CHAPTER 11
“Lily nang Coca Cola leh sprite vêl va lei rawh,keiniin ar hi kan lo hem ang" urlâwk zan a ni bawka, tlaivâr ngei tumin inkhawm banah chuan kan chhungkua chuan kan che mawlh mawlha, u John-a pawh a che mawlh mawlh mai. Kan inkhawm apiangin miin an en duh bawk nen amah hian nuam lo a tih phah ṭhina, ni e kan khuaah a mah chen tu an awm chu sawiloh, a hmelṭha bawk nen an hmuh ngai lohna nen mi en bîk a nilo theilo.
Putea te ho pawh an rawn phei veka, kan vai chuan mi 13 lai kan ni bawk nen kan ri nak nak reng mai. “Kan makpa tur chu kan phulo hle mai che a, i hmêlṭha in i hleitling zuar mai si a, keini fanu meuh chuan i lung a dum zo tak tak ang maw?" tiin u John-a lah chu an zawt leh ṭhina, a ni erawh chuan “Kei hian a lâwm in fanu hi phulo ni, ka hmangaiha ka tân chuan midang ai a ṭhat lohna a awm love, a lung ka dum zo lo zâwk ang tih hi ka hlau zawk asin" fiamthu titak si chuan a lo chhânga.
Keipawh ka lo nui seih mai, khawpuia awm rei ve tâkah chuan ka vun pawh a hma ai a êngin a mam tawha, ka naute ho pawhin min fiam nak nak reng a nihkha.
“Engpawh nise in inneih kan rem ti a, kan rinna che i tihchhiat loh kan beisei, rinawmna hi nupa nihchuan a pawimawh ber a ni. Feli pawh nu i ni dâwn tih hre rengin nu nih tlin takin awm ang che, i fa ni miah lo mahse hmangaih taka enkawl chu a pa i duha i hmangaih a nih chuan i tih tur a ni" a tihchuan ka bu nghat mai, ni e Puipuii hi ka hrin nilo mahse ka tan chuan ka fanu ang mai a ni, ka ngaina bawk.
“Le ar chu kan lo hem tawh ange, in inkawm ve duh ang. Pawnlamah mei kan chhêm kha va ai dûn rawh u" an tih takah chuan sawi buai lovin kan pahnih chuan kan inzui chhuaka, Puipuii erawh a muhil tawh thung.
Thutthleng sei kan dahah chuan in nghêng riala ṭhu dunin a kut lian leh a ṭang sei thlurh chu ka khalhsak neuh neuha, zân a rei tawha. Khawlaia vâk vak awm lo in ṭhenkhat chu khaw pâwnah mei chhemin an zaia, a ṭhen in an mahni inah keini ang tho a ar kang ve in woofer an play dup dup mai bawk. Sawrkar dân zawm vek theih ni hek lo, hunpui lai a ni bawka khawlaia halpuah leh halmawi lo hal tawk lah bo lo.
“A nuam hle mai, thingtlâng boruak meuh chu a lo dangin lunglên pawh a zual duh bik a nih hi, ka vawikhat hmanna mah nise ka bula awm in a zir vâng te pawh aniang a nuam ka tih ber ṭum a ni" a rawn tih thum sup chuan nui sakin a dârah chuan ka beia, “Hei vâng hian alawm helama hman ka duh, khawpui chu intihhlimna leh hlimhlawp tam viau mahse thingtlâng lam hi ka la thlahlel zâwk tho tho in ka ring, a theih hram chuan hman zêl pawh ka duh" tiin ka phun chhuak sapa.
“Nangmah chauh lo pawh, an chhungte hmunpui lama awm pawhin an rawn hmang fo a sin, a nuam an tih zia an sawi fo ṭhin alâwm, helamah chuan hmanlai ang deuha kan la chet avâng hian nuam an ti ṭhina, khawpui angin thawm ri hut hut lo mahse nun hahdam tak leh hmun reh raih ngaihna tân chuan thingtlâng hi Christmas ah chuan a nawm zawk thu an sawi fo a nia" tiin ka nuih var vara.
