STORYFB.COM

Chapter-11



Lalmuanzova POV




Shower hnuaiah chuan ding in bang chu ka in nem khalh ran a, "A ni theilo vang" ka ti chhuak sup bawk, ni e, dawt a ni ngei ang, ka nupui hian min phatsan ka ring theilo, mahse kha mipa kha tunge ni ang. Engvangin nge a ruk a an in hmuh thin ni ang, zawhna tam tak chhanna ka hriat siloh chu ka in zawt nawn tluk tluk a, ka thaw chhuak leh hawk thin mahse a sawt silo, enge awmzia ni ber pawh ka hrelo, ka chhungril erawh in ka nupui ring tlat turin min fuih reng thung.




Bathroom atang chuan ka chhuak a, Bawihi chu khum mu lovin bathroom ka luh dawn a a thut ngai chuan a lo la thu reng a, min en reng bawk tih hre chungin ka haider lui a, ka thawmhnaw bawm lam chu pan in boxer chu ka la chhuak a, ka ha nghal zat bawk, khum lam chu ka pan a, "Lo mu turin ka ti che sia" ka ti bung vut a, hetianga biak hi ka duh lo, mahse mipa dang nen restaurant a an awm lai thlalak kha ka mitthla ah a rawn lang zel a, thikna nasa lutuk in min luah khat bawk nen ka tawngkam bung lutuk pawh chu ka thunun theih piah lam a ni.




"Tinge zu i rawn in a?" a ti chhuak leh sep a, a aw chu zawi hle mahse ka hrechiang hle thung, "Ka sawi tawh kha, thian ten in turin min ti lui tlat ka tihkha, mu rawh, a tlai tawh a nia" ti supin ka mu thla nghal zat a, a awm na lam hawi lo mah ila a la che sawn eih lo tih ka hria, reife hnuah chuan a rawn mu tha sat sat a, kha mipa kha tunge ni ang tih ringawt chu ka in zawt nawn tluk tluk a, vawikhat mah ka la hmu ngailo, Bawihi hmelhriat mai mai a ni thei tiin ka ngaihtuah a, mahse an awmdan in hnaih zet te kha...




Chhin khat te mah ka chhing lo, zingah chuan hma takah ka tho chhuak a, hna kal turin ka in siam nghal, Bawihi chu ti harh lovin room atang chuan ka chhuak a, Opi pawh a rawn la thleng lo bawk, damdawi in ka thleng a, engmah pawh ti hlei lovin ka chair ah chuan thu in nizan a ta tawh ka ngaihtuah naa awm chu ka ngaihtuah leh ta ngut ngut a, engthil teh hrep nge maw nita ngai le, Bawihi hian min phatsan thei dawn em ni, nilo chutiang thil chu a tilo tawp ang.




Tlai lamah chuan ni thei ngang ka hriat loh avangin Bawihi chu ka phone ta a, "Hello" a rawn ti zawi sep a, "Enge i tih, hna i lo thawk hah em?" ka ti sup, "Aih engmah ka tilo, tukin khan i kal lai ka hre miah lova" a tih leh chuan hna lamah buaina a awm thut vanga kal hma ka nih thu in chhuanlam ka siam a, nizan ka awmdan te ka ngaihtuah a, Bawihi lakah pawh ka inthlahrung thar hle, ni e, Bawihi hi ka ring tur a ni, min phatsan duh tur khawp a hmeichhia tenawm a ni hauh lo tih ka hria.




Kan in biak rei tak hnuah chuan a aw pawh ngaihthlak a nuam leh tawh hle, "I rawn haw dawn ah ka pa te in lamah kal kawi rawh aw, ka pa in a biak duh thu che min hrilh a" a rawn tih leh hnuah kan in biakna chu kan ti tawp a, ka thianpa Lalthantluanga chu thawven hmel zet hian a rawn lut a, hna a rawn kal dawn lo emaw tia, "Nizan chu in nu in a lo bauh lo che maw?" nui vur vur chunga a tih chuan ka rum nghut a, nizan kha chu ka in tam ve bawk nen a zawhna min zawh chu a awm lo hran lo.




"Enge hetah te i rawn tih a, nupui nei thar hlim i ni sia, i nupui amah chiah in i rawn chhuah san amaw?" ka ti nghut a, "Teuh nang, ka rawn hruai, motor ah min nghak a, thil pawimawh tih tur ka neih avangin ka rawn kal lawk a nihhi, ka kal lehnghal ang" a ti lehnghal zung zung a, a la hlim hmel em em zui, a awm tho e, a hmeichhe duh em em nupui ah a nei a, ka hrethiam khawp mai, rei pawh awm lovin a chhuak lehnghal thuai a, keipawh chuan ka thiltih tur ang ang te chu ka tih zawm nghal mawlh mawlh bawk.




