CHAPTER 12
Ramriak tur chuan bawr zetin kan in phur lût ve a, a bike pawh in lamah kan daha. Ka nute hnênah kan dah tawp kha ania, misual mi lir lo rûk sak duh leh lo tihchhiat sak duh tâwk hi an awm ṭhin si a, fimkhur thil thu a ka nute bula dah kan ni bawk.
Kawngah chuan riah tum ve midangte nên in ûm pha in kan in be mawlh mawlh hlawma, ramriah tum an lo tam ve tho bawk nên a reh lutuk dâwn lo tih a hriat mai.
“In pa hi chu a fel ania aw, tihian thingtlâng hna te hi a thawk ngai awm siloa. A feh pui peih reng che ania, a hmelṭha bawk si a taima bawk a, pasal i nei fuh. I fel bawka Pathianin pasal ṭha tak a pe che anih hi” an tihte chu hriat a nuam ve reng, u Remruata pawhin engmah a sawi lo nangin a rilru tak chuan nuam a ti ve tho in ka ring.
“Nia a fel bawka, Ruata in nu hi kan khaw nula fel a nih hi aw. A taima a nia, hetianga helama i rawn awmpui thei hi a ṭha hle mai, a mal ṭhin bawk si a. Nang i rawn awma, a khua pawh a har lo deuh ang chu” tiin ka pasal chu an be zui bawrh bawrha, a ni pawh a lo nui ve suk suk mai.
Lo kan thlenga, thlâmah chuan in dah felin kan ṭhu duna “An fak hle mai che” tiin ka nek deuh salh chu min rawn kuahin min ṭhâm deuh saka. “Nangpawh, an sawi kha hmeichhe ṭha nei chu pasal pawh kan hming ṭha nghal mai alawm, nang ang vek hi hmeichhia hi awm sela, mosual an tih ang te hi an awm hauh lovang, mo ṭhenkhat hi chu an mona sual pawh an awm ang, a ṭhen erawh hi chu an zir loh vâng a ni ve fo ania, nang erawh nangmahah sawisêlna tur ka hmulo che” a tihchuan nuam ka ti veng veng mai.
Ni e a sawi dik chiah, hmeichhia pawh hi kan no leh em em lutuka, ho te ah pasal chhûngte sual zia leh ṭhat loh zia kan sawi nghala. Mona chhûngte sual tak tak pawh an awm ve tho nâng in ṭhenkhat hi chu awm âwl tum lutuk, mo nih in hre miah lo hi kan awma, chhûngte leh social media a pasal chhûngte ṭhat loh zia hriat theihna tur reels leh comment hmang deuh deuh ho te hi keichu a lehlamah chuan ka dem zâwk, an mizia a hriat ṭhin ka timai.
Social media a pasal chhûngte rawn sawisel fak fak ngam ho hi chu an pasal te inchhunga an awm dân tur leh an mizia tur âwm ang a hriat ka ti mai. Mo kan ni a, a nuam vek dâwn lo tih hi hriat a ngai reng a ni, kan cousin nupui pawh lo a feh ngai loa, inah rawng a bâwl ngai heklo, mahsela chuti chung pawh chuan a pasal chhûngte a ngeih thei lo a, a rêl reng tho. Pawisa lah an pa hriat lohin a chhûngte a thawna, an pa in pay a khawih loh avângin hre ngai heklo, a bo a ti zela. Tûnah phei chuan ba singkhat chuang an pa hriat loh bawka neiin a tlân bo hmaka, khatiang te kha an awm thei ania(A TAK TAK THIL AW)
Pasal chhûngte sual sual ti ngawt lo hian mahni hi in en ve tur ania, pasal chhûngte ngeih loh tum nghal ran hmeichhia hi kan awma, hmeichhe sual vek vek hi chu kan sual tâwp khâwk tlat. Hmeichhia te vêk hian kan inhre chiang ṭhin.