Mei êng thlâra a hmêl lang chu thlir vang vangin “Nang ang mipa hmelṭha hian engtin nge min duh theih le?" ka tichhuak phawng mai; chuveleh min rawn melh nghal vutin “Ka hmelṭha i tih rualin i hmelṭhat zia hi in hre zawk fo ang che, ka tân chuan khawvêla hmeichhe hmelṭha ber i ni tih hi in hre reng rawh" tiin ka hmuiah chuan a rawn fawp zauha.
“Eh, nu, u John-an a u hmuiah a chuk ania" kan naupang ber chuan rawn tiin a tlan luta, kan chhûngte nui dar dar riin a zui lehnghâl, ka zak lutuk chuan u John-a chu ka ṭham tawn tawna “Awi ava han mâwl tak, rawn chhuak suh u ti mawlh mawlha" tiin ka ner nâng nâng a, a ni erawh a nui hak thung.
“A ho emai engah mah ngai suh, kan la in nei thuai dawna, an duh leh lo hmu ve mai mai rawh se. An rawn puitling anga an hrethiam ve mai ang" tiin min kuah bet rana, an rawn chhuak tawh lem lo, ka putea te ho in an hau pawh aniang. Mei chu tuah belhin kan ai dûn renga, khua a vawt tawh bawk nen meilum thawhsan pawh a huphurhawm riau zêl.
Vân lam hawi chho ila arsi nen thla chu a êng ruih mai bawk nen, kan awmdan chu a romantic kual vêl vek mai, zân a rei tâkah chuan u John-a ngheng ar ar chuan ka muthlu leh lap lap ṭhina, a ni erawhin hrethiam takin ṭhutthleng kar lak chuan min pawm ta zawka, amah chu ka nghêng ar ar bawk.
Kan naute chu puanlum deuh lak tirin kan sin duna, chu chuan ka mut a tichhuak zual. A âwm nghêng chial chung chuan ka mit chu ka chhing siar siara, ka muhil dâwn chauh tihah ar chu a ei theih tawh thu an rawn sawi tâk avâng chuan peihlo zetin ka tho chhuaka, lo mutlum ve tawh nak alaiin an ti hun lo takzet.
Inchhung kan luh rual chuan an lo chhawp thlap tawha, in tur nen lam chuan YMA no ah thliin kan ei nghal zat hlawma, kei erawh ka mut a chhuak ṭan tawh bawk nen ka ei tam lutuk lo thung.
“I ei zawh leh i mu mai dâwn em ni? I meng thei thlâwt lo a nih kha" u John-a chuan ka beng bulah chuan a rawn ti a, ka lu ka thing nar nar thung “Nangmah nen hman dun ka duh ve si a lawm, bakah urlâwk zân te a ni ve a, ka mutthilh daihin ka duh bik lo" tisapin amah chu ka ena, “A nih chuan bawihtei vên pahin roomah kan awm mai dawn a nia, i nute kan bia ange" tiin ka nute ṭhutna lamah chuan a kal zuia.
Engkima ka chhûngte a dah pawimawh thiam leh a rawn hmasa ṭhin chuan min ti lâwm takzet, ka nute pawh chuan an lo rem ti ania'ng a rawn phei thuaia, chhuatah a mu ṭhina, ka nute ho an tlaivâr dâwn bawk nen mutna a phah theih miau loh avângin an lo rem ti pawh a niang.
Ka roomah chuan lutin ka khum lian lem lo takah chuan tâwt deuh takin kan mu hlawma, a kilah Puipuii chu a muhil sak sak mai, mahsela chutia kan tawt chu a lehlam takah chuan a lawmawm zawk, khua a vawt tawh bawk nen mutlum a har si, kei phei chuan pangti lum ka neilo bawk nen thlasik hi chuan ka mu ṭha theilo hi lum taka inthuam ka ngai ziah zêl.
