THE SICILIAN (Book I &II) By Mario Puzo (Completed)

[Loma hmar]

Chapter 5a

Ni danga a tih thin ang bawkin tlai lamah chuan Abbot chuan Franciscan Monastery chu a fang kual leh mek a. Puithiam thatchhe tak tak, eng atan maha tlak lo ho chu a an nitin mamawh thawk chhuak thei tur chuan fuih pah zel a. Hmasang thil hlu dahkhawmna hmuna bawmte chu enfiahin chhang urna hmun, khaw hnai bera chhang tam tham tak thawn chhuak mek turte chu a tlawh bawk a. Huan atanga an thar chhuah, kho khat hnura dah olive, grape leh tomato-te chu a enfiah bawk a. Puithiam ho chu an buai em em vek a- mahse hlim tak hmel an pu lem lo, an tum hmun vek mai a ni. Abbot chuan a kawrfual hnuai atang chuan churut sei tak phawrhin Monastery tual velah chuan zanriah ei tui nan a vei kual vel a ni.

Chutah chuan a ni, Aspanu-an Guilianno chu Monastery Gate lama a rawn hnuh phei lai a hmuh tak ni. Gate vengtu chuan lo hnawh bo mai hi a tum a, mahse Pisciotta chuan Pistol chu a lu meh kawlhah tak chuan a chuktuah a, ani chu thingthiin a tawngtaina hnuhnung chu a chham mawlh mawlh a. Pisciotta chuan Guilianno taksa, thi hnuang mai, thi lek lek chu Abbot ke bulah chuan a nghat a.

Abbot chu cher sang tak, zawng hmai ang tak pu hi a ni a. hnar zum van mai leh mit, kawrkilh buang tereuhte ang nei a ni bawk a. Kum sawmsarih ral kai tawh a ni chungin a la chak tha hle a, a rilru pawh Mussolini hun hma, a mah ruaitu Mafia ten mi an rukbote tlanna sum phutna an ziak tir thin lai ang thovin a la thiangin a la verther a ni.

Tunah chuan mitin mai, mi naran leh thuneitu thleng pawhin an hriat khawpin, a monastery chu Black Marketa sumdawngte leh bungraw tawlh rutute tawm kuk tha tak a lo ni ta a ni. Amah chuan chung dan lova a thil tihna chu a dal ngai lem lo va.

Chuvangin misual naran pahnih, Saint Francis huam chhunga an luh luih pawh chuan Abbot Manfredi chu a zam chhin eih lo. Dik tak chuan Pisciotta chu a hrechiang hle zawk a ni. Bungraw tawlhruk leh Black Market sumdawnna beithamteah pawh a lo hmang zauh zauh tawh thin. Fing vervek tak an nih ve vena chu an inanna a ni, pakhatin chutiang chu mithianghlim leh upain a neih tih a hriatin mak a ti a, pakhatin naupang leh daizau lo takin a nei chu mak a ti thung a!

Abbot chuan gate vengtu puithiam chu thlamuan pahin, Pisciotta hnenah chuan, “Well, my dear Aspanu, eng thil pawiah nge I intahluh tak?” a ti a. Pisciotta chuan Guilianno hliam a tuamna chu a lo tinghet mek a. a hmela lungngaihna nasa tak a hmuh chuan Abbot chuan mak a ti hle, he pa hi chutianga thinlung pu thei chuan a lo ngai ngai lo a ni.

Pisciotta chuan Guilianno hliam a en nawn leh chuan a thianpa chu thi ngei turah a ngai a. engtin nge Guilianno nu leh pate a hrilh tak ang? Maria Lombardo hrehawm ti tur chu a ngaingam lo a ni. Mahse tun dinhmunah chuan chu aia pawimawh zawk tih tur a awm tlat, Monastery-a Guilianno an hum theih nan Abbot chu a hmin ngei a ngai a ni.

Abbot mitah tak chuan a en a, a mitmeng hmang chuan Abbotin a hriatthiam theih tura invauna ni si lo, mahse a hnial palh chuan damchhung hmelma insiamna a ni dawn tih hriattir a duh a ni. “Hei hi ka unaupa leh ka thiantha ber, Salvatore Guilianno a ni a,” tiin bul a han tan a, “I hmuh ang hian a vanduai palh hlauh a ni, hun reiloteah amah leh kei min zawng hian National Police te chuan tlang hi an dap chhuak dawn a ni. Kan beiseina awmchhun I ni a, Min thukru tur leh Doctor ko turin ka ngen che ni. chu chu min tihsak theih chuan kumkhaw thian I nei tihna a ni mai.” Heta ‘thian’ tih hi uar takin a sawi a.

