Politician_Nupui_Hring_Nun #S2 BY Cck Lalchhuanawmi (Completed)

[ngaia]

Politician Nupui Hring nun
S-2
Chapter-11
Ziaktu: Cck Lalchhuanawmi


Pasal neih lam reng a ngaihtuah si lo a, a mak reuh e. Kan hriat loh hian hmangaihnaah a vanduai te hi a ni maithei.


Tlaia Siamtea leh Freddy-a lo haw chu, Bawihbawihi an ko nghal chul.


Ka pawm lai chu min rawn chuh ta mai, "Het, het, inbual fai phawt rawh u", ka ti a. A tlanin an tlan.


"Nu, in pindanah ka inbual dawn", Siamtean a ti a. Ka chhâng hman lo, a thlawk ni berin a lang.


Muangchangin Freddy-a a lo chhuak a, "Inbual turin ka tih che kha",


"Nu, ih maw; Hall-ah kal tho a ngai a, ka inbual lo mai ang", ka thle bak.


Bawihbawihi ka pawmtir dawn chuang lo.


"Bal taka Bawihbawihi pawm ka phal lo a nia", ka ti a. Ner sâwngin a tukkhum a hiat nuah nuah.


"Inbual vat rawh, a inbualfai hmasa zawkin in pawm ang", ka ti ale, a mawng phe ka hmu chang chang.


U Hmain, "Inbual fai pawh nise, an pawm ka phal lo a nia", a lo ti. Ka lu an tihai.


U Hmain Bawihbawihi chu min chuh vat reng bawk. A tawpah, ka chuang ta leng zel mai a ni.


Siamtea a inbual zo hmasa ber a, Bawihbawihi a pawm thuai. Freddy-a inbual zoin a rawn chuh veleh.


U Hmain, "In mak em em lutuk, a ṭhut theih tawh kha; pawm pawm tawh suh u", a ti khar khar.


Ka en tawp tawh, inrawlh pawh ni ila min ngaithla dawn chuang lo.


"Homework in nei lo em ni?", ka ti a. "Nei lo", Siamtean a ti thuai. An nei tih ka chiang em mai.


Freddy-an, "Hall-ah ka va kal tawh teh ang, Nu; sawmhnih min lo pe teh", a ti a.


"Dressing Table-a Purse-ah a awm, 500 va la rawh",


"Tinge? A va han tam",


"Va la rawh", mak ti deuhin a kal hna hna.


Siamtea hnenah, "I nu in tlawh ṭhin em?", ka ti a. A bu zeuh. Freddy-a a lo kal thuai.


"Ka bulah lo ṭhu teh", Freddy-a chu ka bulah a lo ṭhu a, "Thawhṭan khi Bawihbawihi kum khat tlin Cham a ni a, zaninah in Nu bulah riak turin kal ula; Thawhṭanah in lo hawpui dawn nia", a rukin ka ṭang nasa lutuk.


"Ngati nge?", Freddy-an a ti he haw.


A chang chuan, zaidamna hian a tlin dawn ṭhin lo.


"Insiam rawh ule, in riahpui ngai si lo a; a khua a har ang", ka ti sap a. Dik takin, mahni hma chauh ngai thei ka ni lo.


Manoi pawhin a tuar nasa, a tir aṭang rengin a tuar nasa ber a ni hial ang.


"Nu, riak turin min duh tak tak maw?", pha dai hian Freddy-an a ti leh. Siamtea a ngawi reng.


Bu nghatin, "Duh tak tak e, School uniform leh hak thlak keng ula; School bânah in pathumin in lo haw dawn nia. Bawihbawihi piancham lawm turin", ka ti seuh seuh.


Siamtean, "Thawhṭhan chu, School kan chawl dawn lo em ni? Bawihbawihi piancham a nia", a lo ti.


"School chawlh mai mai ka phal lo. In lo haw hnuah daih alawm Hun serh leh chaw kan ei dawn",


"Mahse, Nu, Thawhṭan khi chu chawlh phal mai la", Siamtea bawkin a ti leh.


"Ka phal lo ka tih kha, insiam rawh r'u. Vatin",


"Naaa, Nu; riak loin naktukah bazar pahin kan lêng ang a", Freddy-a chu a thaw hawk.


Ṭhutthlengah a bawk a, "Lallawmawm, insiam vat rawh u ka ti", ka ti hlak a. A tho hna hna.


Ka ṭhutnaah ngawi rengin ka awm, "Nu, kan insiam zo; zanah Bawihbawihi ṭap leh ta se", Freddy-an a ti a.


