PARADISE LODGE 13 Author: Chhantea Pautu, Paradise Lodge

[Chhantea Pautu]

PARADISE LODGE!
Author: Chhantea Pautu, Paradise Lodge

Bung 13 Na
Dawithiam Sûlhnu A Ni Em!?
©
Mitthi chu tih dan pangngai, midang an lo vuiliam tawh dan thoin vuiliam a ni! Tum dang aia a danglamna chu an chhungkaw menber ni lo pali laiin vuina hunserh an hman pui ve ta chu a ni mai! 'Hunserh' han ti ila; Mizo ten mitthi kan vuiliam dan kalphung tlanglawn pawh hi a ang teuh lova; a thuhmunna awmchhun chu lungngai taka mitthi ruang leihnuaia an zalh chu a ni mai e! Bible chhiar emaw, tawngtai teh vak emaw, thusawi sêi, mitthi damlaia a chanchin tha lawrkhawm chawp sawina hun hawn hi Pu Thanglianmawiate chhungkaw tân a tul ve ngai lo! Hruaitluanga, tunlai khawvel changkannain a nun a tihharh phak ve tawh chuan a táwngkhawp lovin, a duhthu a sam lo hle mai; mahse, hei hi a pu Thanglianmawi thu rolum a ni tlat!

Ngaihtei, Muanawma, pu Ramtinsanga leh Health-worker pu Liansanga chu tum dang ang lo taka chhungkaw member ni lo, vuina hun hmanpuitute chu an ni a! Khatia, Pi Rosangi a chahthlâk hma deuha Hruaitluanga hmanhmawh taka Health-worker pu Liansanga ko tura a kal kha, hmanhmawh tak bawkin a rawn kir a; mahse, a tlai zo tawh! A nu Rosangi chu a lo chatthla tawh!

Thawsa phunga pu Liansanga nena an rawn tlân thlenna chuan awmzia a nei lova; eng natna nge an hre chuang hek lo. A hmain Pi Rosangi chuan hrisel lohna a nei ngai miah lova; nu hrisel tak a ni, a damlo ngai lo tluk a ni e! Chuti ang mi chu hun reilotêah, mûal liam khawpa natna tawrhchhuah harin a luhchilh a nih chu!

Hruaitluanga bawk chu harhchhuak hmasaah tangin a nu Rosangi ruang chu postmortem a han rawt a. Health-worker pu Liansanga chuan hemite chhungkaw awm dan hi a hriat ve tho avangin Hruaitluanga rawtna chu a tuihnih duh hran lova. Muanawma pawh chuan Pu Thanglianmawia tawng hun a ngaichâng a, an chhungkua chu inrawnkhawmin, chumi hnuah a thianpa ngaihdan chu sirtlukpui chauh turah a ngai!

Chu rawtna chungchanga Pu Thanglianmawia ngaihdan chu, bung zet a, "A tul lo!" a tih hmuk chuan a sawi chiang tâwk viau bawk!

Hruaitluanga chuan a pu chu a han hnial ngial a, an intithinrim lek lek hial a; chu chu Pu Liansanga'n a hawsan tawh hnu thil a ni! Anni putu chu an han inhnial bap bap a...

Muanawma chuan chumite putu inhnial chu thelh a ngai niin a hria a, "Hruaia, i pu kha hnial tawh teh suh. Ka lo sawi ve tur chu a awm miah lo a; mahse, postmortem a tulna reng reng kei pawh hian ka hre lo!" a han ti a!

Hruaitluanga chuan a thianpa chu mak tih hmel zet hian a han en a, Muanawma pawh chuan a mitmeng hriatthiam har zet chuan a mitah tak a lo en ve reng bawk! Hruaitluanga hian Muanawma'n a nu Rosangi ruang postmortem a tul lova a hriatna chhan hi a hre lova, mak a ti viau bawk. Chutih rual erawh chuan, Muanawma mitmeng a han en a, hetia a tih chhan engemaw awm ngei chuan a han ring ve thla ringawt a; a pu Mawia a hnialna pawh chu a chhunzawm duh ta bîk lo ve mai bawk!

