LET's LOVE AGAIN BY Ziki_nu (Completed)

[ngaia]

By Ziki nu



Chapter-13



Ka nu khawsik a reh hleithei lo bawk nen school ah pawh rilru nuamin ka kal thei meuhlo a, U Mazari lo awm hlauh lo se la chuan ka kal theilo hial zawk mai thei. A ni zarah ka la kal ve hram hram a ni mai a, khawsik hluah han tih tur phei chu ni lem lo mah se awm nawm lohna tur tawka a sik reng avangin thil dangah pawh ka chhuahsan ngailo a, kan inawm chawt a ni ber mai.


Kartawpah ka nu rawn kan pahin Riny a rawn leng kawi a, chaw te ei ve nghalin kan ri hlut a, a thawm a na bawk nen a awm tawh na hi chu kan ri le lu zel mai a ni.





"Ti daih ila inkhelhthiam kha, Nunpuia tiraw khah?" pindana ka nu luh ruala a tih chuan lo bu nghatin "Tinge?" ka ti let vat a, "In inbe leh ta miahlo em ni? Aruata hian a sawi ve leh zuk thin a, a ngei hmel nasa mai che bawk sia" nui chung hian a ti a, keipawh ka nui tho.


Lungawi vaklo chunga a haw zan atang khan kan a inbe leh ta miah lo va, hmuh pawh kan inhmu leh tawh lo. Thian anga awm ka duh laia a duh ve miau loh chuan tih theih ka nei bik chuanglo a, min biak duhloh chuan ka tan han tih vak theih a awm lo.
U Aldrina nen erawh kan inhmu leh zauh thin a, a nau nena kan chungchang chu a hre ve em ka hre lo na in, min be chhe ngai lem lo a, a unaupa ka hlawl tih pawh hria se U Aldrina min be chhe kher chuangin ka ringlo, chutiang mi chu a ni ve tlat lo a.



"A chhe lo chu ka ti ve reng maw le.. Nangpawh hian han duh ve mai mai la tha tur ania, i single rei ve tawh tho sia" ka thiannu in a tih leh chuan ner nang chungin "A ni chu ka soulmate a nilo alawm" ka lo ti a, kei ai mahin a lo ner nasa zawk.



"Kum 4 hnuah changtupa a rawn let a, kan tuar zolo dawn tak tak a ni maw" tiin a thutna atang chuan a ding hluai a, "A tlai tak tak hma in ka va haw teh ang" a ti zui a, thlah ka tum chuan min hnialin "Taxi ka la mai ang, ka thianpa in a khalh ve alawm" a ti tlat a, a tih tawhloh lamah hi chuan a tihluih theih thin loh.



Kawngpui thleng ka thlah hnua ka let leh chuan ka nu pawh a lo muhil leh der tawh a, a pang ka dehsak te chuan a la lum vang vang a, a hmel dawldang lutuk leh a hmai vun zûr ve tawh tak te chu ka en vang vang a, hnuk a ti ulh lek lek thin.



Ka u te nena kan inbiak chuan kar thar lama in check up leh hnuah a result azira rorel that leh a ngaih tur thu an sawi a, ka pa a awm tawhloh avangin U Mama chu chhungkaw pa ber a ni mai tawh a, a thu hi ngaihchan thiam a ngai ve riau thin.




Rintea nen kan inbe ve leh zauh thin a, mahse ka nu vangin han chhuahvahna hun ka nei thei rihlo bawk nen, amah Mizoram lama awm reng a tum ve tawh tho avangin chhuahdun chu kan hmanhmawh lem lo a, "I nu dam hun hunah kan kal dawn nia, hmanhmawh a ngailo" a ti mai zel a, mahse kan inbiak apiangin a sawi chhuak ziah tho a, ka zawh lahin min chhang tha duh ngai chuang bawk silo, min ti hre chak ve thin viau a ni.




