My Arrogant Husband BY Becca Lnz (Completed)

[Rebec Nunziri]

Chapter-12



Stacy Ramthansangi POV




"Mz.. ka thusawi hi ngaithla rawh, Rinkima thusawi kha dawt vek a nihkha, a ni nen khan eng in zawmna mah kan neilo, i birthday lawm naa in buatsaih pui tura ka mi rawih chauh a nihkha" ka ti sep a, ka thusawi a awih loh hmel lutuk chu ka beidawng hluah hluah, ka hmaah chuan a rawn ding thim khup a, "Dawt min hrilh kha chu tum buai duh suh, hmeichhe tha tak anga awm kha chu bansan rawh, i nihna diktak chu ka hrechiang tawk tawh bawk e, chuan kha mipa naupang nen a tlan bo kha chu ngaihtuah pawh ngaihtuah suh ang che, ka dam chhung hi chuan ka lak atang hian i tlan bo thei ngai lovang" a ti vawt ruih a.




Tawng leh tum a ka ka ka ang lai chuan ka banah rawn man chawt in in chung lamah chuan min hnuk chho nghal dawr dawr a, "Mz.. min thlah teh" ka pum a nat deuh zawk zawk thin avang chuan ka ti a, mahse ka tawng ve na te chu engah mah a ngailo tih hriat zetin min dim na nei lek lo chuan step ah chuan min hnuk chho dawr dawr tho, room ah chuan min theh lut a ni ber, chhuat ah chuan ka thu thla nghal tawp a, rawn lut ve nghal zatin kawngka chu chhung lam ah a kal nghal daih bawk.




"Nang hian min phatsan ngam amaw, enge pek loh che ka neih, enge ka lak ah hian duh khawp loh lai i neih?" a ti chhuak hrawih a, muangchangin ka tho chhuak a, "I ngaih ang kha engmah a awm lo, ka phatsan lo bawk che, chuchu thudik a nih chu" ka tih chuan a hma ai mahin a thinrim zual hmel zawk, "Ramthansang dawt min hrilh I la tum amaw, thudik engkim chu a lan chian tawh kha, ka hnena hlim taka i awm theih nan ka theihtawp ka chhuah a sin, chuti chung chuan i la duh khawp lo amaw, chuta karah mipa dang nen nuam in lo tawl thin bawk a, a tha e, zanin ah ngei hian i kham khawp zan chu ka pe ang che, mipa dang i mamawh loh zia ka hriat tir ang che" ti chhuak leh ruih in a kawr hak chu a khelh nghal mual mual a nih chu.




A chet dan avang chuan ka chiai ti tih nghal der, room atanga chhuah tum chuan kawngka lam chu ka pan a, mahse min rawn man hman, ka dar ah chuan rawn man in khum lamah chuan min kal pui nghal a, ka tha neih zawng zawng chuan tang sateh mah ila mipa tha na na na chu hneh lo tak ka ni, khumah chuan tling awlh khawp in min keuh thlu dawt a, min rawn bawh bet nghal zat bawk, a mitmeng te chu rapthlak tak a ni tawp, thinrim na leh natna hlir in a khat.




Ka thawmhnaw hak chu a rawn pawt thler thawt thawt , "Aih, ka duhlo, Mz.. hetiang hian ti suh, i in chhir ang, engmah tihsual ka neilo" ka ti khur dar dar a, ka lo tal ve sek chu ngaithei lo tih hriat zetin ka ban pahnih ah chuan man kawp in ka lu chungah chuan a nam bet nawk a, a taksa rih na in min delh miau avangin ka tan chet ngaihna a awm tawh lo, tawng leh tum a ka ka ka ang chiah tih ah khum sir a a necktie awm chu ban vut in ka ka hnawh nan a rawn hmang zui a nih chu.




A chet dan rawng lutuk avang chuan thawk pawh ka thaw tha hleithei tawh lo, chuchu a ni hian a hai hauh lo tih pawh ka hria, mahse chuti chung chuan tawp a tum chuang lo, kun hniam a ka hnute a fawh lai te chuan ka theih ang ang in ka lo tal a, ka tha ka hmang nasa bawk nen ka chau tawh takzet, ka mittui chu ka bek ah a luang thla zung zung bawk, chutah dim lo lutuk in ka taksa chhungah chuan a rawn lut pawp a, ka eu awrh thei.