Pu Thanglianmawia chuan Muanawma chu a han en vung vung a; chutah, ngawi rengin an nupa pindan lamah a luhsan ta a ni.

Pi Rosangi ruang chu hmun danga la sawn chuang lovin ama pindanah an dah reng a. Zankhuain pi Ngaihsaki chuan a û ruang a vil a, tlin takin pi Nguri pawhin a awmpui bawk! Ngaihtei chuan awm dan a thiam lo hle a, ngawi rengin thutkhawmna pindanah a thu ve ngawt ngawt mai a ni. Ruang va kil ve ngawt chu a hreh deuh si, a pindanah tawm dawn se, thil tih chi a ni si lo. Midang thîte nena a boruak a inan loh em avangin awm dan a thiam ngang lo a ni! Khawmite tumah an rawn kal lova, pu Liansanga lah, Pu Thanglianmawia'n haw san tawh mai tura a tih avangin a haw tawh a. Pu Ramtinsanga erawh ngawi rengin Inah a rawn awm ve thung.

Zîngah mipa hoin thlan an lai a; chumi ni tlailam fêah pi Rosangi ruang chu an phum fel thei tàwk a. Hemite chhungkaw chunga thihna thleng fo hi engti kawng zawng pawh hian a hahthlâk vel vek mai!

Heng hi, pi Rosangi a boral atanga an vuiliama, an phum ták inkara thil awm dan tlangpui chu a ni. Inchhung chu a ngui a ni satliah lova, a ipik ûap hnîm ruih a ni ber mai. A In a hlui tawh si, an boruak tawn mêk leh chu In lianpui, hlui da bui tawh chu a inhmeh letling zawk hial a!

He Inchhunga a luh hnu reilotê chauh a la awm chhung lek pawha thil thleng chuan Ngaihtei rilru a ti buai hle; a hnathawh hi a chhunzawm zel duh leh duh loh pawh a chiang ngam tawh meuh lo! Thihna a awm hnu zan hmasa berah chuan Inchhung chu a ngui ruih a, an tawng mang meuh hlawm lo! Zanriah eikham veleh Inhnung lamah pu Thanglianmawia chu a chhuak nulh a, darkar hnih dawn a ral tihah a rawn lut leh chauh; a hmel awmzia chu hriatthiam a har hle mai!

Muanawma leh Hruaitluanga pawh an titi dun meuh lo. Zan a rei hmain an mutna hmun an pan ve ve a; thiandun e ti lovin Muanawma hian mutdun a duh tlat lo a ni!

Ngaihtei chuan amah chauha a pindana han mut chu a hreh hle a; mahse, dawihzep tak anga midangin a hriat kha a duh bîk lo!

* * * * * * *

Zanlai a ni tawh a; PARADISE LOGDE chu a reh duk a. Pi Rosangi pindanah chuan mipakhat hian thawmdim takin thil a zawng a. Chu pindan zau vak lem lo tak chhungah chuan eng'e a zawn tih leh amah chu tunge a nih tumahin an hre lo!

* * * * * * *

Ngaihtei chu zankhûain chhîn khattê pawh a chhîng miah lo. He Ina a awm ve tanga zan tin(Pi Rosangi boral zan tih loh) a hriat thin tap thawm ang chiah kha a hre leh a; mahse, hemi zâna tap thawm a hriat erawh, tunge a nih a hriat loh tap thawm ni lovin, pi Ngaihsaki tap thawm a ni a hriat zâwk ni!