U Hmain min chhân khalh, "Ka awm hi, lehkha zir ṭhulh lo ula aw".


An unauin min kuah a, "Thawhṭanah in pathumin in lo haw ngei ngei dawn nia", ka ti sap.


Pawn thleng ka thlah a, u Hmain Bawihbawihi puain, "Dawrah ka va kalpui teh ang. Ei châk te i nei em?",


"Nei lo, lo haw vat ula aw".


Kawngka ka khar a, pindanah ka inkhung. Khum nghengin chhuatah ka ṭhu a, eng nge ka ngaihtuah pawh ka hre lo.


Ka lu chung zawn hi a vir kual vat vat ni maiin ka hria.


"Chhuanpui?", Sammy-a thawm ka hria chu ka tawt up up.


"Chhuanpui?", ka hmaah a lo ṭhu thla a, ka chhâng lo. En pawh ka en lo.


Thu laktlaklo zet ka han zawt pek a, "Ngati nge min hmangaih? Chhungkaw tikeh chhetuah min chhuah der alawm".


Aizawlah lo awm malek ila ṭha tur.


Min hmu loin rilru thar a pu lo tur hi a nia. Lal Fanu pawh a la damin, hlim takin chhungkua an awm tur a ni a.


"Lo kal teh", tiin, min kuah a. Bawihbawihi a pawm khawm ang chiahin min pawm.


A ngawih reng hnuah, "Chhungkaw tichhetu ni loin phuar khawmtu zawk i nih hi theihnghilh ngai suh", a ti a.


Awmzia ka hre lo.


Ka âwm tawt lutuk tihthawl nan thâwk ka la vak. Min tibuai leh ta si a, Sammy-a bân bul ka seh vak.


Sammy-an ka hnung a bêng thek thek a, a tawpah ka ṭap chhuak a; mit tui luang chuan min tihahdam sawt.


Zawi zawiin ka nêm tial tial a, mit tui khan min tihahdam.


"I la ṭap leh duh em?", a ti chu, ka nui sak ringawt.


Ka biang a chul heuh heuh a, "Damdawi i ei ka phal bawk si lo, Hmar lunglien i nih kha; ṭang fan fan teh khai", a ti leh a.


"Sam, ka tihpalh lutuk. Ka inthunun ve viau chuan ka hria. Zanin tlai chu ka thei ngang lo a ni", Lal Fanu sawi chhuah ka tum hman a, ka inveng thei hram.


"A pawi lo, a pawi reng reng lo", a ti dam diai mai si a. Ṭah a tichhuak.


"Ka u leh Bawihbawihi ka tâwk a, Siamtea leh Freddy-a te an nu bulah i kal tir em ni?",


"Aw, pawi ti lo hram rawh. Ka lainat em a ni, i lungni lo lo tiraw?",


"Lungni lo lo e, nachang i hre em zawk a ka ti mawle", a thaw hawk a, "Ka'n intifai phawt ang e", min kaitho a.


Inbual turin a liam, u Hmai te haw hun nghakin kan chawhmeh ho ka chhuang lum.


Naktukah Hnahthial leh Thenzawl aṭangin mikhual kan nei dawn a, Lalfela te chhungkua pawh an lo chho dawn.


Bawihbawihi kum khat tlin lawmna chu Hnahthialah an rawt deuh, nimahsela; a u te pahnih School kal an ni bawk nen, kan ṭhulh ta zawk.


Sammy-a inbual zo chokaah lo phei vein, ka bulah a ṭhu a, "Naktukah Sa lei ṭeuh a ngai ngei dawn mai a, eng Sa te nge kan lei ang?", ka ngawi ren rawn.


"Sa zawng zawng a ni mai alawm. Takah, Cake hi",


"U Hmain Bawihbawihi inah lo awmpui se, kan pahnihin bazar ang hmiang",


"Chuti, zingkarah bazar a ngai ang; Sa chu zingkarah a thiangin a ṭha", a kiai sak a.


Tunah chuan, Bawihbawihi pawhin kum khat a tling tawh dawn a; buainain min tlakbuak tawh suh se.


Sammy-a chu hnaih sauh sauhin, mak ti taka min en chu, "Thlahrang hmu ang maia i phawk hru mai a, min tihlau mai dawn", a vei nuih seih.


Ka kâwngah min kuahin, min pawm a, "Kan pahnih chauhin kan awm bawk a", pindan a melh zeuh.