Damdawi in atang ka chhuah chuan khua a thim tawh, karleh atang ka night leh tawh dawn a, ka nupui amah chauh a riah chhuah san a ngai thin hi hreawm ka ti takzet. Ka pa in min biak a duh avang chuan in pui lamah ka kal hmasa leh a, ka nu chuan min lo be vat a, ka pa chu library ah a lo awm a, ka lut nghal vat, "Ka nupui in min biak i duh thu min hrilh a" ti sup in ka pa hmaah chuan ka thu thla a, "A dik alawm, hnaah in buai lai a ni em?", a ti hmasa te te a, kan buai ve deuh lai a nih thu chu ka hrilh a.




"Ka biak duh chhan che chu i nau chungchang ah a nia" a ti sup a, "Enge ni a, buaina a nei em ni?" ka tih chuan lu a thing nghut a, "Chutiang lo lam deuh chu a ni" a ti chhuak nghut a, "Malsawma bialnu hi a rai a ni awm a, a naupai chu thla 5 laia upa a ni tawh nghe nghe" ka pa thusawi avang chuan mak ka ti hle, Malsawma ber kher in sawn a thlak chu mak tih loh rual a nilo, bialnu a nei tih pawh ka hriat loh laiin tunah a bialnu a rai mek tih ka hre nghal a nia, min thawng takzet




"Malsawma chuan neih a duh thu a sawi a, keipawn ka hnial hran lo, a hmeichhia pawh ka hmu tawh a, hmeichhe fel tak niin ka hria, i nu in engmah a la hrelo a, hrilh hmasak phawt che ka duh avangin" a ti leh sup sup a, ""A mak hle mai" ka ti chhuak hap a, "Ni e, keipawh hian ka hriat tirh khan mak ka tiin min fiam emaw ka ti zawk hial, mahse Malsawma hi ka chhuang takzet a ni, a thiltih hi a tha ka ti hauh lo, chuti chung chuan a mawh phurh na tlan chhiat san a tum lo erawh ka fak in ka fapa a ni hi ka chhuang takzet bawk" a ti leh dap a.




"A rang lama an in neih ngei a ngai dawn a nihchu, a hmeichhia ber i hmu tawh a tha i tih chuan keipawn sawisel na ka nei hran lo" ka ti sup a, ka pa pawh a bu nghat nghat a, "Zan lamah i nu pawh ka lo hrilh anga, a rang lamin in neih na chu kan buaipui tan nghal mai dawn nia" ka pa pawh chuan a ti dut a, ka pa te in atang ka chhuah hnu chuan ka thaw chhuak ham ham a, ka nau in nupui a nei ve mai tawh tur chu mak ka la ti tawp theilo, ka sawi tawh em ka hrelo, ka nau hi chu kan unau thum ah ro ro pawh a dangdai ber a, hmeichhia lah a ngaihsak hek lo, lehkha zir kha a thupui ber a ni thin.




In ka thleng a, Bawihi chuan ka lam a rawn pan vat, "Chaw ei ah ka lo nghak che a nia" a ti sep a, room ah inthlak turin kan lut zui nghal, ka thawmhnaw hak ka phelh a, Bawihi chuan suk turah a lo dah nghal zung zung bawk a, "Ka pa te inah chuan i kal ta em?" a ti leh a, "Aw.. kal e, Malsawma chungchang ah min biak a duh vang a nih kha" ka ti leh mai a, eng dang mah min zawh zawm tawh lo, Bawihi ka fak na deuh pakhat chu ka pa nen kan in biak na emaw midang hrim hrim nen a kan in biak pawh hian eng chungchang nge kan sawi tih min zawh a tum ngailo, ka hrilh a nih erawh in uluk takin min lo ngaihthlak sak thin.




Mut hmunah chuan Malsawma chungchang chu ka nupui ka hrilh ve a, a lo lawmpui khawp mai, "Ka nau in fa min neih khalh dawn a ang hle mai" ka ti sup a, ka nupui chu a ngawi vang vang a, "Bawihi" ka tih sup chuan "Aw.. enge nita?" a ti lawi rut a, "Nakinah fa chu kan la nei ve em em ang, ka sawi kha tan kan la deuh anga, fa chu kan la nei thuai mai ang" ka tih leh chuan a nui sen sen a, "Malsawma te chu an in neih vat a ngai anga, thla 5 lai a nih tawh chuan khawmuan chi vak pawh a ni tawh dawn silo a" a ti sep a, ka ngaihdan chiah a ni.