A mut a chhuak miah lo chu a mak a ti zâwk hle a. A han inlet thak thak thin a, a ngaihtuahna chu ama tâwkah a sêng nasa hle mai! Hmeichhia tih takah pi Ngaihsaki chu a khawngaih hle a, pu Thanglianmawia erawh, a tupa Hruaitluanga chungchangah leh pi Rosangi chungchangah a dem rilru ve hle ringawt thung! Chhungkaw thlanmual an nei hrangte, pi Rosangi an vuiliam mai dan satliah takte chu a tan thil thar, maksak, mak danglam tak a ni! He Ina a luh tirh khan, thil thlengte thurûk anga vawng turin chhechham meuh khan a intiam kha a ni a!

Chutia thil thleng vel a ngaihtuah lai tak chuan, dîmtê hian a pindan kawngkhar chu an rawn kik karh karh a. Mak a ti rilru viau a; a Phone a han en a, khawvar lam hnaih a lo ni hial tawh. Ngaihtha vak lovin a pindan kawngkhar chu a va hawng a, pi Ngaihsaki fapa Hruaitluanga thianpa kha a lo ni a. He Inchhungah harsatna a thleng thut a talangin ani nen hian tawngkam khat pawhin an la inbe miah lo!

Ani chuan, "Ka lo lût thei ang em?" inthlahrung aw zet hian a han ti a. "Thil zawh lawk duh che ka nei a ni, a rei lovang" a han tizui a.

Ngaihtei chu a han tîm deuh hlek a; a chhan pawh, he mikhualpa hi Pu Mawia'n a lawm vak lo tih a hriat vang a ni. A ngawi rei deuh a ni ang...

"I hming kha Ngaihtei a ni tiraw?" tiin chupa chuan a han zâwt leh a.

"Aw ni e..."

"Ngaihte, thil tam tak zawh che pawh ka tum lo a nia; anni chhungkaw tan hian ka zawhna tha taka i chhàn hi a tul takzet a ni...kan inkawm thu hi pu Mawia'n hre lo se ka duh bawk...rem i tih chuan min luh tir la, kawngkhar hi khar phui ka duh a ni..." tiin chupa chuan a han dil nawn leh a.

"Rawn lût rawh..."

"Ka lawm e"

Ngaihtei chuan a pindan kawngka khar pahin, "Eng'e min zawh i duh chuuu..." a han ti a.

"Thil thenkhat, he Ina thil thleng nena inkaihhnawih thei thil pawimawh tak!" tih ngawtin chupa chuan a lo chhang a.

"He Inchhûnga thil thleng leh thil awm dan pâwn lam mi hnena sawichhuak miah lo turin chhia ka chham a; chuvangin..." tiin Ngaihtei chu a han ngawi ta daih a!

Chupa chu a han nui deuh a, "Ngaihte, he In ka rawn luha thil awmdan leh thil thleng tlêm ka hmuh atang ngawt pawh hian i hriat aia thui Hruaiate chhungkaw chanchin hi ka chhuidawn thei ang..." a han ti zet a; chutah, hawihawm deuh zâwk hian, "Ka sawi awmzia chu, i chhechham bawhchhe turin ka nawr miah lovang che tih ka tiam che tihna a nia..." a han ti leh a.

"Chuan...min han zâwt la..." Ngaihtei chuan a lo ti hmak a.

"Nangma chungchang hi a ni mah zâwk ang..." chu pain a tih tè tè hnuah, "Thla khatah engzat nge an pêk dawn che?" a han ti ta a.

"20000..." zep tul a ti hran lo.

"A tam tham hle mai...tun hnaiah a chhan i hriat si lohin i hlau ngai em? I chhungrilah tim er erna te i nei ngai lo maw?"

Chu zawhna dawn chu Ngaihtei chuan a inbeisei miah lo; mak tih hmel tak hian, "Eng a...!?" a han ti deuh vak a.

"Shhhh...midangin an hre palh ang'e..." chupa chuan a han ti a!

Ngaihtei pindan hi Inchunglam a nih thu kan sawi tawh a; pu Mawiate pindan chu Inhnuai lamah a ni thung. Mahse, pu Mawiate nupa hi an muhil hauha a rinawm loh avangin fimkhur tluk a awm lo!

