ALL THE WRONG PLACES 17 ONGOING

[B.laltlanhlui]

Chapter 3

Tu es ravissante...Jadore...Je cherirai ce moment pour toujours...restez avec moi...

(I mawi lutuk. Ka duh lutuk che. Kan hun tawn hi ka hlut hle a ni. Ka kiangah awm reng mai rawh)

Julianne mu tui lai chu a harh hlawl a, khum bul dawhkana sana chu a han bih a, zing dar li chauh a la ni

A kerek a tattoo chu a han khawih a

Kum sarih liam ta ah khan Paris a studio apartment ah a ruk te in a chhuak zal zal a nih kha. A bula mu hi a tih harh vaih chuan a khawvel a a let leh tur a dang ngei dawn tih a hrechiang tlat

A mipa hmangaih awmchhun chu a hrereng tawh lo emaw a ti a, a lo la theihnghilh der lo chu a ni e

Jas Mathieu a kha

Tun thlengin a la mangphan reng ṭhin chu a ni a, zan a mut hmunah te a ngaihtuah chhunzawm fo ṭhin

Hmangaih tawn a duh a, a tawng ngei bawk. Kha pa khan lemziah a thiam em em a, hausa tak chu a nih hmel lem lova, mahse a tum tawh chu puitlin ngei tuma bei ṭhin ang kha a nih hmel. Chu chu a ngaihsan chhan pakhat a ni bawk. Mi hriat a hlawh chhoh thlenga a kianga awm theih a chak. Mahse a tir aṭang te khan hma hun an nei thei dawn khan a hre tlat lo a ni. A cham rei theih dawn loh avangin a hming diktak pawh kha a hrilh lo reng a

Tattoo neih a duh lai te kha a hrechhuak a, pakhat tal hi chu a hma aṭang neih a duh ṭhin reng a, mahse a chhungten an remtih sak ngai lo

"I mawngtam, i khel leh i ke rek an rawn en kher dawn em ni?" Jas a'n chimawm zetin a rawn fiam a "An en loh na lai ber ah tattoo i nei duh ang em?" a ti a

A pa khan McAllister nei turin a ti ve bawk hrim hrim a, tattoo hi chu ama tan ngei a ni ang. Paris a a zalenna hriatreng na atan a duh a ni

"Awle a design tur nangmah in min thlan sak" a ti ve leh a

Jas chuan thinlung lem leh phengphehlep thla chu lehkha ah a han ziak phawt a, a mawiin a changkang reuh phian mai. Julianne-i duhzawng tak a ni

"I tattoo neih chhun design thlan sak tur che chuan min ring takzet a maw?" Jas chu a meng de sawr sawr a

"Ka ring tawk che alawm" a nui sen sen a "Paris ka hriatchhuah changa nangmah leh tattoo hi ka mitthla a a rawn lan fo theih nan ka duh alawm" a ti a

Jas chuan tattoo artist hnenah lehkha a a design ang chu a taksa a chhu kai turin a hrilh a. An tih zawh hnu ah Julianne chuan thu mal J ang deuh a ni tih a hmu thiam nghal thuai a, chu lo ah phengphehlep thla chu pakhat te chauh angin a lang bawk

Julianne chuan a melh deuh kar a "I hming bul ka tatoo ah i chhu kai a ni maw?" a ti a

Jas chu a nui huah huah a "I sawi ang khan kei leh tattoo hi a inzawm tlat alawm"

A sawi dik chiah a ni. A theihnghilh leh tawh lo vang. Tattoo hian an hun hman dun kha a hriatchhuah tir leh ṭhin

A nun zawng zawng a thlak danglam sak ang tih tu in nge ring pha bik ang le? Kha zan hun khan kumkhua in a inzawm tir reng tawh a ni

Jared Adrien Sanders

A fapa hming a ni e. A hming lai hi chu Adrienne-i hming aṭanga a lak a ni. A chhungten an hnawhchhuah aṭang khan a tan a awm reng ṭhin a ni