Malsawma te pawh chu thla thar kar hmasa ber ah an in nei ta a, a nupui pawh a fel hmel khawp mai, Bawihi nen an in kawm thei hle bawk, dan khatna an tlin miau loh avangin kohhran hall ah an in nei a, mipui lam pawh rawn kal an tha khawp mai, ka nau chu a hlim hmel hle a, hetiang taka a phur hmel hi ka la hmu ngailo bawk, a nupui chu a hmangaih hle tih a melh dan ah pawh a lang chiang ngang bawk.




Bawihi chuan Feli (Malsawma nupui) chu a en leh vang vang thin a, "A pum lian tawh mahse mo kawr saw a in hmeh takzet" a phun sep a, Bawihi hian vawikhat mah mo kawr a la ha ve lo, kan in neih na kha a phuah chawp em avangin court ah kan in nei tawp kha ania, ka chhungten khatianga in neih kha an phal lo viau na chungin min hnial lem lo bawk a nihkha, Bawihi chu ka en thin, vawikhat te mah mo kawr a ha ve ngailo tur ka ngaihtuah chuan dik thei ngang in ka hre lova, ka ngaihtuah naah chuan a awm zui char char bawk.




Karkhat lai a liam leh hnu chuan Bawihi chu in neih that pui a sawm ka tum ta a, ka birthday a ni tep tawh bawk a, karhnih lai a la awm bawk a, chumi ni ah chuan propose that ka tum a ni, min hnial loh ngei pawh ka beisei. Tlai khat hna ka bang a, ka haw lam chuan jam ah ka tang hlauh mai a, ka tan rei hmel hle nghe nghe, ka phun nghal hluk a, pawn lam ka hawi chhuan ka thil hmuh avang chuan khaw dang ka hawisawn thei tawh lo, ka nupui leh mipa pakhat hi cafe a an thu dun lai chu chiang takin ka hmu a.




Chupa chu ka en chiang a, hmani thlalak a ka hmuh pa ngei kha a ni bawk, an in thut hnaih em em a, phone ah chuan enge an en chiah ka hrelo thung, ka haw hma deuh a kan in biak khan a pa in a a kal tur thu kha a sawi si a, engvanga dawt min hrilh nge a nih ang, nge ni a Mary min hrilh ang tak tak khan Bawihi hian min lo bum zawk?.. Nilo chutiang chu a nih ka la ring phal chuang lo, mahse ka mit ngeiin mipa nen an awm dun tih leh dawt min hrilh thu ka hrechiang si.




Kawng a thawl tak hnuah chuan ka tlan chhuak zui a, in ka thlen hnuah room ah chho in bathroom ah ka lut tlang nghal, bang chu ka hnek dawt a, khapa phiangsen nen khan enge an tih ang, engvanga dawt min hrilh in kha mipa kha hmu nge a nih hrep, Stacy hian keihi min lo bum tak tak em ni tih te chu ka ngaihtuah a, ka kawchhung chu a so bulh bulh thei hial, a ni hian ka hnunglam ah min lo bum a nih vaih zawngin nuam sa tak chuan ka nun tir mai mai hauh lovang.




Room atangin ka chhuak a, Opi hnenah haw tura ka tih hnuah sitting room ah Bawihi lo haw hun chu ka lo chang ran a, tunah dar 6 a pel tawh a, nidangah chuan hetiang hunah hian a chhuak ngailo tih ka hrechiang ve hle bawk, kawngka chu a rawn ri khep a, Bawihi chu a rawn pen lut nghal zan zan a, "I va rawn haw tlai ve?" ka tawng thut avang chuan a phu deuh zuk a, a thin zawn chu dawn chungin sitting room lamah chuan a rawn kal hnai a.




"Nia.. duh aiin ka lo awm rei a" a ti sep a, dawt sawi hmel pawh a pu lo, "Chuan ka pu chu enge a an?" a hmel chu chiang zetin ka en ran a, "A tha lutuk, chaw I ei tawh em?" a tih chuan lu ka thing nghut a, "Um.. ka han in thlak anga, chaw kan ei zui mai dawn nia aw" tia room lama chhoh mai a tum chu "Ka pu in tih lovah kal kawi na I nei em?" ka tih leh chuan ka zawh na avang nge mak tih hmel takin min rawn en a, "Bawihi zawhna ka zawt che" ka tih leh sup chuan "Khawiah mah ka kal kawi lo, ka han inthlak anga chaw chu kan ei dawn nia" tiin inchung ah chuan a chho nghal a.