Rinfeli hnen atangin message emaw call ka dawng leh ta miahlo a, a status erawh a hman chhan hre chiah lo mah ila ka inngaihbel lek lek thin chu a ni e... Kan tleirawl chhuah tirh khan kan Inkawm nasa ve hman viau a, heti taka min haw ta mai hi thil hriatsual nasa tak a neih vang a nih ka ring a, rilru tih hrehawm nan hmang lemlo mah ila hun remchang a awm velah sawipui tho erawh ka tum ruh viau.




Ka nu chu thawhtanah clinic ah ka hruai leh a, doctor in a check chuan typhoid a nih thu min hrilh a, a damdawi ei lai thenkhatte chu thlaksak in a dang min chawh belh nual bawk a, hahdam taka awm turin a chah uluk viau bawk.


Damdawite kan thlaka theih ang anga kan in enkawl hnu chuan a ziaawm ve hret hret a, khawsik pawh a nei tawh ngai meuhlo a tih theih.


Inchhunga awm ngawt ngawt chu a ning ve thin bawk nen tlai lamah kan veng chhung chu ke in ka kal kualpui thin a, thian kawm hmanin khawsa lo mah ila nu te bulah chuan a lo tlei theih khawp a, awm ve reng mai se ka duh rum rum hial a ni.




Zirtawp ni ah U Mama a rawn chhuk a, ka nu rawn hruai pahin a hnathawhna tur bungraw thenkhat te lei nghal a tum bawk a, a tuk maia haw leh tuma a rawn kal a vangin a lo thlen tlaiah chuan bazar lamah a chhuak leh nghal a, kan buai ve nak nak mai.



Zanah pawh khawiah mah chhuak lovin kan nufa thum chuan inah kan tawm thap a, U Mama chuan a hna lam thil te min sawipuiin in kan sak that theih hun chuan a workshop pawh pindan pahniha then hran a duh thute min hrilh ve luam a, Pathian zara ka hna te ka thawh tluan zel theih chuan ka hminga loan lak ve te pawh a harsa tawh dawn lo va, kan in sak that chu tun dinhmunah chuan kan er ve ber a ni rih a ni.




Zingkarah hma deuhah tho in an bungraw hawn tur te chu counter ah kan thiar chho zung zung a, kan khaw sumo driver hote reng reng hi mi phili leh che zung zung chi vek an nih avangin nghah ngaia awm chu kan hlauh ber a ni thin.




Ka nute nena kan han in vailiam chu engtin emaw hian ka awm a, ka ngaiin ka lung a leng nghal vawng vawng mai.


Kar hnih tha zet kan han awmdun leh a, kan inhmu leh zen zen tawh dawn lo tih kan hre ve ve bawk nen, hnuk a ulh duh ngang mai.




Chumi ni chu thawmhnaw bal thenkhat te su pahin inchhung tihfai nan nileng hun ka hmang ral a, zan lamah pawh ka mu hma khawp mai.



Ka nu te chu tlai dar 4 velah an thleng chho chauh a, kawng laiin a dang rei viau a ni âwm e. A damdawi lei sa te chu ei tha turin kan inchah mawlh mawlh a, hna duh ngang a ni bawk nen a lo thawk leh vak ang tih chu ka hlau ru khawp mai.



Pathianni ah U Mazari rualin inkhawm turin ka kal a, chawhma banah ka haw san leh nghal mai thung.

Nunpuia a la reh vang vang reng a, min lo biak loh bakah inkhawm naah pawh a hmel ka hmulo hrim hrim a, pawi tihna vak pawh ka nei chuanglo.



Ka nun chu a pangngaiin ka hmang pût reng ti ila, thil danglam teh vak thleng a awm hranlo, school kala ka chhuak tih loh chu inkhawm turin ka chhuak leh tawp a, in lamah ka tawm ve rih khawp mai.




Zirtawp tlaia school kan bang chu beisei loh deuhin Rinfeli nen kan inhmu a, a pasal û fanu kan school ah a lo lut ve a ni âwm a, chu chu a rawn lam a nih hmel.



