My Arrogant Husband BY Becca Lnz (Completed)

[Rebec Nunziri]

Chapter-13



Stacy Ramthansangi POV



Karkhat lai a liam leh tawh, Mza sawi ang tak takin khami zan aṭang khan kan room hi ka la chhuahsan leh lo, chaw min rawn pe ziah a, chak lo sa teh mah ila ka fa tan ka ei lui hram hram ṭhin, tun aṭanga thla reilote ral hnu ah hian ka pum a rawn puar lian ve anga, Mza bulah engmah sawi lo pawh ni ila a la hre vat dawn bawk, chumi ka ngaihtuah chhuah chang chuan engtinge ka tih ang ka hrelo, mahse thil pakhat hriat chian tak ka neih erawh Mza hian a fa a nih a ring dawn lo tih hi a ni.




Zanah te chuan keimah in ka awm tawp a, Mza chu inah a riak ngailo tih room aṭang in chhuak lo mahila ka hre tho, khawiah nge a riah chhuah ṭhin hrelo mah ila rindan pakhat chiah ka nei, ka ring sual lo ngei bawk ang, zantin Mary nen hun an hmang dun anih ka ring nghet hmiah, a chhan pawh a fa pai turin hmeichhe dang a duh thu a sawi a nih kha, engmah sawi buai ka tum tawh lo, a duh ang chuan ni rawh se, ka thusawi pakhat te mah min ngaihthlak sak duh lo a, engmah sawi luih bik ka tum lo.




Thudik hi thup reng theih a ni dawn lo, thudik rawn lan chhuah hunah chuan in chhir in ka hnenah ngaihdam a rawn dil leh ngei dawn tih pawh ka hria, hma hun tur ka hrelo, mahse tun a tan chuan ka ngaidam thei rih lo tih erawh ka chiang viau, ka lo tawrh na te hi a nasa lutuk, ka hmangaih em avang erawh in ka haw reng thei dawn lo tih ka chiang viau bawk, engtik ah emaw chuan thudik hi a rawn la lang chhuak ang, dawt hi a tlo thei tak tak lo.




Chutia ka lo in ngaihtuah ngawt ngawt lai chuan room kawngka a rawn in hawng a, Mza ka hmu nghal zat bawk, "Rawn chhuak rawh" ti nghut in min en ngur a, chet pawh ka che sawn eih lo, "Ka sawi chu i hria em, rawn chhuak rawh" a ti leh hmuk a, "Mz, keimah in min awm tir mai mai rawh, ka chau lutuk" ka ti sep a, ka aw pawh chu a ringlo hle, zing aṭang khan ka luak a chhuak reng a, ka pum ruak a in let but but bawk nen ka zawi ngiai mai, Mza lah chuan min en chungin a nui suk a.




"Chauh chhan tur i nei em ni chhuanlam awih awm loh zet siam kha bansan la rawn chhuk rawh, Mary a rawn kal a, a ril a ṭam, eitur rawn siam sak rawh" a tih leh chuan ka sa zak a, "A ni eitur siam kha ka bat a ni hrep lo, a duh chuan amah in in siam mai rawh se, kut ke kim a neih ve kha" ka ti hmak a, ka sawi zawh rual rual chuan Mza chuan min rawn pan ding ngur a, "Tunah khan engmaw i sawi a, min hnial hlek suh, ka sawi ang chuan ti rawh, chuti a nih loh chuan hei aia hreawm hian i awm ang" ka biang a rawn sawk tawk chung chuan a ti chhur chhur a.




"A tan khuan eitur ka siam lovang" luhlul zeta ka tih leh rual chuan ka biang a ri sawk a, ka beng a kiu nghal vawng vawng thei, Mza lam chu muangchangin ka hawi a, in thiamlo hmel pu deuhin ka hria, kei hi ka a tawh a nih hi, hepa hian kut min thlak avangin in thiam lohna a nei hrep lo va nge, a ni te chuan na taka ka awm lai hmel hmuh a chak vangin pawn lam ah pawh chhuak thei lovin a mi tang ang maiin min khung bet zawk chu a nih hi.