Pasal kan neih chuan a nuam ngawr ngawr leh mahni in ang khân kan awm thei dâwn lo tih chu a chianga, tawrhchhel pawh a ngai rêng a ni. Mahni ṭhat tum miahloa pasal chhûngte rêl reng thei hmeichhia hi ṭan tâwk lo awm ṭhin mahsela keichuan ka dem ve tlat, kan lungawi lo a nih pawhin Pathian in min hre chiang a, pasal nei duh tho pasal chhûngte mi hmuh leh hriat a miin min rêl pui sela ti ni âwm bera va post chhuak ho te hi mak ka ti, ṭhenkhat lah hian an tum ang chiahin an pasal chhûngte ṭhat lohna kha an rawn comment chhuak ngam ania, engtin nge khatiang chunga an pasalte bula ṭha ber âwm ang zia zanga an la awm theih ka ti, an huaisen ka ti zâwk.
Tu pawh hi duat tak leh nêl tak hian be bawrh bawrh ila, kan pasal nu emaw farnu te emaw pawhin min lo ei lo deuh mahsela ṭha taka kan biak reng chuan an sual reng bik hi ka ring miahlo.
“Nang chu i sual ka ti” ka ti chu a nui haka, “Min nei duh tho a lawm, bâkah keichu sual mah ila ka hmelṭha tho, hmelchhe bawk sual bawk si chu an îtawm loh ve e. Hmeichhia phei chu in nungchang hian a chawi cheu a, in ha sexy tak tak te hi mipa chuan kan it cheu a, mahsela nupui atân kan duh miahlo che u tih hi hriat tur, nupui tur chuan hmeichhe nungchang ṭha leh zahawm taka inchei ṭhin tho ania kan melh ni. Hmeichhe hmelṭha leh no nalh tak tak, in ha changkâng tak tak te hi han ngaizawng ve bawk ṭhin mah ila nupui tur atân chuan kan duh leh chuanglo, châwm zawh loh hlauhawm khawpa makeup leh thawmhnaw man duh sâng hian kan mit a la vak lo, hna a vâng a. Mizo phei chu rethei kan la tam a, hmeichhia te pawh hian in mipa te hi min dem ngawt lo a hrethiam taka kan hnathawh theih mil tâwk a inchei leh nundan in zir ve hi a ngai rêng a sin, in dem ngawt loh tur. Hna tam in ram changkâng ve sela hetiang reng kan ni bik lo ang” tiin ka chalah chuan a rawn fâwp vang vanga.
“Ka hria lawm, keichu thingtlâng nula ka nia ka pasal tur pawhin ka zawlpui deuh ka nei ang tiin ka lo inngaihtuah ve ṭhin a. Mahse, tumloh deuhin ka nei nawlh che a nih hi” ka ti chu a nuih ka ti za bawk aniang a nui hawk hawk mai.
“Ka duh zual sawt che” a tihchuan ka nui ringawta, mahsela nuam ka ti. A hmelṭha zet chu ka en vang vanga, âwih har ka la ti ani, ka in ena enge inchhuanna tur ka neih ve? Ka thianghlimna chauh lo hi chu engmah chhuan tur ka neilo, hmelṭha tak ka niloa, pian nalh tak leh vun nêm no tak lah ka nei ve heklo, mahsela he mipa, mipa hmêlṭha tak tih theih tur leh pianah pawh zahpuiawm loh khawp hian kei thingtlang nula mai mai min duh hi âwih a har êm a sin.
Chutah kan dinhmun a la inthlau en em zuia, “Min duh hi âwih harsa ka la ti” tiin a kut chu ka khalhsaka, a hma anga a no leh mâm em em ang kha a nei tawh biklo a. A hnathawh na avângin a durhin a chang ve hruap tawha, mahsela ka mitah chuan ala mawi em em tho.
“Min ring tawp rawh, ka duhna che hi a lem mai mai a nilo ka tih kha. A tak ngei ani, nakinah i la hre chho mai ang” a tihchuan ka ringhlel lo, ring tawp ila mipa a ni a a thutiam ah chuan a din ngheh ngei pawh ka ring.