Hmelhriat ta nafam chu han inbiak loh ngawt chi ah ka ngai loh avangin "Naupang i rawn lam a ni maw?" tiin tawi te in ka nuih a, "A nih hi, hetah i thawk tih pawh ka lo hre leh tawh hleinem" a lo ti ve mai a, a naupang hruai tur ber a la rawn chhuahloh vangin keipawh chu ka kal mai biklo.



"Kan inhmu ta sa sa, thil sawi dun lawk ang hmiang" amah râwn deuh chunga ka tih chuan "Sawi dun tur vak a awm em mawni le.. " a lo ti duh chauh a, a ni'n sawi tur neilo mah se keiman ka nei alawm tiin ka kalsan duh chuanglo.




"I thil sawi awmzia kha ka ngaihtuah ngial pawhin ka la hrethiam chuanglo a, diklo deuha inhriat reng chu ka duhlo" ka han ti tawl a, tawngkam thaa sawi fe hram hram ka duh ve tho avangin ka tawngkam pawh ka uluk ve viau a ni.



Tha taka a sawifiah ve mai ka rin laiin "Hriatthiam loh tur thil engmah ka sawilo" a lo ti leh hram a, thawk ka la halh mai.



"Nunpuia nena kan chungchang kha I ngai diklo deuhin ka hria a" ka tih chuan min melh deuh hrak pahin "Ngaih dikloh turin in awm a nih dawn chu" a ti leh hmak a, vei tak chuan aw..



"Rintea nena kan inkar chu engpawh lo ni se lo ngaihtuah ve vak duh lo mai rawh, I unaupa thatna tur I duh tih ka hria a, keipawh in a chhiatna tur thil chu engmah ka tilo ang" ka ti charh charh a, kan bul velah midang an tei ve suau suau reng bawk nen ka tawng ring hranlo.



Ka bul ami chuan min en ran chung hian ngeiawm fe in a nui zui hak a, "A chhiatna tur ka duhlo te chu ti ve lo mai rawh Malsawm, hmangaih tak tak ni la I kalsan tawp lovang" min ti a, a thil sawi vang chuan ka mit sulh a, chhan let ngaihna ka hre lo.




Gate atangin a nau hruai tur ni âwm tak chu a rawn tlan chhuak ve chiah bawk nen, ka tawng ve leh hma chuan min kalsan ta daih a, keichu ka dinna ngaiah ka ding rei khawp mai.



'A thatna tur ka duh' ti reng chung si in ka kalsan a, Rinfeli khan a sawi dik chiah, kei hian ka kalsan a ni.


Khatih hun laia ka rilru nghetlo lutuk leh keimah chpah ka lo in ngaihtuahna khan min vaw let mek a, ka mipa hmangaih em em ka tihnat na te khan min la vaw let mek zel dawn a nih hi.




Kwngpuia Riny leh Aruata te inphur haw turin min rawn koh chuan ka chesawn ve ta chauh a, kan invai liam hnuah keipawh garage lamah ka kal a, rilru erawh a dam mawlhlo a ni.



In ka thlen hnuah pawh ngaihtuahna ah thildang a leng thei meuh lo a, buaina bul ber chu kum 4 liam taa keimah chiah ka lo inhmangaih kha a ni.
Khatih hun laia ka dinhmun kha tu hnenah mah ka sawichhuak ngai lova, ka thiantha ber Rdi hnenah takngial pawh ka sawi ngailo.
Rilru lama ka harsatna tawh zawng zawngte kha hneh harsa ka ti thin a, khatih laia ka mamawh ber nia ka hriat ka bialpa Rintea lah a buai reng a, ngaihsaktu leh ngaihlutu neilo nia ka inhriat na vanga tun hun hi thleng kan ni.





