HIS REVENGE BY MAWITEI BAWITLUNG (Completed)

[mawitei bawihtlung]

HIS REVENGE






CHAPTER 13 (LAST)






“Awi ka tlin tawh thawt lo, i duh leh nangmah kha tlan char char rawh" u Danis-a chu enin ka thaw hlawp hlawpa, kha doctor pa kha ka ngei lek lek mai. Exer lak that angau min lo ti khanglanga, ka ngei lutuk zing ka tho hma si chutah ka la hah hrep zel zuia.







Ka pum puar lah chu dawmin ka thu hnawka “I tha em? Baby i tha em?" ka khaw hmuh te chu zu phe veka mawle, u Danisa chu ka nuih lui hram hrama. “Ka tha lutuk a nia, min ngaihtuah suh ka tha" engmah sawi zawm theilo chuan ka zawi hnawka, ka meng tha thei tawh lo engkim chu a phe ruai mai.






“Ka pu, ka nupui hi hmanhmawhin damdawiin kan pan angai" tiin a au tuar tuara, ka fapa min au ri chu ka hriat hnuhnun ber a ni.






Ka harh leh chuan u Danis-a lo ngawi run leh hmalam melh tlawk tlawk chu ka hmu hmasa bera, ka ko nghal sap chu a rawn hawi rang ngei mai.






“Baby ilo harh tawh maw? Min ti hlauthawng lutuk a lawm, ka tihpalh i taksa zawh loh thlengin exercise ka lo lak pui che a, tun atang chuan ila leh tawh miah lovang" ti nghet charhin ka kut chu a hum nghet salha, ka nuih sen sena, ka chalah chuan a rawn fawp nghal vang vang a.







“Doctor kan chhuak thei tawh angem?" doctor rawn lut chiah chu zawhna a lo pea, doctor pa pawh chuan inthlahrun hmel tak hian kan chhuah theih thu chu a lo sawia, a hmelah chuan hlau hmel ka la hmu leh ta nghal, a ni hi hi doctor pa hi a lo hau hrep nge mawni. Amah hi a nia exer la tha tura min hrilh tu, u Danis-a hian a lo hau a ni hrim hrim.









“Doctor kan lawm e, ka taksa chu engmah that lohna a neilo maw?" tiin ka nuih var vara “Neilo e, i thisen a tlem deuha. Chuvang chuan a hma ai in enkawl that i mamawh a nia, exer erawh kha chu lak chhunzawm kher a ngai tawh lovang, i nau neih a hnai tho bawka. Mahse mut tawp ai chuan vah kual nasat kha a pawimawh tho tho a nia, i nau neih lamah pawh a pui nasa dawn che a" a rawn tileh chu ka pasal chu a lo rum nghuta.







“A thihdan leh ai chuan engmah a ti tawh lovang, khatianga ka nupui kha a awm ka duh reng reng lo. Bill chu ka pe fel tawha kan chhuak thei a nihchuan chhuah nghal ka duh, nangmah avanga ka nupui leh ka fa in an tuar hi ka duh hauhlo" ka lo khap vata.






“Doctor a pawi lo a nia, ka lawm lutuk e ka pasal kha hrethiam hram teh. A hlauthawng lutuk a nih hi, kan haw phawt ange" tiin ka lo sawi khalh zung zunga, doctor pa pawh chu a thaw huai mai. Ka pasal ka mengrum lutuk chu nghawk zauhin ka kuaha “Haw i duh kha haw ang" tiin ka tur nghal zat bawk.








“Mi ka hauh dawn ve hian i lo inrawlh reng mai,phakar lutuk" a tihhluk chuan ka nuih hak haka. “Doctor kan mamawh huna min pui tu an ni tih hre reng rawh, kan nunna chhana min enkawltu pawh an mahni bawk, doctor te hi an ropui a sin.Chutih rual erawhin sum duh lutuk sum hmuh hma chuan midang enkawl duhlo, rethei leh hausa thliar hrang leh thin doctor erawh ka ngaisang chuang lo, mahsela tun erawh an thiam loh a nih loh kha" tiin ka thlem hauh hauha.









Pawn kan thlen rual chuan car lam chu min panpuiin dimdawi tak chuan min dah luta. Seatbelt chu min hren tir thlap bawk, “Ka pasal duhtak hian min lo ngaihtuah em em a ni tih ka hriat hian ka lawm em em a ni" tiin ka nuih var vara, a tawp a tawpah chuan a rawn nui ve ta vur vur mai.








