STORYFB.COM

DARK DESIRES


CHAPTER 8


“Nangmahin i tih avâng chauhin ka that lovang” a tih tâkah chuan ka thaw deuh huai a, a that duh tak tak dawn tih ka hria a, nunna lâk belh tawh lo se ka duh. “Dom, thei thûr ka ei châk, min lâksak thei angem? Thil dang ei châk ka nei thei bawk silo, thei thur tal chu ka ei thei ang tiraw?” ka tihchuan a ngawi deuh vang vanga.




“I haw lovang maw? I taksa huat zâwng a nihchuan ka duh hauh lo a nia, i na hmêl leh damdawiin khuma i mu kha ka hmu nawn leh duh tawh lo” tiin ka hmuiah chuan a rawn fâwp vang vanga. Tûnah hi chuan min hmangaih tak tak niin ka ring ta, ka tum chu ka hlawhtling phawta, mahse tihnata a huat zâwng a awm chu ka thiam kher a ngem ka hrelo.



Bâkah ka chungah an ṭhat laia lo sual tlat kha ka duh lova, chutih rual erawhin ka unaupa leh ka ṭhiannu erawh ka theihnghilh ngailo.


“Ka ei châk a lawm, engtin mah ka awm lovang. Fridge ah khân lakhuihthei vêl a awm in ka hria, min zuk lâk lawk mai ta che. Serthlum pawh kha aw” tiin ka tir chhuak zuia, min hnial hauh lo lehnghâl, kawngka a a chhuak chu ka en zui vang vanga.



“Zawi zawiin ka tina ve ang che” ti sapin ka pum chu ka chûl hliau hliaua, tûra min hrai vâng kha nge maw ni ala nuam thei meuh lo. A ri kual ruih ruih reng mai, Rosie-i chu theih se keimah ngei hian sawisak ka châk tak zet, hetiang nunna in lâksak tum lam phei hi chu khawvêla ka huat ber a ni.




Dominic-a chu a rawn lêt har lo, ka thil chah ho chu plate ah zai lêp sa vek hian a rawn kenga, ka lo nuih nghâl var var mai. “A tui dâwn lutuk, ka lawm e” tiin a biangah chuan ka fawhsak zauhva, a ni pawh a rawn khi ve suk mai.



“Maid ho kha engtin mah i tilo tiraw?” ka tihchuan “Thah tum tu che kha ka bân, a dang zawng chu an la awm. Nakinah i tâna pawi thleng leh thei thil a ni tih ka hria, heta thawh ve reng a ngailo, hna dang a hmu mai ang” a tihchuan ka hnial duh ta biklo.



A nun a lâksak lo ringawt pawh kha nu tân kha chuan lâwmna tur a ni ve rêng a ni, a bâng chu pawi ka ti hran lo. Nakinah keimahin ka tawrh leh phah ka hlau, ngawi reng chuan a thil min rawn lâksak chu ka ei ta zâwka.




A tui ngei mai, lakhuihthei hi chu ka ngaina bawk nên englai pawhin ka ei peih, ha kârah a tâng duh mai pawha. Dominic-a ka zâwnah chuan dahin a ni pawhin a lo ei ve mai bawka, ka nui nghal sak mai, min hmangaih thu a sawina kha a la reilo va, chutih rual erawhin ka laka a chêt dân erawh chuan a hma a amah kha a ang lo takzet bawk.




“A tui em?” ka tihchuan a bu nghata, a mah chuan rawn banin a ei ve ta mawlh mawlha. Keiai mahin a heh leh ta zâwk, Serthlum nên chuan a inhnawh lût mawlh mawlha. Ka ner nghal nâng mai.



“Ka ei turin i la ve em em a, min ei zawh sak ṭêp hi. I mak emai, ei tur pawh ka chang ve hleinem“ tiin ka tûm bûr a, a inthiam lo leh si nge “Tihpalh, a dang ka zuk la leh ange lo awm rawh aw” tiin thinrim hauh lo chuan a tho chhuaka.



Chute chuan ka mak tih an tizual, thinrim hauh lova min bia chuan mak min tih tir a ni ber mai. A chhuah hnu thleng chuan a awmdân chu ka ngaihtuah vang vanga, hmangaihna hian mihring nun hi a lo thlâk danglam thei takzet a nih dâwn hi.