"Min hnial suh ka tih kha, Mary tan eitur chu zuk siam vat rawh" a tih leh hluk chuan ka la che sawn eih lo, a tawp ah chuan luhlul min tih hmel fe in min en a, "Ka thu hnial a pawi zia hi ka la hmuh tir ang che" ti chhuak hluk in pawn lamah chuan a chhuak leh ta daih a, ka biang chu ka dawm vat, a na lutuk ringawt, Mza awm lai khan ka na tih hmuh tir ka duh loh vangin ka tuar hram hram a nih Kha, mahse ka mittui tling kha chu a hmuh hmaih hauh lo thung ang.




"Bawihte, lo tuar hram hram rawh aw, rei a ni tawh hauh lo ang, helai hmun aṭang hian kan chhuak thuai ang, ka tiam a che" ti sep in ka pum chu ka dawm a, darkar hnih zet a liam leh hnu chuan Mza chu a rawn lut leh a, a hmel chu a lang chang run bawk, "Ka thusawi i hnial ngam a, enge i chunga ka tih tur hi lo en rawh" ti nghut in a kawr chu a phelh nghal mawp mawp a, khum lu lamah chuan rang zetin ka lo tawlh chho nghal rawk rawk thung.




Ka awmdan a hmuh chuan rapawm zetin min nuih khum duh a nih chu, ka tha te chu a khur nghal dar dar thei, ka ke rek ah vuan rawn man in khum mawng lamah chuan min pawt thla hrawk a, ka lo tal ve nghal buan buan bawk, "Awm tha rawh, min sual let chuan i na mai mai zawk ang" a ti vin ṭhawt a, "Awm sawn rawh, ka ten lutuk che" ka tih chuan a hma ai mahin a hmel chu a lang rapawm zual, "Tunge tenawm zawk chu kan hriat kha" ti leh in ka kawr chu a phelh nghal mawp mawp a.




Ka kekawr a phelh leh a, ka la tal ngat ngat tho, thawk leh khat ah ka luak chu rawn chhuak in ka ka ka hup chawt a, ka awmdan mak tih hmel zet chuan min en a, a awm ah chuan ka nam rawk rawk a, a ni pawh chu a lo awm sawn ve mai, hmanhmawh zetin bathroom ah lut in ka uak nghal tuar tuar a, tlai lama ka thil ei zawng zawng chu ka luak chhuak vek, ka tha te chu a khur dar dar a, ka uak nasa bawk nen ka mittui pawh chu a tling pam bawk.



Mza chu bathroom - ah a rawn lut ve a, chau zet a bathroom chhuat lai a ka ṭhu min hmuh chuan min rawn pan hnai vat a, ka biang rawn tawh a tum chuan ka tha neih zawng zawng in a kut chu ka nem per nawlh a, a thaw chhuak nghal hawk bawk, "Min khawih suh, ka haw lutuk che" ka ti tuarh a, ka kawr awm te chu a huh dup mai, ka awmdan mak tih hmel zet chuan min en a, huat na mitmeng in ka en leh ve ram bawk.




Chhuat aṭang chuan muangchangin ka tho chhuak a, "Min khawih suh" min rawn khawih tura a chet vut rual chuan ka ti leh that a, a ni pawh chu a tawp ve chawt mai, bang rin chhan chung chuan ka chhuak a, khum ah chuan ka thu zawi nghal hnawk bawk, "I enge na?" ka hmaa rawn ding chungin a ti a, he mihring hi hmuh pawh ka hmu peih lo ve, "Min kalsan rawh, ka hmuh phak ah awm suh, i hmel ka hmuh hian ka na" a rum nghut a.




"Chhuak vat rawh, ka haw lutuk che" ka ti leh tuar a, kawchhung tawt hmel zeta thaw chhuak hawk in room aṭang chuan a chhuak nghal nal nal a, ka la ṭhu reng thung, mahse ka tum a chhe ta vek bawk sia, in bual ngei ngei ka ngai, phur lo zetin ka tho chhuak a, bathroom ah chuan ka lut lehnghal, ka in bual zung zung a, bathrobe ha in ka chhuak leh a, thawmhnaw in bel zung zung in khum lam ka pan leh nghal.




