STORYFB.COM

Chapter 13

A sawi ang ngeiin hotel a thawk te chuan eitur an rawn ken dawnah Julianne chu an call hmasa a, pawnah an ding reng tawh a ni

"Mister Starck a'n McAllister chu hotel ah a awm tawh lo tih hrilh tur che in min tir a ni" hotel a hnathawk chuan a ti a

Julianne pawh a thaw huai mai. Jail tang ang maia room chhunga inkhung reng kha a ning ve tawh bawk a ni

Eitur an rawn nawr luh a han hmu chiah chu tam a ti ngei mai

"A tam lutuk. Tinge in rawn ken teuh duh zawk mai le?" Menu a lang zawng zawng chu a kim deuh vek. Sangha, arsa, bawngsa, thlai leh a sehhmeh bakah in tur chi hrang hrang wine thlengin a kim vek

"Mister Starck a'n hotel a i awm chhung chu a tha thei ang bera enkawl tur che in min chah a"

"Awle ka lawm e"

Thil ei pahin chanchinthar a bih pah a, thlipui chu a la thawk tan chauh tih an lo puang a, a tuk leh pawh a la that hmel lo tlat. Julianne awm a nuam tawh lo. Haw theih thuai a chak tawh. Jared a ngai tawh a, Jin Starck nena boruak khat hip dun reng chu nuam a ti thei lo

Jin a'n Patrick lak atanga a rawn chhanchhuak kha chu a lawm a, mahse thiltih tum nei tlat anga a awm chu a hua. Phuba lak tum te pawh ang dawnin a hria

Starck Corp roluahtu a ni a, sumdawnna lian tak a enkawl bawk. Pakhatna ah a inhlan kai theih na tur a nih chuan a hmangaih miah lo pawh nupui ah neih a hreh dawn lo tih a chiang

Engtin nge engkim kalsana a kianga a awm theih kha a lo inrin zawk le?

Julianne pawh mi hausa fanu a lo ni ve tawh thin a, mahse an chhungkaw sumdawnna chu a hriatpui ve ngai lem lo

Tunah phei chuan engmah lo mai a ni tawh. Pawisa emaw ama pual bik neih a nei lo. Patrick khan a lo sawi dik maithei. Hlutna a nei lova, mi hausa te tan pawh iai mai awl tak tur a ni

'A pawi lo, mipa ka mamawh lo. Jared hi ka tan a tawk. Jin Starck leh Patrick McAllister chu duh leh thlawk bo vang vang rawh se'

Julianne chu a inhnawhpuar hnu in a muhil a, a han harh chuan zanlai a lo ni tep tawh. Ruah a lo han tawh a, mahse la sur leh maithei tur angin a awm

A ril a tam ve leh tan a, hotel a thawkte koh a tum buai tawh lo. Restaurant a ei mai chu fuh zawkin a hria

Jin Starck a'n a hnuaia thawk te hmuh lai chuan a tihbuai duh a inring bik lova, a tan pawh a him phian ang

Kekawr var, kawrlum phiar leh a chungah coat a ha a, a sam a tawn sang vah. Room chu a chhuahsan a, restaurant an la khar loh hram a beisei

Adrienne khan a sawi dik a ni. Hotel hi a changkang lutuk ringawt. A te lova, a lian bawk hek lo. A nuam tawk chiah

Julianne hian inchhung chei a tui thei lutuk. A hun hmasa lamah khan ama chei ngei hmunah chen ve a chak thin. Mahse chu kawng chu zawh a rem tawh rih lo. Bultan nan sum tam tham tak a ngai dawn a, a nei mai si lo a ni. Tuna a hnathawh mek pawh hi Jared a tan vek a ni

Thei leh thingpui a in zawh hnu chuan hotel chu la fan kual rih a duh a, mikhual dang te nen an insulpel zut zut bawk. Bar atanga rawn chhuak te leh Cafe a awm mek te an ni hlawm. Piano tum ngaithlaa titi bawrh bawrh te an ni a, an vaiin thli tleh chuan a dang rual thup mai a ni