A laptop chu khawih sakin ka lo nghaka, movie ka en pah bawk. A rawn lêt leh meuh chuan a hma aia tam mah zâwk hi a rawn kenga, ka au nghal hliai mai.



“Khatianga la tam te chu a hma daih aṭang khân rawn ken tawh tur a lawm, i duh chuan i ei ve thei ang” ka tihchuan a bu nghata. Ka sir ah chuan rawn mu thla ve in thil ei pah chuan movie chu kan en dûn a, tûnah hi chuan misual leh ngeiawm tak kha a ang tawh meuh lo.




Zaidam hmêl leh eng helh nei lo hmêl a pu leh daih tawh mai. Ngawi reng chuan ka inhnawh lût mawlh mawlh renga, a ni pawhin mak min ti deuh nge movie pawh en lo chuan keimah ringawt chu min en char char a tih theih.



Ka nuih a tiza ru riau lehnghâl “Ka puar ta, mu ang. Ka chau lutuk, ka meng peih tawh lo” tiin kan thil eina plate ruak chu khum sîrah chuan ka dah ṭha a, in siam rem hrat hratin a kâwngah chuan ka kuaha, ka mu nghâl thak bawk.




A ni pawh rawn insiam remin min kuah nghâl hlu hlua, ka thaw chhuak suai suai mai. Ka la dam lutuk lo nên ka tân mut tam a ṭha tih hria in ka mit chu ka chhing zuia, rei pawh nilo chuan ka muhil ta thuaia.



“Rosie duh tâwk rawh ka that duh mai ang che, Lilia i ti harh a nih vaih chuan” Dominic-a aw chang bêng bâwng ka hriat rualin hmeichhe thinrim âng thâwm ka hre chhun zawm nghal zat mai.



“I bialnu ka nih hi, min that a nih chuan ka pa nên in thawh dunna tâwpin i tlâk chhiat phah ve thei tih i hria ang chu maw? Min that a nih vaih chuan ka pa a ngawi mai mai hauh dâwn lo a nia, sawnu vâng teh hrep sâwn engkim a chhe vek a nih hi” ti a Rosie-i au tuar tuar ri chu a rawn chhuak zuia.




Ka meng chhuak nghal vat mai, helaiah a la rawn kal ngam a maw? “Ṭawng tam hauh suh aw, nang ni thawhpuina tello pawhin ka kal thei tihchu i hrechiang khawp ang, kut ka thlâk hreh dâwn tawh hauh lo che a nia” a tih leh lai chuan Rosie-i chuan ânchhia min rawn lawh leh tuar tuara.



Ka insûm buai peih tawh lo, in perh tho ât in ka na pawh ka ngaihtuah thei tawhlo. Min ṭawng khumna leh min hrai hlum a tumna avângin ka lo thinrim sa tawh bawk nên pan hnai pâwk pâwk in a samah ṭhâm sak chuan a hnarah tak chuan ka hnek ta sawka.




Insûm buai pawh ka tum tawh lo, leiah chuan theh thlu ṭhuai in ka hnek nghal mawlh mawlha. Rosie-i chu a au tuar tuar mai. A ṭap pur bawk nên Dominic-a zâwk chuan min rawn ṭhelh ta tawpa.



“A tâwk e, Frederick” tiin a au zui ṭhata, Frederick-a pawh a rawn lang har lo. “Henu hi theh chhuak nghal rawh u, tin ka phalna tello vin a rawn lût tawh tur a nilo” ti zui hrawkin keichu khum lam chu min panpui zuia.




Engmah tih ka tum tawh biklo, Rosie-i lah chu a ṭap ruah ruah renga, a chan tâwk chiah a hmu anih kha. Mi te thah a la tum ve khang lang lehnghâl.


“Tinge i lo thawh chhuah? I la dam chiang lo ka tih kha, keimahin ka chingfel thei a lawm“ a tihchuan ka nuih ringawta.


“A hrim hrimin ilo va huai pap pap ve, Rosie-i meuh pawhin a ngam lo che a nih kha” tiin a nui suk suka, kei erawh ka nuih a za ve hauh lo. Min rawn ṭhelh lo se chuan khanu kha na takin ka khawih duh ang, a sam te kha pawh ṭilh vek a nia ka duh ni.