“Hmeichhe fel leh ṭha tak tak pawh an tam ang, hmelṭha tak tak pawh. Mahse chûng zawng zawng zîngah chuan ka mit i la ber tih hi hre reng rawh, engmahin an ti danglam ngai lo ang” tiin ka hmuiah chuan a rawn fâwp vang vanga.
Miin min rawn hmuh ka hlau bawk nên ka namsawn vat a, kan lo hi a hmasa pâwl a ni bawk nên kawng kal ho in min hmu ang tih a hlauhawm. Nupa mah ni ila hetianga ual au taka awm chu a mawi lo tih ka hre miaua.
“Tirawh thawk ṭan ila, tlai lam chu rawngbawl kan ngai dâwn sia bâkah ruah rawn sur leh hma hian che zung zung ang” tiin kan tho chhuaka, sawi ang tak takin khua a dur leh khup tawha. Hetianga kan ṭhut mai mai chuan ruah a sûr leh chuan hna kan thawk leh thei dâwn siloa, thlai an ngaihtuah awm lo theilo.
Hlo chu kan thlo leh mawlh mawlha, Fanghma vel an rah ve tawh bawk nên a nuam viau mai. In chhaih pahin kan nui leh hawk hawk ṭhin a, hetia kan awm tâkah chuan a lo nelawm ve theih zia leh a hlim theih zia ka hre thara, a kianga awm nuam ka ti sawt bawk.
Amah hi vei loh theihloh nungchang neitu ni berin ka hria, “Hetiang hian kumtin in thawk chu anisia, in thawh ang hu hian hralhna tur a ṭha leh si loa. In taima ngawt mai, sawrkar ṭha hi kan nei thei siloa, eng party pawh hi inthlan dâwnah intiamin eng party tân pawha ṭha tur hian insawi ve ṭhin bawk mahsela a nih loh zia chu a lang zel mai a nih hi, khawpuiah chuan an ti thei pawh a nimahna. Mahse an tlin chhan thingtlâng lam hi an han tlin chian tak tak chinah chuan an rawn ngaihsak ngailo cheu a nih ber hi” a tihchuan ka bu nghata.
“A dik alawm thingtlâng kilkhawra awm phei chuan eng Party mah hian inthlan dâwnah lo chuan min rawn hre leh tak tak ngailo. Zoram hmasawn theih loh chhan leh kuthnathawktute, hna dang thawk hrim hrim pawh kan kân theih loh chhan hi chu kan sawrkar zel te hi an ni, mi thar an ṭhat beiseiin kan han thlang ve ṭhin a, mahsela khâng te pawh kha a hma mi ang tho, party dang chhiatna lai sawi hmang ve tho, in puh tawn reng leh ram mipui hmasâwnna tur lam ngaihtuah leh miah silo ang vek, mi ramah te chuan kuthnathawk nasa apiang an ding changa, Mizoramah erawh sawrkar lai lam ṭang leh a nei sa ho chiah an len belha, mi thil ti thei chin chiah an ding chang leh zêl tho a nih hi” ka ti ve sapa.
Chutiang lam chu kan sawi tui ta phian lehnghâl “U Remruat in zawh chi a ni em chu ka hrelo, mahsela lehkha i zirsanga, i thiam thei hle tih pawh ka hria. Mahsela enge hetianga i awm tlat chhan hi” ka tihchuan a hnathawk lai chu a tâwp data.
Ruah hmite a rawn tla ṭan chiah bawk nên a sur nasat hma chuan thlam lam kan pana, kan ṭhu fel chiah tihah ruah chu a rawn sur zui leh ta buan buana. Thlam chung leh a bangah di vek kan hman miau avângin a bengchheng lo hlauh thunga.
“Midang bulah sawi ka duh ngai hauhlo va, sawi chhuah fo ka duh heklo. Mahsela i kiangah chuan pawi ka tilo” tiin min kuah te tea, keiin a thusawi tur chu nghâkhlel takin ka lo ngaichâng thunga.