Hrethiamlo lui ngatin, "Kan awm a ni mai a, eng nge ni vak?", ka ti he haw.


A ngaih dan a ni lo lutuk, min thawhpui lawk a; living room-ah min luhpuiin sofa chungah min nghat chawrh.


Ka kap karah a ṭhingṭhi a, ka kut pahnih lu chungah a man khawm, "I hrethiam tawh em?", ka tal laih laih.


"Hrethiam lo, u Hmai te an lo haw thut thei; kalsawn teh",


"A la hma, an lo la haw teuh lo mai", a ti zo chiah, "Kan lo haw e", an lo ti nghal.


Sammy-an min thlah a, ka ṭhu chhuak thuai. A awm sawn tur chu mi han fawp nghek pek a, mak thei nawk nawk a nia.


"Hetah kan awm", u Hmai te a ko a. "Dawrah ka han tir teh ang", a phun sup chu a bengah ka pawt, "Han tir vaih teh, hetah hian i mu char char ang", sehchilh deuh takin ka ti a.


A ngai thutak lo, a nui ruh ruh ringawt.


"In insual elo?", min hmuh rualin u Hmain a ti pek.


Sammy-an, "Hmar Hrangsie kut hi kan tuar reng mai", a han ti a. Ka thlah rang teh asin.


A beng ka pawhna a sen vek, Bawihbawihi a pawm vat a; u Hmai nen chaw ei kan siam.


Chaw ei kham hnu rei vak loah dawra kalpuiah min sawm teh tlat.


Ka han peih lo mai mai khawp a, Bawihbawihi a pua a, "Kalpui mai teh, a bengchheng lutuk", u Hmain min ti tawh.


A bengchheng em lah tak a, "Chhuanpui, kal ang; mawh, kal ang", a ti sek mai a. Thluak a tibuai.


A puak, a fanu lah a tiṭe peih si.


Ka kalpui ta nge nge, Bawihbawihi chu hma lamah a pua a; kan mi tawh apiang hnenah, "Ka fanu a nih hi", a ti ziah bawk.


Tumahin an zawt lo, biak pawh an be lo, nui varin, "Ka fanu a nih hi", a ti ngei ngei.


A changin ka kokia min kuahin, "Hei, Bawihbawihi Nu", a ti bawk a. Inchhuang taka sawi hi a ni ber a, zahthlak ka tih laiin, "Engvangin nge ka zah ang le? Ka fanu leh a Nu ka hmelhriattir a ni ve mai a", a ti sam et mai sia.


Chuta chin chu, zahah ka la ta bik lo.


Nuam ka han ti mai mai tawh khawp a, "Ka fanu leh a Nu, ka hmangaih em em ka nupui ni bawk", a tih tawh chuan nuih loh theih loh a ni tawh ṭhin.


A hlimna chu, tu han chhuhsak theih rual a ni lo.


Chhuhsak theih mi lah ni nghal lo chuan. A hlimna chu ka hlimna a ni a, han inhmuam up churh reng thei ka ni bik lo.


A kâwngah ka kuah a, ka kokiah min kuah hle hle. A va han nuam tak.


Dawrah kan lut a, ka rin loh lutukin Kâwr(CD) a han lam mai a nih kha. Ka zak lutuk chu ka hmai hupin ka chhuak daih.


Pawnah ka ter at at, "Chhuanpui?", ka melh rawm rawm.


"Ka hawsan dawn che", hmai hupin ka ti a. Min kuah bet tlat, "Min hawsan duh la chu, inah i awm tawh ang. Min hawsan duh lo tih ka hria alawm", a han ti zui a.


"Haw ang le", a ti a. Min kalpui a, ka zak lutuk chu kal pawh ka kal ṭha hleithei lo.


Dawr aṭanga hla fe kan thlen hnuah ka pangngai thei chauh nghe nghe. Pangngai tihah, la zak tho mah ila zahna a kiam deuh.


Hmai ka hup tawh lo.


"I lei nge lei lo?",


"Lei tura kal na na na, lei loh ten le", a ti ham ham a. Intithei takin a kekawr ipte a la bêng thak thak zui.


Ka va han ngei tak.


Ka kokia min lo kuahin, "Zanin chu, a Ni bulah riak duh se tiraw?", a phun sup.


"Riak duh lo se ka ti", tia ka chhâng chu, "Lalchhuanpui, i rilru a chhe lutuk", a titau a. Min kalsan nul nul.


A lo hawilet bau lo, kei ai mahin a luhlul.


A chet dan chuan min tihlim em a, nui ver verin ka thlir vawng vawng.