“A phû tâwk a hmu a nih kha, engah nge min lo dan? Min thah a tuma ka la khawih na lo mah mah zâwk a nih kha” tinghat nghatin ka kut chu ka kuangkuah hmaka, “That lo turin min tia, i khawih leh hrep bawk sia“ tiin a nui suk suka, rum zet chuan ka en kalha.



“Ka that ve dawn hleinem, zirtirna ka pe mai dawn a nih kha, a hrim hrimin engvanga ngampa taka i room-a rawn lût nge a nih? Ka lâwm miah lo a nia aw” tiin ka kut chu ka kuangkuah hmaka.



“Sorry an rawn luh tlang tir palha, a thleng nawn leh tawh hauh lovang. A hrim hrimin i ril a ṭâm tawh em?” a tihchuan ka bu nghata, min kai tho in inhnuai lam chu min pan pui nghâl zat mai.



Ngawi reng chuan ka zui ve zêl a, maid ho pawh tukin chu tûk dang ai an hmêl a fuh lo, hlauthâwng hmêl an pu reng mai. Kan thlen thlâk rual chuan chaw ei chu an lo siam zung zunga.



“Mady, hlauthâwng hauh suh u. A hma ang khân awm leh teh u, khatiang chuan in hmêl hmuh a nuamlo. Ka ṭhian neih chhun te in nia, ka chungah engmah in ti ve hleinem, khatianga kimki du a min en kha ka duh hauh lo a nia” tiin Dominic-a bulah chuan ka ṭhu thla a.



An ni pawh an thaw deuh huai mai, Dominic-a lahin engmah a sawi lova, chu ringawt pawh chu an tân chuan a lâwmawm viau ang. Hepa hi chuan midang thu a pe ṭhang lutuka, ṭawngkam mawi leh chhiahhlawhte lakah ngat phei chuan a hawihhawmna hi a lantîr ngai lo rêng rêng.



“I ei chak lutuk i hâk ange, fimkhur deuh khân ei rawh” tiin tissue chuan ka hmui sir vela thil kai chu a rawn hru faia, ka nuih sak ringawt. Thil ei muan lutuk hi ka thei ve lo, ei mawlh mawlha puar zung zung ka duh zâwk.



“Vawiin i vâk chhuak leh angem? Nge ni a inah i awm dâwn?” tiin ka ena, ina a awm tur thu zawnga min chhângin a chaw bawk chu a ei leha, chaw ei lai phei hi chuan a ṭawng tlêm zual.


Be tawh bik lo chuan chaw chu ka ei mawlh mawlha, ka kham rual chuan ka in sa seng tharh bawk. Boruak thianghlim hip ka duh bawk nên pâwnlam chu ka pana, mipa a ni bawka a in bul vêlah hian pangpar lam chi reng reng a awm lova, nakinah ka la phun ngei ang. Compound a nei zau ṭha ro pui si.



Ṭhut mutna tur an siamah chuan pheiin ka ṭhu mu dar dara, vân lam thiang kûk mai chu hmuh a nuam ngei mai. Khitah khian ka nu leh ka u kha an awm ve tawh ngei anga, hlim taka an awm dun ka beisei, an kianga vawikhat tal awm leha, chhûngkaw kim taka awm leh kha ka châk a ni.



“Ka nu, ka u, Katty, hlim takin in awm tawh ang ti ru, nang ni chuan buaina leh harsatna tuar tawh lovin in lêng tawh dâwn si a, ka nu i sawi fo ṭhin Christiante Pathian âng chhûngah chuan i awm tawh ang tiraw? Ka ngai lutuk che u, vawikhat tal hmuh leh cheu ka va han châk tak em, ka kiangah hian rawn awm leh thei ula tih hi ka duhthusam a la ni fan a sin” tiin ka phun chhuak sepa.




A châng a chhumin ni hliaha a rawn awm châng te chuan ka nui leh ver ver ṭhin a, ka u nên khân chhum hmang khân kan duh duh lem kan siam ṭhin a nih kha. Mittui tling pamin chunglam chu ka en vang vanga “Nu ka va mal ta em, engtikah nge kan inhmuh leh ang le, thih hnu piahlam ramah hian kan inhmu leh thei angem? Nge ni a, kumkhua in thih hnu thleng pawhin ka hmu tawh ngai dâwn lo che u?” ka phun leh sep sepa.




