The Traitor BY Tlantlani Fanai

[ngaia]

Awmawmi's POV

Doorbell ri ka hriat chuan zanriah eitur siama ka nu leh pa te an buai avangin kawngka chu hawng turin ka kal a.

Living room-a amah chauha awmtir ka duhloh vangin Matthew-a pawh chu ka pawm bawk a,mahse monitor check loa pawm chunga kawngka ka hawng chu ka inchhir tan der.

"Ben......jamin?"Matthew chu ka pawm nghet nghal a,hepa lak atanga venhim ngai tlata hriatna kan neih chu a.

Mahse a taksa ka mitin a hmuh chuan ka thinlung hi a na zawk mai.

A hah hmel hle a,a la tha tho naa chu chi hrang hranga keh darh nimai awm tak hi a ni a.

Patling anga en dawn chuan a nilo emaw tih mai tur zawk a ni.

"Awmawm..."a hma zawng aiin a aw chu a lawi a,ka ngaihtuahna leh rilru in min thunun lutuk loh nan ka ka chhung chu ka ha in ka seh ruh vak a.

"Tunge-oh ka fapa duhtak?" Ka nu chu rawn chhuak vein a lamah chuan kan hawi rual thap a, Ben-a lo en duh miah lotu ka pawm mek ka fapa chu ka en nghal a.

Ani hian thil ei sual a nei em ni?

Hrehawm tih hmel deuh hian a rawn te a,nge ka awmdann vang zawk hian ni le aw?

Nge a pa vang hian hrehawm a ti zawk?

Ben-a bul velah chuan awm ti nuamlo deuh tur perfume nilo thil dang rim tlem a hriat theih a,mahse Matthew-a hi chu a effect pha ve vak dawn emawni aw?

Ka fapa lak atanga hawisawnin Ben-a lam chu ka en leh a,ngainat hmel taka a fapa a en reng ka hmuh chuan mak ka ti kher mai.

Eng thil nge ni ngai?

"Nakinah ka lo kal leh mai ang,"ka en reng tih a hriat chuan Ben-a chuan a aw a thian kharh a, Matthew-a te bengchheng reng a enna atang chuan hawisawn vatin a inher nghal a.

"Khawiah nge i kal dawn?"tia ka zawh chuan a pen lai chu a ding chawt a,nui lui tih hriat deuha nuiin ka lam a rawn hawi a.

Thil rapthlak tak tawng ang maiin a awm alawm le.

"Ka inah. Ka nu leh pa te nen hun hmang leh tawh rawh u. Sawi lawk loa ka lo kal avangin ka tihpalh,"a tihsual ni miahloa ngaihdam a dil hnua Matthew-a awmdan avang chuan mak ka ti leh hle a ni.

Te bengchhengin a pa lama kal tumin hma lam hawi phet hi a tum a,kal phallo niawm taka a ban pahniha a pa lama ban a phar pah chuan ring mangkheng hian a te leh a.

Tiang hian tu chungah mah ala ti ngailo.

Chuan Benjamin-a lam ka hawi chuan ka thil hmuh chu ka awihlo hial zawk.

Alo tap reng tawh a nih chu.

A tah chhuah loh nan a hmui chu a pet fan fan a,mahse a biangah chuan mittui hi a rawn luang zung zung a.

Heihi eng thil nge?

Engmah hrethiamlo mah ila,an awmdan ka hmuh chuan ka hnuk rawn ulhin ka mittui a rawn tling nghal pum a.

A tap ka hmuh hian thil hriat chhuah ka nei.

Matthew-a hi a haw lo.

Chuan Ben-a bula a awmdan hi ka hmuhin,ka fapa pawh hian a hmaa ding hi a pa a ni tih a hria tih ka hre bawk.

Muangchangin a pawm theih nan Matthew-a chu Ben-a bul lamah ka pawm hnai a,dim deuha naute alo lak chuan a kut khurh nasat zia pawh ka hmu thei.

A fapa a pawm nghet ta tih chuan nghet taka kuahin a tap chhuak leh a.

Hetianga Ben-a awm lai ka la hmuh ngailoh vangin keipawh ka mit atang mittui a rawn luang chhuak ve nghal a.

Tiang hian a tap thei tih pawh ka lo hre reng reng hleinem le.

Matthew-a pawh chu a pa ang chiahin a tap nasa ve a,ka nu in nghet taka min rawn kuah chuan ka mittui chu a rawn luan belh zel bawk a.

Ka inhnit fep fep lai chuan tiang hian Matthew-a hi a la tap ngai miahlo tih ka hre chhuak.

A chaklohna lai a ti lang chhuak ve ta ni ber hian ka hria.

A hmaa a nuih leh thu a awih em em thin kha ka tana a chak zia tih lanna mai a niin ka hre ta zawk tlat a nih chu.

Ka hlim theih nan a nui a,hlim ka mamawh tih a hriat vangin ka naute hi ka tan alo inti chak thin a ni ngei ang.

Ka naute.

Matthew,ka fapa.

Thil ka hriatchhuah tak avanga an pahnih ang maia ka tah ve hnu chuan ban nan hun kan duh rei kher mai.