Chet a lak zawm buan buan a, a zawh meuh chuan che leh tur pawh tha chakna ka nei tawh lo, ka chau hluah hluah a ni tawp mai, ka sir ah chuan ka mu reng in a thaw ham ham reng a, ka pasal ngeiin keihi min sual lui chu a nia, hetiang thil hi ka tawn ka ring pha ngailo, a vawikhat na a ni tawh lo lehnghal, ka taksa ruak vek chu khuh tur pawn chakna ka neih tawh miau loh avangin ka mu zawi reng a, ka mittui erawh a la tla reng thung.




"Hrep a, i mittui kha ti tla phiangsen tawh suh, i pasal ka nih hi" a ti chhuak hrawk a, ka lo tawm chawih thei, tunah tak hi chuan ka pasal ang ni lovin min pawngsual tu ang bakin ka hmu lo, ka mittui chu tih tlak loh tum sateh mah ila ka beidawng chiang khawp mai, ngawi rengin a ni pawh chu a awm reng a, ka taksa na thum ah chuan ka duhkthleh thuah in a nia ka rin ni, a ni ang palian lutuk in a duhtawk a min chin phar hnu meuh chuan ka a ruai maiin ka hria.




Khum atang chuan ngawi rengin a tho chhuak a, bathroom ah reilote a luh hnuah rawn chhuak leh in thawmhnaw a in bel mawlh mawlh a, keichu min ngaihsak na nei lek lovin room atang chuan a chhuak nghal. Ka muhil a ni ngei ang thawm ri deuh rak ah chuan ka harh hlawl a, kawngka chu muangchangin a rawn in hawng a, saruak a ka la awm avang chuan puan chu la in ka in khuh nghal hlun a, Opi chu thawm dim zetin a rawn luh zawm nghal zat bawk.




Khum a ka lo mu reng chu min khawngaih hmel zetin min en vang vang a, "I tha em?" ti sep in khum sirah chuan a rawn ding a, ka hriat sual nge a hmel chu a ngui deuh bam in ka hria, "Ka tha alawm, thil ṭhalo a thleng em ni?" ka tih chuan a thaw deuh hak a, "Rawn mangtha tur che in ka rawn kal a" a tih leh chuan mak ti zetin ka en a, "Enge i sawi awmzia, hetah hian i thawk tawh dawn lo a mi?" ka lo ti nghal hluai a, hna dang a hmu nge, mahse engmah min hrilh bawk silo a.




"U Mza'n hna atanga chawl turin min ti a" a ti zawi leh sep a, a rilru chu a hah hle tih ka hria, engvanga Mza chuan chutiang thil chu ti nge a nih ang?.. Opi te chhungkaw dinhmun a hre ve vek tho bawk si, Opi hlawh hi an ei hmuh na ve ber a ni a, tunah lah a hna atang a ban ringawt bawk si, "Engmah ka lo hre ve lova, Mza chu ka lo bia ang" ka tih chuan lu a thing na na a, "A ngailo, hna dang ka hmu leh vat mai ang, in nupa in kar a tha bawk silo a, lo tih chhiat belh ka duh lo" a ti leh sep a.




Opi hi ka thian neih chhun tak meuh meuh a ni a, a ni a awm tawh loh chuan hreawm ka ti leh zual dawn lutuk, Mza hian hreawm taka ka nun hmang turin min duh tih ka hria, mahse hetiang thil em em hi chu a tih ka ring pha lo a sin, room atanga Opi chhuak chu ka en zui reng a, ka mittui chu a tla leh mai dawn, tunah hian zawi zawi in ka tan a mi hlu tak tak ten min kalbo san zel tih ka hria, chung zing a ka tan a hlu ber chu Mza hi a ni, mahse a rilru ka hneh thei bawk silo.




