OBEDA BY Natasha Hrahsel (Completed)

[ngaia]

CH-11





"U Obed,Judithi chu biak tum la,insawifel rawh u"ka ti dam thlap a,a ngaihtuahna buai hmel hi hmuh hrehawm ka ti.


"A zia ve leh mai ang,hetiang buaina kara ilo awmve hi apawi ka ti Bawihi.Rilru hahna nei thei dinhmun ah pawh iding lo asin mawle "a ti vang vang a,anau aben vangin a inchhir a,kei min ngaihtuah bawk si a ipik ru viau in ka ring.





"I nupui ka ni a,he inah mo ka ni bawk a,chutiang bawkin i unaute chu ka unaute an ni tawh alawm.Ka lakah inthiamloh angai miahlo ania aw,Judithi pawhin i duat zia a hria a,i lakah a pangchang ve anih hi.Ngaihdam te dil la,a haw phal lo tawp ang che,angaih em che hi"ka ti luam a,alo kiai deuh suk ringawt.

"Vawin chawhma lam chu MZU lamah ka zuk kal zawk ang aw,ka chawl rei tawh si a,chawlh la mah ilang zuk lan zawk kha athat ka ring"a tih chuan ka hnial lo khawp.Students ten an mamawh ngawih ngawih laiin loh theihlohna vangin chawlh alak angai a,students chauh nilo amah ngei pawh hian hrehawm a ti dawn lutuk ringawt.





"Umm zuk kal rawh,ngaihtuah ka ngai lo ania aw" ka ti chuan ka bekah dawmin min nuih sak a, "kalo haw veleh ka duat dawn che nia" a ti ve ngei a! Ka lai leh pek ringawt tawh leh nghal!






Dar kaw pelhah MZU lam panin a inkhalh chhuak a,ka chîk leh lutuk nge a tla ve dawkin ka hria! Ka ngaihbel mai mai niin ka hrelo,tunlai ahahin abuai ve em a,ka pa damlo a zuk awmpui nen,kei buaipui ngaiin kalo awm zawm bawk si a,ataksa in a tawrh ve phah te pawh ani maithei.

Khumah mu in ka pasal laptop atang movies ka en mai mai a,ni reilo te tal chu indim ve ka duh.Ka naute hian damdawiin ka luhpui leh anih chuan min dem lutuk palh ang.





Kalo chhing sek aniang ka harh chuan chhun riltam hun alo ni der tawh a,ka ph ka ban thuai,ka pasal missed call vawi hnih lai alo awm hman!
Ka call let thuai a,a chhan rualin "I Muhil em ni?Harsatna te inei em?"arawn ti nghal chu ka nui chhuak hak mai.
"Ka tha lutuk,kalo muhil daih a"ka ti nawi riat a,ani pawh a rawn nui ri ve suk.






"Zirlai thenkhat in ka subj ah min zawh duh an nei nual hlawm a,darkar khat hnu velah chuan ka rawn let hman tawh ang.Eichak i nei em? Ka rawn lei haw dawn nia" a tih chuan ka ngaihtuah vang vang a,eichak ka neih awm pawh ka hrelo e a!
"E taka" ti hluaiin "Diet peng ah khân 'Malva Restaurant' tih a awm a,arem chuan an chili momo minlo hawn thei angem?" Ka ti nghal thuai,ka ngaihtuah chhuak thut a ka ei chak lutuk ringawt.





"Bawihi,chutiang te chu" a rawn ti hniam ruih.





"An siam tui lutuk"ka lo ti zat a,ka chil te hi apût dawn hial mai!
"Kimte,chutiang ei chu ava tha awmlo ve.I eichak zawng dang ngaihtuah la" a ti damthlup nangin ka ngaihdan ani derlo.




"Ka eichak zawng ka hrilh che a,i rawn lei leh dawn siloh chuan enge min zawh? Lo lei lo tawp rawh" ti hmakin phone chu ka dah tau hmak.Enge maw ka thinrim thut ni? Mahse ka eichak zawng min zawt a,min lei duh leh silo tur te chuan min zawhloh mai mai tur ania,ka dik ka inti ve ta tlat mai.