Nitin in Jared hian a hriatchhuah nawn tir leh ṭhin. An sam pawh a sen uk deuh ve ve a ni a, an mit rawng leh an hmai tlak thlengin biangsum leh khabe phir an nei ve ve bawk. Engtin nge Paris a a mipa tawn kha a theihnghilh theih ang? A fapa hian Jas Mathieu a chhun lutuk tawp a ni mai

A la naupan nen Jared chu a themthiam reuh phian a, a pa angin artist a la nih Julianne-i'n a ring nghet bur. A fapa hmangaihna a vur apiangin Jas kha a thinlungah a rawn nung thar leh ṭhin

Kar thum dan ah Adrienne leh Justin chuan chhungkua in Paris an tlawh ṭhin a, an fate pathum Jeffrey leh phir unau Jaeden leh Jaelynn, kum thumna hmang mek te nen an kal ṭhin

Kum liam ta a, Italy aṭanga Julianne a rawn let hnu khan Justin-a te chhungkaw bulah an cheng ve rih a, Justin a'n Adam Industries a Corporate Strategy a VP hna a chelhtir a, hlawh a ṭha in Adam's In ah an cheng ve thei dawn a ni

Julianne chuan a chhia leh ṭha hriatna hman mai chu finthlak zawkin a hria. A inchhuan ve na te leh a hlauhna te dah ṭha in haw zai a rel ve ta a. An chhungten an ngaihdam theih loh pawhin pawi a ti tawh lo. A pawimawh ber chu Justin hian hma hun eng tak a chhawp chhuah sak a ni. Hausa ber chu ni lo mahse Jared a chawm thei tawh anga, a ni pawh khawhar lovin a awm thei ang

Jared pawhin a cousin te a ngaina nghal thuai a, Justin-a te nupa Paris a kal tur a zui tir hmasak berah chuan haw a duh lo lutuk. An chhungkaw mi leh sa ang mai a ni. French thlah a ni ve reng bawk a

Kar hmasa lawkah Jared chuan Paris a kal a dil leh a, Adam Industries ah hnathawh laklawh a neih avangin chawlh la thei a ni si lova, a tellovin a fapa chu a kal tir leh a. A lehpek ah chuan a ruala kal ve a intiam bawk

Julianne chuan message a han check a, Paris Sana nen chuan darkar sarih velin a inthlau a, a fapa te awmna lamah chuan chhun a ni mek ang. Adrienne-i'n a fapa chungchang a rawn hrilh a beisei a

Adrienne hnen aṭang message chu a lo dawng ngei a, Jared a video a lo ni

"Tu...es...ngawi teh eng maw?" Jared a'n camera chu a hmachhawn a, hnung lama awm chu a ko a, Julianne chuan a hmu pha lo chiah chiah "Pate Jin, eng nge kha?"

"Ravi..." hnung lama awm chuan Jared chu a rawn hrilh a

"Ka thiam tawh e" Jared chuan camera lam a rawn hawi leh a, a nui var var bawk

"Nu! Tu es ravissante!" a biangsum a rawn lang suk a, chutah flying kiss rawn pe in "Je t'aime" a ti leh a

Julianne i'n a fapa French ṭawng hman tum a hmuh chuan a hlimpui viau mai. Amah ah bet tel tlat a ni si a

Julianne-i'n Adrienne a be nghal a

"A la zing si a, tinge i thawh duh a?" Adrienne i'n a lo ti a

"Ka muhil thei lo alawm. Video kha ka lo hmu a"

"A duhawm reuh tiraw?"

"Duhawm lutuk. Tunlai chu khatiang kha a tui pui deuh em ni?"

"Aw, ka unaupa hian ṭawng a zirtir a, kan lo haw hunah phei chuan kei ai a nal tawh zawk maithei a ni. French thla chu ni ve tho mah ila, ka thiam lo lutuk a"

'Jared pawh French thlah a ni ve tho asin" a ti rilru a

"I chhungten i fate bakah ka fapa i hruai ve chu buaithlak an ti em lo maw?" Julianne-i'n a ti a

"I fiamthu a ni lo maw? Ka chhungte hian Jared hi an ngaina lutuk. Ka unaupa hian a ngaina lehzual. A chang chuan thinlung nei lo ang deuh hian a awm ṭhin mai pawh a"

"Thinlung nei lo ang deuhin a awm ṭhin i ti em ni? Chutiang chu engtin nge a nih theih?"