“U hmeichhia ka nei ṭhin a, tûna ka ute ho tih loh hian, ka u chiah a nia” tiin a thaw deuh hawk a. Ruahsur lam chu enin “Tun thlengin hetiang ruahsur hian min la tibuai, mahsela i kiangah chuan ka paltlang thei zel e“ a tihchuan a kut chu ka hûm sak vata.
“Kum 25 ka nih laiah a nia, college ka kal tawha. Ka u hian hiking vêl hi nuam a ti ṭhin a, kan inkawm ngeihin kan inzui nasa ṭhin” tiin min nuihsak a, a awmdân ah chuan thil hlui a sawi chhuah leh avânga natna leh thinrimna in chawhpawlh nuk chu ka hmuh hmaih lo.
A hma a a buaina sawi kha ka hre vek thei dâwn a ka hriatna erawh chuan min ti lâwm viau thung. Ka hriat loha hetianga a awm chhan leh a nundan ho ta riau hi ka hre châk a ni.
“Vawikhat chu lui lian vak lo kalna tur a hriat thu a sawia, keichuan lehkha zir ka duh bâkah ka nu leh pa hian ramhnuaia kal hi an phal vak lo bawk nên ka hniala, mahsela min ngên tlata” tiin thâwk a la leh vang vanga, a awmdân chu keiin ngun takin ka lo en thunga.
“A duh ang chuan ka kal pui ta ngeia, mahsela kha ni ah khân ka u chu kumkhua a hmu tawh lo turin a kal dawn tih kha ka hre reng reng lo. Kawr kan zawh dûn a, hlim taka Chakai vêl mana kan awm lai chuan ruah a rawn sura, mahsela nuam kan tih êm avângin kan tâwp san duh chuang loa, mahsela thâwk leh khatah Sabereka khuangkaih an ti emaw ni khatiang kha rawn thlengin keichu lui kamah chuan ka tlânchhe hmana, ka u erawh kha chu ka chhan hman ta lo ani. Kha thil rapthlâk zetin a lâk lai leh a chhilh lai kha ka mitthla ah a la cham a, ruahsur apiang khân kha thil kha hrechhuakin ruahsur hi ka ngaina ngailo” tiin ka nghâwngah chuan a hmai a rawn phûm ta daiha.
A ṭapin ka hria, ni e a ṭap ngei ani. “Ka nu leh pa hmêl ka hmuh a an natna te, keimah min demna thu sawi siloa kan chunga an ṭha duh ta ngai reng reng lo khân min ti na tela, theih tâwp chhuaha tihhlim ka tumna pawhin awmzia a neih tak silohah kha chuan zu lamah ka ṭuan ta a” tiin a ngawi ta vang vanga.
“Ka u kha khatiang khân a awm dâwn tih ka hre bik lo a sin, mahsela ka nu leh pa khân ka hruai luih a an ngai a. An ṭah hla kha ka bengah a châm reng bawk, keimah min demna lam chu an chhâk chhuak hauhlo, mahsela ka tâna hriat nuam kha a ni miahlo bawk. Ka u kha thi turin ka duh rêng rêng lo a sin“ tiin thâwk a la hrawiha.
Hrehawm a tiin a na takzet tih ka hre thei, mahsela ka kianga a in sawi thâwl hian a mah pawh a chhûngril nun tâwt tlat ṭhin kha a reh ka beisei ve vâng a ni.