Ka phone chu a rawn rik zawm leh zat a,ka pasal bawk ani.Ka la dawnlo zet a ka chhang leh ta zawk.





"Ka nuipui chu a ti tau deuh em ni?"nuih za aw zet hian a rawn ti a,ngei zetin ka phone chu ka melh nghek.
"I tau ve nget nget thiam hle mai" a rawn ti phei chu "ka dah dawn"ka ti that tawh.





Nuih hawk hawkin "ka fâ kha a tau tel em? Ka nupui leh ka fâ ti tau chu ka hneh dawn silo a,ka fá tal kha chu lo tau ve suh se"a rawn ti leh hlut,ka va ngei mai mai tak e aw!!! Alo nghal ve thiam khawp hi a!

"I ninawm ka dah dawn" ka ti leh chiah erawh "dah lo ang, i duh chu ka lo hawn dawn che nia.Thinrim lo la,ka lo thlen huna min thinrim khum chuan thlemdan tur che ka thiam dawnlo ania." A ti leh a,midang an awm ve nge ni 'Professor,heng ho hi a tel em?' tih ri te ka hre nawk mai! A students te an awm ve ani ngei ang.Midang awm ve reng laiin khatiang khan min rawn be vel tihna em ni?





"Bawihi, ka rei tawhlo ang aw kan dah phawt ange" pangai tak chuan a rawn ti leh a,kalo aw rang kher mai.
Kan inbiakna kan tihtawp rual chuan ka biang ka dawm a,alo sa hat hat mai!Midang awmve lai renga khatianga min biak te chu a! Keilah tleirawl ngaihzawng nei hlim ang mai ka lai tut zel bawk si...






Ka pasal lo thlen hun ka nghak thleng thei dawna ka hriat loh vangin inhnawhpuar tumin inhnuai lamah ka chhuk a,noodles chhum rimin ka hnar a verh leh zar tawh! Tuntum erawh ka chîl a ti put tlat thung a!
Choka ah chuan Judithi'n noodles ni ngei tur alo ei mawlh mawlh a,ka luh rual chuan a lo chhin tha nghal sawk sawk.





"Ei zawm rawh" ka ti sep a,"i luak a ti chhuak lo em ni?"alo ti ve thuai.





"Aih ka ril ati tam zawk"ka tih chuan ameng deuh awk a, insiamtha leh thuai in a tho a, "lo thu rawh,ka chhum hnem alawm plate kalo lak ang che"a ti ve tehmial!
Ka thuthla ve mai bawk a,aplate rawn lak ah chuan anoodles chhum chu suak chhuakin ka hma ah fork nen a rawn chhawp nghal thlap.





"Bawnghnute kalo thlit dawn che em?" A tih chuan ka hnial thuai.Ani pawh a thutna ngaiah a thuthla ve leh mai bawk.






Ngawi rengin kan plate ami chu kan ei zawm mial mial a,min biak tum awm deuh hian a rawn hawi kâng leh zawk thin chu ka hmu ru reng,ka hrelo der mai mai ani.

"U Mate" athaw hap a, "sawi la enge ni?" Ka lot ih chuan a ngawi leh vung vung reuh sia!




"Sawi la Judith" ka ti nawn leh sap a, a tawngchhuah hreh ve hmel takzet.





"Tukin kha ka tihpalh anih kha" a ti zawi sep a, kalo nuih sun sun thung. "Ka hria alawm" ka tih chuan thawveng huai hmel apu.
"I û pawh a inthiamlo lutuk a,a hmel hmuh pawh ahrehawm alawm.Ngaihdam a rawn dil che chuan lo ngaidam rawh aw"ka ti ve mawlh mawlh a,an unau inkar chhiat mawlh hi ani kalo hlauh ni.