Julianne chu a han vak kual thui deuh a, inchhung dung ah hian lemziah an lo tar chuai a, rawng chi hrang hrang te chu a mit la tak vek an ni. Kut themthiam tak sulhnu tih a hriat lutuk. A ziaktu tur pawh a hre nghal mai

'Jin Starck hian lemziah a lo thiam tak hle mai'

A fapa hian a pa a chhun ang em tih te a ngaihtuah vel mai mai a

Bathlar kawngka ep lamah chuan huan lemziah thla in a kah hi a hmu a, pangpar te chu an eng thup a, glass house a laiah tak a awm bawk. A tak a ang lutuk bawk nen a mit a la nghal chat mai. A va kal hnai a, lemziah mawng kilah chuan 'Jas' tih a lo inchhu kalh mai

A mit chhing vang vangin an intawn tirh lai a ngaihtuah let a

Jas Mathieu

Tu es ravissante...

J'adore...

Je cherirai ce moment pour toujours...

Restez avec Moi...

A mittui a rawn luang a

'Hun hi her let leh thei ila aw. Jas nen hlim takin kan awm dun reng thei dawn asin le'

Mahse a kianga let leh chu thil theih loh tluk a ni. Tunah chuan midang hlak a ni tawh si a, a hmangaih thin kha chuan thil ho te a lawmin a mizia a ngainatawm hle a nih kha

Billionaire hmangaihna pawh ring thei lo ah a chhuak tawh. A rilru luahtu ber chu sumdawnna leh hotel than chhoh zel dan tur ngaihtuah chauh a ni tawh

Julianne chu a tah a chhuah em avangin lemziah chu a kalsan daih. A inher laiin pawn bathlar kawngka a va hmu tak tak. A mittui tling pam kar atangin kawngka chu a hawng a, pawnah a chhuak ta. Ruah a han tawh a, thla a eng viau mai. Tek erawh a la tla reng tho

Patrick McAllister a'n chhuna a tihbuai te kha a hrechhuak leh a, Jin Starck a'n rawn chhan lo se chu a chan a chhe dawn hle tih pawh a hrethiam vek. Justin leh Gian a'n a phuba an laksak dawn tih chu a hrechiang viau lawi a

Jin a thusawi kha a hrechhuak leh a

'I tisual a ni. Ka kiangah awm zawk la tha tur'

Pawisa a neih loh vanga kalsan ah a ngaihtir a, a chhan diktak erawh a dang daih thung

Hum a duh vang zawk a ni. A chhungte thinrim in a nun an tihchhiatsak a hlau a, a duh vang reng ni lova pasal hual a nei kha ama indona a ni, Jin ni lovin. Rethei deuh anga a ngaih lai pawh khan a hmangaih a, cham kha chu a duh ve lutuk alawm. A hmangaih em avang zawkin derthawng taka awm tir a duh lova, a kalsan zawk a ni. A pa in tihchhiat vek a pawisa dawn lo tih a hrechiang em a ni

Jin a'n chu erawh a hre ve lo. Thil hriat loh a ngah mai. McAllister nen an inhmangaih vanga inhual ah a ngai. An induh vang ah a ngai hmak. An mutdun lai pawh khan a la virgin tih a hre lo

'Jared hi a fapa tih pawh a hre lo ania'

Tunah phei chuan mipa mit lak tumah a ngai tlat. A duh apiang neih tum fanu duat sual ah a ngai nghet hmak. Mi thinlung infiamnaa hmang thin ah a ngai tlat bawk

Eng ang pawhin lo ring sual mahse pawi a ti tawh lem lo. Hun liam tawh koh kir theih a ni tawh lo. A mizia a dang vek tawh. A hmangaih Jas Mathieu kha a ni thei ngai dawn lo. Jin Starck a khawvel chu a hran hlak a ni

Hotel atang chuan a chhuk theih a, kailawn hnuai ber chu concrete niin kalkawng awm zelin lemziah a glass house tak tak a pawh a