"Nia, kum hmasa lamah khan ka unaupa hi nelawm tak a ni ṭhin a, a thil tawn in a zir lo a ni maithei. Tunah hi chuan thinlung sak deuh ang mai a ni tawh. Chuvang ania, kalkhawm na ah leh chhungkaw thlalak ah a lan ve ngai miah loh. A thui dawn lutuk. A taka i hmuh hunah ka sawi awmzia i man mai ang"

"Keipawh rual ka pawl bik hleinem. Chhungkaw thlalak ah ka lang ngai lo, a chhan a awm tlat a"

"Ian...lungngai suh aw. Pate Edward hian engtikah emaw chuan in inkar a la siam ṭha em em ang" Adrienne-i'n a rawn fuih a

"Kum sarih a liam tawh ania Adrienne, beiseina ka nei tawh lo. Nang pawh beidawng tawh mai rawh"

"Beiseina a la awm tlatin ka hria. Justin a'n a pui che tih a hriat khan a thinrim miah lo. Kan bulah i cheng tih leh hna i thawk tih pawh a hria a, a chhe lam zawngin thu kam khat mah a chhak chhuak lo"

"Engmah a sawi loh vang khan a rilru a lamlet tihna a ni lo. Ka pa hi chu maw a ngeng ngalh ngalh teh mai ania. Chu chu i hriat a ngai. Keimah lam ai mah chuan a tupa tal hi han pawm thei tal se ka ti em mai"

"A hun a lo la thleng mai ang. I fapa a hmuh hun chuan a thinlung a tui ve chiang khawp ang le. Ka unaupa thinlung lung anga sak tawh pawh a ti nem thei ania, Jared hian mi hneh theihna riau a nei a ni. A pa a chhun a nih ka ring tlat"

'A chhun tak tak alawm. Jas Mathieu kha angel ang maia rilru ṭha tak a ni asin' a ti rilru a

A ngaihtuahnaa Jas Mathieu rawn lang leh chu duh lovin a lu a thing a, a thinlung a na thar leh mai mai dawnin a hria a ni

"Ngawi teh a, i chhungte pawh hi a lo tibuai viau lo maw? Kan la inhmu hlawm lo lehnghal a"

"Ka hrilh tawh che kha, i fapa hian mi hneh theihna riau a nei ka tih kha maw! Ka chhungte thinlung a nei diam tawh. An tupa ang tak takin an en alawm. Hmuh che an chak tawh khawp mai"

"A lehpek ah chuan ka rawn kal ve tawh dawn nia"

"Chu chu i rin aiin a hnai daih ang" Adrienne i'n a ti a

"Tinge?"

"Ka nu'n party a huai hawt dawn a, kan vaia kan tel a beisei. A lehkhabu chhuah kha hralh hnem ber record a siam leh a, pakhatna a hauh hi chuan kan lawm ziah alawm"

"Wow ka lawmpui thu hi min lo hrilh sak dawn nia"

"I rawn thlen hunah nangmah ngeiin i la hrilh zawk dawn nia"

Lawm tur dang kan nei leh bawk a, ka unaupa nupui tur puanzarna ni a ni dawn bawk a"

"Amah duhthu nge chhungkaw inremsiamna tho ni a?"

An nu leh pa te ho hian inremsiam tih vel hi an uar riau mai a, Adrienne-i nu leh a pahrawn te kha chutianga innei an ni a, Justin leh Adrienne pawh kha an ni ve chiah a, mahse anni kha chu an lo inhmangaih sa hlauh a, Julianne ngei pawh hi lo rai hman lo se chu chutiang inneihna tho chu a hmachhawn ve ngei ang

"A neih tur tu nen hian an inhmu ve zeuh zeuh. Starck Corp hian hotel zauh belh a duh a, chu an duhna hmun neitu hi an ni a, ka nu spa enkawl nen a chung bera hlan kai a, neih vek a duh alawm mawle"

"A nih chuan hmeichhia te hotel neihsak in engkim a fel vek dawn tihna a ni maw?"

"Starck Corp tan chance a ṭha dawn a"

"A neitu nihna chang tur hian beih a lo ngai viau elaw?"