Zanriah ei hun kan sawn hla deuh a,mahse kan vaia ka hlim tawn nan kan tah thawl hi a ngai miau si a.

A tah ban hnuah Matthew-a chu a pa banah chuan a muhil zui a,a mutthilh hnu chuan Ben-a jacket ala tham bet tlat zui, an in pawmna lak atanga laksawn kan tum pawh kan thulh phah.

Naute mutthilh vangin zanriah chu ngawi rengin kan ei a,mahse a hrehawm miahlo.
.
.
.
"I coffee tur,"tia no ka pek pahin a hlat hretah chuan ka thlu thla ve a,a vawikhat hmuhna chauh ni mahse ka fapa chuan Ben-a chu a ngaina nghal hle a, mit tla lekloa a pa a en char char lai chu ka en reng a.

"Ka lawm e,"a kut lehlama naute a dawm vangin a kut lehlam chauhin no chu a la a,ka thil en a hriat chuan Ben-a pawh chuan Matthew-a chu a en ve a.

Chu veleh naute chuan alo nuih nghal vur vur a,kan pahnih chuan kan nui ve nghal bawk a.

"A hria anih kha,"Coffee in pah chuan ka ti chhuak a,a harh hnu pawn he nau hi a pa lak atang a kalsan duh hlek lo, an in chhaih lai chuan ka lo la en reng a.

"A nih ka ring."

"I hua em?"Ka hmuh dan hi a thinlunga a awmdan a nih leh nihloh ka hriat duh vangin ka zawt tha leh a. Ka zawhna avang chuan Ben-a chu a dang tih ka hre thei.

"Aih,a teuhlo mai. I hnena ka thil sawi kha ngaihdam tlak a nilo tih ka hria, mahse ka inchhir lutuk. Matthew... Lawmawma'n hrisel taka Matthew-a i nei tih min rawn hrilh ni khan in bula rawn kal baka thiltih chak ka neilo a mahse i hnena ka thil sawi vang khan ka theilo a. Ka tihpalh lutuk,"a ti chhuak a,a mit atang chuan thudik vek a sawi tih ka hmu thei.

"Khang te kha chu thawnthu hlui an ni tawh alawm. Hrisel takin Matthew-a pawh a thang chho a,chu bak chu thildang duh dang ka nei chuanglo."

"Mama!"naute in a rawn tih lang lang chuan rang zetin a lamah kan hawi nghal a, a pa lak atanga lak hran a duh tawh emaw tiin naute chu lak mai tumin ka ban a

Mahse ka kawrbanah nghet zet hian a rawn vuan a,ka rinloh deuhin a tha chak zet hian a lamah min pawt thut a,ka dar lang hawkin a pawt a nih chu.

"Lalruatkim!"

A thiltih leh Ben-a hmuh laia ka dar lang vang chuan ka zak ve det,kawr chu siamtha thuaiin ka ding nghal vat a,naute chu a phu chiang kher mai.

Awka vina ka la vin ngailoh vangin Matthew-a chuan mak a tiin a hmui chu a ti pawrh tarh a,a mittui tling pam ka hmuh chuan ka inthiam lo lutuk ringawt.

"Anu hi ka tihpalh lutuk,naute. Ka thin a rimlo ania,"min en theih nana naute bula ka thut hnaih chuan a hmai chu apa awmah chuan a phum nghal hmak a,ka thiltih tum vanga Ben-a mala ka vawn lai pawh ka hrelo.

Ka hriatchhuah veleh chuan rang tawkin laksawn ka tum nghal a,mahse dim deuha Ben-a'n ka kut a rawn vawn chuan ka tawp nghal chut a.

Ka kut chunglam chu a kutzungpuiin a chul kual a,a kut lum thar thar hi ka la ngai reng tih ka pha theilo.

Ka hawichhuah chuan ngainatawm taka minlo en reng lai chu ka hmu a,ka pum a ti za chhuak vekin ka hria.

"Awm,ka-"sawi zo loin a tawp daih a,a hmelah chuan a insum tih ka hmu thei.

Ngaihdam min dil a tum leh em ni?

"Hm?"ka kut ala vuan reng a,a mitah chuan ka en reng bawk a,tianga a mita en te hi ka ngai tawh lutuk.

"Ka ngai che. Ka tihpalh,mahse ka ngai lutuk che a,"a thil sawi vang chuan min en ngam tawhloin hnuai lam a bih nghal vat a,engmah pawh ka tih hmain Matthew-a chu a rawn che nghal a.

Ka naute chu a pa mala dingin a hmaiah chuan a chul sak a,awmze neilo hian a tawng nawk nawk bawk a.

Ben-a tap mek lai chu nui hakin naute taksa te reuhte ah chuan a hmai a phum a, Matthew pawh chuan a lu-ah chuan lo chulsak hliau hliau a, hnem a tum ve a ni ngei ang.

Keipawn hepa hi ka ngai ve reuh lutuk.

Mahse ka la inring hrihlo.

Mahse,hetianga ka fapa a pa chunga a awm dan ka hmuh takah chuan thuthlukna pakhat ka siam thung a.

Matthew-a tan,an pahnih hian ka then hrang ngailo ang.
Show post links
Top