Tûnah erawh u John-a chuan pangtilum a ngah bawk nen nuam ti takin ka mu thei thung, ka hnung lam aṭang chuan min rawn kuaha, ka hnaih nghal sauh mai. A lum nuam bik takzet, “Tumah vêng thâwng lova awm dun ka châk tawh, khulamah kan chhuk rualin i nu te kan hruai tel anga kan innei tawh ang, i nu te nen kan sawi tawha, inneihna ropui taka tih ka duh laiin i nu khân i duhdan min hrilha, mi tam vak sâwm i duh loh thu a dik em?" a tihchuan ka lo aw vata.
Ni e, ka duh loh chhan erawh mi tam takin an hriat avang hian kan innei reiin kan hlim reng bik kher lova, bâkah sêlna a tam ṭhin bawk nen, chuvângin kan chhûngkhat laina te bak ka duh lem lo, nupa nun hi chu lawmpuitu neih tam leh tlemah nilo in nupa bawk hi kan pawimawh ṭhin.
“Kan pahnih hlimna bâk a pawimawh a awm hleinem, lawmpuitu ngah chiam pawh hi inneih reina a nilova, chuvang chuan kan hmelhriat ṭha an kim chuan a tâwk mai a lawm, ropui taka inneih tluka hlu awm lo mahsela kan nupa nun erawh mite vâng nilo kan pahnih bawk hi kan pawimawh ber dâwn tih i hria ang chu, inṭhen leh mai tura inneih lah ka duh hek lo" ka tihchuan ka dulah chuan a rawn hmer salha.
“Nangin min ṭhen te a nih loh chuan keichuan ka ṭhen ngai lovang che, hre reng rawh. I duh ang ngeiin inneihna pawh kan kal pui ang, kan Pastor pawh ka lo be dawn ania" a tihchuan ka bu nghat ringawt.
“Kan in hi hrehawm i ti em?" tih zawhna chu ka pe khauha, thawk la ham hamin “Engvangin nge chutiang chu min zawh? I bulah hian nuamlo ti hmêl ka pu ṭhin em ni? " a rawn tilêt khauha, ka lu ka thing nar nar ringawt “A nihchuan nuamlo ka tih ring suh, i bulah chuan khawi hmun pawh anuam, tin in In pawh hi ka ngaina bawk, nuam ka ti tih hre reng rawh, in In emaw, nangmah emaw in sitin in zahpui ngai suh, ka tan chuan i nihna ang ang hian i ṭha tawk" a thusawi chuan min hneh takzet.
A lamah inherin ka kuaha “Ka hmangaih che, chuan ka lâwm e, dik tak chuan ka inthiam lo ṭhina, mi pasal chhuhsak tu hialah ka in ngaihna hian i lakah min ti tima, ka in dem lek lek zêl" ka tihchuan lungawi loh hmel tak chuan min ena, ka thusawi avâng chuan a lawm chiah lo tih pawh ka hre mai.
“Khatiang kha sawi tawh suh, kan inṭhen chhanah hian i tello, keimah hi dem zâwk tûr chu ka ni, chutih rual erawhin min uiresan hmasa tu zâwk a ni tih chu i hriat kha, a ma duhthu ngeia kan inneihna pawh tâwp a ni bawk. Nangmah in telna i neilo, a duh a thlanga kei min duhkhawp lo in i rawn awm hma aṭang daih tawhin ngaihzâwng a nei tawha, sawi buai theih a neilo, nang chu min phatsan hnua ka nuna êng rawn kenga, nunthar zawh tura min puitu i ni tih hi hre reng tawh ang che, indemna tur i neilo" tiin min kuah hlu hlua.