Tunah khan dawt min hrilh, ni e, dawt min hrilh chiang a ni, ka mit ngeiin mipa nen an awm dun lai hmu lo ni ila a thusawi kha ka awih ngei ang, mahse haider theih rual lovin dawt min hrilh tih ka chiang si, a nih chuan ka nupui hian min phatsan tihna maw, hah.. ka awih theilo, enge a tan tih loh ka neih, mipa fel ka nilo tih chu ka hria, mahse chutiang chung chuan ka theihtawp in a laka that ka chhuah in ka ngaihsak a sin, chuti chung chuan keihi min la duh khawp lo tihna maw..




Inhnuai a a rawn chhuk leh hnuah chaw ei chu a siam nghal zung zung a, chaw kan ei lai te chuan ka be lo hrim hrim, hmun hnawk vel a tih fel lai chuan room ah chho in chhuak turin ka in siam nghal zung zung a, tunah tak hi chuan a bulah awm hrih lo ila ka duh ber ang, choka atanga a rawn chhuah lai chuan step ah ka lo chhuk thla ve mek bawk a, ka in thuam dan a hmuh chuan a meng deuh awk a, "Khawiah nge i kal dawn?" a ti sep a, "Ka chhuak lawk dawn, min lo nghak suh, ka rawn haw tlai ang" tiin inchhung atang chuan ka chhuak nghal.




Bar kawt ah chuan motor ka ti ding a, chhuk nghal mai lovin seat ngheng chhan ah chuan ka lu ka nghat vang vang a, Bawihi leh kha mipa thu dun lai bawk kha ka mitthla ah a rawn lan leh rual chuan in ring hman lovin steering chu ka chum nghal pawp a, ka thinrim lutuk vang chuan ka thaw pawh a sa ham ham thei hial, motor atang chuan chhuak vut in bar chhungah chuan ka lut nghal a, zu chah in ka in nghal char char, ka thinrim vang teh hrep nge ka rui har phian bawk.




"Thianpa, I va mal ve, keipawh keimah chiah in ka kal a, kan pahnih in kan in kawm hlim mai mai dawn em ni?" hmeichhe pakhat hi ka hmaah a rawn ding ran a, ka en chho nghal vut, a sang in a pian pawh a nalh hle, mahse ka Bawihi a la tluk lo thung, engtin mah ka chhan tak loh vang chuan ka bulah a rawn thu ve nghal zat a, "Nang ang mipa chhelo lutuk hi engtinge helai hmunah te mahni chiah a i rawn kal theih zawk?" nui har har chungin a ti a, ka la chhang chuanglo.




Ka no a in tur awm chu ka tlak leh pap a, ka lu chu a hai tan, "I mal bawk si a, kan pahnih in in kawm hlim mai mai ang aw, zankhua hun a la awm a, in hriatchian nan te pawh kan hmang ang chu, ka mipa duhzawng tak i ni" ka beng bulah chuan a rawn phun sar sar a, ka ngaihtuah naah thil dang daih a awm avang chuan a thusawi pawh chu ka beng khawn meuh lo, zu chu no pakhat ah thli chhuak in a tlak ve nghal pap a, hetiang hmunah hian a vawikhat kalna a ni dawn lo tih ka hmuh tirh khan ka hre tawh.




Ka mal te chu a rawn zut kual dan dan tan a, ngaihsak lem lovin ka no ah chuan in tur ka thli leh a, bur chanve ka in tawh, "Helai hmuna awm reng lo hian hmundang ah kan kal dawn em ni, i duh duh na hmunah a nimai, hotel ah pawh" a rawn ti leh sar sar a, ka nghawng chu a rawn fawp thawi thuak thin bawk, a awmdan chu ka ngaithei der lo, ka nam sawn a, a mitmeng chu a phi chiai a, "Ka mipa duhzawng tak i ni" a rawn ti leh sep a, ka kiai suk, a kawngah chuan man in ka pawt hnai salh a.




"Ka hmeichhe hne zawng tak i ni thung" a beng bulah chuan ka phun sup a, a kawng a ka chelh na chu ka thlah nghal zat bawk, "Enga, tunah khan engmaw i sawi?" thinrim takin a ti ram hmak a, "I hriat chian ka ring, chuvang chuan kalsawn rawh, nang ang hmeichhia hi enga tan mah ka tilo, heihi en rawh" tih pahin ka kut a zungbun chu ka hmuh a, "Nupui nei lai ka nihhi, nang ang hmeichhia hi ka mamawh teh hrep lo che u" ka ti chhuak hluk a, "Hremhmun an kal rawh" ti that in a kalsawn zui nghawng nghawng a.