"Ngaihdam chu min dil lo ang" a ti halh a,"a dil ang" ka lo tihlai chu min pawt chatin "ka û hi ka hrechiang alawm,ngaihdam dil ngai khawpa thil tisual tur mi anilo.Tukin kha chu ka tawnghnem ve bawk a,ka thiamlo hranlo.Kut min thlak kher erawh ka la na a,ngaihdam chu min dil lo anga mahse a inthiamlo in min tihlawm a tum chiam thung ang.Ka lo hmin mai mai dawn bik hrihlo,ka thinrim khum ve hrih dawn" a ti chu ka nuih a ti za ru reuh khawp.An û lakah hian Judy nen hian anlo la pangchang viau anih hi maw! Chutih rualin an zahin an û hi thil tisual ve theilo turah an ngai deuh tawp bawk niin alang.




"Tunlai ka rilru tawt deuh nen i rilru tur dawnlo leka tawng ka lo ching a,min ngaidam dawn nia aw" a ti leh a,a sual lo ka tih thin kha maw.Ka pa damlo hi an ngaihtuah lutuk a an rilru abuai anih hi.
"Aho lutuk" ka tih chuan ka pum lam chu a rawn melh deuh a, "a pawng ve nasa tawh sia,lo chhuak vat vat se ka duat sual chak tawh" mauh mai a! Ka naute hian duatsual tu tur angah dawn mange aw...athalam ah ngai phawt mai teh ang.






Dar hnih dawn hnaih ah U Oneda pawh a rawn thleng a,ka momo chah chu a rawn hawn chiang ngang mai.Ka la puar viau emaw ka tih laiin ka eichak bawk a ka ril a tam leh nghal huam huam maiin ka hria!
Ka pum angaihtuah lutuk a,bawnghnute nena ei tura min tihna chu ka hnial ta em biklo.





Judithi chuan asawi ang tak takin a û chu abe tha duhlo vel ngei a,a haw lo tih ka chiang bawk a an unau inthlem lungawi tum chu kalo thlir vel mai mai tawp.





"Ka pa pawh thatlam apan zel a,doctor remchang se chuan treatment pawh ala thei reng tawh.Helam atang tumah chhuk lo turin min duh a,ka putea te lam an awm bawk nen inlam atang chanchin ngaichang turin min duh ani.Judith,ka pa tan hian sum sen ka ui miahlo ania.A duhdan ka zawm mai chauh ani.Ka pa hian natna khuma amu lai hi hmulo turin min duh niin ka hria a,a tha tawh bawk nen a duhdan chu zawm ka tum chauh aw.A tul anih phawt chuan ka chhuk leh thei reng ania"Zanriah kan kil lai chuan U Obeda chuan a ti dap dap a,a fâl in anau hian abe duh bawk silo a loh theihloh in kan awmve thup laiin a insawifiah ta nge nge alawm.






"I hrethiam ang tiraw"anau melh chuan a ti dam leh thlup a,"ummm" pakhat lahin alo ti tûm hmuk.A rilru tak chuan a û hi ahaw tawhlo tih ka chiang em a,an inkar pawhin ngai a awh leh thuai ka ring tlat.


"U Obed,naktuk chu ka dawr te pawh min rawn hmuhpui ve la.Ka phuisui ve tawh lutuk asin"phûr zetin U Jeneti'n a rawn ti hluai a,Judy erawh project work tiin a thiante in ah zanriah a ei tlang nghal dawn ani.A û pawh a rawn dil leh ngial tawh kha maw.





"Bawihi damthat deuh hunah kan nupa in kanla rawn hmuhpui zawk ang che.Chawlh ka la ta sa sa ka nupui hi kan enkawl phawt anga,kan buaipui hmanloh lai che in nangmahin ilo in chingfel der a! I puitling khawp mai Jenet" U Obeda chuan ati hlauh a,a chhân dan chu ka beisei loh lam daih ani.

"Aaa Judithi hian min pui nasa alawm"U Jeneti chuan ati tawi tak mai,U Obeda chhandan chuan alung a ti awi vaklo nge ni?