“Ka u kha ka ṭhianṭha ber a ni a, thi turin ka duh rêng rêng lo. Chhan pawh ka duh a sin, mahsela ka thei silo a mangang hmêl leh pui tura min ngenna mitmeng kha ka mitthla ah hian ala châm a, tûn thleng hian kha thil kha ka la theihnghilh theilo,mangchhia angin min zuia. Theihnghilh lai ka nei ngailo, ka nu leh pa lah kha thil avâng khân an hlim hmêl ka hmu khât tawha, ka ute pawhin an tihlim zo lo, a bikin ka lakah an hlim hmêl ka hmu ngai tawh lo bawk. Theih tâwp chhuahin an hlimna siam tumin lehkha zir lamah ṭan ka la zuala, topper ka nih pawhin nui ve ṭhin bawk mahsela a hma ang kha an ni thei tawhloa, ka beidawng khân khawvêl lamah tal hlimna ka hmuh beiseia hetianga awm ka ni bawk. Min hmangaih lo chu ka tilo, mahsela ka chunga an awm dân khân an lakah min ti vui ve ṭhin, engvanga ka tihsual niloa min dem nge an nih?” tiin min kuah nghet sauha.
Keipawh chuan ka theih tâwk a kuahin a lu ah chuan ka chûl sak heuh heuha “I thiamloh anihloh chu, mitin hian thih hun tur kan nei veka, kan dan theih a ni hleinem. I u pawh chuan a thih hun hmang thlengin Pathianin a hnêna hruai a duh pawh a nimahna, nangmah in demna tur i neilo, i nu leh pa pawh chuan an dem tawh hauh lo ang che. Tûnah chuan an hmangaih zia che i hriat ka ring, i ṭhatna tura theih tâwp an chhuah ve na hi hmuh hmaih suh aw. Nu leh pa chuan tihsual an nei ve ṭhin, keini an fate pawhin tihsual kan neih fo ang hian nu leh pa nih kawngah pawh tlin loh châng an nei ve ṭhin alawm“ tiin ka thiam ang tâwk chuan ka hnêm ve mawlh mawlha.
“I hur lutuk” ka hnem ve lai laia ka hnute a rawn khawih chu ka beng nghâl thlawrh a. A nui nghal hawk hawk mai, thu tak deuha ka biak ve laia chutianga a rawn awm leh daih chuan min ti lâwm lo lek lek.
“I ṭap emaw tihlaiin khatiang khân i rawn che leh ania, eng ang mi nge maw i nih ni?” tiin ka hawi tûm bûr a, ka kâwngah chuan rawn kuahin min rawn melh ralha.
“Ka nupui i ni hi ka lâwm êm a, nangmah avângin khâng nunhlui te kha ka palzam ve thei tawh tih i hria angem? Ruahsur ka hlauhna leh ngainat lohna i ti reha, keimah in dem ngawih ngawiha ka awm chângin i hmêl hlim leh enghelh neilo zet hian min ti hahdam ṭhin.
Engkim hrilh lo che mah ila a rûka ka lungngaihna te hi i hlim hmêl hian a ti reh fo a sin. I chungah hian ka lâwm tih hi hre tawp rawh, khawvêla hmeichhe ṭha ber i ni chu ka tilo, mahsela hmeichhe khawsak ṭha leh ka mit la tu, hmeichhe ṭha tam tak khûm vek tu i nih hi” tiin ka hmuiah chuan a rawn fâwp a, ruahsur leh thli thaw pawh chu bengah a châm theilo, he mipa ângchhûng leh a mi fawh-na dam raihte hian a ni ka thinlung ti tuiral a, thildang ngaihtuah thei lêk lo a min siamtu chu ni.
Kawngkhar vêl chu khâr phui hmakin thlam chhuatah chuan mut bu delhin min mutpuia, tûnah chuan engmah ka ngaihtuah theilo. A mi fawh-na nuam zet hian khawi dang mah hawi thei leh ngaihsak theilo in min siam a ni.
Ka kawr a hlîm lai pawh chuan ka dang lo a, a thusawi ka ngaihtuah phei kha chuan alo awm dân ṭhin kha ka dem ta miah lo bawk. Tûnah chuan amah tihhlim ai bâka duh ka neilo, a lungngaihna zawng zawngte hi chhâwk thei ila ka duha, keimahah hahchawlhna hmu ngei bawk sela ka duh.
