia Bawihte ka hmangaih che," tiin a fawp vang vang a. Naute pet mai mai pawh heti tak hian a hlimpui a nia, alo pian hunah phei chuan awmdan hi ava han thiam leh lo bik dawn tak.




"Nang chu 'Ka nopui Bawihte' i ti renga Naute rallian inih hi keichu min hrechang tawh lo reng reng. Nangmah hian han pai thei law law la ka ti ngawt mai," ti hmarh hmarhin ka ṭhu tum bar a, en pawh ka en ṭha peih lo.




"Aa..khai a, chutiangin ngailo la ka Rohlupui, kan naute nen hian tawp chin nei lovin ka hmangaih ve ve cheu asin.
Nangmah hian amah a awm a, nangniah kei ka awm thung. In tello chuan engmah ka ni hleinem, ka hmangaih che, ka hmangaih lutuk che a hei aia sawifiah dan hi awm se ka ti,
hmangaihna hi kei ang mi tan chuan hrilhfiah ngaihna a awmlo, mahse ka nihna leh awm ang ang hian ka hmangaih ve che a nia aw," a ti deuh duah a. Mi hi chu a ti lungawi hnehsawh ve sia maw...nge ka alakah hian ka nem awlsam mah mah ṭhin zawk?




A tukah chuan dawrah ka han ṭhu ve reng a, chhunah Andrew-a lo leng lutin kan vai chuan ei tur te min lei sak a. Damdawiin hi kan dawr aṭang hian a hla vak lo bawk a, chhun chawlh lai hian alo lang ve leh nawlh zel.
"Tunlai boruak a eng emaw leng vel hi inhre ve em?" Awmze nei zeta u Ṭhakimi'n a tihchuan, "Sap ṭawng takin 'Love is in the air' an tih kha mi?" U Cki chuan alo ti bau mai a. Andrew-a nen kan sawi chhan tih a hrelo nge mawni.




"Ni chiah e, u Cki zarah chengkhat pawh seng lovin kan in ei puar lah zel mai a a manhla ṭhin teh e," Mafeli'n nui var var chunghian alo ti ve bawk a. U Cki lah a nuam titiah alo ṭang a, "Nia in vannei ngawt mai ka zar in zo ani ve mai tikhan," alo ti deuh ham ham a, Andrew-a pawh a nui deuh tawp. An mize inperhsan lulai lutuk hian nuih a tiza ṭhin khawp mai.




Andrew-a kal hnuah hna kan ṭan leh mawp mawp a, u Ṭhakimi leh Mafeli te haw hmasa in u Cki nen dawr kan khar lai chuan kan dawr kawta Mafeli pangpar khawi, a duh leh duat em em maite chu tu emaw hian a pot chawp chuan a rawn su keh rem rum mai a. U Cki nen chuan thinrim fein bike khalhtupa chu kan melh rum ngang mai.




Amah lah chu chek deuh hluk chunghian a bike aṭang chuan a chhuk a, a pangpar sut chhiat aimah chuan a bike hmalam khem leh khemlohte chu ngaihven ta zawk a, chiang lutuk a a su lai lo hmu ve rengtu tan chuan ngeiawm duh mai mai tak a ni.




"Hey nang kha!" ka ṭawng chhuah hmain u Cki chuan a ti fiak ta ṭhak a, chupa lam chu vung zet hian a pan phei nghal bawk a. Keipawhin zui ve vatin bike khalhtupa pawh alo ding chhuak ve tawh.



"Engah nge mi pangpar duhlai khatia i rawn sut chhiat ringawt a? Ngaihven a hnekin i bike ringawt i thlek i thlek lehnghal," u Cki chuan ava ti nghal khar khar a, "Chutia law, inkhawina lai hi a fuhlo deuh zawk anih hi," chupa pui chuan alo ti reuhva, "Hetia rawn tlar phei put lo hian a kual zawng deuhten rem ta ula ka rawn suh miah lovang," tiin pot rem dan turte chu min hrilh let zawk zawmah a, zam lo ham ham reuh mang e...




"Ava zam lo reuh e...kan dawr kawr ania duh leh a khat pawhin kan rem ang. Kawngpui hi maw lirthei veivahna tur a siam ania engah nge helai daih daiha i rawn tlan ni enrawh kan dawr compoumd chinah ani hi i rawn din," ti fiah fakin dawr kawt chu u Cki chiang zet zet hian a kawk a.




"I helmet te liau luau hi phelh teh mi i va han zah lo em em ve mawle," ti lehin chupa helmet hmalamah chuan a kuk ṭawlh a, "Nula senior ho tak hi chu," ti sup pahin chupa pawh chuan a phelh ve mai bawk a, u Cki chu inseh ruh nasa tawh tak a ni.




"Ehe nang kha eng nge hetah i lo tih ve?!" A hmel ka hmuh rual chuan phawk zetin ka lo ti nghal hliai a, u Cki pawh chuan min lo melh rang khawp mai. "Eng nge ka lo tih lovang?" kan Sakuh daktheia chuan alo ti nghut a,
"Ka kek leh hrep dawn che a mawni le..," ka tih chuan lo nui varin, "Duh mah la i kek thei tawh chuang lovang," tiin inti thei fe hian a lu chu a tuai zeuhva.




A hma angin lubuk zet kha alo ni tawh lova, a sam chu kawlh chiah si lo hian han ṭham dawna kutṭang kara tang theilo tur tawk vel chiah hian a ni a meh ni. Amah lah chu ala nui hui zui a, ti fuh a intih hmel cher cher lutuk.