"I pa te pawhin ka pa rawn zui haw a insak dan tur ngaihtuah tan an tum a,a duhdan ah phei chuan Falkland ah khuan inding sa a awm a,chu chu enchiang a lei mai pawh pawi a tilo anih hmel" u Obeda'n a tih leh chuan U Jeneti chuan ameng deuh awk a, "chutiang inding sa ringawt lei te chu! An hmanraw hman eng ang nge tih pawh hriat loh" ati nghal nak nak mai.




"Ka pa hmelhriat te sak ania,an mahni chênna tura an sak niin asawi lehnghal a,chutiang anih chuan hmanraw chhia chu an hmang lo tawp ang.I Pa pawh a upa ve tawh a,upat lamah insa thar leh kha a huphurh deuh pawh ani mahna.Kei tha kalo ti viau a,engpawh nise i pa pawhin rawn hmu ve phawt se"atih leh erawh chuan U Jeneti angawi ta reng a,a thlenga mi chu ei lo in a khawih akhawih ringawt.





Zanriah kan kil zo a,kan eina vel sengpui ka tum chuan tu ate mahin an phal lehpek lo! Ka tilui duh ta biklo a,sitting room lamah U Obeda ka zui phei ta ringawt.

"Ka phone inchungah ka dah daih a ka han la lawk ang aw,ka nu ten min rawn biak pawh an tum takin "tiin ka thu zet tawh chu ka ding leh thuai.





"Lo thu rawh ka han la ang" a ti chu kalo hnial thuai a,zun pah ka duh thu ka sawi chuan min hnial ta em biklo.Zun ka ngah lutuk hi chu ka ning thin,ka rai vang chauh pawh hi anilo,tunhma atang zunin hi ka pan zing viau zel.Nau ka pai hnu hian ala zual leh ta nghal a! Ninawm ve duh tak a ni.





Ka inthiar zo inhnuai lama chhuk leh ka tum kawngkhar ka hawng chu ka phu nghek a,ka au chhuak lo chauh.Kawngka pawn lamah U jeneti alo ding reng!
"Min ngaithei lo viau ami a?" Angaihna hrelo zetin ka melh tawp ringawt.



"Kimkim,U Obeda hnenah he in ka chhuahsan vat theih nan Falkland a indingsa chungchang kha ilo sawipui ani tiraw?". A tih phei chuan angaihna ka hrelo zual!





"Enge maw i sawi le?"ka ti hluai ringawt.




"Ka hrechiang che alawm nangni ang hi chu.Pawnlamah nu zem angin in lang a,sum leh pai ît lo angin in lang a inchhungril lam erawh sum ît na hlir in inkhat thung" awi! A â deuh emawni?

"U Obeda ineih chhan hi an rosum i ît vang ani tih chu ka hai lo ania"a â tawh tak tak anih hi!






"I ngaih ngaih in ngai teh" ka ti tawp.




Ka kalpel mai tur chu ka ban ah minlo phih hrawk a,ka tlu thelh nghe nghe "Falkland a indingsa lam kha lo sawipui tawh hlek suh ang che" min ti zek a, "U jenet,chutiang lam engmah hriat ka nei hauhlo.U Obeda hnenah in chhungkaw lam chanchin mai nilo i chanchin vawi khat pawh ka la sawi lo bawk.Judithi thluak i suk sak dan te hi hrelo ka ni miahlo ania,kan chhungkua ah ka pa damloh lai lehnghal a innghirhona awmlo se ka duh vang chauha ngawi mai mai ka ni.I Palzut mai mai theih ka ni miahlo ania lo hre rawh aw" ka ti ve ta fak a,ani ka hlauh vanga ngawih chuh ah min ngai anih chuan a ti sual hle ang.






A dar san zeuhin "kan la hria ang chu, ka hlau hranlo che U Obeda bulah pawh engtiangin min sawi rawh ka hlau hranlo.Tunge he inchhunga tla na zawk chu kan hre mai dawn alawm.I sawi anih pawhin i pasala unau te ngaihlo nih bak i hlawh dawn chuanglo" ti sam et anui sak a,ka thinrim chu ka inhum ruh tung tawh.