Ka ngaihtuah chian poh leh, chhungkaw hlim lai tikeh darhtuah ka inngai. Aizawlah awm loin, Sammy-a lahin min hmuin rilru thar a pu lo ang a, tih hi ka ngaihtuah fo.


Chhungkaw tikeh darhtu ka nih loh thu min hrilh chamchi mah se, ka inpawm fithla thei lo.


A thleng tur thleng fel tawhin, kan nih tur ang angin kan ni ta sa sa; khang hun leh kum chhung zawnga min enkawlna ka rul zo thei dawn lo, ka theihna zawnah ka inpe zo hle tur a ni.


Sammy-an min thlahlel tih hre karin, Bawihbawihi muthilh hmatir ka han tum ale; mut chhuak avanga ham bai bai a neih chu sawi loh, a harh tawlh tawlh emaw tih tur a ni.


Zan dar sawm tlangah pawh a Pain, "Ka fanu duatpui, i mut a chhuak tawh; muhil tawh rawh", tiin puak a tum vei rawk a, a Fanu a tal pit a, chhuatah a tla thûm lo chauh.


A hnung aṭanga a tawlh thla, Sammy-an a man hman.


U Hmain, "Naktuk Inrinni a ni tho, a duh chen chen meng rawh se", a lo ti mauh mai a. Sammy-a beidawng hmel lutuk chu, Hauhuk Thei phak bar an tih ang chiah a ni.


"U, mu tawh rawh. Nilengin i awm tawh alawm, a muhil thuai mai ang. Mangṭha", tiin, u Hmai a kuah a.


Bawihbawihi pawmin pindanah a luhpui daih.


"A nih le, Bawihbawihi u te pahnih awm lo chu a khawharthlak alawm le. Chhuanpui", ka kut a rawn vuan a.


U Hmai chuan, "Manoi chunga rilru chhia pu loa, riak tura i kaltir avang hian ka lawm lutuk aw. I ṭhianpa leh Lal Fanu thihnaah, a mawhphurtuah a inruat tih kan hriat kha; ngaidam la, a â lo chauh a ni si a, zâwldawh takin i dawm teh ang aw", a phun sep sep a.


"Dawm lutuk e a, ka ngaidam daih tawh alawm. A tur ve reng a ni a, a fa te a ngai ṭhin tih ka hria; mahni hma chauh sial thei ka ni hleinem",


"I thinlung ngilnei tak hi chhawm reng rawh, Bawihbawihi hian han chhawm nung ve se ka ti mang e", u Hmain a ti leh sep a.


Thinlung ngilnei min ti a, ka ngilnei em tih ka inzawt fo.


U Hmai nen kan inmangṭha a, Bawihbawihi muthilhtir tumin Sammy-an puain a lo âwi nasa lutuk.


A hmalamah a pua a, pua a ang lo; a kuah bet hi a ni ringawt.


"Bawihbawihi, ka fanu hi mu hle hle la, bei hle hle. A mut loh chuan keiman ka beng mu awi ang", tiin, a insâwipui a, Bawihbawihi hnungah a bêng thek thek a.


Bawihbawihi mitmeng lah a fiah ropui, min hmuh chuan, "Hnutê hmanga âwih mut han tum teh", min ti a.


Khum chungah ṭhuin hnutê ka pe a, a meng fiah ngang mai. Kan muhil har dawn mang e.


Sammy-an, "A intihtheih dan hi, amah aiin ka-", a ti chu, "Het", ka ti vat.


"A hrethiam chuang lo", a vûi nasa mai.


"Hrethiamlo tih ngawt loh tur, ṭawng insum tur a nia", dam zetin ka ti a. A beng pawt zeuhin, "Sorry!", a ti a.


A fanu muhil har chuan a tilawm thei lo.


Lukham hnuaia Kâwr a dah chu la chhuakin a thlêk leh ṭhin. Bawm thum lai a lei ve a, bawm khatah a tam dawn tehreng nen; a duhâm mah mah a ni e.


Sawmpahnih a rik chuan Bawihbawihin a mit a nuai ṭan, hnutê a hne ṭha duh si lo a, hmuamtelel a hmuam.


Sammy-a pawh a muhil takin ka hria.


Pindan aṭangin ka chhhahpui a, muthilh a tum hnai ta a ni ang; a zâi rat rat. Inâwihmut a tum ṭan.


Lal Fanu thlalak a hmuh chuan a kâwk a, kan va dinchilh, "A u Lal Fanu a nih hi, Vanramah awmin min thlir reng a; min awmpui reng ṭhin", ka phun sar sar.