"I awm dan atang khan chuti ang chuan i awm tawh a nih ngei ka ring...Ngaihte, dawt sawi lova min chhân a pawimawh tak tak a nia aw..." a han ti leh a.

"Aw awm e..." a ngawi det a..."Engemaw, hmuh theih si loh, min vil khurtu awm tlata hriat tum ka nei tawh; engtin nge chuti anga ka awm i rin theih a!?" tiin Ngaihtei chuan a han zâwt lêt a.

"A nih...kha zawng kha ka zawh duh che chu a ni...ka lawm e aw" tiin chupa chu a nui sak a, a zawhna pawh chhang lem lo chuan a chhuahsan leh ta daih a! Inhnuai lamah a chhuk a, thawmdîm takin Inhnung lam chhuah pheina kawngkhar chu a pan a, a kalhna chu dim zetin a han kuaithla a, pâwnah chhuakin thlàn awmna chu a pan a, a ding dat a, thlàn awm thliahna hnung lama ngaw chhûngah chuan thawmdim leh hmanhmawh zetin a pil bo ta daih a; chumi hnu darkar chanve vel a ralah khua chu a rawn êng ta uau uau a.

Hruaitluanga pawh a muhil miah lo! A pu Mawia thu sûkthlêk leh awm dan inkharkhip zet chu a tha lo a ti hle a; mahse, engmah tih theih a nei chuang lo. Muanawma hian chinfel pui se a duh tak zet a!

* * * * * * *

Kan hriat atân...

Bung hmasa lama lang, Hruaitluanga kha tuna kan sawi mêk Hruaitluanga hi a ni lova!
Pi Ngaihsaki pasal, 1997 kuma boral ta Hruaitluanga kha a hmingpum chu Vanlalhruaitluang a ni a, tuna kan sawi Hruaitluanga hi a fapa niin, ani hmingpum hi chu Remlalhruaitluanga a ni ve thung! A pianphungah a pa a chhun hle a, a ziaah pawh a pa zia a phawk hle bawk...

* * * * * * *

Rebecca Brown hi kan hre hlawm ang a; thlarau sual nena an inbeih dan a ziahna Lehkhabu pawh thenkhat chuan kan chhiar tawhin a rinawm.

Thenkhat chuan Rebecca Brown khawsak dan hi belhchian dawl zui vak lovin an sawi. Hetia rawng a bawl hnuah Cult a din a; setana pawl nena inzawm thûk tak, setanic leh dawithiam inhmuchhuak a enkawl zui tâk, Elaine-i nena Lesbian nupa khawsaka khawsa thin nia sawi a ni bawk! An sawi zui zel dan phei chuan, Rebecca Brown hian Elaine hi pasal a neih san a, Elaine nun beidawng chu a intihlum zui ta an la ti leh zel bawk!

He'ng an chanchin hi thu belhchiandawl a nih leh, belhchiandawl lo a nih hre turin he lehkhabuah hian finfiahna engmah sawi a ni dawn lova, finfiahna sawi tur hriat loh thuhran; chu lam chu kan chhui zui tur a ni lo! Thil chiang tak erawh, Pathian rawngbawltu, Pathianin eng anga a hman nasat pawh hian kawngdik lo zawh ve palh theih a ni e!

Henu chanchina kan han pakái tâkna chhan zâwk chu; a lehkhabu ziah, 'Sal Tângte Chhuah Zalên Turin A Lokal' tihte, 'Raldo Turin Inbuatsaih Rawh' tihte leh, 'Sût Loh Ànchhia' tih vela a thil ziah pawmawm leh awihawm tak tak vang kha a ni. He'ng lehkhabute hi thlarau sual beihna kawnga rawngbawlte tân pawh chhiar tlâk tak a ni; a ziaktu awmzui dan an sawi chu eng ang pawh lo ni se. Kha'ng a lehkhabua a sawi pakhat, Dawithiamte chêt dan a sawi kha tuna kan sawi chanchina pawimawhna riau a neih dawn avangin chu lamah chuan kan pêng lawk dawn a ni.