Ka awm rei tak hnuah chuan bar atangin pai chhat chhat chungin ka chhuak a, ka chahbi chu la chhuak in motor chhunga chuan ka lut nghal, hah.. ka nupui in min bum laiin kei a tan ka lo la rinawm em em amaw, ka in awih theilo hial zawk, chak zetin motor chu ka khalh a, in pawh ka thleng har lo, kawngka chu ka hawng ri thuai a, Bawihi chu a mut tawh ka rin nen a lo la mu hauh lo, min hmuh chuan min rawn pan vat a, min khawih tum a a kut a rawn lek chhuah rual chuan ka lo vai per nawlh a, "Min khawih hlek suh" ti nghut in inchung lamah chuan thei leh thei lovin ka chho a.


Zawmna



Stacy Ramthansangi POV




Mza awmdan hi ka hrethiam lo, a thianpa Thana te in neih ni atang khan zu in a ching chho a, zanin a a awmdan te kha mak ka ti takzet, ka lakah lungawi lohna a nei niin ka hria, mahse enge tih sual ka neih ka hre der silo, inhnuai lamah chuan rei fe ka awm hnuah room ah ka chho ve ta chauh a, room ka luh chuan chu Mza a thawmhnaw hak pawh thlak lova khum a lo mu reng chu ka hmu nghal zat a, pan hnai in ka en chiang a, a lo muhil tui tawh hle.




A pheikhawk bun chu ka phelh sak a, a thawmhnaw hak ka hlih sak dawn laia ka thil hmuh avang chuan ka che lai ka tawp chawt, a ngawng vei lam ah chuan lipstick hnu hma tih hriat zet hian hmeichhe hmui thla chu a lang a, a ni hian hmeichhe dang a hmu amaw, chutah rui chungin a lo la haw zui, chet pawh che sawn lovin a nghawng a lipstick hnu hma chu ka en ngawt ngawt a, tinge hetiang hian a awm le, ka chungah lungawi lohna a nei a nih chuan tha takin sawi mai se, hetianga a awm zel chuan a lungawi lohna chhan ber ka hre silo a, engmah kan siam tha mai mai thei dawn lo tih ka hrechiang si.




Khum sir te ah chuan ka thu mu a, ka pasal mut na lam chu ka en reng bawk, a thaw sak sak a, kei erawh in a chhuah naah khan tu hmeichhia chiah nge a hmuh tih ringawt chu ka ngaihtuah a, ka tawt up up a, hetianga a awm chhan hi chiang taka hriat ka duh, a lungawi lohna tur thil ka ti a nih chuan zep nei lovin min hrilh se, ka in siam tha mai ang, mahse hetiang hian engmah ka bulah sawi si lovin a awm a, ka tan chuan a hrilhhai thlak in han tih vak ngaihna pawh ka hrelo.




Zingah chuan hma takah ka tho a, choka ah lut in rawng ka bawl nghal mawlh mawlh bawk, Opi a rawn thlen chuan rawng ka lo bawl zo vek tawh, "I va tho hma ve" a ti deuh hluai a, ka lo nui ringawt, nizan khan chhin khat te mah ka chhing eih lo, zing khaw var hnu khan darkar khat erh awrh ka muhil ve a, chuzawng chu a ni mai, Mza chu dar 8 dawn ah a rawn tho chhuak a, tuk dang ah kha chuan choka ah rawn lut in min rawn wish thin kha a nia, tukin chu min hmu lo der hmiah in tui a in hnuah a chhuak lehnghal daih, ka thaw chhuak nghal hak.




Room lama a chhoh lai ka hmuh chuan ka zui chho ve nghal, "Ka chungah lungawi lohna I nei em ni, i lungawi lohna chu sawi la, hetiang ringawt a awm lo hian, hetianga I awm hian nuam ka tilo a nia" hna kal turin a siam mawlh mawlh lai chuan ka ti a, chaw pawh kan la ei silo a, "Nanghian ka lakah zep i nei em tih min hrilh rawh" chiang zeta min rawn en pah chuan a ti a, enge a sawi awmzia hi ka hrelo, zep ka neih awm ka hre silo, nilo a birthday ka lawm sak dawn tih chauh lo chu, surprise ka duh avangin ka la hrilh duh hrih silo.




"Engmah zep ka neilo" ka ti sep a, chiang zeta min en run run hnuah in her in a thawmhnaw chu a hak zawm leh mawlh mawlh a, ka lo en mawl tawp, "Zanah ka rawn haw lovang" room atanga a chhuah dawn chuan a ti sup a, "Mahse, i night a zo deuh chiah sia" ka ti sep a, "Thil tihtur pawimawh dang ka nei, min lo nghak duh suh" ti leh nghut in room atang chuan a chhuak zui a, a awmdan hi ka hrethiam thlawt lo, engmah min hrilh tha duh bawk silo nen.