Hrethiam tak ang maw.


A muhil emaw tih laiin, Sammy-a chuan hnung lam aṭangin min kuah.


Engmah phei chu a sawi lo, "A muhil hnai tawh a nia, i nghak peih ang em?",


"Nghak peih lo", a ti muang charh.


"Pindanah lo âwi la, in awm loh chuan khua a har", kan inzui lut a.


A mu meng kur chu a bula dingin, "Sam, muhil ta che",


"Mut chhuak a reh", a ti ta. "Engzah nge i lei?",


"Eng chu maw?", mi pawh en loa a tih chuan, "Dawra mi kha, lukham hnuai aṭangin bawm thum i la chhuak ngei mai a; a dang a la awm em?",


"I dilchhut, awm mai mai rawh", min ti daih. A la lungawilo reng a niang. Min la hawisan daih zui.


Tihtauh a hrat dawn tlat, "Bawihbawih, Apa nen zingah kan bazar dawn a, i piancham cake tur leh Sa chi hrang hrang lei tura kal kan ngai, muhil tawh rawh le", ka ti a.


Sammy-a ka va en, a lo nui vur vur. Ka hmuh hlau takin a inhup ṭai ṭai. Hmu lo pawh ni ila, a hriat theih.


Dar hnih rik hnaihah a muhil ve thei ta hram, chau tak ka ni. Mut chhuak nen, meng mang hlei loa âwi ka ni bawk a.


Khuma ka mut feltir rual rualin ka mu thla ve nghal. Sammy-a pawh a muhil tak takin ka hria.


Ka mut dan ka siam rem peih tawh thlawt lo, Bawihbawihi mutna a rem tho.


Zinga bazar tur kan nih avangin, nghet mang lova muhil ka nih bawk avangin ka harh hma.


Sammy-a a mu tawh lo, phone-ah dar zat ka en a; dar nga a la ri chiah lo.


Bathroom-ah ka kal a, a ha a lo nawt mial mial. Min hmu chu phu zawkin, "I va tho hma ve, mu leh ta che",


"Bazar tur kan nih kha, min kaitho lo a",


"Ka u kalpui ka tum ta mai, Bawihbawihi awmpuiin lo muhil leh mai rawh; i muhil ṭha si lo a", a ti a.


Ka hnial vat, "Ka u a hah zawk, Bawihbawihi nen lo awm rawh se".


Min hnial let dawn emaw ka ti hman, "A ṭha alawm", a nui vur vur.


Thawm kan dim tehreng nen, Bawihbawihi chu a meng ta kuau mai!


Pawm ka tum chu, "Lo insiam rawh, keima'n ka lo ti ang", Sammy-an a ti ta zawk.


A diaper thlakin, wipes-in a hmai a hru fai a. Bathroom-ah luhpuiin a zun a thli a, a hmai a phihsak.


Diaper thlak fel vek hnu leh, a hmai a hrukfai vek hnua chutianga a ti chu nuih a za zawk.


U Hmai kan kaitho a, Bazara kal hmain hnutê ka pe leh rih.


Sammy-a phone a ri a, "Aw, ka pa", a ti zui a. Vawiinah an lo phei dawn a nih kha. Lalfela te chhungkua pawh an lo thlawk chhuak ṭep tawhin ka ring.


U Venpuii te ka zuk hrilh ve a, an lo kal thei dawn lo.


"Sa lei a ngai dawn lo, ka Pain Vawk pum rep a lo keng dawn", a han ti mai chu, "Rapthlak e", u Hmain a ti hluai.


"A pum tihah, a zahve rep leh a zahve hring", a ti leh a. "Tihzia ve, Sa dang lei a ngai tho em?", ka lo ti a.


Sammy-an, "Duh leh, Bawngsa lei ila; Vawksa leh Bawngsa a awm chuan tawk mai rawh se. U, i ngaihdan eng nge?", tiin, u Hmai a rawn a.


U Hmain, "Chhuanpuiin Sa dang ei chak a neih chuan in lei dawn nia, kei chu; eng Sa pawh ka ei thei vek. Uisa awm phei se, a famkim lehzual ang", a han ti a.


Sammy-a ngaihdan ni lo lutuk chu, a thle bak.


U Hmain Uisa tui a tih em em chhan hi ka hre lo, ka la ei ngai miah lo a; eiah ka ruat lo. Chuti ni mah se, a ei ho ka haw(hua) chuang lo a, an ei duh phawt ahnu ei se ka ti. Ka ei duh loh avanga buaina va thlensak ka tum lo.