"Ka pasal hian i rin ai nasa in min ring tawh tih i hrelo ani" ti ve hlakin ka kalpel hmiah.Ani duh duh sawikhum theih ka ni nek lo.




Karkhat leh achanve kan hmang liam awrh tih ah ka nu leh pa te chu dam takin Mizoram an rawn chuangkai leh ta a,ka pasal in asawi lawk tawh ang ngei in u Jeneti nu leh pa in an rawn zui haw bawk.
Ka pa chu hmuh anuamin ahma ai zawngin alang hrisel zawk a,rilru alo hlim ru ve veng veng mai.An rawn thlen zan chuan keima nu leh oa te pawh an rawn chho ve bawk a,kan ri ve luih luih mai.





U Jeneti pa chu Pu Sawiluaia niin anu chu Pi Thahmingi ani bawk a,an fanu anglo zetin kei chu min lawmin ka naupai pawh min lawmpui ngang mai.

"Obeda chu hei nupui i thlang thiam khawp mai.In fate reng an chhe thei dawnlo anih hi"Pu Sawia chuan a ti fiamthu leh hlut thin.Pa ti ti thiam leh fiamthu duh tak niin ka hria.Nuihna tur a chhakchhuak thiamin a uang riau a,ka pasal hma ah min ti lai leh dawn dawn thin.





"Ti daih ilang Sawia,Falkland lam ram chu enge i ngaihdan? "Ka pa (Obeda pa) chuan a rawn ti chhuak hlawl a,U Jeneti ka en chu ahmel alo tum nghal hmuk.




"Han en ve phawt ilang,Chhuanvawra hi ka hrechiang lo nangin ka lo ralkhat hriat ve tawh a,a ni insak chu a chhe theilo"Pu Sawia pawhin a ti ve mawlh mawlh.
"Ka ngaihdan chiah ani,an nu kha Chanmari ah sawn boral hman lo se chuan an tih ral duh kher ka ringlo a,an nu ber kum tir lam khan a boral ta si a,Chhuana hian an nu ruang chhuahna in saw chhuahsan a duhlo ani awm e,chung nilo se tihral pawh a remti kher lo ang"ka pa'n a tih leh chuan Pu Sawia pawh a inngaihtuah muk khawp.





"Pa,indingsa chu tha viau mahse keimahni duhdan ngeia sak chu atha zawk lo maw? Ram nei sa lo pawh kan ni lo a"U Jeneti chuan a rawn ti ve ta hlawl a,a ngawi rei tawh ka ti reng ani.



"Aaa Net-i,i ngaihdan pawh chu atha viau a,mahse kan lo upa deuh tawh nen i û te nen kan inrawn a,inding sa nghet tha leh hmanraw tha hmanga sak a awm phawt chuan lei mai kha sum kan seng hnem lo zawkin kan lo ring a.Mizoram chu lirnghing te hi a hlauhawm ru riau a,hei i pa te inhmun anga rem kan inhmun lei kha ani ve silo bawk nen,Falkland lam lah chu a ram a that hmel viau lehnghal a"Pu Sawia vek chuan a ti leh charh charh.A rilru chuan Falkland lam chu a awn sa anih hmel.A awm ve reng mai,upat lamah in leh lo han dinthar leh pawh chu a huphurhawm ru dawn emai.




"Mahse pa"U Jeneti'n a lo ti leh chu apa'n akut hui khum zeuhin "kan lei ang pawh kanla ti chuanglo a,a ram chinchang te zuk en ve phawt ilang kan la ngaihtuah dawn nia" tiin afanu chu tawngzui leh tawh lo turin a siam nghal hmak.





Mu turin kan room lam kan pan san a,intifai hmasa in U Obeda chu ka zawh ah a intifai ve nghal zat bawk.
Darthlalang hma ah chuan dingin ka pum chu ka thla lo lang chu ka melh reng a,chhia ka inti phal lo.Hmeichhe tam tak chu nau an pai a an dul alo len deuh hian an insit duh viau a,kei erawh ka thisen ngei ka pumah thanglianin ka taksa a rawn ti danglam a,Pathian malsawmna anih vang ringawt pawh hian ka taksa lo danglam ta chu ka insit phal lo.