“Phakar nu" tisupin ka hmuiah chuan fawpin a tlanchhuak zuia, “Bawihtea a tha em?" ka tihchuan min rawn melhin “Ngaihtuah suh, a lam reng che a. Mahse kan in hrilhfiah thei hram a nihkha, a pu nen inah an lo nghak reng tawh ang che. Naupangte nisi hian a rilru a lian phian lehnghal" a tihchuan nui hak hakin “A chhunzia che chu i hai lo ang" tiin ka mit ka san zauh va.









“I ti dik ang, ka fa a nia lawm. He lo piang tur nen hian keimah min chhun em em se ka duh, a nu hi min chuhpui lo se a tawk mai, ka chanpual i nih hi, ka ta chauh" tiin a kut lehlam chuan ka dul chu a rawn khawih zauhva.







“Min chhun ve se ka ti a sin, nangma lam hlira an kal chuan a nu hi ka mal dawn riau in ka hria" tiin ka phun chhuak sapa, a khi suk ringawt.






In kan thlen chuan bawihtea chu ka au lang langa. A ni pawh chu a rawn tlan chhuak nghal vata, “Anu" tiin min rawn pawm nghal chata, ka lo kuah let ve vat bawk. “I lo fel em? Apu i ti buai viau lo maw?" tiin a samah chuan ka chul sak heuh heuh a.






“Aih, Kimtea kha ka fel" tiin min pawm nghet sauh sauha, a pa in a sawi tawh bawk nen min ngaihtuah ve hle tih ka hre mai. Ka fapa hi chu ka hmangaih a ni, a nu min ngaihtuah let nachang a hre tlat te hi a kum rual angah chuan amak zawk.







“Lut phawt ang u hmiang, inchhung lamah in la in awm leh ang chu" u Danis-an a tih takah chuan kan inzui lut hlawma, ka pa pawh chuan chanchin min lo zawt vat in ngaihtuahawm ka nih loh thu chuan ka chhanga.






Bawihtea pawhin min hlatsan thei meuh lo, min lo ngai viau pawh a niang, ka bulah a awm reng mai. A tawpah phei chuan ka mal khamin a mu ta nge ngea, a sam buk leh nem thep chu chul sak heuh heuhin ka en renga.








“Ka lo va mut tawh dawn em ni? A ti chau lutuk ang che. Nangpawh mu hahdam la ka duh, kha thil kha thleng nawn turin ka duh hauh lo a nia" ka pasal chuan tiin bawihtea chu ka pa room lamah a pawm lut zuia, ka pa pawh hahchawlh a duh thu sawiin a lehkha chhiarna pindan lamah chuan a lut zuia.







U Danisa rawn let chuan min kai tho in kan nupa roomah chuan min luhpuiin ka dar vel chu min hmehsaka, ka hahdam nghal suai suai hian ka hria “Ka hlauhthawn hmanzia kha, ka chan tawh dawn che emaw ka ti hman hial a sin; mahse Lalpan zah ngaiin ka kiangah ila awm min phalsaka, hei tluka hlimna hi ka nei leh tawh lovang, nang leh kan chhungkua hi ka hmangaih a ni" tiin min kuah vawng vawnga.









“Keini pawhin kan hmangaih che papa" ti sapin ka kuah leta, ni e u Danis-a hi ka fak lo theilo. Kei leh a fa te mai nilo ka pa thleng in zah takin a bia a, engkim thil pawimawh a nih chuan ka pa a rawn lo ngai lo. A nupui pa a nihna ang pawhin a zahin a thu a ngai pawimawh thiama, an in kawmngeih hle bawk, a ni ang hi chu an tam lo viau ang.







Tam tak hi chuan kan nupui chhungte hi biak kan hreha, kan inthlahrung thin. Hmeichhia hi helamah chuan kan lo ropui ka ti thin, midang inah kan hriat chian pawh nilo inah va lawiin kan va khawsa a, kan pasal nu leh pa chu kan nu leh pa ah kan vuan nghal thei maia, an unaute pawh kan unaute angin kan en nghal mai zela, hei hi mipa ten min tluk lohna a niin ka hria.







Chutihrual erawhin thenkhat chu pasal chhungte sual vangte, pasal nu a sual tlat avangte a mo nih hrehawm ti em em te hi an awm ve leh bawka. Nu thenkhat te hi kan mak ka ti thin, kan mo lai leh kan pasal chhungte nena kan awmdan hre rengin kan mo te hi en ila, kan fapa ten an duha an thlan chu lawm taka pawmpuia lo hmangaih pui ve mai tur kan nih laiin nu tam tak hian mo te hi awmpui emaw ti tlat, a nih loh leh fate nupui atana duh loh avanga tih hrehawm hmang hi kan la tam ka ti.