Ka khawngaih tlat zel Ui ho hi. Sammy-a pawhin a ei duhin ka hria.


"Hun Serh hmanna ruaiah Uisa a awm ka duh miah lo, a hranpain kan la lei dawn nia", Sammy-an a lungawi lohna a thup hram hram.


U Hmain, "Ka sawi mai mai a nih kha, ei lohna a rei tawh em a; a tuina ka pawh phakin ka ring tawh lo. Khawi Bawihbawihi kha, va kal tawh r'u, in tlai lutuk ang e", ti pahin, Bawihbawihi a lo la.


Sammy-a nen Bazar turin kan chhuak a, Bawihbawihin min ngen miah lo chu; a lawmawm rualin a nawm dan a dang.


U Hmai a ngaina zawkah ngaiin, ka han thik dawn ṭhin a; Nu nge nge chu a tawpah ka Ṭang bawk a bel dawn tih ka hria a.


Thikna rilru ka paih thuai.


Vawksa kan lei ta miah lo, Bawngsa kan lei ṭeuh thung.


U Hmain Uisa a sawi ri ta si, Sammy-an a phal lo bur kha a inthiamlo nimaw, "Uisa hi kan en pah dawn mawnile?", a ti nghe nghe.


Uisa ka ngainat loh chu thuhran, amah ang thoin Hun Serh hman ngaihnaah Uisa a tel ka duh lo.


Ka rilru chu tlang takin ka hrilh reng bawk a, "Nakinah, a hranpain kan la leisak dawn nia", a ti a.


Chutah chuan kan lungawi ta ber a, a inthiamlo lo bik ta love.


Bawihbawihi Piancham kawr lei turin Branded ngat a duh bawk, "Hlawh neih man a awm nang le!", a ti mai a.


A thinlung aṭanga sawi a ni tlat thung, Lal Fanu ai khan a thinlungah a khungin a hmangaih bik emaw tih mai a awl.


Kawr bakah pheikhawk pawh Branded ngat a lei. Bakilh nalh zet mai a lei bawk.


"Bawihbawihi chuan rawng Sen hi a inhmeh ber", a ti a. A hlim si, a nui vur vur reng mai.


Kawr, pheikhawk leh Bakilh chu rawng Sen a ni. Hnial mi ni nghal lo chuan, a fanu tan a inpe ral ṭhak ka ti mai.


Cake zawrhna dawrah kan kal a, he Dawr hi U Ngaia cousin Rinfeli dawr a ni nghe nghe.


U Venpuiin sawi lo se chu ka hre lo ang.


Amah Rinfeli hmel reng reng chu a nung sarh mai a, biak a nuam si. Chalsam neiin, a tukkhumah a sam a bâwk.


A uniform hak chu a inhmeh, "U Venpuiin min lo hrilh a, Thawhṭana lo lam turin maw in duh?", a ti a.


Ṭhutna min kawhhmuhah ṭhuin, kan titi.


Sammy-a bawkin a fanu tana Piancham Cake a duh dan a sawi. Rinfeli ka ti lawl lawl a, kan aia U daih a ni.


A fapa Bawihpuia nen an chhinchhiah dun kar, Sammy-an a sawi zawh hnuin Bawihpuia a kalsawn.


U Rinfelin Coffee Latte te min hlui a, a nuam reuh.


Awm rei hman ni hek lo, lungawi takin kan inthlah. Motor chhunga kan ṭhu lut chiah chu, "A fapa kha hmuh tawhna tlat ka nei", Sammy-an a ti a.


"Khawiah chuan maw?",


"Aw, ka hmu tawh. A ngeng ṭalh a nia aw. Hmân kumah tawh, kan College zirlai mipa ṭhenkhatte nen intibuaiin an insual chiam tawh. College leh College ang zawngin an lo insual a ni awm e, midang ho kha chuan ngaihdam dilna an chhak chhuak sup sup a; ani Bawihpuia erawh kha chuan, "Tihsual ka nei lo", ti tlatin, ngaihdam dil a tum lo. Hrem nan an Colllege aṭangin an hnawt chhuak ta em aw ka hre ta lo", a ti a.


"Chutiang ngaihtuah suh, fapa pahnih i nei a ngaihsak zawk teh. Pumruaah chuan Tlangval tia koh theih an ni dawn ta mai a, an Rilruah erawh la Tlangval lo tura tuhsak an ngai", min pawmpui a ni ang, "I sawi dik chiah alawm, an harh lo riau chuan ka hria a; a rukin an harh maithei bawk", a ti a.