"I nalh lutuk" ka hawisawn thuai, a lo chhuahlai ka hre miahlo!





"Ka dul hi alen belh deuhin i hre ve em? Tunlai chu ka thil ei pawh a tui sawt tawp a!" Ka ti hliai,tunlai tak hi eichak ka ngah in ka thil ei a tui viau zel!
"Umm,ka naute tereuhte khân riltamin a siam reng thin miau che a tiraw" nui suka a tih chuan kalo nui ve tawp.
Ka pasal lakan hian pangchan nuam ka ti a,ka eichak zawng te hi abulah sawiin 'i naute tereuhte hian a eichak aniang mi tur ut ut mai'ka ti ta thin a,U Obeda lahin chutianga ka sawi chu alo lawm phian zel!




"Amak e! Ka pian ahnu lama ka dul kiarh ber tum ala niang" ka ti leh hluai chu nui hawk hawkin min rawn pan hnai a,ka hnung lam atanga mi rawn kuahin ka pum chu a chûl ve hauh hauh.
"Ka naute,hmuh che ka nghakhlel tawh hle mai.Lo chhuak tawh mai la" a ti zawi ve ruih.
"Ka duhlo,hetah hian ka tawm tlat dawn a ti anih chu" ka lo ti zeuh a,darthlalang chhan vek atanga mi melh in chimawm min tih hmel zet hian min melh rulh rulh a, ka dul chu na lo te a pen kawrh in "i chimawm reuh hle mai" a ti ta hluk.




Chutia kan nuih dun vur vur lai chuan ka oum chu arawn che a! Avawi khatna ani!





"Bawihi! I hre ve em?"mak ti zetin U Obeda chuan a rawn ti deuh nawk.Ka pum chhunga che te chu engah nge ka hriat loh ang ni?a ti mak thei em em emai.


"Avawikhat rawn chet na anih kha" ka ti chiah chu hlim hmel zet hian a khi ta thaw a,a awmloh lai in a rawn che ang tih ahlauhawm hial zawk.
"Kan thawm ahre ve aniang a"a ti ta reuh a! Ava hahthlak thin tak.Naupang thil thar nei ang mai lawmloh in anuih tak vur vur reng mai hi maw.




Ka pasal pawh hna lamah akal zawm leh tawh a,keipawh ka taksa mam chho tan tawhin hmuh ka nuam ve tawh viau in ka ring.
Ka pasala nu pawhin "ka tû lo piang tur chuan api leh pute alo ngai ber aniang,kanlo haw i ngaih em mai"min ti hial.Ani lah taka,an rawn haw hnu phei hi chuan insawiselna ka nei khat khawp mai.






Beisei loh zetin ka ti dawn nge ni? Pu Sawia te nupa chu Chennai a an let thut angaia,an hna thawh lamah buaipui ngai an nei ani awm e.Ka pasal sawi danin Pu Sawia hi Engineer mizo zingah chuan ahmasa pawl leh ram pawn lama thlengsang pawl niin a sawi a.Sawrkar ah pawh sawmna dawng mahse lut duhlo in pvt company lian tak pakhat ah a thawk ta zawk ani.A fapa ,U Jeneti û chiah hi chu Chennai hotel pakhatah dinhmun sâng tak chelhin a awm bawka,an upa ber erawh hnamdang khawthlang lam mi nupui ah neiin Canada lamah an inbengbel tawh thung.Sum lamah chuan harsatna an neilo viau ang tih chu rinthiam ahar lo.





Kan ni hman chu anuam chho tan viau a,doctor hnena kan inentir leh pawh in ka dinhmun chu naupai dangte ang tho anih leh tawh thu minlo hrilh.Ka sawi awmzia chu naupai hrisel tha pangai tak ang ka tihna ani.Ka Hb erawh hniam leh thut thut thei reng anih vangin inenkawl tha viau turin min ti bawk a,chubakah vawikhat bedrest ngai khawpa ka awm tawh avangin a dawt leh awm tawh lo se athat ber thu min hrikh ngun ngang bawk.