Zanlai a ni a, ka ril chu ṭam tak a ni, ka pum a ri kawrh kawrh a, zan tir lam khan ka thil ei tawh sa te ka lo luak chhuak vek tawh bawk nen ka pum ruak lutuk chu ka tha a khur der der a, kawngka lam chu muangchangin ka pan a, kawngka chu a in kalh ring tho mahila hawn tumin ka herh chhin a, ka hawng thei hlauh, Mza chhuak tur khan a kalh theihnghilh te pawh a ni mahna, a ṭha daih zawk, in hnuai lam ah chuan ka chhuk a.




Choka ah lut in eitur ka hmuh ang ang chu la chhuak in ka ei nghal, deep freezer ka hawng a, ice cream ka hmuh chuan ka la chhuak vat, ka ei chak zia ka hre zawm zat bawk, fian la in ka ei nghal mawlh mawlh a, a tui takzet, choka pawn lamah thil ri deuh rak rak ka hriat avang chuan ka thil ei lai ka chawl dat a, ka ngaithla chiang a, mihring ke pen thawm te ka hria in ka hria, choka aṭang chuan muangchangin thawm dim zet siin ka chhuak a, chuta ka thil hmuh chuan min ti na zual.




Mary leh Mza te chu an lo in kiss ngawng ngawng a nih chu, Mza chuan Mary chu bangah nawr bet in duhthawh zet in a fawp a, ka che sawn theilo, chutia ka en reng lai chuan Mary chu rawn meng in min rawn hmu zawm zat a, zah chu sawi loh ka pasal ngei tukhum ah dawm chung chuan a hma ai a duhthawh in a fawp a, ka biang ah mittui a luang thla nghal pap bawk, ka fian ken lai chu ka thlauh bawl a, Mza chu tawp chawt in ka lam a rawn hawi nghal.



A mitmeng chu a buai ve nak a, hmanhmawh zetin in chung lamah chuan ka tlan chho nghal hlawk hlawk a, Mza chuan min rawn um zui tih hriat zetin ka hnung lawk ah chuan pen thawm a rawn awm a, ka tlan chak zual sawt, ka haw lutuk, tinge kan inah kher hetiang thil min hmuh tir, a ni hi mihring pawh a nilo, ramhuai a nih hi, ramhuai dik tak, Room chhung ah chuan ka lut a, kawngka ka kalh leh tur chu Mza chuan min rawn dang hman.




Hnehsawh zetin kawngka chu a rawn hawng a, "Chhuak rawh" ka lo ti nghal tuar thung, "Bawihi" tih paha min rawn ban a tum chu ka lo awm sawn dawrh a, "Engatinge hetiang kher kher hian i chet, min tih nat hi i la duhtawk lo em ni?" ka ti leh tuar a, "Ka thusawi hi ngaithla rawh" a tih leh te chuan lu ka thing nawk nawk a, "Engmah ngaihthlak tur ka neilo, ka hmuh phak lo ah awm rawh, ka ten lutuk che" ka ti leh tuar a.




"Ka thusawi chu ngaithla phawt rawh" a tih leh lai chuan ka lo nui chhuak hak a, ka nuih chhan pawh ka hrelo, ka rilru nat lutuk avangin ka nui a ni ber, "Engmah ka ngaithla duh lo, i hria em, min ngaithla tura ka ngen ṭawk ṭawk lai che khan min hawi san in hreawm tin reng min tuar tir a, i mi tang ang maiin room chhungah min khung bet bawk a, kha thil kha chu ka la tuar thei, mahse ka mit hmuh ah ngei min zah pah na nei lek lo va i hmei nu nen in awm dun hi chu ka tuar thei biklo, mihring ve tho ka nih hi" ka ti leh tuar a.




