STORYFB.COM

KA LALPA






CHAPTER 12





“Thana nupui i nei i tih hi a dik lo tiraw?" a office kan awm lai chuan a bialnu hlui phone a ka hmuh ngei kha a rawn langa, chutia kan nupa lo ṭhu dun a hmuh chuan a hmêlah chuan thinrim hmêl leh mi tihnat duh hmel a rawn lang nghal zat mai, a mit a hnawih dum bawk sia ramhuai a ang lutuk.








“Nang nu hi maw Thanpuia lo zarbuai tu chu, ka ta a nih hi i hria em? Chhuak nghal rawh" rawn ti tawn tawnin min rawn khawih a tuma, ka lo awm sawn nghal vat thung. A thinrim zual sauh tih a hriat “Rozual chhuak rawh i hmuh ang hian hei hi ka nupui chu a nih hi; hriatbelh duh i la nei em? Mi nupa inkar tibuai lo hian chhuak zawk rawh" Thanpuia pawh chuan a lo ti vawt raiha.





Ka thlavang hauha chutia a ṭawng chu ka lawm takzet, ka in rin loh lai chuan chu nu chuan min rawn nam thlu hnawka, ka pum chu ka la sawh zui, ka hlauthâwng ngei mai. A na nghal rawih rawih bawk nen Thanpuia chuan Rozuali chu rek chawtin kawngka ah chuan a nem chilha, a âng nghal chawp chawp mai.





Ka pum ana bawk nen ṭawng pawh ka ṭawng chhuak thei mai lo “Hre rawh, ka fa i that a nih vaih chuan ka that ve ang che, i chhûngte ka rawn bia ang tih hre rawh" tihrawkin keichu min rawn pana, Rozuali thaw chham chuan boruak a hip lût kawk kawk mai.







“Mira i ṭha em? Engtin mah i awm dâwn lo, ka awm ania aw" tiin min pawm kanga, keipawh chuan ka lo kuah lêt ve vat bawk, pâwn lama min chhuahpui rualin Dodoi chuan min rawn hnaih ruaka “Engthil nge thleng? Miriam i ṭha em?" rawn ti sawk sawkin min rawn hnaiha “Saw nu saw lo chhuah tîr ang cheu, ka phalna tel lovin ka office ah tumah rawn luh tîr tawh suh u, damdawi inah kan kalpui phawt ange" tiin min chhuahpui zuia.








“I ṭha leh dawn ania, lo tuar fan fan rawh. Khanu kha ka ngaidam hauh lovang" timawlh mawlhin car seat-ah chuan dim te hian min ṭhut tira, a tir ang em em kha chuan ka na tawh lo “Te min ngaihtuah suh ka ṭha" harsa ti tak chuan ka ti chhuak thei hrama.





A ni erawh a pângngai thei meuhlo, car chu chak zet hian a tlân chhuah tira, kan awmna aṭangin damdawiin a hla lêm lo bawk a, kan thleng zui thuai a. Min pawm chhuak nawlhin min tlân luh puia “Hmanhmawhin ka nupui hi rawn buaipui rawh u" tiin a au pah tuar tuar bawk, a doctor ṭhianpa leh nurse pathum rawn langin min rawn buaipuia.







Khumah chuan min mut tirin min check nghal mawlh mawlh bawk, ka naute chu ka chân ang tih ka hlau bawk nen ka mittui a tling pam tawh mai. “A ṭha em Rema?" Thanpuia chuan rawn tiin ka kutah chuan a vuan nghal chat bawk.






“A ṭha e, naute pawh ala him e, engtia insawh thei nge maw a nih le? Tûn ai hian sawh na se chuan naute hi kan chhan thei kher lovang, ngaihṭha tak in awm rawh u, naute pawh a la awm e" a tihchuan ka thaw huai mai. Thanpuia pawh a hmêlah chuan a thaw veng huai tih a hriat theih.






Keipawh ka lawm takzet, ka pum chu chulin “Tûn aṭang chuan ka vêng reng tawh ang che" tiin ka phun sapa “Kan lawm e" tiin keichu min rawn hnaiha, ka chalah chuan a fâwp nghal vang vang mai. Mittui nen ka lo en chu ka hmaiah chulin “Tumahin an tina leh tawh lo vang che, Rozuali pawh kha hremna ka pe khawp ang, tihian lo awm lawk rawh aw, pâwnah phone ka va hmang lawk ange" tiin a chhuak zuia.