Judithi chuan pvt school pakhatah thawk tura sawmna a dawng a,zir zawm leh a rilruk hrih lo bawk nen ka pa leh ka pasal te nen an sawi ho hnu in kum khat chhung chu thawh ve ohawt a rel thlu a,karthar atang ahna atan bawk ang.
Naupang la enkawl ve ngai heklo,ka buaipui thin dan te chu min rawn ve mawlh mawlh a,kan inpawh zual phah hle.





"Pâ,U obeda hian ka dawr minla hmuhpui miah lo ania aw"tukthuan kan kîl lai chuan no zet hian ka pa hnenah U Jeneti'n ati leh hnâp tawh.
Min tawngkhum fak atang phei kha chuan ka be hmasa tawh lo tluk ani.A pa ala dam ve reng lai a ka pasal pa 'pa' tia ako duai duai reng te chu ka ngaihdan anilo khawp a,chu erawh ka awmve hma daih atanga an lo in koh fo dan ani tih hria in enghelh loh luih hram hram ka tum.


"Ngahnge maw i nau dawr chu ila hmuh pui loh ni? Vawin sawrkar chawlh ani bawk a in nu nen hian zu hmuh oui tak rawh u"Ka pa pawhin a ti ve nghal a,zep loh chuan U Jeneti dawr kher chu zuk hmuhpui ka peihlo.Chu ai chuan nilenga inhnial pui tur neih pawh ka peih zawk.
Mil loh sa nen ahmel ka hmuh te hian ka ni deuh nghulh zel!






"Bawihi, i peih angem?" Tiin ka pasal chuan min rawn nghal a 'peih teuhlo' ti a chhân tak ania ka nap,achi der mai silo a "peih loh pawh a awm chuanglo"ka ti ta tawp.

"Anih chuan kan rawn kal dawn nia Jenet,chhunlam boruak hi Bawihi hian a zawh loh deuh takin chawhnu lam boruak daih deuh hunah kan rawn kal ang" a ti ta a,ka hnial lo khawp mai.Nileng lenga zuk awm te kha angaih mawlh ania ka hlauh ni.





Chawhnu her alo nih chuan U Jeneti dawra kal turin kan intin tuah a,khua alum bawk nen kawrfual ka chawn thleng vel a pawldal ban bul chu ha in sandals ka bun a,ka sam erawh lum viau mahse ahmawr ti kawi chiat in ka thlah thung.Thawmhanw lam ah inchei lo deuh pawh ni ilang kan sam leh hmai vel kan chei hi chuan kan lang inchei nghal thlup zel

U Obeda chu Tshirh pawl dal hak tir ve in kan thawmhnaw hak rawng chu a in ang lek lek.A thawmhnaw ka thlanchhuah sak leh ka inbel lai chu melh tawn zak zakin min chhaih deuh reuh lehnghal!A duh chuan alo nghal thiam ve khawp mai.






MC lam panin amotor chuan kan inkhalh chhuak a,MC hnuai ah motor dahin U jeneti dawr lam chu kan pan chho nghal a,kan thleng chiah chu U Jeneti'n anunphung ahlauh ka ti dawn nge ni ka pasal chu a rawn kuah deuh chung chung mai!

A dawr chu alo zau reuh khawp a,asawi ang tak takin alo inhnawh muk ve lutuk tawh ringawt.A mi chhawr nge ni nula pahnih an awm ve bawk a,dawrtu an neih loh lai tak pawh ani maithei midang an awm hranlo.





"Ruthi,Sawmi hei U Obeda anih hi"a bân a la kai reng chung chuan U Jeneti chuan a hnathawk te bulah a hmelhriat tir a,kei chu min lam ri ve lo reng reng!