Zan rei tawh hnuah pawh ka la muhil thei chuang lo, zing lam dar 2 a rik dawn tep ah chuan room pawn lamah pen thawm ka hria a, ka taksa la na thum nen chuan kawngka lam chu ka pan chhat chhat a, kawngka chu dim zetin ka hawng a, ka thil hmuh avang chuan ka khawng vek hial in ka hria, Mza leh Mary te chu in hnaih takin an awm a, ka en reng lai chuan kan room piah chiah a room awl ah chuan an lut dun a nihchu.




Chet nachang pawh hrelo in Mza te luh bo na room kawngka chu ka melh ngawt ngawt a, ka thin zawn na lutuk avang chuan ka awm chu ka chum dawt dawt a, kawngka chu zawi muangin ka khar leh riai riai a, bathroom ah chuan lut in shower hnuaiah chuan ka thu ta reng a, ka mittui chu a luang lehnghal zung zung tawh, hetiang em em hian mittui ka ngah tih ka hre ngailo, mahse ka pasal leh hmeichhe dang room khat ah an awm dun mek tih ka hriat avang chuan ka mittui chu ka dang zo lo.




Darkar khat lai shower hnuai ah chuan ka thu tawh, ka taksa chu a khur nasa tawh em em a, ka khua a sik hial tawh, shower chu off in bathroom atang chuan zawi zetin ka chhuak a, ka thawmhnaw hmuh hmasak sak chu la in ka in bel a, sam huh hnuang chungin khumah chuan ka mu zawi leh hnawl bawk, "Tinge hetiang hian ka chungah i chet, min hmangaih thu i sawi a, mahse min ring chuang silo, ka thusawi pawh awih duh lovin awlsam takin hmeichhe dang i awm pui leh thei nghal a, heihi em ni i hmangaih na sawi ve fo chu?" tiin ka phun chhuak sep sep a.




Zing ah chuan kawngkhar hawng ri ka hriat avangin ka harh a, Mza chu hmel pawr deuh fap chungin a rawn lut a, "Inhnuai ah chhuk la, rawng zu bawl rawh Mary'n chaw a rawn ei ve nghal dawn bawk a, bawl kep ang che" ti hluk in bathroom ah chuan a lut zui a, nizan a ka chunga a chet dan avang khan engmah in thiamloh na a neilo chu sawi loh min ngaihtuah lo lek a zan hun a hmanpui hmeichhe tan a ei siam tura min ti te chuan min ti na ngawih ngawih.




Inhnuai ah chuan ka chhuk thla a, rawng chu ka bawl nghal mawlh mawlh, ka thil kan lai ka chawk zo a, ka in her chiah chu Mary nen kan in melh chat, a kawr hak saw Mza kawr a ni tih ka hrechiang ngang bawk, a chhan chu ka leisak a ni miau, zak map lovin chair ah chuan a rawn thu a, "Nizan ah khan in pa nen hun kan hmang dun tih i hria ang chu tiraw, pawi i tih hmel em em loh bawk a, engkim a tha vek mai tiraw?" nui sawng chunga a rawn tih chuan ka kut chu ka hum ruh ngar ngar a.




Mza pawh a rawn lang nghal vat a, Mary bulah chuan a rawn thu thla ve nghal zat bawk, rawng chu ka bawl mawlh mawlh a, awm ve lo ang hmak a min ngaiin an in be mawlh mawlh a, Mary a biak a a aw chhuak dam lutuk ka hriat te chuan ka lo na ngawih ngawih, Mary lah chuan nuam tih hmel zetin Mza lakah chuan a pang chang viau bawk, chaw ei ka peih a, Mary chu a la thu reng, min puih tumna pawh a neilo, dawhkan chu an kil ran a, chaw ei ka siam zawh hnuah chhuah mai ka tum chu Mza tawng ri avang chuan ka tawp chawt a.




"Chaw rawn ei rawh" a rawn ti nawn leh nghut a, "Ka ei chak lo" in her chuang lovin ka ti zawi sep a, choka atanga chhuah nghal mai ka tum chu ka kut ah a rawn man chawt a, a bula chair ruak ah chuan min thut tir in ka hmaa ei tur awm chu ei turin min ti leh a, an bulah hian chaw ka ei theih a ring reng reng emaw ni?.. "Ka ei chak lo" ka thleng a eitur awm chu en ran chungin ka ti a, Mza chu a lo rum nghut.




