STORYFB.COM

DARK DESIRES



CHAPTER 9



“Dom, haw tawh mai ila kan tlai lutuk ange” tiin ka tho chhuaka, ka inbeng fai thuak thuak bawk. A ni erawh chu a la mu zarha, a kekawr a ha tawh nâng in a kawr erawh a la ha hauh lova. Hahdam hmêl tak hian chunglam chu a thlir vang vanga.



A awmdân chu nuam a ti hle tih ka hre thei “Dominic” ka tih leh tâkah chuan muang châng hian a rawn tho chhuak ruai ruaia, a peih lo hmêl ka hmuh avâng chuan ka ner sawk mai. A nuam ka tih laiin min khapa, tûnah nuam a ti leh hle tho sia.



A rawn thawh chhuah rual chuan a kamiz chu ban zawkin a ha zuia, kei erawh chuan min hmu tu an awm nge awm lo enin ka hawi kual ruaia. A thim nên thil hmuh erawh har tak a ni, thla êng hnuaiah chuan engmah an hmuh thui theih lo.



“Kal ila, i mut a chhuak tawh a nih ka ring e, i ṭhin ter tek a chhuak a nih hmêl” a tihchuan ka nuih hak ringawt. A sawi ang tak takin ka chauin khumah hahdam taka mut der der a ni ka châk ber ni. Ka kutah chuan rawn kaiin Frederick-a car nên kan awm tir na lam chu kan pan duna, ka pheikhawk pawh bun peih tawh lovin ke lâwng chuan ka kal tawpa.




A ni in ka phei khawk chu a keng ve bawk, muangchang hian kan kal dûn chhet chheta. Vân lam chu ka thlir vang vanga, khawpui chhûng êng ut pawh chu a mawi tham lutuk tlat. Car bul kan thlen rual chuan Frederick-a chuan kawngkhâr chu min lo hawn sak vata, rang taka ṭhu lûtin nghenchhan chu ka nghêng ar ara.




Dominic-a rawn ṭhu lût ve chuan “Ka cottage zâwk ah khân aw” ti ringawtin Frederick-a chu thu a pe zuia, a ni pawh chuan engmah a sawi tawh lova, mahsela kan awmna pângngaiah kan haw dâwn lo tih erawh ka hrechiang viau thung.



Dominic-a dar ngheng chuan ka ṭhu âwn dar dara, ka mit ka chhing chial bawk. Reife kan tlân hnuah thâwm reh raihin ramhnuaiah kan tlân lût a, tlâng sâng lam a ni kan pan zêl ni.



Ka hawi kual hrek hreka “Dom, khawiah nge kan kal dâwn?” tiin ka en ha a, ka hlauthâwng deuh chu a hria nge ka lu ah chuan a rawn chûl zauh a “Hahdam rawn, khawpui pâwnah hian ka hahchawlhna bîk turin cottage ka nei a, chutah chuan kan kal dâwn a lawm, nuam i tih ngei ka beisei” tiin a kut chuan ka kut chu a rawn hum paha.




Keipawh chu ka thaw ta huai mai, reivak lo kan tlân leh hnuah, in lian vak lo mahsela a sakna leh engkim mai changkâng em em chu kan hmaah a rawn langa. A nawm hmêl em em mai lehnghâl, pâwn lamah chuan pangpar leh hnah mawi hi a inkhawi ṭhap a, in tual chu kawng hniha inṭhen in a lai tâkah chuan hnah mawi lam tho chu a awm ve bawka.



Car tukverh aṭang chuan ka en renga, ka âng pam mai, ka thaw leh hak ṭhin. A landan aṭang chuan hahchawlhna in a nihna ang ngeiin a hahdam thlâk hmêl ngawih ngawih mai.



A tualah chuan dingin Dominic-a chuan min kai chhuak zuia, a ên dânah enkawltu an awm tih a hriat. A chhûng lam pan chuan min kalpui zela, ka hawi kual ruai mai, zân a ni a engmah lang chiang lo mahse a nalh dâwn tih ka hria.



Zîngah ka en leh duh ngei ang, inchhûng kan luh chuan nu upa lam tawh hian min lo chhâwn vata, “Enge in duh ang?” ti a min zawh lai chuan Dominic-a zâwk chuan coffee siam tur chuan a ti zuia, sofaah chuan ṭhu thla in ka ke chu ka ena, ke lâwng in ka la awm reng bawk nên a hik thlar mai.