Rozuali kha a buaipui dâwn a nih ka ring, keipawhin ka naute thah a tum avang pawhin ka ngaidam theilo. “Ṭhiana chu a lo danglam tawh hle mai, zâwlaidi i tat te hi a nilo maw? A hlauthâwng hmêl ka vawikhat hmuhna a ni, eng pawh chu nise in enkawl ṭha la. Nau pai lai chuan fimkhur tûr" tiin Doctor chuan min hrilh leh dap dapa.




Ka bu nghat thung; ni e, Thanpuia mizia hre chiang ho tân chuan a mak ve dâwn em a sin, hetiang khawp hian keipawh hian min ngaihven in min ngaihsak ang tih ka ring pha lo, mahse a kiangah ka han awm tama. Midangte ngaipawimawh thiam leh duat thiam tak a ni rih ka hre nghal mai bawk.




“Ka lawm e, chuan ka lo fîmkhur tawh ang, khatiangin a rawn che dâwn tih ka hre lâwk lova" tiin ka phun sepa “Rozuali em ni? A rapthlâk a sin, ṭhiana tân hian ka duhpui ngai hauh lo, hetiang thil hi a ti duh ang tih chu chiang sa, Thanpuia a neih theih nân chuan engmah tih hreh a nei dâwn lo, fimkhur ang che. Tlaiah in chhuak thei ang, ka kal phawt ange" tiin a chhuak zuia.





A thusawi chu ngun takin ka ngaithla thung, ni e Rozuali hmêlah khân engmah pawisak a nei dâwn lo tih keipawhin ka hre thei, tûn aṭang chuan fimkhur taka ka awm a ngai a ni, ka in ven reng a ngai tawh bawk ang. Ka pum chu chûl heuh heuhin ka in ngaihtuaha, Thanpuia lah chu a rawn lêt har phian lehnghâl.




Ka phone enin Dodoi chu ka call a, a nilah a lo hlauthâwng min rawn zâwt nasa mai “Ka ṭha e, ka lo insawhna lutuk lo hlauha, tlaiah chuan kan chhuak thei ang an tia, Thanpuia chu a chhuak rih, Rozuali kha a be dâwn ania'ng" ka tihchuan a rawn âng ve nasa mai.



“Ti hrep rawh se, ka lo hrelo va. Chuti nilo se chuan ka khawih hrep duh ang, a zaktheilo emai. A niin a neih loh vâng maia khatianga rawn chet ni, an hausakna lah chu a chhuang em em lehnghâl, haw tura kan tih laiin min ṭawngkhum hrep a lawm, mi chu hmaizah lo ila chuan ka khawih hrep duh ang. Makeup in hnawih beh ropui si" a rawn ti hlak hlak chu ka nui hak mai.





A huat tawh lah hi a haw na thei bawk sia, kan inkawm tirh aṭangin kan thlavang kan in hauh nasa a, hei vang pawh hi a niang kan in kawmngeih em em ni. Ka tân lah ui a nei ngai heklo, tun thleng pawhin min la support em em reng chu a nih hi.





Chutia kan lo in biak lai chuan Thanpuia pawh a rawn lût a, a mitmeng chuan tunge ka biak min rawn zâwt nghal zat mai. “Dodoi ka chanchin a hre duh a, i zo tawh em ni?" ka tihchuan a bu nghata, ka pum chu a rawn khawih nghal chat bawk.



“A nih ka dah rih aw, zanah ka lo bia ang che" tiin phone chu ka dah zuia, “Enge i tiha?" ka tihchuan min rawn kuahin “A nu leh pa ka va bia anih kha, an control thei a nih loh chuan keimah ngeiin ka khawih lêt tawh ang. Tihnat tumtu apiang che chu ka zuah dâwn lo" a tihchuan a hmuh loh lamah chuan ka khi sak mai.




A lehlamah chuan ka thlavang a hauhna chuan min tihlim lutuk tlat, hetiang khawpa min ngaihsaktu hi ka vawikhat tawnna a ni. “Ka lawm e, chuan i ṭhianpa khân tlailamah kan chhuak thei chauh ang a tia, ka chau riau mai. Ka muhil lawk ang a" tiin ka rawna, a ruk tak chuan ka bula a awm reng laia mutsan daih chu ka inthiam chiah lo.