"Tun aṭang chuan ka nun ah in rawlh tawh lo la i nun ah pawh ka in rawlh tawh hek lovang, midang kawp san ah che min ngai tiraw, tunah chuan kan in ang tawk chiah e, nang hian i duh duh dan a min tih theih na dan i nei tawh lo, chuan he room ah pawh hian min khung bet thei tawh lo bawk ang, engpawh ti rawh ka hlau lo, thudik a lang chhuak mai ang tiin ka dawh hram hram a, mahse ka dawh reng na chhan tur ka hre tawh hrep lo ve" ka ti ta phiar phiar a.




"I duh ang chuan i awm hlek lo ang" a rawn tih chhuah ṭhawt chuan ka lo nui leh hak a, ngeiawm lam a pawl mah zawk ang chu, "Kan en chhin dawn em ni?" cho tak chuan ka ti chhuak leh fak a, ka awmdan chu min en ngur a, kei pawh chuan ka melh let ve kal bawk, ka mize diktak ka lan chhuah tir ve a hun tawh a ni, chuti a nih loh chuan heng mihring tenawm tak tak te hian an thu hnuai a min dah reng an tum dawn tih ka hre chiang.




Engtinge an awm zui tak zel pawh ka hre tawh lo ve, Mza kha room aṭang in ka nawr chhuak a, a in thiam lo ve deuh nge ni lemchan na zawk, a ṭang eih lo a nih Kha, zing khua lo var rawh se, Stacy Ramthansangi dik tak chu ka hmuh tir chiang khawp ang, Lalmuanzoa ka hmangaih na in ka mit a ti del a, hmeichhe dang min kawp san tih hre chung khan ka la tuar hram hram a nih Kha, mahse ka mit hmuh ah ngei a hmei nu nen a an awm dun kha chu ka tuar thei bik lo.




A tuk lamah chuan inchei sa in room aṭang chuan ka chhuak a, inhnuai ah ka chhuk a, choka ka luh chuan tunge tih pawh ka hriat loh hmeichhia kei ai a upa deuh tur hi a lo che mawlh mawlh a, awmpui a lo la thar leh tawh pawh a ni mahna, min hmuh chuan a phu deuh zawk a, "I lo tho chhuak tawh a ni maw, kei hi in awmpui thar tur ka ni a, Ka hming chu Teremi" a lo ti vat a, "Stacy Ramthansangi ka ni e" ka lo ti ṭha ve mai, chaw ei a peih vek tawh avangin dawhkan chu ka kil zui a.




Ka ei nghal mawlh mawlh bawk, Mza chu choka ah a rawn lut ve a, ka in thuam na a en chuan a rum nghut a, engah mah ngailo
in ka thil ei lai chu ka ei chhunzawm mawp mawp a, ka sir a rawn ṭhut thlak pah chuan "Khawi a kal nge i tum?" a ti nghut a, ka chhang lo, tui ka in leh a, "Ka sawi chu, khawiah nge i kal dawn?" a tih leh hmuk chuan "Ka kal na tur hrilh thlap thlap tur che in ka tan enge i nih?" ka ti fak a, ka chip hmuk chungin min en a, Teremi chu nuam lo tih hmel zetin a lo awm ve reng bawk.




"Lo va chhuak rawh" Mza chuan Teremi melh pah chuan a ti a, Teremi pawh chu hmanhmawh zetin a chhuak nghal, "Awmpui te hriat ah khatiang ṭawngkam kha hmang tawh suh ang che" Teremi chhuah fel rual chuan lungawi loh hmel zetin a ti a, ka nui sak ringawt, ka thil eitur ka ei zo tawh bawk a, ka tho chhuak nghal zat, "Khawiah nge i kal dawn tih min hrilh rawh, i sawi duh lo a nih chuan i chhuak hlek lovang" a va han zak lo mai mai tak.



"Ka sawi tawh kha i hriat a ngailo" ti leh in tui deh na ah chuan ka thleng chu ka dah a, choka aṭang chuan ka chhuak nghal zat, ka hmelhriat taxi driver ka be lawk tawh a, pawn lamah min nghak reng tawh bawk, "Pawn ah chuan ka chhuk a, gate aṭanga ka chhuak leh tur chiah chu ka hnunglam aṭang chuan Mza aw ka hre zawm zat, "Stacy ding rawh ka tih chu, i kal lui a nih chuan enge i chunga ka tih tur ka sawi lawk theilo" a rawn ti leh nghut a.