Nu leh pa kiangah nilo, chhungkaw hran hlak kiangah hun ka hmang ve nawk nawk a, sawi chhuak fo lo mah ila hrehawm tih chang ka ngah ve thin.
Ka nu kha ka ngai thin em em a, tawngkam hriat nuamlo leh mei nei deuh deuha ka chenpui ten min biak changte khan tlanbo daih mai ka duh thin a, mahse ka dinhmun ka hrechiang si, khatiang thil atthlak ti tur kha chuan ka huaisenna in a tlin lova, ka tuar a, mahni infuih chungin ka tuar chhuah theih hun ka nghak a, harsa ka van ti thin tak.




Rintea kha ka ngaihzawng mai ni lovin ka thian tha tak a ni a, thil tam tak pawh ka hrilh ve thin. Mahse kan in kar kha hla ta viaua ka hriat avangin a lakah khan zep ka ngah tulh tulh a, thil ho deuh deuh sawia ka biakna te ngaipawimawh em em thin Tu khan thil pawimawh tak ka sawipui dawn pawhin hun a nei ngai ta meuhlo anih kha.
Hriatthiam kha ka duh a, amah hrethiamtu nih kha ka duh thin, mahse chhungkuaa ka dinhmun leh ka thil tawn zozai te vang khan mahni inkhawngaihna ka nei tan a, midang zawng zawngin min ngaihsak loh lai pawha min ngaihsak tlat tura ka beisei leh ka neihchhun berin ka tan hun a neih theih tak lovah kha chuan han beisei leh tur chuang vak pawh ka nei tawhlo.


Stress khan min tibuai nasa a, kan inkar a chhiat ber lai khan psychiatrist ka pan thin tih pawh tun thlengin Rintea chuan a la hrelo ang, hre tur pawhin ka duh chuanglo.


Engkim kha ka thiamloh tih ka pawm thlap a, keimah chauh ka inngaihtuah lai khan Rintea rilru pawh ka tihrehawm ve thin ngawtin ka ring, khati chung khan a ni chuan tawpna siam mai kha a duh lova, thutawp ka siam hnuah pawh a ngena min ngentu zawk chu amah tho kha a ni.


Ka doctor sawi ang khan mahni inhneh thei ni ila hetiang dinhmun hi kan thleng kherlo ang. Midang ni lovin keimah kha inhneh tum tlat ni ila.




Thawk la suai suai chungin ka biang huh chu ka tuai hul a,hun kal tawh, siam that theih tawhloh vanga tah hi a sawt loh zia hre mah ila bansan ngawt zawng a har a ni.




Ka awm a nawmloh êm avangin U Mazari'n chaw eia min sawm pawh Chuan ka hnial ve tlat a, engmah ei ka chak lo a ni.
Eirawng pawh bawl lovin thim hlim atang Chuan ka mu nghal a, mutthilh ka tum lahin ka inlet beidawng thak a, thawnthu te ngaithla a ka beih ngial hnuah pawh ka thei chuanglo.



Khum atang chuan ka thu chhuak leh hluai a, dar zat ka en chuan dar 7 a lo la ri dawn chauh chu niin, zan a rei duh dawn khawp mai.




Rintea chu ka be mai dawn em mawni tiin ngaihtuahna ka nei a, mahse min lo biak loh laia han biak hmasak chu hreh tak te in ka hreh a, kan tawpna kha keimah vang a ni tih ka hriatchhuah nawn leh vangte pawh a ni mai thei, a lakah chuan a hma zawng aiin ka inthlahrung leh zual a ni.




Thawk ipik zeta ka awm reng laiin beisei loh deuhin Rinsangzuala zawk chuan min rawn call thut a, ka inrin aia hma in a phone call chu ka chhang bawk.



"In ah i awm em?" a rawn tih chuan ka awm thu in ka lo chhang vat a, ka aw atangin ka mu tih a hriat deuh nge ni "i mu tawh elaw?" a rawn ti leh khauh a, ka hnial rang nasa mai. Ka mut tawh thu ka sawi chuan a rawn len loh ka hlau miau a, ka hnial a ngai alawm.