Ka ham bai baia “Dom, coffee chu ka in ve lo mai ang, ka meng lui thei tawh thlâwt lo” tiin a malah chuan ka ṭhu kaia, a dârah bei chung chuan ka muhil zui ta bawrh bawrha.




Ka harh leh chuan khua a lo var tawha, khum dup nuam takah hian lo mu in ka bulah Dominic-a pawh tui zet hian a lo muhila, a thaw sak sak bawk. Thlir vang vangin ka mit chu ka nuai chat chata, room- chhung ka en chu a lo zau ṭha ngei mai, tukverh aṭang chuan pâwnlam chu a hmuh theih vek bawka.



Thingkung sâng tak tak in a hual vêlah kan awm tih hriat tak hian hmuh theih chin chu thing vek a ni a, tho chhuakin tukverhah chuan ka dâk chhuaka. Kan awmna in chu hruizam hian a zem chiai bawk nên a mawiin ramhnuaia chêng ṭhin te in ang mai a ni.



Nui ver verin boruak thianghlim chu ka hip vang vanga, a hma a kan awmna in ai khân a mawi ka ti fe zâwk in a nuam pawh ka ti zâwk. Kan mutna room aṭang chuan chhuakin pâwnlam chu ka pan zuia, tuala pangpar khawi leh hnah khawi ho chu khawih kualin ka hnim leh vang vang ṭhin.



In bul vela sava rawn hrâm chiah chiah te chuan a nawm an belhchhah zual hian ka hria a, ka mit chhing chung chuan ka lam kuala. Hetiang hmun hahdam thlâk lutukah hian awm reng ka châk a ni.



“Lilia” Dominic-a aw rawn chhuak thawp sap lam hawi chuan ka lâm lai chu tawp chat hian ka en pheia, kawngka bulah chuan kawr ha lo hian a lo ding reng tawha, ka lâm lai kha min lo thlir reng tawh tih ka hria.



Nui var var hian ka pan pheia, a sam thur hiang chuan a ti lang naupang phian lehnghâl. “Dom, hetiang hmun hi ilo nei renga, a nuam ka ti lutuk, awm reng ka châk? Vawiin kan la awm thei a ngem?” tiin ka zâwt zuia, a coffee in lai chu han dah te tê hian min rawn hnaiha.




“I ngaina viau em ni?” a rawn tihchuan ka bu nghauh nghauh mai, ka ngaina tak tak. A hmun hma engkim hian ka lung an duma, a in sak dan style chen hian ka ngainat zâwng vek an ni.



“Hetah hian awm reng ka châk, a hma a kan awmna ai thlâwt kha chuan anuam zâwk, hetiang hmun hi ka lo suangtuah fo a sin. Ka u nên pawh khân kan sawi dûn nasa thei lutuk” tiin ka ngawi zui data, ka u ka sawi chhuah leh avâng chuan ka tâwp a nimah zâwk.



Hriat chhuah loh hrâm hrâm ka tum vei nên ka hrechhuak lo thei silo hi a hrehawm takzet a ni. Tûnah hian ka dam ve ang tlata hriatna ka nei lehnghala, mahse chu erawh suangtuahna thleng dik ngai lo tur mai a nih zia ka hre chiang hle thung.



“I ṭha em Lilia? Ti teh i lût vat teh ang, i dik lo leh ṭan dâwn tlat” tiin inchhûng lamah chuan min luh pui zui ta thuaia.


DOMINIC-A POV




Ka hmaa ka hmeichhe hmangaih ngui nghiaia ṭhu chu ka en renga, a ngaihtuahna ah a unaupa leh a ṭhiannu kha an la awm reng tih ka hria. Ka en renga, tûnah chuan ka hmeichhe thah châk em em leh ka nau ngeiin a thih phahna hmeichhe zûnah ka uai ve ta chu a nia, ka tum lâwk hauh lo bawk.



Mahse he hmeichhia hian a ni têlin min hip bawk si, a taksa silo leh a aw ri hre lo chuan ka awm thiam mang tawh der lo lehnghâl. A u leh a ṭhiannu kha ka that lova, ni e ka la zêp ṭang ṭang a ni, an thilo tih a hriat chuan hmuh a duh ngei anga, ka hlatah a awm nghal dâwn tih pawh ka hria. Ka laka a awm reng theih nân thudik hriat tir ka la duh lo mai zâwk, min kalsan ngei a tum dawn tih ka hria.