“Tinge chutiang tih i hriatreng lai pawha i ṭhen loha?" tiin ka zâwt khauha, nui sukin “Ka fanu hi mawle, a ni hi ka hmangaiha ka thisen zawmpui ngei a nihna ang pawhin ka hmangaih, a nu kha ka ṭhen nghal mai chuan ka chang lo dâwn chiang sa a, chuvângin ka dawh hrâm hrâm a ni ber, mahse khatia nang i lo lana i enkawl dân te, ka fanu in angainat zia che ka hmuh khân ngaihtuahna dang neiin nang lah ka mi duhzâwng tak i ni bawk nen insum zo lo in i lakah ka duhna ka ti lang ta fo a nih kha"tihpahin a nui saka.
Ka awm tirh aṭang khan min lo duh nghal tih a sawi chuan ka lungphu a ti rang zual sawt mai, min be ṭha duh ngai miah lo kha a nia, min lo duh reng a maw?
“I phakar hle mai, ka hlauhthâwn zâwk tak erawh kan inneih hnu hian u Cindy-i hi alo inrawlh ang tih a nia, mahse engkim hi nang nen chuan paltlang ka huam thung, mu tawh ang ka mut a chhuak tawh" tiin ka ham zui bai baia, ka mit chu ka chhing nghal hmak bawk, a ni pawh chuan min chhâng tawh lemlo in ka hnungah chuan a chûl hliau hliaua, reiloteah ka muhil ve mai bawk.
A tûkah chuan kan vaiin Christmas thawmhnaw tur kan lei chu inbel ṭheuhvin Biak in lam kan pana, Puipuii pawh a kawr thar nen a au ve nasa mai, Biak in tualah chuan a tlân kual rai raia, u John-a nên chuan kan en dûn reng thung.
“Felfel in lo haw ve animaw? Kha tunge, i bialpa em ni?" hmun danga college kala awm chuan min rawn bia a, ka lo en nghal vat “Um a nih hi, in rawn haw na a la reilo a nimaw?" ka tihchuan bu nghatin u John-a chu a be leha, an inchibai pah bawk.
“Bialpa i nei chhelo hle maia" ti a u John-a a nuih kual vel chuan ka mit a tikham riau lehnghâl. Puipuii chu ko in Biak in chhûngah chuan ka luhpui ta daiha, u John-a pawh chuan min rawn zui ve bawk, a hnung lamah kan pathum chuan kan ṭhua, u John-a chu suit nen a induang zurha, a mawi leh pek viau tawh. A pian nalh lutuk ringawt pawh hian hmeichhia chu a hip hneh viau ang tih a hriat.
“Zai ve la" ka tihchuan a nui pût pût mai, a zai lai hi an ina ka awm tirh aṭang ka la hrelo hrim hrima, chuvângin ka hre châk zual “Zai ve rawh" ka tihleh tâkah chuan a aw thian khurhin a zai ve ta dut duta, a aw chu a nalh lo pawh a nilo; mahse zai chu a inhmeh vak lo a zai chang fek fawk lutuka, ka nui chhuak lo chauh a ni.
A hla thu lam chu thinrim chunga zai chhuak hi a ang ber mai.
Nui pât patin hrelo ang mai chuan ka zai a, a ni pawh a khât tâwk chuan a zai ve ta zauh zauh bawk, Puipuii erawh Biak in chhûng cheina leh mipui che vel thlir chuan a hawikual nasa mai.
Inkhawm bânah chuan lengin kan intihlima, ka chrismas hman tawhah chuan ala nuam ber hialin ka hria, u John-a chuan min ngaihsak bawk nen ka hlim takzet, ka tân chuan ka nuna hlimna rawn kengtu lian ber ka tilo theilo, an ina ka awm tirh khân hetiang kan ni ang tih reng ka ring phaklo.
A tuk lama Christmas ruai kan ṭheh te chu a ni pawhin nuam a ti hle aniang mi chevêl chu ngun takin a ema, fatu te lah an zuan a zâng bawk nen sa chu kan hnianghnar viau mai. Puar âwk khawp chuan eiin u John-a pawhin a eitam viau, a chaw ei tam ber ṭum a ni bawk.