Hawi let in ka nuih sawng a, a haw mai mai ang chu, "I duh duh chu i ti dawn nia, mahse, a hma ang mai mai kha chuan ka dawh ring tawh suh" tiin taxi ah chuan ka ṭhu lut nghal zat a, ka kal duh na te chu ka sawi a, a ni hi a hma daih tawh aṭanga ka hmelhriat a ni a, a fel viau bawk, "I pasal nen khan in ti thiamlo deuh a ang khawp mai" a ti sup a, ka lo nui tawi tak ringawt, "In la naupang a, zinkawng zawh tur tam tak in la nei a, in hauh chang te pawh a awm tur a ni, mahse chu chu puitlin zir nan hman tur" a ti leh dap dap a.




Damdawiin zawnah chuan motor a ti ding a, Mza thawh na damdawiin a ni lo thung, chuan man te ka pe a, lawmthu sawi in ka chhuak nghal, doctor hnenah appointment ka siam fel vek tawh bawk a, nghah rei a ngai hran lo, Ultrasound te kan ti a, ka naute chu thla hnih a upa a lo ni ve tawh a, ka hlim tak zet, "Thil i ei ṭhat a ngaih mai bak ah rilru hah in awm loh hram tum la aw, nau pai lai i ni bawk nen in enkawl uluk i ngai viau a ni, damdawi ka chawh che hi ei hun ka ziah ah hian ei bawk la" Doctor thusawi chu uluk zetin ka lo ngaithla a.




Damdawiin aṭanga ka chhuah leh chuan a la hma bawk a, In ah ka la haw peih loh avang chuan ka Pa inah ka kal leh a, ka tlawh loh na a rei tawh bawk nen min lo ngai viau mai, kan upa inkar engmah a hrelo a, a mah a dam tha lo bawk nen kan nupa buaina ka hrilh a nih chuan min ngaituah lutuk vangin a hrisel na in a tawrh phah ka hlauh avangin engmah ka hrilh duh lo, nau ka pai tih tak ngial pawh ka sawi lang duh rih lo, kan buai na te hi han reh deuh se ka la hrilh ang.



Tlai lamah chauh chuan ka haw ta a, ka phur lo hle, ka Pa in ah khan awm tlang daih mai ka duh rum rum hial, inchhung ah ka lut a, Teremi chuan chhuat a lo nawt a, "I lo haw tawh maw, U Mza'n a ngaihtuah lutuk che a, room ah a nghak reng che" a tih chuan a hmuh loh turin ka ner nawk a, a ni khan min ngaituah lo vang, Mipa dang ka awmpui em tih a ngaituah vang bak a ni lo ange, inchung lamah chuan ka chho a, room a ka luh hma chuan thawk ka la leh vang vang phawt a.




Room chhungah chuan ka lut a, Mza Couch a lo ṭhu chu ka hmu nghal zat bawk, "Khawiah teh hrep nge nileng hun i hman?" thinrim tih hriat zet in a ti khauh far a, "Ka duh duh na ah hun chu ka hmang ang, ka sawi kha, ka nun ah hian rawn in rawlh phet tum suh, i nun ah chauh khan buai rawh" ka ti chhuak nghat a, "Ramthansang ka nupui i ni tih hre rawh, i kal na tur min hrilh chu i tih tur a ni" a tih leh chuan a lam chu ka hawi a.




"Ka hrilh na chhan tur che ka hrelo e, nangpawh i kal na tur ka zawt ngai che em, i nun a ka buai loh ang bawk hian ka nun ah buai suh" ka ti let hmak a, a rum nghut mai, "Engvanga hetiang a awm hi nge i nih hrep?" a ti ṭhawt a, hlauhna pakhat te mah ka nei lo ve, "Engvanga hetianga awm hrep hi nge ka nih i hria ang chu, ka mize dik tak ko chhuak tu chu nang hi i ni" ka ti fak a, ka melh kal bawk, "I duh ang chuan i awm tawp lovang" a ti nghet leh charh a, "Kan hria ang chu" ka lo ti ve hmak.