A hmêl hlim lo tak ṭhin ka hmuh châng erawh chuan an la dam a ni ti a hrilh ka duh a, mahsela ka nau ka ngaihtuah chhuak lo thei silo. A tirah kha chuan hmeichhe le lo tak ni turah ka ngaih avâng khân a lakah pawh ka nunrawnga, mahsela ka rin ang a lo nih loh zia leh ka nau dâwt sawi tam tak pawh ka hriat phah bawk.



Ka nau kha a dik hauh lo tih ka hria a, chutih rual erawhin ka thisen zawmpui ngei a nihna ah erawh a thlavang ka hauh ve a ṭul si, Lilia chu ka en renga, ngawi reng hian a chaw ei lai chu a in hnawh lût mawlh mawlha, nichina a hmêl hmuhnuam tak leh hlim tak mai kha a bo vek bawk.




“Lilia tinge i inthup tlat ṭhin, ka kiangah hian i hlimlai tih ka hria” ka thusawi zawh hma chuan min rawn dang vata “Ka hlim a lawm, engmah thup ka neilo. Ka u ka ngaihtuah chhuah ṭhin na hian min la vaw na êm a ni, ka u that tu i ni a, Dom i lakah pawh hian eng chiah nge ka nih ka hre thei bik silo, a châng chuan thih ve mai te hi ka duh ṭhin“ a rawn tihchuan ka taksa chu a ṭang nghal ât a.




“Khatiang thu sawi tawh hauh suh, thihna kha sawi tawh suh ang che. I nunna ila a nih chuan” tiin ka ngawi zui ta daiha, thi turin ka phal hauh lo. Ka hmangaih ka tih tawh kha, engvanga ka hmangaihna hi hrethiam duh miah lo nge maw a nih ni.



Ka theih tâwp chuan ka dawhtheiin ka enkawl ve ni chuan ka hria a sin mawle, a fian chu dahthla in min rawn en ta rana “Ka in that dâwn lo, mahni in thah chu mi chak lo ber te zia a ni, mahni in khawngaihna hian mihring min ti chak lova, inchhirna zakhua min thlen ṭhin, mahni intih hlum maw? A teuhlo mai” tiin a rawn ṭhu mar ta ât a.




Ka nui nghal suk bawk, he a zia hi a lawm ka duh êm êm. A huaisenna, a luhlulna leh a puitlin rûk riauna hian min hip bawk, a chi ai ve mai mai ngai hek lo, hmeichhia a ni na vang vangin vawitam ka tina chung pawha min hlau ang pawhin a awm ngai heklo.



“A ṭhat chu, vawiin chu hetah chuan kan la awm dâwn a nia, kan pahnih chauhin hun kan hmang ang. Mahse Lilia khawiah mah ka hlatah kal ka phal lo tih hria ang che, he hmun hi tumahin an hre lova, nang leh kei chiah kan ni tih hria ang che“ ka tihchuan a bu nghat nghata.




Ka chaw thlêng chu thawh sanin ka kut chu ka sil zuia, pi Helen-i pawhin min lo be leh nghal zung zunga, a ni hi he in enkawl tura ka rawih a ni a. A thawhna pawh a rei tawhin ka tân chuan nu ang mai a ni bawk, a fate ram dangah an awm a. He inah hian ka chên tira, a enkawl ṭha bawk nên an chunga ka lâwmthu sawi ve na ah ka ngai.




Lilia rawn kal hnai chu kaiin pâwn lam chu ka pan puia, ka inpiah phûlah chuan awmpuiin a infiam chu ka thlir renga. A châng chuan naupang ang mai hian a lang ṭhin a, a châng erawh chuan a puitling ru leh phian bawk si. Ka hmelma pâwl tena min veh reng a vangin Lilia pawh hi ka vêng uluk hle rêng bawka.



A hriat loh lai chenin vêngtu leh enthla tu ka dah reng ṭhin, keimah ai an bitum hmasa dâwn tih ka hailo. Ka chaklo lai George phiangsena khân hmuh a duh miau va, Lilia hi ka chak lohna hnar tur a ni tih a hre harin ka ring lo bawk. A hriat hunah chuan an ngawi mai mai hauh lovang.



Englai pawha min er a min tluk tum ngar ngar tu a ni a, kei erawh chuan ka hmaah a awm ngai dâwn lo tih hi ka beng ka hriat chian tluk zetin ka hre chiang a ni.