Thla pawh a lo eng kulh a, van te chu an thiang kuk tawh mai. Arsi te pawh an de chuah chuah a, ruah sur mai tura a rin loh avangin glass house chu enchian tumin a va hnaih a

Step tawp ber zawh ah chuan a kuangkuah hlan a, glass house a hnaih telh telh a, mawi a va ti tak

Pawn atang chuan thing hring in a hual vel a, a chhung a hmu thei chiah lo. Kawngka ban vawn chu a han herh a, a lo inkalh lo hlauh. A chhung pawh chu mawi tak a ni

Huan zau tak ang mai hi a ni. Rose kung te pawh an lo vul chhuai a, a len zawng a inang lovin rawng chi hrang hrang a ni

A boruak pawh a nuam tawk chiah. Glass ceiling ah chuan eng fim a kal phei zul a, dumde a ang reuh lutuk. Hmun dang pawh a en vek

Glass house chu pawn atanga a lan ai ngawt chuan a lian daih zawk. Thingkung lian tak tak an phun chuan pawn lam a hliah vek a, a him reuh phian mai

A kil tawp ah theuh chuan tuikhuah hi an dah a, a hmun chu a tidai dup mai

A hmun laitak ah chuan sofa var hlai tak mai hi a inhung a, khum tiat lawih a ni. Julianne chuan chu lai hmuna zal der der a van thengreng zau tak mai han thlir vawng vawng mai chu nuam dawn hle in a hria

Sofa sir ah chuan khawnvar eng an chhi ve ve a, Julianne chu a han hawi kual leh deuh a, glass bottle hi a lo intlar dul a, a changkang reuh tawp

A naupan deuh lai khan a tuipui ve thin lutuk. Room ah khan a tlar dul zel a, a lakhawm nasa thei a nih kha

Vanduaithlak tak maiin a lakhawm thei tawh lo. A hun kal tawh hriatrengna mai a ni ta

A mittui a rawn luang ngiai ngiai a, a duhthlanna ah erawh a inchhir lem lo. Hriatchhuah chang a awm lo thei lo a ni

Huan chu fan kual a tum leh lai takin a hnungah ruangam ding a hmu a

"Lalpa le! Min tihlau hman alawm le!"

Jin Starck chu zawimuangin a rawn kal hnai a, engtia rei nge a lo din ang tih pawh a hrethiam pha lo

"Thli a la na dawn chauh. Nangmaha pawna chhuak tur i ni lo asin"

"Engtin nge i hriat? Camera atang min lo enthla em ni?"

Jin a'n a chhang lo

"Aw i tihna ah ka ngai" a ti zawi sap a

"Engtin nge helai hmun hi i rawn hmuh theih?"

"Ka hawi kual a, a mawi khawp mai"

"Ka lawm e...helai hmun hi i rawn hmu hman chu i vannei hle mai. An tichhe tep tawh ang"

"Eng a? Tinge?" Mak ti deuhin a zawt a, he hmun mawi lutuk hi tihchhiat tur atan chuan a ui ve thlawt a ni "A mawi em hi tihchhiat chu i duh tak tak lo vang"

"A mal te te in mawle" harhfim tih hriat zetin a tawng a "Kar hnih hnuah an tan ang"

"Tinge? A uiawm dawn e"

"Nangmah chauh kha thu kha sawi i ni hleinem. Mahse rilru ka siam vek tawh"

"A chhan tur awmang ka hre lo reng reng. He glass huan hi ka hmuh tawhah chuan a la mawi ber ang. Hotel a mikhual te pawhin ka ngaihdan hi an tawm vek ang"

"Tawm vek e. Mahse pawi ka ti lo. Chhan neiin ka din a, mahse rin ang a lo ni leh si lova, chuvang chuan awmzia a awm lo" a aw ki ah chuan phum ruk nei ang maiin a hriam hrak a

Julianne chu a thaw halh a, Jin Starck a rilru natna leh thinurna nasa tak avangin huan pawisawi lo ber chuan a tuar phah ve dawn ta mai chu a ni si a

"Hei chauh hi thil mawi tak i tihchhiat awmchhun a nih ka ring lo" a ti chhuak sap a

"Nang zawk Arabella! Kei chauh hi hming lem i hrilh chhun ka ni lo vang tiraw?"