"Mz, a ei duh loh te chuan tilui lo mai la, bakah kan pahnih bula chaw ei te chu a duh i ring em ni?" Mary chuan a lo ti no hnap a, ka va melh nghal hrawk a, "Mary, ngawi rengin i thleng a ei tur awm kha ei rawh" ti chhuak hmuk in keichu min rawn melh khui a, "Ei rawh, tun bak hi ka sawi nawn tawh dawn lo, i ei duh lo a nih chuan ka kut ngei hian ka ei luih tir ang che" a ti chhuak hluk a, a thusawi chu a sawi mai mai lo tih ka hria, ka ei duh loh thu sawi ngat ila chu ka ka ah hian min barh lui duh mai ang.




Phur lo zetin ka thleng a eitur awm chu ka ei a, ka ka ah chuan ka hnawh deuh mawp mawp a ni ber, ei zo vat vat ila he hmun atang hian kalsawn vat vat ka duh, ka ka ah chuan chaw chu a khat vek a, lem pawh ka lem hleithei lo, ka awm ah chuan a in hnawh tlat a, ka chum zui dat dat bawk, "Ei muang deuh rawh" ti sup in ka hmaah chuan tui a rawn dah a, in tumna chhete mah ka neilo, harsa ti zetin ka lem thei hram, a tui rawn dah hnaih chu hmu lo der hmak in eitur bawk chu ka ei leh mawp mawp a.




Vawi leh khat ah ka thil hmuam lai chu ka phuh chhuak thawt a, Mary chu te nghal that in a ding chhuak zui a, ka khuh that that a, ka hrawk te chu a thip hlar tawh mai, ka mittui a tla phung bawk, ka thil hmuam lai zawng zawng kha hak in Mary hmai ah ka phuh fai vek a, a hmai chu a berh ve luai mak, thupha chawi ka tum lai tak chuan ka bul hnaiah rawn kal in min nam khat deuh dawrh a, ka tlu lo hlauh thung, Mza chu a rum chhuak hrawk a, ka lu a hai lutuk, chuan ka pum in let but but avang chuan ka luak a chhuak em em bawk.




Mza chu a rawn ding chhuak a, ka in sum thei tawh dawn lova ka in hriat avangin ka ka hup chung chuan common bathroom lamah chuan ka tlan dawr dawr a, bathroom chhunga ka luh rual rual chuan ka luak ta bawrh barh a, tun lawk a ka thil ei zawh zawng zawng te kha ka luak chhuak vek, ka hnunga chul tu an awm chuan ka ding kang zawk a, Mza ka hmu nghal zat, rang lutuk in ka awm sawn nghal a, ka hmui tui a ka tih huh chu ka kut in ka hru nghal thuak bawk.




Ka awmdan avang chuan a lungawi loh hmel hle, "I tha chiah maw?" min en run chung chuan a ti a, "Min hmuh ang hi ka nimai, nizana ka chunga i chet dan kha I la theihnghilh bik in ka ringlo, chuan ka awmdan tur chu i hriatthiam ka ring bawk, va chhuak rawh, i hmei nu in a nghah reng che kha" ka ti hmak a, ka thusawi avang chuan a rum chhuak deuh nghut a, pawi tihna pawh ka nei hran lo, "I duh duh sawi hauh suh" a tih leh te chuan ka nui sak ringawt.




In atang chuan an in zui chhuak a, ka thaw huai in ka hria, ka nawm loh vang nge kan ei na hnu hma vel ti fel turin Mza khan min tur lui miah lo, min ti lui pawh nise tih ka tum chuanglo, kan nupa in ngei ah a hmei a rawn hruai lut a, a nupui ka awm ve tih hrelo ang lek a awm in an pahnih in an in chhai dun vel bawk a nihkha, chuvang chuan an ni hmun tih hnawk sa kha ka tihfel a ngaihna ka hre thak lo, a hmei nu nen khan ka rawngbawl sa vek tho an ei a, tihfel lam chu a hmei nu tih tur a ni ka ti ve tlat.