Ka bula ding awm anga ka hriat avâng chuan ka hawi chhuaka, dominic-a chuan chiang zet hian min lo en leh ran tawh mai. Engvanga ka lungngaih laia ka bula awm thei em em hi nge maw a nih le? Ka hrethiam thei ngai dâwn lo a nih hi.



“Lilia khatiang khân in ngaihtuah tawh lo la ka duh, tumah kan ko kîr thei tawhlo. A liam tur chu an liam mai ani, min hmangaih tum la nakinah i tân thil pawimawh tak ka dah hi ka la hmuh tir ang che” tiin ka bulah chuan a rawn ṭhu thla a.




Eng thu a sawi na nge ni ang? Enge ka tâna pawimawh tak chu, ka hrethiam hauh lo mai. “Enge i sawi awmzia? Tûnah min pe thei lo em ni?” ka tihchuan a lu a thing nar nara, “Tunah chuan engmah la hre lo la a ṭha zâwk. Ka sawi ang khân min hmangaih tum phawt rawh, nakinah engkim ka la pe ang che” a ti leh ringawta.



Engmah ka zâwt duh tawhlo, a ṭul a tih loh chuan min hrilh leh dâwn chuang lo tih ka hria. “Inchhungah lût tawh ang hmiang, pâwna awm reng a ṭha lo” a tihchuan ka hnial bik lo. Min pawm nawlhin in chhûng lamah chuan min luh pui zuia, a âwmah ka bei chial a.




A hmeltha zet chu ka en leh vang vang ṭhin, min hmangaih tih a sawi kha ka ringhlel lo bawk. Mahsela engtin nge ka tihnat ang tih hi ka hre theilo, ka tina thei tak tak angem tih pawh ka hrelo va, keimah zâwk pawhin ka tuar leh phah thei tih ka hre chiang hle bawk.

Tûnah pawh hnung zuitu a ngaha, amah duh leh ngaihven tam tak an awm kârah engtin nge ka tih nat ang tih pawh ka ngaihtuah ve fe a ngai a ni. Khumah chuan min mut leh tawpa “Dom, mut reng hi ka ning a nia aw. Ka mu peih tawhlo” tiin khumah chuan ka let kual huat huata, a rawn nui nghal hawk mai.




Min rawn hnaihin ka samah chuan a rawn chûl hliau hliaua, keiin a chêt dân chu ka lo en reng thung. Ka bulah rawn ṭhu chuan min kuah ta hlu hlu a “In a awm chu i ning viau em ni?” a rawn tihrual chuan ka bu nghauh nghauh mai.


Lên chhuaha Korean food lam bâkah sea food te pawh ka ei châk lutuk, ka ngaihtuahna chu Dominic-a bulah chuan ka sawi chhuak ta rêng a, a ngawih vung vung hnuah min chhâng tawh dâwn lo emaw ka ti tawh.



“Aw le, a nih chuan tlân bo i tum tur a nilo tih min tiam la, i duhna hmunah kan kal zêl dâwn a nia” a tihchuan ka phûr ta ngei mai. Ka in tiam nghal zung zunga, tho chhuak nghal in ka thawmhnaw awmna lam chu ka pana, ka inthlâk nghal mawlh mawlh bawk.



Ka phûr hmêl a hmuh chuan a ni pawh a thaw huai tih ka hmu thei, ka insiam zawh chuan min kaiin in hnuai lamah chuan min chhuh pui zuia.


“Frederick, Fresher nên khan min rawn zui rawh u” tiin a bodyguard rinawm te pahnih chu a ko tela. An ni hi chu pakhat zawk zawk emaw tal hi a vah chhuah a piangin a hruai tel ngei ngei. An ṭha in an pu tân an nun chân pawh an huam hle tih a hriat, an ni pawhin min rawn zui vata.



“Kan hruai tel zêl dâwn maw? A nuam âwm lo, min vêng rûn reng dawn bawk si” tiin ka phun nâng nâng a “Kan hlatah an awm zêl mai dawn a lawm, in vên hi a ṭha. Thil thleng pang thut thei a ni a, tûna fimkhur taka kan awm hi kan himna tur a ni” tiin car kawngkhar chu min hawn zuia.