Mza nen chuan in khat a cheng e ti lo chuan kan in be ngailo, min be lo a keipawn ka be biklo, Teremi chuan ka kal na apiang ah min zui a, Mza hian min enthla tûrin a ti tih ka hria a, ka nel lo hle bawk, Opi ka ngai ṭhin tak zet, a bulah kha chuan ka rilru hah na te zep awm lovin ka sawi thei a, tunah chuan in sawi thawl na tur ka nei tawh si lo, a ni pawh hna dang a hmu tawh tih ka hria, kan in be zeuh zeuh reng a, a hna ah a buai ṭhin em avangin duh angin kan in be zing theilo.



Ka in check up - ni a nih avangin inhnuai lamah in siam sa at in ka chhuk a, "Stacy khawiah nge i kal dawn?" Teremi chuan min hmuh rual rual in a lo ti a, "Chhuah na tur ka nei" tih ringawt in ka chhang, khawiah pawh kal dawn ila min zawt peih em em te hi ka ning, dawhtheih loh chin ka la nei dawn tih pawh ka hria, "U Mza'n chhuak lo tur in a tih che kha" a tih leh chuan nin hmel zetin ka en a, "A ni thusawi mai mai engah mah ka ngailo" ti hmak in in aṭang chuan ka chhuak nghal.



Teremi khan Mza hnenah a sawi leh nghal dawn tih ka hria, mahse pawi ka ti lo nasa, a duh leh lo thinrim mai mai rawh se, damdawiin lam pan a kan tlan lai chuan Mza call ka dawng a, ka sawi reng kha, Teremi chuan a lo hrilh hman a ni ngei ang, chhan loh ka tum zet nang in enge a rawn sawi tur chu hre ve hrim hrim ang ti rilru in ka la ta zawk a, "Chhuak lo tur che in ka hrilh chiang viau che" ka rin ang chiah, ka nui hak a, "Chu.. i mi rawih nu chuan a lo hrilh leh hman tawh che a ni maw?" ka aw chhuak chu a ngeiawm tih piah lam a ni.


"Ngawi hmak rawh, tunah khawiah nge i awm?" a tih leh chuan ka nui hak a, "I hriat ṭul lo thil hi min zawt fo suh, thil pawimawh tihtur ka nei" ti hmak in a rawn ṭawng leh hma hma chuan phone chu ka dah ta daih a, damdawiin kan thleng zawm nghal mai bawk, chuan man te ka pek hnu ah taxi aṭang chuan ka chhuak a, damdawi in kawt ah chuan ka ding vang vang phawt a, mi hmuh tur an tam hle.




Doctor room ah chuan ka lut a, ka naute a hrisel thu min hrilh chuan ka lawm takzet tunlai thil ka ei ṭha bawk nen keima tawk ah ka thau ve kung mai, Doctor room aṭanga ka chhuah dawn chuan doctor pawh chu a rawn chhuak zawm ve a, a ṭhian doctor ve tho a lokal dawn ani awm a, kal dun chung chuan kan in be zawm reng a, keimah leh ka naute tana chaw ṭha tur ang te chu min hrilh mawlh mawlh bawk, kei pawh chuan uluk takin ka lo ngaithla ran bawk a, ka naute ṭhat na tur a nih chuan eng pawh ka ei mai ang.



"Nangmah chiah hian i rawn kal ṭhin a, tunge i pasal i rawn hruai tel ngai lova?" Doctor in a tih chuan "Hnaah a buai ṭhin bawk nen min rawn kalpui hman ngailo a nih hi" ka lo ti vat a, dawt ka sawi tih a hriat loh hram ka beisei, "Awle, mihring hi kan buai tawh em a, mahse i pasal pawh chu hauh a ngai a nih chu, nakin ah rawn la hruai la keiman ka lo hau dawn nia, nupui rai lai te chu mahni a in check up turin a kal tir tur a ni hleinem, tawh sual tawh te a hlauhawm mai bakah in fa hmasa ber tur a ni a, buai mahse in in hun a in siam tur a ni" a ti dam leh dap a.