Thlipui leh ruahsur te chuan min tibuai pha tawh lova, khawpui ri chuan min ti harh chhuak zo tawh hek lo. Ka pasal lakah chuan ka pil vawng vawnga, kir leh theih lah a ni tawh heklo, a tân a tân liau liau ka thianghlimna chu ka hlân a, inchhîrna leh pawi tihna ka nei miahlo bawk.
Duat taka ka sama chulin a âwmah chuan min kuah bet a, thawmhnaw kan ha lo bawk nên a rawn vawt sar sara. Puan chu min sin tirin ka chalah chuan a rawn fâwpa, a âwm thlan deuh dap leh a biang vela thlan tui luangte chuan kan thil tih zawh chiah kha min ngaihtuah chhuah tir a.
Ka zah rualin hmuh nuam ka ti viau lawi si, ka taksa chu na mahsela ka pasal hlimna ka siam thei chuan min ti lâwm thung si.
“A hmasa ber ka ni a, ka âwih theilo hial mai. Ka tân pawh a hmasa ber i ni tih i hria em?“ a tihchuan ka en haw a, a thusawi chuan min ṭhawng ani. A chhan chu a hmeichhe kawp ka hmuh pui ve veka, virgin a min neih ka ring lo pawh hi a awm lo lo e.
“I bialnu kha“ ka ti chu a lu a thing nghal nawka “Ka mutpui ngailo, ka nu leh pa in an ngeih loh zia ka hriat avângin runluih nân ka hmang a nih kha. Ka laka an awmdân avâng khân ka thinrim ve bawk nên runluih dân tur ka zawng a ni kha, ka mutpui ngai lova, mahsela ka bialnu a ni tih chu ka pha lo. Kan in kawp ngei alawm, tûnah erawh chuan nang i awma, tu hmeichhia mah ka mamawh tawh lo, chuan tûna thil thleng hi theihnghilh mai mai atân chuan ka phal hek lo, i na ang tih erawh ka hlau” tiin ka taksa chu a en kual dan dana.
A mit chu ka hup nghal vat mai, min hmu vek tawh mahsela chutia min en leh kher chuan min ti zak tho tho.
“Ka na lo, mahsela khatiang khân min en reng suh” ka ti chu a nui deuh kur kura, ka ngei lutuk chuan a dârah chuan ka seh sak ta vaka. A ṭhen nawng nawng mai, mi runluih nuam a ti thar lutuk hi ka ngei lek lek, mahsela a mah ti nelawm zualtu a ni thung si.
Tho chhuak ṭaih ṭaihin na deuh ṭhum chung chuan rawng ka bâwl a, ka chêt buai ru riau chu kan thil tih avâng khân a ni tih ka hria. Ka lu te hi ani nguai mai, ṭhen leh sak ṭhin in rawng chu ka bâwl zo ta thuaia. Khua a thim tak tak hma chuan chaw chu kan ei zui ta thuaia, chhûm a zîng nasa bawk nên khua chu a thim hma hle a, a lehlamah chuan a nuam letling phian mai.
Kan solar light ken chu kan chhi a, hma takah mu in phone chu kan en dûn a. Ramhnuaiah, ruahsur kârah kan pahnih tê in, tuma tih buai loha kan awm chu a nuam takzet.
Zirtawpniah kan ramriak chu kan haw riha, a ṭhiante an rawn kal avânga haw pawh kan ni. Zânah chuan an rawn thlen hman mai ka ring, ka ṭhiannu te in tlawh kawi ka duh bawk nên u Remruata pawh chuan in lama tlang lo in min kalpuia.