Keipawhin engmah ka sawi belh tawh biklo, ngawi reng chuan ṭhu lûtin ka mit ka chhing ta daiha, Dominic-a chuan ka kut chu a rawn hûm nghal vang vang mai. Kan tlân chhuah hnu lawk chuan ka hmu lo rei tawh nên khawpui chhûng kan tlanna vêl chu ka en kuala, lunglenna hlirin min rawn tuam leh tawh.



A hma kha chuan ka duh duhnaah ka kal theia, tûnah erawh khuahkhirhna hnuaiah engkim tih zêl a ngai tawh si. “Saw le, i duhna hmun chu kan thleng e” Dominic-a rawn tih rualin ka en nghal vata, Korean food lam siamnaah chuan min luhpui nghal zat bawk.



Chutah tuipui lam sa te pawh an lo siam tel leh zela, a dawr a lianin a changkâng bawka. Thil chu an lo siam chikim hle bawk, menu an rawn dah aṭang chuan ka duhzâwng chu ka chah ta zung zunga.



“Lilia i ei zo vek thei ang maw?” Dominic-a chuan mak tih hmêl deuh tak hian min rawn ena, ka lo bu nghâl nghat mai. Ka ei zo leh vek dâwn tih ka hria, ka chêr ang ai hian ei ka theia, ka thau theilo hi ka u leh ka ṭhiannu pawh khân mak an ti ṭhin rêng a ni.



Ka thil chah ho chu an rawn chhawp mawlh mawlha, sangha tui leh man to em em ka ei phak ngailoh Tuna an tih ngei mai pawh ka chah tela, Dominic-a hian ka thil duh chu min lei vek thei turin sum a ngah tâwk tih ka hria, tin, tûna ka thil chah ang te hi chu ani tân chuan a ho tham viau ang chu.




Ei nghâl mawlh mawlhin a ni erawhin engmah ei tum lo tih hriat tak hian ka thil ei chu min en renga. Breakfast ka ei hnu lawka chutiang thil ka ei leh thei te chu mak ti hmêl te pawh a pu, mahsela tukṭhuan kha ka ei tam lo miaua. Ka pum hian a la pai huam lutuk tlat.



“A van tui tak, kha ei ve rawh” tiin tteokbokki thak ṭha tak mai chu a lamah ka dah hnaia, a ei hreh hmêl em em mai lehnghâl. Eilo ngam heklo a kâ chu a âng zuia, ka tulh nghal vat mai, a rawn khuh nghal bawrh bawrha.



“A thak lutuk” tiin kan sira theitui inchhawp chu a in nghâl khawlh khawlh mai, ka nuih kiah kiaha. A ni lah a la si hluam hluama, a hâwp tlêm teh lul nên hmarcha chu a va ngam lo tak.




“Khatiang a thak lutuk, ei tawh suh. Khawi paih ang, i pumpui a chhia ang” ti a min rawn lâksak a tum chu ka lo vin hlara. “Ka ei duh a lawm, ka ei châk zâwng a piang ka ei theih tur thu i sawi tawh kha, i thusawi i sût thiang tawh lo. Ka ei zo vek dawn” tiin ka hâwp nghal mawlh mawlha.




Mak ti lutuk hian min en tawp tawh “Eng kâ leh pumpui nge i neih ni” ti hlukin ka thil ei ho chu a en kuala, Tuna te chu ka in barh mawlh mawlha, a va han tui tak. He restaurant ah hian chawlh fo tur a nih hi, an thil siam a tui tlat. Ka thil chah ho ka ei zawh meuh chuan ka puar ta âwk mai.




“A va han tui tak, hetah hian kal fo ang aw. Thil an siam tui tlat, American food ka ngaina lo, hetiang zel hi inah pawh min siam thei se chuan ka chaw ei a tui viau ang” tiin ka sawi par para, ni e ka nu hi Korean mi niin ka pa nên hian an zinna aṭanga in chhar a innei ta an ni a, kan unau hmêlah pawh hian Asian hmêl a lang tel rêng bawka.




“I thi hma dâwn lutuk” a rawn tichu ka ner naka “En la midang phei chu nitin an châwl a, an hrisêl lutuk. Bâkah thak te chu mihring pawhin kan ngeih ve tho a nia, en la hei ka hrisêl ṭhat êm hi. Nitin châwl thei ila duhthusam, inah chuan ka duh loh hlir an siama, keichu thlum lam te hi ka ngaina lo. Thak leh al hi ka ngaina” tiin ka duhzâwng chu ka sawi fak faka.