Mza chu a sawi ang tak tak in zanah a rawn haw lo hrim hrim, nileng in vawikhat mah min rawn be miah lo bawk, chiang takin ka chungah a lungawi lo tih ka hria, enge a chhan ka hre bawk silo, kan awmdan hi hreawm ka ti takzet, mahse a birthday a hnai tawh tho a, a tan ka thiltih tum te hi a hriat hunah chuan a lungawi leh vat mai ang tiin ka in hnem chawp a, Rinkima nen chuan kan in be leh a, picnic spot lam pawh ka be fel vek tawh a, ka sawi tawh ang khan special taka a birthday hi lawm sak ka duh avangin in ruahman hma em em pawh ka ni.




Ni thum lai a liam leh meuh chuan Mza nen kan in be khat hle a, a chhan ber pawh inah a rawn haw khat em vang a ni pakhat, a rawn haw chhun ah lah hian min peh hel tlat mai bawk si, ka pasal in min peh hel tlat hi ka tan tak pawh hian hreawm ka ti a, ka biak loh chuan min be ngailo, ka biak ve chhun ah pawh bul zet zet in min chhang thin a, a lungawi loh chhan chiang takin sawi mai se chuan kan sawi fel thei tur a nia, engmah a sawi duh bawk silo hi ka buaina lai tak a ni.




Karleh nilaini hi Mza birthday a ni tawh a, tunah Inrinni a ni tawh bawk nen a hmun ah kal a en fiah hmasak ka duh avangin Rinkima nen chuan kal kan tum a, Mza hnenah ka chhuak dawn tih sawi ka duh viau na chungin nizan ah a rawn haw lo leh a, call a chhang thei bawk silo nen Opi hnenah thil pawimawh tihtur ka neih thu sawiin in atang chuan ka chhuak a, a tan a ka thil ruahmanna te a hriat hunah chuan ka lakah a lungawi tawh hram ka beisei.




Ka picnic spot book hi vawikhat mah ka la kal lova, a awm na lai vel pawh ka hre lo bawk, chuvang taka Rinkima min kalpui tura sawm pawh ka ni, a hmun kan thleng a, a lo nuam reuh hle, a zau lutuk lo na in a changkang ru phian a, a hmun a hla lutuk lo a, kawng lah chhe lutuk tia sawi tur a awm lo bawk nen ka lungawi viau, a neitu te nen kan in be leh a, biak an nuam takzet, an hawn na a la rei loh avangin a la awl hrih viau bawk, chhungkaw picnic na atan pawh duhthusam a ni.




Kan awm rei hran lo, Mza a rawn haw hma ka ring a, in a thlen hmaa thlen leh ka duh avangin ka hmanhmawh viau bawk, engmah ka hrilh silo a, ka chungah a lungawi lo sa bawk nen tih thinrim belh leh ka duh tawh lo, Rinkima chuan motor a rawn keng hlauh zawk a, Mza rawn haw hma ngeiin in ka thleng hman turah ngai ang, kawng laka kan tlan lai te chuan kan in be reng a, kan in hmu ve zeuh zeuh tawh bawk nen kan in nel ve tawh viau, kei ai kum 2 chiah in a upa a, kan titi duhzawng pawh a in rual khai khawp mai.




Kan in kawt ah chuan motor a ti ding a, "Ka lawm e, chuan thawhlehni chu aw, a theih ang ang in ka lo pui ve dawn che a nia" ka ti sep a, motor atang chuan ka chhuak nghal, inchhung ah chuan ka lut a, Opi ka hmuh nghal mai ka rin nen hmuh tur a awm miah lo, a chhuak lawk a niang tih dawn in kawngka a kalh bawk silo a, ngaihtha zan lo chuan in chung lamah ka chho a, room ka lut chiah erawh ka phu zawk mai, Mza chuan tukverh bulah ding run chungin min lo melh ngur a nihchu.




Chuan enge awmzia??.. Mary pawh a awm tel ve amaw, chupawh kan nupa room ah lehnghal, "Kha mipa kha i tan enge a nih?" a ti chhuak hrawk a, "Mz" ka ti hap, min en lovin couch a Mary thu chu a en a, "Lo va chhuak rawh" nelawm na pakhat mah tello in a ti nghut a, Mary chu ding nghal thuai in kawngka lam chu a rawn pan a, kawngka bulah ka la din reng avang chuan a chhuah dawn a min rawn nuih sak pawh chu ka hmu chiang ngang bawk, a ni hian engthil tak tih tum leh ang maw...