Mahni chiah a in a awm chu a khawhar thlak takzet, nidangah kha chuan Opi a awm ve a, kawm tur ka nei tal a, tunah chuan keimah tlawng ka ni tawh bawk nen ka khua chu a har takzet, ka khawhar na belh chhah turin Mza ka lakah a hel tlat bawk si, tinge ka thusawi kha a rin duh tlat loh le, ka thusawi aiin Mary leh Rinkima te thusawi a ring zawk kha awih harsa ka la ti reng, engtik ah emaw chuan thudik chu a la lang chhuak dawn alawm, chumi hun thlen hma chu ka nghak ang.




Ka ngaihtuahna ka kawm melh melh lai chuan thil hriat chhuah thut ka neih avangin room ah ka chho vat a, ka thil dahna drawer chu ka hai nghal rak rak bawk, ka thil zawn ber ka hmuh hnuah chuan bathroom lamah ka lut vat a, ka thin a phu dup dup bawk, test kit chu ka en lawk ngam lo, minutes 3 vel ka nghah hnuah ka meng chhuak riai riai a, rin sen pahnih ka hmuh chuan ka ka ka hup nghal chawt, keihi ka rai, ni e ka rai ngei a ni.


Zawmna




Room atang chuan hlim zetin ka chhuak a, Mza ka hrilh hunah chuan a hlim ve dawn lutuk, chuan kan in kar buaina pawh hi kan naute lo piang tur vang hian a fel vek ka beisei bawk, inhnuai ah chuan ka chhuk a, ka rin loh lutuk in ka nu ka hmu thut, a rawn kal lohna a rei ve tawh bawk nen chutia ka hmu thut chu mak ka ti em a ni, "Ka nu" ka ti sep a, thinrim hmel zetin min en a, a mitmeng ah chuan kei min huat na bak engmah hmuh tur a awm lo.




"Nang hian ka fapa i phatsan ngam amaw?" a ti chang fak a, "Aih thil hriat sual a nihkha, Mza hi ka phatsan ngailo" "Ngawi hmak rawh, i bialpa ngei a in puan tawh hnuah pawh thiam thu I la sawi ngam a nia, hmeichhe zaktheilo tak chu i lo ni chiang a nihhi, hetiang ang hmeichhia i ni tih ka hriat vang hian alawm ka mo atan ka duh ngai loh che ni, tunah chuan i nihna diktak ka fapa in a hre ta bawk a, he in atang hian chhuak vat turin lo in puahchah ang che" a ti leh tawn tawn a.




"Nu.. ka thusawi hi thudik a ni, vawikhat mah Mza hi ka la phatsan ngailo" beidawng zet chuan ka ti chhuak leh a, "Engmah sawifiah a ngai tawh lo, engkim chu a chiang vek tawh, tunah chuan ka mo i la ni ve bawk a, i pasal a nu ka nih angin thingpui tal te min lum sak i tum lo em ni?" a ti leh hmak a, ka hlimna te kha a reh vek tawh, choka ah chuan ka lut a, tui chu gas thuk ah ka chhuang nghal, a siam zawh hnuah sitting room lamah chuan ka kal leh a, ka nu hmel reng reng hmuh tur a lo awm tawh lo.




Khawiah nge a kal hriat tum in ka hawi kual ruai a, mahse ka hmu lo hrim hrim, inchung lamah a kal a nih ringin thingpui no keng ran chung chuan step ah ka chho ve a, step ka zawh zo chiah tih ah ka nu chu kan nupa room atanga a rawn chhuak chu ka hmu hman chiah bawk, a rawn in her a, min hmuh chuan a phu deuh zuk a, a in siamtha lehnghal vat thung, "Thingpui chu ka in lovang, haw leh vat ka ngai, Bawiha bulah khan lo sawi la, zaninah Mary nen kan rawn kal ang" tiin engah mah min ngailo zet chuan a kal nghal nal nal a.