"I en liam ve mai mai thei lo em ni?" a thaw halh. A thinrim ve hle na a, a awki erawh a san lem lo. Jin chuan a rawn chhuk en avangin a thinrim tih a hre mai

"Engtikah emaw ka la en liam ve thei mahna" Julianne rin loh lutukin a rawn nui a "Ngaihtuah nei lo ang maia i awm ai chuan i rawn thinrim pawh kha a tha zawk. I chungah hian eng nge thleng ta le?"

Julianne chu a laih deuh avangin a hawisawn daih "I lo buai a ngai lo" a ti hmak. A rilru diktak hriattir chu a tum lo bur mai

Jin chu a rawn thaw halh a "Kha a ngaiah bawk i let leh ania. Thinlung nei lo ang maiin i awm leh tawh ania. Kan intawn lai kha chuan chhimbal leh pangpar ang mai kha i ni thin a, he huan ang mai hian i nung sarh reng thin a nih kha"

"Nang pawh kan intawn tirh lai khan angel ang mai i ni thin a, tunah erawh ramhuai i ang ber tawh zawk"

Jin chuan mitko a san a, Julianne sawi dan chu a duh vak lo a ni maithei "I tawngkam hman kha fimkhur hle rawh. I sawi ang chiahin ka awm thei reng ania. Ka tawntir mai tur che asin Ma belle"

Julianne chuan a melh chho vah a "I hnaiha awm te ho hian misual takah an ngai vek che a nih hi. I hming ang chiahin Jinn angin an hmu vek che a nih hi"

Jin chu a khi suk a "Tu thiam loh nge ni a i rin?"

"Mawh min phurh tir i tum mah mah lo maw Mister Starck?"

'Ka kalsan lai khan a rilru a lo na viau em ni le? Jin Starck ania, na a hre ve thei dawn em maw ni?'

A rin loh lutuk in Jin chu a ngawi daih. A chhan loh danah a dik a ni ngei ang

'Thinlung keh angin insawi mahse a ni tak tak meuh ang em le?'

Reilote chhung chu an ngawi dun reng a, tuikhuah rawn inkhawh ri chu a ring telh telh. Zia a ti phian mai chuti ni lo se chu a thin phu ri hi a ring dawn lutuk

'A thin te hi a phu ve ang em le? Thinlung a neih loh chuan phu tur a awm lo vang a'

"Ka kal tawh ang e" a ti zawi sap a

Jin pawhin lu a lo bu nghut a

A kal pelh hnu chuan a rawn zui ve zel a, an inkar boruak rit lutuk vang chuan a tlu tawp thei dawn hialin a inhria. A bul hnaia a awm hian insum har a ti thin. Jin Starck hian heti khawp hian amah ah nghawng a nei na a ni

Kawngka lam a pan a, Jin khan a rawn luhin kawngka a khar phui lova, pawnah thli a rawn na leh thut a, van te pawh chu a dur leh khuih tawh mai. Thli a rawn insiam leh tan a

Chutah thlipui rawn tleh thut chuan kawngka chu a rawn khar chilh hmak. Glass huana current pawh a thim daih. Chutih rual chiah chuan khawpui rawn ri dur dur in tek a rawn tla a, Julianne pawh a te that mai

Jin chuan a tangah a bei tir a

"I tha em?"

Julianne chuan thawk a la halh a, eng chhete rawn lut karah chuan Jin a hmaifang tha tak chu a hmuh hmaih thei lo

"I tha em, Ma belle?" Jin a'n a rawn zawt nawn leh a

Ian pawh chuan lu a lo bu nghat a

A kut ah rawn kaiin kawngka lam a pan pui leh a, hotel ah pawh chuan current a thim vek tih a va hmu a

"Current a thim" tih pahin Jin chuan kawngka hawn a tum a, mahse a thei tlat lo

"Mai mai chuan le" a ti sup a, Julianne chu thlahin theihtawpin a han nam leh a, engtin mah a awm eih lo

"Eng nge a?"