Mahsela an damdawi min pêk vang nge ka mut a chhuak em em bawk si, ka awmdan chu hrethiamin ka hmuiah a rawn fâwp zauh a “Aw le, muhil rawh. Ka lo vêng ang che, kan naute nên hrisel taka in awm ka duh ania" tiin ka khum bul ṭhutthlengah chuan a ṭhu thla a, ka chhang tawh lem lo, ka mit chu chhingin mutthilh tum chuan ka in tintuah zuia.




Ka pumna a awm tawh lo bawk nen ka awm anuam huai huai mai, nichin kha chuan ka chân dawn emaw ka ti tak tak, chhiat vaih ila chuan khanu kha ka ngaihdam theih ka ring lo, Thanpuia kut vuan chung chuan ka muhil zui ta riai riaia.




Ka harh leh chuan khua a lo tlai duai tawha, Thanpuia ka en chu a lo la muhil sak sak mai. Nui sakin a lu an chuan ka chûl sak hliau hliaua, a tira ka hmuh dân leh tuna ka hmuh dan chu a in ang tawh hauhlo, chuan hepa hi ka hmangaih takzet tawhin ka hria, ka tân liau liau zaidam takin a awma.




Kan inneih hnu hian a hnathawk te bulah ngei pawh ṭawngkam vin a hmang ngai lo tluk a ni. A mah a insiam rema, a nelawm tawh an tihruk ṭhin pawh ka hailo, nau ka pai tih hria in ka eichak zâwng te, naupai thawmhnaw thlengin min lei khawl tawh mawle, min ngaihsakna a tihlanna chuan keimah ngei pawh min tihlim.





A duhloh zâwnga ka awm pawhin ṭawngkam vinin min be ngailova, hei tak hi ka ngainat chhan a ni. A kiangah ka thla a muang bawk, kan inneih tirh khân hetiang khawpa an fel hi ka ring pha lo hrim hrim, a bialnu hlui thlavang a hauh nasat ṭhin zia an sawi ka lo hre tawh, mahse chunu hmaah ngei chuan ka tân a ding ania, a ropui em a sin.




A rawn chêt tâk ṭiah ṭiah avâng chuan ka kut chu la sawnin ka insiam rema, a rawn men rual chuan min en nghâl chat mai, nuih sakin ka ṭhu chhuaka. “I mutui em? I chauh viau chuan ṭhutthleng seiah sawn mut chawlh tûr che alâwm" ka tihchuan a mit nuai chat chatin a rawn ding chhuak a.




“Ka venghim ang che ka tih kha, tumahin an tihnat cheu ka phallo, ka hlatah in awm ka duh hek lo. Vawiin ang thil kha ka thlen nawn tîr tawh lovang, min ring rawh" tiin ka kut chu a rawn fawpa, “Um nangmah inthiamlo lutuk suh, a chet dan tur kha kan hre lâwk lo ve ve a, chuvang a nih kha. Mahni inthiamloh a ngailo, kan naute pawh a la awma, kan fîmkhur tawh angai animai" tiin ka nuih saka.




Amah in dem lo se ka duh, kha thil thlengah khân engmah thiamlohna a neilo, Rozuali vek kha a ni. “Tirawh i haw tawh mai ang hmiang, Doctor nghah kher angai tawh chuang em ni?" ka tihchuan a bu nghata “Ka be fel tawh alâwm, engmah tih tur a awm tawhlo kal ang hmiang" tihpaha min kaiin room aṭang chuan min chhuahpui zuia.



Ngawi reng chuan ka zui ve zel bawk, damdawiin tih takah a ṭhen an lo ṭapa. A ṭhen erawh hlim taka nui chhuak te pawh an awm bawk, mi chi hrang hrang awm khâwm kan ni miau va, a loh theihloh.



Pawn kan thlen chuan hawi kual vang vangin mipui insul pêl zut zut chu ka ena, ka lu an ti hai muai muai thei. A bengchheng bawk si, lir lo tlân reng bawk nen ka luak a chhuak nghulh mai.



“Te haw vat teh ang, motor rim hian min ti luak mai dâwn" tiin car chhûngah chuan ka lut vata, a ni pawhin min ngaihtuah tak hian a rawn lut zui ve nghal a, “I ṭha em? Kan haw tlang nghal mai dawn ania" tiin a tlân chhuak zuia, thli chu inchhem tirin ka mit ka chhinga, tûnah chuan nu dinhmun luah chho in ka awm ve mek chu a ni sia.