An in kan thlenga, tual aṭanga auh ka tum laia inhau ri ang ka hriat avâng chuan ngawi datin u Remruata chu ka ena, Dorothyi ṭap leh rilru na tih hriat taka a thusawi chu ka hre zui zata “Keichuan nitin hna ka thawka, lo ka enkawla. Chuti chung pawhin in vawikhat ka awm rualin hnathawk lo chhuahin min chhuaha, ka nau hi hetiang hian in ti ve ngailo. Ram lamah in peih loh zawng zawng ka thawka, inah ka rawn haw a in lamah chêt pawh peihlo in keimah bawk min tir leha, ka nau hau ve ila in chhan nghala. In fa hi ka ni ve tak tak lo em ni tih châng ka ngah a sin, hna ka thawk a i chau em pawh in ti ve ngailo, ina ka nau awm mai mai chu thil ti hlek se a chauh zia leh a buai zia in sawi pui nghala, a nih leh ram hnathawh hi a har lo bik em ni? A hahthlâk loh tihna em ni? Kumtluanin hna ka thawk a, mahsela enge min lei ve ngai le? Mamawh ka neih apiangin min hau in thawh chhuah neilo min ti nghala, chhâng lêt cheu ila misual leh kei ang fa in duh loh thu in sawi leha, awm bo ka tum apiangin min tlawn leha. Kei hi in duh duha in tih tur ka ni bik em ni? Ka nauin hmangaihna zawng zawng a dawn laiin keichuan theih tâwp ka chhuah chung pawhin fakna ka dawng ngailo, ka nu leh pa hi in ni takzet angem tih ka ngaihtuah tawh” ti a rilru na zeta a ṭawng ri avâng chuan ka luh tum pawh ka ṭhulh leha.
Mi in hau thâwm ngaihthlâk reng ka duh loh avâng chuan u Remruata chu ka kalsawn puia, ka ṭhiannu erawh ka lainat takzet. Keipawhin nu Sangi te hi ka dem lek lek ṭhin, naupan têt aṭanga in kawm kan ni bawk nên keiaia ka ṭhiante hrechiang hi chu an awm bîk lo ang.
A sawi ang khân lehkha keimah ang chiahin a zir sâng theiloa, lehkhathiam thei tak a ni a. Mahsela unau mipa neilo chu a chhûngte châwm a ngai si a, school a chawlh phaha, lo te nei ve in a theih tâwkin a thawka. Mahsela a chhûngte tihdan ka hmuh pui hian ka na ve tlat zel, ram hnathawh hahthlâk zia ka hria a, a ni chu a nau hian engmah tih a tum silo, inah awm in in takngial pawh a ti fai peihloa, Dorothyi hian han hau se a nu leh pa hian amah zâwk an hau a, a sawi ang khân an fa a nilo emaw tih tur khawp hian an awma.
Nu leh pa tam tak hi chu fate enkawl kawngah hian an hlawhchham chiang khawp mai. Fa duat bik leh en hran tlat nei nu leh pa te hian eng rilru pu a hetianga an fate ti tlat zêl hi nge an nih dawn ni.
“I ṭhiannu kha tiraw?” u Remruata chuan a rawn ti khauha, ka bûk nghat rualin “Pasal a neih vat angai a nih kha” a rawn ti leh chu zawhna mitmeng nên alam chu ka hawia, khatiang kha engvanga sawi nge maw a nih le?
“Timaw pasal neih kher angaih anga?” ka ti chu “An bulah a awm reia, ngaiah an neih a nih kha. A pawimawhna an hmu thiamloa, han awm lo sela a ṭangkaina leh a hlutna an hmu thiam mai ang. Nu leh pa tam tak hi chuan fa sual zâwk zel hi an duat a, a fel te hi duata enkawlna châng an hre miahloa. An ât na tak pawh a ni, i ṭhiannu pawh kha han awm lo chiah sela a pawimawhna an hmu mai ang” a tihchuan ka pawm pui viau mai.
In kan thlenga ka nau pawh a lo la haw loh avângin kan inah chuan a lo awm renga “I va fel ve aw, i duh leh noodles chhum tur saw va la rawh” u Remruata chuan tiin kan naupang ber lah chu phûr êm êm hian a tlân chhuak a, ka en vung vung ringawt.
Ka chhûngte min hmangaih pui leh a chhûngte ang tak taka a en thei hian a chhûngte chungah ngei pawh keipawhin ṭhat ka chhuah zual angai tih min hriat tir ṭhin.