"Chhungkaw ta a ni si a, a har ve ang"

"An hnuaia Corporate Strategy VP ni ve ta ila, chu tho chu ka rawn maithei a ni. Hmangaih a lo nei ngai lo a nih chuan a thinlung a nem phah deuh ka ring tlat"

"Ka unaupa tan hi chuan chhungkaw sumdawnna hi a pawimawh ber. Engpawh tih a duh mai ang. Dang thei tur an awm lo"

"Chuan party laiin an inhual dawn tihna a ni maw?"

"Ni chiah love, inneih pui ah a sawm ang"

"Party laia chutiang tih chu hmelhriat an nei awm si lova, a romantic awm lo e. I ti ve lo maw?"

"Eng nge i beisei a? Keimah ah pawh a thlen ṭep kha i hre tawh lovem ni? Justin a pawh kha khatianga inneih a min sawm tur khan kan chhungten an beisei alawm. Ka nu lehkhabu lawmna party ah tho a nih kha"

"Party a ka tel lo kha chu pawi ka ti tak tak a ni. In inhualna a in lan loh ve ve laia in chhungte hmel awmdan tur kha ka hmu chak lutuk"

"Kan inneih ni a ṭhian a i ṭang lo kha pawi ka ti"

"Nia, Italy ah in lo innei daih tih ka hriat khan Justin hi kar khat chhung chu ka haw reuh lutuk. In hun thlan kha a fuh lo em a ni"

"Lungngai suh. Ka neih nawn leh hunah ṭhianah i ṭang dawn nia, Ian" Justin a'n line lehlam aṭang Adrienne-i phone a lo chhuhsak a

"Nupui ah neih leh i tum maw?"

"Aw, hun nei ila chu ka nei nawn awn awn ang. Mahse States ah khan neih leh ka tum hrim hrim a, kan thutiam te kan chham nawn leh ang chu. In vaiin kan sawm tawh ang che u"

"A ṭhat hlauh chu! Chuti chu ni lo sela, ka lungawi lo viau ang"

"Engpawh nise email ka rawn thawn che kha i hmu em?" Justin chu a rawn thutak leh kharh tawh. Julianne chuan an boss a be leh tawh tih a inhrethiam thuai a

"Aw, RJ shopping kha a fuh hmel ka ti a, mahse market lamah kum hnih chauh an la thawk si a, Asia a thil thawn buaipui tur chuan company ṭha ber an ni ang em tih chu ka hrethiam rih mai lo"

"A neitu hi ka ring thung alawm. Kar leh lamah Chicago ah a rawn kal dawn a, i lo hmu thei mai ang em?"

"Kei maw? Ka ngaihdan chu ka hrilh tawh che kha! Midangin lo kaihruai mai se a ṭha lo maw?"

"George a sawi dan tur pawh ka hrereng mai" Justin a'n a ti a

"Kei pawh"

"Nia, River hi chance pek ka duh a, i hmuh ve hun chuan ka rin em em chhan i hrethiam mai ang. Amah hmu tur kan tirh chhuah hma in i ngaihdan i thlak maithei asin. Strategy lama VP i ni a, thil ṭha deuh i rawn chhawp leh dawn tih ka hre mai. Thawh ho na ṭha awm hman se chu duhthusam a ni. River hi ka rin ber te zinga mi a ni a"

"Awle. Ka lo hmu dawn nia"

"Ka lawm e, Ian. Ka nupui hi i be leh duh em?"

"Ngai tawh lo mai rawh se. Nakinah ka rawn bia ang che u. Zing dar li chauh a la ni a"

"I rilru tihah lutuk suh aw, Ian. Jared hi kan enkawl ṭha lutuk ania. An ngaina hlawm bawk si a"

"Ka lawm e, Justin. Adrienne leh a chhungte nelawm tak kha lawmthu min lo hrilh sak bawk dawn nia"

"Awle, kan inbe leh dawn nia"

Julianne chu a nui sen sen a, a fapa chu a ngai viau mai. A lehpek ah chuan a buai lutuk tawh loh hram a beisei

****

End of 3

CHHUNZAWM LEH TUR