Ka lo beisei phak loh khawpa ṭha mipa ka la tawng zui, engkim hi Pathian min ruat sak ani ngei ang, a chângin han ṭap ve mah ila hlimna in min lo hmuah hun a awm ṭhin. Rilru nat tâwp khawk leh kan hlim tawh ngai dâwn lo emaw tih tur a kan nun a beidawn ngawih ngawih châng pawha in fuih ṭhat zia chu tûnah hian a takin ka tawng ve ta niin ka hria.




Mi ṭhenkhat chu kan nun beidawn em avangin mahni in tihlum hial te an awma, an demawm loh viau rualin Pathian chêt hun hi nghâk thei se ka ti ṭhin, Pathian hian hrehawm reng tur chuan he khawvelah hian min dah bik hauh lovang, amah beiseia pan a, nghâk peih apiangte hnênah a ropui zia a lan tîr leh ṭhin a lo ni.




Keipawh mal em em hmangaih tu neilo emaw in tiin vawitam ka vuia, ka ṭap bawk. Ka nunna hial lâk pawh ka lo tum ve tawh, mahse kha tih laia ka harh chhuahna khân tûnah chuan pasal ṭha tak tawngin min ngaihsak em em tu ka tawn phah ta chu a nih hi, ka beisei loh lamah min lo hmuak renga, ka rin phâk ngai loh dinhmunah ka ding ta mai chu ani sia.





“Kan thleng e, i nuam lo tak tak em ni?" min ngaihtuah zeta a rawn tihchuan nuih sakin “Ka chau deuh mai mai a lawm, tirawh lût ang. Ṭhat lohna ka neilo ania, motor khu rim khan ka luak a pawt tlata, ka ṭha tawh e" tiin car aṭang chuan ka chhuak zuia, rang zeta rawn chhuakin min rawn kaia.




“I nawm loh chuan zêp miah suh aw, in chungah thil ṭha lo a thleng ang tih ka hlau tih hria la, i nawm loh deuh chuan min hrilh zêl rawh" tiin car chu a kalh ṭha leh te te a. Engmah ka sawi tawh lêm lo, in chhung kan luh rualin room lam ka pana, in dim a la ngai bawk nen ka che peih thlâwt lo, pi Zari pawhin chanchin min lo zâwt nghal zata.






Thil awmzia hrilhin room chhûngah chuan min luhpui zuia,“I ril a ṭam em?" a tihchuan ka lu ka thing nar nara, engmah ei chakna ka neilo tak tak. Nidanga ka rilṭâm theih tehlul nen “Kan mu hahchawl a nge, nangmahin lo ei rih mai rawh. Ka ril a ṭam thei thlawt lo" tiin puan chu ka sin ṭha sat sata “Aw le, a nih tikhan lo mu la ka rawn mu ve vat dawn ania, kan va ei lawk ange aw, ka reilo ang" tiin choka lam pan chuan a chhuak zui ta thuaia.




A hmuh loh lamah chuan ka en vawng vawng mai, a mizia in thlâk ta lutuk te, min ngaihsakna zawng zawng chu ka hlimpui lo theilo. Ka fa avâng chauha min nei a nih lah ka ring tawh lo, engkimah keimah min dah hmasa a, ka thu lo chuan engmah a ti duh miah lo bawk.




A chaw ei chhûng chuan Dodoi nen kan in bia a, Thanpuia min ngaihsakzia ka sawi chuan ani pawh a thaw huai mai, hetiang khawpa min ngaihsak tu ṭhian ka nei hi ka vannei ka inti, tûn angah ṭhian mi rel mai thei an tam tawh laiin a ni erawhin vawikhatmah ka thuruk a la sawi chhuah awm ka hrelova, puih ka ngaih hunah lah a tlânchhe ngai hek lo.





“Taka Thanpuia ṭhianpa khân a rawn be tawh che em?" ka tihchuan a rawn nui haka “Ṭawngkam thiamlo zet kha em ni? Be ve e, min rawn biak ṭan dân phei chu maw ‘Bialpa i nei em?' rawn ti nghâl tawl mai mawle" tiin a nui haka, ka nui ve lo theilo. Joela kha mi ṭawng phawr phawr chi a ni tlat lo.




“An fel a sin, an rilru a ṭha a nia. Lo be zêl rawh, bakah hna ṭha tak an neia, an taima bawk nen an iaiawm hauh lo ania, an rinawm bawk ang" ka tihchuan a rawn nui leh haka, he nu hi chu mipa chungchâng sawipui dawn hi chuan a fiamthu nghâl veka, a ho zo leh vek zêl.