Abbot chuan engmah hriat hmaih a nei lo, chiang takin a hrethiam vek. He tleirawl Guilianno chanchin hi a hre tawh thin, Montelepre-a an zah em em naupang huaisen, Sapelh leh silai kah thiam em em, a kum phu lova puitling bawk si chu.

Friends of friends te pawhin rawngrut atana an enthlak ruk reng a ni a. Don Croce ropuia meuh pawhin, Sumdawnna leh vantlang thila Monastery a rawn tlawh tum pawhin Abbot hnenah hian Guilianno hming chu sawi langin nakina la tangkai tak tur a nih a rin thu a sawi nghe nghe.

Mahse Guilianno-a engmah hreloa awm chu a en chuan Inhumhimna hmun aiin thlanmual a mamawh zawk in, Doctor ai chuan tawngtaia thlah liam tur puithiam a mamawh zawk niin a hria. Pisciotta ngenna chu harsa vakin a hre lo, Sicily-ah meuh pawh hian ruang lo hum chu dan bawhchhiatna ni tlat hek lo.

Mahse chung zawng zawng chu chu tlangval naupang tak chu hrilh hriat a duh chuang lo, “Eng vangin nge an zawn che u?” tiin a zawt a. Pisciotta chuan a sawi hreh hle, Abbot-in Police a thi tih a hriat chuan a hum duh lo thei a, mahse an rawn zawn huna a lo inbuatsaih si loh chuan mak tih vangin a phatsan thut thei bawk. Thu dik a hrilh ngei tur a ni. Thil awm dan chu a hrilh zung zung a.

Abbot chuan chutia hremhmuna Plolice, thlarau bo pakhat a liam leh tak avanga lungngaiin a kun ngaih a, Nikhaw hre lova awm reng Guilianno chu zirchian a duh vang a ni pah bawk. A hliam tuamna atang chuan thisen a rawn put chhuak reng a, a rin angin he mi khawngaihthlak tak hi a thi mai thei a, chuti a nih chuan harsatna awm lovin a fel duak a ni mai.

Franciscan Monk a nihna angin, Abbot chuan lainatna a ngah hle. Mahse hetiang thil rapthlakah hi chuan thil nihna dik tak uluk taka a chhut leh ngaihtuah a ngai a ni tih a hria. Naupang chu a huma a lo thih palh hlauh chuan, a hlawk ber tur chu amah tho. Thuneitute chuan ruang an hmuh chuan an lungawi ang a, chhungkaw lam lahin a mahah bat an nei reng tawh ang. Guilianno a lo dam chhuak a nih pawhin, a chunga a lawmna tur chu thildang zawng ai chuan a hlu dawn, hliam na tak tuar chung pawha pistol hmanga police that thei mipa chu leiba tur atan chuan duhthusam a ni.

He sihal pahnihte hi National Police te hnenah a duh chuan a hlan thei ngei mai; a hna a awlsam sawt a ni mai dawn a. Mahse eng nge hlawk pui tur a neih ang? Tuna a chunga an tih bak hi thuneitute chuan an ti chuang lo vang. A thuneihna tura an dahna chin hi chu a tan chuan a tawk thawkhat tawh. Mahse hungchhung pawn lamah chuan thian a mamawh tlat. Heng mite hi pui duh lo ta se loneitute hmelma nihna chiah a hlawh chhuak ang a, chhungkaw pahnihin an haw kumkhua tawh ang.

A puithiam kawrfual hian phuba lakna, lo thleng ngei tur lak atangin a chhan dawn lo tih hre lo khawpa mi a a ni bik lo va, Pisciotta pawh chu, hremhmun lamtluang zawha a kal hma a kal thui duh tak tur a ni tih a hria. Ni lo ve, heng loneitute huat nih hi ngaih zam mai chi a ni lo. Kristian dik tak, Mithianghlim Mari lim tibawrhbang ngai lo tur an ni. mahse phuba lak duhna thisen lum pap tawhah chuan Pope pawh ‘Omerta’ bawhchhiat vangin an kap darh leuh duh ang. Omerta chu hmanlai atanga thuneitute hnena ka ang lo tura intiamkamna a ni. (Omerta tih bu hi Mafia story a awm bawk a, kan dam a nih chuan kan la hma zel ang chu; Politician thu tiam hian han tiam zel phawt ila  - loma). He ram, Isua lim tamtak awmna ramah hian biang lehlama bengtu hnena biang lehlam dawh tur tih thurin hian awmzia a nei lo, ‘ngaihdamna’ tih chu midawihzep ho inphenna mai a ni. Sicilian minaran ho hian khawngaihna awmzia an hre lo.