"Engvanga min bum nge i nih?" tiin Mza chuan min rawn pan chhur chhur a, "Enga, kei hian ka bum hauh lo che" ka tih chuan ngeiawm zetin a nui chhuak hawk a, "Ka mit ngei a ka hmu chung khan dawt sawi I la tum amaw, kha mipa nen khan vawi tam a rukin in in hmu thin a nilawm ni, min bum chu tum buai duh suh" a ti chhuak ta thawt a, a ni hian Rinkima nen khan kan inkar ah eng emaw awm angin a ngai tih ka hre mai, hei vang chiah hi a nih hi a mizia a lo thlak nasat em em.




"Mz.. hriat fiah loh i nei in ka hria, Rinkima nen khan kan in kar ah engmah a awm hauh lo, a ni te kha chuan min pui mai chauh a ni" ka ti hap a, ka thusawi chu a awih loh hmel hle, "Chu.. Engthil ah chiah nge in lo in puih thin, tisa chakna in pek tawn zawngin maw?" ka in sum hman lo, a biangah chuan ka beng pawp a, a thle ve sawk mai, ka beng na bawk a ka kut chu a sa nghal ham ham thei, "Engtinge khatiang thil kha i sawi theih zawk?" rilru na lutuk in ka ti chhuak a.




"Thudik a nih vang chauh a sawi ka ni, a tira Mary'n min hrilh kha chuan ka awih duh lova, mahse ka mit ngei a khapa nen in in hmu lai ka hmuh hnu kha chuan thudik ngei a ni tih ka hrechiang tawh, chuti chung chuan ka haider lui a, mahse ka awm loh laiin nangni pahnih hian nuam in lo la tawl ngam amaw?" ti chhuak leh hrawk in kawngka bang ah chuan min nawr bet deuh nawk a, ka lu ka tauh dawt avang chuan a na zawk thei hial.




"I ngaih ang kha engmah a awm lo, Rinkima kha chu ka hna min thawh sak tura ka rawih mai a nihkha" ka ti chhuak thei tawk a ni, "Ramthansang nang hian min bum mai mai thei tawh hauh lovang, tun atang hian he in, nilo he room hi i chhuahsan leh tawh lovang" a sawi zawh rual chuan awih lo lutuk in ka melh a, "I ti tak tak lo" a nui nghawr dat a, min tham lo lutuk vanga nui a ang zawk mah, a chezia chu a ngeiawm ngawih ngawih a ni tawp, "Ka tih tak tak leh tak tak loh chu fiah turin min duh kher in ka ringlo" a ti chhum leh hmuk a.




"Aih.. hetiang hian ti suh, Mz kawngka hi rawn hawng rawh, min kalh khun ngawt theilo" room atangin a chhuak a, pawn lamah chuan kawngka a kalh ri deuh rak rak ka hriat rual chuan kawngka hawn tum in ka pawt vak vak a, thawm engmah a awm tawh lo, ka awih theilo, he room ah hian min khung beh a tum amaw, chupawh ka thil tihsual engmah a awm loh naah, kawngka chu ka la beng vak vak a, ka au tuar tuar bawk, mahse min chhawn tu tumah an awm lo thung, "Lo hawng rawh, Mz ka chunga i chet dan hi a diklo a nia, ka in sawifiah na hi ngaithla rawh" tiin ka la au nghek nghek a, mahse min chhawn tu tumah an awmlo.




Khaw thim hnuah pawh chuan kawngka min rawn hawn sak tu tumah an awm lo, chhun thil ka ei bak kha ka la ei loh avangin ka ril a tam tawh takzet bawk, Mza chu Mary nen khan an chhuak daih a nih ka ring, hetia min kalh khum ringawt hi ka rilru a na a, ka tah a chhuak tun bawk, kawngka bula bang chu ngheng in ka thu sawp nuai a, ka mittui chu a luang thla ngiai ngiai bawk, tinge ka in sawifiah na tal kha a ngaihthlak duh lo, min rin thu a sawi thin si a, mahse min lo rin tawk loh zia ka hre chiah.




Ka thiamloh a awm ve tho tih chu ka hria, a lakah thil ka zep vanga hetiang thil thleng hi a ni tih pawh ka hria, mahse ka lo ngaihtuah dan ah kha chuan engmah hrilh lawk lova surprise ka duh avangin ka sawi duh lo kha a nia, a tan ni chhin chiah tlak tak siam sak ka duh vang chauh in a ni a lakah ka zep, mahse enge thleng ta hi, tunah chuan kan nupa inkar a chhiat phah ta chu a ni si a, hetiang thil hi a thleng dawn tih hria ila chu phur em em a ka thil lo ruahman ve te kha chu engmah ka ti lo tawp tur.