Muanawma leh Hruaitluanga inbiakna hi han en lawk teh ang...

"Hruaia, hnukchat lovin mihring thlarau hi a chhuah theih i ring em?"

Hruaitluanga chuan a ngaihna hriat loh hmel zetin a lu a han chul a, "Ka hre lo. Ka lo ngaihtuah ngai miah lova...kan nunna ber a nih hmel a, kan thlarauin kan taksa a chhuahsan tawh berte chuan kan thi tihna a ni mai dawn lo'm ni!?" a han ti a.

"Ni ngawt lo!" Muanawma chuan a han ti nghat a-
"Chu chu ka pawm dan nghet tak a ni" a tizui zat bawk.

"Han sawifiah la..."

"A nih leh, Kristiante chhiar hlawh tak; Sipai pakhatin, Pneumonia avanga thi anga an ngaih tawh hnua a thlarau vahvel dan a ziahna lehkhabu, 'Return From Tomorrow' tih kha i chhiar tawh em?"

Hruaitluanga chuan, "La chhiar lo" awlsam zetin a lo ti a.

"Lehkhabu chhiarte hi uar a tha ngawt mai...kei pawhin ka duh anga ka chhiar tam tâwk lo hi ka la induhkhawp lo teh a nia!"

"Min han hrilhfiah mai mai teh a"

"Tan chhan atana rem tak Bible thu pawh ka hria a sin..." tiin Muanawma chuan Bible a han ban a..."Hei, Thuhriltu 12:6,7 hi han en teh" tiin Hruaitluanga chu a Bible ken lai chu a han pe a...

Hruaitluanga chuan a han chhiar ri a-
"Tangkaraw zâi chu a chah a,
Rangkachak berhbu chu a keh a
Hlumbêl chu tuikhura a keh a,
Tawlailîr chu tuikhuah bulah a tliah hma hian.
Vaivut chu a awm angin leiah a chang leh a,
Thlarau chu a petu Pathian hnenah a kir leh a ni"

A chhiar zawh chuan Muanawma chuan, "Chang 6,7 thu kha, mihring hnukchah dan chanchin sawina a nih kha aw" a lo ti a.

"Thianpa, ka la hrethiam chuang miah lo" nui chungin Hruaitluanga chuan a la ti leh ta tho mai!

"Rebecca Brown chuan mihring leh a thlarau hi lazâia inthlunzawm angin a tehkhin a, chu chu ka pawm zawng tak mai a ni; a chhan chu, Dawithiamte chêt dan thenkhat enin, mihring hian hnukchat si lovin a thlarau hi engemaw chen a chhuahvah tir thei niin a lang tlat! Dawithiamte'n an awmhmuna awm reng sia hmundanga an hmelmate an va tihnat daih theihna dan pawh hi heti ang kawng hian a nih ngei ka ring bawk! Lazâi chat lovin mihring thlarau hi thuitak a vâk vel thei a; chu inthlunzawmna lazâi a chah erawh chuan mihring chu a thi ta tihna a ni mai!" tiin Muanawma chuan a han hrilhfiah a.

"Ho emai a...engtikah nge kan In lamah chuan kan kal dawn...i hman hun ka la nghâk reng a nia..."

"Naktip nakthaiah..."

He an inbiakna hi Hruaitluanga a rawn haw a, a thianpa nena a chhungte hrilhlawk lova a thawn thut hmalam thil a ni. Tuna he In, hlui tawh tak, pawn lam atanga a landanah phei chuan sak that hun tawh tak maia thil thleng nen hian a inmil theih riauna a awm avangin kan han sawi lang leh hnuhnawh a!