Thil pakhat chiang takin a hria, Pisciotta hian a phatsan ngai lovang tih hi. Bungraw tawlhruk chungchangah vawikhat chu, Abbot hian Pisciotta man leh thu zawhfiah a nih theih nan ruahmanna a siam a, Palermo Security Police zinga pakhat, Carabiniere zinga mi ni lo chu chumi ti tur chuan a hmang a. Mahse chung sawisakna leh fing khekrek taka an tihna te pawh chuan Pisciotta chu a tibuai eih lo. A ngawi hmak a ni. Zawtfiahtu chuan chhuah tawpin, he mi hi rintlak leh thil pawimawh takah pawh rin theih a nih tur thu Abbot chu a hrilh a ni. Chuta tang chuan Abbot thinlungah chuan Pisciotta chuan hmun pawimawh tak a chang a, a thlarau tan a tawngtai ta fo a ni.

Abbot chuan chang a han tum raih a, puithiam ho chu rang taka lo tlan khawm nghalin, Abbot chuan Monastery hmun pakhat-a Guilianno dah tur chuan a ti a. Chu lai hmun chu ama quarters bik niin, indo lai khan sipai tlan bo te, Loneitu hausa tak tak fapa te a lo thuhrukna thin hmun a ni. Mel nga leka hla khaw pakhat, San Giuseppe Jato-a Doctor ko turin puithiam pakhat chu a tir nghal bawk a.

Pisciotta chu khumah thuin a thianpa kut chu a vuan reng a. Hliam atanga thisen chhuak a awm tawh lo a, Turi Guilianno mit chu a meng a, mahse enmah a hmu lo niin a lang. Pisciotta chu a tap lek lek a, a tawng ngam lo. Turi-a chal thlan hluam chu a chul a.
Darkar khat hnuah doctor chu a lo thleng a, tlang pang vela carabinieri rual a rawn hmuh avangin a thianpa, Abbotin hliam tuar a thukru chu mak a ti lem lo. Chung vel chuan a tibuai lo a, Police leh sorkar chu eng nge ni vak? Abbot chu a Sicilian pui, a thianpa, Artui tam tak chawlhnia rawn thawn thin tu, krismas-a zu barrel rawn thawn a, holy easter-a beram tuai rawn pe thin tu hian a tanpuina a mamawh miau alawm.

Doctor chuan Guilianno chu en velin a hliamte a tifai a, silaimu chuan a dul tawn tlangin taksa peng pawimawh a khawih tel maithei a, a thin a khawih a ni thei bawk. Thisen tamtak a hlohin a vun chu a dang var pap a ni. A ka bul velah thil var kual a hmu a chu chu a thihna tur chhinchhiahna hmasa ber a ni tih a hre hneh hle.

A thaw huai a, Abbot hnenah chuan, “Ka tih theih ang chu ka ti zo e. thi chhuak chu a reh a, mahse thisen hmun thuma thena hmun khat aia tam a hloh a, chu chu thihpui tham a ni. Thuam lum tha ula, bawnghnute tlem pe ang che u. Morphine ka hnutchhiah bawk e.” pawi tih hmel takin Guilianno taksa chak hmel tak chu a en a.

Pisciotta chuan zawi supin.”A nu leh pate eng nge ka hrilh tak ang, beiseina a la awm em?” a ti a.
Doctor chu thaw hakin, “I duh duh I hrilh dawn a nia, mahse a hliam hi thihpui tham a ni a. Pa chak tak a nih avangin ni reilote chu a la dam ang, mahse beisei loh law law a finthlak zawk ang.”

Pisciotta mita beidawnna leh Abbot hmel zang deuh ta huai a hmuh chuan, fiamthu ti tak deuhin, “Hetiang hmun thianghlimah te chuan eng thilmak pawh thleng thei a ni alawm.” A ti a.

Abbot leh doctor chu an chhuak a. Pisciotta chu a thianpa lamah chuan kunin a mitko vela thlan chu a hruk sak a, Guilianno mita nuihzat hmel lek lek lo lang a hmuh chuan mak a ti hle, a mit chu buang thim deuhin, a sir velah chuan a val kual raih a. Pisciotta chu a kun hniam leh zual a, Guilianno chu a phun sep sep a, tawng tumin a bei nasa hle a ni.

“Ka nu chu ka lo haw ngei ang tih I hrilh dawn nia” a ti a, chutah a hnu kum tam tak liam hnu thleng pawha a theihnghilh theih tawh loh tur chu a rawn ti ta a ni. A kut chu rawn phar chhuak thutin Pisciotta samah chuan a tham a; a chak hle mai, mitthi ni mai tur tha a ni thei lo. Pisciotta lu chu pawt hnaiin, “Ka thu zawm rawh.” a ti a.