"Ka la mu lo, ngatinge?" ka tih chuan a ngawi vung vung a, "A.. Lo len kan tum deuh a" ban charh hian a ti a, a inthlahrung deuh nge mawni.



"Aw lo leng rawh u" ka lo tih tak varah chuan a thianpa te veng atanga an lo tlang nghal tur thu a lo sawi ve thuai a, kan inbiakna kan tih tawp rual chuan ka âwm dawmin ka thaw chhuak ham ham mai.



Tho chhuak vatin ka hmai te chu ka phih a, eng nge maw ka hriat ni, kan inngaihzawn lai zawng pawha ti ngailo khan lan mawiloh hlauin ka hmai te chu uluk deuhin ka chei a, langsar deuha inchei vak erawh ka hlau khawp mai.
A mitah chuan lan mawiloh ka hlau a, eng angin nge min hmuh hreh hauhlo mah ila mawi taka lan chu ka duh a ni tawp mai.




An lo thlen chuan ka lo inpeihfel hman ve chiah a, Richarda nen bawk khan an ni.
An vawi khat rawn lenna anih tawhloh avangin Richarda pawh chu a rawn ri lut nghal phawr phawr a, ukulele an rawn keng tel tat bawk.



"Zai a rem ang tiraw Sawmi?" tia Châta'n min zawh chuan "Rem tho e.. Mahse dar 10 hnu lamah chuan a chi vaklo ang, inchungah khian naute a awm a" ka lo ti ve mai a, Rintea chu an lo thlen atangin a la tawng ve mang meuhlo.



"Thingpui ka lum nghal dawm em?" tia ka bula thu ka en chuan a dar lo kan akin "I tih dan dan" a lo ti mai a, hepa awmdan hi a mak riauin ka hria, hlim lohna nei a ang tlat.




Richarda lah chuan chaw ei dawhkan bawhin a hla sak tur a la zawng kual chhen a, choka lamah thingpui lum turin ka kalsan ta bawk.



Thingpui no chawia ka let leh chuan an pahnihin thutthlengsei ah an lo thu dun tawh a, Rintea zawkin ukulele chu a lo pawm ran tawh bawk.




An thutna bula thingpui no dah pah chuan "Zai tawh ula" tiin ka nui a, "Hepa hi a bawn dawn ania aw Sawmi, recording kan ti mek a, kum thar lamah chuan music video kan lo tichhuak zung zung ang" a lo ti leh nghal phawr phawr a, phawk deuha Rintea ka en ha lai chuan a thianpa chu a lo nghawk sawk a, zak hmel a pu deuhin ka hria.

Music ngaina viau e tilo chuan a zai ngai meuhlo a, kan inzui lai khan zai turin ka ngen lui thin a, mut dawnah te min zaisak ve leh zauh thin. Zai thiam lo han tih ngawt tur chu a ni bik lo va, mahse amah hian zai a tuiloh bakah a ngaina lo ve hrim hrim niin ka hria.



"Chu... Milar a la ni thuai dawn a ni maw?" tia ka nuih lai chuan a ni pawh tawi te in a lo nui ve a, a thianpa in zai turin a lo ti ve chhen bawk nen a thutdan chu siam rem sut sutin,
"Tawi te chauh aw" a ti sup a, a engamah hmain a aw te chu pa riau hian ka hria a, zanin chu amah hrim hrim hi a cool raih ni maiin ka hria.




Thawk a han la vang vang a, a hla sak chu ka hre ngai lo,

'Piallei thima ka zal hnuah pawh,
Ka taksa te rawpin ral vek mah sela,
Nang ka hmangaihna che erawhin,
Kumkhua leh chatuan a daih tawh ang'



A hla thu chu ngun deuhin ka lo ngaithla a, a zai ring hranlo, a aw zawi leh dam ruih chuan mawi deuhin a sa chhuak a, chu hla thu tawite chuan min hneh a ni.








Cont......
Show post links
Top