"Eng nge kan khuaah te i rawn tih ve a a hma lahin buaina i rawn chawk chhuak tawh a tunah lah kan pangpar i rawn su chhe leh ringawt a. A khawitunuin hmu che sela i sam kha a mal te tein a pawt ṭil duh ngei ngei ang," ka tihchuan "Hmp" alo ti duh lek chauh. "Tihian hna min rawn siam a ni ringawt a, pali lai i su chhe lehnghal. I vanneia keini kan ni hlauhva ngaihdam dilna chang pawh i hre silo ngaihkhatah kan ngaihsak mai ang che. Mahse a aiah naktukah min rawn singsak pui a ngai ang. I hria em khawiah nge i thlen dawn engti turin nge ilo kal hrim hrim?" U Cki chuan a ti deuh zung zung a.




"Nge ka lo kal chhan pawh chu min zawh seka ka duha ka lo kal, naktukah ka hman lo luiah kan kal dawn," lungawi hmel vakloh chuan a ti bul bul a. Chuveleh u Cki chuan, "Chutiang chhuanlam a tlinglo tunah kan haw duh tawh naktuka i rawn kalloh vaih ka rawn zawng chhuak ang che," a ti ta khar khar a, chupa chu ning hmel zetin a ner nang mai.




"I va han ninawm dun ber...ka rawn kal ang!" Ti hlukin a bike chu a ti nung a, vung zetin a inkhalh liam zui nghal. A thil sut chhiat chu a theih ang anga dah felin khua a thim lek lek tawh avang chuan muangchang lovin kan inzui haw a, haw lamah u Ckin engtin nge ka hriat dan min zawh chuan tournament laia kan insual thu chu ka lo hrilh a, a nuih a za ngang mai. Pangpar kha a ngaina vak lo emaw tih laiin miin an han sut chhiat tak meuhvah chuan a ui ve ngang ti tur ani a phun pui char char mai.




Haw lamah an inkawta Sangkimi phone hmang kan hmuh chuan alo haw tih kan hre ve chiah a, min lo hmu tho mahse a laklawh hmel em a au talo chuan kut kan vai ringawt a. Ani pawhin nuisang chungin alo vai let ve a, pheikhawk ala bun ṭup danah a rawn thleng chauh ani ngei ang.




Kan inkawt ka han thlen chuan bike pathum hi kawtah chuan an lo ding a, Pialrala bike ni awm tak zawk chu a khem deuh nuai mai bawka ngaih chu ti ṭha duhlo tak zawng a ni. Chutah inchhung ka luh chuan ṭhutthleng sei a ṭhu Pialrala ke dinglama thisen kai luai mai ka hmuh chuan ka mur chhuak vek thei. A ṭhiante pahnih an lo awm ve bawk a, Mimi-i chu alo zilh deuh hlak hlak mai.




"Chak deuh deuhva tlan kha engmah sawtna a awm chhete lo fimkhur tur hian kan chah zin tehreng che nen.
Enrawh hei i thuawihloh rah chu i ke ruh a tliak lo chauh anih ber hi," tiin thisen kai te chu hreh hmel deuh tak hian a hru fai thuak thuak a.




"Khitah kan dressing tir dawn a nia, Tea rawn kuah chhuak ula," Ramdina chuan
lo ti dam dapin amah chu a chhuak zui nghal a, "Nangni ṭhianho tak hi chu aw lirthei hi hawl chhuak ve tawh lo ula a ṭha ang. Midang inna lo hlauhva in vannei tak tak a ni," Pialrala an kuah chhuah lai chuan ka nuin alo ti ve charh charh a.




Dawngdawnga-te unau chuan an en zui dauh dauh va, hmuhnawm thlir tak hian a nia an thlir ni. Ka pu chuan engmah a sawi ve hran lova, Mimi-in a zui ve a, Dawngdawnga-te unau pawhin an ngen tlat avangin an hruai vel leh ta nge nge a. Ka nu min hrilh danin an ṭhianhovin luiah len dengin an zuk kal a, an rawn haw lamah lungphur motor nen in tawkin kawngkual lai tak a ni bawk nen a hmasa bera tlan Pialralan a tuar phah ta a ni awm e. Vanneihthlak takin helmet a khum hlauhva a ke leh nak a sawh hliam deuh tih loh chu na dang emaw hliam dang hmuh tur a nei lo.




Ei rawngbawl chu Mimi-in a zo fel tawh bawka chaw ei turin kan lo nghak a, darkhat hnu velah rawn let lehin a ngal thla chu a intuam var luk tawh. "A Pate a la na em?" Sangsanga'n a ke en pahaca tihchuan, "Mipa in na kan hre ngailo," alo ti thum dut a. An patea chu pa an tih hmel hliah hliah tawh.




"E he...engtin nge i ke chu itih a? I bike te saw avan khem nasa em em i accident a mi?" Thlengthlengi chuan a rawn ti lut hlut a. An chawhmeh zuar an lo haw ve chiah anih hmel...Hmangaihi pawhin a rawn thlek ve dak dak a, chuveleh, "Awiah Dawngdawng khawih khawih suh ana a nia," tiin a ke tuamna lai Dawngdawngan a khawih chuan rang fahran a kut chu a laksawn sak a.




"A patea chu i van pa lo em em, nichinah mipa in na kan hre ngailo i ti zo chiah sia," tiin a fing deuh zawk Sangsanga'n a tihchuan, "Mipa te pawh hian pa theihloh hun kan nei ve ṭhin alawm, hmeichhia ang thovin duat te pawh kan mamawh ve tho," tiin a sawi zawh rual chuan Angaihi choka phei tur chu mui ruh ruh chunghian a melh deuh kher a, pakhat lahin lei alo chhuah khum duh lek chauh.


***************
Show post links
Top