, AN AWMNA COTTAGE “Lilia lo phei tawh ta che, i chau lutuk ang” ti a Dominic-a rawn au lâng lâng na lam chu hawi pheiin ka en renga, ka la infiam tui a sin mawle. He lai hmun hi ka ngaina takzet, awm reng thei ila ka duh, a inpui ai khân nuam ka ti fe zâwk.




“Dom helaiah hian kan awm theilo em ni? Keichu nuam ka ti e, hmun dangah awm pawh ka peih tawh lo. Hetah ka awm châk zâwk” ka ti chu a rawn ner nung mai “A ṭul lo, ka lo hruai duh che a ni. Nuam i ti dawn tlat, awm hlen theih a nilo, helai hi kan pahnih thurûk ni rawh se” a rawn tihluka, ka lo nui hak ringawt.




Enge maw helaia awm pawh chu a duh loh viau ni, keiin nuam ka tih teh lul nên. “I sual emai” tiin ka kal pêl hmaka, tûm burin in chhûngah chuan ka lût zui bawka, min rawn ûmzui nghal vat mai.



In chhûngah chuan ka vei tau nghat nghata “Ka sual vâng pawh a nilo, helaiah chuan vênhimna a pan lutuk dâwn. In puiah khân i him ber bawk, ka vênhim theih loh che hi ka hlau a nia” a rawn tihchuan amah chu chiang tak hian ka en vang vanga, a hmêlah chuan hlauthâwng hmêl leh eng emaw kalh tu nei ang tlat hian ka hmu a, engvanga min vênhim duh em em nge maw anih le.




“Thi tur khân min duh viau emaw ka tia, engvanga min vênhim chu duh viau si nge i nih le?” tiin chiang tak hian a mitah chuan ka ena, min hmangaih a tih kha chu hre tawh mah ila ka ringhlel lo theilo, ka lakah hian eng game nge a khelh pawh ka hrelo va. Lo rin nghâl bur kha ka tum lo, ka hrehawmna ngaihtuah phei chuan min vênhim a duh tlat mai te hian ngaih a ti ṭha lo zâwk.




“A chhan chu vênhim che ka duh ka tih tawh kha, ka vênhim theihloh che hi ka hlau a ni. Ka hmangaih che tih i hria, kha thu kha ka sawi mai mai hauh lo a nia, a tirah kha chuan huatna nên a ka en che avâng khân i lakah pawh engmah ka ti lang duh ngai lova, ka rilru leh ngaihtuahna te pawh ka sawi duh hek lo, i lakah ka nunrawn êm avâng khân ka inthlahrung bawka, mahsela tûnah chuan ka theihna zawng zawnga vênhim che hi ka duh” a rawn ti supa.




A thusawi chu a timai mai lo tih pawh ka hria, a theihna zawng zawnga min vênhim a duh tih a sawi chu ka ring hlel lo, muangchang chuan ka pan hnaia. A kutah chuan va chelh sakin a mit pâwl ram maiah chuan ka en vang vanga, ka chêt dân chu a niin min ngaichâng reng bawka.



Mipa hmêlṭha tak leh hausa tawn taw a ni a, tûn thlenga hmeichhia hel tu an tam zia ka hai bik lo. Ka tum ang ngeiin min hmangaih ta a, mahsela a laka nunrawng taka chêt ka thei hauh lo. Chutih rual erawhin phuba lâk erawh ka duh êm êm bawk si.



“Min hmangaih suh, min hmangaih theilo. I unaupa bialnu hlui ka nihzia pawh i hriat kha, tûnah hetiang dinhmuna kan awm avâng pawh hian keimah pawh hi ka in hua a sin, nang pawh ka hua che. Ka hmangaih ve thei che in ka ring lo, i tâna buaina mai mai ka ni ang tih ka hlau bawk, min hmangaih a nihchuan min chhuah zalên la ka duh” ka tih rual chuan a hmêl chu a rawn in thlâk hlawka..



A hmêlah chuan thinrim hmêl leh lungawi lo hmêl a ni ka hmuh ni. Min khawih duh mai dawn emaw ka tih lai chuan thâwk la vâng vangin a mit a chhing sawka, ka lo thaw dep dep ringawt.



“Khatiang kha sawi tawh hauh suh, haw ang insiam rawh. Zalenna maw tûn thleng ilo la ngaihtuaha, ka lak aṭang hian khawiah mah i kal ngai lovang” rawn ti hrawkin a kalsawn zui vuta, ka thusawi kha ka tisual hle niin ka hria, kan inkar ṭha sa zawng zawng a ti buai vek a ni.