Kan tlan chhuak a, "Hun ka tih hma bialnu neih an tum lo ve ve, Freddy-a erawh a nghal ru tlatin ka hria. A ni lo maithei bawk a, ka thusawi an zâwm hle chuan ka hria. Ngaihzawng lam an la sawi ri lo chu a nia", ka ti seuh seuh a.


Ngaihzawng lam hi min la sawipui lo, midang hnen aṭangin, "An inhnimhnai", tih emaw, "An inngaizawng", tih emaw ka la tawng lo.


Miin min hrilh meuh tawh chuan a lo nasa tawh hle tihna.


"Hun remchangah ka han sawipui ang e", Sammy-an a ti a. "Nia, Pa berin i sawipui a ngai a ni. Ngaihzawng avanga lehkha zir ṭhat theih loh an neih loh nan hrilh ngun hle rawh aw", ka ti mawlh mawlh.


Ngaihzawng avangin rilru na takin an awm ang a, zirlaiah an tihchhiat phah ang tih ka hlau.


Bawihbawihi piancham lawm turin an lo thleng khawm ta.


Siamtea leh Freddy-a awmna min zawh(zawt) an ching. Ṭha takin ka hrilh zel, an mi fak duhna avanga Manoi bula kaltir ka ni lo.


Min fak nasa lutuk a, ka ning deuh ta, "A dinhmun a harsa em em a, ṭanpui theitu leh a khawhar hnem theitu te chu a fapa pahnihte kha an ni. Hmeichhia leh Nu ka ni a, a dinhmuna ka inchanin tuarchhel ka ti zawk ngawt asin", ka ti a.


An ngawi diak, a tawpah âw thian hmasa te tein; Hnahthiala ka pain, "Ka fanu hi i thinlung a ngilnei a, fak loh che tum mah ila, fak lo thei lo che hian min siam i thiam em a; insum zo loin kan han fak leh hluam ṭhin che a ni e. Ninawmah la hlek suh ang che. Hei ai nasaa fakna thu dawng turin inpuahchah sauh rawh", a ti ta mai a.


Ka zak lutuk, Sammy-a ka hmu phir tawh vel.


Ka sa pup pup, "Aa, ka pa chu; i tizahthlak thei em mai. Faktlak kan nih loh hi maw!", han ti ngial mah ila, Sammy-a berin, "Ka pa sawi a dik chiah alawm, fak lo thei lo chein min siam thiam em mai. Fakna thu dawng mawlh mawlh turin inpuahchah rawh", tiin a lo inrawlh ta si a.


Ngawih ka chuh ta.


Lalhmingi lahin min nuih ver ver.


Hnahthiala ka pa bawkin, "Kan Fanu Hmingi hi chu, fak a ngai lo. Amah tawp hi Fakna leh Hriattirna a nia", a ti a.


Kan nui dar dar, Hmingin, "A awihawm loh lutuk, ka pa chu min hmer tel ve kher a", a ti a.


Lungawi lo takin a inawmtir a, Hriatpuian a kuah hle hle.


"Robawihi lah hi, a ṭawng theih kan tuar zo lo ang tiha kan ṭih ruk kha a ni; rin loh lutuk tak maiin Fakselna a ni hawt a. Kan fapa te nupui, kan Fanuah te hian keini in Nu leh Pa lung hi a awi hliah hliah a ni", Hnahthiala ka pain a ti a.


Lung lam a chhe dawn dawn. Hnuk a ulh ṭun mai.


An lo thlen khawm zan chu hlim takin kan titi, Thenzawla ka nu leh pa pawhin nuam an ti.


Bawihbawihi pawh a muhil hma ta hlauh, dim takin ka mut a; Manoi ka call.


"Siamtea leh Freddy-a rualin Thawhṭanah lo kal ngei ngei ang che", ka ti a.


"Ka lo tum ang", ti ringawtin min chhâng.


Siamtea leh Freddy-a min biak tir vat avangin, han sâwm luih a rem ta lo.


"Lehkha in zir em?",.ka han ti a. Bawihbawihi an ngaih thu ngawt an sawi.


"In lo haw hunah, in duhtawkin in pawm dawn nia", ka ti a. An ṭe chel chul, "Nu, Thawhṭan chu School min chawlhtir mai la", Siamtean a lo ti.


Bawihbawihi ka neih dawn avanga School chawla Dandawi ina an awm hre chhuakin, ka phalsak ta nge nge.