* * * * * * *

Pu Thanglianmawia chu midang ang bawkin chumi zan chuan a muhil bîk lo. A farnu a chân tâk mai bakah helhkham dang a la nei leh chêu a; chu chu a tupa Hruaitluanga thianpa Muanawma chu a ni! Hepa hi a ngaimawh a, a chhan a hriat si lohin a hnawk a ti hle ringawt; an Ina awm ve reng atân a duh miah lo. Amah râwn hauh lova a tupa Hruaitluanga'n a rawn hruai lût ngawt mai hi a lawm lo em em a; a thin a la ur reng!

A farnu thih dan chungchangah chuan, a hma nîa ngaw chhunga a vahvelnaa a thil tawn avang khan a ngaih chu a tha bîk chiah lova; mahse a ring phal lo a ni ber mai thung! Hmâ takah a tho a, a lehkha chhiarna pindanah darkar chanve zet a awm a, chumi hnuah In hnunglama chhuah tumin a kal a. Chu lama chhuahna kawngka chu a inkalh lo tih a hriat chuan mak a ti deuh! A han hawng a, ngaw chhung atanga Muanawma rawn chhuak phei chiah chu a va hmu a..."Khangah eng'e i tih!?" a han tichhum nghal hmuk a...

"Ka zing tho ka han vak harh mai mai...i va tho hma ve Pu Mawi..." tiin Muanawma chuan Pu Thanglianmawia lungawi lo hmel chu namnul a tum a!

"Muana, ka tupa thian tha tak i nih hmel a, i kamtam zui loh ka beisei...chuti chung pawhin ka duh aiin i teivel mah mah ka la ti tho mai!"

Muanawma chuan engtinmah a chhang lo!

"Ka duh dan phei chuan, vawiinah ngei haw tawh la ka ti a ni" pu Thanglianmawia chuan a ti bung leh nghut a!

Chu em em zawng, Muanawma chuan ti lutuk deuhin a hria a ni ve ang, u"Pu Mawi, i pawi ka sawi pawh a ni si lova; engvanga chuti taka min hua nge i nih chu le!?" a han ti ve ta sak a.

Pu Thanglianmawia hmel chu a hmuhnawm loh kher mai! A hmai chu a sen vek a.

"Ka In leh a vel hi ka thuhnuaia awm a ni; ka thu lova, saw lam i kal ringawt pawh khan ka pawi i sawi tawh" tiin an piah ngaw chu a han kâwk a! "Nizânah pawh kan awmpui nula i phunpui sawr sawr kha. Mu hman miah lo khawpin i teivel a nih kha; ka hre lo emaw i ti em ni? Nang hi ka ngaina lo che a, he Ina i awm ve reng pawh hi ka duh hek lo. Khawmuang lovin chawei kham veleh kal turin ka ngen nghal bawk che; i chawei hma zawng ka ngaihhnathiam thei hram ang" a han ti leh tùn tùn a!

Muanawma chuan a rûn hle mai; luhlul awm zet hian pu Thanglianmawi a chu a han en a, "Pu Mawi, pi Rosangi thih chhan kha ka hai lo a sin!" a han ti ve leh ta ngat a!

In neitupa chu a meng durkhup a, "Kal rawh...chhuak rawh...tunah...!" a ti ta tuarh a!

Muanawma chuan a en reng a, "A nih leh le...mahse, in nupa hian lo inveng fimkhur ang che u...ka kal ang'e" a ti ve ta a. Muangchangin a kal phei a, Inchhung a luh hma hret chuan, an thawm hriaa Hruaitluanga rawn phei nen chuan an intâwk a.

"Muana, eng'e thil awmzia!?"

"I pu sawn awm ve lo turin min duh a nih hmel"

Hruaitluanga chuan a hrethiam, sawi tur lah a hre hek lo!

"I pu Mawiate nupa hi lo vil ngun ang che; i pu Mawia phei saw chu a dinhmun a derthawng ru riauin ka hria a nia!"