Chutia ka lo in ngaihtuah lung puam lai chuan kawngka a rawn in hawng a, Mza chu a rawn pen lut nghal zat bawk, chhuat a ka thu sawp niai mai a hmuh chuan ding khawng awt chungin min melh chhuk run a, a kut ah chuan eitur ni awm tak a keng ran bawk, "Tho la, eitur hi rawn ei rawh, inhnuai ah min nghak tu an awm, muangchang suh ang che" a ti nghut a, min ngaihtuah na nei lek lovin a chhuak nul nul a, eitur a rawn ken luh chu ka la vat a, ka ril a tam tawh bawk nen ka ei nghal zung zung a, a vaiin ka ei zo vek.




In hnuaiah chuan muangchangin ka chhuk a, sitting room lamah chuan an lo thu a, ka rin loh lutuk in Rinkima a lo tel ve reng a nihchu, "Ka nupui nen hian eng in zawmna chiah nge in neih sawi rawh?" Mza chuan khauh tak mai chuan a ti chhang bal a, "Mz ka sawi tawh kha, Rinkima nen hian i ngaih ang in zawmna kha kan neilo a ni hian min pui mai chauh a ni ka tih tawh kha, karleh a i birthday lo awm turah hian surprise che ka duh avangin Rinkima puih na hi ka dil a, chuvanga in hmu thin chauh kan ni, ka hrilh ang bak che hi Rinkima hian hrilh tur che a neilo" ka ti a.




Mary awm ve na chhan hi ka hrethiam lo, kan nupa buaina a ni a, a ni hian hetah hian tih tur engmah a neilo, "Ka zawhna che chu chhang rawh" Mza bawk chuan Rinkima melh run chungin a ti a, min ring lo lutuk chu ka tha a na hle bawk, "I nupui nen hian i hriat lovin kan in kawp a ni" Rinkima chu ka en dawrh a, tunah khan eng thu nge a sawi kha, "Ka sawi kha, an pahnih hian an in kawp tih ka hrilh lai che khan i awih duh lo a, engkim chu a lang chhuak vek tawh alawm" Mary chuan a lo ti zawt zawt a.




"Nang kha lo ngawi hmak rawh" ka ti that a, Rinkima chu en in "Nang nen hian eng in zawmna mah kan neilo, engvangin nge ka pasal hnenah hian khatiang thu kha i sawi?" ka ti tuar a, "Stacy, kan zep reng thei lovang, i pasal then a kan pahnih a kal bo kan tum tho a, tun hi hun remchang tak a ni bawk, i pasal in engkim a hre tawh tho bawk a, chuvang chuan engmah zep buai ngai lovin kan pahnih in kan awm dun thei tawh dawn alawm" ka awih theilo, engtinge chutiang thu chu bahlah miah lova a sawi theih zawk ni...




"Dawt sawi tawh suh, nang nen hian kan in kar ah engmah a awm lo, hetiang thil hi engvanga ti nge i nih, tuin nge tih tir che?" ka ti leh tuar a, "A tawk viau tawh e, ka hre hnem tawk tawh bawk a, nangpa kha ka mit hmuh ah nilo kan nupa mit hmuh ah vawikhat mah rawn in lan leh tawh ngai suh ang che, chuan ka nupui nen a kal bo kha chu ngaihtuah pawh ngaihtuah suh, ka nupui hi ka bulah a awm reng dawn, in pahnih khan chhuak nghal rawh u" a ti hrawk a, "Maw.. keihi?" Mary chuan a ti bah nak a, "Mary, sawi ngai sawi nawn ka duh lo tih i hriat kha, tunah chhuak nghal rawh u" a ti chang leh fak a, Mary chu lungawi loh hmel takin a chhuak a, Rinkima'n a zui chhuak ve nghal bawk, Mza nen chiah kan awm takah chuan thawm a reh tlawk tlawk a, Mza lah chuan kut min thlak chak hmel takin min en ngawt ngawt bawk, eng ang pawn in sawi thiam tum mah ila a sawt dawn lo tih a hmel ah sawn a lang chiang ngang bawk.

Cont...


Naktukah chapter thar zawm tur bawk in ka rawn dah leh ang aw, ka mit a la dan chiang hleithei silo a, bakah hla kan zir hma ni a ni bawk a...