American food hi chu ka ngaina lo tak tak, ka nu khân a siam khât bawka. Chuvang te pawh chu a niang, kan unau chuan Asian lam thil zêl kan ngaina, “Chuvang a nih kha, i thau theih miah loh” a rawn ti chu ka nui haka.



“Nia, a thlum chu thauna a lawm. Ka ei duh miah loh hi, bâkah thil thlum chu ha pawhin a ngeihlo, ha a bal hma mai mai. Ka awt miah lo,” ka tihlai chuan waiter chu ko in a card chu a pe zuia, ani pawh rang tak hian che in card chu a pe lêt zuia.



“I puar chian tawh chuan hmun dangah kan kal leh dâwn ania” a tihchuan ka bu nghata. Khawiah tak min hruai tum ang maw? Zui ve zêl phawt mai ang.



Chutah khawpui chhûnga lui lian tak awmnaah chuan min hruaiin leiah chuan min kal puia, lei aṭanga tui ka thlir chu a mawi ngei mai. Tuia khawpui êng thla rawn lang chu a mawi lutuk tlat, thlir vang vangin ka nui ta ver vera.



“Hetiang hian a lo mawi a nimaw? Ka hmu ngai miah loa, a mawi takzet” tiin lei sir tlâk dala an thir kham chu ka bawha, ka hnungah Dominic-a chu rawn dingin min kuah vang vanga.



Thla a êng bawk nên ngawi reng chuan kan awm dûn a, motor tlân ri leh music ri nuaih nuaih mahse chûngte chuan hmun an chang hauh lo. A hote pahnih erawh kha chu kan hlat deuh takah a awm tir riha, tûnah chuan tumah dîp dâl tu kan nei lêm lo.



Leia ṭang chuan min kalsawn puiin kawngsira park an siam reh raihah chuan min kal puia, êng an chhi hauh lova. Thla êng hnuaiah erawh phûl tlêm awm dap leh a chung lama thingin a zâr hliah pawh a hmuh chian theih viau mai.



Dominic-a chuan chulam pan chuan min kal puiin kan ṭhu dûn a, ka taksa chu a zût kual riak riak bawk. Ka hmuiah rawn fawpin ril raih hian a hmui chu a ti che a, ka taksa vêl a chûl tel avâng chuan keimah ngei pawh ka danglam leh tawh.



Phûlah chuan min delh mu in khawvêl dangah chuan kan chêng dun leh ta delh delha, kan zawh rual chuan a kawr chung chu hâk sakin kan chunglam thing kâr aṭanga thla êng rawn lût thlir pah chuan kan phun dun sap sapa, a kut chu vuanin arsi chanchin ka hriat ang ang chu ka hrilh ve a, a ni pawhin ngawi reng hian a ngaithla ve bawk.



“Thih hnuah arsi ah an chang ṭhin tih hi i ring em?” ti a ka zawhna chu a rin loh thu a min chhâng in a nui suka. “Chang thei chu nise ka nu leh pa ngei pawh kha an chang mahna, hei chu rin thu mai mai a ni” tiin ka nghâwngah chuan a rawn nul nghal dan dana.

Ka thaw hak mai, a biangah chuan dawm sakin amah chu ka en kara, ka hmu chiang theilo nangin a hmaifang engkim a awm dân ka hrechiang tawh bawka hnaih riai riaiin a hmuiah chuan ka fawhsak ta zauha.


“Ka lâwm e, ka duhzâwng min tihsak avângin, zanin anga ka hun hman nawm hi ka la hrelo” tiin ka nuih var vara, ka chêt dân chuan a tihlim nge nui ri hakin min rawn kuah nghet salha, kan thawmhnaw kan la in bel vek lo nângin panty leh bra erawh ka ha vek tawh thung a.


A kawr chung lian zet chuan ka taksa chu a khuh vek nângin ka ke hmawr erawh a lawr zarha, a hit deuh seng seng bawk.



“Ka thu i âwih phawt chuan i duh zâwng apiang kan ti ang ka tih kha” a rawn ti chu keipawh ka phûr, in a inkhung chawrh chawrh ai chuan vah chhuah a lên khaw thawn ve zeuh zeuh kha ka duh miau a. A thu anga awm phawt chu ka duh, bâkah thil tui tak tak ka ei theih phah dâwn lehnghâl.