“Nui ngawt lo la, an duh ve deuh che ania'ng, keichu ṭha ka ti teh ania. An ṭhianpa in min nei pawh hi an mahni zâwk hian an lo lawmpui zawk maha, i number pawh an mah chuan min dil ngam lova, pakhat zâwk khan a dil sak tawp a lawm" tiin ka nui zui har hara.




“Nia a chhelo pawh ka ti, mahse tûn angah chuan fimkhur a ngai tawha, zu te an lo in phei chuan ka duh lo, an ruih laia an nupuite sawisak ching an tam bawk si. Amah hrin hrim kha chu ka va iai pawh a nilo; mahsela bialpa ka nei ngai silo va, biak dan ka thiam dâwn lo. Min ning palh ang tihte ka hlau alâwm" a rawn ti nâng nâng a.




A hlauhthâwnna chu a âwm ve tho mai, kan ngaihzawng te bulah hi chuan sawi tur hi a vang duh em bawk a ni. Han ṭawng vak dawn lahin min ning ang tih a hlauhawm tho bawk si, han ṭawng vak lo ila zeilo mi an tih a hlauhawm leh bawk sia, a buaithlak ve em bawk a ni.




Chuta kârah thikthu a lo chhiat phei chuan in hauh reng a ngai lehnghâl.


“Han be zêl la, i inzir chho dâwn alâwm. I nihna ang anga a pawm theih loh che leh a duh tak tak lo che tihna animai, han nihpui chhin hrim hrim la ka duh, i leng tar mai dâwn. I kum a naupang zawk zawk tawh bawk silo" ka ti chu a rawn haw teh e.





“I neih tawh mai avâng khân khatiang in min ti rêng rêng suh aw, ka la nei ve dâwn khawp. Tûnah chuan nulat hi nuam ka la tih vang mai mai ania, nia ka lo tum ang. Anih ka dah phawt aw, haw a hun nang ni nupa lah in awm bawk silo" tiin phone chu a dah zuia.




Thanpuia pawh a rawn lût har lo, min rawn panin a thawmhnaw vêl chu a thlaka, ka bulah chuan rawn mu in a tabletah chuan movie kan en dûn a “A changtute hi an hmelṭha thei tiraw? An inhmeh thei bawk sia, hetiang chu ni ve ila kan luck awm" tiin ka nui hak haka “Anni ai hian i hmelṭha fe zawk, nangmah in sit suh ka tih ṭhih kha; tumahin ka nupui hi hmelchhia an la tilo che" tiin min kuah nghet sauha.






Ka nui hak hak ringawt, a dik ve tho mai. Mahni hi in dah hniam lo ila, in dah sang lutuk lo bawk ila, hringnun chu pal ve pawp pawp mai tur. Kan hman thiam pauh leh kan tân zêl ania, kan hman thiam loh leh kan tân bawk a ni “Nia keipawh khawvel mipaah i hmelṭha ka ti ber" tiin a âwma bei chuan ka ham zui ta bai bai.




Chutia movie kan en dun lai chuan kan in bul kawngpuiah chuan bike ring leh chak zeta rawn tlân ri chu thil ri bur ri leh mipui au riin a zuia, ka hawi tang nghâl hra mai. “Enge an in su em ni? Te, chu an accident ania'ng" tiin thawh chhuah ka tuma, min nam mu leh nghal vat mai.





“Lo awm rawh, ka va en ange, rawn chhuak hauh suh ang che. I naupai lai kha hre reng la, rawn chhuak suh aw. Ka rawn lût leh vat ang" tiin a thawmhnaw chu inbelin a chhuak zui leh a, thi an awm angem tih mawlh chu ka ngaihtuah, mipui lah chu an phun mur mur renga. Kan in aṭang pawh chuan a hriat chian viau mai.




Tho chhuak ṭhem ṭhemin tukverh lam chu ka pan pheia, ka en chuan kawngpuia mipui lo pungkhawm chu ka hmu nghal, a hnu lawkah Ambulance ri nen, ka en renga, ruang nge an zâwn ni. Puan varin an khuh lûk lehnghal, en duh tawh lo chuan khum lam chu ka pan phei leh ta thuaia.