"Eng kawngah maw!?"

"Ka la hrethiam bîk chiah lo...kan la inhmu leh thuaiin ka ring...hetah ngei hian...ka kal ang'e" tiin Inchhungah a lut a; chokaa Ngaihtei leh Pi Ngaihsaki lo awm chu a bük khum zauh a, a thawmhnaw lain PARADISE LODGE chu a chhuah san ta a ni.

Pu Thanglianmawia chu a thinur a la reh lo tih hriat tak hian a dinna ngaiah a la ding mitak rûn a. Hruaitluanga chuan a pu chu thil awmzia han zawh chian chi-ah pawh a ngai lo. Biak pawh be lovin Inchhungah a luh san a.

Pu Thanglianmawia chu muangchangin a pen chhut chhut a, thlân awmna kalpelin ngaw chhungah chuan a lut bo ta daih a. Thil awmzia hre lo tân chuan chu In hlui zet neitupa khawsa zia chu hriatthiam a har!

Ngaihtei tân pawh thil thleng mêk kara awm dan thiam chu beihfêt ngai khawpa thil harsa a ni! Sawi tur a hre lova, tih ber tur a hre lo; a tawng duh ve thin tehlul nen chuan! Nizâna mikhualpa awm dan leh a zawhna zawh pahnih lek awmziate kha a hre lova, engvanga zawt nge?

A awmdan dik tak kha...khati anga a awm tawh leh tawh loh kha mikhualpa khan engtia zawt ngawt nge a nih? A hlawh an pek tur zat a zawh kherte kha eng atâna hre duh nge a nih ang? 'Ninawm, awm vel mai mai ang' a ti rilru ta ngawt a; mahse, a tum ang ngawta rilru atanga dah boa ngaihtuah loh a harsat zia chu amah bawk chuan a va hrechiang si tak!

A awmdan kha a han ngaihtuah lêt a, khatihlai khan a hlau thut a, a chhungrilah a tim er er a, a hmulthi a ding sung sung a, a awm a nuam lova, hmuhtheih loh mihring, hriatna thazamin a hriat theih si a bulah chuan awm ve ang mai a ni a; chutah, khum mawnga dressing table a thil dah a rawn tlu ta ringawt a! Eng'e a awm zia? Eng'e a hlauh em em kha ni ang le? Eng thil danglam mah a hmu bawk si lo. Hruaitluanga chuan biak lum lam a han tum viau thin a; mahse, sawi tur pawh a hre lo, titi emaw pawh a peih tehchiam lo. Tunah rih chuan a tih tur ang ang ngawi renga tih a duh tâwk ve vaw khawp mai. He Inah hian zân lo thleng tur hi a huphurhawm a, chawlhna zan tura Siamtu'n mihringte a pek hi, he Inchhungah hi chuan chawlhna zân a tling ngai lo a chha a ni e!

Thil danglam a thleng a, thawm danglam a awm a, khawsak phung pangngai pêla khawsak maksak hmuh tur a awm bawk! Tumah tak takin thil awmzia hi an hre tak tak lo. Mikhualpa khan eng thil emaw tak hriat chu a nei niin a lang. Pu Thanglianmawia hnena pi Rosangi thih dan hriaa a insawite, amah Ngaihtei bula zawhna pahnih lek zâwta lungawi hmel em ema a chhuahsan leh tâk daih dante; ngaw chhungah khan eng'e a va tih reng reng? Ngaw chhunga a kal avang khan pu Thanglianmawia lah a lawm loh hmel viau mai bawk si!

"Ngaw sawn thurûk engemaw tak a lo nei zâwk emaw ni le!?" Ngaihtei chu a phun sap a...

* * * * * * *

Muanawma chhuak ta chu inngaihtuah ding takin a kal chhat chhat a, "Mite pawh an thi; mahse, he Ina thil thleng hi chu a pangngai tlat lo!?" a han ti ringawt a...