Choka ah lut leh in gas thuk te chu ka hru fai a, ka thaw leh hap thin, a hma kha chuan ka nu in ka chungah engpawh tise ka pasal ka bulah a awm tlat thin avang khan hreawm ka ti ngai lemlo, mahse tunah chuan keimah chiah ka ni tawh a, ka pasal ka bulah a awm tawh lo, a ni chu ka hmuh phak ah awm mahse kan in kar chu a hla tawh hle a, min haw em em bawk nen ka mal leh zual takzet, tunah ka rai tih ka hre leh a, kan fa lo piang tur chauh hi ka in nghah na awm chhun chu a ni.




Zanah chuan Mza chu a rawn haw hma a, min be lovin room lamah a chho nghal daih bawk, inhnuai a a rawn chhuk leh hnu chuan chaw ei ka siam vat a, in be miah lovin chaw chu kan ei a, nau ka pai thu hi hrilh ka duh, mahse engtinge ka sawi tan ang ka hrethiam lo, ka in ngaihtuah buai lai chuan Mza chu a kham ta daih a, eng tham mah ka la ei lo, keimah mai ka ni tawh lo tih hria in chaw chu chak viau lo mahila ka ei lui a.




Choka ka tifel zo a, sitting room lam ka pan lai chuan doorbell a rawn ri a, kawngka lam chu ka pan leh ta zawk a, kawngka ka hawng chiah a, ka nu leh Mary te chu ka hmu nghal zat a, biak pawh min be lovin an rawn lui zui nghal a nimai, kawngka ka khar tha a, sitting room lam ka va kal ve chu Mary leh Mza te lo thu dun chu ka hmu nghal a, couch pakhat ah ka nu a lo thu ve bawk, an bulah sawn ka va thu ve dawn em tih ka ngaihtuah mek laiin Mza chuan min rawn en vut a.




"Khatah khan enge i din reng, ka nu te hi thingpui rawn lum sak rawh" a ti nghut a, a hawisawn lehnghal, thaw hak in choka lamah chuan ka kal a, ka chhuah leh hnuah thingpui chu center table ah dah in an bulah chuan bet lo zetin ka thu thla ve ran a, "Mama.. i pa in file kha rawn la nghal ang che min ti a, hriat chhuah lai hian han la lawk mai ta che" ka nu chuan a ti sup a, Mza pawh chu a tho chhuak ve nghal mai bawk, "Ka rawn zui ve ang che" tih leh Mary chu din chhuah a rual a, Mza'n a dan ka rin nen engmah a sawi lo.




Room lama an in zui chho lai chu ka en reng a, ka thin zawn hi a na ngut ngut mai, "Ka sawi kha i la hria ang chu maw, ka fapa leh Mary te hi engtik ah emaw chuan an la in nei ngei dawn, chuvang chuan kalbo vat tum ang che" ka nu chuan a ti fak a, "Ka hria, i mo atan keihi min duh ngai dawn lo tih chu, ka nu zawhna pakhat chiah ka zawt ang che, keihi Mary angin chhungkaw hausa tak atanga sei lian lo ni ta ila, i mo atan hian min pawm angem?" a mit ah tak melh ngal chung chuan ka ti a.




"Enga, i va zaklo ve, nang hian sum chauh duh angin min ngai amaw?" ka zawhna pawh chhang lo chuan a ti that a, ka lo nui sak ringawt, sum a duh lo tiin in sawi eng ang mahse dawt chiang tak a ni tih a awm danah hian a ti lang miau, "I nihna Ieh i nungchang mawi lo zet ka hriat avang chauh a mo atan pawm lo che ka ni, chuchu hre reng ang che" a ti kha leh fak a, ka chhang tawh lo hrim hrim, ka kut chu ka hum ruh ngawt ngawt ringawt.




Mza chu thinrim hmel zetin step ah chuan a rawn chhuk thla a, a kut a chuan damdawi ni awm tak a keng bawk, ka hmaah chuan rawn ding in damdawi chu chhuat ah a vawm tawp a, "Engtinge hetiang thil hi i tih theih zawk?" a au rin em avang chuan ka phu zawk nghe nghe, a sawi awmzia ka hrelo lutuk chu ka en hau a, "Ramthansang, ka zawhna che chu chhang rawh, nang hian rai lohna damdawi I lo ei amaw?" tiin ka dar tawn tawn a rawn tham chuan min tung ding nawk a.