Damdawiin kawt ah chuan kan ding dun a, "Ka ṭhiana pawh chu a va rei ve mawle, ka lo thleng dawn a tihna a rei tawh nen" tiin a phun sup a, min bia ang pawn a awm lo, amah leh amah a in bia a ang zawk mah, "Engpawh nise, ka thusawi te kha zawm hram tum la aw, i vannei a rai no huat i nei vak lo bawk a, chaw te kha han ei thur thur la" tiin a sana chu a bik leh zeuh a, "A rei hle mai, Mizoram hi kum 3 hnuah ka rawn rap leh chauh a ni a, ka ṭhianpa in min rawn tlawh a tum a" a ti leh a, doctor ṭawng duh tak chu a ni ve chiang alawm, Mza nen chuan in ang lo tak an ni.



"A nih chuan ka kal phawt mai ang, ka lawm lutuk e" ka ti sep a, kalsawn tum a ka in her chiah tih chuan Mza ka hmu nghal zat, mak ti zetin ka en a, enge hetah te rawn tih a tum ni, "Ṭhiana i rawn thleng thei hram maw?" ka doctor hmuh ṭhin Ramtea chuan a ti ta mai, a ṭhian ti a a sawi chu Mza hi maw lo ni a?.. "In hmuh loh na rei tawh hle mahse i la in thlak danglam miah lo a nih hi" tiin Doctor Ramtea chu a nui hawk hawk a, Mza erawh in min la en reng thung.



Ka thin a phu dup dup a, Doctor Ramtea hian nau ka pai thu a sawi mai ang tih ka hlau takzet, "Hetah enge i tih?" ti sup in a ṭhianpa biak na pawh ngaihsak lo chuan min en reng a, han chhan mai dan tur pawh ka hrelo, "In in hria amaw?" Doctor Ramtea chuan a rawn ti vat a, "Ka nupui a nih hi" hlauthawng tawh tak ka ni, Doctor Ramtea ka va en chuan mak tih hmel zetin Mza nen chuan min rawn en dun a, a ṭhianpa nupui ka ni tih a hriat chuan a ṭhawng viau a ni ngei ang.



"A nih chu mawle, engmah ka lo hrelo a" Doctor Ramtea pawh chuan a ti ṭha ve mai a, "Engtinge ka nupui nen hian in in hriat zawk?" tih pahin Mza chuan Doctor Ramtea chu a melh nghal run a, chil lem khawlh in Doctor chu ka en a, "Rawn in check up turin a rawn kal ṭhin alawm, a mak hle mai, Stacy hian i nupui a nih thu a sawi lo va, mahse a awm ve tho mai, ṭhian kan ni tih a hre lo miau a, nang hi hauh deuh i ngai a nih hi" Doctor Ramtea chuan a ti a.



Nilo sawi suh ka rilru chuan ka lo ti ngat ngat a, "Buai viau mah la i nupui rawn in check up ni ah em te chuan rawn kal pui ve ṭhin ta che, amah chiah in a rawn kal ṭhin a, mak ka lo ti ṭhin a sin" A ṭhianpa chu a hau a, "Eng chungchang nge maw i sawi le?" Mza chuan a lo ti hluk thung, "I nupui rai lai hi amah chiah a in check up tura i rawn kal tir ṭhin avangin ka hau che a nih chu, i ti mak emai, i nupui i ngaihtuah lo lutuk hi ka lawm miah lo ania" Doctor Ramtea chuan a ṭhianpa dem hmel zet chuan a ti chhuak leh a.


Mit ka chhing nghal sawk, ka men chhuah leh rual chuan Mza mak ti hmel ka hmu nghal zat bawk, "Nidang ah chuan rawn kal pui ṭhin tawh la a tha ang, buai hle mah la i nupui leh i fa hmasa ber rawn piang tur tan hian hun i in siam ve a ngai a nia" Doctor Ramtea chuan kan nupa inkar buaina hre miah lo chuan a ti leh mawlh mawlh a, "Engpawh nise, rawn lut u la, Stacy nangpawh in pa rual hian i haw thei tho bawk a, in hriat chian na hun te kan nei ve ang chu" a tih leh chuan chhuan lam ka lo siam vat.