Thâwk la hakin room lam chu ka pana, insiam tur chiam ka neilo. Ka mut kawr chu thlâkin a hma a ka thawmhnaw ngai bawk chu ka ha leha, ka awm a nuam thei meuhlo.


Room aṭanga ka chhuah leh chuan phone a lo hmang mawlh mawlha, a bulah chuan ngawi reng hian ka va dinga, min lo melh zawk ringawt.



Frederick-a chu reilote hnuah a rawn langa, a ni erawh hi chu cottage bul in te pakhatah a awm a. Kan hlatah a awm kha chu ka ring lo hrim hrim bawk nên chutia a rawn lang nghal mai chu mak ka ti lêm lo, ngawi reng chuan car lam pan chuan kan kal dûn a, ka mit ka chhing vang vang bawk.




Kan boruak ka tichhe vek chu ka haw tak tak, khatiang thu kha la sawi lo tur ka ni a sin mawle. Dominic-a rawn ṭhu lût kut chu ka vawn saka, “Thinrim suh aw, kan inkar tihchhiat hi ka duh bik lo ania, ka tihpalh, khatiang thu kha ka sawi leh tawh ngai lovang” tiin ka phun sapa, nuam lo ka ti tak tak.




Min chhâng lo hian a ngawi rûn renga, engmah pawh ka sawi tawh biklo. Ka ṭawng tam chuan a thinrim zual deuh deuh ka hlau bawk nên ka ngawi ta renga.




In pui kan thlen lai te chuan kan la in be chuang lo, inchhûng lam pan chuan kan inzui hnak hnaka, maid ho chuan min lo chhâwn vat bawk. Dominic-a erawhin en pawh en lo hian room lam a pan nal nala, ka en zui vawng vawng mai.



A awmdân chu nuam ka ti lo takzet, kei pawh hi engvanga khatiang thu kha sawi nge ka nih tih ka in hrethiam biklo, a huat zâwng tak sawi ka duh vâng te pawh aniang.



Hetiang ringawt chuan a dik dâwn lo tih hria in a room lam chu ka pana, kawngka a lo kalh lo hlauha. Ka lût tlang nghal vat bawk, room-a ka luh lai chuan a inbual a niang bathroom lamah thâwm ka hria a, ka lo nghâk ta tawpa.


A rawn chhuah rual chuan ka lo ena, towel veng hian a lu a rawn hru mawlh mawlha, a room-a ka lo awm chu a rawn ner nghal nung mai. Ka awm a tinuam miah lo, ka thaw hawka, chutih rual in a sam huh thlar chhana a mit lang chu a tak ngaka, hmuh a nuam zual.




Thâwk la hapin ka infuih sauh sauha, a lamah phei chuan ka kuai kûn hmiaha, a hmuiah chuan ka fâwp ve ta siah mai. Tun hi ka vawikhat fawh hmasakna a ni bawk, min chhâng mai lova, ka chêt dân chuan a ti ham haih te pawh aniang, a ding khawng renga.



Mahse rei a nilo duhthawh zet chuan min rawn chhâng lêtin ka mawngah chuan a rawn ṭhâm saka, ka kâwngah a kut pakhat chuan dawmin khum lam pan chuan min nawr phei zuia, a chêt dân chu dang duh lo in ka dawh tawpa.





Tûnah hi chuan hei bâk hi kan inkar siamṭhat na tur dang ka hrelo, ka thawmhnaw chu phelh zung zungin a ni erawh inbual zo tih takah engmah a la in bel hauh lova, ka taksa chu a enkual nghal dan dan mai.




A towel chu phelh in a paihsawn zui vata, ka mitah tak chuan min en ran bawk. “Min nghah tir tawh suh, Dom, ka duh che keipawh hian ka duh takzet che” ka tih rual chuan a khi suka, chutah khumah chuan min nam mu hnawkin ka chungah an rawn bawk zuia, duhthawh zeta che dunin thil dang reng reng kan ngaihtuah chang lo a ni ber mai.




Keipawhin tûnah rih chuan kan kar tichhe thei zawng leh ka laka a hel theihna tur ka siam tawh tur a nilo tichuan ka inhrilh mawlh mawlh bawk. Inkuah chiala kan mut hnu chuan ka hnungah chuan a chûl hliau hliaua, a chetdan engkim chuan min hneh a ni ber mai.