"Enga, keihian rai loh na damdawi ka ei amaw?" min vawn na a nat em avang chuan ka then deuh sak a, "Hrelo ang khan awm suh, he damdawi hi nang hian i ei tih ka hria, lemchang in ka hnenah fa neih I chak tawh thu te kha i sawi a, tenawm lutuk" thil tenawm tak sawi ang mai chuan a ner deuh sawk a, "Aih, chutiang engmah ka ei lo, he damdawi hi ka ta a nilo" thil thlen dan chuan min thawn em avangin ka tawng bah deuh nawk nawk hial.




"Stacy i lo va mak ve, hetiang thil em hi chu i tih ka ring ngailo a sin" ka nu pawh chuan rawn ding chhuak pah chuan a ti hap a, "Ka sawi tawh kha, eng damdawi mah ka ei reng reng lo, ka ti tak tak" ka ti leh a, mahse ka thusawi chu an engah mah a thawk lo a nih hmel, "Mz, ka ti tak tak a nia, eng damdawi mah ka ei lo, rai loh na damdawi ei ni ila tunah hian.." ka tih lai mek chuan Mary rawn in rawlh in "Eng damdawi mah i eilo a nih si chuan engtinge heihi in room ah a awm theih, I ta nilo chu a lo awm ngawt na chhan tur a awm lo" a lo ti fak a.




"Ka sawi kha, he damdawi hi ka ta a nilo" ka ti leh a, "Mama, ka sawi kha i hrethiam tawh ang chu tiraw, he hmeichhia hi ka hmuh tirh phat atanga ka duh loh chhan chu a ni reng a ni, a ni hian nangmah ni lovin i sum vang bak hian a nei lo che, tunah pawh mipa dang kawp san che duh tawk lovin a rukin rai loh na damdawi a lo ei reng a nia, hei aia thil rapthlak hi a la ti leh lovang tih tunge sawi thei" ka nu chuan a ti leh fak fak a, a thusawi mal tin te chuan ka thin hi a chhun na zawk zawk hial thei.




"Nutei thusawi kha a dik chiah, kum khat awrh in in nei ve chauh a, mipa dang a kawp san che a nia, hetiang hmeichhia hi chu an hlauhawm a nia, chuvang chuan i nat hma tak tak in a ni hi i hlat takah dah la chuchu i tan leh in chhungkaw tan pawh a tha ber" Mary chuan a lo ti ve leh a, he hmeichhe rawn in rawlh peih lutuk pawh hi ka kham tawh takzet, "Nang kha lo ngawi hmak rawh, kan chhungkaw buai naah hian rawn in rawlh ve phet tum suh" ka ti tuar a.




"I va zaklo ve, Mary hi nang kan hriat hma daih tawh atang che a kan hmelhriat leh ka fanu anga ka en a nihhi, khatianga tihtheih na dan kha i nei hlek lo ania" ka nu bawk chuan a lo ti leh that a, ka chau hluah hluah, Mza lah chuan mitmeng sen ram in min melh ngur bawk si, "Mz, ka ta a ni miah lo tak tak a nia, engtinge kan room ah a lo awm theih pawh ka hrelo, tu emaw in an dah a ni ngei ang, hetiang damdawi hi ka vawikhat hmuh na chauh a ni" ka thusawi a awih loh hmel lutuk chu tah vak mai ka duh rum rum tawh.




"Dawt sawi tawh suh, I ta nilo in room ah a awm ngawt na chhan tur ka hrelo, chuan midang puh mawh tur kha chu zawng buai duh suh, nang lo chu he damdawi nei thei tur an awm lo" Ka nu bawk a ni, "Ka ta a nilo, tu emaw in an dah a ni ngei ang, ka ta a nilo tih chiang takin ka hria, chuan tunge hetiang damdawi leia kan room ah lo dah ka la chhui chhuak khawp ang" ka ti ta fak a, Mary leh ka nu te chuan rapthlak min tih hmel zetin min en a, pawi tihna pawh ka nei hran chuanglo.