Nui var varin a chaw ei chu ka en renga, ka nu lah chuan min rawn hau hlak lehnghâl. U John-a lah chu chutia ka h in min lo hau chu ala nui suk zuia “U, hmelṭha i van ti âwm êm êm, u John-a chu i en char chara, in inneih hunah pawh en char char rawh aw" kan naupang ber bawk chuan a rawn ti leha.
“Lalchhanhim i ṭawngthei i chaw kha ei mai mai rawh" ka lo tihlai chuan midang erawh za takin an lo nui thung, heng ho mi tih luih peih lutuk hi chu a châng chuan ka ning lek lek zêl, u John-a lah hian an mi fiam peih lutuk hi a lâwm zawk emaw ni, a lo tuihnih ve ziah bawka, ala châk lo viau ang.
“Ka duhtak" kan pahnih chiahin kan awma, midang an lêng chhuak vek bawk nen ka chhâng duh ṭhaklo, hrem ve reng reng ka duh.
“I thinrim em ni? Tinge min chhân duh miahloha, le helam lo hawi rawh le. I tihtauh hi chuan sahuana zâwng an khawi thinrim i ang ṭhin" a thusawi avâng chuan rum zetin ka ena, ka thin a tirim deuh deuh bawk.
“Zawng ka ang i tih leh Zâwng ang lo chu ngaizawng la tinia, min rawn hnaih tawh hauh suh" tiin ka chhuahsana, min rawn umzui ve nghal zat bawk. In bula tlangval rual lo awm chu enin ka hnaiha “Lo kal ve rawh Felfel, kan zîngah i awm khat ta riau mai" ka ṭhianpa ve ber Rintea chuan rawn tiin ka darah a rawn kuah nghal thaka.
U John-an a hmuh chuan a meng rum nghal ula, a duh leh thinrim mai mai rawh se. A ṭawng theih lutuk man hi pêk ve reng reng angai, chutilo zawng sim hun a nei dâwn miahlo, mipa thik tur an lo awm remchâng chu ka lawm ru em em zawk, engtin chiah nge a ngaih hriat ka duh.
Kan bulah rawn dingin min pawtsawn nghal ta reng a, midang chuan an lo en ṭhap mai “Haw ang" ti bul hmukin min kalpui mai a tum chu ka lo ṭang ve bawk nen rum deuh tak chuan min ena “Ṭhianpa, a duh rih lo a nih kha, Felfeli te chu kan ṭhian a lâwm a nih, tiru card deng ang u" an rawn tihchuan tel ve tumin ka tal aih aiha, mahse u John-a chuan min man bet tlat mai.
“I kal lui a nihchuan ka ngaihsak tawh loh che hi duh tihna ani ang, kal ta che" ka bengbulah rawn phun supin a kalsawn zui nal nal a nih chu! Sual lutuk mai, lungawi lo zet chuan ka zuia “Inṭhen mai ang" inchhûng kan luh lai chuan ka ti tawpa, ka lamah a rawn hnai nghal ruak mai.
“Eng maw i sawi kha? Kha pa vang khân em ni? Hotea thinrim rual i ni tawh lo, kan inṭhen lo vang, awlsam takin kha thu kha engtin nge i chhah chhuah theih zawk?" ti rum ulin lungawi lo zet chuan a vei kual nghut nghuta, kei erawhin a che vel chu ka en reng thung, a tawpah chuan ka kuah leh ta nge ngea.
“Ṭhen che i duh loh chuan ṭawngkam mawi ka lakah hmang tawh rawh" ti ve in roomah chuan ka lût leh ta daiha.
COMMENT, CLICK KHA AW HMELṬHA HO, TIN WHATSAPP GROUP BIKA KA POST KHA CHU HE MI ZAWH LAM TUR AW)