A innei a te rilru hre miah lo in kan fapa te hmangaih tu kan lo tiduh daha, kan mote hi kan fate ang chiahin en thin ila ka ti, mosual kan han ti ringawt thin te hi a diklo, hmeichhe tam tak chuan an pasal nu leh pa hmangaih pui thei turin pasal an neia, mahse nute hi kan pawimawh, mo kan endan hi kan insiamthat fe chu a ngaiin ka hria.







Kan fate hmangaihin nu leh pa thlazar hnuaia nuamsa taka awm thei khan hmangaihna avangin an hriat miah loh leh an la tlangnel lohna hmunah pasal an rawn neia, tha taka lo chhawnchhaiha kan fate hmangaihtu an ni tih hria a lo enkawl tur zawk kan nih laiin sal chhawra lo inchhawr tawk hi kan la awm zeuh thin chu a nih hi.









“I damchhunga i nupui, i fate nu i taksa peng nih reng ka duh" tiin ka kuah nghet sauha, tarkun thlenga a ni nena dam dun hi ka duh a ni.





“Damchhungin ka nupui, ka ta ka hmangaih i ni reng fo vang" mittui hnam parin a awmah chuan ka beia, kha chen ka nghaha huatna hmangaihna a chantir tum khan tunah chuan hlawhtlinna hmel ka hmu ve ta, rin phak bakin ka hlim bawk, tunah chuan huatna chu hmangaihna in ka hneh ta e.











Ka nau vei chu damdawiin khumah chuan ka rum chhuak leh thin. Ana tih hian a sawifiah zo kher angem, bawihtea ka neih khan hre tawh mah ila ngaiah ka neih theih pawh ka ringlo, ka thlan tui te chuan min bual huh hlapa.







Doctor leh nurse nen min vilin min fuih reng bawk, a tawp a tawpah chuan naute mipa tho neiin ka thaw chhuak huaia, ka zawi deuh hnawk mai.








“Baby ka chhuang lutuk che" ka pasal chu ka nuih saka, kan fapa kan sira tui taka mu hil chu enin ka mittui chu a hnam sawka “U Danis nang nen hetiang dinhmun kan thleng thei ang tih hi ka la awih lo fo; mahse, a tak a ni bawk si" tiin ka insutfaiha.







Min kuah chung chuan min hnem mawlh mawlha “Anu" Kimtea rawn lut chu nui var varin ka lo ena, a hnungah a pu chuan rawn zuiin kan fapa chu kan ena, Hmingthanmawia, mite tana in pe leh mitin te fak rawn ni turin rawn thang lian mawlh rawh se. A u leh a pa nen, hmangaih tawp lova ka hmangaih reng tur chu.







EPILOGUE



“Hringnun hi a mak hle mai" tiin ka phun sapa, kan hmaa kan fapa te pahnih rawn phei mek chu enin ka pasal sam tuak ve nual tawh chu enin ka nui haka.







“Putar i ni tawh chung pawh hian i la hmeltha tho" a rum nghuta, ka ban chu a hmer tawk bawk. Putar tih hi chu a duh lo thin teh e .









“Nu, pa kan lo haw e, ka pu leh pi thlanah kal ang u" nui hakin ka fate pahnih chu ka kuaha, ni e ka pa pawhin kum tam tak liam ta khan min boralsan tawha, ka fapate pawh ram dangah kan dah zui a nih kha.






Tunah chuan chhungkua kan kim lehta, an pi leh pute an awm tawh lo tih mai loh chu. “Nu, pa tunah chuan in fanu hian fapa tlangval ka nei ve tawh a sin" van lam en chuan ka phun sap sapa, nakinah chuan keini ngei pawh hi kan la thi ve ngei anga, ni e Lalpa remruat dan a ani miau si a, khawvel dangah tuna ka chhungkua nen ka nu leh pa te nen ngei khan hlim takin awm leh thei ang i maw.






"Kal ang hmiang ka nupui duhtak" ka pasal englai maha min kalsan ngailo tu chu enin ka nui saka, a ni hi awm lo se ka mal tur zia ka hailo; mahsela ka tan englai pawha awm thin Danis Zoliansanga vang hian engkim ka nei si a ni. Hlim tak chuan inchhung lam pan chuan kan inzui luta.




A TAWP TA, KA NEXT STORY OUR FAULT MIN LO CHHIARSAK LEH VEK DAWN NIA AW.