"Kawngka banvawn hi a tang tlat. Inchhung atang ka hawng thei lo"

"I ti tak tak em ni?"

"Aih. Fiamthu a nih kha" za lo deuha nui hul hakin a kekawr ipte chu a zen a, phone a phawrh a "Lehzel chuan a!"

"Eng nge?"

"Khaw chhung pawh a thim vek aniang. Signal ka nei thei lo. I phone kha han check teh" Jin a'n a ti a

Julianne chuan a lu thing in "Room ah ka dah daih alawm" a ti a

"A va tha ve!" Jin a'n mei nei deuhin a ti sup a, Julianne chu room sir ah a kai a, telephone a lo awm a, a hman theih ringin a lek kang a, mahse line a lo chiang bik lova

Julianne chuan a ngaihna hriat loh hmel zetin a ka hau a, Jin a'n a rawn thlek vang vang a

"Eng nge?"

"I inthuam lum chiah maw?"

"Aw, tinge?"

"A chhan chu hetah hian kan la awm rei deuh a ngaih hmel tlat"

"I fiamthu a ni ang" awih lo lutuk in a han ti leh ringawt a

"Aw, fiamthu ni e" Jin a'n tiin a hui leh pap a, phone chu a han bih leh a "Current awm hun kan nghah mai a ngai"

"Generator i nei lo em ni?"

A sawi zawh rualin hotel chu a rawn eng pup a

"Kar hmasa khan Generator ka sut tir vek alawm"

"Tinge chutia i tih a?"

"Ka hre bik nang. Helai hmun tihchhiat ka tum vangin ka sut a, tu in nge kan tang dawn tih hre bik ang? Nidangah chuan ka thil hriat lawk theihna hi ka lo chher hriam tawh dawn nia"

"Duhtawk tawh teh a"

"A eng chu maw?"

"Min tilui tawh suh!" Huan lai taka sofa hunna lam panin a pheikhawk sang nen chuan a pen ri thlek thlek a, a thut rual chiahin a dup nawm zia a pawh nghal thuai a

Jin pawh a rawn kal hnai ve zel

"Eitur i duh em?"

Julianne chuan lu a thing a "In tur ka lo duh ang"

"Ahh...ruih chi nge ruih loh chi i duh?"

"Chu chu a pawimawh kher em ni?"

"Hnung lamah sawn bar a awm a, tui leh wine ka nei"

Julianne chu sofa atang rawn ding hluaiin a dak chho vah a "Ka chungah hian fel i tum dawn em?"

"Eng a? Ti maw?"

"Heta kan tan chhung chu ka chungah that chhuah rih rawh aw"

Jin chu a thaw halh a "Awle, tehreng mai Ma'am"

Julianne chuan a melh leh kawr kawr a "Chuan min rawn fawp tawh lo turin i intiam thei ang em?"

"Ha Ha!" a ti hul hak a, Julianne i'n mitko a san a, Jin chuan "I thutak em ni?" a ti a

"Thutak chiang e a"

"A nih chuan Aih...!"

"Eng chu..." rawn hnial leh a tum lai takin Jin chuan a rawn fawp a

Jin Starck hi nunrawn hmel viau thin mahse a fawhna hmui hi chu a dam dup thin. A nem em em zel mai a ni. A rawn thlah leh thut a, Julianne chu a hamhaih zo leh vek

"Ka tiam thei lo che" a hmui chhanah a rawn ti a, a tawlh hnung leh daih. A ban a rawn pe a "Min lo zui rawh"

CHHUNZAWM LEH TUR
PS:ZANIN ATAN CHUAN KA DUHTAWK PHAWT MAI ANG. NAKTUKAH KA RAWN ZAWM LEH MAI DAWN NIA