"Ka nu, Mary nen khan min lo va chhuah san rawh u" Mza chuan a ti hluk a, "Mahse" ka nu in a tih lai mek chuan "Ka nu ka sawi ang chuan ti rawh u" Mza bawk chuan a lo ti leh nghut a, keichu min la en run tho, ka nu leh Mary te pawh chu lungawi loh hmel deuhin an chhuak a, Mza nen chiah kan awm ta, "Engtinge hetiang thil hi i tih theih zawk?" a ti hniam ruih a, a aw chhuak ah chuan thinrim na ai mahin natna ka hre tam zawk.




"Ka ti tak tak, kha thil kha ka ta a nilo, engtinge kan room ah a lo awm ngawt theih dan pawh ka hrelo" ka ti chhuak ve sep a, ka thusawi chu awih hram se ti zetin ka en a, "Fa ka awh zia i hria, i bulah pawh ka sawi fo, mipa dang min kawp san chung pawh in chance vawikhat tal pek leh che ka tum a sin, a chhan chu ka hmangaih em vang che in, mahse hetiang thil tenawm lutuk hi ka chungah i ti duh a" a tawp lamah chuan a au deuh thawt a, ka phu zawk nghe nghe.




"Mz.. he damdawi hi ka ei lo a sin" ka sawi zawh rual rual chuan ngeiawm zetin a nui chhuak hak a, "Kei hian i fa..." ka tih leh mek lai chuan "I in sawifiah na engmah ka ngaithla duh lo, ka mit ngeiin ka hmu a, chuvang chuan min bum mai mai tawh lovang, chuan vawin atang hian he in nilo kan room hi vawikhat mah i chhuah san ka phal leh tawh ngai bawk hek lovang" tiin ka ban ah chuan a rawn chelh a, kan room lamah min kai chho nghal dawr dawr bawk.




"Hetiang hian ti suh, ka thusawi hi ngaithla rawh" room ah chuan min man lut nawk nawk a, a ni pawh a rawn lut zui ve nghal zat bawk, "Engmah ngaihthlak leh chuan tur ka neilo, nang hian ka fa i pai duh lova tiraw, a tha e, hmeichhe dang tamtak an awm alawm, mahse ka nupui i nihna hi chu a bo chuang lovang" a thusawi chu a tih tak tak loh ngei ka beisei, "Ka thusawi hi ngaithla rawh, hetiang thil hi ka tilo ka tihchu, tinge ka thusawi i ngaihthlak duh loh?" a tawp lam chu ka vin ve ta that a.




"Engmah ngaihthlak tur ka nei tawh love, nang hi rin na che chheta mah ka neilo, ka sawi ang khan he room hi i chhuahsan leh tawh ngai lovang" tiin pawn lamah chuan a chhuak a, kawngka chu a kalh zui nghal zat bawk, dan pawh ka tumlo, ka thusawi a ngaihthlak duh loh chu sawi loh pakhat mah kha a awih duhlo bawk a, a tha e, hetiang thil ti tu hi tunge a nih ka zawng chhuak khawp ang, lam tang tumah neilo mah ila ka fa lo piang tur vang tal pawh hian thudik chu harsa dawn hle mahse ka hai lang em em ang.




Zankhua chuan a rawn let leh tawh lova, keipawh chu chhin khat mah chhing lovin khumah ka thu tlaivar thak a, zing ah pawh chuan ka la che sawn eih lo, ka pum chu ka chul leh thin a, hetah hian ka mipa hmangaih ber nen a kan fa hmasa ber tur chu a awm mek, mahse a pa hi engmah ka la hrilh silo, kan hun tawn nen hrilh eng ang pawh ni ila a fa anih a rin ka ring chuanglo, chuvang chuan engmah hrilh loh law law ka duh zawk, engkim ka dikna ka hai lan hunah erawh chuan a fa ngei a ni tih hrilhfiah chawp ngai lovin a hrethiam ve mai ang.


Cont...

Tunlai chu ka buai zual lai a ni a, duh angin ka regu thei lova, min lo hrethiam hram hram dawn nia aw...