"Nu, I Love You!", Freddy-an min ti ta.


Ka lawm lutuk chu naupang ang taka chhuat laia han zuan(zuang) zak zak ka nâp a.


"Keipawhin ka hmangaih che", ka ti let.


Manoi tan ngaihthlak hrehawm a nih ka ring lo, a dinhmun ka hrethiam a; ka dinhmun min hrethiam vein ka ring.


Sammy-a a rawn kal a, "An mu vek ta em ni?", a bu zeuh.


"An chau tlang a ni ang e, dar kua chauh a ni a; an Zanlai der tawh", awmze nei fe hian mi han nuih a.


Ka sirah dingin min kuah, "Zanin chu, min hniallo hram ang che aw", a inthlahrung lutuk chu nuih a tiza.


Chutih rualin, min thlakhlelh ṭhinzia tur ka ngaihtuah; rilru pangngai ka pu ta a. Pangchang ngam tur niin, min thlakhlelhzia tilang tur a ni reng bawk.


Intithei takin lukham hnuaia a dah ṭhat Kâwr la chhuakin, "An siam thar a ni bawk a, a rim pawh a dik zaih e", a phun sup.


A hlim bawk si, ka hlimpui ve em em ringawt.


Bawihbawihi harh a hlauh em avangin chhuatah bawk a ni min chetpui. A hma ang tho khan.


Chet nat a tum ruh a, a che na reng bawk.


Ka zâi erawh a ngai thiam em em thung. Vawikhat mai a duhtawk thei lo, "Chhuanpui Darling, vawikhat leh chauhin aw", zak leh inthlahrung tak hian a ti a.


Ka hnial lo, a tuk Chawlhni a ni a; thawh tlai tûk a ni tlat.


Tin, amah chauh ni lo; kei tak hian ka thlahlel.


"Sam, min thlakhlelhna aia nasain ka thlahlel che; muangchang lo hram teh khai", lo kun hniamin min fawp a.


Uar takin ka fawp let, ka kut pahnih chu ka lu chungah a man khawm; a kut pakhatin ka khabe a dawm a, kâ chhungah Lei an inbuan let tal tawp tawp.


A vawihnihna turin min chetpui leh ta tak tak a, a mipa zawk e ti lo chuan a rum chhuak leh nghut ṭhin.


Min tilawmtu ber a ni tlat, a rum chhuah meuh tawh chuan tilawm tâwkah inngaiin; chhungril hi a hlim veng veng zel.


Ka ngawi a ti deuh nge ni, chawlin ka taksa chhung aṭangin a chhuak ta mai, "Chhuanpui, nuam i ti ve nange? Ka tina che em ni? Sawi hreh suh, ka tina che a ni tiraw? Kâwr hman hi nuam i ti lo em ni?", a ṭi dâk.


"Ti e, nuam ka ti lutuk. Min tina lo. Sam, min tina lo, chhunzawm rawh. A tawp min thlentir ṭep a nia",


"I chiang maw? Sawi hreh hauh suh ang che", ṭi dâkin a ti fan.


Ka fawp a, "Thudik alawm ka sawi, chhunzawm ang", ka ti a. Min bawh ṭha leh.


Kan chawlh avang nge ni, a lem ta riauin ka hria. Nuam a ti tawh loin ka hre ta, che mawl ve tawp hi a ang ber.


Ani'n nawm a tihna tilangin a rum chhuak hial a, kei erawh; nuam tichung reng siin ka inthup a.


Min tihnat leh tihnat loh min zawt hial reng a, a ngaih a ṭha ta lo niin a lang.


Sammy-a bekah dawmin ka fawp ngawih ngawih, "Sam, min chhâng rawh", ngen chawp a ngai ta hial.


Min chhâng let a, zau lo têin ka âng a; ka taksa chhunga a chet nat tluk zetin ka kâ chhungah pawh a che na.


Ka inthup duh ta bik lo, thawm ka chhuah ta hial a. A tilawm ngang mai, Bawihbawihi harh hlauin ka melh chho ṭawk ṭawk ta mai.


A vawihnihna atana kan tlingtlak hnuin, ka sirah a rawn bawkkhup thla nghal.


Dang a ro hulh, "Sam, dang a ro lutuk", ka ti sep. Ka âw chu a chhuak thei ṭawk ṭawk.


A han vei nuih seih a, lo thoin min fawp a; a chil min fah mawlh mawlh.


Pathlawi tak hi chu aw...


Show post links
Top