"Ka pa in lamah kal kawi leh ka duh bawk sia, in pahnih in lo in kawm dun zawk mai ta che u, nidang ah kan la in kawm dun zawk dawn nia" ka lo ti nghal sawk sawk a, "Awle, i tih tlat si chuan le, ka sawi kha hre reng la aw" a tih leh chuan ka bu nghat nghat a, helai hmun aṭang hian ka kalsawn vat a ngai a ni, ka pen sawn hma chuan Mza chu ka en leh hram a, hriatthiam harsa zetin min lo en ve reng bawk, en rei duh lo in ka kalsawn nghal daih.




Taxi ka chan lai chuan ka kut a rawn vuan tu an awm a, ka phu zawk mai, ka sir lam ka en chuan Mza ka hmu nghal zat, min rawn zui tih reng reng ka hre miah lo, "Min rawn zui rawh" tih pahin damdawiin parking lot lamah chuan min kai nghal thlah teh" tih leh a kut chu thin thlak tum in ka thing vak a, min vawn ngheh em avang chuan ka thing thla lo chiang a sin, a motor chu hawng rawp in min ṭhut luh tir nghal zat bawk.




"Enge maw i tih hi le?" ka kut a vawn na a thlah rual rual chuan ka ban rek chu ka dawm a, a chelh nghet em avangin a mu chum chum mai, "Ngawi rengin ṭhu rawh, thu sawi dun tur kan ngah viau" ti hmuk in kawngkhar chu a rawn khar nghal dawp a, seat nghen chhan ah chuan ka tukhum ka nawr vak mai, a rawn ṭhut luh ve rual rual chuan motor chu a che awk thei, a lian bawk em a ni, motor chu ti nung in a tlan chhuak nghal zat bawk.



Kan in lamah chuan a tlan a, a ti mah mah tih ka tum lo, boruak chu a uap churh a, damdawiin aṭanga kan in hi a hlat loh nen tunah tak hi chuan a hla bik ngawih ngawih in ka hria, Mza chu a thaw chhuak leh hawlh thin a, ka en ru leh zeuh zeuh zel, enge a ngaihtuah tur awm ang ka hre hauh lo bawk, a naupai lai hi a fa anih a ring ange'm tih te chu ka ngaihtuah a, a fa anih pawh a ring lo ang, ni e, a ni te chuan naupai loh na damdawi ei angah min ngai tlat alawm.




Kan compound chhungah chuan a tlan lut a, a din fel rual rual chuan kawngkhar hawng in ka chhuak nghal, inchhung ah ka lut a, Teremi'n min lo biak na chu hrelo der hmak in in chung lamah ka chho a, he hmeichhia hi ka ngaina teh hrep lo ve, room a ka luh rual rual chuan Mza pawh a rawn lut zui a, "Enge thil awmzia min hrilh rawh, nang hi i rai a maw?" a ti chhuak hrawk a, "I hriat ang kha a nimai, doctor in a sawi kha" awlsam zet chuan ka ti a.




"Tu fa nge?" ka sawi reng kha, a fa nih a ring lo ang ka tih kha, "Tu fa pawh nise i lo buai na tur a awm lo" ka ti leh hmak, "Ramthansang, min chhang ṭha rawh, i bialpa fa kha em ni, nge ni a mipa dang fa zawk?, ka fa ani lo tih ka hria, ka fa pai i hlauh em avangin damdawi i ei hial a ni a, ka fa a nih thu sawi tum hauh suh ang che" min ten hmel zet a atih chuan "A dik, i fa ani lo a, ani ngai hek lo ang, keima fa chauh a ni anga, a ni reng bawk ang, a rawn pian chhuah hunah pawh i fa angin sawi ngai suh ang che, nang hian Pa nihna dinhmun chelh i phu lo" ti chhuak ṭhat in bathroom ah chuan in hnial chhunzawm ka peih loh avangin ka lut ta daih a.

Cont...


Click leh comment kha aw..