"Enge i duh? Kalo enpui dawn che ami?"Ruthi a tih zawk in kei min melhin a rawn ti thuai.





"Bawihi,lo kal ta che.Ka nupui anih kha"U Obeda chu ka bulah rawn kalin ka kut a rawn chelh nghal zat.





"Oh! Anih chu,nupui i van nei hmeltha!"Ruthi chuan a ti ta reuh a! Ka pasal chuan min chhuan hmel zeta min melh deuh vang vang hnu ah "atha ber lo chu ka thlang duh hleinem" a ti ve khauh mai!




Dawr ah chuan kan thu ve ta reng a,rawn tei lut pawh an awm ve leh zeuh zeuh thin.





"In inhralh tha thei em?"Ka pasal chuan zawh bik pawh neilo in a ti a,dawr nghak pathum an awm miau a U Jeneti pawh azawt hran chuanglo.





"MC anih vang hian atam zawk hi chuan rawn kuh an hreh a,a to bik tur ah an ngai ngawt a"Sawmi zawk chuan a rawn ti a,U Jeneti rawn inrawlh vatin "thil to to chu tlo pawh atlo zawk a,man tlawmte lei ai chuan a tha zawk daih alawm"alo ti ve thuai.


"Adik na chen a awm a,man tlawm te tha deuh si pawh hi a awm tho ania.Rawn lenglut te inlo dawnsawn that zel chuan engang mi pawh nise in dawr pawhin mi hriat ahlawh chho em em ang."ka pasal chuan a ti leh charh charh.





"Bawihi,i ril atam em? In eipuar ve lawk ang hmiang"tiin kei chu min be ta daih a,dar thum a ri dawn tawh a,ka ril chu atam ru leh deuh tawh tho mai.






"Kalo kal ve nghal ang,chhuna kan eitur chah kha ka eitha thei derlo.Sawmi ka va chhuak ve zuai ang aw"U Jeneti chu a rawn tho ve nghal tharh! A va hneawm ru reuh tak,awmlo ilang a ei pawh ka ringlo e a.





A dawr piah lawk ah chuan in eipuar turin kan kut a,eitur kan chahfel hnu ah inthiar turin ka tho kang zui,U Obeda chuan min zui ve a tum lehpek tawh a,"ka rei dawn lo lo thu rawh" tiin ka kalsan lui thei hram.Mi mit te kan tikham reu reu ang tih ahlauhawm.






Ka zung zo kan chawlhna dawra la lut leh tur chu Biaktei nen kan inhmu hlawl mai!
"I bazar em ni Biakte"be hmasa ah tangin ka ti a,a ni pawhin tha takin an thil chah an lam thu min hrilh ve mai.

"In bazar thung ami?" Tiin min zawt let ve ngei a,"chutiang lam lo deuh,U obeda pawh a awm asin,thil kan ei dawn chiah a lo lut ve la" ti a dawr chhung lam ka thlek zeuh chuan a thlek ve vat a,a ner nghal nawk thung.







"Saw nu bawk"ti hlakin a eiloh hmel ngang mai!




"Jeneti tei vet sawn enge a tih ve?" A ti ta hlak a,"a dawr hmuhpui turin min sawm a,kan rawn enpui ve a,thil kan ei nghal dawn anih saw.I hria em ni?" Ka tih chuan a hmel chu a siam chhe nasa ngang mai.





"Ka hriatloh chuan amak zawk ang chu.Hmuntinkiltindengchhuaki anih saw,ka ngei ania ahmel ka hmuh zawng te sawn bp sang ka nei dawni'n ka hria! Ka din ve reng chuan ka va kek phar awn awn duh ang ka kalsan phawt ang che.I pawisa ka pul kha rulh let na tur che ka la neilo aw" tiin akalsawn zui nghal nal nal chu ka en reng ringawt.Eng tak chu hria nimaw?

Ads click hi ti hram hram ang u aw, ads kan click atang hian writer ten hlawh an lo neih ve phah thin a, story min ziahsak man lawmthu sawinan ads kan click theuh dawn nia

Show post links
Top