Ka khur der der mai, chutih lai chuan kawngka chu rawn inhawngin Thanpuia chu a rawn lût zuia “Engthil nge thleng, thi an awm em ni?" ka tihchuan a âwm ah min kuah beh pahin “Sh...engkim a ṭha vek, putar kawngkal lai bike in a su palha, damdawi inah an kal dawn a nih kha, a bike khalh tu lah tleirâwl mai a la nia" a tihchuan ka thaw haka.




“Tinge bike an neih avâng hian chak deuh deuha tlân hi an tum kher le, nunna an la hnem tawh si. Keichu jail tân tir zêl se ka duh tawh, naupang nunna chenin an la a, sim an tum silo. Bengchheng tak takin zanlaiah an tlân thul, a ṭha lo emai, kan Sawrkar pawh hian hmalak vat a ngai a ni, an ni tlanchak avanga pawisawi loin nunna an chân reng hi a ṭha lo takzet" ti a phun chhuakin ka mit ka chhing a.




Nichina puanvara an khuh kha putar chu ani ngei ang, bike nalh tak tak neiha. In show off vak kan tum ṭhin hi chu a pawi mange, miin han sawisêl se in sawifiahna tur an han zawng ruaia, an zam lo ṭhim bawk si, hetiang chuan midang nunna mai nilo an mahni nunna pawhin a la tuar lo ang tih pawh a sawi theihloh.




“Mu tawh ang, Police lamin an lo buaipui mai ang. Hahdam taka awm kha tum phawt la, hlauthâwng lutuka i awm reng chuan kan naute kha mengphawk hru in a rawn chhuak palh ang" a tihchuan in ngaihtuah muk viau e tilo chuan ka nui chhuak hawk mai, a va han ngeiawm thei tak.





“A nihchuan mu vat ang, fur rawn in ṭan tûr hi ka huphurh, a ninawm leh dawn si" ti a phun pah chuan ka mu ṭha leha. Furah hi chuan chhiat tawh a awl bawk nen ka nel lo ve tawp mai,thli lah a na thei bawk si.




“Tui deuh khân mut tum rawh, ka lo vêng reng ang che" tiin min kuah hle hle a, keipawh ka thla a muang. A lungphu hre pha a ka mu thei ringawt pawh hian min ti thlamuang takzet, amah chiah ka neih chhun a ni tih ka hriat chhuah ṭhinna avâng pawh hian ka tan chuan a hlu zual, a mah lo in nghahna dang ka nei miau siloa.





“Te, mipa nge hmeichhia i duh?" tiin ka pum chu ka khawih tira, chûl heuh heuh pah chuan a ke chuan min rawn khan pah bawk, “Ka duh ve ve, hrisel takin a rawn pian ka duh bera, eng mi pawh nise ka fa a nih chhûng chuan ka duh, mut tum tawh rawh le. Chawlh hahdam i mamawh an tih kha" tiin a tablet chu banin kan film en chu kan enzawm leha.



Inngeih taka thil en dun chu a nuam riau mai. A pangtilum avâng chuan vâwt pawh ka hrelo, mutthilh ka tum chu nichina accident tâwk lawng lawng kha ka mitthlaah ka hmu zel bawk nen ka muhil thei der lo.




“Te ka muhil theilo, nichina mi kha ka ngaihtuah zêl. A reh theilo, an ṭha angem le?" tiin ka ṭhu chhuak leh hlawla. A ni pawhin hahthlâk min tih hmêl zet hian min en a “Mira, ngaihtuah loh tum rawh. I ngaihtuahnaah i dah reng chuan i muhil thei lovang, thil dang ngaihtuah tum rawh" tiin min kuai mu a.




Chutah ka rin loh lutukin a rawn zai dût dût mai, mak ti a ka en chho ha chu a kut chuan ka mit a hupa, a la sawn duh der lo. “Mutthilh vat tum rawh, chutilo chuan thildang ka tih pui ang che, i mutui nghal mai ang" a tihchuan a sawi ka hre chiang bawka, rang zetin ka insiam ṭha nghal sawk sawk chu a zai pah chuan a nui ri haka.




Sual thiam thei lutuk mai, khatiang zawnga mi ti rêng bik, ngeiawm lutuk. Keipawh chuan ngaihtuah duh tawh bik lo vin a zai chiah chu ka ngaihtuaha, reilote-ah mutchhuak chuan min rawn zemin ka chhing zui nghal riai riaia, ka pasal zai chu hla tak aṭanga rawn richhuak ang mai niin ka hria, nui sakin mangrama luh tum chuan ka thaw zui ta sak saka.


MUTTUI U